ព្រះរាជពិធីបដិបត្តិសមាធិនេះ ត្រូវបានរៀបចំដោយ ក្រសួងធម្មការ និងសាសនា សហការជាមួយ គណៈកម្មការ រៀបចំព្រះរាជពិធីបុណ្យថ្វាយព្រះបរមសពសម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេច ព្រះមហាសង្ឃរាជនៃព្រះរាជាណាចក្រកម្ពុជា។

ព្រះរាជពិធីបដិបត្តិសមាធិនេះបានការនិមន្ដ និងអញ្ជើញចូលរួមពីព្រះសង្ឃគ្រប់ឋានានុក្រម រួមមាន៖ សម្ដេច ព្រះពោធិវ័ង្សកិត្តិបណ្ឌិត អំ លីមហេង ព្រះសង្ឃនាយកស្តីទី នៃព្រះរាជាណាចក្រកម្ពុជា, សម្តេចព្រះវនរ័ត កិត្តិបណ្ឌិត ណយ ច្រឹក សម្ដេច សង្ឃនាយករងទី២, សម្តេចព្រះឧត្តមវង្សាគតិបណ្ឌិត មួង រ៉ា សម្តេចព្រះសង្ឃ នាយករងទី ៣, សម្តេចព្រះឧត្តមបញ្ញា ដូង ផង់ ព្រះអនុប្រធានថេរសភា នៃព្រះពុទ្ធសាសនា, សម្តេចព្រះ ឧត្តមចរិយា ឈឹង ប៊ុនឈា ព្រះអនុប្រធានថេរសភា នៃព្រះពុទ្ធសាសនា, សម្តេចព្រះឧត្តមមុនី ជា សំអាង សមាជិក ថេរសភា នៃព្រះពុទ្ធសាសនា, សម្តេចព្រះពុទ្ធជ័យមុនីបណ្ឌិត ឃឹម សន ព្រះចតុម្មុខមង្គលរង្សី ព្រះមេ គណរាជធានីភ្នំពេញ, សម្ដេចព្រះសាក្យមុនី កិត្តិបណ្ឌិតទស្សនវិជ្ជា រ័ត្ន សារឿន អនុប្រធានថេរសភា ពុទ្ធសាសនា កម្ពុជា, សម្តេចព្រះមហាអរិយវង្សបណ្ឌិត យ៉ន សេងយៀត អនុប្រធានលេខាធិការដ្ឋានគណៈសង្ឃនាយក, សម្តេច ព្រះមង្គលមុនីរង្សី ហ៊ូ ឈីវនាថ អនុប្រធានអចិន្រ្តយ៍លេខាធិការដ្ឋានគណៈសង្ឃនាយក ,ព្រះថេរានុថេរ គ្រប់ព្រះអង្គ, និងប្រជាពុទ្ធបរិស័ទប្រមាណ១០០០០អង្គ/នាក់ ដែលនិមន្តនិងអញ្ជើញមកពីរាជធានី-ខេត្ត ទាំង២៥ ។

ស្របជាមួយព្រឹត្ដិការណ៍នេះដែរ លោកសាស្រ្ដាចារ្យ ប្រាក់ សម្ជស្ស នៅលើបណ្ដាញសង្គមផ្ទាល់ខ្លួន បានឱ្យ ដឹង ផងដែរថា ព្រះរាជពិធីបដិបត្តិសមាធិ ក្នុងឱកាសដែលពុទ្ធបរិស័ទបានជួបនឹងព្រះសមណដ៏ច្រើនអង្គបែបនេះ (៥,០០០ព្រះអង្គ) ជាកិច្ចការមង្គល ដោយចំណេញជាផល៣យ៉ាងធំៗ មានដូចជា៖

ទី១, បានបណ្តុះសទ្ធាតាមរយៈការមើលឃើញនូវ ឥន្ទ្រីយ៍សំវរៈរបស់ព្រះភិក្ខុសង្ឃ ប្រកបដោយសីលាទិគុណ ដ៏ប្រសើរ ដែលនិមន្តមកពីគ្រប់ទិសទី អាចបំពេញនូវភេសជ្ជទានចំពោះព្រះភិក្ខុសង្ឃដោយឥតរើសបុគ្គល ឬ គណៈនោះឡើយ។

ទី២, បានសមាទានសីល និងពិធីវន្ទាទ្រង់ទ្រាយធំជាមួយនឹងព្រះភិក្ខុសង្ឃ បូករួមទំាងការទទួលកិច្ចប្រតិបត្តិ សមាធិមួយខណៈ (ខណិកសមាធិ) ដែលដឹកនំាដោយផ្ទាល់ពីសំណាក់ ព្រះសង្ឃមានចំនួនច្រើន ព្រះអង្គ ក្នុង ពេលតែមួយដូចគ្នា។

ទី៣, មានឱកាសបានផ្សាយនូវបុណ្យ និងឧទ្ទិសព្រះមហាកុសលដែលកើតចេញពីកិច្ចសមាទានសីល និង នមស្សការព្រះរតនត្រ័យ រួមទំាងកិច្ចប្រតិបត្តិសមាធិថ្វាយប្រគេនដល់ព្រះវិញ្ញាណក្ខន្ធ សម្តេចព្រះអគ្គមហា សង្ឃ រាជាធិបតីកិត្តិឧទ្ទេសបណ្ឌិត ទេព វង្ស មួយផ្នែក និងឧទ្ទិសដល់បុព្វការីជនទំាងអស់មួយផ្នែក បូករួមទំាងឧទ្ទិស ដល់សព្វ សត្តនិករទំាងអស់ក្នុងលោកសូមសុខចម្រើន កុំមានពៀរវេរានឹងគ្នាផងដែរ។

សូមជម្រាបជូនថា សម្ដេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្ដេចព្រះមហាសង្ឃរាជ នៃព្រះរាជាណាចក្រកម្ពុជា និងជាសម្ដេចព្រះចៅអធិការវត្តឧណ្ណាលោម រាជធានីភ្នំពេញ បានយាងចូលព្រះទិវង្គត នាថ្ងៃចន្ទ ទី២៦ ខែកុម្ភៈ ឆ្នាំ២០២៤ វេលាម៉ោង ០៥ និង៤០នាទីល្ងាច ក្នុងព្រះជន្ម ៩៣ព្រះវស្សា ដោយព្រះរោគាពាធ នៅក្នុងវត្តឧណ្ណាលោម សង្កាត់ជ័យជំនះ ខណ្ឌដូនពេញ រាជធានីភ្នំពេញ។ ព្រះរាជពិធីថ្វាយព្រះភ្លើងនឹងធ្វើឡើង នៅថ្ងៃចន្ទ ទី៣ ខែមិថុនា ឆ្នាំ២០២៤ វេលាម៉ោង០៦:០០នាទីព្រឹក៕

The post ព្រះសង្ឃ៥០០០អង្គ និងពុទ្ធបរិស័ទរាប់ពាន់នាក់ បដិបត្តិសមាធិ ក្រោមដំណក់ទឹកភ្លៀង ដើម្បីឧទ្ទិសព្រះរាជមហាកុសល ថ្វាយសម្ដេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស appeared first on .