វិបត្តិចំណីអាហារ

UN៖ វិបត្តិកង្វះចំណីអាហារនៅអាហ្វ្រិក កំពុងបង្កការបារម្ភជាខ្លាំងសម្រាប់ពិភពលោក

ឧកញ៉ាសំពៅ — Fri, 28 Apr 2023 03:42:26 +0000

អត្រាអ្នកស្លាប់ដោយសារកង្វះចំណីអាហារនៅអាហ្វ្រិក កំពុងមានការកើនឡើងខ្លាំង ដ្បិតគ្រោះរាំងស្ងួតក៏មានសភាពយ៉ាប់យ៉ឺន ដោយសារបម្រែបម្រួលអាកាសធាតុ និងកត្តាមួយចំនួន។ នេះបើតាមរបាយការណ៍ចេញផ្សាយដោយអង្គការសហប្រជាជាតិ និងអង្គការក្រៅរដ្ឋាភិបាលជាច្រើន។

យោងតាមការចុះផ្សាយពី CNA បានបង្ហាញថា ទ្វីបអាហ្វ្រិកកំពុងជួបប្រទះនឹងវិបត្តិកង្វះចំណីអាហារធ្ងន់ធ្ងរ ដ្បិតនៅប្រទេស Ethiopia, កេនយ៉ា និងសូម៉ាលី មានអត្រាអ្នកស្លាប់ដោយសារភាពអត់ឃ្លាន រៀងរាល់ ៣៦វិនាទីម្ដង។ នេះបើតាមរបាយការណ៍ពី UNICEF, NGOs Care និង Oxfam បានប្រាប់សន្និសិទសារព័ត៌មាន។

ដោយឡែក UN ក៏បានទម្លាយថា នៅភាគខាងកើតបំផុតនៃតំបន់អាហ្វ្រិក មានភ្លៀងធ្លាក់ ៥រដូវកាលជាប់ៗគ្នា ប៉ុន្តែវាតិចខ្លាំង និងបានសម្លាប់សត្វគោរាប់លានក្បាល និងបំផ្លាញការប្រមូលផលដំណាំ។

បញ្ហាមួយនេះក៏បានធ្វើឲ្យមនុស្សប្រមាណ ២២លាននាក់ ជួបប្រទះនឹងបញ្ហាភាពអត់ឃ្លាននៅប្រទេស Ethiopia, កេនយ៉ា និងសូម៉ាលី ខណៈសូម៉ាលីបច្ចុប្បន្នកំពុងប្រឈម នឹងការបះបោរពីប្រជាជនឥស្លាមផង៕

The post UN៖ វិបត្តិកង្វះចំណីអាហារនៅអាហ្វ្រិក កំពុងបង្កការបារម្ភជាខ្លាំងសម្រាប់ពិភពលោក appeared first on .

IMF ទម្លាយថា ប្រទេសប្រហែល ២០ អាចស្នើសុំជំនួយទាក់ទងនឹងវិបត្តិស្បៀងអាហារ

ឧកញ៉ាសំពៅ — Tue, 04 Oct 2022 06:38:59 +0000

វិបត្តិកង្វះខាតអាហារ នៅតែជាបញ្ហាចំបងមួយដែលពិភពលោកកំពុងជួបប្រទះ ហើយក្នុងនោះមន្ត្រីជាន់ខ្ពស់នៃស្ថាប័នមូលនិធិរូបិយវត្ថុអន្តរជាតិហៅកាត់ IMF ទម្លាយថា ៤៨ ប្រទេសទូទាំងសកលលោកកំពុងប្រឈមនឹងបញ្ហាមួយនេះជាទំងន់។

ក្នុងចំណោមប្រទេសទាំង ៤៨ នោះ ទ្វីបអាហ្វ្រិក និងនៅតំបន់អារ៉ាប់ហាក់ប្រឈមខ្លាំងជាងគេ ដ្បិតនៅរបាយការណ៍ពី IMF បានបង្ហាញថា ប្រជាជនច្រើនជាង ១៤០ លាននាក់នៅអារ៉ាប់កំពុងជួបប្រទះវិបត្តិអសន្តិសុខអាហារ។

ឆ្លើយតបនឹងបញ្ហាមួយនេះ លោកស្រី Kristalina Georgieva ប្រធានផ្នែកគ្រប់គ្រងនៃ IMF បានបង្ហើបថា IMF នឹងជួយជាជំនួយស្បៀងអាហារដល់ប្រទេសប្រហែល ២០ ដែលភាគច្រើននៅទ្វីបអាហ្វ្រិក។

“ក្នុងចំណោមប្រទេសទាំង ៤៨ ប្រហែលមាន ១០-២០ ប្រទេស នឹងសុំជំនួយលើផ្នែកស្បៀងអាហារបន្ទាន់ ហើយពួកយើងគឺបានត្រៀមជាស្រេចសម្រាប់បញ្ហាមួយនេះ”។ នេះបើតាមសម្ដីរបស់លោកស្រី Georgieva បាននិយាយ៕

The post IMF ទម្លាយថា ប្រទេសប្រហែល ២០ អាចស្នើសុំជំនួយទាក់ទងនឹងវិបត្តិស្បៀងអាហារ appeared first on .

UN៖ ការឡើងថ្លៃទំនិញ ជាហេតុផលចំបងអាចបង្កឲ្យកើតជាវិបត្តិចំណីអាហារ

ឧកញ៉ាសំពៅ — Tue, 27 Sep 2022 05:49:00 +0000

តម្លៃទំនិញនៅតែបន្តឡើងថ្លៃឥតឈប់ឈរ តាំងពីរុស្ស៊ីបើកការវាយប្រហារលើប្រទេសអ៊ុយក្រែន ស្របពេលបម្រែបម្រួលអាកាសធាតុថែមទៀត វារឹតតែធ្វើឲ្យសង្វាក់ផ្គត់ផ្គង់អាហារលើទីផ្សារមានការរាំងស្ទះ។

ទាក់ទងនឹងបញ្ហាមួយនេះ អ្នកជំនាញជាច្រើនសុទ្ធតែបង្ហាញក្ដីបារម្ភថា វិបត្តិកង្វះចំណីអាហារជាសកលនឹងអាចកើតមានឡើង បើសិនជាសង្វាក់ផ្គត់ផ្គង់ចំណីអាហារនៅតែបង្ហាញសញ្ញាអវិជ្ជមាន។

ដោយឡែក យោងតាមទិន្នន័យអង្គការស្បៀងអាហារ និងកសិកម្មរបស់អង្គការសហប្រជាជាតិបានឲ្យដឹងថា ការឡើងថ្លៃអាហារអាចជាហេតុផលចំបងមួយដែលបង្កឲ្យកើតជាវិបត្តិកង្វះចំណីអាហារ ស្របពេលការផ្គត់ផ្គង់គឺមិនខ្វះឡើយ។

នេះក៏មានន័យថា បើសិនជាទំនិញនៅតែបន្តឡើងថ្លៃ នោះប្រជាជនមានកម្រិតជីវភាពក្រីក្រនឹងជួបប្រទះវិបត្តិកង្វះចំណីអាហារ ស្របពេលអ្នកមានគឺនៅតែសំបូរហូរហៀរដដែល។ តួយ៉ាងតម្លៃអាហារបានបន្តឡើងថ្លៃ ១៣% នៅខែកក្កដា បើធៀបនឹងឆ្នាំទៅ ស្របពេល UN សន្និដ្ឋានថា តម្លៃអាហារសកលនឹងបន្តឡើងថ្លៃ ៨,៥% នៅឆ្នាំ ២០២៧។

សូមជម្រាបដែរថា មានកត្តាជាច្រើនដែលធ្វើឲ្យតម្លៃអាហារឡើងថ្លៃ ហើយក្នុងនោះការឡើងថ្លៃជីដែលនាំចេញពីរុស្ស៊ី គឺជាហេតុផលសំខាន់មួយ ដ្បិតមហាអំណាចមួយនេះជាអ្នកផ្គត់ផ្គង់ជីធំបំផុតមួយលើលោក៕

The post UN៖ ការឡើងថ្លៃទំនិញ ជាហេតុផលចំបងអាចបង្កឲ្យកើតជាវិបត្តិចំណីអាហារ appeared first on .

អត្រាប្រជាជនប្រឈមនឹងអសន្តិសុខស្បៀងអាហារ កើនច្រើនគួរឲ្យបារម្ភនៅឆ្នាំ ២០២២

ឧកញ៉ាសំពៅ — Thu, 25 Aug 2022 13:52:00 +0000

ចំនួនប្រជាជនដែលកំពុងប្រឈមនឹងអសន្តិសុខស្បៀងអាហារធ្ងន់ធ្ងរទូទាំងពិភពលោកបានកើនដល់ចំណុចគួរឲ្យបារម្ភ ពោលគឺកើនឡើងលើសទ្វេដងបើធៀបនឹងឆ្នាំ ២០១៩ ដល់ទៅ ៣៤៥ លាននាក់។ នេះបើតាមទិន្នន័យផ្ដល់ឲ្យដោយកម្មវិធីស្បៀងអាហារពិភពលោក WFP។

មុនមានការរាតត្បាតជំងឺកូវីដ ១៩ ប្រជាជនប្រមាណ ១៣៥ លាននាក់គឺបានជួបប្រទះនឹងបញ្ហាកង្វះស្បៀងអាហារធ្ងន់ធ្ងរ ហើយមកទល់ពេលនេះតួលេខបានកើនឡើងខ្ពស់គួរឲ្យបារម្ភ បណ្ដាលមកពីកត្តាបម្រែបម្រួលអាកាសធាតុ និងសង្គ្រាម។ នេះបើតាមសម្ដីប្រធានផ្នែកតាមតំបន់ WFP បានប្រាប់ Reuters។

ប្រភពដដែលបានបង្ហើបថា តំបន់មជ្ឈិមបូព៌ា និងអាហ្វ្រិកខាងជើង គឺទទួលរងផលប៉ះពាល់ខ្លាំងបំផុត ដោយសារសង្គ្រាមរវាងរុស្ស៊ី និងអ៊ុយក្រែន ដ្បិតតំបន់ ២ នេះពឹងផ្អែកខ្លាំងលើការនាំចូលស្បៀងអាហារតាមរយៈផ្លូវសមុទ្រ Black Sea។

សូមជម្រាបដែរថា WFP រាល់ថ្ងៃគឺអាចមានលទ្ធភាពជួយដល់មនុស្សប្រមាណ ១៣ លាននាក់ក្នុងចំណោម ១៦ លាននាក់ដែលកំពុងត្រូវការអាហារ ប៉ុន្តែជំនួយទាំងអស់គឺមិនអាចរ៉ាប់រងបានទាំងស្រុងឡើយ ដ្បិតអង្គការមួយនេះក៏កំពុងខ្វះខាតថវិកាផងដែរ។

ដូច្នេះហើយទើបកន្លងមក WFP តែងតែទទូចជារឿយៗដល់ក្រុមមហាសេដ្ឋីមានលុយហូរហៀរដូចជា Elon Musk, Jeff Bezos ជាដើម ក្នុងការជួយដោះស្រាយបញ្ហាកង្វះស្បៀងអាហារជុំវិញពិភពលោកមួយនេះ ប៉ុន្តែលទ្ធផលមិនសូវបានផ្លែផ្កាឡើយ៕

The post អត្រាប្រជាជនប្រឈមនឹងអសន្តិសុខស្បៀងអាហារ កើនច្រើនគួរឲ្យបារម្ភនៅឆ្នាំ ២០២២ appeared first on .

បើរុស្ស៊ីមិនព្រមបើកច្រកពាណិជ្ជកម្មអ៊ុយក្រែន ពិភពលោកនឹងជួបវិបត្តិស្បៀងអាហារដ៏រ៉ាំរ៉ៃ

ឧកញ៉ាសំពៅ — Thu, 26 May 2022 05:46:17 +0000

សង្គ្រាមរវាងប្រទេសរុស្ស៊ី និងអ៊ុយក្រែនបានបន្តអូសបន្លាយអស់រយៈពេលជាច្រើនខែ ខណៈវាបានចាប់ផ្ដើមដំបូងនៅចុងខែកុម្ភៈ ហើយមកទល់នឹងពេលនេះស្ថានការណ៍នៃព្រឹត្តិការណ៍មួយនេះនៅតែជះឥទ្ធិពលយ៉ាងខ្លាំងក្លាទៅលើពិភពលោក។

ជាក់ស្ដែង រុស្ស៊ី និងអ៊ុយក្រែនគឺជាប្រទេសនាំចេញស្រូវសាលី និងផលិតផលកសិកម្មដ៏ធំបំផុតមួយលើលោក ហើយសង្គ្រាមបានធ្វើឲ្យការនាំចេញរបស់ប្រទេសទាំង ២ កកស្ទះ ធ្វើឲ្យពិភពលោកកំពុងបារម្ភបញ្ហាកង្វះខាតចំណីអាហារនាថ្ងៃអនាគត។

ទន្ទឹមនឹងនោះ យោងតាមសម្ដីរបស់មន្ត្រីការបរទេសរបស់ប្រទេសអ៊ុយក្រែនបានឲ្យដឹងថា ប្រសិនបើរុស្ស៊ីមិនព្រមបើកច្រកសេដ្ឋកិច្ចផ្លូវសមុទ្ររបស់អ៊ុយក្រែននាពេលឆាប់ៗ នោះពិភពលោកនឹងជួបប្រទះវិបត្តិចំណីអាហារជាច្រើនឆ្នាំ ជាពិសេសគឺលើវិស័យកសិកម្មតែម្ដង។

បញ្ជាក់ដែរថា ច្រកផែសមុទ្រ Black Sea របស់អ៊ុយក្រែនបានស្ថិតក្រោមការគ្រប់គ្រងរបស់រុស្ស៊ីតាំងពីថ្ងៃទី ២៤ កុម្ភៈមកម៉្លេះ ក្រោយពេលរុស្ស៊ីបានបញ្ជូនកងកម្លាំងជាច្រើនពាន់នាក់ទៅកាន់ទីនោះ។

ដោយសារមិនអាចនាំចេញផលិតផលបាន ស្របពេលមិនមានទីតាំងផ្ទុកផលិតផលដែលត្រូវប្រមូលផលនាពេលបន្ទាប់ផង អ៊ុយក្រែនបានព្រមានទៅកាន់រុស្ស៊ី និងស្នើទៅកាន់អង្គការពិភពលោកជាច្រើន ក្នុងការធ្វើអន្តរាគមន៍ស្នើបើកច្រកពាណិជ្ជកម្មផ្លូវសមុទ្រឡើងវិញ បើមិនចង់ឲ្យពិភពលោកជួបវិបត្តិកង្វះចំណីអាហារ៕

ប្រភព: CNN

The post បើរុស្ស៊ីមិនព្រមបើកច្រកពាណិជ្ជកម្មអ៊ុយក្រែន ពិភពលោកនឹងជួបវិបត្តិស្បៀងអាហារដ៏រ៉ាំរ៉ៃ appeared first on .

មន្ត្រី UN ចេញមុខសុំជំនួយពីមហាសេដ្ឋី ស្របពេលវិបត្តិចំណីអាហារកាន់តែធ្ងន់ធ្ងរ

ឧកញ៉ាសំពៅ — Tue, 24 May 2022 08:47:04 +0000

សង្គ្រាមរវាងរុស្ស៊ី-អ៊ុយក្រែន បានធ្វើឲ្យពិភពលោកមានការជ្រួលច្របល់ជាខ្លាំង ជាពិសេសលើផ្នែកសេដ្ឋកិច្ច និងវិបត្តិកង្វះខាតចំណីអាហារតែម្ដង។

ជាក់ស្ដែង ប្រទេសទាំង ២ ខាងលើគឺជាអ្នកនាំចេញធំបំផុត ១/៣ លើផ្នែកស្រូវសាលី គ្រាប់ធញ្ញជាតិ និងប្រេងផ្កាឈូករ័ត្នទូទាំងពិភពលោក ស្របពេលតម្លៃជីកំពុងមានការឡើងថ្លៃខ្ពស់ដោយសារសង្គ្រាមនេះផងដែរ។

ទាក់ទងនឹងបញ្ហាខាងលើ លោក David Beasley ដែលជាប្រធានផ្នែកអាហារពិភពលោកលោកប្រចាំអង្គការសហប្រជាជាតិ បានចេញមុខស្នើសុំជំនួយពីក្រុមមហាសេដ្ឋីទាំងអស់ ក្នុងជួយគ្នាមួយដៃមួយជើង ដើម្បីដោះស្រាយបញ្ហាកង្វះចំណីអាហារមួយនេះ។

មន្ត្រី UN ខាងលើបានបង្ហោះសារទៅកាន់ក្រុមមហាសេដ្ឋីថា៖ “ពិភពលោកកំពុងស្ថិតក្នុងស្ថានការណ៍ដ៏អាក្រក់ ហើយនេះមិនមែនជាពាក្យវោហាសាស្រ្ត ចេះតែនិយាយឡើយ។ ក្រោកឈរឡើង ព្រោះពិភពលោកកំពុងត្រូវការពួកអ្នក”។

បញ្ជាក់ដែរថា សង្គ្រាមកាន់តែអូសបន្លាយ នោះហានិភ័យនៃកង្វះស្បៀងអាហារពិភពលោកកាន់តែមានខ្ពស់ ដ្បិតប្រសិនបើអ៊ុយក្រែននៅតែមិនអាចផ្គត់ផ្គង់ផលិតផលលើទីផ្សារបន្តទៀត ក្នុងរយៈពេល ១០ ទៅ ១២ ខែខាងមុខ ពិភពលោកនឹងជៀសមិនផុតពីវិបត្តិកង្វះចំណីអាហារជាមិនខាន៕

ប្រភព: Thenational

The post មន្ត្រី UN ចេញមុខសុំជំនួយពីមហាសេដ្ឋី ស្របពេលវិបត្តិចំណីអាហារកាន់តែធ្ងន់ធ្ងរ appeared first on .

ប្រធានាធិបតី Putin ព្រមានថា ប្រទេសក្រីក្រនឹងប្រឈមបញ្ហាកង្វះចំណីអាហារ ដោយសារមហាអំណាចលោកខាងលិច

ឧកញ៉ាសំពៅ — Wed, 06 Apr 2022 07:55:17 +0000

កាលពីពេលថ្មីៗនេះ សារព័ត៌មាន Reuters បានអះអាងថា ប្រធានាធិបតីរុស្ស៊ី Vladimir Putin បាននិយាយថា ទណ្ឌកម្មដែលរុស្ស៊ីកំពុងជួបប្រទះបច្ចុប្បន្ន ដែលជាស្នាដៃរបស់ប្រទេសលោកខាងលិច នឹងបណ្ដាលឲ្យកើតមានជាបញ្ហាកង្វះចំណីអាហារទូទាំងពិភពលោក។

ថ្នាក់ដឹកនាំខាងលើបានសង្កត់ធ្ងន់ថា កាលណាការកាត់បន្ថយថាមពល និងជីកាន់តែច្រើន នោះប្រទេសលោកខាងលិចនឹងត្រូវតែបោះពុម្ពលុយបន្ថែមដើម្បីទិញទំនិញ ដែលនេះនឹងធ្វើឲ្យប្រទេសក្រីក្រជាច្រើននឹងជួបប្រទះបញ្ហាកង្វះស្បៀងអាហារ។

“បញ្ហាកង្វះស្បៀងអាហារគឺច្បាស់ជាមិនអាចគេចរួចឡើយ ជាពិសេសគឺនៅតំបន់ក្រីក្រ ហើយវានឹងបណ្ដាលឲ្យមានការចំណាកស្រុកកើនឡើង ហើយជាទូទៅតម្លៃស្បៀងអាហារនឹងមានការឡើងថ្លៃ”។

ប្រធានាធិបតីរូបនេះបានប្រាប់ទៅកាន់ RT ទៀតថា៖ “ពួកយើងនឹងមានការប្រុងប្រយ័ត្នខ្ពស់ចំពោះការផ្គត់ផ្គង់អាហារទៅកាន់ក្រៅប្រទេស ជាពិសេសគឺទៅកាន់ប្រទេសដែលបញ្ចេញក្រចកដាក់យើង”។

បញ្ជាក់ដែរថា កាលពីសប្ដាហ៍មុនអតីតប្រធានាធិបតី Dmitry Medvedev បានទម្លាយថា រុស្ស៊ីនឹងមិនធ្វើពាណិជ្ជកម្មអន្តរជាតិសម្រាប់ផលិតផលនានា ជាពិសេសគឺផលិតផលកសិកម្មទៅកាន់ប្រទេសបច្ចាមិត្តឡើយ។

ដោយឡែក រុស្ស៊ី និងអ៊ុយក្រែនគឺជាអ្នកនាំចេញដ៏ធំបំផុតផ្នែកស្រូវសាលី និងពោតទូទាំងពិភពលោក ខណៈរុស្ស៊ីគ្រប់គ្រងការនាំចេញស្រូវសាលី ១៧% ទូទាំងសកលលោក។ នេះបើតាមរបាយការណ៍ពី ING៕

ប្រភព: Yahoo

The post ប្រធានាធិបតី Putin ព្រមានថា ប្រទេសក្រីក្រនឹងប្រឈមបញ្ហាកង្វះចំណីអាហារ ដោយសារមហាអំណាចលោកខាងលិច appeared first on .

អង្គការអន្តរជាតិមួយទម្លាយថា សង្គ្រាមរុស្ស៊ី-អ៊ុយក្រែននឹងបង្កវិបត្តិដល់មជ្ឈិមបូព៌ា និងអាហ្វ្រិកខាងជើង

ឧកញ៉ាសំពៅ — Mon, 21 Mar 2022 07:32:39 +0000

សង្គ្រាមរវាងប្រទេសរុស្ស៊ី និងប្រទេសជិតខាងអ៊ុយក្រែននៅតែបន្ត ខណៈការចរចាកន្លងមកនៅមិនទាន់អាចរកដំណោះស្រាយណាមួយសមស្របក្នុងការបញ្ឈប់ការឈ្លានពានមួយនេះបាននៅឡើយ។

ទន្ទឹមនឹងនោះ អង្គការសិទ្ធិមនុស្សអន្តរជាតិបានប្រកាសកាលពីថ្ងៃច័ន្ទនេះថា បើសិនជាសង្គ្រាមនៅតែអូសបន្លាយ នោះស្ថានការណ៍នឹងកាន់តែអាក្រក់ទៅៗ ហើយវានឹងរីករាលដាលធំឡើងៗ ជាក់ស្ដែងបច្ចុប្បន្ន ប្រទេសនៅមជ្ឈិមបូព៌ា និងអាហ្វ្រិកខាងជើងកំពុងទទួលរងឥទ្ធិពលសង្គ្រាមមួយនេះបណ្ដើរៗហើយ។

“សង្គ្រាមរវាងអ៊ុយក្រែន និងរុស្ស៊ីគឺកំពុងធ្វើឲ្យការផ្គត់ផ្គង់ចំណីអាហារ ជាពិសេសគឺផលិតផលកសិកម្មនៅប្រទេសជាច្រើននៅតំបន់មជ្ឈិមបូព៌ា និងអាហ្វ្រិកខាងជើងធ្លាក់ក្នុងស្ថានការណ៍ដ៏យ៉ាប់យ៉ឺនមួយ ខណៈតម្លៃចំណីអាហារក៏កើនឡើង ស្របពេលភាពក្រីក្រក៏កាន់តែអាក្រក់ទៅៗ”។

ជាក់ស្ដែង ប្រភពខាងលើបានបន្ថែមទៀតថា រដ្ឋាភិបាលអ៊ុយក្រែនបានសម្រេចចិត្តបញ្ឈប់ការនាំចេញចំពោះផលិតផលផ្នែកកសិកម្មរាប់បញ្ចូលទាំងស្រូវសាលី ពោត គ្រាប់ធញ្ញជាតិ អំបិល និងសាច់កាលពីថ្ងៃទី ០៩ មីនាមកម៉្លេះ។

មិនតែប៉ុណ្ណោះអង្គការសិទ្ធិមនុស្ស HRW បានបញ្ជាក់យ៉ាងច្បាស់ថា បើទោះជាបញ្ហាផ្គត់ផ្គង់មួយនេះអាចដោះស្រាយបានឆាប់ៗក្ដី តែបញ្ហាបែបនេះនឹងអូសបន្លាយយូរទៀត ដ្បិតកសិកររាប់ពាន់ម៉ឺននាក់បានរត់ភៀសខ្លួន ដោយសារសង្គ្រាម ខណៈសម្ភារៈធ្វើដំណាំទាំងនោះក៏បានកំទេចនៅក្នុងហេតុការណ៍នេះទៀត ដូច្នេះបើសង្គ្រាមនៅតែអូសបន្លាយនោះ វិបត្តិចំណីអាហារនៅតំបន់មជ្ឈិមបូព៌ា និងអាហ្វ្រិកខាងជើងនឹងធ្លាក់ក្នុងស្ថានការណ៍ដ៏ពិបាកមួយ។

បញ្ជាក់បន្តិចថា រុស្ស៊ី និងអ៊ុយក្រែនមានចំណែកយ៉ាងធំក្នុងការនាំចេញស្រូវសាលីលើទីផ្សារអន្តរជាតិ ពោលប្រទេសទាំង ២ នាំចេញរហូតដល់ ៣០% ឯណោះទូទាំងពិភពលោក៕

ប្រភព: CNN

The post អង្គការអន្តរជាតិមួយទម្លាយថា សង្គ្រាមរុស្ស៊ី-អ៊ុយក្រែននឹងបង្កវិបត្តិដល់មជ្ឈិមបូព៌ា និងអាហ្វ្រិកខាងជើង appeared first on .