របាយការណ៍ខាងលើបានឱ្យដឹងថា សូចនាករសេដ្ឋកិច្ចសំខាន់ៗក្នុងខែកុម្ភៈ និងរយៈពេល ២ខែ ដើមឆ្នាំ២០២៤នេះបានបង្ហាញពីសញ្ញាណកាន់តែ ល្អជាបន្តបន្ទាប់ ជាពិសេសលើវិស័យពាណិជ្ជកម្មអន្តរជាតិ, ទេសចរណ៍, និងវិនិយោគ ខណៈដែលសន្ទស្សន៍ថ្លៃទំនិញ និងសេវាកម្ម និងវិស័យសំណង់ មានការធ្លាក់ចុះបន្តិច។

បើតាមរបាយការណ៍ដដែល ទំហំពាណិជ្ជកម្មសរុបក្នុងខែកុម្ភៈ ឆ្នាំ២០២៤ មានភាពល្អប្រសើរជាងឆ្នាំមុន ពោលគឺទំហំពាណិជ្ជកម្មសរុបសម្រេចបាន ៤ ០៦៣លានដុល្លារ កើនឡើង០,២% ធៀបនឹងខែមុន។គិតត្រឹមរយៈពេល២ខែ ដើមឆ្នាំ២០២៤នេះសម្រេចបាន ៨ ១២១លានដុល្លារ កើនឡើង ១៩,២% ធៀបនឹងរយៈពេលដូចគ្នាឆ្នាំមុន។ដោយការនាំចេញទំនិញ ២ខែដើមឆ្នាំនេះ ក៏សម្រេចបានកំណើនល្អផងដែរក្នុងទំហំ ៣ ៩៨៥ លានដុល្លារ កើនឡើង ២២,៧% ធៀបទៅនឹងរយៈពេលដូចគ្នាក្នុងឆ្នាំ២០២៣។ក្នុងនោះការនាំចេញផលិតផលវាយនភណ្ឌកើនឡើង ២២, ៣%, ផលិតផលមិនមែនវាយនភណ្ឌកើនឡើង ២៣%, ស្រូវ កើនឡើង ៥៤%, គ្រឿងសង្ហារិមកើនឡើង ៥៣,៧%, ខណៈដែលផលិតផលកសិកម្មធ្លាក់ចុះ ១១, ៩%, និងសូឡាធ្លាក់ចុះ ៣៤,៧%។រីឯការនាំចូលនៅតែសម្រេចបានកំណើនល្អ ក្នុងទំហំប្រមាណជាង ៤ ១៣៥ លានដុល្លារ កើនឡើង ១៦,១% ធៀបទៅនឹងរយៈពេលដូចគ្នាឆ្នាំ២០២៣។

ចំពោះវិស័យទេសចរ២ខែមកនេះ ចំនួនទេសចរមានកំណើនល្អប្រសើរ ជាពិសេសចំនួនភ្ញៀវចូលទស្សនាតំបន់អង្គរ។ ជាក់ស្តែង ក្នុងខែកុម្ភៈ ឆ្នាំ២០២៤ ទទួលបានភ្ញៀវទេសចរអន្តរជាតិប្រមាណ ៤៤៨ ៥២៦ នាក់ កើនឡើង ៣,២% ធៀបនឹងខែកុម្ភៈ ដើមឆ្នាំ២០២៣ និងចំនួនភ្ញៀវអន្តរជាតិទិញសំបុត្រពីគ្រឹះស្ថានអង្គរមានចំនួន ១២០, ៣១៨ នាក់ កើនឡើង ៥១,៣%។បើគិតក្នុងរយៈពេល ២ខែ កម្ពុជាទទួលបានភ្ញៀវទេសចរអន្តរជាតិ ប្រមាណ ៩៨៩ ពាន់នាក់ ដែលមានកំណើន ១៨, ០% ធៀបនឹងរយៈពេលដូចគ្នាឆ្នាំ២០២៣ ទន្ទឹមនេះ ចំនួនភ្ញៀវទេសចរអន្តរជាតិទិញសំបុត្រពីគ្រឹះស្ថាន អង្គរមានចំនួន ២៣៦ ពាន់នាក់ កើនឡើង ៥០, ៣%។

ចំណែកឯវិស័យវិនិយោគក្នុងរយៈពេល២ខែ ឆ្នាំ២០២៤នេះវិញ ស្ថានភាពគម្រោងវិនិយោគឯកជនដែលទទួលបានការអនុញ្ញាតដោយក្រុមប្រឹក្សាអភិវឌ្ឍន៍កម្ពុជា ក្នុងខែ កុម្ភៈ ឆ្នាំ២០២៤ មានការកើនឡើងល្អប្រសើរគួរឱ្យកត់សម្គាល់ទាំងចំនួនគម្រោងទុនវិនិយោគ និងការបង្កើតការងារថ្មី។ ជាកស្តែង ចំនួនគម្រោងវិនិយោគក្នុងខែកុម្ភៈ ឆ្នាំ២០២៤ មាន ៣៧ គម្រោង ដែលបានប្រើប្រាស់ទុនវិនិយោគសរុប ចំនួន ១ ១៨៩ លានដុល្លារ និងបង្កើតការងារថ្មីចំនួន ៣៨ ៣៤៥ កន្លែង ដែលមានកំណើន ១៥,៦%, ៥៤០,៨%, និង ៣៣% រៀងគ្នាធៀបនឹងខែមុន។បើគិត ២ខែមកនេះ មានគម្រោងវិនិយោគសរុប ៦៩ គម្រោង, ទុនសរុប ១ ៣៨៥ លានដុល្លារ និងអាចបង្កើតការងារថ្មី ៦៧ ១៧៨ កន្លែង។ បើធៀបនឹងរយៈពេលដូចគ្នាឆ្នាំ២០២៣ ចំនួនគម្រោងវិនិយោគកើនឡើង ៣៨ គម្រោង (ស្មើនឹង ១២២%), ទុនកើនឡើង ៥០៥%, និងការងារកើនឡើង ៦៨% រៀងគ្នា៕

The post ២ខែ ដើមឆ្នាំ២០២៤ សេដ្ឋកិច្ចកម្ពុជាបានបង្ហាញសញ្ញាណកាន់តែល្អ ពិសេសលើវិស័យសំខាន់ៗ៣ appeared first on .

អនុប្រធានសភាពាណិជ្ជកម្មកម្ពុជាមានប្រសាសន៍ថា ក្នុងនាមជាវិស័យឯកជនក៏ដូចជាសភាពាណិជ្ជកម្មកម្ពុជាយើងអបអរសាទរដែលប្រទេសកម្ពុជាត្រូវបានដកចេញពី«បញ្ជីប្រផេះ»នេះ។ វាជាការពិតណាស់ការដែលយើងរួចផុតពីបញ្ជីប្រផេះនេះ វាគឺជាការផ្តល់កិត្តិយសជូនជាតិយើងវិញ និងផ្តល់ផលប្រយោជន៍សំខាន់ៗជាច្រើន ពិសេសទំាងផលប្រយោជន៍ជា នយោបាយនិងសេដ្ឋកិច្ច ។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាមានប្រសាសន៍ថា«បើពាក់ព័ន្ធនិងផ្នែកសេដ្ឋកិច្ចនេះវិញសម្រាប់អ្នករកស៊ីមានទំនុកចិត្តកាន់តែខ្លំាងដោយសារ នៅប្រទេសកម្ពុជាយើងត្រូវការជួញដូរឆ្លងប្រទេសជាលក្ខណៈអន្តរជាតិច្រើនដែលផលិតផលទំនិញជាច្រើនត្រូវការនាំចេញហើយត្រូវការបង្វែរប្រាក់ដុល្លារអាមេរិកចូលមកវិញ។ ដូច្នេះនៅពេលប្រទេសកម្ពុជាកំពុងនិយមចាយប្រាក់ដុល្លារអាមេរិកស្រាប់ទន្ទឹមពេលនឹងប្រាក់រៀលនេះគឺយើងរីករាយក្នុងការទូទាត់សាច់ប្រាក់ឱ្យល្អប្រសើរឡើងវិញហើយជាក្តីត្រេកអរពីវិស័យឯកជនទំាងអស់គ្នា»។

លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាមានប្រសាសន៍ថា ការដាក់សម្ពាធ ក្នុងបញ្ជីប្រផេះឬក្នុងបញ្ជីខ្មៅនេះអាចជាការយល់ច្រលំឬជាការមើលឃើញក្នុងភាពមួយមិនប្រក្រតីសម្រាប់កម្ពុជា។ មើលមកកម្ពុជាហាក់មិនសូវល្អ អីចឹងរាជរដ្ឋាភិបាលបានអនុញ្ញាតស៊ើបអង្កេត ហើយបន្ទាប់ពីមានការស៊ើបអង្កេតបានត្រឹមត្រូវ ការដាក់ក្នុងបញ្ជីប្រផេះត្រូវបានដកចេញ។

លោកបណ្ឌិត គី សេរីវឌ្ឍន៍សង្កត់ធ្ងន់ថា«ខ្ញុំមើលឃើញថាបើគិតទៅលើតម្លៃសេដ្ឋកិច្ចបច្ចុប្បន្នវាមិនមានអ្វីលើសពីមុនទេ ព្រោះការនាំចេញនាំចូលហើយការទូទាត់របស់យើងនៅធម្មតា។ ក៏ប៉ុន្តែនៅពេលខាងមុខវាអាចបង្ហាញថា អ្វីដែលរាជរដ្ឋាភិបាលកម្ពុជាបានធ្វើឬប្រទេសកម្ពុជាបាននិងកំពុងធ្វើនេះគឺជាកិច្ចខិតខំប្រឹងប្រែងសហការក្នុងកម្រិតអន្តរជាតិ អីចឹងវាអាចជាការទាក់ទាញការវិនិយោគបន្ថែមទៀត សម្រាប់ជំរុញកំណើនសេដ្ឋកិច្ចរបស់កម្ពុជា»៕

អត្ថបទ៖សារេត

The post កម្ពុជាដកចេញពី«បញ្ជីប្រផេះ»នឹងធ្វើឱ្យអ្នកជំនួញរឹតតែមានទំនុកចិត្តកាន់តែខ្លំាងក្នុងវិស័យពាណិជ្ជកម្ម appeared first on .