ភៀសខ្លួនពីសង្រ្គាម ស្រ្តីខ្មែរតស៊ូក្លាយជាវេជ្ជបណ្ឌិតនៅអាមេរិក រហូតសារព័ត៌មានធំៗយកទៅចុះផ្សាយ

ឧកញ៉ាសំពៅ — Thu, 14 Oct 2021 02:54:57 +0000

វេជ្ជបណ្ឌិត SreyRam Kuy គឺមានដើមកំណើតជាជនជាតិខ្មែរ តែបានធ្វើការភៀសខ្លួនទៅកាន់សហរដ្ឋអាមេរិក អំឡុងសម័យរបបខ្មែរក្រហម ហើយក៏បានចាប់ផ្ដើមកសាងជីវិតថ្មីនៅទឹកដីលោកខាងលិចជាមួយគ្រួសារ រហូតសម្រេចក្ដីស្រមៃក្លាយជាវេជ្ជបណ្ឌិតផ្នែកវះកាត់មួយរូប។

បកទៅមើលពីអតីតកាលបន្តិច Dr. Kuy គឺមានទំនោរស្រលាញ់ចូលចិត្តវិស័យវេជ្ជសាស្ត្រតាំងពីក្មេងម៉្លេះ តែដោយសារកើតមកក្នុងរបបប្រល័យពូជសាសន៍លោកស្រី មិនដែលមានឱកាសគ្រប់គ្រាន់ក្នុងការបង្ហាញទេពកោសល្យខ្លួនឡើយ។

មូលហេតុនៅពីក្រោយការស្រឡាញ់ចូលចិត្តនេះផងដែរ គឺលោកស្រីបានអះអាងថា ដោយសារគ្រួសារលោកស្រីធ្លាប់នៅជំរំនៅប្រទេសថៃ ហើយម្ដាយនិងបងស្រីមានរបួសដោយសារការគប់គ្រាប់បែកពីខាងទាហាន ទើបតម្រូវឲ្យម្ដាយលោកស្រីទទួលបានការវះកាត់ពីអង្គការស្ម័គ្រចិត្តកាកបាទក្រហម ដែលវាបានបញ្ឆេះគំនិតក្មេងស្រីតូចច្រមក់ម្នាក់នាពេលនោះឲ្យមានក្ដីស្រមៃក្លាយជាវេជ្ជបណ្ឌិតវះកាត់។

នៅក្នុងឆ្នាំ ១៩៨១ លោកស្រី និងគ្រួសារបានធ្វើការផ្លាស់ទីលំនៅពីជំរំនៅប្រទេសថៃ ទៅកាន់ប្រទេសហ្វីលីពីន ហើយក៏បានផ្លាស់មកដល់តំបន់ Corvallis តាមរយៈការជួយឧបត្ថម្ភពីមូលនិធិសាសនាគ្រឹស្ត និងបានចាប់យកទីតាំងនេះជាលំនៅឋានជាក់លាក់មួយ។

ជីវិតនៅលើទឹកដីថ្មីពិតជាមិនស្រួលឡើយ បើទោះជា Kuy និងបងស្រី SreyReath រៀនឆាប់ចេះមែន តែឪពុកម្ដាយពួកគេមិនទាន់អាចរកការងារបានជាក់លាក់មួយឡើយនាពេលនោះ ដោយមុនសម័យខ្មែរក្រហម ឪពុកលោកស្រីជាមន្ត្រីរាជការ ខណៈម្ដាយជាគ្រូបង្រៀន។

តែពេលមកដល់ទឹកដីសហរដ្ឋអាមេរិក ឪពុករបស់លោកស្រីទទួលបានការងារជាអ្នកបោសសំអាតនៅ OSU ស្របពេលម្ដាយគឺជាស្ត្រីមេផ្ទះបម្រើការនៅមណ្ឌលថែទាំសុខភាព។

ដោយសារសមត្ថភាពដ៏ពូកែនៅវិទ្យាល័យ Crescent Valley High School លោកស្រីធ្លាប់ទទួលបានឱកាសកម្រគឺ លិខិតអនុញ្ញាតឲ្យចូលរៀននៅសាកលវិទ្យាល័យកំពូល Harvard តែជាអកុសលគ្រានោះលោកស្រីបានបាត់បង់ឪពុកដោយរោគកាចសាហាវមហារីកក្រពះ ដែលធ្វើឲ្យលោកស្រីគិតថាមិនចង់ចាកចេញឆ្ងាយពីគ្រួសារ។ ហើយការសម្រេចចិត្តមួយនេះផងដែរ ជាចំណុចចាប់ផ្ដើមនៃភាពជោគជ័យគ្មានថ្ងៃបំភ្លេចបានរបស់លោកស្រី Kuy។

ដោយសារបោះបង់ឱកាសចូលរៀននៅ Harvard ដូច្នេះ Kuy សម្រេចចិត្តចូលរៀននៅ OSU វិញ ដោយចាប់ជំនាញផ្នែកមីក្រូជីវវិទ្យានិងទស្សនវិជ្ជា។ Kuy បានអះអាងថា ស្របពេលមុខវិជ្ជាមីក្រូជីវវិទ្យាអាចជួយលោកស្រីយល់ច្បាស់ពីបញ្ហាសុខភាព និងជំងឺផ្សេងៗ ហើយជាមួយគ្នានោះការសិក្សាទស្សនវិជ្ជាក៏បានជួយឲ្យអ្នកស្រីអាចគិតបានស៊ីជម្រៅទៅលើបញ្ហាគោលនយោបាយសុខភាព និងការប្រាស្រ័យទាក់ទងគ្នា។

ស្ថិតនៅឆ្នាំចុងក្រោយ Kuy បានសម្រេចចិត្តទៅធ្វើការផ្លាស់ប្ដូរបទពិសោធន៍នៅទីក្រុង Washington, D.C នៅឯការិយាល័យព្រឹទ្ធសភាអាមេរិកសម្រាប់លោក Tom Harkin ដែលជាប្រធានស្ថាបត្យករនៃច្បាប់ជនពិការអាមេរិកឆ្នាំ ១៩៩០។

គ្រានោះហើយដែល Kuy ចាប់ផ្ដើមត្រួសត្រាយផ្លូវមកកាន់អាជីពបច្ចុប្បន្នរបស់អ្នកស្រីសម្រាប់គោលនយោបាយសុខភាព ជាមួយសេចក្ដីព្រាងច្បាប់ស្ដីពីសុខភាពស្ត្រី និងការតស៊ូមតិអនុម័តច្បាប់ការពារ និងព្យាបាលជំងឺមហារីកសុដន់ និងមាត់ស្បូន។

ក្រោយមកអ្នកស្រី និងបងស្រីបានចាប់ផ្ដើមសរសេរសៀវភៅរៀបរាប់ពីបទពិសោធន៍ផ្ទាល់ខ្លួនដែលបានហែលឆ្លងសម័យប្រល័យពូជសាសន៍កាចសាហាវនៅកម្ពុជា ដែលមានឈ្មោះថា The Heart of a Tiger។

ក្រៅពីនោះ Kuy ក៏ធ្លាប់ចុះផ្សាយអត្ថបទជាច្រើននៅលើសារព័ត៌មានល្បីៗដូចជា Huffington Post, Los Angeles Times និង the Washington Post ជាដើម ដែលភាគច្រើនស្ដីពីបទពិសោធន៍ទាក់ទងនឹងជីវិតរស់នៅជាជនភៀសខ្លួន និងការតស៊ូក្នុងនាមជាស្ត្រីភៀសខ្លួនជនជាតិខ្មែរតំបូងបង្អស់ដែលមានអាជីពជាវេជ្ជបណ្ឌិតផ្នែកវះកាត់នៅសហរដ្ឋអាមេរិក។

បើនិយាយពីពានរង្វាន់ដែលអ្នកស្រីទទួលបានវិញ គឺច្រើនស្ទើររាប់មិនអស់ ទាក់ទងនឹងវិស័យការងាររបស់លោកស្រី ដូចជាធ្លាប់ទទួលបានពានរង្វាន់ប្រគល់ជូនដោយផ្ទាល់ដោយអតីតប្រធានាធិបតី President George H.W. Bush’s Daily Points of Light Award ជាដើម៕

ប្រភព: បរទេស

The post ភៀសខ្លួនពីសង្រ្គាម ស្រ្តីខ្មែរតស៊ូក្លាយជាវេជ្ជបណ្ឌិតនៅអាមេរិក រហូតសារព័ត៌មានធំៗយកទៅចុះផ្សាយ appeared first on .

វេជ្ជបណ្ឌិតខ្មែរម្នាក់ ប្រកាសថា ខ្ញុំគឺជាគ្រូពេទ្យម្នាក់ដែលក្រីក្រជាងគេ នៅលើពិភពលោកយើងនេះ

ឧកញ៉ាកោះក្របី — Sat, 09 Jan 2021 00:57:35 +0000

ទំព័រហ្វេសបុកឈ្មោះ សាំង គឹមយ៉ាន បានថ្លែងថា ខ្ញុំវេជ្ជបណ្ឌិត សាំង គឹម យ៉ាន សូមជំរាបបងប្អូនជាតិខ្មែរ និងមិត្តភក្តិ រួមជំនាន់ទាំងអស់ ទាំងក្នុងនិងក្រៅប្រទេសអោយបានជ្រាបថា ខ្ញុំគឺជាគ្រូពេទ្យម្នាក់ដែលក្រីក្រជាងគេ នៅលើពិភពលោកយើងនេះ។

លោកបន្តថា ប្រហែលមិនជឿខ្ញុំទេ មូលហេតុមកពីខ្ញុំ មានការយោគយល់ដល់អ្នកជម្ងឺដែលពួកគាត់មាន ជីវៈភាពក្រីក្រខ្លាំងពេក ហើយមានជម្ងឺធ្ងន់ដែលគ្មានគ្រូពេទ្យណាម្នាក់ អាចព្យាបាលជំងឺពួកគាត់ អោយរស់ជីវិតបាន បងប្អូនអាចឃើញបន្ទប់ចំនួន ២ នៅពីក្រោយខ្នងខ្ញុំ បន្ទប់ទាំង ២ នេះហើយដែលខ្ញុំខំសន្សំលុយអស់រយៈពេលជាច្រើនខែ ទើបអាចសាងសង់បានដើម្បីទុកឲ្យអ្នកជម្ងឺមហារីកឈាមឈ្មោះ Leukemia and Cml មកសំរាកព្យាបាល តែខ្ញុំពុំដែលគឹតថ្លៃបន្ទប់ពីអ្នកជម្ងឺទាំងអស់នោះទេ ហើយថែមទាំងជួយចេញថ្លៃទឹកភ្លើង អោយពួកគាត់ថែមទៀតផង ទាំងអស់នេះហើយទើបខ្ញុំ ក្លាយជាគ្រូពេទ្យដែលក្រជាងគេបំផុតលើពិភពលោក។

វេជ្ជបណ្ឌិតរូបនេះ បានគួសបញ្ជាក់ថា អ្នកក្រ ក៏ស្រឡាញ់ជីវិតដូចអ្នកមានដែរ ខ្ញុំខំប្រឹងប្រែង ព្យាបាលពួកគាត់ដោយមិនគិតសេវាព្យាបាល ខ្ញុំមានទីតាំងស្ថិតនៅ ឃុំច្រេស ស្រុក កំពង់ត្រឡាចខេត្តកំពង់ឆ្នាំង ទូរស័ព្ទលេខ ០៧១២៨២៥៣៣៩ យើងចូលរួមសង្រ្គោះជីវិតអ្នកក្រ។

The post វេជ្ជបណ្ឌិតខ្មែរម្នាក់ ប្រកាសថា ខ្ញុំគឺជាគ្រូពេទ្យម្នាក់ដែលក្រីក្រជាងគេ នៅលើពិភពលោកយើងនេះ appeared first on .