ដិតដាមប្រវត្តិសាស្រ្ត ៥ ជំនាន់ សណ្ឋាគារកាំបូឌីយ៉ាណា នៅរក្សាអត្តសញ្ញាណជាតិមិនបាត់បង់

ឧកញ៉ាកោះក្របី — Fri, 12 Feb 2021 03:54:58 +0000

ស្ថិតនៅលើច្រាំងនៃទន្លេបួនមុខ សណ្ឋាគារកាំបូឌីយ៉ាណា មានទីតាំងស្ថិតនៅចំកណ្តាលទីក្រុងពាណិជ្ជកម្មនិងតំបន់ទេសចរណ៍កណ្តាលរាជធានីភ្នំពេញ។ សណ្ឋាគារសាងសង់តាមរចនាប័ទ្មបុរាណនៃរាជធានីភ្នំពេញ ផ្តល់នូវទេសភាពមាត់ទន្លេដ៏ស្រស់ត្រកាលគ្រប់រដូវកាល។

ប្រវត្តិសណ្ឋាគារនេះកើតឡើងរយៈពេលជាង ៥០ ឆ្នាំ តាំងពីឆ្នាំ ១៩៦៩។ សណ្ឋាគារដ៏ចំណាស់នេះជារតនសម្បត្តិនៃប្រវត្តិសាស្ត្រដោយស្នាព្រះហស្តព្រះមហាវីរក្សត្រព្រះបាទ នរោត្តម សីហនុ។

ពាក់កណ្តាលទសវត្សឆ្នាំ ១៩៦០ សណ្ឋាគារកាំបូឌីយ៉ាណា ត្រូវបានចាប់ផ្តើមសាងសង់ឡើងដោយស្ថាបត្យករ Lu Ban Hap ក្នុងអំឡុងពេលជាយុគសម័យនៃស្ថាបត្យកម្មខ្មែរថ្មី។ បន្ទាប់ពីសម្ពោធដាក់ឲ្យប្រើប្រាស់នៅឆ្នាំ១៩៦៩ បានតែមួយឆ្នាំ សណ្ឋាគារដែលមាន ១០០ បន្ទប់ នាពេលនោះ បានបិទទ្វារទៅវិញនៅឆ្នាំបន្ទាប់។ នៅឆ្នាំ ១៩៧០ ក្នុងជំនាន់សម័យលន់ នល់ បានប្រើប្រាស់សណ្ឋាគារនេះជាបន្ទាយយោធា បន្ទាប់មកទៀតក៏ត្រូវបានកាន់កាប់ក្រោមរបបខ្មែរក្រហម។

លុះដល់ឆ្នាំ១៩៩១ វិនិយោគិនសិង្ហបុរី បានកាន់កាប់សណ្ឋាគារនេះ ហើយបានកែលម្អ និងបើកទទួលភ្ញៀវឡើងវិញ មុននឹងសណ្ឋាគារ ត្រូវបានក្រុមហ៊ុន រ៉ូយ៉ាល់គ្រុប ទិញបន្តនៅឆ្នាំ២០០៥។

ក្រុមហ៊ុន រ៉ូយ៉ាល់គ្រុប បានទិញអចលនទ្រព្យសណ្ឋាគារនេះ ហើយបានបន្តវិនិយោគដើម្បីស្តារសណ្ឋាគារឲ្យមានភាពរុងរឿង ដោយរក្សាអត្តសញ្ញាណវប្បធម៌ជាតិ។

សណ្ឋាគារកាំបូឌីយ៉ាណា ជាសណ្ឋាគារផ្កាយ៤ ដែលមាន ២៣៨ បន្ទប់។ ទោះបីមិនមែនជាសាខាសណ្ឋាគារអន្តរជាតិក្តី នៅតែមានកិត្តិនាមមានការទទួលស្គាល់ទាំងភ្ញៀវក្នុងស្រុក និងនៅបរទេស។

នៅក្នុងផែនទីបែងចែកតំបន់ របស់ការិយាល័យទទួលបន្ទុកស្ថាបត្យកម្ម-នគរូបនីយកម្ម នៃរាជធានីភ្នំពេញ (Bureau de l’architecture et urbanisation – BAU) សណ្ឋាគារកាំបូឌីយ៉ាណាក៏ជាអត្តសញ្ញាណរបស់រាជធានីភ្នំពេញ ក្រៅពីតំបន់មួយចំនួនទៀតដូចជា វិមានឯករាជ្យ វត្តឧណ្ណាឡោម សារមន្ទីរជាតិ ព្រះបរមរាជវាំង សាលសន្និសីទចតុមុខ ពុទ្ធសាសនបណ្ឌិត និងវិមានរដ្ឋសភាជាតិជាដើម៕

The post ដិតដាមប្រវត្តិសាស្រ្ត ៥ ជំនាន់ សណ្ឋាគារកាំបូឌីយ៉ាណា នៅរក្សាអត្តសញ្ញាណជាតិមិនបាត់បង់ appeared first on .

សណ្ឋាគារកាំបូឌីយ៉ាណា

ដិតដាម​ប្រវត្តិសាស្រ្ត ៥ ជំនាន់ សណ្ឋាគារកាំបូឌីយ៉ាណា នៅ​រក្សា​អត្តសញ្ញាណ​ជាតិ​មិន​បាត់បង់

ដិតដាមប្រវត្តិសាស្រ្ត ៥ ជំនាន់ សណ្ឋាគារកាំបូឌីយ៉ាណា នៅរក្សាអត្តសញ្ញាណជាតិមិនបាត់បង់