បើ​តាម​លោក Daniel Grau នាយកគ្រប់គ្រងសណ្ឋាគារ Rosewood Phnom Penh ធ្លាប់​បានថ្លែង​ក្នុង​សន្និសីទ​សារព័ត៌មាន​ឱ្យ​ដឹង​ថា សណ្ឋាគារ​លំដាប់ផ្កាយ​៥នេះ ជាសណ្ឋាគារប្រណីតដំបូងគេនៅភ្នំពេញ ដែល​យកចំណែកខាងលើ នៃអគារវឌ្ឍន:​មកវិនិយោគ ហើយសណ្ឋាគារនេះ ទើបតែមានពីរកន្លែង ប៉ុណ្ណោះ​នៅតំបន់អាស៊ីប៉ាស៊ីហ្វិក គឺមួយនៅ ទីក្រុង​ប៉េកាំង និងមួយទៀតនៅកម្ពុជា។ ការ​រចនា​​របស់​សណ្ឋាគារ គឺ​រួម​បញ្ចូល​គ្នា​បែប​សហ​សម័យ ​​ដោយ​​​គោរព​រចនា​បទ​តាម​បែប​វប្បធម៌​ខ្មែរ ទាំង​សម័យ​បុរាណ លាយ​ឡំ​សម័យ​ទំនើប។

Rosewood Phnom Penh ​​ត្រូវ​បាន​គេ​ទទួល​ស្គាល់​​​ជា​សណ្ឋាគារ​​ដ៏​ល្អ​បំផុត​មួយ ​​​ពី​ទស្សនាវដ្តី​ និង​ស្ថាប័ន​ល្បីៗ​កម្រិត​ពិភពលោក។ ជាក់​ស្តែង នៅ​ឆ្នាំ​២០២២​នេះ សណ្ឋាគារ Rosewood Phnom Penh ​​បាន​ឈ្នះ​ពាន​រង្វាន់​ចំនួន​៤ គឺ​ ១)សណ្ឋាគារ​លំដាប់​កំពូល​ទាំង​១០ ​​នៅ​អាស៊ីអាគ្នេយ៍ (ទស្សនាវដ្តី​​អាមេរិក​ Condé Nast Traveler), ២)ភោជនីយដ្ឋាន​ល្អ​បំផុត​លំដាប់​លេខ​១​នៅកម្ពុជា (ទស្សនាវដ្តី​​អាមេរិក TRAVEL + LEISURE), ៣)សណ្ឋាគារ​​​ល្អ​បំផុត​នៅ​ក្នុង​ទីក្រុង​លំដាប់​លេខ​២​នៅកម្ពុជា (ទស្សនាវដ្តី​​អាមេរិក TRAVEL + LEISURE) និង ៤)សណ្ឋាគារ​ជា​ទីពេញ​ចិត្ត​របស់​អ្នកចាត់ការ​ទូទៅ ​​ចំណាត់​​ថ្នាក់​លេខ១​នៅកម្ពុជា (ទស្សនាវដ្តី​​អាមេរិក TRAVEL + LEISURE) ផងដែរ។

រីឯ​ចំណុច​ពិសេស ​របស់​សណ្ឋាគារលំដាប់ផ្កាយ៥ ដ៏មានសក្តានុពលលើសគេ​ទៀត​នោះគឺ ទឹកអប់ និង​សាប៊ូ សម្រាប់លាងសំអាតរាងកាយ ត្រូវបានផលិតដោយយកចេញពីរុក្ខជាតិ ផ្កា និងភាពល្អឯកនៃ​ធនធាន​ធម្មជាតិ​របស់ប្រទេស ដែលបាន​បោះទុនវិនិយោគ។ សណ្ឋាគារ Rosewood បានជ្រើសរើសយកអ្នក​ផលិត​ទឹក​អប់ល្បីឈ្មោះបំផុតពីប្រទេសបារាំង ដើម្បីមកផលិតទឹកអប់សំរាប់ប្រើប្រាស់ក្នុងសណ្ឋាគារនេះ។ អ្នកផលិតទឹកអប់ បានជ្រើសរើសយកផ្កាព្រៃ នៅឧទ្យានជាតិកុសុមៈគិរីរម្យ និងឧទ្យានជាតិវីរៈជ័យ នៅ​ខេត្តរតនៈគិរី ដើម្បីយកមកផលិតទឹកអប់សំរាប់ដាក់ប្រើប្រាស់ជាប្រចាំក្នុងសណ្ឋាគារនេះ។

សូម​ជម្រាប​ជូន​ថា ម៉ាកយីហោ​ Rosewood ​ត្រូវ​បាន​បង្កើត​ឡើង​ដោយ​លោកស្រី Caroline Rose Hunt ដែលជាជនជាតិអាមេរិក នៅក្រុង Dallas រដ្ឋតិចសាស ក្នុងឆ្នាំ១៩៧៩។ ក្រោយ​មក​ នៅ​ឆ្នាំ​២០១១ ​​ក្រុម​ហ៊ុន​អាមេរិក​មួយ​នេះ ​​បាន​លក់​​ទៅ​ឱ្យ​ក្រុមហ៊ុនបដិសណ្ឋារកិច្ច Rosewood Hotel Group ដែលមាន​មូលដ្ឋាននៅក្រុងហុងកុង ក្នុង​តម្លៃ ២២៩​លាន​ដុល្លារ រួមជាមួយសណ្ឋាគារ ៥​ទីតាំងទៀត ដែលលក់​ក្នុង​តម្លៃ ៥៧០លានដុល្លារ។ បច្ចុប្បន្ន​ក្រុមហ៊ុនសណ្ឋាគារ និងរីហ្សតប្រណីតអន្តរជាតិមួយនេះ កំពុង​ប្រតិបត្តិ​ការ​សណ្ឋាគារ​ជិត ៣០​កន្លែង នៅក្នុង​១៦​ប្រទេស​ ទូទាំង​ពិភពលោក។

គួរ​បញ្ជាក់​ថា ​សណ្ឋាគារ​ Rosewood Phnom Penh ឋិតនៅចាប់ពីជាន់ទី ២៥ ដល់ជាន់ទី ៣៩ នៃអគារវឌ្ឍនៈ ដែលមានទីតាំងស្ថិតនៅទល់មុខ ស្ថានីយរថភ្លើងភ្នំពេញ តាមបណ្តោយ មហាវិថីព្រះមុនី​វង្ស បានបើកដំណើរការជាផ្លូវការ កាលដើមឆ្នាំ២០១៨ ដោយមានបន្ទប់ស្នាក់នៅចំនួន ១៧៥បន្ទប់ សាលប្រជុំ ភោជនីយដ្ឋាន ក្លឹបកម្សាន្ត ស្កាយបារ មជ្ឈមណ្ឌលហាត់ប្រាណ បន្ទប់ស្ប៉ា អាងហែលទឹក ជាដើម។ សណ្ឋាគារនេះ មានកម្ពស់ផុតពីផ្ទៃដី ១៨៨ម៉ែត្រ និង​ជាសំណង់ស្ថាបត្យកម្មថ្មី ដ៏ល្បីល្បាញនៅក្នុង​រាជធានី និងជានិមិត្តរូប នៃប្រទេសកម្ពុជានាសម័យទំនើប៕

The post តើសណ្ឋាគារ Rosewood របស់អ្នកឧកញ៉ា សំអាង វឌ្ឍនៈ មានលក្ខណៈពិសេសអ្វីខ្លះ? appeared first on .