ម៉ាឡេស៊ី សម្រេចដកចេញបម្រាមលើការនាំចូលសត្វគោរស់ពីអូស្ត្រាលី

ឧកញ៉ាសាមញ្ញ — Fri, 08 Sep 2023 00:55:00 +0000

អាជ្ញាធរម៉ាឡេស៊ី កាលពីពេលថ្មីៗនេះ បានសម្រេចលុបចោលបម្រាមក្នុងនាំចូលសត្វគោរស់ពីប្រទេសអូស្រ្តាលីឡើងវិញ បន្ទាប់ពីបានផ្អាកអស់មួយរយ: ដោយសារតែជំងឺឆ្លងដែលអាចនាំឱ្យមានគ្រោះថ្នាក់ ដល់សត្វពាហន:។ នេះបើតាមការចុះផ្សាយពីសារព័ត៌មាន VNA ។

ម៉ាឡេស៊ី បានសម្រេចផ្អាកការនាំចូលនេះ កាលពីខែមុន ដែលជាផ្នែកមួយនៃវិធានការប្រុងប្រយ័ត្នរបស់ខ្លួន បន្ទាប់ពីជំងឺឆ្លងលើស្បែក (LSD) ត្រូវបានរកឃើញនៅលើសត្វគោមួយចំនួន ដែលដឹកមកដល់ប្រទេសជិតខាងឥណ្ឌូនេស៊ី ពីអូស្ត្រាលី ។

យ៉ាងណាមិញ ជុំវិញការសម្រេចចិត្តបើកឱ្យមានការនាំចូលឡើងវិញនេះ ត្រូវបានធ្វើឡើងបន្ទាប់ពីម៉ាឡេស៊ី ទទួលបានរបាយការណ៍ស៊ើបអង្កេតពេញលេញ ពីសំណាក់អាជ្ញាធរអូស្ត្រាលី ដើម្បីធានាបាននូវសុវត្ថិភាព និងរួមទាំងការពិភាក្សាដែលត្រូវបានធ្វើឡើងរវាងភាគីប្រទេសទាំងពីរ ផងដែរ។

ជម្រាបជូនផងដែរថា ជំងឺឆ្លងនេះ ប៉ះពាល់យ៉ាងខ្លាំងដល់សត្វគោ និងក្របី ដែលបណ្តាលឱ្យមានពងបែក និងកាត់បន្ថយការផលិតទឹកដោះ និងត្រូវបានចម្លងដោយសត្វល្អិតខាំ ប៉ុន្តែវាមិនបង្កគ្រោះថ្នាក់ដល់មនុស្សនោះឡើយ ៕

The post ម៉ាឡេស៊ី សម្រេចដកចេញបម្រាមលើការនាំចូលសត្វគោរស់ពីអូស្ត្រាលី appeared first on .

ឥណ្ឌូនេស៊ី ចង់កាត់បន្ថយការពឹងផ្អែកលើអូស្ត្រាលី ដោយគ្រោងនាំចូលគោ ពីអាហ្រ្វិក និងម៉ិកស៊ិកបន្ថែម

ឧកញ៉ាសាមញ្ញ — Mon, 17 Jul 2023 09:55:00 +0000

ឥណ្ឌូនេស៊ី កំពុងមានគម្រោងក្នុងការពង្រីកលើការនាំចូលសត្វគោពីអាហ្វ្រិកខាងត្បូង និងម៉ិកស៊ិក ដើម្បីកាត់បន្ថយការពឹងផ្អែករបស់ខ្លួនទាំងស្រុង តែទៅលើប្រទេសអូស្រ្តាលី។ នេះបើតាមអគ្គលេខាធិការក្រសួងពាណិជ្ជកម្ម លោក Suhanto បានលើកឡើង។

យោងតាមលោក Suhanto បានបង្ហាញទៀតថា ឥណ្ឌូនេស៊ី កំពុងស្ថិតនៅក្នុងដំណាក់កាលចរចាពាណិជ្ជកម្មជាមួយប្រទេសម៉ិកស៊ិក លើកកិច្ចព្រមព្រៀងមួយ ដើម្បីអនុញ្ញាតឱ្យមានការនាំចូលសត្វគោ ដើម្បីធានាដល់ការផ្គត់ផ្គង់ក្នុងស្រុកបន្ថែម។ ទន្ទឹមនឹងនេះ ផែនការនាំចូលសត្វគោចំនួន ៥០ ០០០ ក្បាល ពីប្រទេសអាហ្វ្រិកខាងត្បូង ក៏ត្រូវបានលើកឡើង ដោយអ្នកសម្របសម្រួលកិច្ចការសមុទ្រ និងរដ្ឋមន្ត្រីវិនិយោគ លោក Luhut Binsar Panjaitan ផងដែរ អំឡុងពេលលោកជួបជាមួយប្រធានាធិបតីអាហ្រ្វិកខាងត្បូង លោក Cyril Ramaphosa ។

មិនតែប៉ុណ្ណោះ លោក Suhanto បានសង្កត់ធ្ងន់ទៀតថា នៅពេលដែលផែនការនាំចូលគោ ពីអាហ្វ្រិកខាងត្បូង និងម៉ិកស៊ិក ត្រូវបានអនុវត្ត ដូច្នេះឥណ្ឌូនេស៊ី នឹងមិនចាំបាច់ត្រូវពឹងផ្នែកទាំងស្រុងលើការផ្គត់ផ្គង់ពីអូស្រ្តាលីទៀតនោះទេ ដោយសារតែតម្លៃគោអូស្រ្តាលី គឺមាននិន្នាការកើនឡើងជារៀងរាល់ឆ្នាំ ដែលធ្វើឱ្យប៉ះពាល់ដល់តម្លៃក្នុងស្រុក ។

ជម្រាបជូនផងដែរថា បើតាមទិន្នន័យពីការិយាល័យស្ថិតិកណ្តាលរបស់ប្រទេសឥណ្ឌូនេស៊ី (BPS) បានបង្ហាញថា អូស្ត្រាលីគឺជាអ្នកនាំចេញសត្វគោច្រើនជាងគេ ទៅកាន់ប្រទេសឥណ្ឌូនេស៊ី។ ក្នុងឆ្នាំ២០១៧ ការនាំចូលគោរបស់អូស្ត្រាលី ទៅកាន់ឥណ្ឌូណេស៊ីបានកើនដល់ ៨៥ ១៩២ តោន។ ហើយនៅឆ្នាំ ២០១៨ ចំនួននេះបានកើនឡើងដល់ ១០០ ៦២៣ តោន ខណ:នៅឆ្នាំ ២០១៩ ចំនួនកើនឡើងដល់ ១២២ ៦៨៤ តោន។ ក្នុងឆ្នាំ ២០២០ ប្រទេសឥណ្ឌូនេស៊ី បាននាំចូលគោ ត្រឹម ១០៥ ១៦០ តោន ប៉ុណ្ណោះ ប៉ុន្តែនៅឆ្នាំបន្ទាប់ ប្រទេសនេះបាននាំចូលដល់ចំនួន ១២២ ៨៦៣ តោន៕

The post ឥណ្ឌូនេស៊ី ចង់កាត់បន្ថយការពឹងផ្អែកលើអូស្ត្រាលី ដោយគ្រោងនាំចូលគោ ពីអាហ្រ្វិក និងម៉ិកស៊ិកបន្ថែម appeared first on .