គណៈប្រតិភូសភាពាណិជ្ជកម្មកម្ពុជា បានអញ្ជើញចូលរួមពិព័រណ៍ម្ហូបអាហារអូស្ត្រាលី(Fine Food Australia 2026) នៅទីក្រុងមែលប៊ន ប្រទេសអូស្ត្រាលី ដែលជាពិព័រណ៍ឈានមុខគេមួយក្នុងវិស័យម្ហូបអាហារ និងកសិឧស្សាហកម្ម។ ព្រឹត្តិការណ៍នេះមានការចូលរួមពីអាជីវកម្ម និងម៉ាកផលិតផលមកពីប្រទេសជាច្រើនជុំវិញពិភពលោក។ ជាពិសេស បានបង្ហាញនូវផលិតផល បច្ចេកវិទ្យា ឧបករណ៍ និងដំណោះស្រាយថ្មីៗជាច្រើនក្នុងវិស័យម្ហូបអាហារ និងបដិសណ្ឋារកិច្ច។

គណៈប្រតិភូសភាពាណិជ្ជកម្មកម្ពុជា ក៏បានអញ្ជើញចូលរួមកិច្ចពិភាក្សាការងារ និងស្វែងយល់បន្ថែមអំពីកិច្ចសហប្រតិបត្តិការលើវិស័យពាណិជ្ជកម្ម និងវិនិយោគ ជាមួយការិយាល័យតំណាងសភាពាណិជ្ជកម្មកម្ពុជាប្រចាំទីក្រុងមែលប៊ន សភាពាណិជ្ជកម្ម និងឧស្សាហកម្មរដ្ឋវិចតូរៀ និងតំណាងសភាពាណិជ្ជកម្មកម្ពុជាប្រចាំទីក្រុងស៊ីដនី ប្រទេសអូស្ត្រាលី។ ការជួបពិភាក្សាខាងលើ គឺជាឱកាសដ៏មានតម្លៃក្នុងការពង្រឹងបណ្តាញទំនាក់ទំនងអន្តរជាតិ ស្វែងរកដៃគូសហការថ្មីៗ និងបង្កើតមូលដ្ឋានសម្រាប់កិច្ចសហប្រតិបត្តិការនាពេលអនាគត ជាពិសេសស្វែងយល់ពី សក្តានុពលទីផ្សារ ឱកាសវិនិយោគ ការពង្រីកទំនាក់ទំនងអាជីវកម្ម និងការតភ្ជាប់វិស័យឯកជនរវាងកម្ពុជា និងអូស្ត្រាលី ដែលអាចរួមចំណែកដល់ការជំរុញ ពាណិជ្ជកម្ម ការវិនិយោគ និងទំនាក់ទំនងធុរកិច្ច។

បន្ថែមពីនេះ គណៈប្រតិភូសភាពាណិជ្ជកម្មកម្ពុជាក៏បានទស្សនកិច្ចនៅក្រុមហ៊ុន LUUS COMMERCIAL CATERING EQUIPMENT ដែលជាក្រុមហ៊ុនមានឯកទេសក្នុងការរចនា និងផលិត ឧបករណ៍ និងគ្រឿងបរិក្ខារផ្ទះបាយពាណិជ្ជកម្ម សម្រាប់វិស័យភោជនីយដ្ឋាន សណ្ឋាគារ និងបដិសណ្ឋារកិច្ច  ដែលមានមូលដ្ឋានផលិតកម្មនៅទីក្រុងមែលប៊ន។ ក្រុមហ៊ុននេះផ្តោតលើការផលិតឧបករណ៍ និងគ្រឿងបរិក្ខារដែលមានគុណភាពខ្ពស់ ប្រសិទ្ធភាព និងភាពធន់ ស្របតាមតម្រូវការរបស់ផ្ទះបាយពាណិជ្ជកម្មទំនើប រួមមាន ឧបករណ៍ចម្អិនអាហារប្រើហ្គាស ឧបករណ៍ចម្អិនអាហារបែបអាស៊ី ម៉ាស៊ីនចៀន ឧបករណ៍ដុត ឧបករណ៍ចម្អិនម្ហូប និងចង្ក្រានពាណិជ្ជកម្ម ដែលត្រូវបានរចនាឡើងសម្រាប់ការប្រើប្រាស់ក្នុងផ្ទះបាយដែលមានតម្រូវការខ្ពស់។

តាមរយៈសកម្មភាពនៃដំណើរទស្សនកិច្ចខាងលើនេះ គឺជាសក្ខីភាពនៃការប្តេជ្ញាចិត្ត និងទិសដៅដ៏មុតមាំរបស់សភាពាណិជ្ជកម្មកម្ពុជា ក្រោមការដឹកនាំរបស់ គិត ម៉េង ជាប្រធាន ដែលតែងជំរុញឱ្យមានកិច្ចសហការយ៉ាងជិតស្និទ្ធជាមួយដៃគូ និងស្ថាប័នអន្តរជាតិ ក្នុងការបន្តពង្រឹងទំនាក់ទំនងលើវិស័យធុរកិច្ច ពាណិជ្ជកម្ម និងការវិនិយោគ ជាមួយបណ្តាប្រទេសនានា និងដើម្បីឱ្យសមាជិក សមាជិកា ដែលស្ថិតក្នុងវិស័យម្ហូបអាហារ និងបដិសណ្ឋារកិច្ច ទទួលបានបទពិសោធន៍ និងចំណេះដឹងបន្ថែមទៀតដែលអាចយកទៅអភិវឌ្ឍន៍ក្នុងអាជីវកម្មប្រកបដោយភាពជោគជ័យ និងក្នុងការពង្រីកភាពជាដៃគូក្រៅប្រទេស ជំរុញការផ្លាស់ប្តូរវិនិយោគ និងលើកកម្ពស់កិច្ចសហប្រតិបត្តិការអន្ដរជាតិ៕

The post អ្នកឧកញ៉ា ភួ វាសនា ដឹកនាំគណៈប្រតិភូសភាពាណិជ្ជកម្មកម្ពុជា បំពេញទស្សនកិច្ចពាណិជ្ជកម្មទៅកាន់ទីក្រុងមែលប៊ន និងស៊ីដនី ប្រទេសអូស្ត្រាលី ប្រកបដោយភាពជោគជ័យ appeared first on .

អនុស្សរណៈនៃការយោគយល់នេះ ត្រូវបានចុះហត្ថលេខាដោយ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា និងលោក គីម សឹង ស៊ូ (Kim Seong Su) ប្រធានសភាពាណិជ្ជកម្មកូរ៉េនៅកម្ពុជា (KOCHAM) និងប្រព្រឹត្តទៅក្រោមអតិបតីភាពរបស់លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃ អគ្គនាយកដ្ឋានពន្ធដារ និងមានការអញ្ជើញចូលរួមពីអនុប្រធាន និង សមាជិកនៃសភាពាណិជ្ជកម្មទាំងពីរផងដែរ។

ថ្លែងក្នុងឱកាសនៃពិធីចុះអនុស្សរណៈនៃការយោគយល់គ្នានេះ អ្នកឧកញ៉ា គិត ម៉េង បានគូសបញ្ជាក់ថា កម្ពុជាមានបរិយាកាសធុរកិច្ចល្អប្រសើរ និងមានស្ថិរភាពម៉ាក្រូសេដ្ឋកិច្ច ដែលអំណោយផលសម្រាប់វិនិយោគិន និងមានគោលនយោបាយលើកទឹកចិត្ត និង គាំទ្រធុរកិច្ចរបស់រាជរដ្ឋាភិបាល ក្រោមការដឹកនាំប្រកបដោយភាពឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ 

អ្នកឧកញ៉ា គិត ម៉េង សង្កត់ធ្ងន់ថា អនុស្សរណៈនៃការយោគយល់គ្នានេះ គឺជាដំណាក់កាលដ៏សំខាន់មួយឈានឆ្ពោះទៅរកកិច្ចសហប្រតិបត្តិការដ៏រឹងមាំរវាងសភាពាណិជ្ជកម្មទាំងពីរ ដែលត្រូវបានរៀបចំឡើងដើម្បីការពារ និងទាក់ទាញការវិនិយោគពីកូរ៉េ។

លោក គីម សឹង ស៊ូ បានគូសបញ្ជាក់ពីសារៈសំខាន់ជាយុទ្ធសាស្ត្រនៃអនុស្សរណៈយោគយល់នេះ និងចាត់ទុកជាព្រឹត្តិការណ៍ប្រវត្តិសាស្ត្រក្នុងទំនាក់ទំនងរវាងសភាពាណិជ្ជកម្មកូរ៉េនៅកម្ពុជា និងសភាពាណិជ្ជកម្មកម្ពុជា។ អនុស្សរណៈនេះ មិនត្រឹមតែជួយទាក់ទាញវិនិយោគិនកូរ៉េប៉ុណ្ណោះទេ ថែមទាំងជួយការពារការវិនិយោគដែលមានស្រាប់ផងដែរ។

សូមជម្រាបថា MoUនេះ បង្កើតក្របខ័ណ្ឌប្រតិបត្តិកាសំខាន់ៗរួមមាន៖ ការចែករំលែកទិន្នន័យពាណិជ្ជកម្ម ព័ត៌មានបច្ចុប្បន្នភាពបទប្បញ្ញត្តិ គោលនយោបាយសេដ្ឋកិច្ច ការផ្គូផ្គងធុរកិច្ច ការរៀបចំទស្សនកិច្ចពាណិជ្ជកម្ម វេទិកាធុរកិច្ច ការដោះស្រាយបញ្ហាប្រឈម និងការជួយគាំទ្រគ្នាទៅវិញទៅមកផងដែរ៕ 

The post អ្នកឧកញ៉ា គិត ម៉េង ដឹកនាំប្រតិភូសភាពាណិជ្ជកម្មកម្ពុជា ចុះ MoU ជាមួយសភាពាណិជ្ជកម្មកូរ៉េនៅកម្ពុជា ដើម្បីជំរុញធុរកិច្ច និងវិនិយោគ appeared first on .

ជំនួបនេះ ត្រូវបានរៀបចំឡើងដោយស្ថានទូតអារ៉ាប៊ីសាអូឌីតប្រចាំកម្ពុជា នៅសណ្ឋាគារ Raffles Le Royal រាជធានីភ្នំពេញ ដោយមានការអញ្ជើញចូលរួមពី ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ព្រមទាំងមន្ត្រីជាន់ខ្ពស់រាជរដ្ឋាភិបាលមួយចំនួនទៀត។

ពិធីពិសាអាហារពេលល្ងាច និងកិច្ចពិភាក្សានេះធ្វើឡើងក្នុងគោលបំណង ពង្រឹង និងពង្រីកកិច្ចសហប្រតិបត្តិការលើវិស័យសេដ្ឋកិច្ច វិនិយោគ ពាណិជ្ជកម្ម និងទេសចរណ៍ រវាងព្រះរាជាណាចក្រកម្ពុជា និងព្រះរាជាណាចក្រអារ៉ាប៊ីសាអូឌីត ជាពិសេសជំរុញកិច្ចសហប្រតិបត្តិការទ្វេភាគីរវាងវិស័យឯកជននៃប្រទេសទាំងពីរ។

សូមជម្រាបថា ក្នុងឱកាសនោះ ភាគីពាក់ព័ន្ធបានផ្លាស់ប្តូរយោបល់អំពីសក្តានុពល និងឱកាសសម្រាប់ការអភិវឌ្ឍវិស័យទេសចរណ៍ ក៏ដូចជាការជំរុញកិច្ចសហប្រតិបត្តិការរវាងវិស័យសាធារណៈ និងវិស័យឯកជន ដើម្បីបង្កើនការផ្សព្វផ្សាយគោលដៅទេសចរណ៍ និងផលិតផលទេសចរណ៍របស់កម្ពុជា ទៅកាន់ទីផ្សារមជ្ឈិមបូព៌ា ជាពិសេសទីផ្សារអារ៉ាប៊ីសាអូឌីត៕

The post អ្នកឧកញ៉ា គិត ម៉េង ចូលរួមពិសាអាហារពេលល្ងាច និងពិភាក្សាផ្លាស់ប្តូរយោបល់ជាមួយឯកអគ្គរាជទូតថ្មីអារ៉ាប៊ីសាអូឌីតប្រចាំកម្ពុជា appeared first on .

អនុស្សរណៈនេះ ត្រូវបានចុះហត្ថលេខាដោយ ឯកឧត្តមកិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានអង្គភាពប្រឆាំងអំពើពុករលួយ និងអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា, ប្រធានគណៈកម្មការសម្របសម្រួលក្រុមការងារផ្នែកឯកជន សម្រាប់យន្តការវេទិការាជរដ្ឋាភិបាល-ផ្នែកឯកជន និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានកម្ពុជា។

ពិធីនេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាប្រធានក្រុមប្រឹក្សាជាតិប្រឆាំងអំពើពុករលួយ ដោយមានការចូលរួមពីថ្នាក់ដឹកនាំ និងមន្ត្រីអង្គភាពប្រឆាំងអំពើពុករលួយ តំណាងក្រសួង-ស្ថាប័នពាក់ព័ន្ធ ប្រធាន និងអនុប្រធានសហប្រធានក្រុមការងារផ្នែកឯកជនទាំង១៦ នៃយន្តការវេទិការាជរដ្ឋាភិបាល-ផ្នែកឯកជន (G-PSF) សមាជិក សមាជិកាសភាពាណិជ្ជកម្មកម្ពុជា និងសហគមន៍ធុរជនជាតិ និងអន្តរជាតិជាច្រើនរូប។

ក្នុងពិធីចុះ MoU ដ៏សំខាន់នេះ អ្នកឧកញ៉ា គិត ម៉េង បានចាត់ទុកការចុះអនុស្សរណៈនៃការយោគយល់គ្នានេះ ថាជាព្រឹត្តិការណ៍ប្រវត្តិសាស្ត្រមួយ ដែលសភាពាណិជ្ជកម្មកម្ពុជា ក្នុងនាមជាស្ថាប័នតំណាងវិស័យឯកជននៅកម្ពុជា និងអង្គភាពប្រឆាំងអំពើពុករលួយ បានឈានដល់ការសហការជាផ្លូវការ ដោយឆ្លុះបញ្ចាំងពីការប្តេជ្ញាចិត្តរួមគ្នាក្នុងការកសាងមូលដ្ឋានគ្រឹះដ៏រឹងមាំសម្រាប់កំណើនសេដ្ឋកិច្ចប្រកបដោយចីរភាព។

អ្នកឧកញ៉ា បានគូសបញ្ជាក់ថា បរិយាកាសធុរកិច្ចដែលមានតម្លាភាព និងភាពស្អាតស្អំ មិនត្រឹមតែជាគោលដៅរបស់ស្ថាប័នពាក់ព័ន្ធប៉ុណ្ណោះទេ ប៉ុន្តែជាកម្លាំងចលករដ៏សំខាន់ក្នុងការបង្កើនទំនុកចិត្តរបស់វិនិយោគិន ទាក់ទាញការវិនិយោគផ្ទាល់ពីបរទេស ធានាការប្រកួតប្រជែងដោយស្មើភាព និងលើកកម្ពស់វិបុលភាពពាណិជ្ជកម្មរយៈពេលវែង សម្រាប់សហគមន៍ធុរកិច្ចទាំងក្នុង និងក្រៅប្រទេស ដែលកំពុងប្រតិបត្តិការនៅកម្ពុជា។

ឯកឧត្តមកិត្តិនីតិកោសលបណ្ឌិត ឱម យ៉ិនទៀង បានមានប្រសាសន៍ថា ការចុះអនុស្សរណៈនៃការយោគយល់គ្នារវាងអង្គភាពប្រឆាំងអំពើពុករលួយ និងសភាពាណិជ្ជកម្មកម្ពុជា គឺជាការបង្ហាញពីឆន្ទៈ និងការតាំងចិត្តរួមគ្នា ក្នុងការផ្លាស់ប្តូរវប្បធម៌ធុរកិច្ចឱ្យកាន់តែផ្អែកលើសុចរិតភាព និងតម្លាភាព។

ឯកឧត្តមបានបញ្ជាក់ថា កិច្ចសហប្រតិបត្តិការនេះ មានគោលដៅជំរុញបរិយាកាសវិនិយោគ និងធុរកិច្ចនៅកម្ពុជា ឱ្យកាន់តែស្អាតស្អំ និងមានសមត្ថភាពប្រកួតប្រជែងកាន់តែខ្លាំង ស្របពេលដែលបរិយាកាសសេដ្ឋកិច្ចពិភពលោក កាន់តែទាមទារឱ្យមានទំនុកចិត្ត ការគោរពច្បាប់ និងការការពារផលប្រយោជន៍របស់ធុរជនទាំងជាតិ និងអន្តរជាតិ។

សូមជម្រាបថា យោងតាមខ្លឹមនៃ MoU ភាគីទាំងពីរ មានការប្តេជ្ញាចិត្តសំខាន់ ២គឺ៖ ទី១. តួនាទី និងការចូលរួមរបស់សភាពាណិជ្ជកម្មកម្ពុជា ផ្តល់ការសម្របសម្រួល-ទទួលពិភាក្សា និងបញ្ជូនពាក្យប្ដឹងពីសមាជិកមកកាន់ អ.ប.ព. ដើម្បីបន្តនីតិវិធីតាមច្បាប់ជាធរមាន និងផ្តល់ការសហការជាមួយ អ.ប.ព. ក្នុងករណីចាំបាច់ណាមួយតាមសំណើរបស់ អ.ប.ព. ធ្វើការផ្សព្វផ្សាយឱ្យបានទូលំទូលាយអំពីច្បាប់ ស្តីពីការប្រឆាំងអំពើពុករលួយទៅសមាជិក របស់ខ្លួន។ ទី២. ការប្តេជ្ញាចិត្តរបស់ អ.ប.ព. គឺ អ.ប.ព. ប្តេជ្ញាការពារ និងលើកកម្ពស់សុចរិតភាព ព្រមទាំងគាំទ្រយ៉ាងពេញទំហឹងចំពោះការចូលរួមនិងការប្តេជ្ញារបស់ភាគីពាក់ព័ន្ធក្នុងការបង្ការ និងប្រយុទ្ធប្រឆាំងអំពើពុករលួយ៕

The post អ្នកឧកញ៉ា គិត ម៉េង ដឹកនាំប្រតិភូសភាពាណិជ្ជកម្មកម្ពុជា ចុះ MoU ជាមួយអង្គភាពប្រឆាំងអំពើពុករលួយ ដើម្បីរួមគ្នាកសាងវប្បធម៌ធុរកិច្ចស្អាតស្អំ តម្លាភាព និងបរិយាកាសវិនិយោគល្អប្រសើរនៅកម្ពុជា appeared first on .

ពិធីសម្ពោធនេះមានការចូលរួម ឯកឧត្តម នរ៉ាណាឫទ្ធិ អានន្ទដាយ៉ាត រដ្ឋមន្ត្រីប្រតិភូអមនាយករដ្ឋមន្ត្រី និងជាអនុប្រធានក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ ព្រមទាំង ឯកឧត្តម លោកជំទាវ តំណាងក្រសួង-ស្ថាប័នពាក់ព័ន្ធ ថ្នាក់ដឹកនាំសភាពាណិជ្ជកម្មកម្ពុជា ធុរជន វិនិយោគិន និងតំណាងក្រុមហ៊ុនជាតិ-អន្តរជាតិជាច្រើនរូប។

ស៊េរីពិព័រណ៍កម្ពុជា ឆ្នាំ២០២៦ ជាព្រឹត្តិការណ៍ពិព័រណ៍ពាណិជ្ជកម្មអន្តរជាតិដ៏មានសារៈសំខាន់ សម្រាប់ជំរុញការអភិវឌ្ឍវិស័យ កសិកម្ម បសុសត្វ វារីវប្បកម្ម អាហារ និងភេសជ្ជៈ សត្វចិញ្ចឹម ឱសថ បរិក្ខារវេជ្ជសាស្ត្រ មន្ទីរពិសោធន៍ សម្រស់ និងផលិតផលប្រើប្រាស់។

ថ្លែងទៅកាន់អង្គពិធី ឧកញ៉ា តាន់ មុនីវណ្ណ បានស្វាគមន៍យ៉ាងកក់ក្តៅចំពោះ ឯកឧត្តម លោកជំទាវ អ្នកឧកញ៉ា ឧកញ៉ា សមាជិក សមាជិកា សភាពាណិជ្ជកម្មកម្ពុជា ភ្ញៀវកិត្តិយស តំណាងស្ថាប័ន ក្រុមហ៊ុន សហគ្រាស និងដៃគូអាជីវកម្មជាតិ និងអន្តរជាតិទាំងអស់ ដែលបានចំណាយពេលវេលាដ៏មានតម្លៃ អញ្ជើញមកចូលរួមក្នុងព្រឹត្តិការណ៍ដ៏មានសារៈសំខាន់នេះ។

លោកឧកញ៉ាបណ្ឌិត ក៏បានថ្លែងថា ពិព័រណ៍នេះនឹងក្លាយជាឱកាសដ៏ល្អសម្រាប់ធុរជន និងវិនិយោគិន ក្នុងការស្វែងរកដៃគូអាជីវកម្មថ្មីៗ បង្កើតកិច្ចសហប្រតិបត្តិការ ពង្រឹងទំនាក់ទំនងអាជីវកម្ម និងពង្រីកខ្សែសង្វាក់ផ្គត់ផ្គង់។ ជាពិសេស ព្រឹត្តិការណ៍នេះនឹងរួមចំណែកជួយឱ្យវិស័យ ពាណិជ្ជកម្ម កសិកម្ម ឧស្សាហកម្ម និងវិស័យពាក់ព័ន្ធនៅកម្ពុជា កាន់តែមានសមត្ថភាពប្រកួតប្រជែង និងមានភាពរឹងមាំបន្ថែមទៀត។

ឆ្លៀតក្នុងឱកាសនោះ លោកឧកញ៉ា បានអំពាវនាវដល់ក្រុមហ៊ុន និង សហគ្រាសឯកជនទាំងអស់ សូមចូលជាសមាជិកសភាពាណិជ្ជកម្មកម្ពុជា ដើម្បីទទួលបានអត្ថប្រយោជន៍ និងសេវាគាំទ្រផ្សេងៗ ព្រមទាំងមានឱកាសចូលរួមក្នុងបណ្តាញធុរជននិងសកម្មភាពផ្សេងៗរបស់សភាពាណិជ្ជកម្មកម្ពុជា ហើយក៏បានបន្ថែមទៀតថា សភាពាណិជ្ជកម្មកម្ពុជា ដែលជាតំណាងឱ្យវិស័យឯកជន តែងតែចូលរួមការពារផលប្រយោជន៍ស្របច្បាប់របស់វិស័យឯកជន ព្រមទាំងដើរតួនាទីជា ស្ពានភ្ជាប់រវាងវិស័យឯកជន និងរាជរដ្ឋាភិបាល ព្រមទាំងស្ថាប័នពាក់ព័ន្ធ ដើម្បីរួមចំណែកលើកកម្ពស់បរិយាកាសធុរកិច្ច និងការវិនិយោគនៅកម្ពុជា។

The post អ្នកឧកញ៉ា គិត ម៉េង ចាត់តាំងឧកញ៉ា តាន់ មុនីវណ្ណ ចូលរួមជាភ្ញៀវកិត្តិយស និងថ្លែងសុន្ទរកថា នៅក្នុងពិធីសម្ពោធ «ស៊េរីពិព័រណ៍កម្ពុជា ឆ្នាំ២០២៦» appeared first on .

កិច្ចប្រជុំពិភាក្សានេះ ក៏មានការចូលរួមផងដែរពីសំណាក់ថ្នាក់ដឹកនាំ និងមន្ត្រីនៃក្រសួងរ៉ែ និងថាមពល, សមាជិកសភាពាណិជ្ជកម្មកម្ពុជា, ប្រធាន ឬតំណាងសភាពាណិជ្ជកម្មរាជធានី-ខេត្ត,សហប្រធានក្រុមការងារផ្នែកឯកជន នៃវេទិការាជារដ្ឋាភិបាល-ផ្នែកឯកជន (G-PSF), និង ប្រធាន ឬ តំណាងគ្រឹះស្ថាន សមាគម ធុរជន ក្រុមហ៊ុនឯកជន និងភាគីពាក់ព័ន្ធជាច្រើនរូបទៀត។

បើតាមសភាពាណិជ្ជកម្មកម្ពុជា កិច្ចប្រជុំពិភាក្សានេះរៀបចំឡើងក្នុងគោលបំណង៖

១. ពង្រឹងកិច្ចសន្ទនារវាងរដ្ឋ និងឯកជន៖ បង្កើតវេទិការសន្ទនាដោយផ្ទាល់ និងមានតម្លាភាព រវាងថ្នាក់ដឹកនាំក្រសួងរ៉ែ និងថាមពល ជាមួយសភាពាណិជ្ជកម្មកម្ពុជា ដែលតំណាងឲ្យវិស័យឯកជន, ធុរជន សមាគធុរកិច្ច និងអ្នកវិនិយោគ និងក្រុមហ៊ុនឯកជន នៅក្នុងស្រុក ដើម្បីទទួលយកនៅអនុសាសន៍ ផ្លាស់ប្តូរព័ត៌មាន និងយោបល់នានាលើការអភិវឌ្ឍវិស័យរ៉ែ និងថាមពលនៅកម្ពុជា។

២. ដោះស្រាយបញ្ហាប្រឈម និងក្តីកង្វល់៖ បើកឱកាសឱ្យផ្នែកឯកជនលើកឡើងនូវបញ្ហាប្រឈម ឧបសគ្គបច្ចេកទេស និងកង្វល់ជាក់ស្តែងរបស់សមាគមធុរកិច្ច, សហគ្រាស/ក្រុមហ៊ុនឯកជន ទាក់ទងនឹងការប្រើប្រាស់ថាមពល ថ្លៃដើមអគ្គិសនី និងបទដ្ឋានគតិយុត្ត មកពិភាក្សាដោយផ្ទាល់ ដើម្បីស្នើសុំដំណោះស្រាយ និងការសម្របសម្រួលពីភាគីរាជរដ្ឋាភិបាល ជាពិសេសជាមួយក្រសួងរ៉ែនិងថាមពល។

នៅក្នុងឱកាសនោះ អ្នកឧកញ៉ា ប្រធាន បានគូសបញ្ជាក់ថា «យុទ្ធសាស្ត្របញ្ចកោណ-ដំណាក់កាលទី១» របស់រាជរដ្ឋាភិបាលកម្ពុជា បានបន្តរក្សានូវអាទិភាពគន្លឹះចំនួន ៤ គឺ «មនុស្ស ផ្លូវ ទឹក ភ្លើង» និងបានបន្ថែមអាទិភាពគន្លឹះទី៥ គឺ «បច្ចេកវិទ្យា» ដើម្បីឆ្លើយតបទៅនឹងបរិវដ្តកម្មឌីជីថលសកល។ អ្នកឧកញ៉ា បានបន្ថែមថា វិស័យរ៉ែ និងថាមពល គឺជាសសរទ្រូងសេដ្ឋកិច្ចដ៏សំខាន់ក្នុងការជំរុញកំណើនឧស្សាហកម្ម ទាក់ទាញការវិនិយោគទុនបរទេស និងគាំទ្រដល់ការអភិវឌ្ឍប្រកបដោយចីរភាព ដែលវិស័យនេះកំពុងត្រូវបានផ្លាស់ប្តូរទម្រង់ថ្មីជាបន្តបន្ទាប់ ដើម្បីឆ្លើយតបទៅនឹងតម្រូវការរបស់វិស័យឯកជន និងសេដ្ឋកិច្ចជាតិ និងបរិបទសកលលោក។

ជាការឆ្លើយតប ឯកឧត្តម រដ្ឋមន្ត្រីក្រសួងរ៉ែ និងថាមពល បានលើកឡើងថា វិស័យឯកជនគឺជាដៃគូរបស់រាជរដ្ឋាភិបាលដែលមិនអាចខ្វះបាន និងជាក្បាលម៉ាស៊ីនជំរុញកំណើនសេដ្ឋកិច្ចជាតិ ដោយរាជរដ្ឋាភិបាលបាននិងកំពុងយកចិត្តទុកដាក់យ៉ាងខ្លាំងក្នុងការដោះស្រាយបញ្ហាប្រឈមជាក់ស្តែងក្នុងវិស័យរ៉ែ និងថាមពល។

ជាមួយគ្នានេះ ឯកឧត្តម រដ្ឋមន្ត្រី បានស្នើឱ្យផ្នែកឯកជនទាំងអស់ប្រើប្រាស់យន្តការក្រុមការងារនៃយន្តការវេទិការាជរដ្ឋាភិបាល-ផ្នែកឯកជន ដែលមានសភាពាណិជ្ជកម្មកម្ពុជាជាច្រកចេញចូលតែមួយគត់ ដើម្បីលើកឡើងនូវបញ្ហាប្រឈម និងក្តីកង្វល់នានា សំដៅស្វែងរកដំណោះស្រាយ និងការសម្របសម្រួលពីសំណាក់ភាគីរាជរដ្ឋាភិបាល។ ឯកឧត្តម ក៏បានស្នើឱ្យសភាពាណិជ្ជកម្មកម្ពុជា បន្តរៀបចំឱ្យមានកិច្ចប្រជុំពិភាក្សារវាងរដ្ឋ និងឯកជនបែបនេះជាបន្តបន្ទាប់ ដោយមានការចូលរួមពីថ្នាក់ដឹកនាំតាមក្រសួង-ស្ថាប័ននីមួយៗ ដើម្បីបង្កើតឱ្យមានកិច្ចសន្ទនាដោយផ្ទាល់ និងមានតម្លាភាព ជាមួយតំណាងធុរជន និងក្រុមហ៊ុនឯកជន។

The post អ្នកឧកញ៉ា គិត ម៉េង អញ្ជើញជាសហប្រធានដឹកនាំកិច្ចប្រជុំពិភាក្សារវាង សភាពាណិជ្ជកម្មកម្ពុជា និង ក្រសួងរ៉ែ និងថាមពល appeared first on .

ក្នុងឱកាសដំណើរទស្សនកិច្ចនេះ អ្នកឧកញ៉ាប្រធាន និងគណៈប្រតិភូសភាពាណិជ្ជកម្មកម្ពុជា ត្រូវបានទទួល​ស្វាគមន៍​យ៉ាងកក់ក្តៅដោយ ឯកឧត្តម ម៉ម រិទ្ធី សមាជិកក្រុមប្រឹក្សាភិបាលនៃកំពង់ផែស្វយ័តភ្នំពេញ និងជាទីប្រឹក្សា​សម្តេចមហារដ្ឋសភាធិការធិបតីប្រធានរដ្ឋសភា តំណាងដ៏ខ្ពង់ខ្ពស់ ឯកឧត្តម អ្នកឧកញ៉ា ហ៊ឺ បាវី ប្រតិភូរាជរដ្ឋា​ភិបាលទទួលបន្ទុកជាប្រធានអគ្គនាយកកំពង់ផែស្វយ័តភ្នំពេញ ព្រមទាំងថ្នាក់ដឹកនាំ និងមន្ត្រីជាន់ខ្ពស់នៃកំពង់ផែ​ស្វយ័តភ្នំពេញ។

សភាពាណិជ្ជកម្មកម្ពុជា បានឱ្យដឹងថា ដំណើរទស្សនកិច្ចនេះ មានគោលបំណងស្វែងយល់ឱ្យកាន់តែច្បាស់​អំពី​វឌ្ឍនភាព សមត្ថភាព និងសក្តានុពលរបស់កំពង់ផែស្វយ័តភ្នំពេញ ព្រមទាំងតួនាទីដ៏សំខាន់របស់កំពង់ផែ ក្នុងការ​គាំទ្រដល់ការដឹកជញ្ជូន ការធ្វើពាណិជ្ជកម្ម និងការអភិវឌ្ឍសេដ្ឋកិច្ចរបស់កម្ពុជា។

តាមរយៈដំណើរទស្សនកិច្ចនេះ សភាពាណិជ្ជកម្មកម្ពុជាក៏បានស្វែងយល់បន្ថែមអំពីឱកាសនានា ក្នុងការពង្រឹង​កិច្ចសហការរវាងវិស័យឯកជន និងកំពង់ផែស្វយ័តភ្នំពេញ ដើម្បីរួមចំណែកលើកកម្ពស់ប្រសិទ្ធភាពប្រព័ន្ធដឹកជញ្ជូន និងពង្រឹងសមត្ថភាពប្រកួតប្រជែងរបស់កម្ពុជា ក្នុងតំបន់ និងលើឆាកអន្តរជាតិ។

ក្នុងឱកាសនោះ អ្នកឧកញ៉ាប្រធានបានលើកឡើងអំពីតួនាទី និងបណ្តាញរបស់សភាពាណិជ្ជកម្មកម្ពុជា ក្នុងការគាំទ្រ និងតំណាងឱ្យវិស័យឯកជន។ បច្ចុប្បន្ន សភាពាណិជ្ជកម្មកម្ពុជាមាននៅតាមបណ្តាខេត្តនានា ព្រមទាំងបានពង្រឹង និងពង្រីកបណ្តាញអន្តរជាតិ តាមរយៈបង្កើតការិយាល័យតំណាងសភាពាណិជ្ជកម្ម​កម្ពុជា​នៅក្រៅប្រទេស ចំនួន ៨ ការិយាល័យ រួមមាន៖ ប្រទេសជប៉ុន (តំបន់សេនដាយ) ប្រទេសកាណាដា (ទីក្រុងតូរ៉ុនតូ និងទីក្រុងម៉ុងរ៉េអាល់) សហរដ្ឋអាមេរិក (រដ្ឋកាលីហ្វ័រញ៉ា) ប្រទេសអូស្ត្រាលី (ទីក្រុងមែលប៊ន, ទីក្រុងស៊ីដនី និងទីក្រុងអាដេឡែត) និងប្រទេសនូវែលសេឡង់ (ទីក្រុងអូក្លង់)។ សភាពាណិជ្ជកម្ម​កម្ពុជា ក៏គ្រោង​នឹងបង្កើតការិយាល័យតំណាងនៅប្រទេសបារាំងនាពេលខាងមុខនេះ។

ជាមួយគ្នានេះ សភាពាណិជ្ជកម្មកម្ពុជាក៏មានតួនាទីសំខាន់ក្នុងក្រុមការងារនៃវេទិការរាជរដ្ឋាភិបាល-ផ្នែកឯកជន ដែលជាយន្តការដ៏សំខាន់សម្រាប់ប្រមូល និងលើកយកបញ្ហាប្រឈមរបស់វិស័យឯកជន ដើម្បីពិភាក្សា និងស្វែង​រកដំណោះស្រាយជាមួយរាជរដ្ឋាភិបាល ក្នុងគោលបំណងលើកកម្ពស់បរិយាកាសធុរកិច្ច និងការវិនិយោគ​នៅកម្ពុជា។

ដំណើរទស្សនកិច្ចនេះ បានបង្ហាញពីការយកចិត្តទុកដាក់របស់សភាពាណិជ្ជកម្មកម្ពុជា ក្នុងការស្វែងយល់ពី​តម្រូវការ និងសក្តានុពលនៃវិស័យដឹកជញ្ជូន និងភស្តុភារកម្ម ព្រមទាំងបន្តជំរុញកិច្ចសហការរវាងវិស័យឯកជន និងស្ថាប័នពាក់ព័ន្ធ ដើម្បីរួមចំណែកដល់ការអភិវឌ្ឍសេដ្ឋកិច្ច និងពង្រឹងភាពប្រកួតប្រជែង​របស់កម្ពុជាឱ្យកាន់តែ​ប្រសើរឡើង។

The post អ្នកឧកញ៉ា គិត ម៉េង ដឹកនាំគណៈប្រតិភូសភាពាណិជ្ជកម្មកម្ពុជា ចុះទស្សនកិច្ចសិក្សាពីវឌ្ឍនភាព និងប្រតិបត្តិការរបស់ចំណតផែកុងតឺន័រ LM១៧ នៃកំពង់ផែស្វយ័តភ្នំពេញ appeared first on .

បើតាមសភាពាណិជ្ជកម្មកម្ពុជា នាឱកាសនោះ លោកឧកញ៉ា អគ្គនាយក បានមានប្រសាសន៍ស្វាគមន៍យ៉ាងកក់ក្តៅចំពោះសមាជិក-សមាជិកាថ្មី និងបានបញ្ជាក់បន្ថែម អំពីប្រវត្តិ ក៏ដូចជាតួនាទី និងសកម្មភាពសំខាន់ៗរបស់សភាពាណិជ្ជកម្មកម្ពុជា ក្នុងការចូលរួមអភិវឌ្ឍវិស័យធុរកិច្ចឯកជន រាប់បញ្ចូលទាំងការដោះស្រាយបញ្ហាប្រឈម ការរៀបចំជំនួបពាណិជ្ជកម្ម ពិព័រណ៍ពាណិជ្ជកម្ម ក្នុងស្រុក និងក្រៅស្រុក និង ការរៀបចំព្រឹត្តិការណ៍ជំរុញធុរកិច្ចនិងវិនិយោគ ការផ្តល់នូវវគ្គបណ្តុះបណ្តាល  និងសិក្ខាសាលាផ្សេងៗ។

សូមជម្រាបថា ជាចុងបញ្ចប់នៃកម្មវិធី លោកឧកញ៉ា អគ្គនាយក បានអញ្ជើញប្រគល់លិខិតបញ្ជាក់សមាជិកភាពជាផ្លូវការ ជូនដល់សមាជិក-សមាជិកាថ្មី និងថតរូបទុកជាអនុស្សាវរីយ៍ផងដែរ៕

The post ឧកញ៉ា ងួន ម៉េងតិច ដឹកនាំរៀបចំពិធីស្វាគមន៍ និងសំណេះសំណាលជាមួយសមាជិក-សមាជិកាថ្មី របស់សភាពាណិជ្ជកម្មកម្ពុជា លើកទី៣៦ appeared first on .

នៅលើបណ្តាញសង្គមហ្វេសប៊ុក នាព្រឹកថ្ងៃទី២១ ខែសីហា ឆ្នាំ២០២៦នេះ អ្នកឧកញ៉ា លឹម ហេង អនុប្រធាន​សភាពាណិជ្ជកម្មកម្ពុជា បានលើកឡើងថា៖ “បើមានអ្នក​កៀបស៊ី បងប្អូនអាជីវករទាំងអស់បើមានមន្ត្រីខិលខូច ឬស្ថាប័នណាមួយកៀបស៊ី សូមអញ្ជើញមកកាន់សភាពាណិជ្ជកម្មតាមរាជធានីខេត្ត ដើម្បីធ្វើការដោះស្រាយជូន អរគុណ”។

ការលើកឡើងរបស់អ្នកឧកញ៉ា លឹម ហេង ខាងលើនេះ គឺបន្ទាប់ពីនៅថ្ងៃទី២០ ខែសីហា ឆ្នាំ២០២៦ អង្គភាព​ប្រឆាំងអំពើ​ពុករលួយ (ACU) និងសភាពាណិជ្ជកម្មកម្ពុជា (CCC) បានជួបពិភាក្សាបឋមនៅស្នាក់ការ​សភាពាណិជ្ជកម្មកម្ពុជាស្ថិតនៅអគារ Wing Tower លើចំណុចសំខាន់ៗ ជាកង្វល់របស់វិស័យឯកជន ដើម្បីរួមគ្នា​ចងក្រងជាអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការ ដែលគ្រោងនឹងចុះហត្ថលេខា នាពេលដ៏​ឆាប់​ខាងមុខនេះ។

ជំនួប ACU និង CCC បង្ហាញអំពីការពង្រឹងភាពជាដៃគូរវាងស្ថាប័នសាធារណៈ និងវិស័យឯកជន ក្នុងការបង្ការ ទប់ស្កាត់ និងប្រយុទ្ធប្រឆាំងអំពើពុករលួយ ព្រមទាំងលើកកម្ពស់សុចរិតភាព តម្លាភាព និងការគោរពច្បាប់ក្នុងការ​ប្រកបធុរកិច្ចនៅកម្ពុជា។

ឯកឧត្តមកិត្តិនីតិកោសលបណ្ឌិត ទេសរដ្ឋមន្រ្តី ឱម យ៉ិនទៀង ប្រធានអង្គភាពប្រឆាំងអំពើពុករលួយ មានប្រសាសន៍ថា៖ «យើងចង់ឱ្យកិច្ចសហប្រតិបត្តិការនេះ មិនមែនបញ្ចប់ត្រឹមការចុះហត្ថលេខាលើ MOU នោះទេ ប៉ុន្តែត្រូវក្លាយជា​យន្តការសហការជាក់ស្តែង ដែលជួយវិស័យឯកជន បង្ការ និងកាត់បន្ថយហានិភ័យនៃអំពើពុករលួយ ព្រមទាំងរួមគ្នាពង្រឹងពង្រីកការកសាងវប្បធម៌សុចរិតភាព»។

សូមជម្រាបថា ខ្លឹមសារ MOU គឺផ្តោតលើចំណុចសំខាន់ៗ ៖ ១) វិស័យឯកជនប្តេជ្ញាបដិសេធអំពើសូកប៉ាន់​និងអំពើពុករលួយ ២) ACU ប្តេជ្ញាគាំទ្រការការពារសុចរិតភាព និង៣)ការបង្កើតច្រកទំនាក់ទំនងរហ័ស សម្ងាត់ និងមានប្រសិទ្ធភាព។

The post អ្នកឧកញ៉ា ឧកញ៉ាៗម្ចាស់ក្រុមហ៊ុន លែងបារម្ភរឿងមានមន្ត្រីខិលខូច ឬស្ថាប័នរដ្ឋកៀបស៊ី ដោយ ACU ប្តេជ្ញាជួយបំបាត់អំពើពុករលួយ appeared first on .

កិច្ចប្រជុំពិភាក្សាដ៏សំខាន់នេះ ត្រូវបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម កិត្តិនីតិកោសល​បណ្ឌិត ទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយ នៃព្រះរាជាណាចក្រកម្ពុជា និងអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា, ប្រធានគណៈកម្មការសម្របសម្រួលក្រុមការងារ​ផ្នែកឯកជន សម្រាប់យន្តការវេទិការាជរដ្ឋាភិបាល-ផ្នែកឯកជន (គ.ស.ឯ.រ.ជ), និងជាប្រធានក្រុមប្រឹក្សា​ធុរកិច្ចអាស៊ានសម្រាប់កម្ពុជា (ASEAN BAC Cambodia) ដោយមានការចូលរួមពីថ្នាក់ដឹកនាំ មន្ត្រីជាន់ខ្ពស់ អ.ប.ព. និងតំណាងផ្នែកឯកជនជាច្រើនរូប។

សេចក្តីព្រាង MoU នេះ ត្រូវបានរៀបចំឡើងក្នុងគោលបំណងបង្កើតយន្តការសហប្រតិបត្តិការផ្លូវការ រវាងផ្នែកឯកជន និងស្ថាប័នអនុវត្តច្បាប់ ដើម្បីទទប់ស្កាត់ បង្ការ និងរារាំងអំពើពុករលួយ ព្រមទាំងលុប​បំបាត់ការចំណាយក្រៅផ្លូវការ និងភាពរាំងស្ទះនានាក្នុងសកម្មភាពធុរកិច្ច។ តាមរយៈកិច្ចពិភាក្សានេះ ភាគីទាំងពីរ គ្រោងនឹងចុះហត្ថលេខាជាផ្លូវការនៅសប្តាហ៍ក្រោយនេះ។

អ្នកឧកញ៉ា គិត ម៉េង បានមានប្រសាសន៍ថា គោលបំណងដែលសភាពាណិជ្ជកម្មកម្ពុជា ចង់ចុះហត្ថលេខា​លើកិច្ចព្រមព្រៀងជាមួយអង្គភាពប្រឆាំងអំពើពុករលួយ គឺដោយសារតែមានការស្នើសុំពីអាជីវករ ពាណិជ្ជករ វិនិយោគិនជាតិ និងអន្តរជាតិជាច្រើន។ អ្នកឧកញ៉ា បានបញ្ជាក់ថា ពេលនេះ គឺជាពេលវេលាដ៏ល្អ និងសក្តិសម​ក្នុងការឈានទៅចុះកិច្ចព្រមព្រៀងជាមួយអង្គភាពប្រឆាំងអំពើពុករលួយ ដើម្បីរួមចំណែកធ្វើឱ្យវិស័យ​ធុរកិច្ចនៅកម្ពុជាកាន់តែមានភាពរឹងមាំ រីកចម្រើន និងអាចទាក់ទាញការវិនិយោគថ្មីៗបានកាន់តែច្រើន។

ឯកឧត្តមកិត្តិនីតិកោសលបណ្ឌិត ឱម យ៉ិនទៀង បានបង្ហាញមោទនភាពចំពោះការចាប់ដៃគ្នាជាចំហរ រវាងអង្គភាព​ប្រឆាំងអំពើពុករលួយ និងសភាពាណិជ្ជកម្មកម្ពុជា ដែលជាស្ថាប័នតែមួយតំណាងឲ្យវិស័យឯកជននៅកម្ពុជា ក្នុងការរួមគ្នាប្រយុទ្ធប្រឆាំងអំពើពុករលួយ និងបង្កើនទំនុកចិត្តដល់វិនិយោគិនជាតិ និងអន្តរជាតិ ក្នុងការធ្វើធុរកិច្ច​នៅកម្ពុជា។

ឯកឧត្តមទេសរដ្ឋមន្ត្រី បានបញ្ជាក់ថា នៅក្នុងរបបសេដ្ឋកិច្ចទីផ្សារសេរី វិស័យឯកជនដើរតួនាទី​យ៉ាងសំខាន់​ក្នុងការជំរុញកំណើនសេដ្ឋកិច្ច បង្កើតការងារ និងចូលរួមកសាង និងអភិវឌ្ឍប្រទេសជាតិ។ ដូច្នេះ កង្វល់ និងបញ្ហាប្រឈមរបស់វិស័យឯកជន ក៏ជាកង្វល់ដែលរាជរដ្ឋាភិបាលត្រូវយកចិត្តទុកដាក់ និងរួមគ្នាស្វែងរក​ដំណោះស្រាយផងដែរ៕

The post អ្នកឧកញ៉ា គិត ម៉េង ដឹកនាំគណៈប្រតិភូសភាពាណិជ្ជកម្មកម្ពុជា ជួបពិភាក្សាជាមួយប្រធានអង្គភាព ACU ដើម្បីត្រៀមចុះ MoU ស្តីពីកិច្ចសហប្រតិបត្តិការប្រឆាំងអំពើពុករលួយ appeared first on .