ថវិកា និងគ្រឿងឧបភោគបរិភោគដែលយកទៅប្រគល់ជូននេះ បានមកពីអ្នកឧកញ៉ាបណ្ឌិត ជា រតនា និងអ្នកឧកញ៉ា លី ហៀក រតនា ព្រមទាំង លោកជំទាវ ខៀវ បុប្ជាផល ឥតសារ៉ាត់, ឯកឧត្ដម លោកជំទាវ, ឧកញ៉ា លោក លោកស្រី ពីស្ថាប័ន Corporate Connections (CC) និងក្រុមការងារនៃគណៈកម្មាធិការសិទ្ធិមនុស្ស បានថវិកាសរុប ប្រមាណ២២លានរៀល។

ថ្លែងនៅក្នុងឱកាសនោះ ទេសរដ្ឋមន្រ្តី កែវ រ៉េមី បានថ្លែងអំណរគុណចំពោះអ្នកឧកញ៉ា និងលោកជំទាវ ព្រមទាំងលោក លោកស្រី ដែលមានទឹកចិត្តសប្បុរធម៌ និងជួយដល់ក្មេងកំព្រាគ្មានទីពឹង។

ទេសរដ្ឋមន្ត្រីក៏បានសម្ដែងនូវការកោតសរសើរដល់សមាគម ដែលបានចូលរួមចំណែកយ៉ាងសំខាន់ក្នុងការលើកកម្ពស់ និងការការពារសិទ្ធិសេរីភាពជាមូលដ្ឋានរបស់កុមារ ជាពិសេស សិទ្ធិសុខភាពទាំងផ្លូវកាយនិងផ្លូវចិត្ត រួមទាំងសិទ្ធិទទួលបានការអប់រំ ជាដើម។ ទន្ទឹមនឹងនេះ ទេសរដ្ឋមន្រ្តី ក៏បានសាទរចំពោះការគ្រប់គ្រងប្រកបដោយភាពត្រឹមត្រូវ មិនមានការរំលោភបំពានដល់សិទ្ធិកុមារដែលរស់នៅទីនោះឡើយ។ លើសពីនេះទៅទៀត ឯកឧត្តមទេសរដ្ឋមន្រ្តី ក៏បានបញ្ជាក់ផងដែរថា ក្នុងករណីកុមាររស់នៅទីនេះមានបញ្ហាសុខភាពអាចទំនាក់ទំនងមកក្រុមការងារ គ.ស.ម.ក. ដើម្បីជួយអន្តរាគមន៍ក្នុងការនាំយកកុមារទៅកាន់មន្ទីរពេទ្យឱ្យទាន់ពេលវេលា។

អ្នកឧកញ៉ាបណ្ឌិត ជា រតនា មានប្រសាសន៍ថា៖ អ្នកឧកញ៉ា ពិតជាសូមកោតសរសើរដោយស្មោះចំពោះ លោក ប៉ែន សុផល ប្រធានសមាគមស្នាមញញឹមថ្មីនៃក្តីសង្ឃឹមរបស់កុមារ និងភរិយា ដែលមានទឹកចិត្តដ៏សប្បុរស និងលះបង់ខ្ពស់ ប្រឹងប្រែង ជួយយកអាសារចិញ្ចឹមបីបាច់ថែរក្សាក្មួយៗកុមារកំព្រា និងកុមារខ្វះខាតទាំងអស់ ព្រោះថា ទៅថ្ងៃអនាគត ពួកគាត់ទាំងអស់គ្នា មានឱកាសក្លាយខ្លួនជាធនធានមនុស្សដ៏ល្អ សម្រាប់សង្គមជាតិយើង។

ទន្ទឹមគ្នានេះ អ្នកឧកញ៉ាបណ្ឌិត ក៏មិនភ្លេចថ្លែងអំណរគុណចំពោះ ឯកឧត្ដមទេសរដ្ឋមន្រ្តី កែវ រ៉េមី ដែលបានយកចិត្តទុកដាក់លើបញ្ហាសិទ្ធិមនុស្សនៅកម្ពុជា ជាពិសេសក្មួយៗកុមារនៅទីនេះផ្ទាល់តែម្ដង ព្រោះថាបញ្ហាសិទ្ធិមនុស្ស គឺជាបញ្ហាសកលដែលប្រទេសនានានៅលើពិភពលោកតែងតែយកចិត្តទុកដាក់ខ្ពស់បំផុត។ បន្ថែមពីនេះ អ្នកឧកញ៉ាបណ្ឌិត ជា រតនា អគ្គនាយកក្រុមហ៊ុន SUN & MOON GROUP ក៏សូមអំពាវនាវដល់សប្បុរសជននានា ដែលមានធនធាន ហើយមានបំណងជួយគាំពា និងឧបត្ថម្ភគាំទ្រដល់កុមារកំព្រាអាណាព្យាបាល កុមារខ្វះខាតជីវភាព និងកុមារងាយរងគ្រោះជាដើម សូមបន្តចូលរួមជួយឧបត្ថម្ភដល់សមាគមស្នាមញញឹមថ្មី នៃក្ដីសង្ឃឹមរបស់កុមារ នេះផង។

លោក ប៉ែន សុផល ប្រធានសមាគមស្នាមញញឹមថ្មីនៃក្តីសង្ឃឹមរបស់កុមារ បានលើកឡើងថា សមាគមស្នាមញញឹមថ្មីនៃក្តីសង្ឃឹមរបស់កុមារបានកកើតឡើងនៅឆ្នាំ២០០២ និងបានចុះបញ្ជីទទួលស្គាល់ដោយក្រសួងមហាផ្ទៃនៅថ្ងៃទី ០៦ ខែ មិថុនា ២០១៦ ។ លោកបន្តថា ក្នុងនាមលោកជាប្រធានសមាគម ដែលនាំយកកុមារទាំងនោះមកចិញ្ចឹម បីបាច់ ថែរក្សា និងផ្គត់ផ្គង់ គឺគោលបំណង ដើម្បីឱ្យកុមារទាំងអស់ទទួលបាននូវសិទ្ធិ សេរីភាព សិទ្ធិរស់រានមានជីវិត សិទ្ធិទទួលបានការអប់រំរៀនសូត្រ សិទ្ធិទទួលបានការមើលថែទាំ និងសិទ្ធិទទួលបានអាហាររូបបឋម និងផ្តល់នូវភាពកក់ក្តៅ ផ្តល់ស្នាមញញឹម និងក្តីសង្ឃឹមដល់កុមារទាំងអស់នោះ ដូចជាកុមារឯទៀតនៅក្នុងពិភពលោកយើងនេះដែរ។

គួរបញ្ជាក់ថា អ្នកឧកញ៉ាបណ្ឌិត ជា រតនា និងលោកជំទាវ អ្នកឧកញ៉ា លី ហៀក រតនា កន្លងមកតែងតែចូលរួមយ៉ាងសស្រាក់សស្រាំក្នុងសកម្មភាពមនុស្សធម៌ ការជួយត្រឡប់ទៅសង្គម ជួយកសាងវត្តអារាម មន្ទីរពេទ្យ សាលារៀន ជួយឧបត្ថម្ភរថយន្តពេទ្យសង្គ្រោះបឋមរាប់សិបគ្រឿង ជួយដល់ស្ត្រីកែភេទ ដែលកំពុងស្ថិតក្នុងពន្ធធនាគារ, កុមារកំពុងមានឳពុកម្ដាយជាប់ពន្ធធនាគារ, ព្រមទាំង រួមទាំងចូលរួមបរិច្ចាគថវិកាទៅជូនកាកបាទក្រហមកម្ពុជា រៀងរាល់ឆ្នាំមិនដែលខាន ។ អ្វីដែលលើសពីនេះ និងមិនធ្លាប់មាន សប្បុរសជនណាបានគិតគូដល់ អ្នកឧកញ៉ាទាំងពីរ ក៏ជាស្ថាបនិក «មូលនិធិអ្នកឧកញ៉ាបណ្ឌិត ជា រតនា និងអ្នកឧកញ៉ា លីហៀក រតនា» ដែលផ្ដោតលើការជួយជនមានពិការភាពកំបុតដៃទាំង២ នៅទូទាំងប្រទេសកម្ពុជា ដោយផ្ដល់ទាំងថវិកា បង្កើតឱកាសឱ្យជនពិការកំបុតដៃទាំងពីររាប់ពាន់នាក់ ឱ្យទទួលឱកាសបានរៀនសូត្រចំណេះ ជំនាញ ផ្ដល់ដើមទុន យកទៅបង្កើតមុខចិញ្ចឹមជីវិតប្រចាំថ្ងៃថែមទៀតផង៕

The post ទេសរដ្ឋមន្រ្តី កែវ រ៉េមី និងអ្នកឧកញ៉ាបណ្ឌិត ជា រតនា ចុះសួរសុខទុក្ខ ព្រមទាំងសម្ភារៈមួយចំនួនជួយដល់សមាគមស្នាមញញឹមថ្មី នៃក្ដីសង្ឃឹមរបស់កុមារ appeared first on .