សម្តេចហ៊ុន សែន

រដ្ឋាភិបាល ប្រកាសប្រើប្រាស់ថវិកាជាតិ សាងសង់រោងចក្រផលិតវ៉ាក់សាំងប្រឆាំងកូវីដ

ឧកញ៉ាមហាសម្បត្តិ — Tue, 17 May 2022 02:24:16 +0000

ប្រមុខរដ្ឋាភិបាលបានប្រកាសនៅព្រឹកនេះ រដ្ឋាភិបាលនឹងប្រើប្រាស់ថវិកាជាតិដើម្បីបង្កើតរោងចក្រផលិតវ៉ាក់សាំងកូវីដ ១៩។

ការលើកឡើងស្របពេលកន្លងទៅ រដ្ឋាភិបាលបានផ្តល់អាជ្ញាបណ្ណដល់ផ្នែកឯកជន បង្កើតរោងចក្រផលិតវ៉ាក់សាំងហាក់មានភាពយឺតយ៉ាវ។

សម្តេចតេជោ ហ៊ុន សែនបានបញ្ជាក់ថា មកដល់ម៉ោងនេះជាច្រើនខែដូចគ្មានព័ត៌មានពីរោងចក្រនេះសោះ រហូតដល់ខាងមិត្តចិនបានសាកសួរត្រឡប់មកវិញដោយសារមានភាពយឺតយ៉ាវពេក។

សម្តេចបន្តថា ឥលូវនេះរដ្ឋាភិបាលនឹងចេញមុខដោយប្រើប្រាស់ថវិកាជាតិពីក្រសួងសេដ្ឋកិច្ចយកទៅបង្កើតរោងចក្រផលិតវ៉ាក់សាំងកូវីដនេះ។

បើតាមប្រមុខរដ្ឋាភិបាល រោងចក្រផលិតវ៉ាក់សាំងនេះមិនត្រឹមតែសម្រាប់ផលិតវ៉ាក់សាំងកូវីដ អនាគតអាចនឹងប្រើប្រាស់ផលិតវ៉ាក់សាំងដទៃទៀត។

ក្នុងពិធីសម្ពោធកំណាត់ផ្លូវជាតិលេខ ១១ ក្នុងខេត្តព្រៃវែងកន្លងមក ប្រមុខរដ្ឋាភិបាលកម្ពុជាបានបញ្ជាក់ថា កម្ពុជានឹងបើករោងចក្រផលិតវ៉ាក់សាំងក្នុងស្រុកនាឆ្នាំ២០២២ ក្រោយក្រុមហ៊ុនក្នុងស្រុកទទួលបានសិទ្ធិផលិតវ៉ាក់សាំងបន្តពីប្រទេសចិន។

សម្តេចតេជោ ហ៊ុន សែន អះអាងថា បច្ចុប្បន្នរដ្ឋាភិបាលនិងក្រុមហ៊ុនផលិតវ៉ាក់សាំងរបស់ចិនបានគាំទ្រ និងយល់ព្រមផ្តល់សិទ្ធិឱ្យកម្ពុជាលទ្ធភាពសាងសង់រោងចក្រផលិតវ៉ាក់សាំងក្នុងប្រទេស ខណៈក្រុមហ៊ុនដែលទទួលសិទ្ធផលិតវ៉ាក់សាំង ក៏បានចុះហត្ថលេខាលើកិច្ចព្រមព្រៀងរួចហើយផងដែរ។

យ៉ាងណាថ្លែងជាថ្មីនៅព្រឹកនេះ ភាពយឺតយ៉ាវនេះជំរុញឲ្យរដ្ឋាភិបាលពិចារណាដកអាជ្ញាប័ណ្ណមកវិញ ហើយនឹងប្រើប្រាស់ថវិកាជាតិបង្កើតរោងចក្រនេះផ្ទាល់តែម្តង ដែលនឹងផ្តល់លទ្ធភាពដល់កម្ពុជាអាចផ្គត់ផ្គង់វ៉ាក់សាំងដល់ប្រជាពលរដ្ឋដោយខ្លួនឯងផ្ទាល់៕

The post រដ្ឋាភិបាល ប្រកាសប្រើប្រាស់ថវិកាជាតិ សាងសង់រោងចក្រផលិតវ៉ាក់សាំងប្រឆាំងកូវីដ appeared first on .

ទំហំពាណិជ្ជកម្មកម្ពុជាវៀតណាមឆ្នាំ២០២២ អាចកើនដល់ ១០ ពាន់លានដុល្លារ

ឧកញ៉ាមហាសម្បត្តិ — Thu, 12 May 2022 04:33:16 +0000

សម្តេចតេជោបានលើកឡើងចំពោះជនរួមជាតិនៅសហរដ្ឋអាមេរិកនៅព្រឹកនេះថា ទំហំពាពាណិជ្ជកម្មកម្ពុជាវៀតណាមបានកើនឡើងខ្លាំងរយៈពេល៣ឆ្នាំចុងក្រោយនេះ។

នៅឆ្នាំ២០២១ ទំហំពាណិជ្ជកម្មរវាងប្រទេសទាំងពីរ សម្រេចបានរហូតដល់ ៩៥០០ លានដុល្លារ ខណៈ ៤ ខែដើមឆ្នាំ២០២២នេះ សម្រេចបាន៤ពាន់លាន ដូច្នេះឆ្នាំនេះអាចឡើងដល់១០ពាន់លានដុល្លារ។ នេះបើតាមប្រមុខរដ្ឋាភិបាលសម្តេចតេជោ ហ៊ុន សែន បានបញ្ជាក់ក្នុងខណៈជួបសំណេះសំណាលជាមួយ ប្រជាពលរដ្ឋខ្មែររស់នៅសហរដ្ឋអាមេរិក និងកាណាដា ប្រមាណជាង២ពាន់នាក់នៅព្រឹកថ្ងៃទី១២ ខែឧសភា ឆ្នាំ២០២២។

សម្ដេចតេជោ ហ៊ុន សែន បានអះអាងថា ទំហំនៃការនាំចូលរបស់កម្ពុជាទៅវៀតណាមគឺច្រើនជាងវៀតណាមនាំចូលនៅកម្ពុជា។ សម្តេចតេជោបញ្ជាក់ថា ក្នុងនាមប្រទេសជិតខាងត្រូវសន្ទនាគ្នា ហើយក៏មិនត្រឹមតែជាមួយវៀតណាមទេ ត្រូវធ្វើជាមួយប្រទេសទាំងអស់ដើម្បីពង្រីកទំហំពាណិជ្ជកម្ម ក៏ដូចជាកិច្ចសហប្រតិបត្តិការផ្សេងៗទៀត។

ជាមួយគ្នានេះសម្តេចនាយករដ្ឋមន្ត្រី ហ៊ុន សែន ក៏បានបង្ហាញពីពាណិជ្ជកម្មកម្ពុជា និងអាមេរិក ដោយកម្ពុជាបាននាំចេញទៅអាមេរិកមានរហូតដល់ជាង ៩ពាន់លានដុល្លារអាមេរិក ស្របពេលដែលក្រុមហ៊ុនអាមេរិកជាច្រើនកំពុងតែវិនិយោគនៅក្នុងប្រទេសកម្ពុជា និងកំពុងធ្វើការទាក់ទាញការវិនិយោគថ្មីៗបន្ថែមទៀត។

សម្តេចតេជោ ហ៊ុន សែន ក៏បានលើកឡើងពីស្ថានភាពសេដ្ឋកិច្ចកម្ពុជាដោយសារវិបត្តិសង្គ្រាមរុស្ស៉ី និងអ៊ុយក្រែន ធ្វើឱ្យកម្ពុជាទម្លាក់ការព្យាករណ៍កំណើនសេដ្ឋកិច្ចពី ៥.៦% មកនៅត្រឹម ៥.២% សម្រាប់ឆ្នាំ២០២២៕

The post ទំហំពាណិជ្ជកម្មកម្ពុជាវៀតណាមឆ្នាំ២០២២ អាចកើនដល់ ១០ ពាន់លានដុល្លារ appeared first on .

សម្តេចតេជោប្រកាស កូនប្រសាម្នាក់មានសមត្ថភាពអាចបើកយន្តហោះបាន

ឧកញ៉ាមហាសម្បត្តិ — Tue, 03 May 2022 03:00:23 +0000

សម្តេចតេជោ ហ៊ុន សែនបានប្រកាសជាសាធារណៈថា កូនប្រសារម្នាក់មានសមត្ថភាពអាចបើកយន្តហោះបាន។

សម្តេចប្រកាសយ៉ាងដូច្នេះថា ក្នុងគ្រួសារមានកូនប្រសារសម្តេចម្នាក់ជាភីឡុត ដែលមានសមត្ថភាពអាចបើកយន្តហោះបាន ហើយដែលសម្តេចអាចពឹងពាក់បានក្នុងគ្រាបន្ទាន់ណាមួយ។

យ៉ាងណាមិញ សម្តេចមិនបញ្ចេញឈ្មោះកូនប្រកាសរូបណានោះទេ ដែលជាភីឡុតមានសមត្ថភាពអាចបើកបរយន្តហោះ។

ប្រមុខរដ្ឋាភិបាលមានកូនប្រសាចំនួន ៥ នាក់មានដូចជា លោក ឌី វិជ្ជា (ស្វាមីលោកជំទាវ ហ៊ុន ម៉ាណា) លោកជំទាវ ពេជ ចន្ទមុនី (ភរិយាលោក ហ៊ុន ម៉ាណែត) លោក សុខ ពុទ្ធីវុធ (ស្វាមីលោកជំទាវ ហ៊ុន ម៉ាលី) លោកជំទាវ យឹម ឆៃលីន (ភរិយាលោក ហ៊ុន ម៉ានី) និងលោកជំទាវ ឌី សុខីទីឃាយុកោ (ភរិយាលោក ហ៊ុន ម៉ានិត)៕

The post សម្តេចតេជោប្រកាស កូនប្រសាម្នាក់មានសមត្ថភាពអាចបើកយន្តហោះបាន appeared first on .

ក្រៅពី instagram សម្តេចតេជោ ក៏មានប្រើទាំង Twitter និង YouTube

ឧកញ៉ាមហាសម្បត្តិ — Tue, 03 May 2022 02:26:16 +0000

ថ្លែងក្នុងពិធីជួបសំណេះសំណាលសិស្សនិទ្ទេស A នៅព្រឹកនេះ ប្រមុខរដ្ឋាភិបាលសម្តេចតេជោហ៊ុន សែន ក្រោយប្រកាសប្រើប្រាស់ instagram សម្តេចក៏បញ្ជាក់ថាក៏មាន Twitter និង YouTube កំពុងប្រើប្រាស់ផងដែរ។

សម្តេចថ្លែងថា សម្តេចបានប្រើប្រាស់ instagram ជាយូរមកហើយ ដោយគ្រាន់តែមិនចង់បង្ហាញប៉ុណ្ណោះ។ ដោយឡែក YouTube និង Twitter ក៏សម្តេចបានរៀបចំសម្រាប់ទុកប្រើប្រាស់នោះដែរ។

ក្នុងឱកាសនោះដែរ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ក៏បានក្រើនរំលឹកឱ្យមន្រ្តីរាជការទាំងអស់ត្រូវធ្វើអក្ខរកម្មព័ត៌មានវិទ្យា ដើម្បីឆ្លើយតបទៅនឹងតម្រូវការផ្សេងៗក្នុងភារកិច្ចរបស់ខ្លួន។

កន្លងមក សម្តេចតេជោធ្លាប់ប្រកាសដាក់ចេញគោលនយោបាយ ដោយមិនឱ្យតែងតាំងមន្រ្តីដែលមិនចេះប្រើប្រាស់បច្ចេកវិទ្យាស្មាតហ្វូនទេ។

សម្តេចតេជោ ហ៊ុន សែន បានលើកឡើងថា សម្តេចតែងយកទូរស័ព្ទជាប់ខ្លួនគ្រប់ពេល ដើម្បីចាត់ចែងការងារ និងការទទួលព័ត៌មានសំខាន់ៗផ្សេងពីមន្រ្តី៕

The post ក្រៅពី instagram សម្តេចតេជោ ក៏មានប្រើទាំង Twitter និង YouTube appeared first on .

សម្តេច ហ៊ុន សែន ប្រកាសមិនឱ្យមានការសាងសង់អាគារខ្ពស់ៗ ក្នុងខេត្តសៀមរាប

ឧកញ៉ាមហាសម្បត្តិ — Mon, 04 Apr 2022 02:34:12 +0000

ថ្លែងក្នុងពេលសម្ពោធដាក់ឱ្យប្រើប្រាស់សមិទ្ធផលផ្លូវ៣៨ខ្សែ នៅខេត្តសៀមរាប កាលថ្ងៃទី៤ ខែមេសា ឆ្នាំ២០២២នេះ សម្ដេចតេជោ ហ៊ុន សែន បានប្រកាសមិនអនុញ្ញាតឱ្យមានការសាងសង់អាគារខ្ពស់ណាមួយ ក្នុងខេត្តសៀមរាប ដែលជាតំបន់បេតិភណ្ឌពិភពលោកនោះឡើយ។

សម្តេច ហ៊ុន សែន បានលើកឡើងថា«យើងមិនសម្លាប់មេមាន់គ្រាន់តែដើម្បីឆ្ញាញ់មួយពេលនោះទេ យើងត្រូវចិញ្ចឹមមេមាន់ឱ្យបានល្អដើម្បីទទួលពងរបស់វាឱ្យបានច្រើន។ ហេតុនេះ សម្តេចបានប្រកាសថារដ្ឋាភិបាលកម្ពុជានឹងមិនអនុញ្ញាតឱ្យមានការសាងសង់អាគារខ្ពស់ៗក្នុងខេត្តសៀមរាបនោះឡើង គឺដើម្បីកុំអោយអង្គរវត្តកម្ពុជាបាត់បង់ឋានៈជាបេតិភណ្ឌពិភពលោក ហើយកម្ពុជានឹងបន្តគោរពគោលការណ៍ ការណែនាំរបស់អង្គការយូនីស្គូជានិច្ច។

ជាមួយគ្នានេះ សម្តេចក៏បានប្រាប់ទៅកាន់អង្គការយូនីស្គូ និងដៃគូអភិរក្សតំបន់បេតិភណ្ឌកម្ពុជា សូមកុំឱ្យមានការបារម្ភចំពោះបញ្ហានេះ ដោយថារដ្ឋាភិបាលមិនអនុញ្ញាតឱ្យមានរឿងសាងសង់អគារខ្ពស់ៗណាមួយកើតឡើងនោះទេ។

គួរបញ្ជាក់ថា ឆ្លៀតក្នុងឪកាសនោះដែរ សម្តេច ហ៊ុន សែន ក៏បានស្នើរសុំឱ្យអង្គការអន្តរជាតិក៏ដូចជាប្រទេសដៃគូរដែលធ្វើជាសហប្រធាន ICC គឺមានជប៉ុន និងបារាំងដែលត្រៀមចុះហត្ថលេខាធ្វើការសម្រាប់រយៈពេល១០ឆ្នាំបន្តទៀតកុំមានការស្ទាក់ស្ទើរអី ដែលនេះជាការបញ្ជាក់ពីនាយករដ្ឋមន្ត្រីនៃព្រះរាជាណាចក្រកម្ពុជា។
មិនតែប៉ុណ្ណោះ សម្តេច ក៏បានឲ្យដឹងថា រដ្ឋាភិបាលក៏កំពុងរៀបចំសំណុំឯកសារទាំងឡាយដាក់តំបន់ផ្សេងទៀតនៅខេត្តសៀមរាប ដើម្បីចូលជាបញ្ជីបេតិកភណ្ឌពិភពលោកនាពេលខាងមុខថែមទៀត៕

អត្ថបទ៖ រង្សី

The post សម្តេច ហ៊ុន សែន ប្រកាសមិនឱ្យមានការសាងសង់អាគារខ្ពស់ៗ ក្នុងខេត្តសៀមរាប appeared first on .

ផ្លូវជាតិលេខ ៦ ចូលក្រុងសៀមរាបនឹងពង្រីកពី ២ គន្លងទៅ ៤ គន្លង

ជំទាវឧកញ៉ាស្រីទីន — Sun, 03 Apr 2022 03:09:31 +0000

ថ្លែងក្នុងពេលចុះពិនិត្យការដ្ឋានសាងសង់ព្រលានយន្តហោះថ្មីខេត្តសៀមរាប សម្តេចតេជោ ហ៊ុន សែនបានលើកឡើងពីគម្រោងពង្រីកផ្លូវជាតិលេខ ៦ ពី ២ គន្លងទៅ ៤ គន្លងសម្រាប់សម្រួលការធ្វើដំណើររនៅពេលព្រលានយន្តហោះថ្មីខេត្តសៀមរាបដាក់ឲ្យប្រើប្រាស់ ដែលនឹងរុញកំណើនការធ្វើដំណើររបស់ភ្ញៀវទេសចរមានការកើនឡើង។

សម្តេចតេជោ ហ៊ុន សែន បានថ្លែងថា ត្រូវបន្តរួមគ្នាជំរុញការអភិវឌ្ឍនៅតំបន់សាងសង់ព្រលានយន្តហោះថ្មីក្នុងខេត្តសៀមរាប ដូចជាតភ្ជាប់បណ្តាញអគ្គិសនី ផ្គត់ផ្គង់ទឹកស្អាត និងសាងសង់ផ្លូវ ដែលមានផ្លូវល្បឿនលឿនចេញពីព្រលាន និងត្រូវពង្រីកផ្លូវជាតិលេខ៦ ជា៤គន្លងសម្រាប់ចូលទៅក្រុងសៀមរាប។

គម្រោងសាងសង់អាកាសយានដ្ឋានអន្តរជាតិ សៀមរាប-អង្គរ បច្ចុប្បន្នសម្រេចបានប្រមាណ ២២ភាគរយ នៃផែនការសរុប។ អាកាសយានដ្ឋានអន្តរជាតិ ដែលស្ថិតនៅក្នុងឃុំពពេល និងឃុំតាយ៉ែក ស្រុកសូទ្រនិគម ខេត្តសៀមរាប ចាប់ផ្តើមសាងសង់នៅថ្ងៃទី១៥ ខែមីនា ឆ្នាំ២០២០ ហើយគ្រោងប្រើរយៈពេលសាងសង់សរុបចំនួន ៣៦ខែ ឬ ៣ឆ្នាំ ដោយបានប្រើប្រាស់កម្មករប្រមាណជាង ១,០០០នាក់ ក្នុងនោះ ៧០ភាគរយជាពលករខ្មែរ។

អាកាសយានដ្ឋានអន្តរជាតិសៀមរាប-អង្គរ គ្រោងចំណាយទុនវិនិយោគប្រមាណ ៨៨០លានដុល្លារអាមេរិក។ តាមគម្រោងអាកាសយានដ្ឋាននេះ គ្រោងនឹងបញ្ចប់ការសាងសង់នៅថ្ងៃទី៣០ ខែមីនា ឆ្នាំ២០២៣ និងដំណើរការសាកល្បង ជាលើកដំបូងនៅខែតុលា ឆ្នាំ២០២៣។

ជាមួយគម្រោងព្រលានយន្តហោះថ្មីខេត្តសៀមរាបដែលកំពុងដំណើរការសាងសង់ រដ្ឋាភិបាលក៏គ្រោងសាងសង់ផ្លូវល្បឿនលឿន និងហេដ្ឋារចនាសម្ព័ន្ធតភ្ជាប់ពីព្រលានយន្តហោះថ្មីដែលមានចម្ងាយជាង ៤០ គីឡូម៉ែត្រពីក្រុងសៀមរាប។ សម្តេចតេជោ ហ៊ុន សែន បានណែនាំឱ្យទេសរដ្ឋមន្ត្រី លោក ស៊ុន ចាន់ថុល ខ្ចីថវិកាចិនសម្រាប់ការសាងសង់ផ្លូវចូលទៅក្រុងសៀមរាប៕

The post ផ្លូវជាតិលេខ ៦ ចូលក្រុងសៀមរាបនឹងពង្រីកពី ២ គន្លងទៅ ៤ គន្លង appeared first on .

នាយករដ្ឋមន្រ្តីកម្ពុជា ចេញលិខិតផ្ទាល់សរសើរដល់សហគ្រាសផលិតភេសជ្ជៈមួយ បង់ពន្ធច្រើនជាងគេរហូតបានសារពើពន្ធប្រភេទមាស

ឧកញ៉ាមហាសម្បត្តិ — Fri, 01 Apr 2022 04:11:36 +0000

តាមរយៈការចូលរួមបំពេញកាតព្វកិច្ចបង់ពន្ធដារផ្ទៃក្នុងជូនរដ្ឋ សម្តេចតេជោ ហ៊ុន សែន បានចេញលិខិតថ្លែងអំណរគុណ និងកោតសរសើរចំពោះសហគ្រាស ហ៉ិននីគែន (ខេមបូឌា) ឯ.ក (HEINEKEN (CAMBODIA) CO., LTD) ជាសហគ្រាសដែលជាប់ចំណាត់ថ្នាក់លេខ១ ក្នុងចំណោមសហគ្រាសដែលបានបង់ពន្ធច្រើនជាងគេ និងទទួលបានអនុលោមភាពសារពើពន្ធប្រភេទមាស ក្នុងឆ្នាំ២០២១។

ក្នុងលិខិតជូនដល់សហគ្រាស ហ៉ិននីគែន ប្រមុខរដ្ឋាភិបាលបានលើកឡើងយ៉ាងដូច្នេះថា «ការបំពេញកាតព្វកិច្ចបង់ពន្ធរបស់សហគ្រាសលោក-លោកស្រី គឺជាការចូលរួមចំណែក ដែលមិនអាចខ្វះបាន ពីវិស័យឯកជនដែលជាដៃគូដ៏សំខាន់របស់រដ្ឋ និងជាកម្លាំងចលករសម្រាប់ការអភិវឌ្ឍ និងរីកលូតលាស់នៃសេដ្ឋកិច្ច និងសង្គមជាតិកម្ពុជា។

គួរបញ្ជាក់ដែរថា ក្រុមហ៊ុន ហ៉ិននីគែន ក៏ជាក្រុមហ៊ុនទី១ ដែលបានបំពាក់ឧបករណ៍វាស់ចំណុះស្រាបៀរមុនគេ ដែលជាគំរូមួយដ៏ល្អ ជំរុញឲ្យមានតម្លាភាពក្នុងការបង់ពន្ធ និងមានការប្រកួតប្រជែងដោយស្មើភាព។

The post នាយករដ្ឋមន្រ្តីកម្ពុជា ចេញលិខិតផ្ទាល់សរសើរដល់សហគ្រាសផលិតភេសជ្ជៈមួយ បង់ពន្ធច្រើនជាងគេរហូតបានសារពើពន្ធប្រភេទមាស appeared first on .

គណៈរដ្ឋមន្រ្តីអនុម័តច្បាប់វិសោធនកម្មថ្មី បង្កើនចំនួនគណៈអភិបាលរាជធានី-ខេត្តដល់ ១១ រូប

ជំទាវឧកញ៉ាស្រីទីន — Fri, 01 Apr 2022 03:53:21 +0000

តាមកិច្ចប្រជុំគណៈរដ្ឋមន្ត្រី ដឹកនាំដោយសម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅព្រឹកថ្ងៃសុក្រនេះ បានសម្រេចអនុម័តទាំងស្រុងលើ «សេចក្ដីព្រាងច្បាប់ ស្ដីពីវិសោធនកម្មមាត្រា១៤០ នៃច្បាប់ស្ដីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ» ដែលនឹងបើកផ្លូវឱ្យបង្កើនចំនួនសមាសភាពគណៈអភិបាលរាជធានី ខេត្ត ក្រុង ស្រុក និងខណ្ឌ ច្រើនជាងមុន។

ក្នុងមាត្រា១៤០ចាស់ ដែលប្រកាសឱ្យប្រើដោយព្រះរាជក្រមលេខ នស/រកម/០៥០៨/០១៧ ចុះថ្ងៃទី២៤ ខែឧសភា ឆ្នាំ២០០៨ បានកំណត់ចំនួនសមាសភាពគណៈអភិបាលរាជធានី ខេត្ត ក្រុង ស្រុក ខណ្ឌដូចខាងក្រោម៖

* គណៈអភិបាលរាជធានីភ្នំពេញមានចំនួនយ៉ាងច្រើន៧រូប។
* គណៈអភិបាលខេត្តមានចំនួនពី ៣រូប ទៅ ៧រូប។
* គណៈអភិបាលក្រុង ស្រុក ខណ្ឌមានចំនួនពី ៣រូប ទៅ ៥រូប។
* ចំនួនជាក់ស្តែងនៃគណៈអភិបាល សម្រាប់ខេត្ត ក្រុង ស្រុក ខណ្ឌ ត្រូវកំណត់ដោយអនុក្រឹត្យតាមសំណើរបស់រដ្ឋមន្ត្រីក្រសួងមហាផ្ទៃ។

ដោយឡែកមាត្រា១៤០ថ្មី ដែលបានធ្វើវិសោធនកម្ម ហើយត្រូវបានគណៈរដ្ឋមន្ត្រីអនុម័តនាព្រឹកនេះ បានកំណត់ចំនួនសមាសភាពគណៈអភិបាលរាជធានី ខេត្ត ក្រុង ស្រុក ខណ្ឌដូចខាងក្រោម៖

* គណៈអភិបាលរាជធានីភ្នំពេញមានចំនួនយ៉ាងច្រើន ១១រូប។
* គណៈអភិបាលខេត្តមានចំនួនពី ៧រូប ទៅ១១រូប។
* គណៈអភិបាលក្រុង ស្រុក ខណ្ឌ មានចំនួនពី ៥រូប ទៅ ៧រូប។ ចំនួនជាក់ស្តែងនៃគណៈអភិបាលសម្រាប់រាជធានី ខេត្ត ក្រុង ស្រុក ខណ្ឌ ត្រូវកំណត់ដោយអនុក្រឹត្យតាមសំណើរបស់រដ្ឋមន្ត្រីក្រសួងមហាផ្ទៃ។

សេចក្តីព្រាងច្បាប់ស្តីពីវិសោធនកម្មមាត្រា១៤០នេះ ក៏បានចែងដែរថា ចំនួនគណៈអភិបាលសម្រាប់រាជធានី ខេត្ត ក្រុង ស្រុក ខណ្ឌនីមួយៗ នឹងត្រូវបានសិក្សា និងពិនិត្យឡើងវិញ ដោយធ្វើការគិតគូរផ្អែកលើកត្តាមួយចំនួនដែលរួមមាន ចំនួនសមាជិកក្រុមប្រឹក្សានៃរាជធានី ខេត្ត ក្រុង ស្រុកខណ្ឌនីមួយៗ កត្តាភូមិសាស្ត្រ និងកត្តាប្រជាសាស្ត្រនៃរាជធានី ខេត្ត ក្រុង ស្រុក ខណ្ឌនីមួយៗ ដើម្បីជាមូលដ្ឋានក្នុងការសម្រេចដាក់ចេញនូវអនុក្រឹត្យស្តីពីការកំណត់ចំនួនគណៈអភិបាលរាជធានី ខេត្ត ក្រុង ស្រុក ខណ្ឌ បន្ទាប់ពីច្បាប់ស្តីពីវិសោធនកម្មមាត្រា១៤០នេះ ចូលជាធរមាន៕

The post គណៈរដ្ឋមន្រ្តីអនុម័តច្បាប់វិសោធនកម្មថ្មី បង្កើនចំនួនគណៈអភិបាលរាជធានី-ខេត្តដល់ ១១ រូប appeared first on .

ប្រៀបធៀបចំណូលពន្ធដារ ៣ ខែ ដើមឆ្នាំ២០២២ ខុសគ្នាយ៉ាងណា?

ជំទាវឧកញ៉ាស្រីទីន — Thu, 31 Mar 2022 03:32:14 +0000

សម្តេចតេជោ ហ៊ុន សែន បានថ្លែងនៅព្រឹកនេះថា ថ្ងៃ ៣០ ខែមីនាជាថ្ងៃដែលសម្តេចសប្បាយចិត្តខ្លាំងជាងគេ ដោយសារពន្ធដារបានបំបែកឯកទគ្គកម្មសម្រាប់ការប្រមូលពន្ធបានច្រើនបំផុតជាប្រវត្តិសាស្រ្ត។

សម្តេចតេជោ បានបញ្ជាក់ក្នុងពិធីសម្ពោធសមិទ្ធផលស្ពានអាកាសនិងផ្លូវក្រោមដីចោមចៅថា រយៈពេលមួយខែមីនានេះ ពន្ធដារអាចរកចំណូលប្រមាណ ៧០០ លានដុល្លារ។ ខែមករាប្រមាណ ២៨៨ លាន ខែកុម្ភៈប្រមាណ២២៣លាន សរុបរយៈពេល៣ខែឆ្នាំ២០២២ ចំណូលបានជាង១២០០លានដុល្លារ។

សម្តេចថា ម្សិលមិញគឺជាពេលវេលាដែលសម្តេចសប្បាយចិត្តឥតឧបមាបំផុត ពីព្រោះជាថ្ងៃបំបែកឯកត្តកម្មសម្រាប់ចំណូលផ្ទៃក្នុង ពោលគឺរកចំណូលពីពន្ធបានច្រើនបំផុតក្នុង១ថ្ងៃមិនធ្លាប់មាន។ ថ្ងៃទី ៣០ មីនា ម្សិលមិញនេះ រដ្ឋប្រមូលចំណូលពន្ធផ្ទៃក្នុងបានដល់ទៅជាង ២៣៦លានដុល្លារអាមេរិកឯណោះ ដែលតួលេខនេះគឺខ្ពស់មិនធ្លាប់មាន។

ថ្មីៗនេះ ប្រមុខរដ្ឋាភិបាលបានកោតសរសើរនិងវាយតម្លៃខ្ពស់ដល់លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារនិងថ្នាក់ដឹកនាំ ព្រមទាំងមន្ត្រី រាជការទាំងអស់នៃអគ្គនាយកដ្ឋានពន្ធដារនៃក្រសួងសេដ្ឋកិច្ចនិងហិរញ្ញវត្ថុ ដែលបានខិតខំអស់ពីកម្លាំងកាយចិត្តក្នុងការបំពេញ បេសកកម្មយ៉ាងជោគជ័យដោយបានប្រមូលចំណូលពន្ធដារផ្ទៃក្នុងជូនរដ្ឋបានលើសផែនការដែលកំណត់ដោយច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០២១ ចំនួន ១២៤,០២ ភាគរយ នៃផែនការប្រចាំឆ្នាំ។

ការសម្រេចបានលទ្ធផលដ៏ល្អប្រសើរនេះ ជាកំណត់ត្រាប្រវត្តិសាស្រ្តនៃការប្រមូលចំណូលពន្ធ ដែលអគ្គនាយកដ្ឋានពន្ធដារសម្រេចបានលើសផែនការរហូតដល់ ២៤,០២ ភាគរយ ស្មើនឹង ២ ១៨២,៣៧ ប៊ីលានរៀល ប្រមាណជា ៥៣៨,៨៥ លានដុល្លារ៕

The post ប្រៀបធៀបចំណូលពន្ធដារ ៣ ខែ ដើមឆ្នាំ២០២២ ខុសគ្នាយ៉ាងណា? appeared first on .

ចំណតកំពង់ផែស្វយ័តខេត្តព្រះសីហនុចាយថវិកាជាង ២០០ លានដុល្លារ គូសប្លង់រួចរាល់ ចាប់ផ្តើមសាងសង់នៅឆ្នាំនេះ

ឧកញ៉ាសម្រែ — Mon, 21 Mar 2022 02:30:35 +0000

គម្រោងអភិវឌ្ឍន៍កំពង់ផែទឹកជ្រៅខេត្តព្រះសីហនុ ដែលទទួលបានប្រាក់កម្ចីជាង ២០០លានដុល្លារពីរដ្ឋាភិបាលជប៉ុន នឹងចាប់ផ្តើមដំណើរការសាងសង់នៅឆ្នាំ២០២២ និងបញ្ចប់នៅដើមឆ្នាំ២០២៥។

បច្ចុប្បន្ននេះ ការអភិវឌ្ឍចំណតកំពង់ផែស្វយ័តក្រុងព្រះសីហនុក្នុងជំហានទី១ ដែលមានប្រវែង ៣៥០ម៉ែត្រ និងជម្រៅទឹក ១៤.៥ម៉ែត្រ សម្រេចបានការគូសប្លង់រួចរាល់ហើយ និងកំពុងដំណើរការដេញថ្លៃ។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោក គីស៊ីដា ហ្វឺមីអូ នាយករដ្ឋមន្រ្តីជប៉ុន ដែលកំពុងធ្វើដំណើរទស្សនកិច្ចនៅកម្ពុជាបានឯកភាពគ្នាសហការយ៉ាងពេញទំហឹង ដើម្បីធ្វើឱ្យកំពង់ផែក្រុងព្រះសីហនុក្លាយជាកំពង់ផែដ៏សំខាន់ចម្បងមួយ ដែលមិនមែនសម្រាប់តែកម្ពុជាប៉ុណ្ណោះទេ ប៉ុន្តែសម្រាប់តំបន់មេគង្គ និងពិភពលោក។

សម្ដេចតេជោ ហ៊ុន សែន បានបញ្ជាក់ថា កំពង់ផែទឹកជ្រៅខេត្តព្រះសីហនុ ត្រូវបានរ៉ាប់រង និងទទួលខុសត្រូវ និងការជួយទំនុកបម្រុងពីរដ្ឋាភិបាលជប៉ុន។

បច្ចុប្បន្នកំពង់ផែស្វយ័តក្រុងព្រះសីហនុ អាចអនុញ្ញាតឲ្យនាវាក្នុងតំបន់អាស៊ីប៉ាស៊ីហ្វិច ចូលបានតែប្រមាណ ១៨%ប៉ុណ្ណោះ មានន័យថា ក្នុងចំណោម ១០០កប៉ាល់ អាចចូលចតបានតែ១៨ ឬ ១៩កប៉ាល់ និងអនុញ្ញាតឱ្យនាវាដែលផ្តុកកុងតឺន័រ បានតែ ១៥០០ប៉ុណ្ណោះ។

នៅពេលដែលកំពង់ផែទឹកជ្រៅនេះ សាងសង់រួចរាល់នៅឆ្នាំ២០២៥ នឹងអាចអនុញ្ញាតឲ្យកប៉ាល់ដែលសមត្ថភាពផ្ទុក កុងតឺន័ររហូតដល់ជាង ៤ពាន់កុងតឺន័រ អាចចូលចតដែលពេលនោះកប៉ាល់ប្រមាណ ៩៣% នៃកប៉ាល់ក្នុងតំបន់អាស៊ី ចូលចតនៅកម្ពុជាបាន ដែលនឹងធ្វើឱ្យតម្លៃដឹកជញ្ជូនទាបជាងមុន៕

The post ចំណតកំពង់ផែស្វយ័តខេត្តព្រះសីហនុចាយថវិកាជាង ២០០ លានដុល្លារ គូសប្លង់រួចរាល់ ចាប់ផ្តើមសាងសង់នៅឆ្នាំនេះ appeared first on .

សម្តេចហ៊ុន សែន

រដ្ឋាភិបាល ​ប្រកាស​ប្រើប្រាស់​ថវិកា​ជាតិ សាងសង់​រោងចក្រ​ផលិត​វ៉ាក់សាំង​ប្រឆាំង​កូវីដ

ទំហំពាណិជ្ជកម្ម​កម្ពុជា​វៀតណាម​ឆ្នាំ​២០២២ អាច​កើន​ដល់ ១០ ពាន់​លាន​ដុល្លារ

សម្តេច​តេជោ​ប្រកាស​ ​កូន​ប្រសា​ម្នាក់​មាន​សមត្ថភាព​អាច​បើក​យន្តហោះ​បាន

ក្រៅពី instagram សម្តេច​​​តេជោ ក៏​មានប្រើ​ទាំង Twitter និង YouTube