ពិធីចុះកិច្ចសន្យាទិញ​ បានធ្វើឡើងកាលពីថ្ងៃទី៣០ ខែកញ្ញា ឆ្នាំ២០២៥  ក្រោមអធិបតី លោក គី ច័ន្ទរំដួល  អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងលោក គន់ រ័ត្នមុនី អភិបាលរងខេត្តត្បូងឃ្មុំ។

ក្នុងនោះ រួមមានពិធីចុះកិច្ចសន្យាទិញលក់ពោតក្រហម និងស្រូវស្រងែថ្មី រវាងសហគមន៍កសិកម្មជីរោទិ៍រុងរឿង និងក្រុមហ៊ុនអាហ្គ្រោ ឃីង ត្រេឌីង ឯ.ក (AGRO KING TRADING CO.LTD) និងក្រុមហ៊ុន អ៊ិលប៊ីអិន អង្ករ (កម្ពុជា)។

លោក គី ច័ន្ទរំដួល  បានគូសបញ្ជាក់ថា ក្រុមហ៊ុនអាហ្គ្រោ ឃីង ត្រេឌីង ឯ.ក (AGRO KING TRADING CO.LTD) ទទួលទិញពោតក្រហមពី សហគមន៍កសិកម្មជីរោទិ៍រុងរឿង ដោយចុះកិច្ចសន្យាទិញលក់ពោតក្រហមស្ងួតចំនួន១០៥០តោន។ ចំណែកក្រុមហ៊ុន អិល ប៊ី អិន អង្ករ កម្ពុជា បានចុះកិច្ចសន្យា ទិញ លក់ ស្រូវចំណីប្រភេទពូជស្រូវសែនក្រអូប០១ និងស្រូវស្រងែថ្មី រវាងសហគមន៍កសិកម្មកសិកររុងរឿងផងដែរ។

លោកអនុរដ្ឋលេខាធិការ បានបង្ហាញសុទិដ្ឋិនិយមថា ការចុះកិច្ចសន្យានេះនឹងធ្វើឱ្យប្រជាកសិករកាន់តែមានឱកាសក្នុងការលក់ផលិតផលកសិកម្មរបស់ខ្លួនទៅកាន់ក្រុមហ៊ុននាំចេញទៅទីផ្សារអន្តរជាតិ។

គួរឱ្យដឹងថា សហគមន៍កសិកម្មជីរោទ៍រុងរឿងបានត្រូវបានផ្តួចផ្តើម បង្កើតឡើងកាលពីឆ្នាំ២០២២ ដោយមានការសម្របសម្រួលពីមន្ទីរកសិកម្មខេត្ត អាជ្ញាធរឃុំ ស្រុក។ បច្ចុប្បន្ន សហគមន៍មានថ្នាក់ដឹកនាំក្រុមប្រឹក្សាភិបាល ៥រូប ក្នុងនោះស្រី ២រូប គណៈកម្មាធិការត្រួតពិនិត្យ ៣រូប និងមានសមាជិកសរុប ៣៥នាក់ ក្នុងនោះស្រី ១២ នាក់ មានភាគហ៊ុនសរុបចំនួន ១១០ហ៊ុន ស្មើនឹងទឹកប្រាក់សរុប ១១ ០០០ ០០០រៀល។ សហគមន៍កសិកម្មមានផ្ទៃដីផលិតកម្មកសិកម្មសរុប ១៤០ហិចតា ក្នុងនោះផ្ទៃដីដាំបន្លែ ១០ហ.ត ស្រូវ មានផ្ទៃដី ២០ហ.ត និងពោតក្រហមជាដំណាំសក្តានុពលជាងគេ មានផ្ទៃដី១១០ហិចតា បរិមាណផល ២ ០០០ តោនក្នុងមួយឆ្នាំ៕

The post ក្រុមហ៊ុនមួយប្រមូលទិញពោតក្រហមពីសហគមន៍កសិកម្មជីរោទិ៍រុងរឿង ជាង ១ពាន់តោន appeared first on .