តំណាងសហគមន៍ចិញ្ចឹមឃ្មុំកម្ពុជា បានបញ្ជាក់ដូច្នេះថា «ទឹកឃ្មុំដែលប្រជាកសិករកសិដ្ឋាននៅក្នុងស្រុកខ្មែរ គឺជាទឹកឃ្មុំធម្មជាតិដែលយើងប្រមូលផលតាមរយៈស្តង់ដាមួយ គឺទុកឱ្យទឹកឃ្មុំមានអាយុចាស់ មានន័យថា គ្រប់អាយុក្លាយជាទឹកឃ្មុំពេញលេញ ដែលយើងអាចប្រើប្រាស់ធ្វើជាឱសថសម្រាប់ព្យាបាលសុខភាព ហើយទឹកឃ្មុំរបស់យើងគឺមានប្រភពច្បាស់លាស់។

តំណាងសហគមន៍ខាងលើបន្តថា មុននឹងប្រមូលផលបងប្អូនអ្នកចិញ្ចឹមឃ្មុំមានការផ្ចិតផ្ចង់ណាស់ ដោយធ្វើយ៉ាងណាឱ្យទឹកឃ្មុំក្លាយទៅជាទឹកឃ្មុំដែលមានគុណភាព ស្តង់ដា អនាម័យ ដើម្បីចែកចាយនៅលើទីផ្សារសម្រាប់អ្នកប្រើប្រាស់។ ហេតុដូច្នេះ បានជាទឹកឃ្មុំរបស់យើងមានតម្លៃរាងខ្ពស់បន្តិច ប៉ុន្តែវាមានគុណភាពពិតសម្រាប់សុខភាពរបស់យើង»។

ហេតុអ្វីបានទឹកឃ្មុំនាំចូល ឬទឹកឃ្មុំដែលមិនដឹងពីប្រភពច្បាស់លាស់ មានតម្លៃថោកជាង?

ឆ្លើយតបនឹងសំណួរនេះ តំណាងសហគមន៍ចិញ្ចឹមឃ្មុំកម្ពុជា បានលើកឡើងថា ព្រោះទឹកឃ្មុំដែលនាំចូលពីបរទេស ភាគច្រើនជាទឹកឃ្មុំដែលកែច្នៃ(មានន័យថាយកទឹកឃ្មុំដែលមិនគ្រប់អាយុ និងប្រមូលផលច្រើនដង)។ដូច្នេះ ទឹកឃ្មុំនោះមិនទាន់ក្លាយជាទឹកឃ្មុំពេញលេញនៅឡើយទេ គ្រាន់តែជាទឹកដបផ្កាប៉ុណ្ណោះ។ សម្រាប់ទឹកឃ្មុំទាំងអស់នោះ បើយកមកប្រើប្រាស់គឺបានតែក្នុងផ្ទះបាយប៉ុណ្ណោះ សម្រាប់ធ្វើជាថ្នាំ ឱសថ សម្រាប់សុខភាពគឺមានការបាត់បង់នូវសារធាតុ ប្រុតេអ៊ីន វីតាមីនដែលមាននៅក្នុងទឹកឃ្មុំ។

លើសពីនេះ ទឹកឃ្មុំដែលកែច្នៃ បានបញ្ចូលនូវសារធាតុគីមីម្យ៉ាងទៅក្នុងទឹកឃ្មុំ ដើម្បីទុករក្សាកុំឱ្យប្រែពណ៌ កុំឱ្យឡើងក្រាមផងដែរ ខណៈអ្នកចិញ្ចឹមឃ្មុំក្នុងស្រុកមិនមានការកែច្នៃ បន្ថែមឬបន្ថយឡើយ គឺប្រើប្រាស់អ្វីជាធម្មជាតិរបស់ឃ្មុំ។

បើតាមសហគមន៍ចិញ្ចឹមឃ្មុំកម្ពុជា ទឹកឃ្មុំឆៅ ឬទឹកឃ្មុំធម្មជាតិ គឺជាទឹកឃ្មុំដែលមានគុណភាពសម្រាប់សុខភាព ដូចជា បញ្ហាលើសឈាម ក្រពះពោះវៀន បញ្ហាដំណេកយ៉ាងមានប្រសិទ្ធិភាព។ ទឹកឃ្មុំក្នុងស្រុកខ្មែរ អាចយកផលពីប្រភពធម្មជាតិដូចជា ចំការគ ទឹកដមផ្កាចម្រុះ និងកៅស៊ូ ជាដើម៕

The post តើហេតុអ្វីបានជាទឹកឃ្មុំកម្ពុជាមានតម្លៃថ្លៃជាងទឹកឃ្មុំនាំចូល? appeared first on .

ជុំវិញរឿងខាងលើនេះ សមាជិកសហគមន៍ចិញ្ចឹមឃ្មុំកម្ពុជា តំណាងឱ្យប្រជាពលរដ្ឋខ្មែរ ប្រជាកសិករចិញ្ចឹមឃ្មុំទូទាំងប្រទេសកម្ពុជា ក៏បានចេញវីដេអូបំភ្លឺទាក់ទងបញ្ហាដែលកំពុងតែផ្ទុះការវែកញែកទៅលើរឿងទឹកឃ្មុំក្លែងក្លាយដែលកំពុងចរាចរនៅលើទីផ្សារប្រទេសកម្ពុជានេះផងដែរ ដោយសហគមន៍បានលើកឡើងថា ក្រុមហ៊ុន ច័ន្ទ ហាន់នី អិមផត អិចផតគឺជាក្រុមហ៊ុនដែលនាំចូលនូវទឹកឃ្មុំសុទ្ធធម្មតាពីប្រទេសជិតខាងរបស់យើងយកមកស្តុកទុកក្នុងប្រទេសកម្ពុជា ហើយក្លែងបន្លំប្រភព(ដោយនិយាយថាជាទឹកឃ្មុំរបស់ប្រជាកសិករខ្មែរ ជារបស់សហគមន៍ចិញ្ចឹមឃ្មុំនៅប្រទេសកម្ពុជា) ហើយធ្វើការនាំចេញទៅប្រទេសទី៣ គឺសហរដ្ឋអាមេរិក។

សហគមន៍ចិញ្ចឹមឃ្មុំកម្ពុជា បានបន្តថា ក្រុមហ៊ុននេះពុំបានផលិតទឹកឃ្មុំក្លែងក្លាយដើម្បីចែកចាយនៅក្នុងទីផ្សារប្រទេសកម្ពុជាទេ។ ដោយក្រុមហ៊ុននេះធ្វើសកម្មភាពទុច្ចរិត គឺបាននាំទឹកឃ្មុំពីប្រទេសជិតខាងមកស្តុកនៅកម្ពុជា ក្លែងបន្លំ កុហកបោកប្រាស់ទៅកាន់ដៃគូនាំចេញទឹកឃ្មុំរបស់ខ្លួនថាជាទឹកឃ្មុំរបស់ប្រជាកសិករខ្មែរ ទាំងដែលការពិតមិនមែនជាទឹកឃ្មុំរបស់សហគមន៍ទេ។

ជាមួយគ្នានេះ សហគមន៍ចិញ្ចឹមឃ្មុំកម្ពុជា បានអំពាវនាវឈប់មានការយល់ច្រឡំថាទឹកឃ្មុំដែលចែកចាយនៅលើទីផ្សារស្រុកខ្មែរជាទឹកឃ្មុំមិនល្អ ជាទឹកឃ្មុំក្លែងក្លាយប្រភព ព្រោះប្រជាកសិករខ្មែរយើងរក្សាក្រមសីលធម៌ រក្សាវិជ្ជាជីវៈអ្នកចិញ្ចឹមឃ្មុំបែបធម្មជាតិ ចែកចាយតែទឹកឃ្មុំដែលមានគុណភាពដល់បងប្អូនតែប៉ុណ្ណោះ ពុំមានការកែច្នៃ ពុំមានការក្លែងបន្លំគុណភាពទឹកឃ្មុំនោះទេ។

សូមជម្រាបជូនផងដែរថា កាលពីពេលថ្មីៗកន្លងទៅនេះ កម្លាំងជំនាញការិយាល័យប្រឆាំងបទល្មើសកម្មសិទ្ធិបញ្ញា នៃនាយកដ្ឋាននគរបាលប្រឆាំងបទល្មើសសេដ្ឋកិច្ច សហការជាមួយមន្ដ្រីសាខា ក.ប.ប រាជធានីភ្នំពេញ និងមន្ត្រីជំនាញ នៃស្នងការដ្ឋាននគរបាលរាជធានីភ្នំពេញ បានចុះបង្រ្កាបទីតាំងក្រុមហ៊ុន CHAN HONEY IMPORT EXPORT CO.,LTD ស្ថិតនៅផ្ទះលេខ៧៦ ផ្លូវបេតុង ភូមិតាងៅកណ្តាល សង្កាត់និរោធ ខណ្ឌច្បារអំពៅ រាជធានីភ្នំពេញ ដែលសង្ស័យធ្វើការនាំចូល ស្តុកទុក ទឹកឃ្មុំក្លែងបន្លំប្រភពដើមទំនិញ។នៅក្នុងអំឡុងពេលប្រតិបត្តិការនោះ សមត្ថិកិច្ចជំនាញបានរកឃើញទឹកឃ្មុំក្លែងបន្លំ សរុបចំនួន១៣០ធុង ដែលមានទម្ងន់សរុបជិត២០តោន ។

ជាមួយនឹងការស្រាយបំភ្លឺខាងលើ សហគមន៍ចិញ្ចឹមឃ្មុំកម្ពុជា ដដែលសូមស្នើដល់ដល់ស្ថាប័នពត៌មានមួយចំនួន ដែលចុះពត៌មានមិនច្បាស់លាស់ធ្វើឲ្យប៉ះពាល់ដល់ ជំនឿទុកចិត្តរបស់ប្រជាពលរដ្ឋខ្មែរ មកលើផលិតផលទឹកឃ្មុំ របស់ប្រជាសហគមន៍ចិញ្ចឹមឃ្មុំ នៅក្នុងប្រទរសកម្ពុជា មេត្តាកែតម្រូវសាឡើងវិញ ដើម្បីបញ្ឈប់កុំឲ្យមានការយល់ច្រឡំបន្តទៅទៀត៕

សូមស្ថាន ការបកស្រាយរបស់តំណាងសហគមន៍ចិញ្ចឹមឃ្មុំកម្ពុជា ទាំងអស់គ្នា៖

The post សហគមន៍ចិញ្ចឹមឃ្មុំកម្ពុជា បំភ្លឺបញ្ហាដែលកំពុងតែផ្ទុះការវែកញែករឿងទឹកឃ្មុំក្លែងក្លាយកំពុងចរាចរលើទីផ្សារកម្ពុជា appeared first on .