សហគ្រាសក្នុងស្រុក

មកស្គាល់ សហគ្រាសកែច្នៃតំណាប់ស្វាយមូយ នៅខេត្ត ត្បូងឃ្មុំ

Kem sinath — Sat, 24 Sep 2022 07:30:00 +0000

បច្ចុប្បន្នឃើញថា នៅកម្ពុជាយើង ផ្លែស្វាយរដូវមានអត្រាសល់ច្រើន ហើយក៏មានសហគ្រាស សិប្បកម្ម ជាច្រើនបានទទួលទិញយកទៅកែច្នៃផងដែរ បើទោះបីជាមានការនាំចូលពីខាងក្រៅយ៉ាងណាក្តី ។

សហគ្រាស អិលប៊ីអិន អេហ្គ្រីខលឈ័រ (LBN Agriculture) គឺជា សហគ្រាសកែច្នៃផ្លែឈើឲ្យក្លាយជាតំណាប់ ដែលបានបង្កើតឡើងប្រមាណ ៤ ឆ្នាំ មកហើយ ពោល នៅដើមខែ ឧសភា ឆ្នាំ ២០២១៨ មានទីតាំងស្ថិតនៅ តាមបណ្តោយផ្លូវជាតិលេខ ៧ ក្នុងភូមិ បេង ឃុំ ដារ ស្រុក មេមត់ ខេត្ត ត្បូងឃ្មុំ ។

តាមរយៈ អិលប៊ីអិន អេហ្រ្គីខលឈ័រ ការបង្កើតនូវសហគ្រាសនេះឡើងក្នុងគោលបំណង បង្កើតការកែច្នៃ ឲ្យមានផលិតផលសម្រេចនៅក្នុងស្រុក និង បង្កើនការនាំចេញទៅក្រៅប្រទេសដែលមិនធ្លាប់មានពីមុន ដោយកន្លងទៅក៏បានធ្វើការនាំចេញផលិតផលតំណាប់ស្វាយទៅកាន់ទីផ្សារប្រទេសចិនផងដែរ ។

អ្វីដែលជាចំណុចពិសេស ភាពខ្លាំងរបស់សហគ្រាសមួយនេះ គឺអាចកែច្នៃ ផ្លែឈើស្រស់ឲ្យក្លាយជាតំណាប់ដែលមានរសជាតិឆ្ញាញ់ មានអនាម័យ មានគុណភាពតាមកម្រិតស្តង់ដារអន្តរជាតិ ដោយមានឆ្លងកាត់ការត្រួតពិនិត្យ និង ទទួលបានវិញ្ញាបនបត្រ ពីមន្ទីរពិសោធគីមីចំណីអាហារ ប្រទេសចិន មិនតែប៉ុណ្ណោះក៏បានចុះពិនិត្យផ្ទាល់ពីរដ្ឋមន្រ្តីក្រសួង កសិកម្ម រុក្ខាប្រមាញ់ និងនេសាទ អាចនាំផលិតផលចេញទៅកាន់ទីផ្សារអន្តរជាតិ ជាការធ្វើឲ្យផ្លែស្វាយក្នុងស្រុកមានទីផ្សារ និងមានតម្លៃឡើងវិញ ។

ក្នុងការផលិតតំណាប់ស្វាយ គឺសហគ្រាស LBN Agriculture ជ្រើសរើសស្វាយកែវរមៀត សាច់លឿង ទំហំប្រមាណ ចាប់ពី ៣ ទៅ ៤ ផ្លែ ក្នុងមួយគីឡូក្រាម ។ ដោយទទួលទិញស្វាយស្រស់ពីខេត្ត កំពង់ចាម ត្បូងឃ្មុំ ក្នុងបរិមាណ ជាង ២០ តោន ក្នុងមួយថ្ងៃ ។

សូមបញ្ជាក់ផងដែរថា កាលពីពេលកន្លងទៅ រដ្ឋមន្រ្តី ក្រសួងកសិកម្ម រុក្ខាប្រមាញ់ និងនេសាទ បានចុះត្រួតពិនិត្យ ក៏បានឲ្យដឹងថា សហគ្រាសមួយនេះវិនិយោគក្នុងទុនប្រមាណ ជាង ២ លានដុល្លារ ៕

The post មកស្គាល់ សហគ្រាសកែច្នៃតំណាប់ស្វាយមូយ នៅខេត្ត ត្បូងឃ្មុំ appeared first on .

ណែនាំឱ្យស្គាល់ទឹកសណ្ដែកសិរីរាង្គមួយប្រភេទដែលមិនប៉ះពាល់ដល់សុខភាព

រ៉េត សុកធា — Tue, 30 Aug 2022 05:09:21 +0000

ទឹកសណ្ដែកសិរីរាង្គ Mae soy ជាផលិតផលខ្មែរនៅក្នុងស្រុកមួយដែលផលិតឡើងពីវត្ថុធាតុដើមនៅក្នុងស្រុក មិនប៉ះពាល់ដល់សុខភាព ដែលមានដូចជា ស្លឹកតើយ សណ្ដែកសៀង និងផ្កាមេអំបៅ។

លោកស្រី សាន់ វិច្ឆិកាលក្ស្មី ជាស្ថាបនិក អាជីវកម្មម៉ែសយបានផ្ដល់បទសម្ភាសន៍ជាមួយឧកញ៉ាញូស៍ថា សហគ្រាសនេះបើកដំណើរការបានមិនទាន់ដល់១ឆ្នាំទេ ដែលចាប់ផ្ដើមបើកនៅថ្ងៃទី19 ខែវិចិ្ឆកា ឆ្នាំ2021។

លោកស្រីបានលើកឡើងថា សហគ្រាសនេះបើកជាលក្ខណៈខ្នាតតូចឬជាលក្ខណៈគ្រួសារតែប៉ុណ្ណោះដោយមិនមានបុគ្គលិកឬកម្មករទេ ។

ស្ថាបនិកវ័យ២៨ឆ្នាំបានបន្តថា គោលបំណងដែលបើកសហគ្រាសផលិតទឹកសណ្ដែកនេះគឺចង់ផ្តល់ឱ្យអតិថិជននូវភេសជ្ជៈប្រកបដោយគុណភាពល្អសម្រាប់សុខភាពដែលជ្រើសរើសយកគ្រឿងផ្សំសរីរាង្គមានស្រាប់ក្នុងស្រុក និងធ្វើដោយខ្លួនឯងផ្ទាល់ ដើម្បីរួមចំណែកធ្វើឱ្យសហគមន៍នៅក្នុងប្រទេសកម្ពុជាមានសុខភាពល្អនិងសប្បាយរីករាយ។

ចំពោះលក្ខណៈពិសេសរបស់ទឹកសណ្តែកសរីរាង្គនេះវិញគឺការផលិតជ្រើសរើសយកសណ្តែកសៀងមកប្រើ ដែលជាសណ្តែកដាំដុះនៅខេត្តមណ្ឌលគិរី។ សណ្ដែកនេះមានសភាពខាប់ល្អ មិនប្រើសារធាតុរក្សាទុក ក្លិន និង ពណ៌សិប្បនិមិ្មតឡើយ។ ក្នុងពេលបច្ចុប្បន្ននេះ Mae soyផលិតបាន 3 រសជាតិហើយ គឺ រសជាតិសណ្តែកសុទ្ធ (មិនមានស្ករ) រសជាតិស្លឹកតើយ (ស្ករ25%) និងរសជាតិផ្កាមេអំបៅ (ស្ករ 25%)។

វត្ថុធាតុដើមក្នុងការផលិតនេះ សម្រាប់ស្លឹកតើយដាំដោយខ្លួនឯងនិងទិញពីអ្នកស្រុកខ្លះ រីឯផ្កាមេអំបៅគឺដាំខ្លួនឯងផ្ទាល់តែម្ដង។

បើក្រលេកមកមើលតម្លៃវិញទឹកសណ្តែកនេះមិនថ្លៃនោះទេគឺតុល្យភាពជាមួយនឹងគុណភាពតែម្ដងដែលតម្លៃមាន 3ជម្រើស សម្រាប់ដប ប្លាស្ទីក 330ម.ល. 1.25$/ដប ដបថ្ម 500ម.ល. 3.75$/ដប ដបថ្ម 1000ម.ល. 4.5$/ដប រិតតែពិសេសនោះសម្រាប់ភ្ញៀវដែលមានសំបកដបទិញលើកមុន អាចយកមកបំពេញវិញដោយខាងសហគ្រាសគិតតែថ្លៃទឹកសណ្តែកប៉ុណ្ណោះ ដកថ្លៃដបចេញ។ការធ្វើបែបនេះដើម្បីរួមចំណែកជួយបរិស្ថាន និងកាត់បន្ថយប្លាស្ទីក។

សម្រាប់ទឹកសណ្តែកសរីរាង្គនេះមិនមានសារធាតុឡាក់តូសទេ (Lactose Free)ដែលអ្នកញ៉ាំអាចញ៉ាំដោយជឿជាក់ដោយមិនប៉ះពាល់ដល់សុខភាពដូចជាហើមពោះឬរាគជាដើម។

ក្នុងការបើកដំណើរការសហគ្រាសនេះ ស្ថាបនិកវ័យក្មេងសម្ដីផ្អែមបានប្រាប់ឥតលាក់គឺចាយដើមទុនអស់៥០០ដុល្លារក្នុងការបណ្ដុះពន្លកសហគ្រាសនេះ។

លោកស្រីបានបន្តថា ការបើកសហគ្រាសនេះគឺមានផលលំបាកក៏ដូចជា កត្ដាប្រឈមជាច្រើនដែរដូចជា៖

សហគ្រាសបើកជាលក្ខណៈ homemade មិនមានសារធាតុរក្សាទុកបានយូរ ពិបាកក្នុងការចែកចាយ (បើលក់សល់គឺខូចចោល ប្រឈមនឹងការខាត)
ការទុកដាក់គឺត្រូវរក្សាទុកក្នុងទូរទឹកកក ឬក្លាសេក្នុង សីតុណ្ហភាពចន្លោះ 2-7°c ទើបទុកបាន 7-10 ថ្ងៃ។
ការដាក់លក់នៅក្នុងហាងលក់ភេសជ្ជៈគឺត្រូវមើលទៀត ដើម្បីអោយប្រាកដថាផលិតផលរបស់យើងអាចដាក់នៅទីនោះបានហើយរក្សារគុណភាពល្អ។
ចំពោះការផលិតគឺ ចំណាយពេលគួរសម ទម្រាំបានជាផលិតផលសម្រេច ត្រូវចំណាយពេលត្រាំសណ្តែកជាច្រើនម៉ោង, កិន និងកូរដោយយកចិត្តទុកដាក់ បើខ្លោចគឺចោល។
បច្ចុប្បន្នសហគ្រាសរបស់លោកស្រីអតិថិជនស្គាល់មិនច្រើនទេ ដូច្នេះការលក់ក៏មិនទាន់បានច្រើនដែរ។
ផ្នត់គំនិតរបស់អតិថិជនមួយចំនួនគឺគិតថា ផលិតផលខ្មែរមិនមានគុណភាពល្អដូចរបស់នាំចូលពីក្រៅប្រទេស។
កង្វះខាតដើមទុន
សហគ្រាសនេះផ្តើមពីតូច មិនមានបុគ្គលិកដែលចេះជំនាញផ្សេងៗ អ៊ីចឹង ទាំង ការ លក់ រកអតិថិជន ការផ្សព្វផ្សាយដោយផ្ទាល់តាមរយៈការលក់ក្នុងពិព័រណ៍នានា ការឌីហ្សាញផុសស្ទ័រ Digital market, accounting, customer service…. និងការងារផ្សេងៗ សុទ្ធតែ ធ្វើខ្លួនឯង។

ជាមួយគ្នានេះលោកស្រី លក្ស្មីក៏បានប្រាប់ផងដែរថា អត្ថន័យនៃ ឈ្មោះម៉ែសយនេះគឺលោកស្រីចង់បង្ហាញន័យថា “ម៉ែ” តំណាងឱ្យម្តាយលោកស្រីផ្ទាល់ដែលជាគ្រូបង្រៀនម្នាក់ហើយខិតខំប្រឹងប្រែងទំនុកបម្រុងគ្រួសារ ដែលអ្នកម្ដាយលោកស្រីផ្ទាល់ជាអ្នកធ្វើទឹកសណ្តែក។ ចំណែកឯ”សយ” គឺមកពីភាសាអង់គ្លេស “Soybean” ហើយ tag line របស់សហគ្រាសគឺ “Celebrating Moms” មានន័យថា អបអរសារទរទៅដល់ម្តាយគ្រប់រូបក្នុងការលះបង់សម្រាប់គ្រួសារ និងចង់លើកកម្ពស់ស្នាដៃឬទេពកោសល្យដល់ម្តាយឱ្យគេស្គាល់។

សូមរំលឹកផងដែរថា សហគ្រាសម៉ែសយនេះមានទីតាំងនៅភូមិគ្រួស សង្កាត់ស្វាយដង្គំ ស្រុកសៀមរាប ខេត្តសៀមរាប៕

ម្ដាយស្ថាបនិកលោកស្រីលក្ស្មី

The post ណែនាំឱ្យស្គាល់ទឹកសណ្ដែកសិរីរាង្គមួយប្រភេទដែលមិនប៉ះពាល់ដល់សុខភាព appeared first on .

ស្គាល់ប្រវត្តលម្អិត មីជាតិយីហោមីខ្មែរទីពីរវាយលុកទីផ្សារកម្ពុជា

ឧកញ៉ាមហាសម្បត្តិ — Fri, 15 Jul 2022 03:13:40 +0000

មីជាតិបានចាប់ផ្តើមចេញចរាចរលើទីផ្សារកម្ពុជាបានជិត ៣ ឆ្នាំតាំងពីឆ្នាំ ២០១៩។ ដោយមានរោងចក្រផលិតនៅសង្កាត់គោករការ ខណ្ឌពោធិសែនជ័យ នេះជាយីហោមីខ្មែរទីពីរ បន្ទាប់ពីមីយើងដែលជាយីហោមីក្នុងស្រុកដំបូងគេដែលវិនិយោគដោយក្រុមហ៊ុន ម៉ែន សារុន។

វត្តមាននៃមីជាតិគឺជាមោទនភាពថ្មីរបស់កម្ពុជាក៏ដូចជាប្រជាជនខ្មែរ ដែលមានស្លាកយីហោមីក្នុងស្រុកតំណាងឲ្យផលិតផលជាតិ។

ដំណើរការផលិត”មីជាតិ”

មីជាតិ ត្រូវបានផលិតដោយប្រើបច្ចេកវិទ្យា និងម៉ាស៊ីនជប៉ុនទំនើបចុងក្រោយ ព្រមជាមួយកម្មវិធីគ្រប់គ្រង និងពិនិត្យយ៉ាងម៉ត់ចត់ នៅគ្រប់ដំណាក់កាលនៃសង្វាក់ផលិតកម្ម ចាប់តាំងពីគ្រឿងផ្សំ ដំណើរការផលិត និងការវេចខ្ចប់ដើម្បីទទួលបាននូវផលិតផលសម្រេចប្រកបដោយគុណភាពស្ដង់ដារ និងសុវត្ថិភាព។ មីជាតិប្រើប្រាស់វត្ថុធាតុដើម ដែលមានគុណភាពខ្ពស់ សម្រិតសម្រាំងទាំងក្នុងស្រុក និងក្រៅប្រទេស។ ម្សៅសាលី ស្ករ ខ្ទឹម ម្រេច ឈើអែម ប្រេងរុក្ខជាតិ និងម្សៅស៊ុបត្រូវបាននាំចូលពីប្រទេស អូស្រ្ដាលី សឹង្ហបុរី ថៃ និង ម៉ាឡេស៊ី។

មីជាតិ ស្នាដៃខ្មែរ រសជាតិខ្មែរ

មីជាតិ ជាផលិតផលរសជាតិបែបខ្មែរដំបូងគេ ផលិតដោយអ្នកជំនាញខ្មែរ។ មីជាតិ ត្រូវបានផលិតដោយមានរសជាតិបីជម្រើស គឺមីជាតិខគោ មីជាតិសាច់ជ្រូកចិញ្រ្ចាំ និងមីជាតិស៊ុបមាន់ ដែលរសជាតិទាំងបីនេះ ត្រូវបានឆ្លងកាត់ការពិសោធស្រាវជ្រាវយ៉ាងហ្មត់ចត់បំផុត ដើម្បីឲ្យសមស្របទៅតាមបែបបទរសជាតិខ្មែរ និងការពេញនិយមរបស់ប្រជាជនខ្មែរ ដូចទៅនឹងពាក្យស្លោករបស់មីជាតិ ដែលថា “ស្នាដៃខ្មែរ រសជាតិខ្មែរ”។

មីជាតិឆ្ពោះទៅកាន់ទីផ្សារអន្តរជាតិ

ស្របពេលមានការទទួលស្គាល់លើគុណភាព និងរសជាតិឆ្ងាញ់ មីជាតិជាផលិតមីកញ្ចប់ខ្មែរដំបូងគេ បាននាំចេញផលិតផលទៅកាន់ទីផ្សារប្រទេសវៀតណាម។ នេះជាវឌ្ឍនភាពថ្មីដ៏អស្ចារ្យមួយទៀតក្នុងការពង្រីកវិសាលភាពផលិតផលខ្មែរចូលក្នុងទីផ្សារថ្នាក់តំបន់។

ការបើកទំព័រនៃដំណើរថ្មីរបស់ផលិតផលមីជាតិ ឆ្លុះបញ្ចាំងពីការជឿជាក់លើគុណភាពផលិតផលមីជាតិ នៅក្នុងកម្រិតស្តង់អន្តរជាតិមួយ ស្របជាមួយតម្រូវការទីផ្សារក្នុងប្រទេសជិតខាងផងដែរ។ សម្រាប់ផលិតផលមីជាតិក្នុងការបង្ហាញខ្លួនលើទីផ្សារអន្តរជាតិ ក៏ស្របពេលដែលមីរបស់ខ្មែរនេះបានការទទួលស្គាល់រួចជាស្រេចពីសំណាក់ប្រជាជនកម្ពុជា។

មីជាតិ ជាមីកញ្ចប់ខ្មែរដំបូងគេ ទទួលបានវិញ្ញាបនបត្រស្តង់ដារអន្តរជាតិពីចក្រភពអង់គ្លេស

មីជាតិជាមីកញ្ចប់ខ្មែរដំបូងគេ ដែលទទួលបានវិញ្ញាបនបត្រស្តង់ដារអន្តរជាតិ ពីចក្រភពអង់គ្លេសនៅឆ្នាំ២០២២។ ស្ថាប័នវិញ្ញាបនបត្រស្តង់ដារអន្តរជាតិ SGS បានបញ្ជាក់ថា មីជាតិជាផលិតមីកញ្ចប់ឆ្អិនស្រាប់ទីមួយនៅប្រទេសកម្ពុជា ដែលបានអនុវត្តតាមបទដ្ឋានចំណីអាហារអន្តរជាតិ រហូតទទួលបានការធ្វើសវនកម្មខាងក្នុងនិងខាងក្រៅ ជាប់ជាស្ថាពរ និងទទួលបានវិញ្ញាបនបត្របញ្ជាក់ GHPs, HACCP និង ISO 9001:2015 ទទួលស្គាល់ពីស្ថាប័ន SGS និង UKAS។ ការទទួលស្គាល់នេះនឹងធ្វើឲ្យដៃគូអាជីវកម្ម អ្នកប្រើប្រាស់ និងពិសាផលិតផលមីជាតិ កាន់តែមានទំនុកចិត្ត ទៅលើផលិតផល គុណភាព អនាម័យនៃផលិតផលមីជាតិ។

សាររបស់អគ្គនាយិកាប្រតិបត្តិក្រុមហ៊ុន

លោកជំទាវ ជីង សុគន្ធាវី អគ្គនាយិកាប្រតិបត្តិក្រុមហ៊ុន វ័នម៉រ មេនូហ្វេកឆឺរីង បានថ្លែងថា មីជាតិ ជាម៉ាកផលិតផលមីរបស់ប្រជាជនខ្មែរផ្ទាល់ ជាមួយនឹងផលិតផលគុណភាពខ្ពស់ មានរសជាតិបែបខ្មែរ សម្រាប់ប្រជាជនខ្មែរ។ មីជាតិ ចាប់ផ្តើមឡើងពីក្តីសុបិនមួយ ដើម្បីបង្កើតនូវរសនិយមអាហារដែលឈ្ងុយឆ្ងាញ់របស់ខ្មែរពិតប្រាកដ។ ថ្ងៃនេះ យើងបានសម្រេចក្តីសុបិនមួយនេះ។ យើងមានមោទនភាពខ្លាំងណាស់ ដែលបានបង្កើតនូវរសជាតិមីបីប្រភេទខុសៗគ្នាគឺ សាច់ជ្រូកចិញ្ច្រាំ ស៊ុបមាន់ និងខគោ ដែលជារសជាតិបែបខ្មែរដំបូងគេនៅក្នុងប្រទេសកម្ពុជា។

លោកជំទាវបានគូសបញ្ជាក់បន្ថែមថា គ្មានអ្នកណា គាំទ្រផលិតផលខ្មែរក្រៅពីខ្មែរនោះទេ។ ដូច្នេះ ដើម្បីការរីកចម្រើនរបស់ខ្មែរ ដើម្បីកូនចៅជំនាន់ក្រោយរបស់ខ្មែរ និងដើម្បីមោទនភាពកិត្តិយសរបស់ខ្មែរ យើងជាកូនខ្មែរត្រូវគាំទ្រ និងរួមគ្នាជួយលើកកម្ពស់ផលិតផលខ្មែរនៅលើទីផ្សារ ដើម្បីវឌ្ឍនភាពរបស់កម្ពុជា។

គួរបញ្ជាក់ថា ក្រុមហ៊ុន វ័នម៉រ មេនូហ្វេកឆឺរីង ដែលជាក្រុមហ៊ុនផលិតមីជាតិ បង្កើតឡើងក្នុងឆ្នាំ២០១៩ ជាបុត្រសម័្ពន្ធរបស់ក្រុមហ៊ុន វ័ន ម៉រ លីមីធីត រួមមាន ក្រុមហ៊ុន អិន វី ស៊ី ខបភើរេសិន (ផលិតទឹកពិសាវីតាល់) ក្រុមហ៊ុន វ័ន ម៉រ មេនូហ្វេកឆឺរីង (ផលិតមីជាតិ) ក្រុមហ៊ុន វ័ន ហ្វ្រេតធើនីធី ភោជនីយដ្ឋាន វ័ន ម៉រ និងសហគ្រាសឱសថកម្ពុជា៕

The post ស្គាល់ប្រវត្តលម្អិត មីជាតិយីហោមីខ្មែរទីពីរវាយលុកទីផ្សារកម្ពុជា appeared first on .

សហគ្រាសក្នុងស្រុក

មក​ស្គាល់​ សហគ្រាស​កែ​ច្នៃ​តំណាប់​ស្វាយ​មូយ​ នៅ​ខេត្ត​ ត្បូងឃ្មុំ