មកស្គាល់សហគ្រាសមួយកន្លែងកែច្នៃផលិតស្ករចេកដំបូងគេក្នុងស្រុកខ្មែរ

Kem sinath — Thu, 13 Oct 2022 05:10:00 +0000

ធ្លាប់តែដឹងថាស្ករធ្វើពីត្នោត ឬ អំពៅ តែសហគ្រាសមួយកន្លែងក្នុងឃុំ តាអុង ស្រុក ចំការលើ ខេត្ត កំពង់ចាម បានកែច្នៃស្ករពីផ្លែចេក ដែលជាផលិតផលដំបូងគេក្នុងប្រទេសកម្ពុជា ក៏ដូចជា ប្រទេសដទៃទៀតផងដែរ ។

អ្នកស្រី យន់ ផល្លី ជាម្ចាស់សហគ្រាសគំនិតថ្មី ផលិតស្ករចេកបានឲ្យឧកញ៉ាញូស៍ដឹងថា អ្នកស្រីបង្កើតការកែច្នៃនេះរយៈពេល ៩ ឆ្នាំ មកហើយ ពោលគឺតាំងពីឆ្នាំ ២០១៣ មកម្ល៉េះ។ ដោយ ក្រៅពីផលិតស្ករចេកក៏មានផលិតផលមួយចំនួនទៀតដូចជា ស្រាចេក ស្ករគ្រាប់ចេក ជាដើម ។

អ្នកស្រី បានបន្តថា សព្វថ្ងៃផ្លែចេកស្រស់នៅប្រទេសយើងគឺសល់ច្រើន ដោយកាលពីមុនក្រុមគ្រួសារអ្នកស្រីគឺជាឈ្មួញកណ្តាលទទួលទិញផ្លែចេកស្រស់ក្នុងតំបន់ យកទៅចែកចាយទូទាំង រាជធានី ខេត្ត ប៉ុន្តែមកដល់ឆ្នាំ ២០១០ គឺជាឆ្នាំដែលផ្លែចេកជួបវិបត្តិទីផ្សាធ្លាក់ចុះ ធ្វើឲ្យមានការខាតបង់ច្រើន ទើបអ្នកស្រីរិះរកវិធីកែច្នៃចេកទៅជាផលិតផលសម្រេចដែលអាចទុកបានយូរ អាចចែកចាយលើទីផ្សាបានទូលំទូលាយជាងការលក់ចេកស្រស់ ក៏ចាប់យកការកែច្នៃ ផលិតស្ករចេកឡើង ។

អ្នកស្រី បានបន្ថែមថា ស្ករចេកជាផលិតផលមួយដែលអាចប្រើបានដូចស្ករស ស្ករត្នោត ដែរប៉ុន្តែ កម្រិតជាតិស្កររបស់ស្ករចេកគឺមិនផ្អែមខ្លាំងដូចស្ករដទៃទេ មានរសជាតិផ្អែមស្រាល មានអត្ថប្រយោជន៍ល្អសម្រាប់សុខភាព កម្រិតជាតិស្ករទាប មិនជាបញ្ហាចំពោះអ្នកខ្លាចលើសជាតិស្ករ ជាពិសេសអាចរក្សាទុកបានរហូតទៅដល់ ៣ ឆ្នាំ ។ ចំពោះវិធីធ្វើ ត្រូវបន្ទំចេកសិន ទើបយកទៅរម្ងាស់ធ្វើស្ករ ទម្រាំបានជាស្ករចេក ត្រូវប្រើរយៈពេល ១០ ថ្ងៃ ។

កត្តាជំរុញទឹកចិត្តអ្នកស្រីឲ្យបង្កើតនូវសហគ្រាសផលិតស្ករចេកនេះឡើង ១.កាត់បន្ថយការខាតបង់របស់កសិករក៏ដូចជាក្រុមគ្រួសារអ្នកស្រីផ្ទាល់ផងដែរ ។ ២. អាចជួយរកទីផ្សារជូនដល់កសិករនិងពង្រីកទីផ្សារនូវផលិតផលកសិផលរបស់កសិករ ។ ៣. អាចបង្កើតការងារជូនដល់ប្រជាពលជនក្នុងតំបន់ឲ្យមានជីវភាពសមរម្យ ។ ៤. អាចផលិតនូវផលិតផលថ្មីដែលប្រទេសកម្ពុជាយើងមិនទាន់មាន។ ៥. ដើម្បីបង្ហាញ ផ្សព្វផ្សាយផលិតផលក្នុងស្រុក ក៏ដូចជាក្រៅប្រទេស បង្ហាញឲ្យអន្តរជាតិបានឃើញផលិតផលស្នាដៃកូនខ្មែរអាចធ្វើបានដូចបរទេសដែរ ។ ដោយ បច្ចុប្បន្នស្ករចេកអ្នកស្រីមានការនាំចេញជិត ១ តោន ក្នុងមួយខែ ផ្គត់ផ្គង់ជាង ៤០០ ទីតាំងក្នុងស្រុកខ្មែរទាំង ២៥ ខេត្ត ក្រុង ជាពិសេសតាមផ្សារទំនើបនានាដូចជា ឡាក់គី អ៊ីអន 7eleven និងផ្សារបន្លែធម្មជាតិជាច្រើនទៀត ហើយក៏មានការសហការដៃគូនាំចេញទៅកាន់ប្រទេស កូរ៉េ ចិន អាឡឺម៉ង់ ផងដែរ ។

ទោះបីជាយ៉ាងណាក៏មានបញ្ហាប្រឈមផងដែរ ដោយអ្នកស្រីលើកឡើងថា កត្តាចម្បងគឺខ្វះដើមទុន ក៏ដូចជាចំណេះដឹង ស្តង់ដារផលិតបន្ថែម ។ ទន្ទឹមនឹងនេះ អ្នកស្រី ក៏សំណូមពរទៅដល់ប្រជាជនខ្មែរទាំងអស់ងាកមកគាំទ្រនូវផលិតផលក្នុងស្រុក ក៏ដូចជាការជួយបង្កើតការងារដល់ប្រជាពលរដ្ឋក្នុងតំបន់ ដើម្បីបង្កើនសេដ្ឋកិច្ចជាតិ កុំឲ្យលំហូរសាច់ប្រាក់ហូរចេញទៅក្រៅ ៕

The post មកស្គាល់សហគ្រាសមួយកន្លែងកែច្នៃផលិតស្ករចេកដំបូងគេក្នុងស្រុកខ្មែរ appeared first on .

សហគ្រាសខេត្តកំពង់ចាម

មក​ស្គាល់​សហគ្រាស​មួយ​កន្លែង​កែ​ច្នៃ​​​ផលិត​ស្ករ​ចេក​ដំបូង​គេ​ក្នុង​ស្រុក​ខ្មែរ

មកស្គាល់សហគ្រាសមួយកន្លែងកែច្នៃផលិតស្ករចេកដំបូងគេក្នុងស្រុកខ្មែរ