សហគ្រាសខេត្តបាត់ដំបង

គ្រូបង្រៀនម្នាក់ ក្លាយជាម្ចាស់ប្រេនឆាយម្ជូរក្រឡុក ជោគជ័យពង្រីកបានជាង ៥ សាខា

Kem sinath — Wed, 31 Aug 2022 04:40:58 +0000

ធ្លាប់តែជាគ្រូបង្រៀនកុងត្រា បែរមកសម្រេចចិត្តប្រកបមុខរបរលក់ម្ជូរក្រឡុក ដោយផ្តើមទុនត្រឹមតែ ៣០០ ដុល្លារ មកក្លាយជាម្ចាស់ប្រេនឆាយជាង ៥ សាខា និង ទទួលលក់ប្រេនឆាយ ទូទាំង ២៥ ខេត្ត ក្រុង ។

ម្ចាស់ប្រេនឆាយម្ជូរក្រឡុក អ្នកស្រី ឡាយ សុគន្ធា

ម្ចាស់ប្រេនឆាយស្លាកយីហោ ” ម្ជូរក្រឡុកចុងស្ពាន ” ក្នុងសង្កាត់រតនៈ ក្រុង បាត់ដំបង ខេត្ត បាត់ដំបង អ្នកស្រី ឡាយ សុគន្ធា បានប្រាប់ឧកញ៉ាញូស៍ឲ្យដឹងថា ដោយពីដើមអ្នកស្រី និង ស្វាមី ជាគ្រូបង្រៀនកុងត្រា តែនៅពេលចប់កុងត្រា ពិបាករកការងារធ្វើ ក៏ងាកមកផ្តើមលក់ម្ជូរក្រឡុក ដែលលក់ដំបូងចំណាយត្រឹម ៣០០ ដុល្លារ ឬ ១ លាន ២០ ម៉ឺនរៀល តែប៉ុណ្ណោះ។ ប៉ុន្តែបច្ចុប្បន្ននេះ មានបុគ្គលិករហូតទៅដល់ ៧ នាក់ មាន ៥ សាខា ( ភ្នំពេញ សៀមរាប កំពង់សោម បាត់ដំបង ២ សាខា ) ដែលឈរជើងជាង ៥ ឆ្នាំ មកហើយ ។

អ្នកស្រី បានឲ្យដឹងបន្ថែមថា ក្នុងមួយថ្ងៃ អាចរកចំណូលបានជាង ១ លានរៀល ដោយថ្ងៃណាដាច់ខ្លាំងរកពេលចិតមិនទាន់ការកម្មង់របស់អតិថិជនផងក៏មាន។ នេះមកពីខាងម្ជូរក្រឡុកអ្នកស្រីមានចំណុចពិសេសដូចជា ១ អំបិលមានរសជាតិឆ្ងាញ់ ដោយអំបិលទាំងអស់មានជាង ១០០ មុខ រសជាតិប្លែកៗពីគ្នាគ្រប់មុខ។ ២ ធ្វើតាមតម្រូវការចិត្តភ្ញៀវ តាមការកម្មង់របស់អតិថិជន។ ៣ ចំពោះការវេចខ្ចប់មានអនាម័យ បុគ្គលិកមានភាពរួសរាយរាក់ទាក់ទៅកាន់អតិថិជន។ អ្វីដែលពិសេសគឺអតិថិជនដែលទទួលទិញប្រេនឆាយ មានការបង្រៀនធ្វើទីផ្សារ គ្រប់គ្រងបុគ្គលិក ហិរញ្ញវត្ថុបន្ថែមទៀត។

ចំពោះប្រេនឆាយ ម្ចាស់អាជីវកម្មម្ជូរក្រឡុករូបនេះបានលើកបន្ថែមថា លក្ខខណ្ឌដើម្បីទទួលបានប្រេនឆាយ ទី ១ ឈុតតូចមានតម្លៃ ២០០០ ដុល្លារ ទទួលបានសម្ភារៈមួយឈុតរួមមាន ទូរលក់ បណ្តោយ ២ ម៉ែត្រ ទទឹង ៧ តឹក ហ្វ្រីអំបិល ២០ មុខ (២០ រសជាតិ) ចំ់នួន ៥០ គីឡូក្រាម គ្រឿងម្ជូរគ្រប់មុខទាំងប្រភេទស្រស់ និងប្រភេទត្រាំ។ ចំណែក ឈុតធំមានតម្លៃ ៣៥០០ ដុល្លារ ទទួលបានទូរលក់ បណ្តោយ ២.៥ ម៉ែត្រ ទទឹង ១ ម៉ែត្រ សម្ភារៈផ្សេងៗដូចជា ភ្លើង កង្ហារ ហ្រ្វីអំបិល ១០០ គីឡូក្រាម ២០ មុខ មួយមុខ ១០ គីឡូក្រាម។ ចាប់តាំងពីការបើកលក់ប្រេនឆាយនេះមក ឃើញថា មានអតិថិជនចាប់អារម្មណ៍ច្រើនដូចជា ខេត្តបន្ទាយមានជ័យ ខេត្ត ត្បូងឃ្មុំ ភ្នំពេញ កំពុងត្រៀមនឹងទិញខាងមុខ ។

ម្ចាស់អាជីវកម្មវ័យ ៣១ ឆ្នាំ រូបនេះបានលើកឡើងថា អ្នកស្រី មានការរំពឹងក៏ដូចជាមានទស្សនៈវិស័យថា មុខរបរលក់ម្ជូរមួយនេះ គឺកំពុងពេញនិយមខ្លាំង មុខរបរនេះមិនសាបសូន្យទេ ឲ្យតែមានការពង្រឹងទៅលើអំបិល ការក្រឡុក អនាម័យ សេវាកម្មលក់បានល្អ។

ជាមួយគ្នានេះ អ្នកស្រី ក៏មើលឃើញថា ប្រជាជនខ្មែរចូលចិត្តទទួលទានម្ជូរ។ អ្វីកាន់តែកត់សម្គាល់ អតិជនដែលទិញប្រេនឆាយលក់បន្តនៅតាមសាខានានា មានការលក់ដាច់ខ្លាំង ដូចជា សៀមរាប បាត់ដំបង ភ្នំពេញ ជាដើម៕

The post គ្រូបង្រៀនម្នាក់ ក្លាយជាម្ចាស់ប្រេនឆាយម្ជូរក្រឡុក ជោគជ័យពង្រីកបានជាង ៥ សាខា appeared first on .

សិប្បកម្មច្នៃណែមឆ្ងាញ់មួយកន្លែងក្នុងខេត្តបាត់ដំបង មួយខែអាចរកប្រាក់ចំណេញជាង ១០០០ ដុល្លារ

Bou Ranhen — Sun, 28 Aug 2022 02:08:00 +0000

ម្ចាស់សិប្បកម្មច្នៃណែមលក់ក្នុងស្រុកឯកភ្នំខេត្តបាត់ដំបង អ្នកស្រី ធឿន ស៊ីណាត អាចរកប្រាក់ចំណេញបានជាង១០០០ ដុល្លារក្នុងមួយខែ។

អ្នកស្រី ធឿន ស៊ីណាត មានអាយុ ៥៣ ឆ្នាំ រស់នៅក្នុង ភូមិខ្ពប ឃុំខ្ពប ស្រុកឯកភ្នំ ខេត្តបាត់ដំបង បានប្រកបមុខរបរលក់ណែមអស់រយៈពេល ១៥ឆ្នាំមកហើយ បើគិតពីឆ្នាំ២០០៧ រហូតមកដល់បច្ចុប្បន្ន។

ម្ខាស់អាជីវកម្មរូបនេះបានឲ្យឧកញ៉ាញូស៍ដឹងថា ណែមដែលគាត់ផលិតនេះមកមាន ៤ ប្រភេទផ្សេងៗគ្នាដូចជា ណែមត្រីលេខ ២ ណែមត្រីផ្ទក់លេខ ១ ណែមត្រីផ្ទក់លាយស្បែកជ្រូក និងណែមសាច់ជ្រូកលាយស្បែកជ្រូក។ ដោយឡែកក្នុងមួយថ្ងៃ ណែមស្បែកជ្រូកផលិតបានពី ៧០០០ ទៅ ៨០០០ គ្រាប់ ដោយប្រើសាច់និងស្បែកជ្រូកជាង ២០០ គីឡូក្រាម។

អ្នកស្រីបានឲ្យដឹងដែរថា គ្រាន់តែណែមស្បែកជ្រូកនេះគាត់អាចរកប្រាក់ចំណេញបានជាង ១០០០ ដុល្លារក្នុងមួយខែ។

អ្នកស្រី ធឿន ស៊ីណាត បានបង្ហើបពីលក្ខណៈពិសេសនៃណែមស្បែកជ្រូករបស់គាត់គឺ ស្បែកជ្រូកមានលក្ខណៈទន់ស្រួយ មានរសជាតិឆ្ងាញ់ប្លែកពីណែមដទៃ។ ណែមស្បែកជ្រូកនេះមានលាយគ្រឿងផ្សំដោយប្រើបរិមាណត្រឹមត្រូវដូចជា៖ ស្បែកជ្រូក ៧៥% អំបិល ២.៥% ខ្ទឹមស ៤.៥% រំដេង ៣% ស្ករ ១០.៥% ប៊ីចេង ១.៥% និងម្ទេស ៣% ។

ចំណែកណែម ៣ ប្រភេទទៀត ក្នុងមួយថ្ងៃគឺត្រូវការសាច់ត្រីជាង ១តោន ដើម្បីផលិតចេញជាណែម។ អតិថិជននៅតាមបណ្តាខេត្តមួយចំនួនដូចជា ខេត្តព្រៃវែង ខេត្តក្រចេះ រាធានីភ្នំពេញ និងតាមមួយចំនួនទៀត។

បន្ថែមលើនេះ អ្នកស្រីក៏បានលើកឡើងពីផលវិបាកមួយចំនួនក្នុងដំណើរការអាជីវកម្មនផងដែរគឺ មួយរយៈចុងក្រោយនេះទទួលបានប្រាក់ចំណេញតិចតួចព្រោះ អ៊ីវ៉ាន់ឡើងថ្លៃខ្លាំងពេក។ តែទោះជាយ៉ាងណា អ្នកស្រី ធឿន ស៊ីណាត ក៏បានថ្លែងអំណរគុណដល់អតិថិជន ដែលតែងតែគាំទ្រសិប្បកម្មណែមរបស់លោកស្រីតាំងពីដើមរហូតមកដល់បច្ចុប្បន្ន។

សិប្បកម្មអ្នកស្រី ធឿន ស៊ីណាត មានការទទួលស្គាល់ពីក្រសួងពាណិជ្ជកម្ម និងបានចុះបញ្ជីដើម្បីធ្វើអាជីវកម្មស្របច្បាប់ផងដែរ។

The post សិប្បកម្មច្នៃណែមឆ្ងាញ់មួយកន្លែងក្នុងខេត្តបាត់ដំបង មួយខែអាចរកប្រាក់ចំណេញជាង ១០០០ ដុល្លារ appeared first on .

សហគ្រាសច្នៃអាហារសម្រន់មួយ ល្បីដល់ចៅហ្វាយខេត្តបាត់ដំបង មានចំណុចពិសេសអីខ្លះ?

Kem sinath — Tue, 23 Aug 2022 02:28:27 +0000

ដោយមើលឃើញថា ខេត្តបាត់ដំបង ជាខេត្តមួយដែលមានសហគ្រាសធុនតូច-មធ្យម ជាង ៨០០ មូលដ្ឋាន ហើយសហគ្រាសកែច្នៃកសិផលមានតិចតួចនៅឡើយ។ ក្នុងនោះយើងឃើញមានសិប្បកម្មកែច្នៃ ចេក និង ស្វាយ សំងួតមួយកន្លែងនៅខេត្តបាត់ដំបងកំពុងទទួលបានការគាំទ្រ សូម្បីចៅហ្វាយខេត្តក៏បានកោតសរសើរនិងចូលរួមផ្សព្វផ្សាយសហគ្រាសនៅក្នុងខេត្តបាត់ដំបងនេះដែរ។

លោក ហុង សុខមាន ជាម្ចាស់សិប្បកម្មច្នៃ ចេក ស្វាយ សំងួត ដែលមានទីតាំងស្ថិតនៅ ភូមិ អូរអន្លក់ ឃុំ តាសែន ស្រុក កំរៀង ខេត្ត បាត់ដំបង។ សិប្បកម្មរបស់លោកបានដំណើរការអស់រយៈពេល ៩ ឆ្នាំ មកហើយ ដែលគិតពីឆ្នាំ ២០១៣ រហូតមកដល់បច្ចុប្បន្ន ។

ម្ចាស់សិប្បកម្មរូបនេះបានប្រាប់ឧកញ៉ាញូស៍ថា ចេក និង ស្វាយ សំងួតសិប្បកម្មរបស់លោកមានលក្ខណៈពិសេសដូចជាទី ១ ការជ្រើសរើសម៉ាស៊ីនសំងួតគឺម៉ាស៊ីនសំងួតបច្ចេកវិទ្យាចុងក្រោយរបស់ជប៉ុន មានលក្ខណៈពិសេសរក្សានូវគុណភាពផ្លែឈើ អាចសំងួតឲ្យនៅបានល្អដូចដើម មិនបាត់បង់នៅក្រោយពេលសំងួតមិនថា វិតាមីន ប្រូតអ៊ីន សារធាតុចិញ្ចឹម មិនបាត់បង់ដោយសារកំដៅឡើយ។ ទី ២ ចំពោះការវេចខ្ចប់ តាមស្តង់ដាត្រឹមត្រូវមានទឹកសម្លាប់មេរោគ ដែលមាននៅលើកញ្ច្រែងឬសម្ភារៈប្រើប្រាស់ទាំងអស់ រួមទាំងផ្លែឈើមុនសំងួតត្រូវសម្លាប់មេរោគសិន ដើម្បីកុំឲ្យកើតផ្សិត ព្រោះធ្វើមិនប្រើសារធាតុបម្រុងសារធាតុទុកឲ្យបានយូរ រួចធ្វើការវេចខ្ចប់ ។ ទី៣ ថង់ខ្ចប់មានគុណភាពល្អ ជាប្រភេទថង់ប្លាស្ទិកល្អ ( Brand Top ) ដែលអាចជួយរក្សាផលិតផលឲ្យបានយូរ។ ទី ៤ ចេក ស្វាយ សំងួតមានអាយុកាលយូរ អាចទុកបានរហូតទៅដល់ ១ ឆ្នាំ ៦ ខែ។ ទី ៥ មានការរក្សាសំណើមទឹកសកម្មនៅក្នុងកម្រិតស្តង់ដា ១០ ទៅ ១៤ ភាគរយ។ ទី ៦ បានបញ្ចូលនៅសារធាតុមួយទៀត ដែលមានតួនាទីសម្រួលពោះវៀនធំ ប្រព័ន្ធរំលាយអាហារបានល្អ បត់ជើងស្រួល ធ្វើឲ្យពោះវៀនស្អាត លាងសម្អាតពោះវៀនខាងក្នុង ដោយការបញ្ចូលបន្ថែមចុងក្រោយ ដើម្បីលើកស្ទួយសុខភាពអ្នកទទួលទាន។

ការធ្វើចេកសំងួត ម្ចាស់សិប្បកម្មរូបនេះឲ្យដឹងថា គឺជ្រើសរើសចេកណាំវ៉ា ដែលជាចេកសម្បូរអ្នកដាំច្រើន អាចផ្គត់ផ្គង់បានគ្រប់គ្រាន់ និងគ្រប់រដូវ។ ក្នុងមួយកញ្ចប់ចេកសំងួត ១២០ ក្រាម មានតម្លៃ ២.៥ ដុល្លារ យើងយកចេកណាំវ៉ា បណ្តូលលឿង ត្រូវចំណាយ ផ្លែចេក ៧ ទៅ ៨ ផ្លែ ចាស់ល្អ បន្ទុំឲ្យទុំល្អ ទើបយកសំងួត ជាមួយនឹងម៉ាស៊ីនសំងួតជប៉ុន។ ចំណែកឯស្វាយសំងួតវិញ មួយកញ្ចប់ ៦០ ក្រាម មានតម្លៃ ២.៥ ដុល្លារដូចគ្នា គឺជ្រើសរើសស្វាយកែវរមៀត ជាស្វាយរដូវ មិនប្រើថ្នាំ (ស្វាយធម្មជាតិ ) ៣ ផ្លែ យ៉ាងតិច យកតែចំណុចល្អនៃផ្លែ ទើបយកមកសំងួត ។ ការសំងួតស្វាយ និង ចេក ប្រើរយៈពេលខុសគ្នា ( ស្វាយ ២៤ ម៉ោង ចេក ៥០ ទៅ ៦០ ម៉ោង ស្មើនឹង ២ ថ្ងៃកន្លះ ) ចេក ចំណាយពេលច្រើនជាងស្វាយរហូតទៅដល់ ៣ ដង ដោយសារមានជាតិទឹកច្រើន កម្រាស់ក្រាស ប៉ុន្តែការធ្វើបែបនេះអាចរក្សាគុណភាពចេក ក៏ដូចជារសជាតិ ពណ៍ ក្លិន មិនបាត់បង់ ។

លោកក៏បានបន្ថែមថា កក្តាដែលជំរុញឲ្យមានការបង្កើតនូវសិប្បកម្មនេះឡើង ដោយសារមើលឃើញថាខេត្តបាត់ដំបង ជាខេត្តដែលសម្បូរកសិផល មានការដាំដុះច្រើន ទើបលោកមានគំនិតថា ត្រូវធ្វើអ្វីមួយដើម្បីជួយសហគមន៍ ក៏បង្កើតសិប្បកម្មធ្វើ ចេក ស្វាយ សំងួតនេះឡើង “ បង្កើតការកែច្នៃក្នុងសហគមន៍ បង្កើតការកែច្នៃក្នុងតំបន់ជនបទ” ដើម្បីដោះស្រាយបញ្ហាទីផ្សារផង ដោះស្រាយញ្ហាកសិផលផង តាមរយៈលំហូរសាច់ប្រាក់រង្វិលជុំ ផ្តល់ការងារដល់សហគមន៍ ជាមធ្យោបាយមួយធ្វើឲ្យសហគមន៍មានការរីកចម្រើន មានដំណើរការល្អ ។

ម្ចាស់សិប្បកម្មរូបនេះក៏បានលើកឡើងពីបញ្ហាដែលជាការចោទផងដែរ ដូចជា ទី១ ការបង្វែរការគាំទ្រផលិតខ្មែរពីប្រជាជនខ្មែរ ( កត្កាចម្បង ) មានន័យថា បើប្រៀបធៀបរវាងផលិតផលខ្មែរ និង បរទេស គឺខ្មែរប្រើប្រាស់ផលិតផលបរទេស ។ ទី ២ បញ្ហាទីផ្សារ ដើម្បីចូលទីផ្សារបានមានការពិបាក ដោយសារផលិតផលថ្មី រោងចក្រមិនទាន់មានការទទួលស្គាល់ជាលក្ខណៈអន្តរជាតិនៅឡើយ ។ ទី ៣ ការវេចខ្ចប់មានការនាំចូលភាគច្រើន ។ ប៉ុន្តែ លោក មានការរំពឹងថា នឹងព្យាយាមបង្វែរឲ្យអតិថិនខ្មែរមកគាំទ្រ ឲ្យស្គាល់ពីផលិតផលល្អក្នុងស្រុក ទីផ្សារនឹងល្អនៅថ្ងៃខាងមុខ ។ សព្វថ្ងៃសិប្បកម្មរបស់លោក ផ្គត់ផ្គង់តាមផ្សារទំនើប អ៊ីអន១ ព្រលានយន្តហោះ ទាំងបីកន្លែង ( ភ្នំពេញ សៀមរាប ព្រះសីហនុ ) នៅមាត់ទន្លេ និង តាមរយៈប្រព័ន្ធអនឡាញ ផងដែរ ។

លោកក៏បានស្នើរឲ្យប្រជាជនខ្មែរ ជួយទទួលយកក៏ដូចជាការជួយគាំទ្រ នូវផលិតផលខ្មែរក្នុងស្រុកផងដែរ។

អាចទាក់ទងតាមរយៈ Website: http://www.sorakhmer.com

The post សហគ្រាសច្នៃអាហារសម្រន់មួយ ល្បីដល់ចៅហ្វាយខេត្តបាត់ដំបង មានចំណុចពិសេសអីខ្លះ? appeared first on .

គាំទ្រផលិតផលក្នុងស្រុក អភិបាលខេត្តបាត់ដំបង ធ្វើដំណើរបណ្តើរ ទទួលអាហារសម្រន់ខ្មែរបណ្តើរ

ឧកញ៉ាមហាសម្បត្តិ — Sun, 14 Aug 2022 06:42:50 +0000

ខណៈកំពុងធ្វើដំណើរក្នុងរថយន្ត លោក សុខ លូ អភិបាលខេត្តបាត់ដំបងបានលើកបង្ហាញផលិតផលអាហារសម្រន់ ជាស្នាដៃរបស់សហគ្រាសក្នុងខេត្តបាត់ដំបង។

នៅលើគណនីហ្វេសបុកផ្ទាល់ លោក សុខ លូ បានសរសេរថា អាហារសម្រននេះអាចញាំក្នុងឡានក៏បាន នៅផ្ទះក៏បាន និងនៅទីណាក៏បាន។

នៅខេត្តបាត់ដំបង សហគ្រាសធុនតូច-មធ្យម មានជាង ៨០០ មូលដ្ឋាន ហើយសហគ្រាសកែច្នៃកសិផលមានតិចតួចនៅឡើយ។ សហគ្រាសកែច្នៃផ្លែឈើចំនួរពីរកំពុងមានភាពលេចធ្លោគឺសហគ្រាសមីសូតា និងណាវីតា ដែលកែច្នៃផ្លែឈើ ដូចជាស្វាយ ម្នាស់ ផ្លែស្រកានាគ ប៉េងប៉ោះ ឆែរី ផ្លែតាង៉ែនជាដើម។ ក្រុមហ៊ុនណាវីតា ថ្មីៗនេះក៏បានផលិតមៀនកែវដែលបានទទួលការគាំទ្រ និងចាប់អារម្មណ៍យ៉ាងខ្លាំងពីអ្នកបរិភោគ ហើយគ្រោងផលិតនូវផលិតផលថ្មីៗបន្ថែមទៀត ដោយសហគ្រាសបានចុះអនុស្សារណៈជាមួយសហគមន៍កសិករនៅស្រុកភ្នំព្រឹក។

បើតាមមអគ្គនាយកដ្ឋានសហគ្រាសធុនតូច និងមធ្យម និង សិប្បកម្ម បច្ចុប្បន្ននេះសហគ្រាសធុនតូច មធ្យម និង សិប្បកម្មដែលចុះបញ្ជីសរុបមានចំនួន ៤៣,២៧៦ មូលដ្ឋាន ដែលបង្កើតការងារបានចំនួន ៤៣៥,៩០៥ នាក់។

សហគ្រាសធុនមីក្រូ តូច និងមធ្យម (MSMEs) ត្រូវបានចាត់ទុកថាជាក្បាលម៉ាស៊ីន ដែលរួមចំណែកនៅក្នុងការអភិវឌ្ឍសេដ្ឋកិច្ច និង បង្កើតការងារក្នុងប្រទេស។ នៅប្រទេសកម្ពុជា សហគ្រាសធុនមីក្រូ តូច និងមធ្យម តំណាងឱ្យ ៧០% នៃការងារសរុបនិងរួមចំណែកក្នុងផលិតផលក្នុងស្រុកសរុបចំនួន ៥៨%៕

The post គាំទ្រផលិតផលក្នុងស្រុក អភិបាលខេត្តបាត់ដំបង ធ្វើដំណើរបណ្តើរ ទទួលអាហារសម្រន់ខ្មែរបណ្តើរ appeared first on .

ដាំដូងក្រអូបរកចំណូល ៣០០០ ដុល្លារក្នុងមួយខែ ដាំម្តងកើបលុយរាប់ឆ្នាំ

Kem sinath — Mon, 01 Aug 2022 02:23:32 +0000

ដូងក្រអូបជាប្រភេទផ្លែឈើមួយដែលមានអ្នកនិយមទទួលទាននិងមានការកែច្នៃទៅជាគ្រឿងសំអាង និងសម្ភារប្រើប្រាស់ជាច្រើនទៀត។ ដំណាំដូងក្រអូបជាដាំណាំដែលហុចផលខ្ទង់ពាន់ដុល្លារក្នុងមួយខែ បើមានបច្ចេកទេសដាំត្រឹមត្រូវ។

អ្នកស្រី សុខ ចិន្តា ជាម្ចាស់ចំការដូងក្រអូប

កញ្ញា សុខ ចិន្តា វ័យទើបតែ ៣២ ឆ្នាំ គឺទៅជាម្ចាស់ចំការដូងវ័យក្មេងមួយរូបនៅស្រុកសំពៅលូន ខេត្តបាត់ដំបង។

ម្ចាស់ចំការដូងក្រអូបនេះបានប្រាប់ឧកញ៉ាញូស៍ថា ការដាំដូងក្រអូបនេះរយៈពេលទើបតែ ៣ ឆ្នាំទេ មានចំនួន ២០០០ ដើម នៅលើផ្ទៃដីប្រមាណ ៥ ហិកតា។ ប៉ុន្តែបទពិសោធន៍ដែលគ្រួសារកញ្ញាមានជាង ១៥ឆ្នាំមកហើយលើការដាំដំណាំសក្តានុពលនេះ។

ដំណាំដូងក្រអូបជាដំណាំប្រមូលផលរង្វិលជុំដែលក្នុងមួយខែ អាចប្រមូលផលបាន ៣០០០ ដុល្លារ (២០០០ដើម) ដោយតម្លៃបច្ចុប្បន្នក្នុងមួយផ្លែ ១៥០០ រៀលទៅ ១៨០០ រៀល ក្នុងការលក់ចេញឲ្យឈ្មួញកណ្តាល។

កញ្ញាបានបន្តថា ដំណាំដូងនេះមានអាយុកាលត្រឹមតែ ២ ឆ្នាំកន្លះអាចប្រមូលផលបានអាស្រ័យលើការថែទាំ។ មូលហេតុដែលកញ្ញាដាំដូងក្រអូប ព្រោះដោយសារផ្អែកទៅលើទី ១ វាជាដំណាំនិវត្តន៍ដែលប្រមូលផលរហូតដល់ចាស់អាចមានចំណូលចូលខ្លួនឯងរហូតហើយបទពិសោធន៍ដែលមានគឺអ្នកស្រីសង្ឈឹមអាចជោគជ័យ។ ទី២ ជាជម្រើសមួយដ៏ល្អបំផុតនាពេលបច្ចុប្បន្ន និងអនាគតដោយសារដំណាំដូងគឺជាតម្រូវការសំខាន់មិនថាជាការបរិភោគផ្ទាល់និងការផលិតកែច្នៃជាគ្រឿងសំអាងឬកែច្នៃជារបស់របរផ្សេងៗទៀត។ លើសពីនេះនៅលើសាកលលោកឃើញថាមានការប្រើប្រាស់ដំណាំដូងច្រើនមែនទែនលើការកែច្នៃរបស់បុគ្គលនីមួយៗនៃម្ចាស់ចំការក្នុងកែប្រែដូងឲ្យមានតម្លៃខ្ពស់ ទោះបីជាទីផ្សារធ្លាក់ចុះក៏ដោយ។ ទី៣ព្រោះការស្រលាញ់ចូលចិត្តហើយពូជដូងក្រអូបនេះមានពូជមកពីប្រទេសថៃជំនាន់ទី ២ មកពីតំបន់ទឹកប្រៃគឺអត្រាក្រអូបនិងសុទ្ធរបស់វាមានរហូតដល់៩៨%។

ទិដ្ឋភាពចំការដូងក្រអូប

អ្នកស្រីបានបន្ថែមថា ចំពោះដើមទុនដែលយើងដាំមួយដើមចំណាយទុន ២០ដុល្លារដោយបែងចែកជាប្រព័ន្ធទឹក១០ ដុល្លារ ពូជដូង ៣ ដុល្លារកន្លះជាងនិងថ្នាំ ៤ ដុល្លារកម្លាំងពលកម្ម ២ ដុល្លារ។ ចំណែកវិធីដាំវិញម្ចាស់ចំការវ័់យក្មេងរូបបានបង្ហើបថា ត្រូវគិតលើពូជគិតលើជី ការថែទាំនិងសណ្ឋានដី។ អ្វីដែលពិសេសនៅចន្លោះដូងបើសិនអាចដាំជាប្រភេទកាកាវព្រោះប្រភេទកាកាវជាដាំណាំ ដែលនៅក្រោមម្លប់បានផលល្អ ហើយក៏វាស៊ីជីដូចដូងដែរ ឬអាចដាំត្របែកក៏បាន។

ចំពោះបញ្ហាកញ្ញាមិនមានជាការចោទទេ ប៉ុន្តែមានគឺការដាំដំបូងមានការរៀបចំប្រព័ន្ធទឹកខុសបន្តិចបន្តួចតែមកដល់ពេលនេះមិនមានជាបញ្ហាទៀតឡើយ។

កញ្ញាក៏មានគម្រោងពង្រីកដីចំការ ២០ ហិកតាទៀតដែលអាចក្លាយទៅជាកសិកម្មខ្នាតធំ ដោយសាររំពឹងខ្ពស់ទៅលើតម្លៃដូងនៅលើទីផ្សាបច្ចុប្បន្ននិងពេលអនាគត។

កញ្ញាចង់ឲ្យបងប្អូនកសិករគឺឈ្នះក្នុងវិស័យកសិកម្មដូងក្រអូប កុំឲ្យចំណាយដើមទុនខុស មិនចង់ឲ្យប្រើបច្ចេកទេសខុស ចង់ឃើញការទទួលបានផលល្អ ហើយចំណាយដើមទុនយ៉ាងណាកុំប៉ះពាល់ក្នុងសេដ្ឋកិច្ចផ្សេងៗក្នុងគ្រួសារ៕

The post ដាំដូងក្រអូបរកចំណូល ៣០០០ ដុល្លារក្នុងមួយខែ ដាំម្តងកើបលុយរាប់ឆ្នាំ appeared first on .

គ្រួសារមួយមានរូបមន្តធ្វើបង្អែមពិសេស មួយថ្ងៃលក់ដាច់ជាង ១ពាន់ចាន ចំណូលវិញមិនក្រោម ៣០០ ដុល្លារ

Kem sinath — Thu, 14 Jul 2022 03:50:34 +0000

មុខរបរបង្អែមមើលឃើញពីក្រៅសមញ្ញ ដែលត្រូវការភាពអំណត់ព្យាយាមនិងនឿយហត់បន្តិច តែក៏តបស្នងមកវិញក្រាស់ក្រែលតាមរយៈចំណូលប្រចាំថ្ងៃ។

ខេត្តបាត់ដំបងក្រៅពីល្បីណែម ក្រូចពោធិ៍សាត់ និងរបស់ហូបចុកដ៏សំបូរបែប និយាយពីបង្អែមវិញ គ្រួសារមួយមានរូបមន្តធ្វើបង្អែមពិសេសប្លែក ដែលអាចលក់ដាច់មួយថ្ងៃមិនក្រោម ១ ពាន់ចាន ហើយចំណូលវិញមិនក្រោម ៣០០ ដុល្លារក្នុងមួយថ្ងៃ។

លោក មុត ចាន់ធិ ដែលរស់នៅក្នុងសង្កាត់រតនៈ ក្រុងបាត់ដំបងខេត្តបាត់ដំបងប្រាប់ឧកញ៉ាញូសន៍ថា បង្អែមដែលគ្រួសារលោកលក់រាល់ថ្ងៃនេះ មួយថ្ងៃអាចលក់បានចូល ១០០០ ចាន ដែលមួយចានមានតម្លៃ ៥០០០រៀល។

លោកបង្ហើបរូបមន្តបង្អែមមួយប្រភេទហៅថា “បង្អែមនំដង្កូវ” ដែលជាស្នាដៃគ្រួសាររបស់លោកផ្ទាល់ ហើយដែលលក់ដាច់ទទួលការគាំទ្របំផុត។

លោកបញ្ជាក់ថា រវាងនំបង្អែមទាំងអស់ ឃើញថាអតិថិជនពេញនិយមបង្អែមនំដង្កូវច្រើនជាងគេ ដោយភ្ញៀវពោលថា “ឆ្ញាញ់” គ្រប់គ្នា។ បង្អែមមួយមុខនេះប្រើគ្រឿងផ្សំមានរសជាតិ ហើយក៏មានភាពលំបាកក្នុងការធ្វើផងដែរ។

ក្រៅពីការលក់បង្អែមនំដង្កូវ គ្រួសារបុរសនេះក៏មានលក់ អាកោខ្ទិះ សង់ខ្យាទុរេន បង្អែមដួងពោត ថែមទាំង មាននំខ្មែរផ្សេងទៀតដូចជា នំបាក់បិន នំបាយត្រៀប និងជាប្រភេទបង្អែមទឹកជាដើម។

បុរសរូបនេះបន្តថា បើគិតជាប្រាក់ចំណូលខ្ទង់ ៣០០ដុល្លារក្នុងមួយថ្ងៃ(ដាច់ខ្លាំង) បើមិនសូវដាច់ក្នុងមួយថ្ងៃត្រឹម ១០០ ដុល្លារ។

បុរសវ័យ២៧ឆ្នាំរូបនេះ ក៏បានបន្ថែមថា មុខរបរធ្វើបង្អែមនេះ គ្រួសាររបស់លោកប្រកបតពីដូនតាមកម្ល៉េះ។ លោក មុត ចាន់ធិក ក៏មានក្តីរំពឹងថាពង្រីកឲ្យកាន់តែធំឡើងបន្ថែមទៀត បើសិនថ្ងៃក្រោយទទួលការគាំទ្រច្រើន៕

The post គ្រួសារមួយមានរូបមន្តធ្វើបង្អែមពិសេស មួយថ្ងៃលក់ដាច់ជាង ១ពាន់ចាន ចំណូលវិញមិនក្រោម ៣០០ ដុល្លារ appeared first on .

ចេកស្រស់មិនសូវមានទីផ្សារ ម្ចាស់សិប្បកម្មនៅបាត់ដំបងច្នៃចេកឆាប លក់បានពី ៥០០-៦០០ កេះក្នុងមួយខែ

Bou Ranhen — Wed, 13 Jul 2022 02:17:33 +0000

ដោយមើលឃើញកសិផលនៅក្នុងស្រុកសល់ច្រើនព្រោះមិនសូវមានទីផ្សារ ទើបជម្រុញទឹកចិត្តឲ្យលោកស្រី នុន ចាន់នី បង្កើតសិប្បកម្មចេកឆាបឡើង ដែលអាចនាំចេញលក់លើទីផ្សារក្នុងស្រុកពី ៥០០-៦០០កេះក្នុងមួយខែ។

លោកស្រី នុន ចាន់នី ម្ចាស់សិប្បកម្មចេកឆាបរាជនី ចាប់ផ្ដើមអាជីវកម្មរបស់ខ្លួនជិត៤ឆ្នាំមកហើយ ដែលកែច្នៃចេកស្រស់ ឲ្យក្លាយជាចេកឆាបមានរសជាតិឈ្ងុញឆ្ងាញ់ អាចពង្រីកសក្តានុពលចេញពីស្រុកសំឡូត ខេត្តបាត់ដំបង ចែកចាយបន្តដល់ រាជធានីភ្នំពេញ និងបណ្ដាខេត្តមួយចំនួដូចជា ខេត្តពោធិ៍សាត់ ខេត្តព្រៃវែង ខេត្តព្រះសីហនុ ខេត្តកណ្ដាល និងថ្មីៗនេះនាំចេញទៅដល់ខេត្តកោះកុង ថែមទៀតផង។

បើតាមម្ចាស់សិប្បកម្មរូបនេះបានឲ្យឧកញ៉ាញូស៍ដឹងថា ផលិតផលនៅលើទីផ្សារនាំមុខគេ គឺចេកឆាប ដោយក្នុងមួយថ្ងៃអាចផលិតបានពី ១៥០-១៦០គីឡូកា្រម ហើយមួយខែលក់ចេញបានពី ៥០០ ទៅ ៦០០កេះ ដោយក្នុង ០១ កេះមាន ១៦ដុំ និង០១ដុំៗមាន១២កញ្ចប់។ ក្រៅពីនោះមានចេកសម្ងួតជាផលិតផលទី ០២ និងឆៃប៉ូវ ជាផលិតផលទើបតែសាកល្បងច្នៃថ្មី។

លោកស្រីបានបន្ថែមថា សិប្បកម្មមួយនេះមិនត្រឹមតែជួយឲ្យលោកស្រីរកប្រាក់ចំណូលបាននោះទេ ប៉ុន្តែអាចជួយដល់សង្គមបានដូចគ្នា មិនថាទាំងអ្នកដាំចេក អ្នកធ្វើការនៅក្នុងសិប្បកម្ម និងសូម្បីតែអ្នកញាំក៏ទទួលបានអត្តប្រយោជន៍ផងដែរ ព្រោះពួកគាត់អាចទទួលបានផលិតផលដែលមានគុណភាពពី ចេកឆាបរាជនី។

លើសពីនោះ លោកស្រី នុន ចាន់នី បានបញ្ជាក់បន្ថែមថា គាត់ពិតជាសប្បាយចិត្តនូវអ្វីដែលគាត់ធ្វើឡើងចេញជាផ្លែផ្កាបែបនេះ និងសំណូមពរឲ្យអតិថិជននៅតែបន្តការគាំទ្រផលិតផល ចេកឆាបរាជនីនេះបន្តទៀត ជាពិសេសសូមផ្ញើផលិតផលដែលផលិតចេញពីក្រុមស្ត្រីជនបទទៅកាន់បេះដូងអតិថិជនគ្រប់ៗគ្នា៕

The post ចេកស្រស់មិនសូវមានទីផ្សារ ម្ចាស់សិប្បកម្មនៅបាត់ដំបងច្នៃចេកឆាប លក់បានពី ៥០០-៦០០ កេះក្នុងមួយខែ appeared first on .

សហគ្រាសខេត្តបាត់ដំបង

​គ្រូ​បង្រៀន​ម្នាក់ ​​ក្លាយ​ជា​ម្ចាស់​ប្រេន​ឆាយ​ម្ជូរ​ក្រឡុក ជោគជ័យ​ពង្រីក​បាន​​ជាង​ ៥ សាខា​

សិប្បកម្មច្នៃណែមឆ្ងាញ់មួយកន្លែងក្នុងខេត្តបាត់ដំបង មួយ​ខែ​អាចរកប្រាក់ចំណេញ​ជាង ១០០០ ដុល្លារ

សហគ្រាស​ច្នៃ​អាហារសម្រន់មួយ​ ល្បីដល់​ចៅហ្វាយ​ខេត្ត​​បាត់ដំបង មានចំណុចពិសេសអីខ្លះ?

គាំទ្រ​ផលិតផល​ក្នុង​ស្រុក​ អភិបាល​ខេត្ត​បាត់ដំបង ធ្វើ​ដំណើរ​បណ្តើរ​ ​ទទួល​អាហារ​សម្រន់ខ្មែរ​បណ្តើរ

ដាំដូង​ក្រអូប​រក​ចំណូល ៣០០០ ដុល្លារក្នុងមួយខែ ដាំម្តង​កើប​លុយ​រាប់ឆ្នាំ

គ្រួសារ​មួយ​មានរូបមន្តធ្វើ​បង្អែមពិសេស ​មួយថ្ងៃលក់​ដាច់​ជាង ១ពាន់ចាន ចំណូល​វិញមិនក្រោម ៣០០ ដុល្លារ