កញ្ញា មាណ រដ្ឋា អាយុ ៣៤ឆ្នាំ មានស្រុកកំណើតនៅ ភូមិអង្រង ឃុំកន្ទ្រាំង ស្រុកប្រាសាទបាគង ខេត្តសៀមរាប។

កញ្ញា មាណ រដ្ឋា បាន​ឲ្យឧញ៉ាញូស៍ដឹងថា​ មុខរបរលក់ទឹកឃ្មុំធម្មជាតិនេះ បានចាប់ផ្ដើមអស់រយៈពេលជិត ៣ ឆ្នាំមកហើយ។ កត្តាជំរុញទឹកចិត្តបង្កើតអាជីវកម្មមួយនេះឡើង ព្រោះ​យុវតី​រូប​នេះ​ចង់ឲ្យអ្នកប្រើប្រាស់ទឹកឃ្មុំគ្រប់គ្នា មិនថាជាភ្ញៀវជនជាតិខ្មែរ ឬបរទេសនោះទេ ងាកមកប្រើនិងគាំទ្រផលិតផលធម្មជាតិពិតប្រាកដ។

ដោយប្រមូលទិញទឹកឃ្មុំធម្មជាតិពីអ្នករកឃ្មុំតាមព្រៃ និងអ្នកចិញ្ចឹមឃ្មុំធម្មជាតិតាមកសិដ្ឋានមួយចំនួន យកមកលក់បន្តជូនអតិថិជន។ ទឹកឃ្មុំធម្មជាតិដែលកញ្ញា រដ្ឋា មានដូចជា ទឹកឃ្មុំស្រស់ លំអងផ្កា  cream (សម្រាប់​បៀក​លើ​នំប័ុង​) និងក្រមួនឃ្មុំ (យកទៅផលិតធ្វើជាសាប៊ូ)។

កញ្ញា មាណ រដ្ឋា បាន​បញ្ជាក់ថា ដើមទុនកាលពីចាប់ផ្តើមអាជីវកម្មដំបូងអស់ត្រឹមតែ ១០០ ដុល្លារប៉ុណ្ណោះ។ ដោយ​ការលក់ចេញអាចលក់បានពី ៥០០-៦០០ដុល្លារក្នុងមួយខែ។ ចំណែកការវេចខ្ចប់មានពីរប្រភេទគឺមាន៖ ១កែវចំណុះ ៥០០​ក្រាម និង ២៥០ ក្រាម ដោយទឹកឃ្មុំព្រៃកែវធំថ្លៃ ១៧ ដុល្លារ កែវតូចថ្លៃ ៩ ដុល្លារ។ ដោយឡែកទឹកឃ្មុំចិញ្ចឹមកែវធំថ្លៃ ១៣ ដុល្លារ និងកែវតូច ថ្លៃ៧ ដុល្លារ។

បើ​តាមម្ចាស់​អាជីវកម្ម​រូប​នេះ​ អតិថិជនមាន​អ្នក​ទិញ​យកទៅប្រើប្រាស់ផ្ទាល់​ និងអ្នកទិញ​យកទៅលក់បន្ត ដែល​មួយ​ចំនួននៅក្នុងខេត្តសៀមរាប  និងរាជធានីភ្នំពេញ។ ចំណែកអតិថិជនដែលទិញយកទៅប្រើប្រាស់ភាគច្រើនគឺជាភ្ញៀវបរទេស។

កញ្ញា មាណ រដ្ឋា បានបញ្ជាក់បន្ថែមថា ទឹកឃ្មុំធម្មជាតិទាំងនោះកញ្ញា​​យកពី​អ្នក​រក​ឃ្មុំតាមព្រៃ និងកសិដ្ឋានចិញ្ចឹមឃ្មុំធម្មជាតិនៅ​ខេត្តសៀមរាប កំពង់ចាម ប៉ៃលិន និង មណ្ឌលគីរី ។

ម្ចាស់អាជីវកម្ម QBEE រូបនេះមានជំនាញអាចភ្លក់រស់ជាតិនៃទឹកឃ្មុំបានយ៉ាងស្ទាត់ជំនាញ ព្រោះកញ្ញាធ្លាប់បានសិក្សាបន្ថែមពីលោកគ្រូជាជនជាតិបរទេសម្នាក់ដែលមានជំនាញនេះ។

យុវតី​រូប​នេះ​បាន​បង្ហាញពី​អត្ថប្រយោជន៍នៃទឹកឃ្មុំធម្មជាតិមានច្រើនយ៉ាងដូចជា ជួយព្យាបាលជំងឺផ្ដាសសាយក្អក ស្ក្រាប់លើមុខដុំម្បីកាត់បន្ថយមេរោគលើស្បែក ព្យាបាលរបួស ជាដើម។

ទាក់ទង​អាជីវកម្មលក់ទឹកឃ្មុំ កញ្ញា មាណ រដ្ឋា បាន​បញ្ជាក់​ថា ពេលចាប់ផ្ដើមដំបូងរៀងពិបាកព្រោះ អតិថិជនមិនមានជំនឿចិត្តលើផលិតផលទឹកឃ្មុំប៉ុន្មានទេ ដោយសារ​តែអតិថិជនធ្លាប់ទិញប៉ះទឹកឃ្មុំមិនសុទ្ធ។ ប៉ុន្ដែក្រោយមកដោយមានអតិថិជនជាច្រើនបានដឹងយ៉ាងប្រាកដថា ទឹកឃ្មុំដែលកញ្ញាលក់នេះគឺសុទ្ធ១០០% ទើបមានអ្នកគាំទ្រកាន់តែច្រើន និងអាចធ្វើឲ្យអាជីវកម្មរបស់កញ្ញាអាចឈរជើងបានដល់បច្ចុប្បន្ន។

បើតាម​កញ្ញា មាណ រដ្អា អាជីវកម្មទឹកឃ្មុំធម្មជាតិ QBEE បាន​រួម​ចំណែក​ជួយដល់ប្រជាជនដែលរកទឹកឃ្មុំបាន ប៉ុន្តែគ្មានទីផ្សារ និងថែមទាំងបានជួយអភិរក្សឃ្មុំព្រៃថែមទៀតផង ដោយអ្នកដែលរកទឹកឃ្មុំព្រៃ គឺយកតែទឹកឃ្មុំមកលក់​ប៉ុណ្ណោះ ចំណែកកូនឃ្មុំវិញគឺមិនលក់ចេញនោះទេ៕

The post យុវតី​វ័យ​ក្មេង​មួយរូប​ ​​មួយ​ខែ​​អាច​រក​ចំណូល​បាន​ពី ៥០០ ទៅ ៦០០ ដុល្លារ ដោយសារ​របរ​លក់ទឹកឃ្មុំធម្មជាតិ appeared first on .

រដ្ឋបាលខេត្តសៀមរាបបានឲ្យដឹងថា ស្រុកស្រីស្នំក៏មានសក្តានុពលលើវិស័យកសិកម្ម ហើយថ្មីៗនេះកសិករចាប់ផ្តើមប្រមូលផលដំណាំល្មើរបស់ខ្លួនបណ្ដើរៗហើយ។

តាមប្រភពដដែលបានបញ្ជាក់ថា ប្រជាពលរដ្ឋចំនួន ៣ គ្រួសារ រស់នៅភូមិដង្កោ ឃុំស្លែងស្ពាន ស្រុកស្រីស្នំ ខេត្តសៀមរាបបានប្រកបរបបដាំល្មើជាលក្ខណៈគ្រួសារលើផ្ទៃដីទំហំ ១៥ហិចតា ហើយបច្ចុប្បន្ននេះ ពួកគាត់កំពុងតែប្រមូលផលជាប្រចាំផងដែរ។

ដំណាំហូបផ្លែប្រភេទនេះធ្លាប់មាននៅតែបរទេសប៉ុណ្ណោះ។ ប៉ុន្តែដោយការចេះស្វែងយល់របស់ប្រជាកសិករខ្មែរ ពីការដាំដំណាំហូបផ្លែល្មើនេះ កសិករមួយចំនួនទើបតែធ្វើការដាំដុះនិងមួយចំនួនទៀតក៏​ដាំយូរហើយ និងកំពុងតែប្រមូល​ផល​បានបណ្តើរៗហើយផងដែរ៕

The post ស្ងាត់ៗ​ប្រជា​កសិករ​​នៅ​​ខេត្តសៀមរាប ប្រមូល​ផល​ផ្លែល្មើ​លើ​ផ្ទៃ​ដី​ប្រមាណ​ជាង ១៥ ហិចតា appeared first on .

លោកស្រី ស៊ុន សុភ័ក្រ ជា ស្ថាបនិកនិងជាសហគ្រិនឆ្នើមដែលចេះបត់បែនតាមកាលៈទេសៈ ចេះផ្លាស់ប្ដូរស្ថានការណ៍ក្នុងអាជីវកម្មរបស់ខ្លួន។

សហគ្រាស Miss SEW Cambodia ជាសហគ្រាសមួយដែលលេចរូបរាងឡើងតាំងពីឆ្នាំ២០១៤ មកម្ល៉េះ។ កាលនោះលោកស្រី​បើកជាសហគ្រាសដេរវាំងននសម្រាប់លម្អផ្ទះ លុះក្រោយមកដល់ឆ្នាំ ២០១៨ ទើបប្ដូរមកជាដេរអាវក្រៅគីម៉ូណូនេះវិញ ដោយសារបច្ចុប្បន្នមានគេនិយមពាក់ច្រើន។

លោកស្រីបានបន្តថា មូលហេតុដែលសម្រេចចិត្តបើកសហគ្រាសនេះឡើង ព្រោះចង់ជួយអ្នកដែលមានសមត្ថភាពខាងដេរតែគ្មានការងារធ្វើ។

ចំពោះការមើលឃើញក្នុងការផលិតនេះលោកស្រីមានបំណងចង់បើកតាំង២០១៥ មកម្ល៉េះ តែដោយសារមានបញ្ហាមួយចំនួន រហូតមក២០១៨ អាវនេះទទួលបានការចាប់អារម្មណ៍ច្រើនពីភ្ញៀវបរទេស រួមទាំងបងប្អូននៅក្នុងស្រុក ។

អាវគីម៉ូណូនេះធ្វើពី ផូលីសជីសស្ទើដែលជាក្រណាត់ងាយស្រួលពាក់ មិនពិបាកអ៊ុតច្រើន ក្រណាត់ប្រភេទហ្វីនិន លីឡុង និងក្រណាត់កាតុង ដែលជាប្រភេទអំបោះធម្មជាតិងាយស្រួលក្នុងការពាក់។ ដោយឡែកអាវក្រៅវែងនេះលោកស្រី​ធ្វើតែមួយទំហំ តែប៉ុណ្ណោះ ដោយផ្ដោតទៅលើអ្នកពាក់ដែលគាត់ស្រឡាញ់ ចូលចិត្តអាវនេះ ហើយពាក់បានគ្រប់ភេទ គ្រប់វ័យទាំងអស់។

ទៅថ្ងៃអនាគតសហគ្រិនឆ្នើមរូបនេះ មានចក្ខុវិស័យពង្រីកសហគ្រាសរបស់គាត់ឱ្យកាន់តែធំ មានជាងដេរផ្ទាល់នៅក្នុង​ហាង ព្រមទាំងខិតខំរកម៉ូដថ្មីៗជូនអតិថិជន។

ទន្នឹមនឹងភាពជោគជ័យនេះ ក៏មានបញ្ហាប្រឈមមួយចំនួនផងដែរគឺពិបាកក្នុងការគ្រប់គ្រងអ្នកដេរអាវព្រោះទីតាំងនៅឆ្ងាយពីគ្នាហើយរវល់ច្រើន ដោយបំណងចង់ឱ្យគុណភាពនៃការដេររបស់គាត់ប្រហាក់ប្រហែលគ្នា។

ឆ្លើយតបដោយឥតលាក់លៀមលោកស្រីក៏ប្រាប់ឧកញ៉ាញូស៍ផងដែរថា ការបើកសហគ្រាសនេះចាយដើមទុនប្រមាណជា ១០០០ដុល្លារជាងហើយដែលការចំណាយនេះលោកស្រីបែងចែកជាពីរ ព្រោះការបើកសហគ្រាសនេះមានដំណើរការ២ដង ដែលកាលបើកលើកទី១ទទួលបានការបរាជ័យ។

គួរដឹងផងដែរ តម្លៃអាវក្នុងមួយមានតម្លៃចាប់ពី ១៥ ដុល្លារទៅដល់ ៣៥ ដុល្លារ​៕

The post តម្រូវ​​ចិត្ត​អតិថិជន សហគ្រិន​មួយដេ​រ​អាវ​ពាក់ក្រៅលក់​បាន ១៥ ដុល្លារទៅដល់ ៣៥ ដុល្លារ​ appeared first on .

កញ្ញា ទួន សាវ៉ៃ អាយុ ៣៨ ឆ្នាំ ជាម្ចាស់សិប្បកម្មច្នៃត្រីងៀតមួយកន្លែងនៅក្នុង ភូមិគោកឫស្សីខាងត្បូង ឃុំដានរុន ស្រុកសូទ្រនិគម ខេត្តសៀមរាប។

ម្ចាស់សិប្បកម្មរូបនេះបានប្រាប់​ឧកញ៉ាញូស៍​តាម​ទូរសព្ទ​ថា បានចាប់អាជីពមួយនេះអស់រយៈពេល ៥ ឆ្នាំមកហើយ ដោយការទិញត្រីស្រស់ពីគេយកមកច្នៃជាត្រីងៀតលក់ចេញជូនអតិថិជនសម្រាប់បរិភោគ និងឈ្មួញយកទៅលក់បន្តតាមបណ្ដារាជធានីខេត្តមួយចំនួន។

កញ្ញា ទួន សាវ៉ៃ ប្រាប់​ថា ការលក់ចេញបានច្រើនឬតិចទៅតាមរដូវ ដោយខែប្រាំងលក់បានច្រើន ក្នុងមួយខែអាចលក់ចេញបានពី ១០ទៅ ១២តោន និងក្នុងមួយថ្ងៃច្នៃបានពី ៣០០ ទៅ៤០០គីឡូក្រាម។ ចំណែកខែវស្សា ការលក់គឺធ្លាក់ចុះខ្លាំងមួយខែលក់ចេញបានប្រហែលពី ២ទៅ ៣តោនប៉ុណ្ណោះព្រោះខែវស្សាជាខែដែលសម្បូរត្រី។

សម្រាប់ដំណើរការនៃការកែច្នៃ កញ្ញា​បញ្ជាក់ថា ត្រីដែលទិញបានមកគឺយកទៅលាងជម្រះឲ្យស្អាត រួចត្រាំទឹកកកទុកមួយយប់ ទើបព្រឹកឡើងយកទៅប្រឡាក់ និងហាលត្រឹមតែមួយថ្ងៃអាចលក់ចេញបានហើយ។ តម្លៃនៃការលក់ចេញក្នុង ១ គីឡូក្រាមថ្លៃ ២៨០០០រៀល-៣០០០០រៀក តាមប្រភេទត្រីស្ងួតឬសើម។

កញ្ញា ទួន សាវ៉ៃ បាន​ឲ្យ​ដឹង​បន្ថែម​ថា អាចច្នៃត្រីងៀតបានរហូតដល់ ៣ រសជាតិគឺ ប្រៃ ជូរប្រៃ និងផ្អែម។ រីឯត្រីដែលត្រូវយកមកធ្វើងៀតនោះមានច្រើនប្រភេទដូចជា ​ត្រីរស់ ត្រីអណ្ដែង និងត្រីប្រាជាដើម។

ជុំវិញ​ការ​ចាប់​មុខ​របរ​មួយ​នេះ បើ​តាម​កញ្ញា ទួន សាវ៉ៃ ក៏​ស្ទើរតែបោះបង់ចោលម្ដងៗទៅហើយ ដោយសារតែការ​ហត់​នឿយ ​និងខ្វះដើមទុនសម្រាប់ដំណើរការសិប្បកម្ម។

យ៉ាងណាមិញ សហគ្រិនស្រ្តី​រូប​នេះកំពុងបន្តសិក្សាតាមវគ្គសិក្ខាសាលាបន្ថែម ដើម្បីយកចំណេះដឹងមកជំរុញសិប្បកម្មឲ្យបានប្រសើរឡើង ដើម្បី​ឲ្យ​មានស្ដង់ដារអាច​នាំចេញទៅក្រៅប្រទេស។

សូមបញ្ជាក់ថា សិប្បកម្ម​របស់​កញ្ញា ទួន សាវ៉ៃ ថ្មីៗនេះ​បានទទួល​កញ្ចប់ថាវិកា​ពី​គម្រោង​របស់​អង្គការ UNIDO ក្រោមកម្មវិធីគាំទ្រដល់សហគ្រាស ទាក់ទងបច្ចេកទេសកែច្នៃជលផល ដើម្បី​ធ្វើឱ្យប្រសើរឡើងនូវប្រព័ន្ធសុវត្ថិភាពចំណីអាហារ ដើម្បីឈានទៅប្រកួតប្រជែង និងឆ្លើយតបតាមស្តង់ដាទីផ្សារនាំចេញ៕

The post ម្ចាស់សិប្បកម្ម​នៅ​សៀមរាប ច្នៃត្រីងៀត​ឲ្យមានស្ដង់ដា ដើម្បី​​នាំចេញទៅក្រៅប្រទេស appeared first on .

លោក គ្រួច លី ជាអ្នកសម្របសម្រួល​ផលិតផល​សមាគមន៍​នៅឃុំខ្នងភ្នំបានឲ្យដឹងថា សព្វថ្ងៃប្រមាណមានពលរដ្ឋ​​ជាង ១៥ គ្រួសារ​កំពុង​ប្រកប​របរ​ដេរ​ស្លឹក​ខុនមារ​កែច្នៃ​ធ្វើជា ដំបូល ជញ្ជាំង និង​ពិដានផ្ទះ​ជាដើម ដែល​ជា​ការ​ធ្វើ​លក្ខណៈ​សហគមន៍។

លោកបន្តថា បច្ចុប្បន្ន​សមាគមន៍​ស្លឹកឃុនមារ​មិនទាន់មានទីតាំងណាមួយ ដែល​ជា​កន្លែង​សិប្បកម្ម​សមាគមន៍នៅឡើយទេ គឺ​នៅធ្វើនៅផ្ទះរៀងខ្លួនៗ​ទៅតាមដែល​អតិថិជន​កម្មង់។

ឃុនមារ​ជាស្លឹករុក្ខជាតិ​រង្វិលជុំ​ដែលក្នុង​មួយ​ខែទៅមួយ​ខែ​ប្រជាពលរដ្ឋ​ប្រមូលផល​ជាបន្តបន្ទាប់ឥតដាច់។ វា​ជាប្រភេទ​រុក្ខជាតិ​ដែល​ធន់នឹងទឹកភ្លៀង បើប្រៀបជាមួយ​ស្បូវ​គឺប្រើបានយូរជាង​ចន្លោះ ​៣ ​ទៅ ​៤​ ឆ្នាំ(ប្រក់ជម្រាល) ចំពោះ​ធ្វើពិដាន​ប្រើបាន​ចន្លោះ​ ៥​ ទៅ ​៦ ឆ្នាំ រីឯ ​សម្រស់​ក៏ស្រស់ស្អាត​មិនចាញ់​ស្បូវ​ដែរ ពិសេស​គឺមិនងាយឆាបភ្លើងដូច​ស្បូវ​។

អ្នកសម្របសម្រួល​ផលិតផល​សហគមន៍​រូបនេះ​ក៏បាន​លើកឡើងពី​ចក្ខុវិស័យ​ ក៏​ដូចជា​គោលបំណង​នៃ​ការបង្កើត​សហគមន៍​កែច្នៃ​ស្លឹក​ខុនមារ​នេះឡើង​ ដោយសារការ​មើល​ឃើញ​ថា ស្លឹក​ខុនមារ​ជា​ប្រភេទ​ស្លឹក​ម៉្យាង​ដែល​ល្អ ហើយ​​ប្រជាជន​នៅលើ​ខ្នងភ្នំ​ភាគច្រើន​មាន​ជីវភាព​ខ្វះខាត លោក​ក៏បាន​ជួយ​ខិតខំ​ស្វែង​រកទីផ្សារ​បន្ថែម​។ អ្វី​ដែល​សំខាន់គឺ​ចង់ឲ្យ​ពួកគាត់​បញ្ឈប់​ការកាប់​គាស់​ ឆ្ការ ដី​ដាំស្វាយចន្ទី​ ហើយ​ងាកបែរ​មកអាស្រ័យ​ផល​ស្លឹក​ខុនមារ​វិញ ព្រោះ​មុខរបរ​នេះ​ជា​របរ​រង្វិលជុំ ។

ចំពោះ​បញ្ហាប្រឈម​ក៏មាន​ការចោទ​ខ្លះដែរ​ដោយទី​ ១ ប្រជាជន​មិនសូវ​រក្សា​តម្លៃ​ជាគោល​ពោលគឺ​អតិថិជន​ណា​ឲ្យថ្លៃ​រីករាយនឹង​លក់ចេញ​។ ប៉ុន្តែ លោក​ក៏​សង្កត់ធ្ងន់​ថា «បើប្រជាជន​ដែលនៅ​រក្សាតម្លៃថេរ​គឺ​លោក​មាន​ការងារ​ឲ្យ​ធ្វើ​ជានិរន្តរ​»​ ។

លោក បានបញ្ជាក់ថា ចំពោះ​តម្លៃ​ជា​មធ្យម​មានចន្លោះ​ចាប់ពី ១៥០០០ រៀល ទៅ ២០០០០ រៀល​។ ​ក្នុង​មួយ​ខែ អាច​លក់បាន ៣០០ ទៅ ៤០០ ដុំ បើ​គិតជា​ម៉ែត្រ​ប្រមាណ​ជិត ៥០០ ម៉ែត្រ​។

​លោក គ្រួច​ លី ក៏បានសំណូមពរ​ដល់​បងប្អូន​ខ្មែរ​ជួយ​លើកកម្ពស់​ផលិតផល​មូលដ្ឋាន​ឬ​ផលិតផល​សហគមន៍​ពិសេសជួយគាំទ្រ​ផលិតផល​លើដងភ្នំគូលែន​ឲ្យដូចពាក្យ​ដែលថា «​ខ្មែរ ជួយ ខ្មែរ» ៕

The post អ្នក​ភូមិ​ជាង ១៥ គ្រួសារ​ច្នៃ​ស្លឹកខុនមារ​ដុះលើ​ខ្នង​ភ្នំ​ធ្វើដំបូល ជញ្ជាំង ពិដានផ្ទះ រក​ចំណូលដោះស្រាយ​ជីវភាព​ appeared first on .