ក្នុងជំនួបជាមួយសហព័ន្ធដំឡូងមីកម្ពុជានៅព្រឹកថ្ងៃទី០៦ ខែមករា ឆ្នាំ២០២៥ លោករដ្ឋមន្ត្រីបានណែនាំឱ្យសហព័ន្ធដំឡូងមីកម្ពុជាត្រូវផ្តោតទៅលើការធ្វើពាណិជ្ជកម្មដំឡូងមីស្រស់ និងការកែច្នៃដំឡូងមីក្រៀមសម្រាប់នាំចេញ ជៀសជាងការដាំដុះប្រកួតប្រជែងជាមួយប្រជាកសិករ។

លោករដ្ឋមន្ត្រីក៏បានបានផ្តល់អនុសាសន៍ណែនាំដល់សហព័ន្ធត្រូវពិនិត្យគិតគូរច្បាស់លាស់ពីការរៀបចំអង្គការចាត់តាំងរបស់ខ្លួន និងភាពជាតំណាងដែលមានសារៈសំខាន់ ក្នុងការធ្វើពាណិជ្ជកម្ម និងកែច្នៃដំឡូងមី ដោយដាក់ធនធានរួមគ្នា ចេះធ្វើការជាមួយគ្នា យល់ច្បាស់ពីទំហំទីផ្សារពិតប្រាកដ គិតគូរពីប្រសិទ្ធសេដ្ឋកិច្ច ឈរជើងបានរឹងមាំ និងដើរត្រូវទៅតាមគោលដៅ។

លើសពីនេះ ឯកឧត្តមរដ្ឋមន្ត្រី បានបញ្ជាក់បន្ថែមថាសហព័ន្ធត្រូវមានភាពបត់បែន ដឹងពីតម្រូវការ និងការផ្គត់ផ្គង់ មានផែនការយុទ្ធសាស្រ្តជាក់លាក់ ដាំក្នុងកម្រិតរក្សាស្ថិរភាពទីផ្សារ ដោយមិនជំរុញការពង្រីកផ្ទៃដីផលិតកម្ម ជៀសវាងធ្វើឱ្យតម្លៃធ្លាក់ចុះ។

លោករដ្ឋមន្ត្រី បានលើកទឹកចិត្តដល់សហព័ន្ធបន្តសហការជាមួយក្រសួងកសិកម្ម និងភាគីពាក់ព័ន្ធទាំងអស់ឱ្យមានភាពបន្ស៊ីគ្នា ដោះស្រាយបញ្ហាប្រឈមនានា និងជោគជ័យទាំងអស់គ្នាដើម្បីផ្តល់ផលប្រយោជន៍ដល់ប្រជាកសិករពិតប្រាកដ៕

The post រដ្ឋមន្ត្រីកសិកម្មជំរុញសហព័ន្ធដំឡូងមីកម្ពុជា កែច្នៃដំឡូងមីក្រៀមសម្រាប់នាំចេញ appeared first on .

នៅក្នុងកិច្ចប្រជុំនាពាក់កណ្តាលសប្តាហ៍នេះ ឧកញ៉ា ច្រាយ សុន តំណាងសហព័ន្ធដំឡូងមីកម្ពុជា បានលើកឡើងពីសក្តានុពលដ៏ធំនៃអនុវិស័យដំឡូងមី។ បច្ចុប្បន្ន កម្ពុជានាំចេញដំឡូងមីស្រស់ ៩៥% ហើយកែច្នៃក្នុងស្រុក ៥% ដែលបានរួមចំណែកប្រមាណ ៧២៨ លានដុល្លារដល់សេដ្ឋកិច្ចជាតិ។

លោកបានបញ្ជាក់ថា៖ កម្ពុជាជាប់ចំណាត់ថ្នាក់ជាប្រទេសនាំចេញដំឡូងមីធំជាងគេទី៤ នៅអាស៊ី និងទី១០ នៅលើពិភពលោក ដែលមានផ្ទៃដីដាំដុំដំឡូងមីប្រមាណ ៦០០.០០០ ទៅ ៨០០.០០០ ហិកតា។ មើមដំឡូងមីអាចត្រូវបានកែច្នៃទៅជាផលិតផលច្រើនប្រភេទ រួមមានម្សៅដំឡូងមី និងកែច្នៃបន្ត (reprocessing) ទៅជាផលិតផលចំណីអាហារ ដូចជានំប៉័ង នំស្រួយ ភេសជ្ជៈ ឬចំណីសត្វជាដើម។

លោក ហែម វណ្ណឌី បានលើកឡើងថា ការផ្លាស់ប្តូរពីការនាំចេញមើមដំឡូងមីស្រស់ ទៅជាការកែច្នៃក្នុងស្រុក គឺជាគន្លឹះក្នុងការបង្កើតតម្លៃបន្ថែម, លើកកម្ពស់ជីវភាពរបស់ប្រជាកសិករ, និងធ្វើពិពិធកម្មឧស្សាហកម្មរបស់កម្ពុជា។

លោកក៏បានលើកឡើងពីតួនាទីសំខាន់របស់សហព័ន្ធដំឡូងមីកម្ពុជា ក្នុងការកៀរគរអ្នកដាំ, ជំរុញការប្រើប្រាស់ពូជដែលសម្បូរម្សៅ និងការអនុវត្តកសិកម្មតាមកិច្ចសន្យាដោយយុត្តិធម៌។

លោករដ្ឋមន្រ្តីបានបន្ថែមថា ក្រសួងគាំទ្រចំពោះសំណើររបស់សហព័ន្ធ ក្នុងការអនុវត្តផលិតកម្មស្អាត និងការបង្កើតចង្កោមខ្សែច្រវាក់តម្លៃដំឡូងមី ព្រមទាំងបានចាត់ឱ្យវិទ្យាស្ថានស្តង់ដារកម្ពុជា ធ្វើបច្ចុប្បន្នភាព “ស្តង់ដារកម្ពុជា” សម្រាប់អនុវិស័យដំឡូងមី ដើម្បីបំពេញតាមលក្ខខណ្ឌតម្រូវរបស់ទីផ្សារ។

លោកក៏បានលើកទឹកចិត្តឱ្យសហព័ន្ធ សហការជាមួយសហគ្រិនខ្មែរ និងគ្រឹះស្ថានហិរញ្ញវត្ថុ ដូចជាធនាគារសហគ្រាសធុនតូចនិងមធ្យម និងធនាគារ ARDB ដើម្បីទទួលបានការគាំទ្រផ្នែកហិរញ្ញវត្ថុការធ្វើផែនការអាជីវកម្ម ការចូលរួមពិព័រណ៍អន្តរជាតិ និងការពង្រីកទីផ្សារជាដើម។

លើសពីនេះ លោករដ្ឋមន្ត្រី បានស្នើឱ្យសហព័ន្ធដំឡូងមីកម្ពុជា ចូលរួមផ្សព្វផ្សាយដល់ប្រជាកសិករដែលជាអ្នកដាំដំឡូងមីប្រមាណ ៩០.០០០ គ្រួសារនៅទូទាំងប្រទេស ស្វែងយល់ និងចុះឈ្មោះលើថ្នាលឌីជីថលសម្រាប់អភិវឌ្ឍសេដ្ឋកិច្ចក្រៅប្រព័ន្ធ ដែលទើបត្រូវបានសម្ពោធដាក់ឱ្យដំណើរការ ក្នុងគោលដៅលើកកម្ពស់ភាពធន់ និងបរិយាបន្នសេដ្ឋកិច្ច៕ដោយៈសុភក្ត្រា

The post ក្រសួងឧស្សាហកម្ម និងសហព័ន្ធដំឡូងមីកម្ពុជា ជជែករកយុទ្ធសាស្ត្រជំរុញការអភិវឌ្ឍអនុវិស័យដំឡូងមី appeared first on .

សេចក្តីជូនដំណឹងរបស់ CFC បានឱ្យដឹងថា៖ តម្លៃដំឡូងមីស្រស់ក្រោម ៤០០រៀល/គក្រ ពិតជាពុំគាប់ប្រសើរដល់ការ ដោះស្រាយជីវភាពរបស់ប្រជាកសិករឡើយ។ តម្លៃបច្ចុប្បន្នស្ថិតក្នុងចន្លោះពី ១៩០រៀល/គក្រ ទៅដល់ ៣២០រៀល/គក្រ អាស្រ័យទៅលើកម្រិតជាតិម្សៅ និងទីតាំងរបស់កសិករ។

ដើម្បីជៀសវាងការធ្លាក់តម្លៃកាន់តែខ្លាំងថែមទៀត សហព័ន្ធដំឡូងមីកម្ពុជា សូមធ្វើការអំពាវនាវដល់ប្រជាកសិករ និង សហគមន៍កសិកម្ម ទូទាំងព្រះរាជាណាចក្រកម្ពុជា ដែលមានខ្លឹមសារដូចតទៅ៖

ទី១-ប្រជាកសិករ ក៏ដូចជាសហគមន៍កសិកម្មដាំដុះដំឡូងមី ផ្អាកការប្រមូលផលមួយអន្លើរសិន គឺដើម្បីជាវិធានការទប់ ស្កាត់ការទម្លាក់តម្លៃដំឡូងមីស្រស់ដោយគ្មានមូលដ្ឋានច្បាស់លាស់។នៅពេលដែលតម្រូវការទាបតែការផ្គត់ផ្គង់ខ្ពស់គឺនាំឱ្យមាន ការទម្លាក់ថ្លៃដោយជៀសមិនរួច។

ទី២- ប្រជាកសិករ ក៏ដូចជាសហគមន៍កសិកម្មដាំដុះដំឡូងមី កុំប្រញាប់ប្រមូលផលដំឡូងមីដែលមិនទាន់មានកម្រិតជាតិ ម្សៅខ្ពស់ (ចាប់ពី ២៥ ភាគរយឡើង)។ ការយកមើមដំឡូងដែលមានជាតិម្សៅស្ទើរទៅលក់ អាចបង្ករជាលេសដល់ឈ្មួញក្នុងការ ទម្លាក់តម្លៃកសិករដទៃទៀតដែលដំឡូងរបស់គាត់មានជាតិម្សៅខ្ពស់។

ទី៣-ប្រជាកសិករ ក៏ដូចជាសហគមន៍កសិកម្មដាំដុះដំឡូងមីសូមបង្កើនការប្រុងប្រយ័ត្នក្នុងការប្រមូលផលដោយជៀសវាង ការបណ្តោយឲ្យមានលាយដី ឬជាប់ស្នែង ឬដើមទៅជាមួយច្រើន ដែលជាហេតុបង្កលេសសម្រាប់ឈ្មួញទម្លាក់ថ្លៃថែមទៀត ។

សហព័ន្ធដំឡូងមីកម្ពុជា បានសំណូមពរប្រជាកិសករ ប្រជាសមាគមកសិករ ប្រជាសហគមន៍កសិកម្មទូទាំងព្រះរាជាណាចក្រកម្ពុជា មេត្តាចូលរួមអនុវត្តតាមសេចក្តីណែនាំនេះ អោយមានប្រសិទ្ធភាពខ្ពស់ ដើម្បីធានាអោយបាននូវការគ្រប់គ្រងគុណភាព និងតម្លៃ ដំឡូងមីនៅលើទីផ្សារកម្ពុជា៕ដោយៈសុភក្ត្រា

The post តម្លៃដំឡូងមីក្នុងស្រុកធ្លាក់ សហព័ន្ធដំឡូងមីកម្ពុជាប្រាប់ពីវិធានការការពារ appeared first on .