នាឱកាសនោះ សម្តេចធិបតី ហ៊ុន ម៉ាណែត បានថ្លែងថា សម្តេចមានសេចក្តីរីករាយ ដោយបានចូលរួមក្នុង «ពិធីបើកការដ្ឋានសាងសង់ សារមន្ទីរសម្ដេចព្រះព្រហ្មរតនមុនី ពិន សែម រាជបូណ៌» ស្ថិតនៅក្នុងវត្តរាជបូណ៌ ដែលជាទីតាំងវត្តអារាមដ៏ចំណាស់ រួមជាមួយសំណង់បេតិកភណ្ឌសាសនានា។

លើសពីនេះ សម្ដេចធិបតី បញ្ជាក់ថា សារមន្ទីរព្រះព្រហ្មរតនមុនី ពិន សែម សាងសង់ឡើងក្នុងទិសដៅពីរ គឺដើម្បីរក្សាសម្បត្តិវប្បធម៌ និងទាក់ទាញទេសចរណ៍។

បើតាមសម្តេចធិបតី វត្តរាជបូណ៌ ជាវត្តដ៏ចំណាស់មួយក្នុងចំណោមវត្តដទៃទៀតនៅក្នុងខេត្តសៀមរាប ដែលស្ថិតនៅក្នុងក្រុងតាមដងស្ទឹងសៀមរាប។ អារាមមួយនេះមានព្រះវិហារមួយដែលមានលក្ខណៈស្ថាបត្យកម្មល្អឯក អំឡុងនៃការសាងសង់ក្នុងរាជព្រះបាទនរោត្តម។ នៅលើជញ្ជាំងព្រះវិហារផ្នែកខាងក្នុង មានសិល្បៈដ៏រស់រវើកល្អវិចិត្រគឺគំនូរបុរាណរឿង «រាមកេរ្តិ៍» ដែលជារឿងល្បីល្បាញ នៅអាស៊ីអាគ្នេយ៍ គូរនៅរវាងឆ្នាំ១៩២០-១៩២៤។ អំពីអាយុកាលនៃការកកើតវត្តនោះ ពុំមានភស្តុតាងនោះទេ។

សូមបញ្ជាក់ដែរថា សារមន្ទីរ សម្ដេចព្រះព្រហ្មរតនមុនី ពិន សែម គឺស្ថិតក្នុងបរិវេណវត្តរាជបូណ៌ ស្ថិតនៅសង្កាត់សាលាកំរើក ក្រុងសៀមរាប ខេត្តសៀមរាប។ ការសាងសង់សារមន្ទីរនេះ គ្រោងថវិកាចំណាយ ១,០៣៩,៦៦០.៧៩ ដុល្លារអាមេរិក (មិនរាប់បញ្ចូលការរចនាទូតាំង និងការលំអ ខាងក្នុងអគារ) ដោយប្រើប្រាស់រយៈពេល២៤ខែ៕ អត្ថបទ៖ រង្សី

The post សម្តេចធិបតី ប្រកាសបើកការដ្ឋានសាងសង់សារមន្ទីរសម្ដេចព្រះព្រហ្មរតនមុនី ពិន សែម រាជបូណ៌ តម្លៃជាង១.៣ លានដុល្លារ ជាផ្លូវការ appeared first on .