សេដ្ឋកិច្ចវៀតណាម

សេដ្ឋកិច្ចឌីជីថលវៀតណាម ត្រូវបានព្យាករណ៍ថានឹងកើនឡើង ២០% ដល់ ៤៣ ពាន់លានដុល្លារឆ្នាំ ២០២៥

ឧកញ៉ា ខួច — Mon, 14 Oct 2024 01:30:35 +0000

សេដ្ឋកិច្ចឌីជីថលរបស់ប្រទេសវៀតណាម កំពុងពង្រីកយ៉ាងឆាប់រហ័សដោយឈានដល់តម្លៃ ៣០ ពាន់លានដុល្លារអាមេរិកក្នុងឆ្នាំ ២០២៣ ហើយត្រូវបានព្យាករណ៍ថានឹងកើនឡើង ២០% ដល់ ៤៣ ពាន់លានដុល្លារនៅឆ្នាំ ២០២៥ ។

យោងតាមរបាយការណ៍ទិន្នន័យពីស្ថាប័ន Acclime ប្រចាំនៅវៀតណាមលើប្រធានបទ៖ «Innovations shaping Vietnam’s transformation (2024 – 2025)» បានបង្ហាញឲ្យឃើញពី កំណើនដ៏គួរឲ្យកត់សម្គាល់នៅក្នុងឆ្នាំ 2023 លើវិស័យវិទ្យាសាស្រ្ត បច្ចេកវិទ្យា និងនវានុវត្តន៍ជាមួយនឹងការព្យាករណ៍កំណើននៅឆ្នាំ 2024 – 2025 ។ តួលេខកំណើននេះ បានធ្វើឲ្យប្រទេសវៀតណាម ជាប់ជាប្រទេសដែលមានសេដ្ឋកិច្ចឌីជីថលកើនឡើងលឿនរហ័សជាងគេនៅតំបន់អាសុីអាគ្នេយ៍នៅក្នុងឆ្នាំ ២០២៣ កំពុងកើនក្នុងឆ្នាំ ២០២៤ និងបន្តដល់ ២០២៥ ខាងមុខតទៀត។

កត្តាគន្លឹះសំខាន់ៗដែលជាការផ្លាស់ប្តូរនៅក្នុងប្រទេសជិតខាងកម្ពុជានេះ ត្រូវបានគេដឹងថា អាចមកពីកត្តាការសម្របខ្លួននឹងបច្ចេកវិទ្យាបានឆាប់រហ័ស និងការចាប់យកឱកាសថ្មីៗផងដែរ។

ជាមួយភាពសម្បូរបែបនៃប្រជាជនវ័យក្មេង វៀតណាម មានឱកាសនាំមុខប្រទេសអាស៊ានភាគច្រើនដែលមានសេដ្ឋកិច្ចខ្លាំងដូចជាសិង្ហបុរី ថៃ ឬម៉ាឡេស៊ី។ ជាពិសេសនោះគឺ ការប្រើប្រាស់សេវាកម្មអុីនធើណិតអនឡាញ ពាណិជ្ជកម្មតាមប្រព័ន្ធអេឡីចត្រូនិច និងការដាក់ឲ្យប្រើប្រាស់បច្ចេកវិទ្យា AI យ៉ាងទូលំទូលាយនៅក្នងសហគ្រាសធុនតូច មធ្យមនិងធុនធំ។

តាមរយៈការស្ទង់មតិបានបង្ហាញថា បច្ចេកវិទ្យា AI បានរួមចំណែកយ៉ាងច្រើនក្នុងន័យសំដៅធ្វើយ៉ាងណាប្រើប្រាស់វាដើម្បីពន្លឿនការផ្ដល់សេវាកម្មអតិថិន និងការធ្វើឲ្យប្រសើរឡើងនូវដំណើការ IT ក្នុងសហគ្រាសធុនតូច មធ្យមនិងធំជាដើម៕

អត្ថបទពាក់ព័ន្ធ៖ ADB ព្យាករណ៍ថា សេដ្ឋកិច្ចវៀតណាម នឹងមានកំណើនលឿនជាងគេបំផុតនៅអាស៊ីអាគ្នេយ៍

The post សេដ្ឋកិច្ចឌីជីថលវៀតណាម ត្រូវបានព្យាករណ៍ថានឹងកើនឡើង ២០% ដល់ ៤៣ ពាន់លានដុល្លារឆ្នាំ ២០២៥ appeared first on .

កំណើនសេដ្ឋកិច្ចវៀតណាម កើនឡើងទាបជាងការរំពឹងទុកក្នុងឆ្នាំ២០២៣

ឧកញ៉ាសំពៅ — Fri, 29 Dec 2023 10:00:00 +0000

កំណើនសេដ្ឋកិច្ចនៃប្រទេសវៀតណាមក្នុងឆ្នាំ២០២៣នេះ ទទួលបានត្រឹម ៥,០៥% ទាបជាងឆ្នាំទៅ ដែលមាន ៨,០២% ស្របពេលរដ្ឋាភិបាលវៀតណាមបរាជ័យ ក្នុងការសម្រេចបានកំណើនសេដ្ឋកិច្ច ៦,៥% ដូចផែនការគ្រោងទុកកាលពីដើមឆ្នាំ។

យោងតាមការចុះផ្សាយពីសារព័ត៌មាន CNA បានបង្ហាញថា មូលហេតុដែលវៀតណាម មិនអាចសម្រេចបានផែនការខាងលើ ដោយសារតម្រូវការសកលលោកធ្លាក់ចុះ ស្របពេលការបណ្ដាក់ទុនសាធារណៈក៏កំពុងជាប់គាំង ចំពេលមានការបង្ក្រាបអំពើពុករលួយទ្រង់ទ្រាយធំនៅក្នុងប្រទេស។

រំលឹកបន្តិចថា ប្រទេសវៀតណាម គឺជាមជ្ឈមណ្ឌលពាណិជ្ជកម្មដ៏ធំមួយនៅតំបន់អាស៊ីអាគ្នេយ៍ ដែលពឹងផ្អែកខ្លាំងលើការធ្វើពាណិជ្ជកម្ម ប៉ុន្តែការនាំចេញរបស់ពួកគេបានធ្លាក់ចុះ ៤,៤% នៅក្នុងឆ្នាំ២០២៣ ដែលសម្រេចបានទំហំទឹកប្រាក់ត្រឹម ៣៥៥,៥ពាន់លានដុល្លារប៉ុណ្ណោះ។

ដើម្បីអូសទាញក្រុមវិនិយោគិនបរទេស មកបណ្ដាក់ទុននៅក្នុងស្រុកវិញ រដ្ឋាភិបាលវៀតណាមបានដាក់ចេញនូវគោលនយោបាយគាំទ្រការវិនិយោគបរទេសជាច្រើន ដូចជាការកាត់បន្ថយពន្ធ និងផ្ដល់អត្ថប្រយោជន៍មួយចំនួនទៀត លើការអភិវឌ្ឍន៍ហេដ្ឋារចនាសម្ព័ន្ធក្នុងស្រុក។

ជម្រាបបន្ថែមថា បើទោះជាវៀតណាមសម្រេចបានកំណើនសេដ្ឋកិច្ចទាបជាងការរំពឹងទុកក្ដី ប៉ុន្តែប្រទេសមួយនេះនៅតែមានកំណើនសេដ្ឋកិច្ចល្អខ្លាំង ធៀបនឹងបណ្ដាប្រទេសក្នុងតំបន់ ដោយក្នុងត្រីមាសចុងក្រោយនេះ ពួកគេទទួលបានការបណ្ដាក់ទុនរាប់ពាន់លានដុល្លារ ពីសហរដ្ឋអាមេរិក និងប្រទេសចិន៕

The post កំណើនសេដ្ឋកិច្ចវៀតណាម កើនឡើងទាបជាងការរំពឹងទុកក្នុងឆ្នាំ២០២៣ appeared first on .

កំណើនសេដ្ឋកិច្ចវៀតណាម កើនឡើងខ្ពស់ការរំពឹងទុកសម្រាប់ឆ្នាំ ២០២២

ឧកញ៉ាសំពៅ — Tue, 11 Oct 2022 08:48:52 +0000

កំណើនសេដ្ឋកិច្ចវៀតណាមឆ្នាំនេះ ត្រូវបានគេរំពឹងថានឹងកើនឡើងរហូតដល់ទៅ ៨% ដែលខ្ពស់ជាងគោលដៅដែលរដ្ឋាភិបាលកំណត់ចន្លោះពី ៦ ទៅ ៦,៥%។ នេះបើតាមដំណឹងដែលរដ្ឋាភិបាលបានទម្លាយកាលពីថ្ងៃទី ១១ តុលា។

ដោយឡែក សម្រាប់ការនាំចេញវិញ រដ្ឋាភិបាលព្យាករណ៍ថានឹងអាចកើនឡើងដល់ ៩,៥% ឬអាចដល់ ៣៦៨ ពាន់លានដុល្លារ ស្របពេលលំហូរវិនិយោគិនបរទេសមានការកើនពី ៦,៤% ដល់ ១១,៥% ឬ ២១ ពាន់លានដុល្លារ។

សូមជម្រាបដែរថា វៀតណាមគឺជាមជ្ឈមណ្ឌលផលិតកម្មក្នុងតំបន់ដែលមានកំណើនសេដ្ឋកិច្ចឆាប់រហ័សបំផុតមួយ បន្ទាប់ពីផ្ទុះការរាតត្បាតជំងឺកូវីដ ១៩ ដោយផលិតផលក្នុងស្រុកសរុបនៅត្រីមាសទី ៣ មានការកើនឡើង១៣,៦៧% បើធៀបនឹងឆ្នាំទៅ៕

The post កំណើនសេដ្ឋកិច្ចវៀតណាម កើនឡើងខ្ពស់ការរំពឹងទុកសម្រាប់ឆ្នាំ ២០២២ appeared first on .

ដំណាំហូបផ្លែនៅវៀតណាម លក់ថ្លៃជាងមុន ៤ ដង គ្រាន់តែក្រូចឆ្មារមួយគីឡូឡើងដល់ជាង ៨ ០០០ ដុង

ឧកញ៉ាសំពៅ — Wed, 20 Oct 2021 07:17:06 +0000

ប្រទេសវៀតណាមចាប់ផ្ដើមបន្ធូរបន្ថយច្បាប់ចត្តាឡឺស័កដូចនឹងប្រទេសនានាទូទាំងពិភពលោកដែរកាលពីថ្ងៃទី ០១ តុលាកន្លងទៅ ថែមទាំងមានគម្រោងប្រកាសបើកប្រទេសជាផ្លូវការវិញនៅខែមិថុនា ២០២២ ខាងមុខទៀតផង។

ក្រោយប្រកាសបន្ធូរបន្ថយច្បាប់ទេសចរណ៍មិនបានប៉ុន្មានផង តម្លៃនៃដំណាំហូបផ្លែនៅក្នុងស្រុកមានការកើនឡើងយ៉ាងគំហុក ពោលគឺកើនដល់ទៅ ៤ ដង មុនពេលដាក់ប្រទេសក្នុងគ្រាអាសន្ន។

ជាក់ស្ដែង ក្រូចឆ្មារដែលធ្លាប់តែទិញផ្ទាល់នៅចម្ការតម្លៃប្រមាណ ២ ០០០ ដុង/គីឡូ ស្រាប់តែឡើងថ្លៃដល់ ៧ ទៅ ៨ ០០០ ដុងនាពេលបច្ចុប្បន្ន ខណៈផ្លែខ្នុរវិញ គឺឡើងថ្លៃជាងមុនដល់ទៅ ៤ ដងដូចគ្នា ដោយពេលនេះតម្លៃលើទីផ្សារគឺចន្លោះពី ១៩ ០០០ ទៅ ៣០ ០០០ ដុង/គីឡូ។

បញ្ជាក់ដែរថា កាលពីខែកក្កដាកន្លងទៅ ផ្លែឈើដែលដាំនៅតំបន់សហគមន៍ Mekong Delta គឺលក់ចេញក្នុងតម្លៃទាបបំផុតសម្រាប់ទីផ្សារទូទាំង HCMC ដោយសារវិបត្តិកូវីដ ១៩ ស្របពេលដែលទិន្នផលនាំចេញទៅក្រៅប្រទេសគឺមានចំណែកយ៉ាងធំពីតំបន់សហគមន៍ Mekong Delta ពោលស្ថិតិនាំចេញក្រៅប្រទេសមានដូចជា អង្ករ ៩០% គ្រឿងសមុទ្រ ៦៥% និងផ្លែឈើ ៧០% នៃការនាំចេញសរុបគឺសុទ្ធតែចេញពី Mekong Delta ទាំងអស់៕

ប្រភព: vnexpress

The post ដំណាំហូបផ្លែនៅវៀតណាម លក់ថ្លៃជាងមុន ៤ ដង គ្រាន់តែក្រូចឆ្មារមួយគីឡូឡើងដល់ជាង ៨ ០០០ ដុង appeared first on .

វៀតណាមប្រកាសគម្រោងសាងសង់កំពង់ផែបន្ថែម ចាយថវិកាខ្ទង់ ១៣ ពាន់លានដុល្លារ

ឧកញ៉ាសំពៅ — Tue, 05 Oct 2021 02:59:38 +0000

កាលពីពេលថ្មីៗនេះ រដ្ឋាភិបាលប្រទេសវៀតណាមបានប្រកាសពីគម្រោងថ្មី ដោយចង់ពង្រឹងវិស័យពាណិជ្ជកម្មអន្តរជាតិទៅកាន់ប្រទេសនៅតំបន់អឺរ៉ុប ដែលនោះគឺនឹងសាងសង់កំពង់ផែជាច្រើនកន្លែង ជាមួយថវិកាសាងសង់ប្រមាណ ១៣,៧ ពាន់លានដុល្លារឯណោះ។

គម្រោងនោះនឹងមានការសាងសង់កំពង់ផែធំ ២ នៅតំបន់ Nam Do Son ភាគខាងជើងនៃទីក្រុង Hai Phong និងមួយទៀតនៅតំបន់ Cai Mep ភាគខាងត្បូងនៃខេត្ត Ba Ria-Vung Tau ខណៈបើតាមការអះអាងពីរដ្ឋាភិបាល គឺគម្រោងនេះនឹងចាយពេលចន្លោះពីឆ្នាំ ២០២១-២០៣០ ជាមួយចក្ខុវិស័យដល់ឆ្នាំ ២០៥០ផងដែរ។

កំពង់ផែខ្នាតធំទាំង ២ នេះ នឹងដើរតួជាកន្លែងធ្វើពាណិជ្ជកម្មអន្តរជាតិសម្រាប់ការនាំចេញទំនិញពីប្រទេសវៀតណាម ទៅកាន់ទីផ្សារតំបន់អឺរ៉ុបនិងអាមេរិកដោយផ្ទាល់តែម្ដង និងមិនចាំបាច់ត្រូវចូលកំពង់ផែប្រទេសផ្សេងៗដូចសព្វថ្ងៃឡើយ។

ក្រៅពីកំពង់ផែអន្តរជាតិ ២ ខាងលើ នៅមានកំពង់ផែ ៣៤ កន្លែងផ្សេងទៀតដែលនឹងត្រូវបែងចែកតាមលំដាប់លំដោយដូចជា លំដាប់ទី ១, ២ និង ៣ ស៊ីសងលើផ្នែកទំនិញ និងទីតាំង។ កំពង់ផែអន្តរជាតិ និងលំដាប់ថ្នាក់ទី ១ នឹងភ្ជាប់ជាមួយផ្លូវថ្នល់ និងខ្សែរថភ្លើងពិសេស ស្របពេលកំពង់ផែតូចៗដែលនៅតំបន់ជ្រៅៗ នឹងត្រូវដកចេញ។

ដោយឡែក បើតាមការលើកឡើងពីក្រសួងដឹកជញ្ជូនបានឲ្យដឹងថា ការប្រើប្រាស់កំពង់ផែជាមធ្យោបាយធ្វើពាណិជ្ជកម្ម គឺចំណេញទាំងថ្លៃដឹក កាត់បន្ថយសម្ពាធផ្លូវថ្នល់ និងមិនសូវមានហានិភ័យថែមទៀត។

រីឯថវិកានៃគម្រោងខ្នាតយក្សនេះផងដែរ គឺ ៩៥% នឹងជាមូលនិធិទទួលបានពីក្រុមហ៊ុនឯកជននានា និងប្រភពស្របច្បាប់ជាច្រើនទៀត៕

ប្រភព: vnexpress

The post វៀតណាមប្រកាសគម្រោងសាងសង់កំពង់ផែបន្ថែម ចាយថវិកាខ្ទង់ ១៣ ពាន់លានដុល្លារ appeared first on .

វៀតណាមអាចខូចប្រយោជន៍ធំ បើនៅយឺតយ៉ាវគ្មានផែនការច្បាស់លាស់អូសទាញអ្នកវិនិយោគ

ឧកញ៉ាសំពៅ — Wed, 22 Sep 2021 06:53:43 +0000

វៀតណាម ដែលកំពុងជួបប្រទះការឆ្លងរាលដាលនៃវីរុស COVID-19 អាចនឹងខកខានឱកាសធ្វើជាម្ចាស់ផ្ទះនៃការវិនិយោគពីក្រៅប្រទេស។ នេះបើយោងតាមអង្គជំនុំជម្រះ AmCham, EuroCham, KoCham និងក្រុមប្រឹក្សាពាណិជ្ជកម្មអាមេរិក-អាស៊ាន។

ប្រសិនមានភាពយឺតយ៉ាវ ហើយវៀតណាមមិនមានវិធានការច្បាស់លាស់ អ្នកវិនិយោគនៅវៀតណាម អាចផ្លាស់ប្តូរសកម្មភាពផលិតទៅប្រទេសផ្សេង ដែលនាំការខូចខាតប្រយោជន៍ធ្ងន់ធ្ងរសម្រាប់ប្រទេសមានប្រជាជនជិត ១០០ លាននាក់នេះ។

ជាការពិតក្រុមវិនិយោគិនដែលសម្រេចផ្លាស់ប្ដូរសង្វាក់ផលិតកម្ម ពួកគេកម្រនឹងងាកមករកដៃគូសហការចាស់វិញណាស់ ព្រោះការវិនិយោគនឹងមិនមានការកើនឡើងដោយគ្មានគម្រោងច្បាស់លាស់។

បើតាមក្រុមប្រឹក្សាពាណិជ្ជកម្មអាមេរិក-អាស៊ាន បានសន្យានឹងជួយស្ដារសេដ្ឋកិច្ចប្រទេសវៀតណាមឲ្យមានស្ថិរភាពឡើងវិញ ដោយជាដំបូងវៀតណាម ត្រូវរកវិធីគ្រប់គ្រងស្ថានការណ៍ការឆ្លងរាលដាលនៃវីរុសជាមុនសិន។

បើតាមប្រភពពីក្រុមអ្នកវិនិយោគ ការចាក់វ៉ាក់សាំងគឺជាកូនសោសំខាន់សម្រាប់ការងើបឡើងវិញនៃសេដ្ឋកិច្ច ខណៈបុគ្គលដែលមានអាទិភាព គួរទទួលបានវ៉ាក់សាំងមុនគេមាន បុគ្គលិកពេទ្យ មនុស្សចាស់ បុគ្គលដែលមានជំងឺប្រចាំកាយ បុគ្គលិកធ្វើការផ្នែកផលិតសម្ភារៈ និងបុគ្គលិកផ្នែកដឹកជញ្ជូនជាដើម៕

ប្រភព: vnexpress

The post វៀតណាមអាចខូចប្រយោជន៍ធំ បើនៅយឺតយ៉ាវគ្មានផែនការច្បាស់លាស់អូសទាញអ្នកវិនិយោគ appeared first on .

សេដ្ឋកិច្ចវៀតណាម

សេដ្ឋកិច្ច​ឌីជីថល​វៀតណាម ត្រូវបាន​ព្យាករណ៍​ថានឹង​កើន​ឡើង ២០% ដល់ ៤៣ ពាន់លានដុល្លារ​ឆ្នាំ ២០២៥

កំណើនសេដ្ឋកិច្ចវៀតណាម កើនឡើងទាបជាងការរំពឹងទុកក្នុងឆ្នាំ២០២៣

កំណើនសេដ្ឋកិច្ចវៀតណាម កើនឡើងខ្ពស់ការរំពឹងទុកសម្រាប់ឆ្នាំ ២០២២

ដំណាំហូប​ផ្លែ​នៅ​វៀតណាម លក់ថ្លៃ​ជាង​មុន​ ៤ ដង គ្រាន់តែ​ក្រូច​ឆ្មារ​មួយ​គីឡូ​ឡើង​ដល់​ជាង ៨ ០០០ ដុង

វៀតណាម​ប្រកាស​គម្រោងសាងសង់​កំពង់​ផែ​​បន្ថែម ចាយ​ថវិកា​ខ្ទង់ ១៣ ពាន់​លានដុល្លារ

វៀតណាម​អាច​ខូច​ប្រយោជន៍​ធំ​ បើ​​នៅ​យឺតយ៉ាវគ្មាន​ផែនការច្បាស់លាស់​អូសទាញអ្នក​វិនិយោគ

សេដ្ឋកិច្ចឌីជីថលវៀតណាម ត្រូវបានព្យាករណ៍ថានឹងកើនឡើង ២០% ដល់ ៤៣ ពាន់លានដុល្លារឆ្នាំ ២០២៥

ដំណាំហូបផ្លែនៅវៀតណាម លក់ថ្លៃជាងមុន ៤ ដង គ្រាន់តែក្រូចឆ្មារមួយគីឡូឡើងដល់ជាង ៨ ០០០ ដុង

វៀតណាមប្រកាសគម្រោងសាងសង់កំពង់ផែបន្ថែម ចាយថវិកាខ្ទង់ ១៣ ពាន់លានដុល្លារ

វៀតណាមអាចខូចប្រយោជន៍ធំ បើនៅយឺតយ៉ាវគ្មានផែនការច្បាស់លាស់អូសទាញអ្នកវិនិយោគ