ស្ដេចត្រាញ់អចលនទ្រព្យ David Rubenstein អះអាងថាដំណើរសេដ្ឋកិច្ចនៅតែល្អ ស្របពេលមហាសេដ្ឋីឯទៀតកំពុងបារម្ភវិបត្តិអតិផរណា

ឧកញ៉ាសំពៅ — Wed, 09 Feb 2022 10:57:20 +0000

មួយរយៈកាលចុងក្រោយនេះ គេសង្កេតឃើញថា ទ្រព្យសម្បត្តិមហាសេដ្ឋីជាច្រើនកំពុងមានការធ្លាក់ចុះជាខ្លាំង តួយ៉ាងដូចជាស្ថាបនិក Facebook លោក Mark Zuckerberg បានរបូតទ្រព្យសម្បត្តិដល់ទៅជាង ៣០ ពាន់លានដុល្លារត្រឹមមួយថ្ងៃ បន្ទាប់ពីតម្លៃហ៊ុននៃក្រុមហ៊ុន Meta ធ្លាក់ចុះយ៉ាងគំហុកមិនធ្លាប់មាន។

មូលហេតុនេះហើយទើបក្រុមមហាសេដ្ឋីជាច្រើនកំពុងឈឺក្បាលហាលថ្ងៃ បារម្ភខ្លាចក្រែងបញ្ហាមួយនេះអាចបង្កទៅជាវិបត្តិអតិផរណានាពេលអនាគត។ តែជាមួយគ្នានោះក៏មានមហាសេដ្ឋីផ្សេងទៀតដែលមិនយល់ស្របជាមួយមតិនេះដូចគ្នា។

ជាក់ស្ដែង លោក David Rubenstein បានអះអាងថា ដំណើរការសេដ្ឋកិច្ចនៅតែបង្ហាញសញ្ញាវិជ្ជមានដដែល និងមិនមានកត្តាមួយណាអាចធ្វើឲ្យវិស័យសេដ្ឋកិច្ចពិភពលោកមានការប្រែប្រួលទៅជាវិបត្តិសេដ្ឋកិច្ចបានឡើយ។

“ខ្ញុំមិនបានមើលឃើញពីកត្តា ឬក៏មូលហេតុចំបងអ្វីមួយដែលធ្វើឲ្យទំហំទីផ្សារមានការប្រែប្រួល និងអាចធ្វើឲ្យសេដ្ឋកិច្ចនាពេលបច្ចុប្បន្នវិវត្តថយក្រោយទាល់តែសោះ។ ខ្ញុំយល់ឃើញថាទំហំទីផ្សារបច្ចុប្បន្នគឺនៅតែមានភាពល្អប្រសើរ ដូចទៅនឹងអតីតភាពដែលពួកយើងធ្លាប់ជួបប្រទះ”។

បញ្ជាក់ដែរថា លោក Rubentstein គឺជាសហស្ថាបនិកក្រុមហ៊ុន Carlyle Group ដែលជាក្រុមហ៊ុនអចលនទ្រព្យធំបំផុតមួយលើលោក និងគ្រប់គ្រងអចលនទ្រព្យមានតម្លៃប្រមាណ ៣០១ ពាន់លានដុល្លារទូទាំងពិភពលោក ខណៈបច្ចុប្បន្នទ្រព្យសម្បត្តិរបស់បុរសវ័យ ៧២ ឆ្នាំគឺមានប្រមាណ ៤,៣ ពាន់លានដុល្លារ៕

ប្រភព: Yahoo

The post ស្ដេចត្រាញ់អចលនទ្រព្យ David Rubenstein អះអាងថាដំណើរសេដ្ឋកិច្ចនៅតែល្អ ស្របពេលមហាសេដ្ឋីឯទៀតកំពុងបារម្ភវិបត្តិអតិផរណា appeared first on .

សេដ្ឋកិច្ចអាមេរិក