សម្តេច ហ៊ុន សែន ស្នើដល់ថ្នាក់ដឹកនាំស្ថាប័ននិងអ្នកសារព័ត៌មាន ប្រកាន់ខ្ជាប់នូវក្រមសីលធម៌វិជ្ជាជីវៈ កុំគិតប្រយោជន៍ផ្ទាល់ខ្លួន

ឧកញ៉ាកោះក្របី — Sat, 11 Dec 2021 01:53:17 +0000

តាមរយៈសារលិខិតក្នុងវេទិកានិពន្ធសារព័ត៌មានកម្ពុជា លើប្រធានបទ «ស្តីពីកូវីដ-១៩៖ បញ្ហាប្រឈម និងឱកាសសម្រាប់អ្នកសារព័ត៌មាន» នៅព្រឹកថ្ងៃសៅរ ទី១១ ធ្នូ នេះ ប្រមុខរាជរដ្ឋាភិបាល សម្តេច ហ៊ុន សែន បានអំពាវនាវដល់ថ្នាក់ដឹកនាំស្ថាប័នសារព័ត៌មាន និងអ្នកសារព័ត៌មាន សូមប្រកាន់ខ្ជាប់នូវក្រមសីលធម៌វិជ្ជាជីវៈសារព័ត៌មាននិងមានសុចរិតភាពក្នុងការបំពេញភារកិច្ច ជៀសវាងការបំពានច្បាប់និងវិជ្ជាជីវៈដោយគិតតែពីប្រយោជន៍ផ្ទាល់ខ្លួនធ្វើឲ្យប៉ះពាល់ដល់កិត្តិយស សេចក្តីថ្លៃថ្នូរ កិត្យានុភាពស្ថាប័នសារព័ត៌មាន និងអ្នកសារព័ត៌មានអាជីពដែលអនុវត្តបានត្រឹមត្រូវតាមវិជ្ជាជីវៈ។

ជាមួយគ្នានេះ សម្តេច ហ៊ុន សែន បានវាយតម្លៃខ្ពស់ដល់អ្នកសារព័ត៌មាន និងស្ថាប័នសារព័ត៌មានដែលបានចូលរួមចំណែកយ៉ាងសកម្មក្នុងការប្រយុទ្ធប្រឆាំងព័ត៌មានមិនពិត និងព័ត៌មានក្លែងក្លាយដែលបង្កឡើងដោយជនឪកាសនិយមមួយចំនួន ធ្វើការវាយប្រហារមកលើរដ្ឋាភិបាលកម្ពុជា បំភ្លៃសភាពការណ៍ពិតធ្វើឲ្យមានការភាន់ច្រឡំនិងបំផុសមិនឲ្យប្រជាពលរដ្ឋទៅទទួលថ្នាំបង្ការកូវីដ១៩ជាដើម។

តាមរយៈកិច្ចសហការដ៏ល្អនេះ ត្រូវបានរដ្ឋាភិបាលប្តេជ្ញាចិត្តក្នុងការលើកកម្ពស់ភាពជាដៃគូរវាងរដ្ឋាភិបាលជាមួយស្ថាប័នព័ត៌មាន ដើម្បីរក្សាសុខសន្តិភាពនិងការអភិវឌ្ឍនប្រទេសជាតិ។

បើតាមក្រសួងព័ត៌មាន ក្នុងប្រទេសកម្ពុជាបច្ចុប្បន្នមានសាប័នផ្សព្វផ្សាយចំនួន ១ ៣៦៥ស្ថាប័ន។ ក្នុងចំណោមនោះ មានស្ថាប័នបោះពុម្ពផ្សាយចំនួន៤៥០ ស្ថាប័នអនឡាញចំនួន៦៦៩ ស្ថានីយវិទ្យុចំនួន២២០ និង២៦ផ្សេងទៀតជាស្ថានីយទូរទស្សន៍៕

The post សម្តេច ហ៊ុន សែន ស្នើដល់ថ្នាក់ដឹកនាំស្ថាប័ននិងអ្នកសារព័ត៌មាន ប្រកាន់ខ្ជាប់នូវក្រមសីលធម៌វិជ្ជាជីវៈ កុំគិតប្រយោជន៍ផ្ទាល់ខ្លួន appeared first on .