កិច្ចប្រជុំពិនិត្យពិភាក្សាអំពីវឌ្ឍនភាពនៃគម្រោងសិក្សាស្ពានឆ្លងកាត់ទន្លេមេគង្គ កោះនរា-មេគង្គឃី និងផ្លូវតភ្ជាប់ពីស្ពានកោះនរា ទៅកាន់ផ្លូវជាតិលេខ១ បានធ្វើឡើងកាលទី១៧ ខែសីហា ឆ្នាំ២០២៦ ដឹកនាំដោយលោក ចាន់ តារា អនុរដ្ឋលេខាធិការ និងជាប្រធានក្រុមការងាររៀបចំគម្រោងសិក្សាស្ពាន ក្រុមការងារបច្ចេកទេស និងមានការចូលរួមកិច្ចប្រជុំពិភាក្សាការងារជាមួយក្រុមហ៊ុន ZHEJIANG (PRC) Institute of Communication Co., Ltd។

កិច្ចប្រជុំនេះធ្វើឡើងក្នុងគោលបំណងពិនិត្យលើវឌ្ឍនភាពការងារសិក្សាគម្រោងសាងសង់ស្ពានឆ្លងកាត់ទន្លេមេគង្គ កោះនរា-មេគង្គឃី ដើម្បីក្រុមការងារបច្ចេកទេសនៃក្រសួងសាធារណការ និងដឹកជញ្ជូន ផ្ដល់ជាយោបល់ និងការកែសម្រួលឱ្យស្របទៅតាមបទដ្ឋានបច្ចេកទេស។

សូមជម្រាបដែរថា ក្រសួងសាធារណការ និងដឹកជញ្ជូន ធ្លាប់បានបញ្ជាក់ដែរថា គម្រោងនេះ នឹងរួមចំណែកបំពេញក្តីប្រាថ្នារបស់ពលរដ្ឋផង និងជំរុញកំណើនសេដ្ឋកិច្ចជាតិជារួមផង តាម រយៈការជួយបង្កើនភាពសកម្មនៃវិស័យអចលនទ្រព្យ, វិនិយោគ, ពាណិជ្ជកម្ម, បដិសណ្ឋារកិច្ច, ក៏ដូចជា ការជួយផ្សព្វផ្សាយវប្បធម៌ និង ទេសចរណ៍របស់កម្ពុជា។ ក្រោយសាងសង់រួច ប្រមុខរដ្ឋាភិបាលកម្ពុជា រំពឹងខ្ពស់ថា គម្រោងនេះ នឹងនាំការរីកចម្រើននៅផ្នែកខាងកើតទន្លេមេគង្គទាំងមូល៕ អត្ថបទ៖ ហ្សាលីន

The post រដ្ឋ សិក្សាគម្រោងស្ពានឆ្លងកាត់ទន្លេមេគង្គ កោះនរា-មេគង្គឃី និងផ្លូវពីស្ពានកោះនរា ឆ្ពោះទៅផ្លូវជាតិលេខ១ appeared first on .