លោក ជួប វឿន បានឱ្យដឹងថា នៅក្នុងមួយរដូវកាលនៃការធ្វើស្រែប្រាំងលើផ្ទៃដីជិត៦ហិកតា លោកត្រូវការប្រើប្រាស់ជីគីមី សរុបចំនួន៤០បេ ហើយថ្ងៃនេះក៏ជាថ្ងៃចុងក្រោយនៃប្រើជីដើម្បីជំរុញឱ្យស្រូវមានការលូតលាស់ស្រុះគ្នា ឬទុំទាន់គ្នា ងាយស្រួលក្នុងការប្រមូលផលនៅថ្ងៃខាងមុខ។

បើតាមកសិករ ជួប វឿន, ការធ្វើស្រូវប្រាំងកសិករប្រើប្រាស់ថ្នាំនិងជីគីមីអស់តិចឬច្រើនវាអាស្រ័យទៅលើស្រូវមានជំងឺ។ បើស្រូវកើតជំងឺទាមទារឱ្យកសិករប្រើថ្នាំនិងជីគីមីញឹកញាប់ដើម្បីជួយជំនួយឱ្យល្អឡើងវិញ។

លោកបន្តថា កាលធ្វើស្រែប្រាំងក្នុងឆ្នាំ២០២៤កន្លងទៅ លោកបានចំណាយប្រាក់ទៅលើថ្នាំ ជីនិងប្រេងម៉ាស៊ូតសម្រាប់បូកទឹកអស់ប្រាក់៨លានរៀល ហើយដល់ពេលប្រមូលផលស្រូវបានជាង២០តោន ដោយក្នុងមួយតោនលក់បានថ្លៃ១លាន២០ម៉ឺនរៀល ក្រោយពីកាត់ចំណាយហើយនៅសល់ប្រាក់ជាង៤លានរៀលសម្រាប់ជួយទ្រទ្រង់ជីវភាពគ្រួសារ។

លោក ញ៉ិប ស្រ៊ន ប្រធានមន្ទីរកសិកម្ម រុក្ខាប្រមាញ់និងនេសាទ ខេត្តតាកែវធ្លាប់បានឱ្យដឹងថា ការធ្វើស្រូវប្រាំងនៅតំបន់វាលទំនាបនៅភាគខាងកើតទីរួមខេត្តតាកែវ ចាប់ផ្តើមដំណើរការទៅតាមទឹកស្រក ហើយនៅតំបន់ខ្លះបានចាប់តាំងពីចុងខែវិច្ឆិកា ឆ្នាំ២០២៤។

លោកលើកឡើងថា តំបន់វាលទំនាបនៅប៉ែកខាងកើត ខេត្តតាកែវមានផ្ទៃដីដែលអាចផលិតស្រូវប្រាំងបានមានចំនួន៨ម៉ឺនហិកតា ហើយទទួលបានទិន្នផលស្រូវជាមធ្យម៥,២តោនក្នុងមួយហិកតា ។តួយ៉ាងកាលពីឆ្នាំ២០២៤កន្លងមកនេះការផលិតស្រូវប្រាំងបានចំនួន៥៩០ពាន់តោន។

លោក ញ៉ិប ស្រ៊ន គូសបញ្ជាក់ថា “តំបន់វាលទំនាបនៅខាងកើតទីរួមខេត្តតាកែវ ជាតំបន់ដែលមានសក្តានុពលភាពខ្លាំងជាងគេចំពោះដំណាំស្រូវ ហើយប្រជាពលរដ្ឋធ្វើស្រែប្រាំងនៅតំបន់ទាំងនោះនិយមចូលចិត្តពូជស្រូវ OM 5451និងពូជស្រូវ IR ច្រើនជាងពូជស្រូវផ្សេងៗ ”៕

The post កសិករផលិតស្រូវប្រាំងនៅភាគខាងកើតខេត្តតាកែវកំពុងបង្កើនការថែទាំឱ្យទាន់រដូវកាលប្រមូលផល appeared first on .

តាមរយៈសំណេរនៅលើទំព័រហ្វេសប៊ុកផ្លូវការរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា នៅថ្ងៃទី២៣ ខែមករា ឆ្នាំ២០២៥នេះថា រាជរដ្ឋាភិបាល នៅជាប់ជាមួយប្រជាកសិករ និងបន្តអន្តរាគមន៍ជួយគ្រប់កាល:ទេស:។បន្ថែមពីការជួយរកទីផ្សារ និងរក្សាលំនឹងថ្លៃស្រូវជូនប្រជាកសិករ រាជរដ្ឋាភិបាល បានបន្តជួយអន្តរាគមន៍បូមទឹកជួយសង្គ្រោះស្រូវប្រាំងជូនប្រជាកសិករ ដើម្បីធានាថា នឹងមិនមានស្រូវប្រាំងប្រជាកសិករណារងការខូចខាត។

ដោយក្នុងនោះ ក្រសួងធនធានទឹក និងឧតុនិយម ក្រសួងកសិកម្ម រុក្ខាប្រមាញ់ និងនេសាទ និងគណ:កម្មាធិការជាតិគ្រប់គ្រងគ្រោះមហន្តរាយ ព្រមទាំង អាជ្ញាធរមូលដ្ឋាន និងអ្នកពាក់ព័ន្ធ បានរួមគ្នាជួយអន្តរាគមន៍តាមគោលដៅ និងដែនសមត្ថកិច្ចរបស់ខ្លួន។

សម្តេចធិបតីបានបន្តថា គិតចាប់ថ្ងៃទី២២ មករា ២០២៥ ក្រសួង ស្ថាប័ន អាជ្ញាធរ និងអ្នកពាក់ព័ន្ធ បានចុះអន្តរាគមន៍បូមទឹកជូនប្រជាកសិករបានប្រមាណ ២ម៉ឺនហិកតា ក្នុងចំណោមស្រូវប្រាំងដែលរងហានិភ័យប្រមាណជាង៣ម៉ឺនហិកតា ដែលស្ថិតក្នុងភូមិសាស្ត្រខេត្តតាកែវ ព្រៃវែង កំពង់ធំ កំពង់ចាម កំពង់ឆ្នាំង ក្រចេះ កណ្ដាល បន្ទាយមានជ័យ ស្វាយរៀង ។

បើតាមសម្តេចធិបតី បានគូសបញ្ជាក់ថា ក្រសួង ស្ថាប័ន អាជ្ញាធរ និងអ្នកពាក់ព័ន្ធ នឹងនៅតែបន្តបូមទឹកជួយសង្គ្រោះស្រូវប្រាំងជូនប្រជាកសិករ រហូតទាល់តែស្រូវប្រាំងឈប់ត្រូវការទឹកបន្តទៀត៕

The post ក្រសួង ស្ថាប័ន អាជ្ញាធរពាក់ព័ន្ធ បានចុះអន្តរាគមន៍បូមទឹកជូនកសិករបានប្រមាណ ២ម៉ឺនហិកតា ក្នុងចំណោមស្រូវប្រាំងរងហានិភ័យជាង៣ម៉ឺនហិកតា appeared first on .