រោងចក្រនេះ ចាប់ផ្តើមដំណើរកាដោយរប្រើទុនវិនិយោគជាង ១៦០លានដុល្លារអាមេរិកដែលបានបង្កើតការងារប្រមាណជាង ១,៦០០កន្លែង។ កាលចាប់ផ្តើមសង្វាក់ផលិតកម្មរបស់ខ្លួនដំបូងស្ថិតក្នុងស្ថានភាពការរាតត្បាតខ្លាំងនៃជំងឺកូវីដ-១៩ ទាំងនៅកម្ពុជា និងក្នុងពិភពលោកទាំងមូល ដែលបានបង្កផលប៉ះពាល់ធ្ងន់ធ្ងរដល់ស្ថានភាពសង្គម-សេដ្ឋកិច្ច ក៏ក្រុមហ៊ុននៅតែខិតខំពុះពារជម្នះការលំបាក រហូតសម្រេចបាននូវការវេចខ្ចប់លើកដំបូង និងការចែកចាយនៅលើទីផ្សារក្នុងខែកញ្ញា ឆ្នាំ២០២១ ដោយប្រើប្រាស់រយៈពេលត្រឹម ០២ ឆ្នាំប៉ុណ្ណោះ។

ថ្លែងក្នុងឱកាសនោះ លោក ហ៊ុន ម៉ាណែត បានបញ្ជាក់ថា នេះគឺជាសក្ខីភាពមួយបង្ហាញឱ្យឃើញអំពីការប្តេជ្ញាចិត្តខ្ពស់ និងទស្សនវិស័យច្បាស់លាស់របស់ក្រុមហ៊ុនក្នុងការចូលរួមចំណែកជាមួយរាជរដ្ឋាភិបាល ដើម្បីរក្សាភាពធន់ជាមួយនឹងវិបត្តិកូវីដ-១៩ ព្រមទាំងការស្តារ និងជំរុញកំណើនសេដ្ឋកិច្ចជាតិឡើងវិញនៅក្រោយវិបត្តិ។

លោក ហ៊ុន ម៉ាណែត ថ្លែងថា៖ “ជាមោទនភាពដោយបានឃើញក្រុមហ៊ុនក្នុងស្រុកថ្មីមួយទៀត តួយ៉ាងដូចជាក្រុមហ៊ុន ហនុមាន ប៊ែវើរីជីស នេះផ្ទាល់ ដែលបានប្រើប្រាស់ទុនវិនិយោគទាំងស្រុង ១០០% ជាទុនក្នុងស្រុក ដើម្បីបើកដំណើរការរោងចក្រដ៏ធំសម្បើម និងទំនើបមួយនេះ ដែលមានស្តង់ដារនៃការផលិតខ្ពស់ និងធានាបាននូវគុណភាពកាន់តែល្អប្រសើរសម្រាប់អតិថិជនទាំងក្នុងស្រុក និងទីផ្សារក្រៅប្រទេស”។

លោកបន្តថា ក្រុមហ៊ុន ហនុមាន ប៊ែវើរីជីស ពិតជាបានចូលរួមចំណែកយ៉ាងសំខាន់ជាមួយរាជរដ្ឋាភិបាល ក្នុងការជំរុញពិពិធកម្ម និងពង្រឹងផលិតកម្មក្នុងស្រុក ដែលអាចបង្កើតការងារបានរហូតដល់ទៅ ៥០០ កន្លែងនៅក្នុងរោងចក្រផ្ទាល់ ក៏ដូចជាការចូលរួមចំណែកបង្កើនចំណូលពន្ធរបស់រដ្ឋ និងលើកស្ទួយវិស័យ កសិកម្ម, កសិ-ឧស្សាហកម្ម និងវិស័យពាក់ព័ន្ធផ្សេងទៀតនៅកម្ពុជា។

យ៉ាងណា បេក្ខភាពអនាគតនាយករដ្ឋមន្ត្រី ហ៊ុន ម៉ាណែត បានរំលេចផងដែរថា ការបើកដំណើរការរោងចក្រនាពេលនេះ ក៏បានបង្ហាញឱ្យឃើញអំពីសក្តានុពលនៃវិស័យវិនិយោគនៅកម្ពុជា ជាពិសេសការគាំទ្រដល់ការបោះជំហានទៅមុខនៃចក្ខុវិស័យក្នុងការជំរុញកែប្រែ និងធ្វើទំនើបកម្មរចនាសម្ព័ន្ធឧស្សាហកម្មកម្ពុជា ពី “ឧស្សាហកម្មអតិពលកម្ម” ឈានទៅជា “ឧស្សាហកម្មផ្អែកលើជំនាញ និងបច្ចេកវិទ្យា” ដូចមានកំណត់នៅក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ របស់រាជរដ្ឋាភិបាល។

លោកគូសបញ្ជាក់បន្ថែមថា ក្នុងបរិការណ៍នេះ ការអភិវឌ្ឍប្រទេសមួយប្រកបដោយភាពរឹងមាំ ត្រូវការជាចាំបាច់នូវការចូលរួមយ៉ាងសកម្ម និងរស់រវើកពីវិស័យឯកជន ជាមួយនឹងការគាំទ្រ និងការលើកទឹកចិត្តពីសំណាក់រាជរដ្ឋាភិបាល តាមរយៈការលើកកម្ពស់បរិយាកាសធុរកិច្ច-វិនិយោគ ដើម្បីធ្វើឱ្យវិស័យឯកជនអាចអភិវឌ្ឍខ្លួនយ៉ាងឆាប់រហ័ស និងដើរតួនាទីជាឆ្អឹងខ្នងនៃខឿនសេដ្ឋកិច្ចជាតិ ហើយអាចចូលរួមចំណែកដោយផ្ទាល់ដល់ការអភិវឌ្ឍសង្គម-សេដ្ឋកិច្ច តាមរយៈការបង្កើតការងារ និងការពង្រឹងភាពប្រកួតប្រជែង និងដោយប្រយោលតាមរយៈការបង្កើនចំណូលពន្ធ និងការបង្កើនការវិនិយោគ៕

The post លោក ហ៊ុន ម៉ាណែត ថា រោងចក្រ ហនុមាន ប្រើដើមទុនក្នុងស្រុក១០០% appeared first on .

លោកស្រី ខៀវ សស៊ីលៀប ស្ថាបនិកា និងអគ្គនាយិកាក្រុមប្រឹក្សាភិបាល នៃក្រុមហ៊ុន ហនុមាន ប៊ែវើរីជីស​ នៅក្នុងសន្និសិទសារព័ត៌មាននាពេលថ្មីៗនេះ បានលើកឡើងថា៖ «ក្រុមហ៊ុន ហនុមាន ប៊ែវើរីជីស ស្ម័គ្រចិត្ត និងចូលរួមយ៉ាងសកម្ម ជាមួយអគ្គនាយកដ្ឋានពន្ធដារ ក្នុងការអនុវត្ត ការតម្លើងឧបករណ៍វាស់ចំណុះ ស្រាបៀរ និងភេសជ្ជៈគ្មានជាតិសុរា ក៏ដូចជាការចូលរួមពង្រឹងនូវតម្លាភាព និងការប្រកួតប្រជែងដោយស្មើភាពក្នុងវិស័យភេសជ្ជៈនៅកម្ពុជា»។ 

លោកស្រីថ្លែងថា៖ «សម្រាប់ការឈានចូលទីផ្សារក្នុងកាលៈទេសៈដែលកំពុងមានការប្រកួតប្រជែងខ្លាំង មិនមែនជារឿងងាយស្រួលនោះទ។ យ៉ាងណាមិញលោកស្រីសម្លឹងឃើញឱកាសនៅមាន ដោយយល់ពីតម្រូវការទីផ្សារច្បាស់លាស់ និងជឿជាក់ថាអតិថិជនកំពុងរង់ចាំគាំទ្រនូវផលិតផលខ្មែរ ដែលមានគុណភាពពិតប្រាកដ ជាផលិតផលដែលធ្វើឲ្យទាំងអស់គ្នាមានមោទនភាពក្នុងការណែនាំដល់មនុស្សបន្ត»។

លោកស្រីបន្ថែមថា ការដែលបង្កើតក្រុមហ៊ុន ហនុមាននេះឡើង ​គឺលោកស្រីបានគិតគូរយ៉ាងលំអិត និងច្បាស់លាស់ ក្នុងគោលដៅរួម​ចំណែកជាមួយរាជរដ្ឋាភិបាលក្នុងការពង្រីកវិស័យឧស្សហកម្មនៅកម្ពុជា ជាពិសេសគឺបង្កើនការផលិតក្នុងស្រុកឲ្យកាន់តែរីកចំរើន ក៏ដូចជាគោលបំណងចំបងរបស់លោកស្រីគឺចង់ចូលរួមចំណែកក្នុងការបង្កើតការងារដល់កូនខ្មែរឲ្យកាន់ច្រើន។ 

ការដាក់ឲ្យដំណើរការឧបករណ៍វាស់ចំណុះស្រាបៀរ នៅគ្រប់ខ្សែសង្វាក់ផលិតកម្ម នេះគឺជាការចាប់ផ្តើមអនុវត្តរបស់ក្រុមហ៊ុនក្នុងស្រុកថ្មីមួយទៀត តាមសេចក្ដីណែនាំរបស់អគ្គនាយកដ្ឋានពន្ធដារ។

យ៉ាងណា សម្រាប់លោក  គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកជាអគ្គនាយកដ្ឋានពន្ធដារ គូសបញ្ជាក់ថា ការបំពេញកាតព្វកិច្ចនេះ បានឆ្លុះបញ្ចាំងអំពី អភិបាលកិច្ចសាជីវកម្ម ដ៏ល្អប្រសើររបស់ក្រុមហ៊ុនផ្ទាល់ និងជាគំរូល្អ សម្រាប់សហគ្រាសដ៍ទៃទៀត ក្នុងវិស័យផលិតស្រាបៀរ និងភេជ្ជៈ គ្មានជាតិសុរា នៅក្នុងព្រះរាជាណាចក្រកម្ពុជា។

លោក គង់ វិបុល បានបញ្ជាក់បន្ថែមថា ការចូលរួមសហការអនុវត្តយន្តការនេះ មិនត្រឹមតែបានឆ្លុះបញ្ចាំង អំពីអភិបាលកិច្ចសាជីវកម្ម (Corporate Governance) ដ៏ល្អប្រសើររបស់ក្រុមហ៊ុនផ្ទាល់ និងជាគំរូល្អ សម្រាប់សហគ្រាសដ៍ទៃទៀត ក្នុងវិស័យដូចគ្នានេះ ក៍ដូចសហគ្រាសទូទៅ និងជាការរួមចំណែក មិនអាចខ្វះបាន ពីវិស័យឯកជន ដែលជាដៃគូដ៏សំខាន់របស់រដ្ឋ និងជាកម្លាំងចលករសម្រាប់ការអភិវឌ្ឍ និងរីកលូតលាស់ នៃ សេដ្ឋកិច្ចកម្ពុជា។

សូមជម្រាបជូនថា ក្រុមហ៊ុន ហនុមាន ប៊ែវើរីជីស ឯ.ក ត្រូវបង្កើតឡើងដោយកូនខ្មែរសុទ្ធសាធ ជាមួយទុនវិនិយោគរហូតដល់ ១៦០ លានដុល្លារ ដែលមានសមត្ថភាពផលិតរហូតដល់ប្រមាណ ៣០លានកេស ក្នុងមួយឆ្នាំ ហើយក៏អាចផ្តល់ឱកាសការងារប្រមាណជាង ១.៦០០កន្លែងផងដែរ៕

The post លោកស្រី ខៀវ សស៊ីលៀប៖ សម្លឹងឃើញឱកាសនៅមាន, ជឿជាក់អតិថិជនកំពុងរង់ចាំគាំទ្រនូវផលិតផលខ្មែរ ទើបផលិតស្រាបៀរហនុមាន appeared first on .

យោង​តាម​ការ​ចុះផ្សាយ​ពី SCMP បាន​ឲ្យ​ដឹង​ថា ការ​រិះគន់​ខាងលើ​បាន​កើតឡើង​កាលពី​ចុងខែ​ឧសភា បន្ទាប់​ពី​ប្រជាជន​ឥណ្ឌា​ប្រទះ​ឃើញ​ការ​បង្ហោះ​ផ្សព្វផ្សាយ​ស្រាបៀ​ហនុមាន​លើ​បណ្ដាញ​សង្គម Twitter និង​មាន​ការ​ទាមទារ​ឲ្យ​មាន​ការ​ផ្លាស់ប្ដូរ​រូប​ហនុមាន ដោយ​ពួកគេ​អះអាង​ថា ហនុមាន​គឺ​ជា​ព្រះ​នៃ​សាសនា​របស់​ពួកគេ ហើយ​ការ​យក​រូប​ហនុមាន​មក​ប្រើប្រាស់​បែបនេះ ប្រៀប​ដូចជា​ ការ​មើល​ស្រាល​ដល់​សាសនា​នៃ​ប្រទេស​មួយ​នេះ​យ៉ាង​ដូច្នេះ។

ប្រជាជន​មួយ​ចំនួន​បាន​ស្នើ​ដល់​ស្ថានទូត​ឥណ្ឌា​ប្រចាំ​ប្រទេស​កម្ពុជា ចេញ​មុខ​អន្តរាគមន៍​អំពី​ការ​សុំ​ឲ្យ​មាន​ការ​ផ្លាស់ប្ដូរ​ឈ្មោះ និង​ឡូហ្គោ ខណៈ​ប្រជាជន​មួយ​ចំនួន​ទៀត​បាន​ប្រឆាំង​នឹង​មតិ​ខាងលើ ដោយ​បាន​អះអាង​ថា វា​មិន​បាន​ប៉ះពាល់​អ្វី​ដល់​សាសនា​ធ្ងន់ធ្ងរ​ឡើយ ហើយ​បើ​ទោះ​ជា​ក្រុមហ៊ុន​ Hanuman Premium Lager យក​ព្រះនាម​ព្រះ​មក​ធ្វើ​ជា​អត្តសញ្ញាណ​ផលិតផល ក៏​សាសនា​របស់​ប្រទេស​កម្ពុជា​មាន​ស្ថិរភាព ខុសពី​នៅ​ឥណ្ឌា។

“​ហនុមាន​គឺ​ជា​តួអង្គ​ទេវកថា​មួយ​ ហើយ​ខ្ញុំ​មិន​យល់​ឃើញ​ថា មាន​បញ្ហា​អ្វី​ចំពោះ​រឿង​នេះ​ឡើយ។ មាន​ក្រុមហ៊ុន​ស្រាបៀ​ជាច្រើន​ដែល​យក​តួអង្គ​ទេវកថា​ក្រិក​មក​ធ្វើ​ជា​អត្តសញ្ញាណ ដូច្នេះ​វា​គឺជា​រឿង​ធម្មតា​ប៉ុណ្ណោះ”។ នេះ​បើតាម​ការ​សរសេរ​នៅ​លើ​បណ្ដាញ​សង្គម Twitter របស់​ជនជាតិ​ឥណ្ឌា​ម្នាក់”។

សូមជម្រាប​ដែរ​ថា នេះ​មិនមែន​ជា​លើក​ទី ១ ឡើយ ដែល​ប្រជាជន​ឥណ្ឌា​នាំ​គ្នា​លើកទ័ព​រិះគន់​ទៅ​លើ​ក្រុមហ៊ុន​បរទេស អំពី​បញ្ហា​ជំនឿ​សាសនា ពោល​កាលពី​ឆ្នាំ ២០២០ ពួកគេ​ក៏​ធ្លាប់​វាយ​ប្រហារ​ទៅ​លើ​ក្រុមហ៊ុន Amazon ដោយ​មាន​ការ​ទាមទារ​ឲ្យ​លុប​នូវ​ផលិតផល​កម្រាល​ព្រំ ដែល​មាន​រូប​ព្រះ​នៃ​ទេវកថា​ហិណ្ឌូ​ផង​ដែរ៕

The post ប្រជាជន​ឥណ្ឌា​ទាមទារ​ឲ្យ​មាន​ការ​កែប្រែឈ្មោះ និង​ឡូហ្គោ​ស្រាបៀ​ហនុមាន appeared first on .

ក្រុមហ៊ុន ហនុមាន ប៊ែវើរីជីស ឯ.ក ត្រូវបង្កើតឡើងដោយកូនខ្មែរសុទ្ធសាធ ជាមួយការបោះវិនិយោគទុនរហូតដល់ ១៦០ លានដុល្លារ ដោយមានច្ចេកវិទ្យាទំនើបចុងក្រោយពីអឺរ៉ុប ស្របទៅតាមបទដ្ឋានស្តង់ដារលំដាប់ពិភពលោក ព្រមទាំងមានសមត្ថភាពផលិតរហូតដល់ប្រមាណ ៣០លានកេស ក្នុងមួយឆ្នាំ ពោលគឺនឹងផ្តល់ឱកាសការងារប្រមាណជាង ១.៦០០កន្លែង។

បន្ថែមលើនេះ ក្រុមហ៊ុន មានការប្តេជ្ញាចិត្តដ៏មោះមុត ក្នុងការរួមចំណែកអភិវឌ្ឍសេដ្ឋកិច្ចនៃកម្ពុជា ខណៈទិសដៅរបស់រាជរដ្ឋាភិបាលបាននឹងកំពុងជំរុញដល់ការបង្កើនវិស័យឧស្សាហកម្មផលិតក្នុងស្រុក ដែលមានទីតាំងស្ថិតនៅ ផ្លូវជាតិលេខ ៤ ភូមិត្រពាំងវែង ឃុំឆក់ឈើនាង ស្រុកអង្គស្នួល ខេត្តកណ្តាល។

នាយកប្រតិបត្តិក្រុមហ៊ុន ហនុមាន ប៊ែវើរីជីស លោក Chas GESCHKE បានឲ្យដឹងថា៖ «បន្ទាប់ពីការសាងសង់អស់រយៈពេលជាងពីរឆ្នាំ យើងបានឆ្លងកាត់នូវឧបសគ្គជាច្រើន ក្នុងស្ថានភាពការរីករាលដាលនៃជំងឺ កូវីដ-១៩ ដែលបានជះឥទ្ធិពលដល់ល្បឿននៃការសាងសង់របស់យើង។ យ៉ាងណាមិញក្រុមហ៊ុនបានខិតខំស្វែងរក ដំណោះស្រាយក្នុងការជំរុញដំណាក់កាលនីមួយៗបន្តទៅមុខជានិច្ច»។

លោកថា នៅទីបំផុតយើងសម្រេច បាននូវគោលដៅដំបូងរបស់ក្រុមហ៊ុន ហើយយើងពិតជាមោទកភាពក្នុងការទទួលបានជោគជ័យ នៃការផលិតនូវផលិតផលដំបូងរបស់យើង គឺស្រាបៀរហនុមាន-Hanuman Premium Lager ព្រមទាំងបានចែកចាយលើទីផ្សារកាលពីថ្មីៗនេះ។

ជាមួយគ្នានេះដែល លោកស្រី ខៀវ សស៊ីលៀប ស្ថាបនិកា និងអគ្គនាយិកាក្រុមប្រឹក្សាភិបាលក្រុមហ៊ុន ហនុមាន ប៊ែវើរីជីស មានប្រសាសន៍ថា៖ «ផលិតផលដំបូងរបស់យើង ទទួលបានការគាំទ្រពេញចិត្ត និងកោតសរសើរមិនដាច់ពីមាត់ ពីសំណាក់បងប្អូនប្រជាជនកម្ពុជា និងភ្ញៀវអន្តរជាតិ អំពីរសជាតិដ៏ឆ្ងាញ់ គុណភាពល្អ និងមានរូបរាងគួរឲ្យទាក់ទាញ ដែលនេះជាសមិទ្ធផលផ្លែផ្កាដ៏វិសេសវិសាលដំបូងសម្រាប់ក្រុមហ៊ុន»។

បើតាមលោកស្រី ក្រុមហ៊ុនមានចក្ខុវិស័យវែងឆ្ងាយប្រកបដោយវិសាលភាព ដែលផ្តោតសំខាន់លើ ឧត្តមភាព នៃគុណតម្លៃ ក្នុងការផ្តល់បរិយាកាសការងារល្អដល់បុគ្គលិក ស្ថិរភាពលើគុណភាពផលិតផល ក៏ដូចជាការគាំទ្រលើយុទ្ធសាស្រ្តល្អៗ ដើម្បីនិរន្តរភាពដល់ការពង្រីកអាជីវកម្មជាចម្បង ជាពិសេសគឺជំរុញបន្ថែមលើការកសាងគុណភាពម៉ាកសញ្ញាកូនខ្មែរទៅកាន់សកលលោក៕

The post លោកស្រី ខៀវ សស៊ីលៀប បោះទុន ១៦០ លានដុល្លារ វិនិយោគលើរោងចក្រផលិតស្រាបៀរ ហនុមាន appeared first on .