ហាងសម្លៀកបំពាក់ល្បីឈ្មោះ

Stefano Ricci ប្រកាន់គោលការណ៍ពិសេស មិនលក់សម្ភារៈប្រណីតឡាយឡុង ឥវ៉ាន់លក់មិនចេញ កំទេចចោល

ឧកញ៉ាសាមញ្ញ — Wed, 29 May 2024 02:00:00 +0000

Stefano Ricci គឺជាក្រុមហ៊ុនម៉ាកយីហោដ៏ល្បីល្បាញបំផុតមួយរបស់អ៊ីតាលី ដោយផ្តោតទៅលើអាជីវកម្មធំៗ ជាពិសេសសម្លៀកបំពាក់សម្រាប់បុរស និងសម្ភារ:ប្រើប្រាស់ប្រណីតៗ ហើយចំណុចពិសេសរបស់ក្រុមហ៊ុនមួយនេះគឺ ផលិតផលដែលលក់មិនចេញ មិនប្រកាសលក់ឡាយឡុងឡើយ ពោលគឺកំទេចចោលទាំងស្រុងតែម្ដង។

ក្រុមហ៊ុន Stefano Ricci នេះ ត្រូវបានបង្កើតឡើងក្នុងឆ្នាំ១៩៧២ ដោយអ្នករចនាដ៏ល្បីល្បាញគឺលោក Stefano Ricci និងភរិយា លោកស្រី Claudia ខណ:ទីតាំងចាប់ផ្តើមអាជីវកម្មដំបូងរបស់ពួកគេ គឺស្ថិតនៅក្នុងផ្ទះគ្រួសារមួយ ក្នុងទីក្រុង Florence ប្រទេសអ៊ីតាលី។

ជាមួយនឹងការចាប់ផ្តើមដំបូង ដោយផ្តោតទៅលើតែសម្លៀកបំពាក់ លោក Stefano Ricci ក៏បានចាប់ផ្តើមពង្រីកកេរ្តិ៍ឈ្មោះរបស់ខ្លួនបន្ថែមទៀត ជាមួយនឹងការបង្កើតអាជីវកម្មថ្មីៗ ដូចជាការផលិតទឹកអប់ នាឡិកា ស្រា គ្រឿងប្រើប្រាស់ក្នុងផ្ទះ និងសូម្បីតែសេវាកម្មរចនាផ្ទៃខាងក្នុង ផងដែរ។

លុះយូរៗទៅ Stefano Ricci បានផ្លាស់ប្តូរពីក្រុមហ៊ុនតូចមួយទៅជាក្រុមម៉ាកយីហោដ៏ប្រណីតមួយលំដាប់អន្តរជាតិដែលមានបុគ្គលិកសរុបប្រមាណ ៦០០ នាក់ នៅទូទាំងពិភពលោក និងមានហាង ៧០ នៅក្នុងទីក្រុងនានា ជុំវិញពិភពលោក ដោយក្នុងនោះក៏មានហាងស្ថិតនៅក្នុងប្រទេសកម្ពុជាផងដែរ ដែលមានទីតាំងនៅក្នុងអគារវឌ្ឍនៈ ជាន់ផ្ទាល់ដី។

បច្ចុប្បន្ន លោក Stefano Ricci បានតែងតាំងកូនប្រុស ២រូបរបស់លោក ឲ្យចូលមកជំនួសកិច្ចការមួយចំនួន ដោយកូនប្រុសច្បង Niccolo បានក្លាយជា CEO និងកូនប្រុសពៅ Filippo ជាប្រធានផ្នែករចនាម៉ូដ។

ជម្រាបជូនផងដែរថា ចំណុចលេចធ្លោមួយដែលធ្វើឲ្យក្រុមហ៊ុន Stefano Ricci មានឈ្មោះបោះសំឡេងកាន់ខ្លាំងនោះ គឺដោយសារតែផលិតផលរបស់ពួកគេតែងតែថ្មីជានិច្ច ព្រោះថាទំនិញដែលលក់មិនចេញ នឹងត្រូវបំផ្លាញចោលជារៀងរាល់ឆ្នាំ ដើម្បីចៀសវាងកុំឲ្យទំនិញណាមួយត្រូវលក់ក្នុងតម្លៃទាបជាងទីផ្សារ ឬបន្តយកទៅលក់នៅក្នុងហាងនានាផ្សេងទៀត។ ហើយសម្រាប់ប្រាក់ចំណូលសរុបរបស់ក្រុមហ៊ុនកាលពីឆ្នាំ២០២៣ កន្លងទៅ មានចំនួនប្រមាណជាង ២០០លានដុល្លារ ពោលគឺបានកើនឡើងជាង ៤០% បើធៀបទៅនឹងឆ្នាំ២០២២ និងឆ្នាំ២០១៩៕

The post Stefano Ricci ប្រកាន់គោលការណ៍ពិសេស មិនលក់សម្ភារៈប្រណីតឡាយឡុង ឥវ៉ាន់លក់មិនចេញ កំទេចចោល appeared first on .

តស់! មកស្គាល់ស្ដេចត្រាញ់ ៥រូបមានប្រាក់វាល់លាន រកស៊ីក្នុងវិស័យឧស្សាហកម្មសម្លៀកបំពាក់

ឧកញ៉ាសំពៅ — Mon, 10 Jul 2023 03:42:52 +0000

វិស័យឧស្សាហកម្មម៉ូដសម្លៀកបំពាក់ គឺជាប្រភពរកប្រាក់ចំណូលរាប់ពាន់លានដុល្លារ សម្រាប់ក្រុមមហាសេដ្ឋី ហើយវាក៏ជាឧស្សាហកម្មបែបចាស់បុរាណ ប៉ុន្តែគ្មានថ្ងៃសាបរលាបងាយៗឡើយ។

យោងតាមការចុះផ្សាយពីគេហទំព័រ Nairametrics បានបង្ហាញថា ទំហំទឹកប្រាក់នៅក្នុងវិស័យមួយនេះ មានរហូតដល់ ២,៥ទ្រីលានដុល្លារ មុនពេលមានជំងឺរាតត្បាត ហើយវាត្រូវបានគេរំពឹងថា នឹងកើនឡើងចន្លោះពី ៥% ដល់ ១០% ក្នុងរយៈពេលប៉ុន្មានឆ្នាំខាងមុខ។

ខាងក្រោមនេះគឺជាបញ្ជីឈ្មោះមហាសេដ្ឋីមានបំផុត ៥រូប ដែលកំពុងរកស៊ី និងកើបលុយបានក្រាស់ក្រែលពីឧស្សាហកម្មមួយនេះ ផ្អែកតាមការចុះផ្សាយពីគេទំព័រ Forbes៖

៥. មហាសេដ្ឋីជប៉ុន Tadashi Yanai មានទ្រព្យសម្បត្តិប្រមាណ ៣៦,៧ពាន់លានដុល្លារ ជាម្ចាស់ក្រុមហ៊ុន Fast Retailing

៤.មហាសេដ្ឋីបារាំង François Pinault មានទ្រព្យសម្បត្តិប្រមាណ ៣៩,២ពាន់លានដុល្លារ ជាម្ចាស់ក្រុមហ៊ុនម៉ាកយីហោល្បីៗដូចជា Gucci និង Yves Saint Laurent

៣.មហាសេដ្ឋីអាមេរិក Phil Knight មានទ្រព្យសម្បត្តិប្រមាណ ៤១,១ពាន់លានដុល្លារ ជាសហស្ថាបនិកក្រុមហ៊ុន Nike

២.មហាសេដ្ឋីអេស្ប៉ាញ Amancio Ortega មានទ្រព្យសម្បត្តិប្រមាណ ៨៨,៩ពាន់លានដុល្លារ ជាម្ចាស់ក្រុមហ៊ុន Inditex

១.មហាសេដ្ឋីបារាំង Bernard Arnault មានទ្រព្យសម្បត្តិប្រមាណ ២២២ពាន់លានដុល្លារ ជាម្ចាស់ក្រុមហ៊ុន LVMH៕

The post តស់! មកស្គាល់ស្ដេចត្រាញ់ ៥រូបមានប្រាក់វាល់លាន រកស៊ីក្នុងវិស័យឧស្សាហកម្មសម្លៀកបំពាក់ appeared first on .

ប្រាក់ចំណេញ Uniqlo កើនឡើងខ្ពស់បំផុត បើទោះជាស្ថិតិលក់នៅចិនធ្លាក់ចុះខ្លាំង

ឧកញ៉ាសំពៅ — Thu, 13 Oct 2022 08:21:23 +0000

កាលពីពេលថ្មីនេះ ក្រុមហ៊ុនលក់សម្លៀកបំពាក់ខ្នាតយក្ស Uniqlo បានបង្ហោះពីរបាយការណ៍ប្រាក់ចំណេញប្រចាំឆ្នាំ ជាមួយនឹងតួលេខខ្ពស់បំផុតមិនធ្លាប់មាន បើទោះជាកន្លងមកក្រុមហ៊ុនជប៉ុនមួយនេះធ្លាប់បង្ហាញក្ដីព្រួយបារម្ភ ជុំវិញការលក់នៅទីផ្សារប្រទេសចិនមានការធ្លាក់ចុះជាខ្លាំង។

យោងតាមការចុះផ្សាយពី CNA បានឲ្យដឹងថា របាយការណ៍ប្រាក់ចំណេញប្រចាំឆ្នាំគិតត្រឹមខែសីហា គឺមាន ២៩៧,៣ ពាន់លានយ៉េន ឬប្រហែល ២,០២ ពាន់លានដុល្លារ ខណៈកាលឆ្នាំទៅពួកគេរកបាន ២៤៩ ពាន់លានយ៉េន។

ទិន្នន័យដែលក្រុមហ៊ុនទទួលបានឆ្នាំនេះ ក៏មានលើសការព្យាករណ៍ទុកមុន ពីសំណាក់ Refinitiv ផងដែរ ដោយពួកគេព្យាករថា Uniqlo អាចនឹងទទួលប្រាក់ចំណេញត្រឹម ២៩១ ពាន់លានយ៉េន ប៉ុន្តែវាបានហក់ឡើងដល់ជាង ២៩៧ ពាន់លានយ៉េនឯណោះ។

ដោយឡែក សម្រាប់ទីផ្សារអន្តរជាតិធំបំផុតរបស់ Uniqlo គឺប្រទេសចិន ទទួលបានប្រាក់ចំណេញតិចជាងឆ្នាំទៅ ១៧% ដោយសារការរឹតបន្តឹងវិធានការទប់ស្កាត់កូវីដ ១៩ នៅក្នុងប្រទេស ប៉ុន្តែក្រុមហ៊ុនរំពឹងថា កំណើននៃការលក់នឹងកើនឡើងវិញនៅត្រីមាសទី ៤ បើសិនជាស្ថានការណ៍កូវីដ ១៩ នៅចិន មានសភាពស្ងប់ស្ងាត់វិញ៕

The post ប្រាក់ចំណេញ Uniqlo កើនឡើងខ្ពស់បំផុត បើទោះជាស្ថិតិលក់នៅចិនធ្លាក់ចុះខ្លាំង appeared first on .

ផលិតផល ១០ យ៉ាងដែល Gucci ធ្លាប់លក់ចេញក្នុងតម្លៃថ្លៃបំផុត

ឧកញ៉ាសំពៅ — Fri, 23 Sep 2022 03:55:00 +0000

Gucci គឺជាហាងលក់សម្លៀកបំពាក់ និងគ្រឿងអលង្ការដ៏ស៊ីវិល័យបំផុតមួយលើពិភពលោក ដោយអតិថិជនរបស់ពួកគេសុទ្ធតែជាបុគ្គលល្បីៗ និងលំដាប់អភិជន។

តម្លៃមូលធនទីផ្សាររបស់ Gucci គឺមានរហូតដល់ជាង ៦០ ពាន់លានដុល្លារ ហើយវាត្រូវបានគេចាត់ទុកថាជាហាងដែលមានតម្លៃថ្លៃបំផុតមួយលើលោក។

ខាងក្រោមនេះគឺជាផលិតផល ១០ មុខ ដែល Gucci ធ្លាប់លក់ចេញក្នុងតម្លៃថ្លៃបំផុត៖

10/ ស្បែកជើងកវែង Gucci Woven Leather Boot តម្លៃ ៣ ៧៥០ ដុល្លារ

9/ ខោខូវប៊យ Gucci Genius Jeans តម្លៃ ៤ ០០០ ដុល្លារ

8/ កាបូបយួរដៃ Gucci Sylvie Purse តម្លៃ ៤ ០០០ ដុល្លារ

7/ នាឡិកាដៃ Gucci Men’s I-Digital Grammy Special Edition Watch តម្លៃ ៧ ៩០០ ដុល្លារ

6/ រ៉ូប Gucci Sequin Dress តម្លៃ ១២ ៩០០ ដុល្លារ

5/ អាវក្រៅ Gucci Biker Jacket តម្លៃ ១៨ ៦៥០ ដុល្លារ

4/ កាបូប Gucci 1921 Collection Medium Shoulder Bag តម្លៃ ២៨ ៩៩០ ដុល្លារ

3/ កាបូប Soft Stirrup Black Crocodile Shoulder Bag តម្លៃ ៣០ ០០០ ដុល្លារ

2/ កាបូប Gucci Crocodile Tote Bag With Bamboo Handle តម្លៃ ៣២ ០០០ ដុល្លារ

1/ ខ្សែក្រវ៉ាត់ Gucci Stuart Hughes Belt តម្លៃ ២៥០ ០០០ ដុល្លារ៕

The post ផលិតផល ១០ យ៉ាងដែល Gucci ធ្លាប់លក់ចេញក្នុងតម្លៃថ្លៃបំផុត appeared first on .

ហាង Uniqlo របស់មហាសេដ្ឋីជប៉ុន ជាប់ឈ្មោះក្នុងបញ្ជីហាងសម្លៀកបំពាក់ធំបំផុតទាំង ១០ លើលោក

ឧកញ៉ាសំពៅ — Tue, 18 Jan 2022 02:33:52 +0000

ដូចធ្លាប់បានដឹងរួចមកហើយថា ហាងសម្លៀកបំពាក់ដ៏ពេញនិយមនៅជប៉ុន ក៏ដូចជាជុំវិញសកលលោកគឺ Uniqlo គឺជាអាជីវកម្មរបស់លោក Tadashi Yanai ដែលជាអ្នកមានដាច់គេទី ២ នៅជប៉ុន។

មិនត្រឹមតែជា Brand សម្លៀកបំពាក់ធំប្រចាំប្រទេសឡើយ តែ Uniqlo ថែមទាំងជាប់ជា Brand ល្បីទូទាំងពិភពលោក ដែលមានសាខាជាច្រើនកន្លែង ពោលគិតត្រឹមចុងខែវិច្ឆិកា ២០២១ Uniqlo មានសាខា ២ ៣៥៨ កន្លែងរាប់ទាំងនៅជប៉ុន និងអន្តរជាតិ។

ផ្អែកតាមការចុះផ្សាយពី Thevou ហាងរបស់មហាសេដ្ឋីជប៉ុនមួយនេះបានជាប់ចូលក្នុងបញ្ជីហាងសម្លៀកបំពាក់ធំបំផុតលើលោកទាំង ១០ ដោយផ្អែកលើមូលធនទីផ្សារប្រចាំឆ្នាំ ២០២១ និងភាពល្បីល្បាញរបស់ម៉ាកយីហោមួយនេះ។

ហាង Brand សម្លៀកបំពាក់ធំៗទាំង ១០ លើលោកទាំងនោះមានដូចជា៖

ហាង NIKE មានទីស្នាក់ការកណ្ដាលនៅសហរដ្ឋអាមេរិក មូលធនទីផ្សារឆ្នាំ ២០២១ គឺ ៣០,៥ ពាន់លានដុល្លារ
ហាង GUCCI មានទីស្នាក់ការកណ្ដាលនៅប្រទេសអ៊ីតាលី មូលធនទីផ្សារឆ្នាំ ២០២១ គឺ ១៥,៦ ពាន់លានដុល្លារ
ហាង Louis Vuitton មានទីស្នាក់ការកណ្ដាលនៅប្រទេសបារាំង មូលធនទីផ្សារឆ្នាំ ២០២១ គឺ ១៤,៨ ពាន់លានដុល្លារ
ហាង Adidas មានទីស្នាក់ការកណ្ដាលនៅប្រទេសអាល្លឺម៉ង់ មូលធនទីផ្សារឆ្នាំ ២០២១ គឺ ១៤,៣ ពាន់លានដុល្លារ
ហាង Chanel មានទីស្នាក់ការកណ្ដាលនៅប្រទេសបារាំង មូលធនទីផ្សារឆ្នាំ ២០២១ គឺ ១៣,២ ពាន់លានដុល្លារ
ហាង ZARA មានទីស្នាក់ការកណ្ដាលនៅប្រទេសអេស្ប៉ាញ មូលធនទីផ្សារឆ្នាំ ២០២១ គឺ ១៣,១ ពាន់លានដុល្លារ
ហាង UNIQLO មានទីស្នាក់ការកណ្ដាលនៅប្រទេសជប៉ុន មូលធនទីផ្សារឆ្នាំ ២០២១ គឺ ១៣,១ ពាន់លានដុល្លារ
ហាង H&M មានទីស្នាក់ការកណ្ដាលនៅប្រទេសស៊ុយអែត មូលធនទីផ្សារឆ្នាំ ២០២១ គឺ ១២,៤ ពាន់លានដុល្លារ
ហាង Cartier មានទីស្នាក់ការកណ្ដាលនៅប្រទេសបារាំង មូលធនទីផ្សារឆ្នាំ ២០២១ គឺ ១២ ពាន់លានដុល្លារ
ហាង Hermes មានទីស្នាក់ការកណ្ដាលនៅប្រទេសបារាំង មូលធនទីផ្សារឆ្នាំ ២០២១ គឺ ១១,៦ ពាន់លានដុល្លារ៕

ប្រភព: thevou

The post ហាង Uniqlo របស់មហាសេដ្ឋីជប៉ុន ជាប់ឈ្មោះក្នុងបញ្ជីហាងសម្លៀកបំពាក់ធំបំផុតទាំង ១០ លើលោក appeared first on .

ម្ចាស់ Brand ល្បីឈ្មោះ Zara ចាយលុយជាង ១ ពាន់លានដុល្លារ ទិញអគារពាណិជ្ជកម្មកណ្ដាលទីក្រុងតូរ៉ុនតូ

ឧកញ៉ាសំពៅ — Fri, 14 Jan 2022 08:38:23 +0000

កាលពីពេលថ្មីៗនេះ លោក Amancio Ortega ដែលជាមហាសេដ្ឋីជនជាតិអេស្ប៉ាញ និងជាម្ចាស់ម៉ាកយីហោហាងសម្លៀកបំពាក់ល្បីឈ្មោះ Zara បានចំណាយលុយប្រមាណ ១,២ ពាន់លានដុល្លារទិញយកអគារពាណិជ្ជកម្មនៅទីក្រុងតូរ៉ុនតូ ប្រទេសកាណាដា។

អគារពាណិជ្ជកម្មដែលត្រូវបានមហាសេដ្ឋីអេស្ប៉ាញទិញកាលពីពេលថ្មីៗនេះ គឺមានឈ្មោះថា Royal Bank Plaza ដែលជាទីប្រមូលផ្ដុំដោយធនាគារជួរមុខប្រចាំប្រទេស និងជាកន្លែងពាណិជ្ជកម្មធំៗផងដែរ។

បើតាមសម្ដីរបស់អ្នកតំណាងគ្រួសារត្រកូល Ortega បានបញ្ជាក់ប្រាប់ទៅកាន់ Bloomberg News កាលពីថ្ងៃព្រហស្បតិ៍ថា ក្រុមហ៊ុន Oxford Properties និង Canada Pension Plan Investment Board បានដាក់អគារមួយនេះលក់លើទីផ្សារតាំងពីឆ្នាំ ២០២១ មកម៉្លេះ និងដាក់តម្លៃប្រហែលខ្ទង់ ១ ពាន់លានដុល្លារ។

ដោយឡែក ការបញ្ជាទិញអគាររបស់ម្ចាស់ម៉ាកយីហោ Zara មួយនេះ បានក្លាយជាការទិញអចលនទ្រព្យធំបំផុតមួយលើលោក គិតចាប់តាំងពីមានការរាតត្បាតជំងឺកូវីដ-១៩ ខណៈក្រុមហ៊ុនអចលនទ្រព្យ CBRE បានបង្ហើបថា តាំងពីមានការរាតត្បាតមក ចំណូលរបស់ Royal Bank Plaza ហាក់មានការធ្លាក់ចុះបន្តបន្ទាប់ ដោយសារក្រុមហ៊ុនជាច្រើនមានបំណងចង់ឈប់ជួលកន្លែង និងងាកមកទីស្នាក់ការរបស់ពួកគេវិញ។

បញ្ជាក់ដែរថា ថ្វីបើជះលុយជាង ១ ពាន់លានដុល្លារទៅលើអគារពាណិជ្ជកម្មខ្នាតយក្សមួយនេះមែនពិត តែ Royal Bank Plaza មិនមែនជាអចលនទ្រព្យទី ១ នៅទ្វីបអាមេរិកខាងជើងដែល គ្រួសារ Ortega គ្រប់គ្រងឡើយ ពោលនៅមានដូចជា អគារប្រវត្តិសាស្ត្រ Haughwout នៅទីក្រុងម៉ាហាថាន់ សណ្ឋាគារ Chicago អគារការិយាល័យខ្ពស់បំផុតនៅទីក្រុង Miami និងអគារការិយាល័យចំនួនពីរនៅ Seattle ជួលដោយក្រុមហ៊ុន Amazon៕

ប្រភព: dailyhive

The post ម្ចាស់ Brand ល្បីឈ្មោះ Zara ចាយលុយជាង ១ ពាន់លានដុល្លារ ទិញអគារពាណិជ្ជកម្មកណ្ដាលទីក្រុងតូរ៉ុនតូ appeared first on .