លោក លី ប្រយុទ្ធ តំណាងអង្គការ FAOមានប្រសាសន៍ថា ការធ្វើពាណិជ្ជកម្មអង្ករលើពីភពលោកត្រូវបានប៉ាន់ប្រមាណថា នឹងកើនឡើង៣០ %នៅក្នុងរយៈពេល១០ឆ្នាំខាងមុខ ពោលនឹងកើនពីប្រមាណ៥៤លានតោនអង្គរក្នុងឆ្នាំ២០២៣-២០២៤ ដល់៧០លានតោនក្នុងឆ្នាំ២០៣៤-២០៣៥ ស្របពេលប្រជាជនលើពិភពលោកកំពុងមាននិន្នាការប្រើប្រាស់ស្បៀងអាហារមានគុណភាព សុវត្ថិភាព ផ្តល់អត្ថប្រយោជន៍ល្អសម្រាប់សុខភាព។

លោកបន្តថា ការផលិតដែលមានការគិតគូរដល់បរិស្ថាននៅក្នុងបរិបទនេះ ពាណិជ្ជកម្មដើរតួនាទីយ៉ាងសំខាន់ក្នុងដំណើរបរិវត្តកម្ម ដោយជួយឱ្យតួអង្គក្នុងខ្សែច្រវាក់តម្លៃអាចសម្របខ្លួនទៅតាមការផ្លាស់ប្តូរយ៉ាងលឿននៃទីផ្សារ និងការរកឱកាសថ្មីៗដើម្បីបង្កើតតម្លៃបន្ថែម។

លោកលើកឡើងថា ដំណាំស្រូវត្រូវបានដាំដុះនៅទូទាំងពិភពលោក និងជាអាហារមូលដ្ឋានសម្រាប់មនុស្សជាងពាក់កណ្តាលនៅលើពិភពលោក ហើយក៏ជាទំនិញមួយប្រភេទដែលមានលក្ខណៈរសើប ទាក់ទងនិងផ្នែកនយោបាយដោយតម្លៃរបស់វា ប្រែប្រួលទៅតាមស្ថានភាពផលិតកម្ម ការស្តុកទុក ការបញ្ចេញស្តុក និងគោលនយោបាយរបស់ប្រទេសនាំចេញ និងនាំចូល។ ដូចនេះការតាមដាននិន្នាការ ផលិតកម្ម និងទីផ្សារសកល ការប្រែប្រួលតម្លៃ និងគោលនយោបាយរបស់ប្រទេសនាំចេញ និងនាំចូល គឺជាកត្តាសំខាន់ ដើម្បីកំណត់ពីហានិភ័យដែលអាចកើតមានចំពោះវិស័យស្រូវអង្គរ សំដៅរៀបចំយុទ្ធសាស្ត្រ និងវិធានការនានាដើម្បីកាត់បន្ថយផលប៉ះពាល់ជាអវិជ្ជមាន និងកសាងបាននូវមូលដ្ឋានរឹងមាំនៅក្នុងប្រព័ន្ធពាណិជ្ជកម្មស្រូវអង្ករពិភពលោក។

លោក លី ប្រយុទ្ធ មានប្រសាសន៍ថា «ប្រទេសកម្ពុជា មានកិត្យានុភាពផលិតអង្ករដែលមានគុណភាពល្អ ដែលជាគុណតម្លៃអង្ករកម្ពុជា គឺបានបង្ហាញតាមរយៈការឈ្នះពានរង្វាន់អង្ករល្អបំផុតរបស់ពិភពលោក។ ដើម្បីទាញយកគុណប្រយោជន៍ពីគុណតម្លៃនេះ វាទាមការខិតខំប្រឹងប្រែងបន្តទៀតលើការផលិត និងការកែច្នៃ ដែលអនុឡោមតាមស្តងដារ ការបង្កើតម៉ាក ការផ្សព្វផ្សាយទីផ្សារ និងបង្កើនសមត្ថភាពនាំចេញ។ បន្ថែមលើសពីនេះវាទាមទារការវិនិយោគបន្ថែមលើការស្រាវជ្រាវ និងកម្មវិធីបង្កាត់ពូជ ការកែលម្អលើការដាំដុះ និងគ្រប់គ្រងដំណាំ ការអភិវឌ្ឍផ្នែកឡូជីស្ទីក ការពង្រីកកម្មវិធីហិរញ្ញប្បទាន ដើម្បីកសាងកេរ្តិ៍ឈ្មោះ និងទំនុកចិត្តយូរអង្វែងសម្រាប់អង្ករកម្ពុជាលើទីផ្សារអន្តរជាតិ។ សកម្មភាពទាំងនេះសុទ្ធសឹងជាសកម្មភាពអាទិភាពដែលបានកំណត់នៅក្នុងយុទ្ធសាស្រ្តពង្រីកនិងពិធិធកម្មទីផ្សារនាំចេញអង្ករកម្ពុជា»៕

The post ការធ្វើពាណិជ្ជកម្មអង្ករនៅលើពិភពលោក នឹងកើនដល់៧០លានតោន នៅត្រឹមឆ្នាំ២០៣៥ appeared first on .

ការបង្ហាញពីបំណងរបស់អង្គការស្បៀង និងកសិកម្មនៃសហប្រជាជាតិ (FAO) ក្នុងជំនួបពិភាក្សាការងាររវាងលោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ជាមួយជំនួយការអគ្គនាយក និងជាប្រធានផ្នែកជលផល និងវារីវប្បកម្មនៃអង្គការស្បៀង និងកសិកម្មនៃសហប្រជាជាតិ (FAO) កាលពីថ្ងៃទី៩ ខែមករា ឆ្នាំ២០២៥។

ក្នុងជំនួបនោះ លោក ឌិត ទីណា បានស្វាគមន៍ចំពោះក្រុមការងារនៃអង្គការ (FAO) ដែលមានបំណងពង្រឹងកិច្ចសហប្រតិបត្តិការជាមួយគ្នាឱ្យកាន់តែរឹងមាំបន្ថែមទៀត និងពិនិត្យលទ្ធភាពក្នុងការគាំទ្រក្នុងវិស័យជលផល និងវារីវប្បកម្មក្នុងប្រទេសកម្ពុជា។

លោកបានលើកឡើងអំពីគោលនយោបាយរបស់រាជរដ្ឋាភិបាលអាណត្តិទី៧ ក្នុងការរក្សាស្ថិរភាពថ្លៃសម្រាប់ប្រជាកសិករ និងអ្នកប្រើប្រាស់ ដោយពិនិត្យច្បាស់លាស់ពីតម្រូវការ និងការផ្គត់ផ្គង់ ការដាក់ពង្រាយមន្រ្តីកសិកម្មឃុំ ដែលជាជំនួយការបច្ចេកទេសរបស់ប្រជាកសិករ និងរាយការណ៍បញ្ហាប្រឈមទាន់ពេលវេលា ព្រមទាំងការកសាងសហគមន៍កសិកម្មទំនើប ដែលអាចជួយប្រជាកសិករកាត់បន្ថយថ្លៃដើមផលិត មានផែនការផលិតកម្មច្បាស់លាស់ អាចផ្គត់ផ្គង់ទៅតាមតម្រូវការទីផ្សារ មានការគាំទ្របច្ចេកទេសពីក្រសួងកសិកម្ម វិនិយោគទទួលបានប្រាក់ចំនេញ និងមានហានិភ័យទាបពីការប្រែប្រួលអាកាសធាតុ។

លើសពីនេះ លោកក៏បានលើកទឹកចិត្តឱ្យមានការជំរុញការធ្វើវារីវប្បកម្ម ដើម្បីធានានិរន្តរភាពធនធានជលផលធម្មជាតិឱ្យបានគង់វង្សយូរអង្វែង និងបានសង្កត់ធ្ងន់ឲ្យកំណត់ការនេសាទសម្រាប់បម្រើដល់ការហូបចុក ឬ «មានហូប» ហើយយកការធ្វើវារីវប្បកម្មជាមូលដ្ឋានដើម្បីស្វែងរកផលចំណេញគឺ «មានបាន»។ ទោះជាយ៉ាងណាក៏ដោយ ការធ្វើវារីវប្បកម្មនេះទាមទារការអភិវឌ្ឍការចិញ្ចឹមត្រីមានបច្ចេកទេសត្រឹមត្រូវ ការវិនិយោគលើការផលិតចំណីដែលមានគុណភាព និងការវិនិយោគលើការបង្កាត់-ភ្ញាស់កូនត្រី ដែលភាគីអង្គការអាចពិនិត្យលទ្ធភាពក្នុងការចូលរួមជួយគាំទ្រ និងសហការក្នុងការងារនេះ។

ជាការឆ្លើយតប ភាគីជំនួយការអគ្គនាយក និងជាប្រធានផ្នែកជលផល និងវារីវប្បកម្មនៃអង្គការស្បៀង និងកសិកម្មនៃសហប្រជាជាតិ (FAO) បានបង្ហាញគោលចំហររបស់ខ្លួនក្នុងការគាំទ្រប្រទេសកម្ពុជា បើសិនជាកម្ពុជាត្រូវការជំនួយបច្ចេកទេសពាក់ព័ន្ធនឹងការងារវារីវប្បកម្ម ការផលិតចំណី និងការបង្កាត់-ភ្ញាស់កូនត្រី ព្រមទាំងពិនិត្យពិចារណាក្នុងការពង្រីកការគាំទ្រចំពោះវិស័យកសិកម្មកម្ពុជា និងក្រសួងកសិកម្មផ្ទាល់ លើអ្វីដែលបានសម្រេចជាមួយគ្នាកន្លងមក និងបន្ថែមនូវការគាំទ្រលើការអភិរក្សធនធានធម្មជាតិបន្ថែមទៀតផងដែរ៕

The post អង្គការ (FAO) គាំទ្រក្នុងវិស័យជលផល និងវារីវប្បកម្មក្នុងប្រទេសកម្ពុជា appeared first on .

នេះបើយោងតាមកិច្ចប្រជុំពិនិត្យវឌ្ឍនភាពស្តីពីកម្មវិធីអភិវឌ្ឍវិស័យកសិកម្ម ផ្សាភ្ជាប់ការវិនិយោគទៅនឹងពាណិជ្ជកម្ម (CAFE-2025) ដឹកនាំដោយលោករដ្ឋមន្ដ្រី ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ជាមួយតំណាងអង្គការស្បៀង​ និងកសិកម្មនៃសហប្រជាជាតិប្រចាំកម្ពុជា​(FAO)កាលថ្ងៃទី០៦ ខែមករា​ ឆ្នាំ២០២៥។

​កិច្ចពិភាក្សានេះ បានផ្តោតលើការជំរុញទៅលើតម្រូវការនៃការវិនិយោគទាំងអ្នកវិនិយោគក្នុងស្រុក​ និងវិនិយោគិនបរទេស​ នូវកសិផលសំខាន់របស់កម្ពុជា ​រួមមាន៖​ ស្រូវអង្ករ​ ស្វាយចន្ទី​ ស្វាយ​ កៅស៊ូ​ ផលិតកម្មបន្លែ​ ផលិតផលវារីវប្បកម្ម​ ម្រេច​ ដំឡូងមី​ ត្រចៀកកាំ​ និងផលិតផលសក្តានុពលនានាជាដើម។

នាឱកាសនោះដែរ លោករដ្ឋមន្រ្តី ក៏បានផ្តល់អនុសាសន៍ណែនាំដល់ក្រុមការងារត្រូវពិនិត្យពីកាលបរិច្ឆេទសមស្របមួយ​ ដែលអាច​ប្រារព្ធកម្មវិធីនេះ បានដោយរលូន​ និងមានការចូលរួមបានគ្រប់ភាគីពាក់ព័ន្ធទាំងអស់ក្នុងវិស័យកសិកម្ម​ ផ្សាភ្ជាប់ពាណិជ្ជកម្មកាន់តែទូលំទូលាយ។​ ទន្ទឹមគ្នានេះ លោកថែមទាំង បានលើកទឹកចិត្តដល់ក្រុមការងារ​ត្រូវជំរុញការងារនេះឱ្យចេញជារូបរាង។

សូមរម្លឹកដែរថា ក្នុងឆ្នាំ២០២៤ ផលិតផលដំណាំកម្ពុជា សម្រេចបាន៣៩លានតោន កើនឡើងលើសឆ្នាំ២០២៣ ចំនួន២,៧លានតោន ក្នុងនោះនាំចេញបាន១១,៦៦លានតោន  គិតជាទឹកប្រាក់ជាង៤ ៧៩២លានដុល្លារ។នេះបើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ កាលថ្ងៃទី២ ខែមករា ឆ្នាំ២០២៥។

ក្រសួងកសិកម្ម បានបញ្ជាក់ដែរថា អាទិភាពសម្រាប់ឆ្នាំ ២០២៥ គឺការបង្កើនគុណភាពនៃការផលិតសម្រាប់ទីផ្សារ និងការកាត់បន្ថយថ្លៃដើមផលិតដើម្បីបង្កើនប្រាក់ចំណូលជូនកសិករ និងបន្តរក្សាលំនឹងថ្លៃស្បៀងអាហារសំខាន់ៗជូនប្រជាជនគ្រប់រូប៕ អត្ថបទ៖ ហ្សាលីន

The post ក្រសួងកសិកម្ម-អង្គការ FAO បើកិច្ចពិភាក្សាជំរុញការវិនិយោគលើកសិផលសំខាន់របស់កម្ពុជា appeared first on .