ជំនួបនេះ បានផ្តោតជាសំខាន់លើការរឹតចំណងសាមគ្គីភាព និងកិច្ចសហប្រតិបត្តិការរវាងបណ្ឌិត្យសភាវិទ្យាសាស្ត្រកសិកម្មកម្ពុជា និងអង្គការ UNIDO ក្នុងបេសកកម្មរួមគ្នាដើម្បីគាំទ្រ និងអភិវឌ្ឍ «មន្ទីរពិសោធន៍ជាតិកសិកម្ម»។ គម្រោងជាយុទ្ធសាស្ត្រនេះ ត្រូវបានធ្វើឡើងក្រោមជំនួយឧបត្ថម្ភនៃកម្មវិធី «ភាពជាដៃគូសហភាពអឺរ៉ុប-កម្ពុជា សម្រាប់មន្ទីរពិសោធន៍ជាតិកសិកម្ម» (EU-Cam NAL)។

គួរបញ្ជាក់ថា គម្រោង EU-Cam NAL នេះ គឺដើម្បីធ្វើការកែទម្រង់ និងពង្រឹងសមត្ថភាពបច្ចេកទេស ក៏ដូចជាការអភិវឌ្ឍហេដ្ឋារចនាសម្ព័ន្ធមន្ទីរពិសោធន៍ជាតិឱ្យកាន់តែមានភាពទំនើបស្របតាមស្តង់ដារសកល។ ជំហានដ៏មានសារៈសំខាន់នេះ នឹងក្លាយជាគ្រឹះយ៉ាងរឹងមាំក្នុងការលើកកម្ពស់គុណភាព និងសុវត្ថិភាពវិស័យកសិកម្មកម្ពុជា ធានាបាននូវទំនុកចិត្តខ្ពស់សម្រាប់អ្នកប្រើប្រាស់ក្នុងស្រុក និងបើកផ្លូវកាន់តែទូលាយសម្រាប់ការនាំចេញកសិផលខ្មែរទៅកាន់ទីផ្សារអន្តរជាតិ។

The post កម្ពុជា-UNIDO ចាប់ដៃគ្នាធ្វើទំនើបកម្មមន្ទីរពិសោធន៍ជាតិ ដើម្បីលើកកម្ពស់ស្តង់ដារកសិកម្មទៅកាន់ទីផ្សារអន្តរជាតិ appeared first on .

ការដាក់ឱ្យដំណើរការនេះជាផ្នែកមួយនៃគម្រោង «ការងារ និងមុខរបរសមរម្យសម្រាប់យុវជន» ដំណាក់កាលទី៣ (DEY III) ដែលជាកម្មវិធីរួមរបស់អង្គការសហប្រជាជាតិ អនុវត្តដោយអង្គការ ILO, UNIDO, UNESCO, និង UNICEF ក្រោមជំនួយពីទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ (SDC)។

តាមរយៈគម្រោងនេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ រួមជាមួយអង្គការ UNIDO នឹងសហការអនុវត្តសកម្មភាពជាច្រើន ដើម្បីពង្រឹងសមត្ថភាពសហគ្រាស និងសមាគមធុរកិច្ច ឱ្យបង្កើនផលិតភាព និងសមត្ថភាពប្រកួតប្រជែងលើទីផ្សារ រួមចំណែកជំរុញកំណើនសេដ្ឋកិច្ចជាតិ និងផ្ដល់ការងារសមរម្យដល់យុវជន។

លោក ហេង សុខគង់ រដ្ឋលេខាធិការក្រសួងឧស្សហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា៖ “គម្រោងនេះដើរតួនាទីយ៉ាងសំខាន់ក្នុងការជំរុញ និងពង្រឹងសមត្ថភាពកម្មករ-បុគ្គលិក រោងចក្រ សហគ្រាស និងសិប្បកម្ម ជាពិសេសផ្តោតទៅលើវិស័យកសិ-ឧស្សាហកម្ម។ ក្រសួងបាននិងកំពុងយកចិត្តទុកដាក់លើកកម្ពស់សហគ្រិនភាព និងការអភិវឌ្ឍសហគ្រាសធុនតូចនិងមធ្យម ដឹកនាំសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ ក្នុងការបង្កើតការងារសមរម្យនិងតម្រង់ទិសរួមជាមួយការកែសម្រួលក្របខ័ណ្ឌគតិយុត្តិ និងបទបញ្ញត្តិពាក់ព័ន្ធ ដើម្បីរួមចំណែកត្រៀមក្នុងដំណើរចាកចេញពីឋានៈជាប្រទេសមានការអភិវឌ្ឍតិចតួចនៅចុងឆ្នាំ២០២៩ ដោយជោគជ័យ។”

តាមលទ្ធផលនៃការវាយតម្លៃរហ័សអំពីតម្រូវការ ធ្វើឡើងរបស់អង្គការ UNIDO សហគ្រាសធុនតូច និងមធ្យមនៅកម្ពុជា កំពុងប្រឈមនឹងឧបសគ្គមួយចំនួនដូចជា កង្វះលទ្ធភាពទទួលហិរញ្ញប្បទាន ប្រាក់កម្ចី និងទុនបង្វិល កង្វះចំណេះដឹងបច្ចេកទេស ដូចជាទាក់ទងនឹងសុវត្ថិភាពម្ហូបអាហារ និងប្រសិទ្ធភាពធនធាន លទ្ធភាពតភ្ជាប់និងជ្រៀតចូលទីផ្សារតិចតួច និងកង្វះបុគ្គលិកជំនាញ សមត្ថភាពគ្រប់គ្រងដំណើរការអាជីវកម្ម និងវត្ថុធាតុដើមដែលមានគុណភាពជាដើម។

លោក សុខ ណារិន តំណាងប្រចាំប្រទេសអង្គការ UNIDO បានបញ្ជាក់អំពីសារៈសំខាន់នៃការកសាងសមត្ថភាព សហគ្រាសធុនតូច និងមធ្យម ថា៖ “គំនិតផ្តួចផ្តើមនេះនឹងផ្លាស់ប្តូរ SMEs ធ្វើឱ្យពួកគេមានសមត្ថភាពប្រកួតប្រជែងខ្លាំងជាងមុន និងមានការរីកចម្រើនខ្ពស់។ វានឹងជួយបង្កើតការងារ បំផុសគំនិតដល់អ្នកដទៃ និងពង្រឹងខ្សែច្រវាក់ផ្គត់ផ្គង់ ដែលនាំឱ្យសេដ្ឋកិច្ចក្នុងស្រុកមានភាពធន់ រឹងមាំ។ តាមរយៈការផ្តល់ដល់ SMEs នូវចំណេះដឹងសំខាន់ៗទាំងនេះ គំនិតផ្តួចផ្តើមនេះមានគោលដៅចូលរួមក្នុងការធ្វើទំនើបកម្មឧស្សាហកម្ម និងការអភិវឌ្ឍសេដ្ឋកិច្ចប្រកបដោយបរិយាបន្ននៅកម្ពុជា។”

The post ក្រសួងឧស្សាហកម្ម និងអង្គការ UNIDO ដាក់ឱ្យដំណើរការកម្មវិធី «ជំនាញបង្កើនផលិតភាពសហគ្រាស» appeared first on .