បុរស​វ័យ ៦៣ ឆ្នាំ​បាន​ប្រកាស​នៅ​តាម​បណ្ដាញ​សង្គម​ Twitter ថា ទីក្រុង​ដែល​មាន​ប្រជាជន​រស់នៅ​ច្រើន​បំផុត​ប្រចាំ​ប្រទេស​មួយ​នេះ នឹង​មាន​ការ​ផ្លាស់ប្ដូរ​ចំពោះ​បញ្ហា​ឧក្រិដ្ឋកម្ម និង​វិបត្តិ​គ្មាន​ផ្ទះ​សម្បែង ស្របពេល​លោក​បាន​ដាក់​ឯកសារ​រួចស្រេច​សម្រាប់​ការ​ឈរ​ឈ្មោះ​ជា​បេក្ខភាព​អភិបាលក្រុង។

ជាក់ស្ដែង ស្ថានការណ៍​បច្ចុប្បន្ន​នៅ​ទីក្រុង LA កំពុង​មាន​សភាព​គួរ​ឲ្យ​បារម្ភ​ខ្លាំង ដោយសារ​អត្រា​ប្រជាជន​គ្មាន​ផ្ទះសម្បែង​មាន​ការ​កើនឡើង​ខ្លាំង ដែល​ធ្វើឲ្យ​ការ​បោះតង់​នៅ​តាម​ទីសាធារណៈ​កាន់​តែ​មាន​ច្រើន​ ស្របពេល​ករណី​ឆក់​ប្លន់​ក៏​កើត​មាន​ច្រើន​ដូចគ្នា ដោយសារ​អស្ថិរភាព​ពី​ការ​បិទ​ប្រទេស​រយៈពេល​ជាង ២ ឆ្នាំ​កន្លង​មក​នេះ។

ដោយឡែក ការ​បោះឆ្នោត​ជា​បឋម​នឹង​ធ្វើឡើង​នៅ​ថ្ងៃទី ០៧ ​មិថុនា​ខាងមុខ ស្របពេល​មហាសេដ្ឋី​មាន​ទ្រព្យ​ជាង ៤ ពាន់​លាន​ដុល្លារ​រូប​នេះ នឹង​ឈរ​ឈ្មោះ​ជា​បេក្ខភាព​នៃ​បក្ស​ប្រជាធិបតេយ្យ។

បញ្ជាក់ យោង​តាម​កំណត់ត្រា​របស់​អាជ្ញាធរ Los Angeles បាន​ឲ្យ​ដឹង​ថា Caruso ធ្លាប់​ជា​អ្នក​គាំទ្រ​បក្ស​សាធារណរដ្ឋ​យូរ​ណាស់​មកហើយ តែ​បាន​ងាក​ទៅ​គាំទ្រ​បក្ស​ប្រជាធិបតេយ្យ​វិញ​នៅ​ខែធ្នូ ឆ្នាំ ២០១១ ប៉ុន្តែ​រំលង​បាន ៥ ឆ្នាំ​លោក​បាន​ត្រឡប់​មក​ជា​អ្នកគាំទ្រ​បក្ស​សាធារណរដ្ឋ​ម្ដងទៀត និង​ចុងក្រោយ​បង្អស់​បាន​ប្រកាស​មក​ជា​អ្នក​គាំទ្រ​បក្ស​ប្រជាធិបតេយ្យ​ដើម្បី​ឈរឈ្មោះ​ជា​បេក្ខភាព​អភិបាលក្រុង LA អាណត្តិ​ថ្មី៕

ប្រភព: federalnewsnetwork

The post មហាសេដ្ឋី Rick Caruso ប្រកាស​ឈរ​ជា​បេក្ខភាព​បោះឆ្នោត​រើស​អភិបាល​ក្រុង LA អាណត្តិ​ថ្មី appeared first on .