ចាប់តាំងពីរងការឈ្លានពានពីរុស្ស៊ីអស់រយៈពេល៤ឆ្នាំមកនេះ អ៊ុយក្រែនបានអភិវឌ្ឍប្រព័ន្ធការពារដើម្បីប្រឆាំង និងបាញ់កម្ទេចដ្រូនសត្រូវយ៉ាងស្ទាត់ជំនាញ។ អ៊ុយក្រែនបានអះអាងថា វាមានតម្លៃសមរម្យតែមានប្រសិទ្ធភាពខ្ពស់ បើធៀបនឹងប្រព័ន្ធការពារអាកាសថ្លៃៗដែលប្រទេសជាច្រើនកំពុងប្រើប្រាស់សព្វថ្ងៃ។  

ពេលនេះ អ៊ុយក្រែន បានចាប់ផ្ដើមចែករំលែកជំនាញដល់ប្រទេសក្នុងតំបន់ឈូងសមុទ្រចំនួន៣ រួមមានកាតា អេមីរ៉ាត់អារ៉ាប់រួម និងអារ៉ាប៊ីសាអូឌីត ដែលកំពុងរងការគំរាមកំហែងពីដ្រូនអ៊ីរ៉ង់ដែលជាប្រភេទតែមួយដែលរុស្ស៊ីតែងតែប្រើលើទីក្រុងកៀវ។

ជាថ្នូរនឹងការផ្ដល់ជំនួយបច្ចេកវិទ្យានេះ លោក ហ្សេលេនស្គី សង្ឃឹមថា ទីក្រុងកៀវ នឹងទទួលបានមកវិញនូវគ្រាប់មីស៊ីលការពារអាកាសប្រភេទ PAC-2 និង PAC-3 ដែលអ៊ុយក្រែនកំពុងខ្វះខាត។ លោកបញ្ជាក់ថា គ្រាប់មីស៊ីលទាំងនេះដែលត្រូវបានប្រើប្រាស់ក្នុងប្រព័ន្ធការពារអាកាស Patriot នឹងជួយឱ្យអ៊ុយក្រែនមានសមត្ថភាពក្នុងការស្ទាក់ចាប់ការវាយប្រហារដោយមីស៊ីលបាលីស្ទិកពីរុស្ស៊ី៕ 

The post អ៊ុយក្រែន បញ្ជូនអ្នកជំនាញប្រឆាំងដ្រូនអ៊ឺរ៉ង់ទៅជួយកាតា អេមីរ៉ាត់អារ៉ាប់រួម និងអារ៉ាប៊ីសាអូឌីត appeared first on .

ការិយាល័យប្រឆាំងអំពើពុករលួយជាតិអ៊ុយក្រែន (NABU) បាននិយាយនៅក្នុងសេចក្តីថ្លែងការណ៍មួយរបស់ខ្លួនថា ៖” អតីតរដ្ឋមន្ត្រីថាមពលអ៊ុយក្រែនដែលកាន់តំណែងចន្លោះពីឆ្នាំ២០២១-២០២៥ ត្រូវបានគេរកឃើញថាបានចូលរួមក្នុងអំពើលាងលុយកខ្វក់ និងចូលរួមក្នុងឧក្រិដ្ឋកម្មដែលបានរៀបចំទុកជាមុន”។

យ៉ាងណាក៏ដោយ NABU មិនបានបញ្ជាក់ប្រាប់ឈ្មោះជាក់លាក់នោះឡើយ ប៉ុន្តែលោក Herman Galushchenko ត្រូវបានគេដឹងថា ធ្លាប់បានបម្រើការជារដ្ឋមន្ត្រីថាមពលអ៊ុយក្រែនពីឆ្នាំ២០២១ ដល់ឆ្នាំ២០២៥។ យោងតាមច្បាប់ព្រហ្មទណ្ឌអ៊ុយក្រែន អ្នកដែលត្រូវបានកាត់ទោសពីបទឧក្រិដ្ឋទាំងនេះ អាចប្រឈមមុខនឹងការជាប់ពន្ធនាគាររហូតដល់ ១៥ឆ្នាំ។

ជម្រាបជូនថា ការប្រកាសនេះបានកើតឡើងមួយថ្ងៃបន្ទាប់ពី លោក Galushchenko ត្រូវបានចាប់ខ្លួនខណៈពេលកំពុងព្យាយាមចាកចេញពីប្រទេស។ នេះគឺជាការវិវឌ្ឍចុងក្រោយបំផុតនៅក្នុងរឿងអាស្រូវអំពើពុករលួយថាមពលដែលបានធ្វើឱ្យរដ្ឋាភិបាលអ៊ុយក្រែនរង្គោះរង្គើកាលពីឆ្នាំមុន៕​

The post អតីតរដ្ឋមន្ត្រីថាមពលអ៊ុយក្រែន កំពុងស្ថិតនៅក្រោមការស៊ើបអង្កេតពីបទលាងលុយកខ្វក់ appeared first on .

របាយការណ៍មួយដែលបានចេញផ្សាយនៅថ្ងៃទី១១ ខែកុម្ភៈ ដោយវិទ្យាស្ថានស្រាវជ្រាវសេដ្ឋកិច្ចពិភពលោក Kiel ដែលមានមូលដ្ឋាននៅប្រទេសអាល្លឺម៉ង់ បង្ហាញថា ជំនួយយោធាពីបណ្តាប្រទេសនៅអឺរ៉ុប ដល់អ៊ុយក្រែនបានកើនឡើង ៦៧% ក្នុងឆ្នាំ២០២៥ បើប្រៀបធៀបទៅនឹងមធ្យមភាគប្រចាំឆ្នាំក្នុងអំឡុងពេល ២០២២-២០២៤ ខណៈពេលដែលជំនួយហិរញ្ញវត្ថុ និងមនុស្សធម៌ក៏បានកើនឡើង ៥៩% ផងដែរ។

ទន្ទឹមនឹងនេះ ជំនួយសរុបរបស់សហរដ្ឋអាមេរិកដល់អ៊ុយក្រែនក្នុងអំឡុងពេលដូចគ្នានោះ រួមទាំងជំនួយយោធា ហិរញ្ញវត្ថុ និងមនុស្សធម៌ បានថយចុះអស់ ៩៩%។

គួរឲ្យដឹងថា ជំនួយយោធារបស់សហរដ្ឋអាមេរិក ដល់អ៊ុយក្រែនបានធ្លាក់ចុះយ៉ាងខ្លាំង ពោលគឺចាប់តាំងពីលោក ដូណាល់ ត្រាំ ត្រលប់មកកាន់អំណាចវិញ នៅក្នុងខែមករា ឆ្នាំ២០២៥។ រដ្ឋបាលរបស់លោក ត្រាំ បានលក់អាវុធឲ្យសម្ព័ន្ធណាតូ ហើយបន្ទាប់មកត្រូវបានផ្ទេរទៅឲ្យអ៊ុយក្រែនបន្ត។

ជម្រាបជូនថា អឺរ៉ុបខាងលិចគឺជាតំបន់ដែលផ្តល់ជំនួយយោធាច្រើនបំផុតដល់អ៊ុយក្រែនក្នុងឆ្នាំ២០២៥ និងបន្ទាប់មកគឺអឺរ៉ុបខាងជើង។ នៅក្នុងតំបន់នោះ ចក្រភពអង់គ្លេស និងអាល្លឺម៉ង់ បានរួមចំណែកពីរភាគបីនៃជំនួយយោធាសរុបមកពីអឺរ៉ុបខាងលិច ចន្លោះឆ្នាំ២០២២ ដល់ឆ្នាំ២០២៥៕​

The post ការផ្តល់ជំនួយរបស់សហរដ្ឋអាមេរិក ដល់ប្រទេសអ៊ុយក្រែនថយចុះអស់ស្ទើតែ ១០០%​ appeared first on .

នៅក្នុងកិច្ចប្រជុំកំពូលសហភាពអឺរ៉ុប (EU) នៅទីក្រុងព្រុចសែល ប្រទេសបែលហ្ស៊ិក កាលពីថ្ងៃទី១៨ ខែធ្នូ រដ្ឋជាសមាជិកចំនួន ២៧ បានប្រញាប់ប្រញាល់ដើម្បីឈានដល់ការឯកភាពគ្នាលើផែនការមួយដើម្បីផ្តល់ការគាំទ្រផ្នែកហិរញ្ញវត្ថុដល់អ៊ុយក្រែន។ អាទិភាពចម្បងរបស់ប្លុកនេះគឺការប្រើប្រាស់ទ្រព្យសម្បត្តិប្រហែល ២០០ពាន់លានអឺរ៉ូ (ឬប្រមាណជាង ២៣៤ពាន់លានដុល្លារ) ពីធនាគារកណ្តាលរុស្ស៊ី ដែលបច្ចុប្បន្នត្រូវបានបង្កកនៅអឺរ៉ុប ដើម្បីបង្កើតប្រាក់កម្ចីសម្រាប់ទីក្រុងគៀវ។

ប៉ុន្តែទោះជាយ៉ាងណាក៏ដោយ សហភាពអឺរ៉ុបបរាជ័យក្នុងការឈានដល់ការឯកភាពគ្នាលើផែនការនេះ បន្ទាប់ពីបែលហ្ស៊ិក ដែលកាន់កាប់ទ្រព្យសម្បត្តិបង្កកភាគច្រើនរបស់រុស្ស៊ី បានទាមទារការធានានៃការទទួលខុសត្រូវផ្នែកច្បាប់រួមគ្នាក្នុងចំណោមរដ្ឋជាសមាជិក ក្នុងករណីមានសកម្មភាពផ្នែកច្បាប់ណាមួយដែលចេញដោយរុស្ស៊ី។

ជម្រាបជូនផងដែថា ចំពោះការបរាជ័យរបស់សហភាពអឺរ៉ុប ក្នុងការឈានដល់ការឯកភាពគ្នាលើផែនការផ្ទេរទ្រព្យសម្បត្តិរបស់រុស្ស៊ីដែលត្រូវបានបង្កកទៅឲ្យអ៊ុយក្រែននេះ ហាក់ជាការវាយប្រហារដ៏ធំមួយចំពោះអធិការបតីអាល្លឺម៉ង់ លោក Friedrich Merz ដែលជាអ្នកគាំទ្រដ៏ខ្លាំងក្លាបំផុតម្នាក់នៃគំនិតផ្តួចផ្តើមនេះ។ លោកធ្លាប់បានថ្លែងថា ភាពជឿជាក់របស់សហភាពអឺរ៉ុបនឹងត្រូវខូចខាត ប្រសិនបើពួកគេមិនចាត់វិធានការនោះទេ៕​

The post សហភាពអឺរ៉ុប បរាជ័យលើកិច្ចព្រមព្រៀងផ្ទេរទ្រព្យសម្បត្តិរុស្ស៊ីជាង ២៣៤ពាន់លានដុល្លារ ទៅឲ្យអ៊ុយក្រែន appeared first on .

នៅក្នុងសន្និសីទសារព័ត៌មានរួមគ្នាជាមួយនាយករដ្ឋមន្ត្រីហូឡង់ លោក Dick Schoof នៅទីក្រុងឡាអេ កាលពីថ្ងៃទី១៦ ខែធ្នូ លោក Zelensky បាននិយាយថា ប្រទេសរបស់ខ្លួន មានគម្រោងប្រើប្រាស់ទ្រព្យសម្បត្តិរបស់រុស្ស៊ីចំនួន ២១០ពាន់លាន់អឺរ៉ូ (ប្រមាណជាង ២៤៦ពាន់លានដុល្លារ) ដែលកំពុងត្រូវបានបង្កកនៅអឺរ៉ុប ដើម្បីបំពេញតម្រូវការហិរញ្ញវត្ថុបន្ទាន់ ក្នុងរយៈពេលប៉ុន្មានឆ្នាំខាងមុខ។

យ៉ាងណាមិញ លោក Zelensky បានបន្តទៀតថា ដំបូងឡើយអ៊ុយក្រែន ចង់ប្រើប្រាស់ទ្រព្យសម្បត្តិទាំងនេះ ដើម្បីកសាងប្រទេសឡើងវិញ ប៉ុន្តែយ៉ាងណាក៏ដោយចំនួនទឹកប្រាក់ទាំងនេះហាក់មិនគ្រប់គ្រាន់ ដើម្បីគ្របដណ្តប់ការខាតបង់បន្ទាប់ពីជម្លោះនោះឡើយ។

ផ្ទុយទៅវិញ ប្រធានធិបតីអ៊ុយក្រែនរូបនេះ បានសង្កត់ធ្ងន់លើតម្រូវការក្នុងការប្រើប្រាស់ទ្រព្យសម្បត្តិរបស់រុស្ស៊ីទាំងនេះ ដើម្បីបំពេញតម្រូវការចំណាយបន្ទាន់ ដូចជាការទិញអាវុធជាដើម។

ជម្រាបជូនថា បន្ទាប់ពីការផ្ទុះឡើងនៃអរិភាពនៅអ៊ុយក្រែនក្នុងខែកុម្ភៈ ឆ្នាំ២០២២ មក ប្រទេសលោកខាងលិចបានដាក់ទណ្ឌកម្មជាបន្តបន្ទាប់លើរុស្ស៊ី ដោយបង្កកទ្រព្យសម្បត្តិរបស់ធនាគារកណ្តាលរុស្ស៊ី និងអ្នកមានអំណាចជាច្រើនរបស់ប្រទេសនេះ។ ក្នុងចំណោមទ្រព្យសម្បត្តិជាង ២៤៦ពាន់លានដុល្លារដែលត្រូវបានបង្កកនៅក្នុងសហភាពអឺរ៉ុប (EU) មាន ២១៧​ពាន់លានដុល្លារត្រូវបានរក្សាទុកនៅបែលហ្ស៊ិក ២១ពាន់លានដុល្លារនៅប្រទេសបារាំង និងនៅសេសសល់ ត្រូវបានរក្សាទុកនៅប្រទេសលុចសំបួរ អាល្លឺម៉ង់ និងស៊ុយអែត៕​

The post លោក Zelensky ថាអ៊ុយក្រែននឹងប្រើប្រាស់ទ្រព្យសម្បត្តិរបស់រុស្ស៊ី ដើម្បីទិញសព្វាវុធ appeared first on .

នៅក្នុងការផ្តល់បទសម្ភាសមួយនៅប្រព័ន្ធអ៊ីនធើណិត លោក Zelensky បាននិយាយថា ៖”​តាំងពីដើមដំបូងមក បំណងប្រាថ្នារបស់អ៊ុយក្រែនគឺចង់ចូលរួមជាមួយណាតូ ដែលផ្តល់នូវការធានាបានសន្តិសុខពិតប្រាកដ។ ប៉ុន្តែដៃគូមួយចំនួនមកពីសហសរដ្ឋអាមេរិក និងអឺរ៉ុប មិនបានគាំទ្រមាគ៌ានេះឡើយ”។

ជុំវិញបញ្ហានេះ លោក Zelensky បានសង្កត់ធ្ងន់ទៀតថា ការធានាសន្តិសុខពីសហរដ្ឋអាមេរិក អឺរ៉ុប និងដៃគូផ្សេងទៀត អាចជាជម្រើសដ៏សំខាន់មួយ ជំនួសឲ្យការក្លាយជាសមាជិកណាតូ។

ជម្រាបជូនផងដែរថា នេះ​គឺជា​ការផ្លាស់ប្តូរ​ដ៏សំខាន់​មួយ​នៅក្នុង​ជំហរ​របស់​អ៊ុយក្រែន ក៏ដូចជា​ការបំពេញ​តាមគោលបំណង​មួយ​របស់​រុស្ស៊ី ​ក្នុងការ​ចាប់ផ្តើម​ប្រតិបត្តិការ​ពិសេស។ សេចក្តីថ្លែងការណ៍​នេះ​ត្រូវបាន​ធ្វើឡើង​មុនពេល​ដំណើរ​របស់លោក Zelensky ទៅកាន់​ប្រទេស​អាល្លឺម៉ង់ ដើម្បី​ជួបជាមួយ​ប្រេសិត​អាមេរិក និង​មេដឹកនាំ​អឺរ៉ុប ក្នុង​កិច្ចខិតខំ​ប្រឹងប្រែង​ដើម្បី​បញ្ចប់​ផែនការ​សន្តិភាព​ដែល​បាន​ផ្សព្វផ្សាយ​ដោយ​ប្រធានាធិបតី លោក ដូណាល់ ត្រាំ ៕​

The post លោក Zelensky ថាអ៊ុយក្រែន នឹងបោះចោលមហិច្ឆតារបស់ខ្លួន ក្នុងការចូលរួមជាមួយអង្គការណាតូ​ appeared first on .

លោកស្រី Ursula von der Leyen ប្រធានគណៈកម្មការអឺរ៉ុប បានប្រាប់អ្នកយកព័ត៌មាន កាលពីថ្ងៃទី៣ ខែធ្នូថា ៖”ថ្ងៃនេះយើងបានដាក់សំណើដើម្បីគ្រប់គ្រងពីរភាគបីនៃតម្រូវការហិរញ្ញវត្ថុរបស់អ៊ុយក្រែនក្នុងរយៈពេលពីរឆ្នាំខាងមុខ។ តួលេខនេះគឺមានចំនួន ៩០ពាន់លានអឺរ៉ូ (១០៥ពាន់លានដុល្លារ) ដែលនៅសល់នឹងត្រូវបានគ្រប់គ្រងដោយដៃគូអន្តរជាតិ”។

មិនតែប៉ុណ្ណោះ លោកស្រី Von der Leyen បានពន្យល់ទៀតថា ចំនួនទឹកប្រាក់ទាំងនេះ នឹងត្រូវបានរៃអង្គាសដោយការខ្ចីប្រាក់ពីសហភាពអឺរ៉ុប ឬប្រើប្រាស់ទ្រព្យសម្បត្តិរបស់ធនាគារកណ្តាលរុស្ស៊ីដែលត្រូវបានបង្កកនៅអឺរ៉ុប ដើម្បីផ្តល់ជាប្រាក់កម្ចីសំណង ដល់អ៊ុយក្រែន។

យោងតាមលោកស្រី ប្រភពហិរញ្ញវត្ថុទាំងនេះ នឹងអនុញ្ញាតឱ្យទីក្រុងគៀវ ធ្វើការចរចាសន្តិភាពជាមុន នៅក្នុងបរិបទនៃសហរដ្ឋអាមេរិកដែលដាក់សម្ពាធលើអ៊ុយក្រែនឱ្យឈានដល់កិច្ចព្រមព្រៀងយ៉ាងឆាប់រហ័ស ដើម្បីបញ្ចប់ជម្លោះជាមួយរុស្ស៊ី។

ប៉ុន្តែទោះជាយ៉ាងណាក៏ដោយ ប្រទេសបែលហ្ស៊ិក ដែលជាទីតាំងរបស់ធនាគារ Euroclear អន្តរជាតិ និងជាទីតាំងកាន់កាប់ទ្រព្យសម្បត្តិភាគច្រើនរបស់រុស្ស៊ីដែលត្រូវបានបង្កក រហូតមកដល់ពេលនេះ បានប្រឆាំងនឹងផែនការនេះ ដោយសារមានការភ័យខ្លាចអំពីការប្រឈមមុខនឹងការសងសឹកផ្នែកច្បាប់ និងហិរញ្ញវត្ថុយ៉ាងធ្ងន់ធ្ងរ ពីទីក្រុងមូស្គូ នៅពេលក្រោយ។

ទន្ទឹមនឹងនេះ រដ្ឋាភិបាលបែលហ្ស៊ិក បានសង្កត់ធ្ងន់ទៀតថា ខ្លួនចង់បានការធានាយ៉ាងរឹងមាំពីប្រទេសសហភាពអឺរ៉ុបផ្សេងទៀត ជុំវិញការទទួលខុសត្រូវលើការបែងចែកទ្រព្យបង្កកទាំងនេះ។ ប៉ុន្តែបើតាមគណៈកម្មការអឺរ៉ុប បានទទូចថាខ្លួនបានដាក់ចេញនូវ “ប្រព័ន្ធការពារបីជាន់” ដើម្បីការពារប្រទេសបែលហ្ស៊ិកពីហានិភ័យផ្នែកច្បាប់ណាមួយ៕​

The post EU ប្រកាសពីផែនការប្រើប្រាស់ទ្រព្យសម្បត្តិបង្កករបស់រុស្ស៊ីជាង ១០០ពាន់លានដុល្លារ សម្រាប់អ៊ុយក្រែន appeared first on .

ជុំវិញការចេញមុខនិយាយរិះគន់ចំៗបែបនេះ ត្រូវបានកើតឡើង នៅពេលដែលលោក Peter Szijjarto ចង់សំដៅលើសំណើបែងចែកទឹកប្រាក់ចំនួន ១០០ពាន់លានអឺរ៉ូ ដើម្បីគាំទ្រដល់អ៊ុយក្រែន សម្រាប់ឆ្នាំ ២០២៨-២០៣៤ ដែលគណៈកម្មកាអឺរ៉ុបបានអនុម័ត កាលពីខែកក្កដា។

យ៉ាងណាមិញ នៅមុនពេលជួបជាមួយដៃគូសហភាពអឺរ៉ុបនៅប្រទេសបែលហ្ស៊ិក លោក Peter បានសង្កត់ធ្ងន់ថា ផែនការផ្ទេរប្រាក់ទៅកាន់អ៊ុយក្រែននេះ គួរតែត្រូវបានបញ្ឈប់ ដោយសារតែប្រព័ន្ធពុករលួយជាច្រើនកំពុងដំណើរការនៅក្នុងប្រទេសនេះ ។

គួរឲ្យដឹងថា យោងតាមការិយាល័យប្រឆាំងអំពើពុករលួយជាតិអ៊ុយក្រែន (NABU) និងការិយាល័យព្រះរាជអាជ្ញាឯកទេសប្រឆាំងអំពើពុករលួយ (SAPO) បានចាប់ផ្តើមបើកការស៊ើបអង្កេតទ្រង់ទ្រាយធំមួយ នៅដើមសប្តាហ៍នេះ ដោយកំណត់គោលដៅលើអង្គការឧក្រិដ្ឋកម្មកម្រិតខ្ពស់ នៅរោងចក្រថាមពលនុយក្លេអ៊ែរ Energoatom។ បណ្តាញនេះ ត្រូវបានចោទប្រកាន់ពីបទពុករលួយ និងការលាងលុយកខ្វក់ប្រមាណ ១០០លានដុល្លារអាមេរិក។

មិនតែប៉ុណ្ណោះ NABU បាននិយាយទៀតថា ក្រុមនេះពាក់ព័ន្ធនឹងមន្ត្រីអ៊ុយក្រែនជាច្រើននាក់ ហើយត្រូវបានដឹកនាំដោយអ្នកជំនួញ Timur Mindich ដែលមានទំនាក់ទំនងជិតស្និទ្ធជាមួយប្រធានាធិបតី លោក Volodymir Zelensky ហើយបានភៀសខ្លួនចេញពីប្រទេសភ្លាមៗ មុនពេលអាជ្ញាធរវាយឆ្មក់ចូលលំនៅដ្ឋានរបស់លោក កាលពីថ្ងៃទី១០ ខែវិច្ឆិកា៕​

The post ហុងគ្រី កំពុងស្នើឲ្យ EU ឈប់ផ្ទេរប្រាក់បន្ថែមទៀតទៅឲ្យអ៊ុយក្រែន appeared first on .

គណៈកម្មការអឺរ៉ុប (EC) គ្រោងនឹងប្រើប្រាស់ទ្រព្យសកម្មរបស់រុស្ស៊ីដែលបានបង្កកនៅក្នុងប្រទេសបែលហ្ស៊ិក ដើម្បីផ្តល់ជាប្រាក់កម្ចីសំណងដល់អ៊ុយក្រែនចំនូួន ១៤០ពាន់លានអឺរ៉ូ។ ប៉ុន្តែកម្ចីនេះ អ៊ុយក្រែននឹងត្រូវសងត្រលប់មកវិញ បន្ទាប់ពីរុស្ស៊ីព្រមទូទាត់សងសម្រាប់ការខាតបង់ដោយសារសង្គ្រាម។

យ៉ាងណាមិញ ជុំវិញប្រាក់កម្ចីទាំងនេះ ភាគច្រើននឹងត្រូវយកទៅទិញសព្វាវុធ និងគាំទ្រឧស្សាហកម្មការពារជាតិអឺរ៉ុប និងអ៊ុយក្រែន។

គួរឲ្យដឹងថា បន្ទាប់ពីសង្គ្រាមនៅអ៊ុយក្រែនបានផ្ទុះឡើងនៅចុងខែកុម្ភៈ ឆ្នាំ២០២២ ប្រទេសលោកខាងលិចបានដាក់ទណ្ឌកម្មជាបន្តបន្ទាប់លើប្រទេសរុស្ស៊ី ដោយបង្កកទ្រព្យសម្បត្តិរបស់ធនាគារកណ្តាលរុស្ស៊ី និងមហាសេដ្ឋីរុស្ស៊ីប្រហែល ៣០០ពាន់លានអឺរ៉ូ (ឬប្រមាណជាង ៣២០ពាន់លានដុល្លារ) ។

ទ្រព្យសកម្មរុស្ស៊ីដែលត្រូវបានបង្កកមានប្រហែល ២៤៥ពាន់លានដុល្លារស្ថិតនៅក្នុងសហភាពអឺរ៉ុបដែលក្នុងនោះមានជិត ២១៥ពាន់លានដុល្លារត្រូវបានគ្រប់គ្រងដោយ Euroclear ដែលជាកន្លែងដាក់ប្រាក់ដែលមានមូលដ្ឋាននៅប្រទេសបែលហ្ស៊ិក៕

The post EU គ្រោងប្រើលុយបង្កករបស់រុស្ស៊ី ដើម្បីយកទៅទិញអាវុធឲ្យអ៊ុយក្រែន appeared first on .

លោក ត្រាំ បាននិយាយប្រាប់អ្នកយកព័ត៌មាន នៅសេតវិមានកាលពីថ្ងៃទី២៦ ខែសីហាថា៖” មនុស្សរាប់ពាន់នាក់ដែលភាគច្រើនជាយុវជនកំពុងស្លាប់ជារៀងរាល់សប្តាហ៍។ ប្រសិនបើខ្ញុំអាចធ្វើបាន ខ្ញុំនឹងបញ្ឈប់វាដោយការដាក់ទណ្ឌកម្ម ប្រើប្រាស់ពន្ធគយធ្ងន់ធ្ងរបំផុត ដែលនឹងបណ្តាលឲ្យខូចខាតយ៉ាងខ្លាំងដល់រុស្ស៊ី និងអ៊ុយក្រែន ឬអ្នកពាក់ព័ន្ធ”។

ប្រធានាធិបតីអាមេរិករូបនេះ បានសង្កត់ធ្ងន់ទៀតថា ៖” យើងមានទណ្ឌកម្មសេដ្ឋកិច្ច។ ខ្ញុំកំពុងនិយាយពីទណ្ឌកម្មសេដ្ឋកិច្ច ពីព្រោះយើងនឹងមិនលូកដៃចូលទៅក្នុងសង្គ្រាមនោះទេ។ វានឹងក្លាយជាសង្គ្រាមសេដ្ឋកិច្ច”។

គួរឲ្យដឹងផងដែរថា លោក ត្រាំ កំពុងស្វែងរកការចរចាដោយផ្ទាល់រវាងមេដឹកនាំនៃប្រទេសរុស្ស៊ី និងអ៊ុយក្រែន ក្នុងកិច្ចខិតខំប្រឹងប្រែងដើម្បីបញ្ចប់ជម្លោះដែលបានអូសបន្លាយជាងបីឆ្នាំមកហើយ។ ប្រធានាធិបតីអ៊ុយក្រែន លោក Volodymyr Zelensky បានយល់ព្រមជាគោលការណ៍ចំពោះកិច្ចចរចាបែបនេះ ប៉ុន្តែចំពោះប្រធានាធិបតីរុស្ស៊ី លោក ពូទីនវិញ ហាក់មិនបានអនុវត្តតាមនោះទេ។

ជម្រាបជូនថា លោកប្រធានាធិបតី ត្រាំ នៅថ្ងៃទី២១ ខែសីហា បានកំណត់ពេលវេលាពីរសប្តាហ៍ដើម្បីវាយតម្លៃលទ្ធភាពសម្រាប់កិច្ចចរចាសន្តិភាពរុស្ស៊ី-អ៊ុយក្រែន ដោយនិយាយថាសហរដ្ឋអាមេរិក អាចជ្រើសរើសវិធីសាស្រ្តផ្សេងទៀត បន្ទាប់ពីកាលបរិច្ឆេទកំណត់នេះ ត្រូវបានបញ្ចប់ ប៉ុន្តែមិនបានផ្តល់ព័ត៌មានលម្អិតនោះទេ៕​

The post លោក ត្រាំ ព្រមានដំឡើងពន្ធធ្ងន់ធ្ងរលើរុស្ស៊ី និងអ៊ុយក្រែន បើការចរចាសន្តិភាពមិនដំណើរការ appeared first on .