ខាងក្រោមនេះគឺជាសំនួរ និងចម្លើយ ដែលគ្រប់គ្នាត្រូវការ និងចង់ដឹងអំពីអ្នកនិពន្ធរបស់យើង គឺលោកស្រី ម៉ីសន សុធារី សូមតាមដាន​បទសម្ភាសន៍ជាមួយយើងខ្ញុំដូចខាងក្រោម ៖

សំណួរ៖ បង! យោងតាម​ទិន្និន័យ​ពេលនេះ​តើបងយល់ថា ខែក្រោយអាចជាខែល្អ​ឡើងវិញដែរ ឬយ៉ាងណាសម្រាប់គ្រប់យ៉ាង ?

ចម្លើយ៖ វានឹងក្លាយជាខែដ៏លំបាកមួយ ព្រោះ​យើងត្រូ​វតែវិលទៅធ្វើការ​វិញ កំណត់​យុទ្ធសាស្ត្ររៀងៗខ្លួន ដើម្បីផ្លាស់ប្តូរ​ឥរិយាបថនៃការ​ប្រកបរបរទទួលទាន មិនថាផ្នែកណាមួយឡើយ គ្រប់គ្នា​ត្រូវសម្រេចចិត្ត ។ ខ្ញុំមិនមែន​បានន័យ​ថា កន្លងមក​យើងបានឈប់ធ្វើការទេ ប៉ុន្តែ​ខ្ញុំចង់និយាយថា ​យើ​បាននាំគ្នា​ធ្វើការ​ផង ភ័យ​ផង តាមដាន​ផងគឺធ្វើត្រឹមមួយរស់ មួយទប់ ហើយ​រង់ចាំ​មើលសិន ! ពេលនេះ យើងអស់ពេលចាំមើលហើយ ! គ្រប់គ្នា​ត្រូវ​បង្វែរ​ផ្លាស់ប្តូរ ព្រោះ២ខែហើយ ! ​អ្វីៗ​ច្បាស់ដូចថ្ងៃ ថា យើង​ត្រូវបន្ត​តាមរបៀបចាស់រង់ចាំ​បរាជ័យ ឬមួយ​ក៏​ផ្លាស់មករបៀបថ្មី ?

សំណួរ៖ ក្នុងនាមជាអ្នកនិពន្ធ តើបងមាន​គំនិតបែបណា​ចំពោះការប្រើប្រាស់ពេលវេលាក្នុងហានិភ័យមួយនេះ ?

ចម្លើយ៖ នេះមិនមែនជាហានិភ័យទេ ប៉ុន្តែ​ជា​សង្គ្រាម! វាមិនមែន​ស្រពេចស្រពឹលដូចកាលពីគ្រប់គ្នា បានរៀន ​ក្នុងសាលាពាណិជ្ជកម្មទេ តែវាមកដល់ចំពោះមុខហើយ! សង្គ្រាម​លើកនេះ ពុំមែន​គ្រប់គ្នា​ត្រូវប្រឆាំង​នឹងអ្នកណា​ទំាងអស់ គឺកំពុង​តែ​សាកល្បងនឹងខ្លួនឯងថាអាចផ្លាស់ប្តូរបានដែរទេ ? កាលពីមុនមនុស្សជាច្រើន​ក្នុងប្រទេសយើង​មាន​ហេតុផលមានក្តីស្រមៃ​ផ្សេង តែពីរខែចុងក្រោយនេះ​យើង​តែងក្រោកមកជាមួយ​នូវការភាន់ច្រឡំមួយ​ថា តើជាសុបិន ឬការពិត! យើងត្រូវភ្ញាក់មក​វិញហើយ​ប្រាប់ខ្លួនឯងថាពិភពលោកនេះលែងដូចមុនហើយ! យើង​ត្រូវតែ​រហ័ស​គ្រប់គ្រាន់ក្នុងការ​ទទួលយក ​ហើយ​ឆ្លៀតប្រើឧបសគ្គមកកម្រើកបានមុនគេ ផ្លាស់ប្តូរបានលឿនជាងគេ ​​ប្រសិន​បើចង់បានជោគជ័យ​ដំបូងគេ !

សំណួរ៖ បងធ្វើយ៉ាងណា​ទើបអាចផ្លាស់ប្តូរបាន ?

ចម្លើយ៖ មិនទាន់បានទំាងស្រុងទេ​ប៉ុន្តែកំពុងធ្វើ! ការផ្លាស់ប្តូរក៏វាមិនមែនងាយស្រួល​ដូចនិយាយដែរ! យើង​ត្រូវការ​តាំងចិត្ត កម្លាំងចិត្ត និង​សេចក្តីសង្ឃឹម។ ខ្ញុំខ្លួនឯង មាន​ពេលខ្លះបាក់ទឹកចិត្ត​យ៉ាងខ្លាំង ខ្លាំង​ដល់ថ្នាក់មិនចង់និយាយស្តី មិនចង់ហូបបាយ​មិនចង់ទៅណាខ្ញុំនិយាយរឿងនេះ​ជាមួយ​មនុស្ស​ល្អៗនៅក្បែរខ្ញុំ ហើយ​ខ្ញុំ​បានប្រើការស្រលាញ់ចំពោះពួកគេ​មកធ្វើជាកម្លាំង​ចិត្ត​ ព្រោះថា​បើគ្មាន​កម្លាំង​នេះ សេចក្តីសង្ឃឹម​ក៏គ្មាន​ដែរ នៅពេលគ្មាន​ក្តីសង្ឃឹម​តើយើងទៅធ្វើអ្វីបាន ? ខ្ញុំតែងតែងាយ​បាក់ទឹកចិត្ត តែខ្ញុំឆាប់ជាសះស្បើយមកវិញ នេះជាទម្លាប់ដោយសារ​យើងមានចំណេះ​ដឹងជាគ្រឿងទប់ ​និងយើងមាន​គំនិតបើកចំហរជាថ្នាំព្យាបាល ។

សំណួរ៖ បើពេលនេះ​មនុស្សម្នាក់កំពុងបាក់ទឹកចិត្ត​ ខំ​ដាក់លុយកាក់ធ្វើអ្វីៗ​ស្រាប់តែខាតបង់អស់ ទំាងមិនអស់ចិត្ត តើគាត់ត្រូវធ្វើយ៉ាងណា?

ចម្លើយ៖ គិតមួយៗអំពីហេតុ និងផល! តើយើង​ស្តាយអ្វី?​ប្រសិន​បើចម្លើយគឺលុយកាក់ ខ្ញុំអាចមានគំនិតថា លុយកាក់ គង់រកមកបាន បើយើង​ស្លាប់បាត់វាក៏គ្មានន័យទៀតដែរ! ប្រសិន​យើងស្តាយ​មុខមាត់ និង​ពេលវេលា​កម្លំាងកាយចិត្ត ខ្ញុំនឹង​ប្រាប់ខ្លួនឯងថា គ្រប់គ្នា​ដូចយើង​ដែរទេ អ្នកខ្លះខាតបង់ច្រើនជាងយើងផង ខ្លះគេ​វិនិយោគមក១០ ឬ ២០ឆ្នាំ មកខាតអស់រលីងត្រឹមពេលចុងក្រោយ​នេះផង! គ្មានអ្វីមួយ​ទៀងទាត់ស្រាប់ហើយក្នុងលោកយើងនេះ! ទ្រព្យ​សម្បត្តិ​មែន​ទែន​របស់មនុស្ស​យើង គឺកម្លំាងចិត្ត ​និងកាយ យើងត្រូវតែចេះថ្នាក់ថ្នមថែទំាវា ព្រោះថា​បើយើង​បណ្តោយ​ឱ្យបាត់ វានឹងបាត់ទៅទៀត នោះយើងចាញ់ហើយ ។

សំណួរ៖ តើបងនឹង​សរសេរសៀវភៅអំពីសេចក្តីសង្ឃឹមដែរទេ ?

ចម្លើយ៖ គ្រប់សៀវភៅ គ្រប់វីដេអូ គ្រប់អត្ថបទ គ្រប់Caption ដែលខ្ញុំបាន​សរសេរ​ខ្ញុំតែង​តែបញ្ចូលអំពី​អាវុធមួយនេះ គឺ « សេចក្តីសង្ឃឹម » ! ខ្ញុំតែង​តែ​នាំមនុស្ស​គ្រប់គ្នា​ឱ្យ​យល់អំពី​គុណតម្លៃ​នៃ​សេចក្តីល្អ និងជឿជាក់ គុណតម្លៃ​នៃការពិត​ដែលថ្លាឆ្វង់ពីក្រោមអំពើកេងបន្លំ និង​លាបព៌ណ មួលបង្កាច់ ។ ខ្ញុំមិនបាច់មាន​សៀវភៅមួយ​ដែលមានចំណងជើង​ថាសេចក្តីសង្ឃឹម​ទេ ព្រោះគ្រប់មនុស្ស​ដែលអានសំណេររបស់ខ្ញុំ គេបាន​ទទួលវា​រួចទៅហើយ ហើយពួកគេ​នឹងបន្តសរសេរអត្ថបទ និយាយវីដេអូ រាប់ម៉ឺន​សែនបន្ថែមទៀត​ អំពីពាក្យនេះ ។

សំណួរ៖ តើបងចង់ឱ្យគ្រប់យ៉ាងវិលត្រឡប់ដូចមុនវិញដែរទេ?

ចម្លើយ៖ តាំងពីដើមមក​មនុស្ស​យើង​តែង​ចង់បង្វិលពេលវេលា​ឱ្យថយក្រោយ ។ មិនថាពេលនេះមាន​វីរុស ឬពេលមុន ពេលណា​ក៏ដោយ មនុស្ស​យើងតែងតែលោភលន់ចង់ដឹងអ្វីមុនដើម្បីធ្វើការ​ដោះស្រាយ​ឱ្យបានល្អជាងនេះ ! មនុស្ស​យើងមិនចេះស្កប់ស្កល់ទេ តែបើយើងអាចស្កប់ស្កល់បានខ្លះ យើងជោគជ័យ​ខ្លាំង​ហើយ! ខ្ញុំពុំមែនជាបុព្វជិត! ខ្ញុំជាមនុស្ស​ធម្មតាម្នាក់​ ខ្ញុំពេលខ្លះក៏​ស្រងេះស្រងោច នឹកឃើញ​ហាងកាហ្វល្បីៗនៅសង្កាត់បឹងកេងកងមួយ ដែលខ្ញុំតែ​ងតែមាន​ប្រជុំជាមួយ​មនុស្ស​នានា មិនដាច់! ខ្ញុំនឹក​ដល់​ជីវភាព​សប្បាយ​ពីអតីតកាលប្រកបដោយសេរីភាព តែពេលនេះ ខ្ញុំមាន​សេរីភាព​បែបផ្សេង ​!គ្រប់គ្នាទៅណាមិនបានទំាងអស់គ្នា ! ពេលខ្លះ​វាក៏ល្អ យើងមិនបាច់ប្រៀបធៀបច្រើន សំខាន់ក្នុងពេលនៅផ្ទះ​នេះ អ្នកណាមាន​លទ្ធផល​ច្រើនជាង​ អ្នកហ្នឹងកំពុងប្រើពេលវេលា​យ៉ាងមាន​តម្លៃ ! កុំនៅស្ងៀម ធ្វើអ្វីម្យ៉ាងទៅ​ពេលវេលាមិនរង់ចាំ​យើងទេ ៕

ប្រភព៖business-cambodia.com

The post ម៉ីសន សុធារី៖សេចក្តីសង្ឃឹម ដែលជាថ្នំា​ព្យាបាលក្នុងវិបត្តិសង្គម​និងសេដ្ឋកិច្ច​​ដោយ​​កូវីដ​១៩​ appeared first on .

ជុំវិញនេះ Oknha News ​បា​នធ្វើការជួបសម្ភាសន៍ ជាមួយ​អ្នកស្រីម៉ីសន​សុធារី ម្ចាស់រឿង​ស្ទូឌីយោលេខ៧ កាលពីពេលសម្ពោធថ្មីៗ ជុំវិញ​ការចាកចេញមួពីភីអិនអិន សូមអាន​បទម្ភាសន៍។

Oknha News ៖  បង លឺថា​បងឈប់ពីភីអិនអិនហើយ​តើមាន​ទំនាស់អ្វីដែលការងារ​ត្រូវបញ្ចប់ទើបតែបាន៨ខែ?

ម៉ីសនសុធារី៖​ចាស ខ្ញុំបានឈប់មែន ឈប់ជាបុគ្គលិកពេញម៉ោង តែ​បើថាមានទំនាស់អីគឺ​អត់ទេ! ខ្ញុំជា​អ្នកនិពន្ធម្នាក់ ខ្ញុំត្រូវការ​ដាក់រឿង​របស់ខ្លួនឯងផលិតនៅទូរទស្សន៍ច្រើន​ទៀត ចំណែក​នៅភីអិនអិន​គឺ​ពិបាក​បន្តិចក្នុងការ​អោយ​ទូរទស្សន៍ផ្សេងទៀត​ផលិតរឿងរបស់ខ្ញុំ ។

Oknha News ៖ តើបងយល់យ៉ាងណាចំពោះការងារ​ប្រធានទីផ្សារនៅទីនោះ?

ម៉ីសនសុធារី៖​  វាជាតួនាទីល្អ ប៉ុន្តែ​សំខាន់តើយើងធ្វើវាបានល្អដែរទេ? ខ្ញុំមាន​បញ្ហា​ខ្លះ​មិនពេញចិត្ត​ចំពោះខ្លួនឯង​​ដោយសារ​តែ​ខ្ញុំពីដើមមក គឺមិនចូលចិត្តទស្សនារឿងភាគថៃ ហើយ​កាលដែលផ្នែកទីផ្សារ​ទទួល​ធ្វើEvent​ដែលមាន​តារាថៃច្រើន​ មិនត្រូវជាមួយ​ចរិតពិតរបស់ខ្ញុំ។ ខ្ញុំមិនមាន​ទំនោរស្ងើច​សរសើរ​តារាថៃទំា​ង​នោះ ជាងសិល្បករក្នុងស្រុកទេ ​អញ្ចឹងខ្ញុំគិតថា ការងារនេះមិនសម​នឹងខ្ញុំ ហើយមិនជំរុញទឹកចិត្ត​សោះ។ ខ្ញុំជាអ្នកនិពន្ធ និងជាអ្នកឌីជីថល ខ្ញុំមើលឃើញ​ឱកាសមួយចំនួន​ទៀត​ដែលមិនចាប់ពេលនេះ គឺ​វាអាចយឺត ដូច្នេះ​ខ្ញុំបានសូមទោសគាត់ហើយ​ថ្នាក់ដឹកនាំ​នៅទីនោះមាន​ទឹកចិត្ត​ទូលាយ ហើយគាត់នៅតែមាន​ការងារ​ខ្លះៗទៀត​ជាមួយ​ខ្ញុំជាគម្រោង​ខ្លីៗ ភាគច្រើនទាក់ទងជាមួយកុនល្ខោន។

Oknha News ៖ តើចេញពី ការងារ​ប្រធានទីផ្សារ​ តើបងរំពឹង​កុងត្រារឿងភាគធំៗប៉ុន្មាន​រឿងទៀត​ជាមួយ​ទូរទស្សន៍​ ផ្សេងៗ?​មានគេទាក់ទងមកបងច្រើនទេ?

ម៉ីសនសុធារី៖​ មិនមែន​គេទាក់ទងខ្ញុំទេ គឺខ្ញុំទាក់ទងគេ​! អ្នកនិពន្ធ​តូចតាចដូចខ្ញុំ​ មិនលើសក៏មិនខ្វះពេកដែរ​សម្រាប់​អ្នកវិនិយោគផ្នែកទូរទស្សន៍​ដែលជាអាជីវកម្មវាល់លានដុល្លារ បើថា ចាំគេ​មកទាក់ទង​យើង អាហ្នឹង​​យើងមិនដឹងជាសិល្បករ​ស្អីនោះទេគឺខ្ញុំទាក់ទងនិយាយជាមួយ​អគ្គនាយក​និង​នាយកផ្នែក​កម្មវិធី​នៃ​ទូរទស្សន៍​មួយ​ចំនួន​​មកហើយ​យើងមានការងារខ្លះចាប់ផ្តើមឆ្នាំក្រោយ។

Oknha News ៖ មានមតិមកថា​រឿង​របស់បង​ថ្ងៃមុនស្អប់ថ្ងៃនេះស្រលាញ់មិនបានទទួលចំណាត់ថ្នាក់ខ្ពស់​ទេក្នុងការវាស់វែងរបស់ Kanta?

ម៉ីសនសុធារី៖​ ពិតណាស់! ចំណាត់ថ្នាក់រឿង​ទូរទស្សន៍ដែលមានគេមើលច្រើនបង្អស់ មិនបាន​មក ថ្ងៃមុន​ស្អប់ថ្ងៃនេះស្រលាញ់ទេ ប៉ុន្តែ​តើបានទៅលើរឿងណាវិញ? ​ហើយ​ហេតុអ្វី?​នេះជាសំនួរ​ដែលផ្នែក​ទូរទស្សន៍​​ត្រូវចោទសួរខ្លួនឯង? នៅលើឌីជីថល រឿងថ្ងៃមុនស្អប់ថ្ងៃនេះ​ស្រលាញ នាំមុខដោយតួលេខកំពូល​មិនធ្លាប់មាន​ក្នុងស្រុកខ្មែរ អញ្ចឹងមាន​ន័យថា​តើ​យើង​យកមនុស្ស​ឌីជីថលឬយើងដើរ​ថយក្រោយ? ឌីជីថល​ជាអនាគត ពេលនេះវា​គ្រាន់តែជាអន្តរកាល ដែលយើង​កំពុង​ឆ្លង​ចាកចោលប្រពៃណី យើង​អាចមានបញ្ហាខ្លះពីដំបូង ប៉ុន្តែនេះ​ជា​ការឆ្ពោះទៅមុខ បែរទៅរក​​អនាគត មនុស្ស​ដើរថយក្រោយ​​គឺដើរ​ទៅរកបរាជ័យ។ ​នៅក្នុងក្រុមដឹកនាំកំពូល​របស់ភីអិនអិន មេដឹកនាំខ្ញុំបានសាទរ​ពេញទំហឹងចំពោះរឿង​នេះ ហើយ​ប្អូន​អាចទៅស្រង់ទិន្នន័យ​ពី​Agencyពាណិជ្ជកម្មទំាង​អស់នៅកម្ពុជា​លោមើលថាតើមានរឿងខ្មែរណា​ដែលមាន​ស្លាកសញ្ញា​ធំៗ ​​បុកមកគាំទ្រ​ច្រើន​​ ដូចថ្ងៃមុនស្អប់ថ្ងៃនេះស្រលាញ់? តើ​ក្រៅពីរឿងមួយ​នេះ តើមាន​រឿង​ខ្មែរណាមួយ​ ដែលអាចមាន​លទ្ធភាព​ទាញបានដោយជោគជ័យ នូវបណ្តាយុវវ័យខ្មែរ​​ដែលធ្លាប់​បោះបង់ចោលការមើលទូរទស្សន៍ក្នុងស្រុក ​អោយ​វិលមកទស្សនាកុនខ្មែរ​ឡើងវិញ​? សារព័ត៌មាន​ក្នុងប្រទេស នានាមានមោទនភាព ​ក្នុងការ​លើកឡើងពី​ល្ខោនទូរទស្សន៍ដ៏ធំមួយនេះ តើនេះ​ជាសុចនាករអ្វី ?

Oknha News ៖ ប៉ុន្តែ​បង មាន​គេនិយាយថា ​បងល្បីខ្លំាង​ដោយសារមាន​សារព័ត៌មាន​ចោមរោម​ជួយជានិច្ច ព្រោះគេមាន​ចេតនា​ជួយ​តែប្រូម៉ូតរឿង​បងម្នាក់គត់ ហើយមិនរវល់ ចំពោះអ្នកនិពន្ធផ្សេងៗ។ តើបងបកស្រាយយ៉ាងណា?

ម៉ីសនសុធារី៖ (សើច) អ្នកដែលនិយាយនេះ តើគេកំពុងមើលងាយខ្ញុំឬមើលងាយអ្នកកាសែត?អោយគេគិតម្តងទៀតទៅ!

Oknha News ៖ សួរតាមត្រង់បងម៉ីសន​សុធារី តើភីអិអិនមានថតរឿងថ្មីជាមួយបងទៀតទេ?

ម៉ីសនសុធារី៖ តំាងពី​ពេលរឿង​ថ្ងៃមុនស្អប់ បញ្ចាំង​បានពាក់កណ្តាល អគ្គនាយកភីអីអិនបាន​ពិភាក្សាអំពីការថតរឿង​ក្រោយជាមួយខ្ញុំទៅហើយ តែខ្ញុំបានសុំគាត់មើល​Trendឆ្នំាក្រោយសិន។ គាត់ថា គាត់មិនត្រួវការ​Ratingអីមកនិយាយ តែគាត់ត្រូវការ​Trendថ្មីៗ ដែលវាជាគុណតម្លៃធំរបស់ភីអីនអិន។​ពួកគាត់មានចក្ខុវិស័យ​វែងឆ្ងាយហើយភីអិនអិនមានធនធានមិនចេះរីងស្ងួត​ទេក្នុងការ​ឈរជើងលំដាប់កំពូល​ក្នុង​វិស័យ​រឿង​ភាគខ្មែរ ពួកគេ​មិនគិត​តូចៗ ដូច​ដែលយើងឃើញហើយ​ថា​ LYP Group​ជោគជ័យ​កម្រិត​ណាក្នុងការកំណត់យុទ្ធសាស្ត្រ​អនាគត​របស់គេ​ម្តងៗ។ ចុងក្រោយ​កញ្ញា​ទូច​បុប្ផាប្រធានកម្មវិធីភីអិនអិន បានជជែកនឹងខ្ញុំឆ្អឹងរឿង​ខ្លះៗសម្រាប់២០២០ឬ២០២១។ ​យើងកំពុង​បន្តស្វែងរកខ្លួន​យើង គឺ​អត្តសញ្ញាណ​ធំមួយ​របស់រ៉ឿងភាគខ្មែរ​ទៅអនាគត។ ដូចខ្ញុំតែងដាស់តឿនប្រាប់ ការស់មួយ​ឆាវតាមស្រមោលអ្នកដទៃ​គ្មានភាពជាខ្លួនឯង ជាការប្រលែង​និងវិបត្តិធ្លាក់ទឹកចិត្ត​នៅចុងបញ្ចប់។ទំហំនែការខូចខាត កេរ៍ឈ្មោះ ធនធាន និងពេលវេលា ជាការខាតបង់ដ៏ធំ យើងមិនអាចវិនិយោគ​ទៅលើ​យន្តការហួសម័យ ដើម្បីតែជោគជ័យ​បណ្តោះអាសន្ននោះទេ។

​Oknha News ៖ បង ក្នុងនាមជាអ្នកនិពន្ធ បងយល់យ៉ាងណា​ការបញ្ចូល​សំឡេង​កុនខ្មែរ​ដែលមាន​គេរិះគន់ច្រើន?

ម៉ីសនសុធារី៖ បើប្អូនថា​គេរិះគន់ច្រើន​ហើយ មកសួរបង​ដល់ណា?​ចង់អោយបងបញ្ជាក់ន័យបន្ថែម​?ឬគាំទ្រ​ការិះគន់នោះជាមួយគ្នា?  ខ្ញុំអាចនិយាយបានខ្លីថា តំាងពីឆ្នាំ៩០ប្លាយមក តារាសម្តែង​ខ្មែរ​បាន​បាត់បង់​ឧត្តមភាព​របស់ពួកគេ​ដោយសារទស្សនិកជន​រកមិនឃើញ ភាពអស្ចារ្ស​ដែលបង្កប់ក្នុងខ្លួនពួកគេ! ប្រទេស​ជិតខាង​បានប្រើសំឡេង​ដើម​របស់តួម្នាក់ៗ តំាំង​ពី​ម្ភៃឆ្នាំមុនមកម៉្លេះ បើយើង​ដើរថយក្រោយ​មិនគួរថយឆ្ងាយ​យ៉ាងនេះទេ។ តារាខ្មែរ​យើង​គួរចេះបដិសេធ​ពេលដែល​ប្រើសំឡេងអ្នកដទៃ​ប​ន្ថែម​រសនិយមដល់ខ្លួ​នយើង ។​ការ​សម្តែង​គឺសម្តែង​ទំាងសំឡេងទំាង​រូបសម្បត្តិទំាង​អារម្មណ៍​នោះទើបជា​ទេពកោសល្យពិត​និង ​អត្តសញ្ញាណ​Identityនៃសិល្បករម្នាក់ៗ។​សិល្បករដែលមិនមាន​អត្តញ្ញាណខ្លួន និងចែងចាំង​រយៈពេលខ្លី។

Oknha News ៖ ទាក់ទង​រឿង​ល្បីនិងភាពល្បីឈ្មោះ តើបងប្រាប់បាន​ទេនូវវិធីសាស្ត្រ​ដែលនាំអោយ​បង​បានក្លាយ​ជាអ្នកនិពន្ធដ៏ល្បីក្នុងពេលដ៏ខ្លី?ហើយបងមានវិធីសាស្រ្តយ៉ាងណា​រក្សាចំណុចនោះ?

ម៉ីសនសុធារី៖ ពេលដ៏ខ្លី? ខ្ញុំសរសេររឿង​តំាង​ពី​១៩៩២ប្អូន។ ចំណែកថាល្បី ខ្ញុំមិនគិតថា អ្នកណាម្នាក់​នៅ​លើចំណុចកំពូលរបស់សិល្បៈជារៀងរហូតទេ។ គ្រប់អាជីពតែងមាន​អ្នកថ្មីលេចឡើងមកហើយ​ល្អជាងមុន ខ្លាំង​ជាជំនាន់យើង ព្រោះ​យើងបានដកពិសោធន៍មុន គេរៀនតាមបន្ត មិនបាច់ចាយពេលដូចជំនាន់យើង​។សំខាន់យើងមាន​អ្នកដើរតាម​ច្រើនទេ(Follower) អ្នកហ្នុងហើយ​ដែលធ្វើតាម​លំនាំយើង គឺបង្ហាញថា​យើងជោគជ័យ​ឬបរាជ័យ។ ចំណែកនិយមន័យ​ថាធ្វើយ៉ាងណា​អោយល្បីឈ្មោះជារៀងរហូតខ្ញុំចង់ពន្យល់ថា មនុស្ស​ល្បីរហូត​ព្រោះមនុស្ស​ខ្លួនឯង មិនមែនព្រោះបទចម្រៀងដែលគេច្រើន រូបសម្ភស្សដែលគេកែ ឬសាច់រឿង​ដែលគេសរសេរនោះទេ។ ថ្ងៃនេះ​គេចូលចិត្ត​មុខយើង បទចម្រៀង​យើង​សាច់រឿងយើង​ ថ្ងៃស្អែកគេ​អាចឃើញអ្នកថ្មី​ហើយ​ដូរសនិយមនោះទៅតាម​និន្នការសង្គមTrend។ ចំណែកហ្វេន​ពិតរបស់យើង គឺគេ​ចូលចិត្ត​លើសពីនេះ គេចូលចិត្ត​យើង​ដែលជាខ្លួនយើង ហើយ​ការ​ចូលចិត្ត​មួយនេះ គ្មានអ្នកណា​ជំនួសបានទេ ព្រោះយើងមានតែមួយប៉ុណ្ណោះ។ សិល្បករលើលោកជាច្រើន​បាក់ទឹកចិត្ត មាន​ជំងឺផ្លូវចិត្ត​ខ្លះដល់ថ្នាក់លិចលង់ក្នុងសម្ពាធ ពិបាកដកដង្ហើមពិាករស់នៅ ធ្វើអត្តឃាត ក៏​ដោយសារ​ភាពល្បី និងការប្រកួតប្រជែង​អស់ទំាងនេះ។ ចូរកសាងអត្តសញ្ញាណរបស់​យើង ហើយ​សាបព្រោះវា កំណត់ថា​នោះជា​កត្តាជោគជ័យ ចំណែក​ភាពល្បី វាមិនមែន​ជាកម្មសិទ្ធិរបស់អ្នកណាម្នាក់រហូតទេ ធ្វើចិត្ត​ទៅ!

Oknha News ៖ តើបងមានគម្រោង​បង្កើតក្រុមហ៊ុនឬធ្វីអ្វីបន្ថែម​ទៀត គ្រប់គ្នា​គិតថា​បងសម​ជាសហគ្រិនឆ្នើម?

ម៉ីសនសុធារី៖ (សើច) ខ្ញុំនឹងមិនក្លាយជាសហគ្រិនទេ ខ្ញុំជាអ្នកនិពន្ធម្នាក់ ជារៀងរហូតតទៅ នេះជា​អត្តសញ្ញាណ​ដែលខ្ញុំកំណត់យក ហើយ​វាមិនប្រែប្រួល។ ចេញពីនេះ ខ្ញុំកំពុងស្វែងរកការងារធ្វើ ទៀត ក្នុងវិស័យ​បីថ្មីស្រឡាងសម្រាប់ខ្ញុំនោះគឺ ផ្នែក​ហិរញ្ញវត្ថុ អចលនាទ្រព្យ និង​ទេសចរ។ ខ្ញុំកំពុងដាក់ពាក្យ​ហើយ​វិលទៅ​ចាប់ផ្តើម​ការរៀនសូត្រ​លើផ្នែកបីនេះ ហើយ​ខ្ញុំនិងចេញសៀវភៅ​បន្តបន្ទាប់ទាក់ទងនឹងចំណេះ​ទំាងនោះ​ដែលខ្ញុំចាប់បាន។ បើនៅធនាគារ​មួយឆ្នាំ​ខ្ញុំនិងអាចជួយអ្នកអាន​របស់ខ្ញុំអោយដឹងពី ចរាចរណ៍​ពិតបស់លុយ​ក្នុងវិស័យ​ធនាគារ​បរិបទកម្ពុជា។ ខ្ញុំដឹងថាមានចំណេះ​ច្រើនណាស់ដែលខ្ញុំមិនទាន់ចេះ។ហើយ​ខ្ញុំនៅមានពេលសិក្សា។

Oknha News ៖ អ្នកគាំទ្របងពេញចិត្ត​ជាខ្លាំង​លើចំណេះ​ដឹង ទេពកោសល្យ ​ព្រមទំាង​បំណិនជីវិត​ក្នុងលក្ខណៈសម្បត្តិ​របស់បង តើSoft Skillដែលបងចេះនេះ បងរៀន​ពីណាមក? គ្រូឈ្មោះអ្វី?​បរទេសឬខ្មែរ?

ម៉ីសនសុធារី៖ ខ្ញុំរៀនពីមនុស្ស​បីប្រភេទ។ អ្នកក្រដែលខ្ញុំរាប់អាន ពួកគេ​នៅជុំវិញខ្លួនខ្ញុំ បង្រៀនខ្ញុំពីការ​តស៊ូ និង​អត្ថន័យ​នៃខ្លួនទីពឹងខ្លួន ពួកអ្នកមាន​ដែលខ្ញុំជួប ​បង្រៀនខ្ញុំពីសម្ពាធ​និងការថប់បារម្ភ​ដែលពួកគេត្រូវតតាំង​ជាមួយក្នុងសង្គមប្រជែងនិងចក្ខុនិយម សម្ភារៈនិយម ចុងក្រោយ​មនុស្ស​ថ្នាក់កណ្តាល​ដែលបង្រៀន​ខ្ញុំពីរបៀប​រើចេញពីភាពក្រីក្ររបស់ពួកគេ​និងមូលហេតុដែល​មិនអាចក្លាយជាអ្នកមាន​។

Oknha News ៖ មានឧកញ៉ា​ពីរបីនាក់ និយាយថា​បងម៉ីសនសុធារីឆ្មើងឆ្មៃ ពិបាកធ្វើការជាមួយ សូម្បីការងារសរសេរសៀវភៅ ក៏ទាក់ទង​មិនស្រួលកុំថាការងារផ្សេង បងដែលទទួលបានពាក្យរិះគន់​អស់​នេះ?

ម៉ីសនសុធារី៖ ទីមួយ​មកពីពួកគេមិនស្គាល់ខ្ញុំ ទីពីរ​ពួក​គេប្រហែលជួបមនុស្ស​រណេបរណប​ច្រើនពេកហើយ។

Oknha News ៖ សំនួរចុងក្រោយ បើនៅសុខៗមាន​គេទម្លាក់លុយមក៥លានដុល្លារសម្រាប់យកទៅអភិវឌ្ឍន៍​តើបងនឹង​ធ្វើអ្វី?

ម៉ីសនសុធារី៖ ខ្ញុំប្រហែលធ្លាប់គិតថា​ធ្វើម៉េច​នឹងទទួលបានទ្រព្យសកម្ម៥លានដុល្លារ តែបើថា ទទេៗ​ទទួល​បាន៥លានមក ខ្ញុំខ្ចិលគិតណាស់ ។​ខ្ញុំមិនដែលចំណាយពេល​ទៅគិត​ពីអភិនិហារ​ទេ ជីវិត​ខ្ញុំជាជីវិត​ពិត គ្រប់យ៉ាង​ខ្ញុំកសាងវាឡើងមកជាមួយ​ការពិតជាក់ស្តែង។ អរគុណណាស់ សម្រាប់បទសម្ភាសន៍។

​អ្នកនិពន្ធម៉ីសនសុធារី ម្ចាស់សៀវភៅ ពេលវេលា ​ដែល​ទើបនឹង​បោះពុម្ពបីពាន់ក្បាលកាលពីខែមិថុនា ឥឡូវនេះត្រៀម​បញ្ចេញ​ស្តុកថ្មីទៀតហើយ​។ អ្នកស្រីជានិពន្ធនាយិកាដំបូង​ដែលបាន​បង្កើត ​Sabay.com.kh និងអ្នកសារព័ត៌មាន​ឌីជីថលវ័យក្មេងជាច្រើន​លើវិស័យ​សារព័ត៌មាន​នៅកម្ពុជា។

The post អ្នកនិពន្ធល្បីចាកចោលទូរទស្សន៍​ភីអិនអិន appeared first on .

នៅទីបំផុត​តម្រា​ដែលជាកូនពៅគេក្នុងវិស័យអំណាននៅកម្ពុជា​បានប្រារព្ធការជួបជុំជាមូយប្រិយមិត្ត​អ្នកអានរបស់ខ្លួន​កាលពីថ្ងៃអាទិត្យ​ទី១៨ខែសីហានេះ ក៏ជាការបើកសម្ពោធដាក់លក់ ចំណងជើង​ទី​បួន​នៃ​ការបោះពុម្ពផ្សាយ​របស់ខ្លួនមានចំណងជើងថា​ “ស្ទូឌីយោលេខ​៧ ​” ដែល​ជា​ការ​តែង​និពន្ធ​ដោយ ​អ្នកស្រី​ម៉ីសន​សុធារី អ្នកនិពន្ធ​ល្បី​ឈ្មោះ​មួយ​រូប​នៅ​ក្នុង​ប្រទេស​កម្ពុជា។

កញ្ញា ទូចបុប្ផា នាយិកា​តម្រា មានប្រសាសន៍ថា ស្ទូឌីយោលេខ៧ ជា​រឿងប្រលោមលោក​សើបអង្កេត​ដំបូងគេ​​ក្នុងសកម្មភាពបោះពុម្ពផ្សាយ​កន្លងមក​ហើយ​ដែលរឹតតែពិសេស​ទៅទៀត​គឺ​ជាសំណៅដើម​នៃ​សំណុំរឿងឃាតកម្មដំបូង​បង្អស់ក្នុងចំណោមប្រលោមលោកឃាតកម្មធំៗ៤ករណី ស្នាដៃអ្នកនិពន្ធ អ្នកស្រី ម៉ីសន​សុធារី។

នាយិកា​រូបនេះ បានអោយ​ដឹងបន្ថែម​ថា ការ​​ជ្រើសរើសសាចរឿងមួយនេះ​ជាការបើក​ពិធីជួបជុំដំបូង​ជាមួយប្រិយមិត្ត​របស់ខ្លួន  ដោយសារសាច់រឿងមួយនេះមានលក្ខណៈពិសេសឆ្លុះបញ្ចាំងពីសា្នដៃកូនខ្មែរ​តំាងពីទសវត្ស​៩០ដែលអានិពន្ធបាន​នូវ​ប្រលោមលោកប្រដេញប្រកិតបានញឹក​ល្អដែលគេ​ទើបនឹងឃើញ​ម្ភៃឆ្នាំក្រោយមកមាន​ភាពដុះដាលច្រើនឡើង​លើការតាក់តែងបទនិពន្ធប្រភេទនេះ។

ប្រលោមលោក រឿងស្ទូឌីយោលេខ៧ ​ មានចំនួនជាង​មួយរយទំព័រ បោះពុម្ព ​១០០០ច្បាប់គត់​មិនលើសមិនខ្វះ ជាប្រភេទ​ច្បាប់ពិសេសសម្រាប់អ្នកអាន Collector’s Editions គឺមាន​តែអ្នកអាន​ដែលស្រលាញ់រឿងនេះ​ពំផុត​ដែលនឹង​ទិញ​យកទុក។

ដោយ​តម្រាមានគោល​ការណ៍​ព្យាយាម​រក្សាតម្លៃសៀវភៅទំាងអស់​របស់ខ្លួន​អោយនៅត្រឹមតែ​២៥០០០រៀលមិនឡើងមិនចុះ កញ្ញា​ទូចបុប្ភា​អះអាងថា ការបោះពុម្ពនេះ មិនមែន​ដើម្បី​ទទួលបាន​សាច់ប្រាក់ចំណេញ​ឡើយ​ប៉ុន្តែ​ជាការកសាងបណ្តាញ​និងស្លាកសញ្ញាប្រកបដោយគុណតម្លៃមួយ។

«យោងតាមគម្រោង យើងនិងមានអ្វីច្រើន​ទៀត​នៅលើឌីជីថត ហើយ​យើង​ស្វាគមន៍​រាល់ការចូលរួម​ពីផ្នែកឯកជន ក្នុងការ​លើកកំពស់ វប្បធម៌​អាន​និងតែងនិពន្ធនៅកម្ពុជា»

​អ្នកនិពន្ធម៉ីសនសុធារី​ត្រូវបានគេដឹងថា ជាទីប្រឹក្សានៃមាតិកា​នានារបស់គម្រោង​មួយនេះ ហើយ​ក៏ជាអ្នកនិពន្ធដែលមានស្នាដៃ​ជាច្រើន​មកហើយ​មិនថា​ប្រលោមលោកឬសៀវភៅ​បំណិនជីវិត។

អ្នកស្រី​គូសបញ្ជាក់ថា តម្រា គឺជាអ្នកបោះពុម្ពផ្សាយ​ក្មេងខ្ចីក្រោយគេមួយ​ដែល​បានកសាងស្លាកសញ្ញារបស់ខ្លួន​យ៉ាង​ឆាប់រហ័ស ដោយសារតែក្រុមនេះ​មាន​ទស្សនវិស័យ​ច្បាស់ មាន​យុទ្ធសាស្ត្រ​ល្អ និង​មាន​សកម្មភាពរស់រវើក តែ​ច្នៃប្រឌិតមិនច្រំដែល។

អ្នកស្រី​បន្ថែមថា ស្ទូឌីយោលេខ៧ និង​បង្ហាញ​ផ្លូវ​ដល់មនុស្ស​ជំនាន់ថ្មី នូវ​របៀប​តែងនិពន្ធ​នៃ​យុគសម័យ​មួយ​ដែលការអាន​ធ្លាក់ចុះ​ដល់ចំណុច​សូន្យ ព្រោះ​កត្តា​សេដ្ឋកិច្ច ​ហើយមានអ្នកនិពន្ធមួយចំនួន​បាន​ព្យាយាម​ចងក្រង​នូវស្នាដៃ​របស់ពួកគេទំាង​ប្រឈមនិងការលំបាក មិនថា​ប្រភពសម្រាប់ស្រាវជ្រាវ មិនថា មូលដ្ឋាន​កម្លាំងចិត្ត​។

​ប្រលោមលោក​ រឿង​ស្ទូឌីយោ​លេខ៧ បានព័ណ៌នា​អំពី​សភាព​ត្រូវ​ធ្វើឃាតរបស់ពិធីការិនីមួយរូបដែលកំពុង​ផ្សាយផ្ទាល់ ហើយ​ប៉ុន្មាន​ដង្ហើម​ដែលភ្លើ​ងរលត់នាង​ត្រូវបានឃាតករឆក់យកជីវិត។

ចាប់តាំង​ពីទំព័រដំបូង​រហូត​ដល់ចុងបញ្ចប់​អ្នកនិពន្ធ​បានបង្គាប់អោយ​អ្នកអាន​ប្រដេញ​តាមរ​ក​ជនដៃដល់ជាមួយ​ខ្សែតម្រុយជាច្រើន​ប្រទាក់ក្រឡាដានជាន់លើដាន​ពិបាកស្មាន​រកចុងបញ្ចប់។

លោក​អ្នក​ដែល​មាន​បំណង​ចង់​ទទួល​យក​ការចែកចាយ​ដុំនិងរាយ សូម​ទាក់ទង​​តាមរយៈ លេខ​ទូរសព្ទ ០១២៤៧២០០៣។

The post ប្រលោមលោរឿង”ស្ទូឌីយោលេខ៧” ចេញ​លក់ផ្លូវការ​ហើយ appeared first on .