ក្រោយឃើញភាពជោគជ័យរបស់កូនស្រី អ្នកឧកញ៉ា គិត ម៉េង បានបង្ហោះសារដ៏មានអត្ថន័យនៅលើបណ្តាញ​សង្គម នៅថ្ងៃទី៩ ខែមិថុនា ឆ្នាំ២០២៦ បែបនេះថា៖ “សព្វថ្ងៃនេះ នៅក្នុងចិត្តរបស់ខ្ញុំចំពោះកូនស្រីខ្ញុំ ខ្ញុំឃើញ​ដំណាក់កាលបីនៃជីវិតរបស់គាត់៖ ជាក្មេងស្រីតូច ជានារីវ័យក្មេង និងជាមនុស្សធំដែលកំពុងអភិវឌ្ឍខ្លួន។

ប៉ាចាំថា កាលពីកូននៅតូច កូនកាន់ដៃប៉ា កូនសួរសំណួរមកប៉ាជានិច្ច ហើយជារឿយៗកូនផ្លាស់ប្តូរគំនិត​របស់កូនចំពោះអ្វីដែលកូនចង់ធ្វើនាពេលអនាគត។ ពេលវេលាបានកន្លងផុតទៅដោយស្ងប់ស្ងាត់។ ថ្ងៃនេះ កូនឈរនៅចំពោះមុខយើងក្នុងនាមជាសិស្សបញ្ចប់ការសិក្សាថ្នាក់វិទ្យាល័យ ដែលមានទំនុកចិត្ត ឯករាជ្យ និងមានសមត្ថភាព។ ប៉ាមិនត្រឹមតែមានមោទនភាពក្រៃលែងចំពោះសមិទ្ធផលរបស់កូនប៉ុណ្ណោះទេ ប៉ុន្តែប៉ាក៏មានមោទនភាពយ៉ាងខ្លាំងចំពោះកូនដែលបានក្លាយជាមនុស្សមានចិត្តសប្បុរស មានភាពធន់ និងក្លាហាន”។

អ្នកឧកញ៉ា បានបន្តថា ការបញ្ចប់ការសិក្សាផ្តល់ទាំងក្តីរីករាយ និងក្តីបារម្ភសម្រាប់ឪពុកម្តាយគ្រប់រូប។ យើង​អបអរសាទរភាពជោគជ័យរបស់កូនៗយើង ហើយក្នុងពេលជាមួយគ្នានេះ យើងក៏ដឹងដែរថាពួកគេកំពុងពឹង​ផ្អែកលើ​យើងតិចជាងមុន។ ទោះយ៉ាងណា គោលបំណងរបស់ឪពុកម្តាយគឺផ្តល់ឱ្យកូននូវក្តីស្រទ្បាញ់ ការគាំទ្រ សុវត្ថិភាព សេរីភាព និងទំនុកចិត្ត។

«កូនស្រីរបស់ប៉ា អនាគតរបស់កូនគឺពោរពេញដោយកាលានុវត្តភាព។ ទោះកូនទៅទីណា កូនធ្វើអ្វី ឬមានអ្វីកើត​ទ្បើងចំពោះកូន ចូរកូនចាំថាគ្រួសារយើងនឹងនៅតែគាំទ្រ លើកទឹកចិត្ត និងជឿជាក់លើកូនជានិច្ច។ អបអរសាទរ​ការបញ្ចប់ការសិក្សាថ្នាក់វិទ្យាល័យរបស់កូនស្រី ស៊ូណាវីន។ ទំព័រជីវិតរបស់កូនទើបតែចាប់ផ្តើមប៉ុណ្ណោះ ហើយ​មិនថាកូនទៅឆ្ងាយប៉ុនណា ឬពេលវេលាកន្លងផុតទៅរយៈពេលប៉ុន្មាននោះទេ កូននឹងនៅតែជាក្មេងស្រីតូច ដែលកាន់ដៃប៉ា ហើយស្ថិតក្នុងដួងចិត្តរបស់ប៉ាជារៀងរហូត”។ អ្នកឧកញ៉ា បានបន្ថែម។

សូមជម្រាបថា អ្នកឧកញ៉ា គិត ម៉េង និងលោកជំទាវអ្នកឧកញ៉ា ម៉ៅ ចំណាន គិតម៉េង មានបុត្រាបុត្រីចំនួន ៤នាក់គឺ កូនប្រុសច្បង ឧកញ៉ា គិត ស៊ូឡា បច្ចុប្បន្នកំពុងកាន់តួនាទីជា នាយកគ្រប់គ្រងផ្នែកប្រតិបត្តិការ​នៃក្រុមហ៊ុន រ៉ូយ៉ាល់គ្រុប អន្តរជាតិ, កញ្ញា គិត ស៊ូរៀរង្សី, កញ្ញា គិត ស៊ូណាវីន ទេវី និងកូនប្រុសពៅ គិត ស៊ូឡុង៕

The post កូនស្រីអ្នកឧកញ៉ា គិត ម៉េង បញ្ចប់ការសិក្សាថ្នាក់វិទ្យាល័យ ពីសាលាឪពុករបស់ខ្លួន appeared first on .

សភាពាណិជ្ជកម្មកម្ពុជា បានឱ្យដឹងថា កិច្ចប្រជុំនេះមានការអញ្ជើញចូលរួមពីថ្នាក់ដឹកនាំធុរកិច្ច វិនិយោគិន និងតំណាងសហគ្រាសឈានមុខនៃប្រទេសទាំងពីរ ដើម្បីស្វែងយល់ពីឱកាសវិនិយោគ និងពង្រីកបណ្តាញទំនាក់ទំនងដៃគូយុទ្ធសាស្ត្រ។

ថ្លែងក្នុងឱកាសនៃជំនួបនេះ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា បានមានប្រសាសន៍គូសបញ្ជាក់ថា ចំណងមិត្តភាពការទូតរវាងកម្ពុជា និងវៀតណាមដែលបានបង្កើតឡើងតាំងពីឆ្នាំ១៩៦៧ រហូតមកទល់ពេលបច្ចុប្បន្ន បានក្លាយជាកាតាលីករដែលជំរុញប្រទេសទាំងពីរទៅជាដៃគូសេដ្ឋកិច្ចដែលមិនអាចខ្វះបាន។ ក្នុងនោះវៀតណាមគឺជាដៃគូពាណិជ្ជកម្មឈានមុខគេរបស់កម្ពុជានៅក្នុងតំបន់អាស៊ាន។ រដ្ឋាភិបាលប្រទេសទាំងពីបានកំណត់ទិសដៅ ទំហំពាណិជ្ជកម្មទ្វេភាគីកើនដល់ ២០ ពាន់លានដុល្លារ។ ទិសដៅប្រកបដោយសក្តានុពលខ្ពស់នេះ នឹងអាចសម្រេចបានក្នុងរយៈពេលដ៏ខ្លីខាងមុខតាមរយៈកិច្ចសហប្រតិបត្តិការជិតស្និទ្ធ និងការរួមគ្នាកសាងសេដ្ឋកិច្ច។ អ្នកឧកញ៉ា ជំរុញនិងស្នើឱ្យរដ្ឋាភិបាលនៃប្រទេសទាំងពីរ ជួយសម្របសម្រួលនីតិវិធីពាណិជ្ជកម្មឆ្លងដែន និងដំឡើងកម្រិតច្រកទ្វារព្រំដែនទាំងអស់ ទៅជាច្រកទ្វារអន្តរជាតិ។

លោក ង្វៀន ក្វាងវីញ (Nguyen Quang Vinh) អនុប្រធានសភាពាណិជ្ជកម្ម និងឧស្សាហកម្មវៀតណាម បានសម្តែងការអបអរសាទរ និងវាយតម្លៃខ្ពស់ចំពោះទំនាក់ទំនងធុរកិច្ចដ៏ស្អិតរមួតរវាងប្រទេសទាំងពីរ ព្រមទាំងបានបង្ហាញនូវក្តីសង្ឃឹមយ៉ាងមុតមាំលើវិស័យសក្តានុពលជាច្រើនដែលទាមទារឱ្យមានការជំរុញបន្ថែម។ ទន្ទឹមនឹងនេះ លោកបានគូសបញ្ជាក់ពី កិច្ចសហប្រតិបត្តិការល្អប្រសើររវាងសភាពាណិជ្ជកម្ម និង ឧស្សាហកម្មវៀតណាម និងសភាពាណិជ្ជកម្មកម្ពុជា ដែលដើរតួជាស្ពានចម្លងដ៏សំខាន់មួយរវាងសហគមន៍ធុរកិច្ចនៃប្រទេសទាំងពីរ។ លើសពីនេះ លោក ង្វៀន ក្វាង វិញ បានលើកឡើងអំពីវិស័យអាទិភាពសំខាន់ៗចំនួនបីសម្រាប់កិច្ចសហប្រតិបត្តិការទៅថ្ងៃអនាគតរួមមាន៖ ១)ការលើកកម្ពស់ការតភ្ជាប់ទីផ្សារសម្រាប់អ្នកប្រើប្រាស់ផលិតផលវៀតណាមដែលកំពុងរីកចម្រើនយ៉ាងខ្លាំងហូតដល់ទៅជាងមួយរយលាននាក់ ២)ការអភិវឌ្ឍខ្សែច្រវាក់តម្លៃរួមគ្នា និង ៣)ការរៀបចំកម្មវិធីបណ្តុះបណ្តាលរួមគ្នាដើម្បីពង្រឹងសមត្ថភាពសម្រាប់សហគ្រាសធុនតូចនិងមធ្យម។ 

ក្នុងឱកាសនៃកិច្ចប្រជុំនេះ ក៏មានជំនួបពាណិជ្ជកម្មរវាងធុរជន និងវិនិយោគិននៃប្រទេសទាំងពីរ ដោយភាគីទាំងអស់បានពិភាក្សាគ្នាដោយផ្ទាល់ទៅតាមវិស័យសំខាន់ៗ រួមមាន៖

– បច្ចេកវិទ្យា និងឌីជីថល៖ ហេដ្ឋារចនាសម្ព័ន្ធឌីជីថល និងដំណោះស្រាយព័ត៌មានវិទ្យាសហគ្រាស។

– កសិកម្ម និងភស្តុភារកម្ម៖ ការកែច្នៃកសិផលកម្រិតខ្ពស់ និងភស្តុភារកម្មខ្សែច្រវាក់ផ្គត់ផ្គង់។

– ផលិតកម្ម និងឧស្សាហកម្ម៖ ការផលិត ឧស្សាហកម្មធុនធ្ងន់ និងសម្ភារៈឧស្សាហកម្ម។

– អចលនទ្រព្យ៖ ហេដ្ឋារចនាសម្ព័ន្ធ និងការអភិវឌ្ឍគម្រោងសំណង់ធំៗ។

The post អ្នកឧកញ៉ា គិត ម៉េង ថ្លែងគូសបញ្ជាក់ចំណងមិត្តភាពការទូតរវាងកម្ពុជា និងវៀតណាម ខណៈសភាពាណិជ្ជកម្មកម្ពុជា និងសភាពាណិជ្ជកម្ម និងឧស្សាហកម្មវៀតណាម ពង្រឹងទំនាក់ទំនងធុរកិច្ច និងជំរុញកាលានុវត្តភាពវិនិយោគ appeared first on .

ក្នុងឱកាសនៃដំណើរទស្សនកិច្ចនេះ គណៈប្រតិភូសភាពាណិជ្ជកម្មកម្ពុជា នឹងជួបប្រជុំពិភាក្សាការងារជាមួយសភាពាណិជ្ជកម្ម និងឧស្សាហកម្មវៀតណាម ព្រមទាំងរៀបចំជំនួបពាណិជ្ជកម្ម ដើម្បីធុរជននៃប្រទេសទាំងពីរបានជួបពិភាក្សា និងស្វែងរកដៃគូសហការ។

ក្រៅពីនេះ គណៈប្រតិភូសភាពាណិជ្ជកម្មកម្ពុជា នឹងអញ្ជើញធ្វើទស្សនកិច្ចនៅតាមបណ្តាក្រុមហ៊ុនធំៗមួយចំនួន នៅទីក្រុងហាណូយ ជាពិសេសក្នុងវិស័យផលិតគ្រឿងបង្គុំអេឡិចត្រូនិក ព្រមទាំងចូលរួមក្នុងជំនួបពាណិជ្ជកម្មផ្សេងៗទៀត ដើម្បីសិក្សា និងស្វែងរកឱកាសពង្រីកកិច្ចសហប្រតិបត្តិការធុរកិច្ច និងវិនិយោគរវាងប្រទេសទាំងពីរបន្ថែមទៀត៕

The post អ្នកឧកញ៉ា គិត ម៉េង នឹងដឹកនាំគណៈប្រតិភូសភាពាណិជ្ជកម្មកម្ពុជា អមដំណើរសម្តេចធិបតី ហ៊ុន ម៉ាណែត បំពេញទស្សនកិច្ចផ្លូវការ នៅប្រទេសវៀតណាម appeared first on .

កិច្ចពិភាក្សានេះបានប្រព្រឹត្តទៅនៅរាជធានីភ្នំពេញ ក្នុងឱកាសនៃកិច្ចប្រជុំអគ្គនាយកគយអាស៊ានលើកទី៣៥ ក្រោមអធិបតីភាពរបស់ ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកជាអគ្គនាយកនៃ​អគ្គនាយកដ្ឋានគយនិងរដ្ឋាករកម្ពុជា និងជាប្រធានកិច្ចប្រជុំអគ្គនាយកគយអាស៊ានលើកទី៣៥។

សភាពាណិជ្ជកម្មកម្ពុជា បានឱ្យដឹងថា នៅក្នុងកិច្ចប្រជុំនេះ ក្រុមប្រឹក្សាធុរកិច្ចបានដាក់ស្នើនូវឯកសារទស្សនាទាន ដោយផ្តោតលើចំណុចសំខាន់ៗដូចខាងក្រោម៖

 ១. ការសម្រួលនីតិវិធីទំនិញជាប់កម្រិត (Restricted Goods Streamlining): ស្នើលុបបំបាត់ការចុះបញ្ជីស្ទួន ការត្រួតពិនិត្យ និងការដាក់បន្ទុកស្នើសុំអាជ្ញាប័ណ្ណ សម្រាប់ផលិតផលគ្រឿងសំអាង ម្ហូបអាហារ គ្រឿងអេឡិច​ត្រូនិច និងឧបករណ៍វេជ្ជសាស្ត្រ ដែលបានអនុលោមតាមស្តង់ដារបច្ចេកទេសរបស់អាស៊ានរួចរាល់។

 ២. ការធ្វើសាមញ្ញកម្មនីតិវិធីសម្រាប់សហគ្រាសមីគ្រូ សហគ្រាសធុនតូច និងមធ្យម

 ៣.ការធ្វើទំនើបកម្មពាណិជ្ជកម្មតាមប្រព័ន្ធអេឡិចត្រូនិកឆ្លងដែន (Modernized Cross-Border E-Commerce): រៀបចំឱ្យមានសំណុំទិន្នន័យដែលមានភាពស៊ីសង្វាក់គ្នា (Harmonised Data Set) ក៏ដូចជាគំរូប្រមូលពន្ធពីអ្នកលក់ (Vendor-Collection Model)។

 ៤. កាបង្កើតនីតិវិធីលឿនសម្រាប់អាស៊ាន (Express Clearance Lanes): បង្កើតក្របខ័ណ្ឌនីតិវិធីលឿនសម្រាប់​តំបន់ (Regional Express Lane Framework) ក៏ដូចជាការទទួលស្គាល់ប្រតិបត្តិករពាណិជ្ជកម្មតាមប្រព័ន្ធ អេឡិចត្រូនិកឆ្លងដែន (CBEO)។

សូមជម្រាបថា កិច្ចពិភាក្សារវាងក្រុមប្រឹក្សាពិគ្រោះយោបល់ធុរកិច្ចអាស៊ាន និងអគ្គនាយកគយអាស៊ាន គឺជាវេទិកា​ដ៏មានសារៈសំខាន់សម្រាប់ថ្នាក់ដឹកនាំគយនៃប្រទេសជាសមាជិកអាស៊ានទាំងអស់ ក្នុងការជួបពិភាក្សាដោយផ្ទាល់​ជាមួយតំណាងវិស័យឯកជន លើបញ្ហាពាក់ព័ន្ធនឹងកិច្ចសម្រួលពាណិជ្ជកម្ម នីតិវិធីគយ និងការអនុវត្តច្បាប់​ឱ្យកាន់​តែ​មានប្រសិទ្ធភាព៕

The post អ្នកឧកញ៉ា គិត ម៉េង ចូលរួមកិច្ចពិភាក្សារវាងក្រុមប្រឹក្សាពិគ្រោះយោបល់ធុរកិច្ចអាស៊ាន និងអគ្គនាយកគយអាស៊ាន appeared first on .

ឯកឧត្តមនាយឧត្តមសេនីយ៍ យន្ត មីន ប្រធានកិត្តិយសសាខា លោកជំទាវ ឈី​ វ៉ា ប្រធានគណៈកម្មាធិការសាខា សូមថ្លែងអំណរគុណយ៉ាងជ្រាលជ្រៅបំផុតចំពោះ អ្នកឧកញ៉ា គិត ម៉េង ដែលបានបរិច្ចាគថវិកាចំនួន ១០,០០០ដុល្លារ ជូនសាខាកាកបាទក្រហមកម្ពុជាខេត្តកោះកុង ដើម្បីអបអរទិវា ៨ ឧសភា ២០២៦ ក្នុងឱកាស​ខួបទី១៦៣ ទិវាពិភពលោកកាកបាទក្រហម និងអឌ្ឍចន្ទក្រហម ក្រោមប្រធានបទ «បន្តរួមកម្លាំងគ្នា ដើម្បីមនុស្សធម៌»។

សាខាកាកបាទក្រហមកម្ពុជាខេត្តកោះកុង ក៏បានប្រកាសសូមអំពាវនាវចំពោះសម្តេច ឯកឧត្តម លោកជំទាវ អ្នកឧកញ៉ា លោកឧកញ៉ា ឧកញ៉ា លោក លោកស្រី អ្នកនាងកញ្ញា សូមបន្តចូលរួមបរិច្ចាគថវិកា សម្ភារៈ ជូនកាកបាទ​ក្រហមកម្ពុជា ដើម្បីឱ្យសមាគមជាតិមានធនធាន និងលទ្ធភាពគ្រប់គ្រាន់ ក្នុងការបន្តផ្តល់សេវាកម្ម​មនុស្សធម៌​ជួយដល់ជនរងគ្រោះ និងជនងាយរងគ្រោះបំផុត ប្រកបដោយបរិយាប័ន្ន។

សូមជម្រាបថា កាលថ្ងៃទី៦ ខែឧសភា ឆ្នាំ២០២៦ ឧកញ៉ា គិត ស៊ូឡា អគ្គនាយកប្រតិបត្តិ នៃក្រុមហ៊ុន រ៉ូយ៉ាល់គ្រុប អ៊ិនធើណេសិនណល អ្នកឧកញ៉ា ម៉ៅ ចំណាន គិតម៉េង អនុប្រធានក្រុមប្រឹក្សាភិបាល អ្នកនាង គិត ស៊ូណាវីន ទេវី និងអ្នកឧកញ៉ា គិត ម៉េង ប្រធានក្រុមប្រឹក្សាភិបាល និងជាអគ្គនាយក ក៏បាននាំយកថវិកាចំនួន ១.៥៥៥.៥៥៥ ដុល្លារ បរិច្ចាគជូនកាកបាទក្រហមកម្ពុជា ក្រោមអធិបតីភាពលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្ត្រៃយ៍ កាកបាទក្រហមកម្ពុជាផងដែរ៕

The post អ្នកឧកញ៉ា គិត ម៉េង បរិច្ចាគថវិកា ១០,០០០ដុល្លារ ជូនសាខាកាកបាទក្រហមកម្ពុជាខេត្តកោះកុង appeared first on .

គិតត្រឹមខែមេសា ឆ្នាំ២០២៦នេះ សកម្មភាពនាំចេញពីក្នុងតំបន់សេដ្ឋកិច្ចពិសេសទាំងពីរ ក៏បានបង្ហាញពីកំណើន​ដ៏វិជ្ជមាន​។ ការនាំចេញសរុបចាប់ពីខែមករា ដល់ខែមេសា ឆ្នាំ២០២៦ មានទំហំទឹកប្រាក់រហូតដល់ទៅ ៨០៩.០២លានដុល្លារអាមេរិក កើនឡើងពីចំនួន ៥៧៩.៨៨ លានដុល្លារអាមេរិក ដែលបានកត់ត្រាក្នុងរយៈពេល​ដូចគ្នាកាលពីឆ្នាំ២០២៥ ដែលតួលេខនេះ បង្ហាញពីកំណើនប្រមាណ ៣៩.៥%។

លទ្ធផលវិជ្ជមាននេះបង្ហាញពីភាពធន់ និងសមត្ថភាពប្រកួតប្រជែងរបស់វិនិយោគិនអ្នកផលិត ដែលកំពុងដំណើរ​ការនៅក្នុងតំបន់ទាំងពីរ ជាពិសេសចំពេលដែលមានការប្រឈមនឹងឧបសគ្គ នៃបញ្ហាសេដ្ឋកិច្ចក្នុងតំបន់ និងសកល​លោកនាពេលបច្ចុប្បន្ន។

អ្នកឧកញ៉ា គិត ម៉េង ប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក បានលើកឡើងថា «កំណើនជាបន្តបន្ទាប់នៃតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ និង រ៉ូយ៉ាល់ គ្រុប កណ្ដាល ឆ្លុះបញ្ចាំងពី​ទំនុកចិត្តយ៉ាងមុតមាំរបស់វិនិយោគិន ចំពោះអនាគតសេដ្ឋកិច្ចរបស់កម្ពុជា និងការប្ដេជ្ញាចិត្តរបស់ភាគី​ពាក់ព័ន្ធ​ទាំងអស់ ក្នុងការធ្វើការរួមគ្នា ដើម្បីពង្រឹងប្រព័ន្ធអេកូឡូស៊ីឧស្សាហកម្មរបស់ប្រទេស យើងខ្ញុំនៅតែបន្តប្ដេជ្ញាចិត្ត​ក្នុងការគាំទ្រដល់ការវិនិយោគ ប្រកបដោយនិរន្តរភាព ការបង្កើតការងារ និងការអភិវឌ្ឍសេដ្ឋកិច្ចរយៈពេល​វែង​សម្រាប់ប្រទេសកម្ពុជា»៕

The post តំបន់សេដ្ឋកិច្ចពិសេសទាំងពីររបស់អ្នកឧកញ៉ា គិត ម៉េង បង្ហាញកំណត់ត្រានាំចេញកើនដល់ជាង ៨០០លានដុល្លារ នៅ៤ខែដំបូង ឆ្នាំ២០២៦នេះ appeared first on .

ពិធីសម្ពោធនេះ មានការអញ្ជើញចូលរួមពី លោកអ្នកឧកញ៉ា អ្នកឧកញ៉ា ឧកញ៉ាៗជាច្រើនរូបរួមមាន អ្នកឧកញ៉ា គិត ម៉េង លោកអ្នកឧកញ៉ា លាង ឃុន លោកអ្នកឧកញ៉ា លី ហួរ អ្នកឧកញ៉ា ម៉ុង ឫទ្ធី អ្នកឧកញ៉ា សំ អាង និងលោកជំទាវ​អ្នកឧកញ៉ា អ្នកឧកញ៉ា ថៃ ជាហួត អ្នកឧកញ៉ា អ៊ាន អេឡែន អ្នកឧកញ៉ា លី ឃុនថៃ អ្នកឧកញ៉ា សំ សុខនឿន ឧកញ៉ា តាន់ មុនីវណ្ណ ឧកញ៉ា ស៊ិន ចន្ធី ព្រមទាំងអ្នកឧកញ៉ា ឧកញ៉ាៗ និងភ្ញៀវកិត្តិយសជាច្រើនរូប​ទៀត។

សម្តេចធិបតី ហ៊ុន ម៉ាណែត បានគូសបញ្ជាក់ថា កម្ពុជាសម្រេចបានកំណើនសេដ្ឋកិច្ចរឹងមាំ និងមានកំណើន​ចំណូល​ពន្ធបានល្អប្រសើរ​។ ការវិវត្តជាវិជ្ជមាននេះ តម្រូវឱ្យមានការពង្រីក និងពង្រឹងហេដ្ឋារចនាសម្ព័ន្ធ ព្រមទាំងការអភិវឌ្ឍធនធានមនុស្ស ដើម្បីឆ្លើយតបនឹងទំហំការងារ និងនិរន្តរភាពជាតិ ជាក់ស្តែងសមិទ្ធផល​អគារទីស្នាក់ការកណ្ដាលនៃអគ្គនាយកដ្ឋានពន្ធដារត្រូវបានសាងសង់ដើម្បីដោះស្រាយបញ្ហាប្រឈម និងដើម្បីអាចគាំទ្រដល់ការប្រមូលចំណូល ការផ្ដល់សេវាជូនអ្នកជាប់ពន្ធ និងការបន្តកែទម្រង់រដ្ឋបាល សារពើពន្ធឱ្យកាន់តែមានភាពទំនើប វិជ្ជាជីវៈខ្ពស់ និងឆ្លាតវៃ ស្របតាមឧត្តមានុវត្តន៍ជាអន្តរជាតិ៕

The post លោកអ្នកឧកញ៉ា អ្នកឧកញ៉ា ឧកញ៉ាៗច្រើនរូប ចូលរួមពិធីសម្ពោធដាក់ឱ្យប្រើប្រាស់ជាផ្លូវការ អគារទីស្នាក់ការកណ្តាលថ្មី​នៃអគ្គនាយកដ្ឋានពន្ធដារ appeared first on .

តាមរយៈបណ្តាញសង្គមហ្វេសប៊ុក នៅថ្ងៃទី១៩ ខែឧសភា អ្នកឧកញ៉ាបានលើកឡើងថា មនុស្សភាគច្រើនចង់​បានទ្រព្យសម្បត្តិឆាប់រហ័ស ប៉ុន្តែការពិត ទ្រព្យសម្បត្តិពិតប្រាកដមិនអាចរកបានក្នុងមួយពព្រិចភ្នែកនោះទេ។ ភោគទ្រព្យពិតប្រាកដត្រូវបានកសាងឡើងដោយភាពស្ងប់ស្ងាត់ ភាពជាប់លាប់ និងពេលវេលាបន្តិចម្តងៗ។

អ្នកគួរប្រើពេលវេលាឱ្យមានអត្ថប្រយោជន៍ ដែលមនុស្សដទៃមិនងាយមើលឃើញភ្លាម មិនមែនរំពឹងលើសំណាង ហើយក៏មិនប្រើវិធីផ្លូវកាត់នោះទេ គឺប្រើពេលវេលា។

១. បង្កើនប្រាក់ចំណូលរបស់អ្នកយឺតៗ។ អ្នកអាចចាប់ផ្តើមជាមួយនឹងប្រាក់ខែគោល។ អ្នកធ្វើឱ្យប្រសើរទ្បើង​នូវទំនាក់ទំនងរបស់អ្នក គំនិតរបស់អ្នក និងភាពជាអ្នកដឹកនាំរបស់អ្នក។ អ្នកធ្វើឱ្យជំនាញរបស់អ្នកប្រសើរ​ទ្បើងម្តងមួយៗ មិនមែនជំនាញទាំងអស់ក្នុងពេលតែមួយនោះទេ។ ក្នុងរយៈពេល៣ទៅ៥ឆ្នាំ សកម្មភាពប្រសើរ​ទ្បើង​បន្តិចម្តងៗទាំងនេះនឹងនាំឱ្យមានការដំទ្បើងមុខតំណែង និងប្រាក់ចំណូលខ្ពស់ជាងមុន។ សមិទ្ធផលនេះកើត​មានដោយសារការធ្វើឱ្យប្រសើរទ្បើងដោយភាពជាក់លាប់ និងមានស្ថិរភាព មិនមែនដោយសារព្រឹត្តិការណ៍សំណាង ឬអស្ចារ្យណាមួយនោះទេ។

២. ទិញរបស់របរមានអត្ថប្រយោជន៍ដល់អ្នក ជំនួសឱ្យរបស់របរមានតម្លៃ“ថ្លែខ្ពស់”

ជំនួសឱ្យការប្រញាប់ប្រញាល់ទិញរថយន្តប្រណីត អ្នកអាចវិនិយោគលើរបស់របរដែលជួយអ្នកឱ្យរកលុយបាន ដូចជា កុំព្យូទ័រយួរដៃល្អ វគ្គបណ្តុះបណ្តាល ទូរសព្ទដែលជួយអ្នកឱ្យធ្វើការបានលឿនជាងមុន។ របស់ទាំងនេះ​មើលទៅមិនឆើតឆាយនោះទេ ប៉ុន្តែយូរៗទៅ ឧបករណ៍ទាំងនេះជួយអ្នកឱ្យរកប្រាក់ចំណូលបានកាន់តែច្រើន។

៣. កសាងកេរ្តិ៍ឈ្មោះរបស់អ្នកឱ្យគេស្គាល់

ការចែករំលែកទស្សនៈមានតម្លៃរបស់អ្នកនៅលើបណ្តាញសង្គមរៀងរាល់សប្តាហ៍ មើលទៅហាក់ដូចជាតូចតាច ប៉ុន្តែមួយឆ្នាំក្រោយមក មនុស្សជាច្រើនអាចទុកចិត្តលើគំនិតរបស់អ្នក។ ពីរឆ្នាំក្រោយមកទៀត ឱកាសនឹងមក​ដល់​សម្រាប់អ្នក ដូចជា អតិថិជន ការអញ្ជើញអ្នកឱ្យធ្វើជាវាគ្មិន ភាពជាដៃគូ។ ការបង្ហាញឱ្យជាប់លាប់នូវទស្សនៈ ឬជំនាញរបស់អ្នកនឹងធ្វើឱ្យមនុស្សជាច្រើនចាប់អារម្មណ៍ ហើយចំណាប់អារម្មណ៍នេះ​ប្រែក្លាយទៅជាចំណូល​សម្រាប់អ្នក។

មនុស្សភាគច្រើនឱ្យតម្លៃខ្ពស់ពេកចំពោះអ្វីដែលពួកគេអាចសម្រេចបានក្នុងរយៈពេល១ឆ្នាំ ប៉ុន្តែមើលស្រាលអ្វីដែល​ពួកគេ​អាចបង្កើតបានក្នុងរយៈពេល១០ឆ្នាំ។ ដូច្នេះ សូមកុំប្រញាប់ប្រញាល់ កុំប្រៀបធៀប កុំភ័យស្លន់ស្លោ នៅពេលដែលវឌ្ឍនភាពរបស់អ្នកហាក់យឺតបន្តិច។

អ្នកឧកញ៉ា គិត ម៉េង បានគូសបញ្ជាក់បន្ថែមថា សូមចាប់ផ្តើមសកម្មភាពតូចៗនៅពេលនេះ ដោយផ្តោតម្តងមួយៗ​លើជំនាញ ការវិនិយោគ និងការធ្វើអ្វីមួយឱ្យប្រសើរទ្បើង ពីព្រោះនៅពេលដែលអ្នកប្រើពេលវេលាបន្តិចម្តងៗ​ដើម្បីសម្រេចគោលដៅរបស់អ្នក ការខិតខំទាំងអស់របស់អ្នកនឹងផ្តល់ឱ្យអ្នកមកវិញនូវភោគទ្រព្យ៕

The post អ្នកឧកញ៉ា គិត ម៉េង ចែករំលែកគន្លឹះ ក្នុងការកសាងទ្រព្យសម្បត្តិពិតប្រាកដ appeared first on .

WCFO ជាក្រុមហ៊ុនផលិតខ្សែអុបទិកស្តង់ដារអន្តរជាតិមួយ ដែលផលិត និងនាំចេញផលិតផលមានគុណភាពខ្ពស់​ទៅកាន់ទីផ្សារធំៗដូចជា ជប៉ុន និងសហរដ្ឋអាមេរិក។ ក្រុមហ៊ុន WCFO បានជ្រើសរើសប្រទេសកម្ពុជា ជាមូលដ្ឋាន​ផលិតកម្មក្រៅប្រទេសដំបូងរបស់ខ្លួននៅឆ្នាំ២០២០ និងបានចាប់ផ្តើមផលិតកម្មក្នុង RGPPSEZ ជាមួយរោងចក្រ​ជួល ហើយក៏បានពង្រីកអាជីវកម្មជាបន្តបន្ទាប់ ឈានដល់ការសាងសង់រោងចក្រផ្ទាល់ខ្លួននៅក្នុង RGPPSEZ តែម្តង។

តំបន់​សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ (RGPPSEZ) ក៏បានជូនពរឱ្យក្រុមហ៊ុន WCFO ទទួលបានជោគជ័យ និងសង្ឃឹមថានឹងបានឃើញភាពរីកចម្រើនបន្ថែមទៀតនាពេលអនាគត។

សូមជម្រាបថា តំបន់​សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ ជាអ្នករួមចំណែកដ៏សំខាន់មួយ ចំពោះការ​បង្កើតឱកាសការងារ និងការអភិវឌ្ឍសេដ្ឋកិច្ចសង្គម នៅក្នុងប្រទេសកម្ពុជា។ គិតត្រឹមខែកុម្ភៈ ឆ្នាំ២០២៦ តំបន់សេដ្ឋកិច្ចពិសេសនេះ ផ្ដល់ឱកាសការងារដល់កម្មករ កម្មការិនីចំនួន ៥៥ ៩៣៥នាក់ ដែលគាំទ្រដល់ជីវភាព​រស់នៅ និងរួមចំណែកដល់ការអភិវឌ្ឍកម្លាំងពលកម្មជំនាញ៕

The post ក្រុមហ៊ុនផលិតខ្សែអុបទិក WCFO បើកការដ្ឋានសាងសង់អគារថ្មី ក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ របស់អ្នកឧកញ៉ា គិត ម៉េង appeared first on .

ក្នុងខ្លឹមសារលិខិតជូនពរ អ្នកឧកញ៉ាប្រធានសភាពាណិជ្ជកម្មកម្ពុជា បានលើកឡើងថា សូមគោរពជូនពរ ឯកឧត្តមឧបនាយករដ្ឋមន្ត្រី សូមមាន សុខភាពល្អបរិបូណ៌ កម្លាំងពលាំងមាំមួន បញ្ញាឈ្លាសវ និងអាយុយឺនយូរ ដើម្បីបន្តបេសកម្មដ៏ឧត្តុង្គឧត្តម ក្នុងការដឹកនាំក្រសួងរៀបចំដែនដី នគរូបនីយកម្ម និងសំណង់ ឱ្យ កាន់តែរីកចម្រើន និងជោគជ័យនូវសមិទ្ធិផលធំៗបន្ថែមទៀត។

ឆ្លៀតក្នុងឱកាសដ៏វិសេសវិសាលនេះ យើងខ្ញុំសូមគោរពកោតសរសើរដោយស្មោះចំពោះ ឯកឧត្តមឧបនាយក រដ្ឋមន្ត្រី ដែលបានលះបង់អស់កម្លាំងកាយ និងប្រាជ្ញាស្មារតី ដោយមិនខ្លាចនឿយហត់ ដើម្បីជាឧត្តមប្រយោជន៍​ដល់ជាតិ មាតុភូមិ និងប្រជាពលរដ្ឋនៃព្រះរាជាណាចក្រកម្ពុជា។

យើងខ្ញុំជឿជាក់យ៉ាងមុតមាំថា ឯកឧត្តមឧបនាយករដ្ឋមន្តី នឹងបន្តចូលរួមចំណែកក្នុងការអភិវឌ្ឍប្រទេសជាតិឱ្យ​កាន់តែរីក​ចម្រើនរុងរឿងបន្ថែមទៀត ក្រោមមាគ៌ាដឹកនាំដ៏ថ្លៃថ្លា ប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ជាថ្មីម្តងទៀត យើងខ្ញុំទាំងអស់គ្នា សូមបួងសួងដល់វត្ថុស័ក្តិសិទ្ធិក្នុងលោក សូមប្រោះព្រំប្រសិទ្ធពរជ័យ ជូនដល់ ឯកឧត្តមឧបនាយករដ្ឋមន្ត្រី និង លោកជំទាវ ព្រមទាំងក្រុមគ្រួសារជាទីស្រឡាញ់ សូមបានប្រកបនូវពុទ្ធពរ ទាំងបួនប្រការគឺ អាយុ វណ្ណៈ សុខៈ ពលៈ ជានិច្ចនិរន្តរ៍។

The post អ្នកឧកញ៉ា គិត ម៉េង ផ្ញើសារលិខិតជូនពរ ឯកឧត្តមបណ្ឌិត សាយ សំអាល ឧបនាយករដ្ឋមន្ត្រី ក្នុងឱកាសខួបកំណើត appeared first on .