នៅលើបណ្តាញសង្គម នាថ្ងៃទី៦ ខែកញ្ញា ឆ្នាំ២០២៦ លោកជំទាវអ្នកឧកញ៉ា បានលើកឡើងបែបនេះថា៖ “ក្នុងនាមជាម្តាយ ម៉ាក់ចង់ឱ្យកូនធំឡើងដោយយល់ថា ចិត្តល្អរបស់កូន មិនមានន័យថាកូនត្រូវយល់ព្រមគ្រប់រឿងនោះទេ។ កូនអាចយកចិត្តទុកដាក់ចំពោះអ្នកដទៃ ហើយនៅតែចេះកំណត់ព្រំដែនសម្រាប់ខ្លួនឯង។ កូនអាចគោរពអ្នកដទៃ ហើយនៅតែហ៊ានការពារខ្លួនឯង។ កូនអាចស្រឡាញ់អ្នកដទៃ ដោយមិនបាត់បង់ខ្លួនឯង”។

“ម៉ាក់ក៏ចង់រំឭកកូនថា តម្លៃរបស់កូនមិនគួរអាស្រ័យលើតំណែង សមិទ្ធផល ឬការទទួលស្គាល់ពីអ្នកដទៃនោះទេ។ ក្នុងដំណើរជីវិតរបស់កូន កូននឹងជួបមនុស្ស ដែលនឹងមានការរំពឹងទុកចង់ឱ្យកូនក្លាយជាមនុស្សបែបណាមួយ ប៉ុន្តែម៉ាក់សង្ឃឹមថា កូននឹងមានភាពក្លាហានក្នុងការស្តាប់ខ្លួនឯង និងជ្រើសរើសជីវិតដែលកូនគិតថាស័ក្តិសមសម្រាប់ខ្លួនឯង”។ លោកជំទាវអ្នកឧកញ៉ា បានបន្ត។

លោកជំទាវអ្នកឧកញ៉ា បានបន្ថែមថា លោកជំទាវមិនអាចសម្រេចចិត្តគ្រប់យ៉ាងជំនួសកូន ឬការពារកូនពីគ្រាលំបាកៗក្នុងជីវិតបានទេ ប៉ុន្តែលោកជំទាវអាចផ្តល់គុណតម្លៃឱ្យកូនយកតាមខ្លួនបាន ក្នុងនោះរួមមាន ការមានចិត្តល្អ ស្គាល់តម្លៃរបស់ខ្លួនឯង ហើយកុំខ្លាចក្នុងការជ្រើសរើសអ្វីដែលល្អសម្រាប់ខ្លួនឯង នៅពេលដែលចាំបាច់។

សូមជម្រាបថា អ្នកឧកញ៉ា គិត ម៉េង និងលោកជំទាវអ្នកឧកញ៉ា ម៉ៅ ចំណាន គិតម៉េង មានបុត្រាបុត្រីចំនួន ៤នាក់រួមមាន កូនប្រុសច្បង ឧកញ៉ា គិត ស៊ូឡា, កូនប្រុសពៅ គិត ស៊ូឡុង និងកូនស្រីចំនួនពីររូបគឺ កញ្ញា គិត ស៊ូរៀរង្សី និងកញ្ញា គិត ស៊ូណាវីន ទេវី៕

The post លោកជំទាវអ្នកឧកញ៉ា ម៉ៅ ចំណាន គិតម៉េង ផ្តល់ដំបូន្មានប្រកបដោយអត្ថន័យ ជូនដល់កូនស្រីទាំងពីរ appeared first on .

សមាគមសិល្បករខ្មែរ បានឱ្យដឹងថា តាមរយៈ​កិច្ចសហប្រតិបត្តិការនេះ បាន​ស្តែងឱ្យឃើញពីការប្តេជ្ញាចិត្តរួមគ្នាក្នុងការគាំទ្រដល់សិល្បករខ្មែរ ដោយការពង្រីកវិសាលភាព​នៃការទទួលបានកិច្ចការពារធានារ៉ាប់រងអាយុជីវិត ការលើកកម្ពស់ចំណេះដឹងផ្នែកហិរញ្ញវត្ថុ និងការលើកទឹកចិត្តឱ្យមានការរៀបចំផែនការហិរញ្ញវត្ថុក្នុងរយៈពេលវែង។ តាមរយៈកិច្ចសហការនេះ ស្ថាប័នទាំងពីរមានគោលបំណងជួយសិល្បករ និងគ្រួសាររបស់ពួកគាត់ក្នុងការពង្រឹងផ្នែកហិរញ្ញវត្ថុឱ្យកាន់តែរឹងមាំ ខណៈពេលដែលពួកគាត់បន្តចូលរួមចំណែកដល់បេតិកភណ្ឌវប្បធម៌ដ៏សម្បូរបែបរបស់កម្ពុជា។

តាមរយៈកិច្ចព្រមព្រៀងនេះ ក្រុមហ៊ុន រ៉ូយ៉ាល់គ្រុប ឡាយហ្វ៍ អ៊ីនសួរេន និងសមាគមសិល្បករខ្មែរ នឹងសហការរួមគ្នាដើម្បី៖

– បង្កើនការយល់ដឹងអំពីសារៈសំខាន់នៃសេវាធានារ៉ាប់រងអាយុជីវិត និង លើកកម្ពស់ចំណេះដឹងផ្នែកហិរញ្ញវត្ថុ ដើម្បីជួយសិល្បករ និងក្រុមគ្រួសាររបស់ពួកគាត់។

– ផ្តល់ជូននូវដំណោះស្រាយធានារ៉ាប់រងអាយុជីវិត ប្រកបដោយភាពងាយស្រួល និងសមស្របតាមតម្រូវការរបស់សមាជិកសមាគមសិល្បករខ្មែរ។

– អភិវឌ្ឍគំនិតផ្តួចផ្តើមផ្តាច់មុខ សម្រាប់សមាជិកនៃសមាគមសិល្បករខ្មែរ តាមរយៈកម្មវិធីណែនាំបន្ត (Referral Program) ដែលបង្កើតឡើងដោយក្រុមហ៊ុន រ៉ូយ៉ាល់គ្រុប ឡាយហ្វ៍ អ៊ីនសួរេន និងសមាគមសិល្បករខ្មែរ ដែលជាផ្នែកមួយនៃការប្តេជ្ញាចិត្តរួមគ្នាក្នុងការការពារផែនការហិរញ្ញវត្ថុសម្រាប់ក្រុមគ្រួសារកម្ពុជា។

លោក អ៊ុត សឿង អគ្គនាយកក្រុមហ៊ុន រ៉ូយ៉ាល់គ្រុប ឡាយហ្វ៍ អ៊ីនសួរេន ម.ក បានមានប្រសាសន៍ថា៖ “សិល្បករ គឺជាបេះដូងនៃវប្បធម៌កម្ពុជា។ តាមរយៈគំនិតច្នៃប្រឌិត និងការលះបង់របស់ពួកគាត់ដែលបានថែរក្សាប្រពៃណី បំផុសគំនិតល្អៗ និងបង្កើតអត្តសញ្ញាណជាតិរបស់យើង។ ក្រុមហ៊ុន រ៉ូយ៉ាល់គ្រុប ឡាយហ្វ៍ អ៊ីនសួរេន យើងជឿជាក់ថា ពួកគាត់គឺសក្តិសមទទួលបានការការពារផ្នែកហិរញ្ញវត្ថុ ក៏ដូចជាភាពកក់ក្តៅក្នុងចិត្ត។ កិច្ចព្រមព្រៀងដៃគូនេះ ស្តែងឱ្យឃើញពីការប្តេជ្ញាចិត្តរបស់យើងក្នុងការធ្វើឱ្យសេវាធានារ៉ាប់រងអាយុជីវិតកាន់តែងាយស្រួល ព្រមទាំងគាំទ្រដល់សុខុមាលភាពរយៈពេលវែងជូនសិល្បករខ្មែរ និងគ្រួសាររបស់ពួកគាត់”៕

The post លោកជំទាវអ្នកឧកញ៉ា ម៉ៅ ចំណាន គិតម៉េង ចុះ MoU ជាមួយ​ក្រុមហ៊ុន រ៉ូយ៉ាល់គ្រុប ឡាយហ្វ៍ អ៊ីនសួរេន ម.ក ប្រកាស​ផ្តល់សេវាធានារ៉ាប់រង​អាយុជីវិតដល់សិល្បករខ្មែរ appeared first on .

នៅលើបណ្តាញសង្គមហ្វេសប៊ុក លោកជំទាវអ្នកឧកញ៉ា បានបង្ហោះវីដេអូឃ្លីបភ្ជាប់ជាមួយសារបែបនេះថា៖ “រៀងរាល់ឆ្នាំ នៅថ្ងៃខួបកំណើតរបស់បង អូនតែងតែគិតថា តើអូនអាចជូនពរអ្វីដល់បងបន្ថែមទៀត បើក្តីប្រាថ្នារបស់អូននៅតែដដែល គឺសូមឱ្យបងមានសុខភាពល្អ មានសុភមង្គល និងមានពេលវេលាច្រើនជាងមុន ដើម្បីរីករាយជាមួយជីវិតដែលយើងបានកសាងជាមួយគ្នា។

ពីមួយឆ្នាំទៅមួយឆ្នាំ អូនកាន់តែយល់ថា ពេលវេលាដើរលឿនប៉ុណ្ណា។ កូនៗរបស់យើងក៏កាន់តែធំឡើង សក់របស់យើងក៏ចាប់ផ្តើមមានពណ៌សបន្តិចម្តងៗ ហើយពេលវេលាធម្មតាៗដែលយើងមិនសូវចាប់អារម្មណ៍ បែរជាក្លាយជាពេលវេលាដែលអូនឱ្យតម្លៃ និងចងចាំបំផុត។

ដូច្នេះ ឆ្នាំនេះ ក្តីប្រាថ្នារបស់អូនគឺសាមញ្ញបំផុត។ អូនសូមឱ្យពួកយើងនៅមានពេលវេលាជាច្រើនឆ្នាំទៀត ដើម្បីមើលកូនៗរបស់យើងធំឡើង ដើរលេងជាមួយគ្នា, ធ្វើអ្វីដែលមានអត្ថន័យសម្រាប់សង្គម និងប្រទេសជាតិរបស់ពួកយើងជាមួយគ្នា, ប្រកែកគ្នារឿងតូចតាច ហើយនៅតែអាចត្រឡប់មកសើចជាមួយគ្នាវិញដូចរាល់ដង។

រីករាយថ្ងៃខួបកំណើតបងសម្លាញ់! លើសពីពាក្យជូនពរទាំងអស់ដែលអូនអាចនិយាយនៅថ្ងៃនេះ អ្វីដែលអូនចង់ឱ្យបងដឹងបំផុត គឺមិនថាជីវិតបាននាំពួកយើងឆ្លងកាត់គ្រាបែបណាក៏ដោយ យើងនៅតែនៅក្បែរគ្នា ហើយស្រលាញ់គ្នាច្រើនជាងមុន”។

សូមជម្រាបថា អ្នកឧកញ៉ា គិត ម៉េង គឺជាអ្នកជំនួញដ៏ធំប្រចាំកម្ពុជា និងជាប្រធានសភាពាណិជ្ជកម្មកម្ពុជា ក៏ដូចជាប្រធានក្រុមហ៊ុន The Royal Group ដែលមានក្រុមហ៊ុនចំណុះជិត ៣០ក្រុមហ៊ុន។ អ្នកឧកញ៉ា គិត ម៉េង និងលោកជំទាវអ្នកឧកញ៉ា ម៉ៅ ចំណាន គិតម៉េង មានបុត្រាបុត្រីចំនួន ៤នាក់គឺ កូនប្រុសច្បង ឧកញ៉ា គិត ស៊ូឡា បច្ចុប្បន្នកំពុងកាន់តួនាទីជា អគ្គនាយករង​នៃក្រុមហ៊ុន រ៉ូយ៉ាល់គ្រុប, កញ្ញា គិត ស៊ូរៀរង្សី, កញ្ញា គិត ស៊ូណាវីន ទេវី និងកូនប្រុសពៅ គិត ស៊ូឡុង៕

The post លោកជំទាវអ្នកឧកញ៉ា ម៉ៅ ចំណាន គិតម៉េង ផ្ញើសារដ៏ផ្អែមល្ហែមក្នុងឱកាសខួបកំណើតរបស់ អ្នកឧកញ៉ា គិត ម៉េង appeared first on .

សមាគមសិល្បករខ្មែរ បានឱ្យដឹងថា នេះជាការបត់បែន និងទស្សនវិស័យថ្មីសម្រាប់សិល្បករខ្មែរ ដើរឱ្យទាន់​សម័យកាល ក្នុងនោះលោកជំទាវអ្នកឧកញ៉ា ម៉ៅ ចំណាន គិតម៉េង បានគូសបញ្ជាក់ថា ក្រៅពីភារកិច្ចអភិរក្ស និងលើកកម្ពស់វប្បធម៌ សិល្បករត្រូវតែ «ដើរឱ្យទាន់របត់ពិភពលោក និងបច្ចេកវិទ្យាសកល» ដោយចាប់យកបំនិន​ជីវិតថ្មីផ្នែកហិរញ្ញវត្ថុ ដើម្បីបង្កើតប្រភពចំណូលអកម្មបន្ថែម។

ម្យ៉ាងទៀត នេះជាខែលការពារសិល្បករពីការឆបោក ព្រោះការបណ្តុះបណ្តាលនេះជួយឱ្យសិល្បករ​យល់ដឹងពី​ការគ្រប់គ្រងហានិភ័យ និងការវិនិយោគត្រឹមត្រូវ ដើម្បីចៀសវាងពីការឆបោកហិរញ្ញវត្ថុផ្សេងៗ។ សិល្បករ-សិល្បការិនី នឹងប្រើប្រាស់ឥទ្ធិពល និងបណ្តាញសង្គម (Followers) របស់ខ្លួន ដើម្បីចែករំលែកចំណេះដឹង​ហិរញ្ញវត្ថុដ៏ត្រឹមត្រូវនេះ បន្តទៅកាន់សាធារណជន និងអ្នកគាំទ្រ។

ការទទួលបានអត្ថប្រយោជន៍ផ្ទាល់ៗរបស់សិល្បករ នៅក្នុងព្រឹត្តិការណ៍នេះ សិល្បករ-សិល្បការិនីទាំងអស់ដែល​បានចូលរួម ទទួលបាននូវកញ្ចប់ប្រយោជន៍ភ្លាមៗសម្រាប់ការអនុវត្តជាក់ស្តែង រួមមាន៖ លេខអត្តសញ្ញាណ​វិនិយោគិន (Investor ID) ដោយសេរី និងមិនគិតថ្លៃ, គណនីជួញដូរភាគហ៊ុន បើកជូនដោយឥតគិតថ្លៃ, ភាគហ៊ុនចំនួន ៥ ភាគហ៊ុន (ក្រុមហ៊ុន Cellcard / CAM GSM) ស្មើនឹងទឹកប្រាក់ ១៥,០០០ រៀល ដើម្បីសាកល្បងទិញ-លក់ក្នុងទីផ្សារជាក់ស្តែង។

ឯកឧត្តម ស៊ូ សុជាតិ (អគ្គនាយក ន.ម.ក.) បានមានប្រសាសន៍សង្កត់ធ្ងន់ថា៖ «សិល្បៈបង្កើតតម្លៃតាម​រយៈ​ទេពកោសល្យ និងការច្នៃប្រឌិត ខណៈការវិនិយោគបង្កើតតម្លៃតាមរយៈចក្ខុវិស័យ។ សិល្បករគឺជាបុគ្គលមាន​ឥទ្ធិពលលើការគិតរបស់សាធារណជន ក្នុងការបណ្តុះវប្បធម៌វិនិយោគនៅកម្ពុជា»។

ឯកឧត្តមបន្តថា សិល្បករ និងសិល្បការិនី គឺជាបុគ្គលមានឥទ្ធិពលលើការគិត និងអាកប្បកិរិយារបស់សាធារណជន ដូច្នេះការចូលរួមរបស់ពួកគេនឹងជួយផ្សព្វផ្សាយចំណេះដឹងហិរញ្ញវត្ថុ ពង្រឹងទំនុកចិត្តលើទីផ្សារមូលបត្រ និងរួម​ចំណែកកសាងវប្បធម៌វិនិយោគប្រកបដោយចំណេះដឹង ដែលជាមូលដ្ឋានសម្រាប់ការអភិវឌ្ឍវិស័យមូលបត្រ និងកំណើនសេដ្ឋកិច្ចប្រកបដោយចីរភាព៕

The post លោកជំទាវអ្នកឧកញ៉ា ម៉ៅ ចំណាន គិតម៉េង ដឹកនាំរៀបចំសិក្ខាសាលាបណ្តុះបណ្តាលសិល្បករ ជាង ១០០នាក់ ពីចំណេះដឹងឧបករណ៍ហិរញ្ញវត្ថុ និងឱកាសវិនិយោគក្នុងទីផ្សារមូលបត្រ appeared first on .

ពិធីនេះបានប្រព្រឹត្តទៅនៅថ្ងៃទី១ ខែសីហា ឆ្នាំ២០២៦ ក្រោមអធិបតីភាព សម្តេចកិត្តិសង្គហបណ្ឌិត ម៉ែន សំអន ឧត្តមក្រុមប្រឹក្សាព្រះមហាក្សត្រ ដោយមានការចូលរួមពីមន្ត្រីជាន់ខ្ពស់រាជរដ្ឋាភិបាល, អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងតំណាងវិស័យឯកជនជាច្រើនរូប។

ការចូលរួមរបស់លោកជំទាវអ្នកឧកញ៉ា ម៉ៅ ចំណាន គិតម៉េង និងសិល្បករ-សិល្បការិនី នៃសមាគមសិល្បករខ្មែរ ដើម្បីអបអរសាទរការវិនិយោគរោងចក្រថ្មីរបស់ក្រុមហ៊ុន ជីប ម៉ុង ក្នុងនាមជាក្រុមហ៊ុន ដែលបានឧបត្ថម្ភទ្រទ្រង់ធំ​មួយ​ដល់​សមាគមសិល្បករខ្មែរជាប្រចាំឆ្នាំរយៈពេល ១០ឆ្នាំ។

សូមជម្រាបថា ក្រុមហ៊ុន ជីប ម៉ុង បានបោះទុនវិនិយោគប្រមាណ ២៥០ លានដុល្លារអាមេរិក លើការសាងសង់​រោងចក្រ​ផលិតអាហារ និងភេសជ្ជៈដ៏ទំនើប ដែលរួមមានផលិតផលទឹកដោះគោ មី និងតែ ដោយសហការជាមួយ​ក្រុមហ៊ុន​បច្ចេកវិទ្យាលំដាប់ពិភពលោកមកពីប្រទេសអាល្លឺម៉ង់ និងបារាំង។

រោងចក្រថ្មីនេះ គឺជាការវិនិយោគរយៈពេលវែងរបស់ក្រុមហ៊ុន ជីប ម៉ុង ក្នុងគោលបំណងពង្រឹងសមត្ថភាពផលិត​ក្នុងស្រុក បង្កើនតម្លៃបន្ថែមលើវត្ថុធាតុដើមកម្ពុជា និងរួមចំណែកជំរុញការអភិវឌ្ឍវិស័យផលិតកម្ម ដែលជាមូលដ្ឋាន​សំខាន់​សម្រាប់ការកសាងសេដ្ឋកិច្ចជាតិប្រកបដោយភាពរឹងមាំ និងចីរភាព៕

The post លោកជំទាវអ្នកឧកញ៉ា ម៉ៅ ចំណាន គិតម៉េង ដឹកនាំសិល្បករ-សិល្បការិនី ចូលរួមអបអរសាទរពិធីបើកការដ្ឋាន​សាងសង់រោងចក្រផលិតអាហារ និងភេសជ្ជៈ របស់ក្រុមហ៊ុន ជីប ម៉ុង appeared first on .

សមាគមសិល្បករខ្មែរ បានឱ្យដឹងថា ជំនួបដ៏មានសារៈសំខាន់នេះ ផ្តោតជាចម្បងលើការផ្លាស់ប្តូរទស្សនទាន និងការស្វែងរកឱកាស ដើម្បីតភ្ជាប់ស្ពានមេត្រីភាពរវាងសិល្បករក្នុងស្រុក និងសិល្បករខ្មែរដែលកំពុងរស់នៅសហរដ្ឋអាមេរិក។ ពិសេសជាការសិក្សាបន្ថែមពីការពង្រីកសក្តានុពលសិល្បៈខ្មែរ ដល់ក្មេងៗជំនាន់ក្រោយកម្ពុជាដែលបានកើតធំធាត់ និងរស់នៅក្រៅប្រទេស។

នៅក្នុងឱកាសនោះ លោក Jay Chan ក៏បានលើកឡើងពីទិដ្ឋភាពមួយចំនួនដែលលោកមានបទពិសោធន៍ ទាំងក្នុងការផលិតបទចម្រៀង និងរៀបចំការប្រគំតន្ត្រីធំតូចទាំងលក្ខណៈជាតិ និងអន្តរជាតិលើទឹកដីអាមេរិកផងដែរ។ ទន្ទឹមនឹងគ្នានោះ លោកក៏បានសម្តែងនូវការប្តេជ្ញាចិត្តខ្ពស់ក្នុងការនាំយកចំណេះដឹង បទពិសោធន៍ និងបច្ចេកទេសសិល្បៈពីបរទេស មកធ្វើការរួមគ្នានាពេលខាងមុខផងដែរ។

 អ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ បានវាយតម្លៃខ្ពស់ចំពោះទឹកចិត្តស្រឡាញ់ជាតិមាតុភូមិរបស់ លោក Jay Chan ព្រមទាំងបានបញ្ជាក់យ៉ាងច្បាស់ថា សមាគមសិល្បករខ្មែរ តែងតែបើកទ្វារចំហ និងត្រៀមខ្លួនគាំទ្ររាល់គំនិតផ្តួចផ្តើមទាំងឡាយណា ដែលបំរើឱ្យផលប្រយោជន៍សិល្បៈវប្បធម៌ជាតិ និងលើកកម្ពស់តម្លៃសិល្បករខ្មែរគ្រប់រូប ដោយមិនប្រកាន់ថារស់នៅក្នុងស្រុក ឬក្រៅស្រុកនោះឡើយ៕

The post លោកជំទាវអ្នកឧកញ៉ា ម៉ៅ ចំណាន គិតម៉េង ទទួលជួបពិភាក្សាការងារជាមួយតារាចម្រៀងខ្មែរ-អាមេរិក លោក Jay Chan  appeared first on .

សមាគមសិល្បករខ្មែរ បានឱ្យដឹងថា តាមរយៈពិធីនេះ ធនាគារ វីង បានប្តេជ្ញាឧបត្ថម្ភថវិកាសរុបចំនួន ១០ ម៉ឺនដុល្លារអាមេរិក ក្នុងមួយឆ្នាំ រយៈពេល ៥ ឆ្នាំជាប់គ្នា ដែលសរុបជាទឹកប្រាក់ទាំងអស់គឺ ៥០ ម៉ឺនដុល្លារអាមេរិក។ ថវិកានេះនឹងត្រូវយក​ទៅ​ប្រើ​ប្រាស់​ដើម្បីជួយ​ជ្រោមជ្រែង​ដល់សុខុមាលភាពសិល្បករ បណ្តុះបណ្តាលសិល្បករ​ជំនាន់ក្រោយ និងបង្កើតឱកាសថ្មីៗ ដើម្បីនាំយក​សិល្បៈខ្មែរទៅកាន់ឆាកអន្តរជាតិ។

តាំងពីយូរលង់ណាស់មកហើយ សិល្បៈខ្មែរតែងតែជាកញ្ចក់ឆ្លុះបញ្ចាំងពីប្រវត្តិសាស្ត្រ គុណតម្លៃ និងដួងព្រលឹង​របស់ជាតិយើង ដែលតែងតែបណ្តុះនូវមោទនភាព និងជួយឱ្យមរតកវប្បធម៌នេះស្ថិតស្ថេររហូតមក។

លោកបណ្ឌិត ឌីមីត្រូ ខូលេកកូ អគ្គនាយក នៃធនាគារ វីង បានលើកឡើងថា៖ “សិល្បៈខ្មែរគឺជាកញ្ចក់ឆ្លុះបញ្ចាំង​ពីអត្តសញ្ញាណជាតិ និងបេតិកភណ្ឌវប្បធម៌ដ៏ឧត្តុង្គឧត្តមរបស់ជាតិកម្ពុជា។ យើងពិតជាមានមោទនភាពដែលបាន​ចូលរួមចំណែកជាមួយសមាគមសិល្បករខ្មែរ ក្នុងការបណ្តុះបណ្តាលធនធានសិល្បករខ្មែរយើង និងថែរក្សា​សិល្បៈខ្មែរ​ឱ្យនៅរស់រវើក។ ជាមួយគ្នានេះ យើងខ្ញុំក៏សូមកោតសរសើរចំពោះភាពជាអ្នកដឹកនាំដ៏ឈ្លាសវៃរបស់ លោកជំទាវអ្នកឧកញ៉ា ម៉ៅ ចំណាន គិតម៉េង ដែលតែងតែយកចិត្តទុកដាក់ខ្ពស់ក្នុងការលើកស្ទួយវប្បធម៌ជាតិ និងគាំទ្រដល់សិល្បករដែលជាអ្នកថែរក្សាមរតកនេះដោយផ្ទាល់។”

លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ បានមានប្រសាសន៍ថា៖ “ការគាំទ្រពីធនាគារ វីង នឹងក្លាយជាកម្លាំងចលករយ៉ាងសំខាន់ ជួយឱ្យសមាគមសិល្បករខ្មែរអាចបន្តបេសកកម្មជ្រោមជ្រែងសិល្បករយើង ជួយបណ្តុះបណ្តាលសិល្បករជំនាន់ក្រោយ និងបង្កើតឱកាសកាន់តែច្រើន ដើម្បីឱ្យសិល្បៈខ្មែរអាចលេច​ត្រដែត​ឡើង និងទទួលបានការឱ្យតម្លៃកាន់តែខ្លាំងពីសំណាក់សាធារណជនគ្រប់ទិសទី។”

ក្នុងនាមជាធនាគារសម្រាប់ប្រជាជនកម្ពុជាគ្រប់រូប ធនាគារ វីង បន្តគាំទ្ររាល់គំនិតផ្ដួចផ្ដើមនានា ដែលរួមចំណែកដល់ការពង្រឹងសហគមន៍ និងថែរក្សាមរតកវប្បធម៌ជាតិ។ ការរួមចំណែកនាពេលនេះ គឺជាសក្ខីភាពនៃការបន្តភាពជាដៃគូដ៏រឹងមាំជាមួយសមាគមសិល្បករខ្មែរ និងឆ្លុះបញ្ចាំងពីការប្តេជ្ញាចិត្តរួមគ្នា ក្នុងការបង្កើតផលវិជ្ជមានជូនសង្គមជាតិ និងការជ្រោមជ្រែងដល់សហគមន៍កម្ពុជាឱ្យកាន់តែរីកចម្រើន។

រូបភាព៖ សមាគមសិល្បករខ្មែរ

The post លោកជំទាវអ្នកឧកញ៉ា ម៉ៅ ចំណាន គិតម៉េង អញ្ជើញចូលរួមពិធីទទួលថវិកាឧបត្ថម្ភ ៥០ម៉ឺនដុល្លារ របស់ធនាគារ វីង ជូនដល់សមាគមសិល្បករខ្មែរ appeared first on .

បើតាមសមាគមសិល្បករ​ខ្មែរ បានឱ្យដឹងថា នៅក្នុងជំនួបនេះ លោកជំទាវអ្នកឧកញ៉ា បានបង្ហាញ​នូវការយកចិត្ត​ទុកដាក់ខ្ពស់លើការលើកកម្ពស់វិស័យសិល្បៈ និងវប្បធម៌ខ្មែរ តាមរយៈការបង្កើតព្រឹត្តិការណ៍ដែលមានគុណភាព និងមានលក្ខណៈច្នៃប្រឌិត។ កិច្ចពិភាក្សាបានផ្ដោតសំខាន់លើការរៀបចំយុទ្ធសាស្ត្រ ដើម្បីធានាឱ្យព្រឹត្តិការណ៍​ឆ្នាំនេះ កាន់តែមានភាពអធិកអធម និងទទួលបានជោគជ័យបន្ថែមទៀត ក្នុងការនាំយកស្នាដៃសិល្បករ​ខ្មែរទៅកាន់ឆាកជាតិ និងអន្តរជាតិ។

ផលិតកម្មបារមី ដែលជាដៃគូសហការយ៉ាងជិតស្និទ្ធ បានបង្ហាញនូវការប្តេជ្ញាចិត្តក្នុងការសម្របសម្រួល និងរៀបចំកម្មវិធីឱ្យស្របតាមទស្សនវិស័យរបស់លោកជំទាវអ្នកឧកញ៉ា ដើម្បីលើកស្ទួយស្មារតីសិល្បករខ្មែរ និងបង្កើតឱកាសថ្មីៗសម្រាប់យុវជនក្នុងវិស័យសិល្បៈ។

សូមជម្រាបថា ព្រឹត្តិការណ៍ «Rise for Khmer ២០២៦» ត្រូវបានរំពឹងថានឹងក្លាយជាវេទិកាដ៏សំខាន់មួយទៀត ក្នុងការបង្ហាញពីសក្ដានុពលសិល្បៈសម័យរបស់កម្ពុជា ទៅកាន់ទស្សនិកជនគ្រប់មជ្ឈដ្ឋាន។

The post លោកជំទាវអ្នកឧកញ៉ា ម៉ៅ ចំណាន គិតម៉េង ជួបពិភាក្សាការងារជាមួយផលិតកម្មបារមី ដើម្បីត្រៀមរៀបចំ​ព្រឹត្តិការណ៍ «Rise for Khmer ២០២៦» appeared first on .

ពិធីនេះបានប្រព្រឹត្តទៅនៅការិយាល័យធនាគារ J Trust Royal Bank ស្ថិតក្នុងអគារ Royal Group Central Tower ក្រោមវត្តមានរបស់ លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ និង លោក Toru Myochin នាយកប្រតិបត្តិ ធនាគារ J Trust Royal Bank ថ្នាក់ដឹកនាំក្រុមហ៊ុន Royal Group of Companies ថ្នាក់ដឹកនាំធនាគារ ភ្ញៀវកិត្តិយស និងសិល្បករ សិល្បការិនីជាច្រើនរូប។

ថ្លែងក្នុងពិធីនេះ លោក Toru Myochin នាយកប្រតិបត្តិ ធនាគារ J Trust Royal Bank បានមានប្រសាសន៍ថា ក្នុងនាមជាជនជាតិជប៉ុន​​ដែលរស់នៅ និងបំពេញការងារនៅកម្ពុជា លោកបានកោតសរសើរយ៉ាងជ្រាលជ្រៅ​ចំពោះតម្លៃនៃអរិយធម៌ និងវប្បធម៌ដ៏សម្បូរបែបរបស់កម្ពុជា។ លោកលើកឡើងថា ភាពរឹងមាំរបស់ប្រទេសមួយ មិនត្រូវបានវាស់ស្ទង់ត្រឹមកំណើនសេដ្ឋកិច្ចប៉ុណ្ណោះទេ ប៉ុន្តែជា​ការរួមបញ្ចូលនូវ​សមត្ថភាពក្នុងការអភិរក្ស និងលើកតម្កើងអត្តសញ្ញាណវប្បធម៌របស់ខ្លួនផងដែរ។

លោកបានបញ្ជាក់ថា ធនាគារ J Trust Royal Bank មានមោទនភាពដែលបានរួមចំណែកគាំទ្រការអភិរក្ស និងផ្សព្វផ្សាយមរតកសិល្បៈវប្បធម៌ខ្មែរ និងអំពាវនាវឱ្យគ្រប់ភាគីបន្តសហការគ្នា ដើម្បីធានាថាសិល្បៈខ្មែរ​នឹងបន្តរីកចម្រើន និងបំផុសគំនិតដល់មនុស្សជំនាន់ក្រោយ។

ជាការឆ្លើយតប លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ បានថ្លែងអំណរគុណ​យ៉ាងជ្រាលជ្រៅចំពោះធនាគារ J Trust Royal Bank និង Royal Group of Companies ដែលបានបន្តគាំទ្រ​សកម្មភាព​របស់សមាគមជាបន្តបន្ទាប់។ លោកជំទាវបានលើកឡើងថា ការឧបត្ថម្ភនេះបានឆ្លុះបញ្ចាំង​ពីទំនួលខុស​ត្រូវសង្គម និងចក្ខុវិស័យវែងឆ្ងាយរបស់វិស័យឯកជន ក្នុងការចូលរួមអភិរក្ស និងលើកកម្ពស់មរតកវប្បធម៌ជាតិ។

លោកជំទាវបានបញ្ជាក់ថា ថវិកាឧបត្ថម្ភដែលសមាគមទទួលបាន នឹងត្រូវប្រើប្រាស់ដោយតម្លាភាព និងប្រសិទ្ធភាព សម្រាប់គាំទ្រសកម្មភាពអភិរក្ស និងអភិវឌ្ឍសិល្បៈ វប្បធម៌ ជួយដល់សិល្បករ និងសិល្បការិនីដែលជួបការលំបាក បណ្តុះបណ្តាលយុវជនជំនាន់ក្រោយ និងផ្សព្វផ្សាយតម្លៃសិល្បៈវប្បធម៌ខ្មែរ ទាំងក្នុង និងក្រៅប្រទេស។

ជាមួយគ្នា​នោះ លោកជំទាវអ្នកឧកញ៉ា ក៏បានអំពាវនាវដល់ស្ថាប័នរដ្ឋ វិស័យឯកជន សប្បុរសជន និងសិល្បករ សិល្បការិនីទាំងអស់ បន្តចូលរួមគាំទ្រសកម្មភាពរបស់សមាគមសិល្បករខ្មែរ ដើម្បីរួមគ្នាថែរក្សា អភិរក្ស និងលើក​ស្ទួយសិល្បៈ វប្បធម៌ និងអត្តសញ្ញាណជាតិខ្មែរ ឱ្យស្ថិតស្ថេរគង់វង្សសម្រាប់មនុស្សជំនាន់ក្រោយ។

ពិធីប្រគល់-ទទួលថវិកានេះ បានបង្ហាញពីភាពជាដៃគូដ៏រឹងមាំរវាងសមាគមសិល្បករខ្មែរ និងធនាគារ J Trust Royal Bank ក្នុងការរួមចំណែកអភិវឌ្ឍសង្គម តាមរយៈការអភិរក្សវប្បធម៌ លើកកម្ពស់សុខុមាលភាពសិល្បករ និងជំរុញការអភិវឌ្ឍប្រកបដោយចីរភាពនៅកម្ពុជា៕

The post លោកជំទាវអ្នកឧកញ៉ា ម៉ៅ ចំណាន គិតម៉េង អញ្ជើញជាអធិបតីក្នុងពិធីទទួលថវិកាឧបត្ថម្ភ ចំនួន ១០០,០០០ ដុល្លារអាមេរិក ពីធនាគារ J Trust Royal Bank ជូនដល់សមាគមសិល្បករខ្មែរ appeared first on .

សមាគមសិល្បករខ្មែរ បានឱ្យដឹងថា ពិធីចុះហត្ថលេខានេះ បានប្រព្រឹត្តទៅក្រោមវត្តមានដ៏ខ្ពង់ខ្ពស់របស់ លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ, ឧកញ៉ា គិត លីច័ន្ទផាន់ណា អនុប្រធាន និងជាទីប្រឹក្សាជាន់ខ្ពស់សមាគម​សិល្បករខ្មែរ ព្រមទាំងជាអគ្គនាយកប្រតិបត្តិក្រុមហ៊ុន KLYP Investments និងលោក ម៉ា អ៊ែមមឺសិន ម៉ានី នាយកប្រតិបត្តិនៃមន្ទីរពេទ្យអឃីត និងជានាយកគ្រប់គ្រងប្រចាំប្រទេសកម្ពុជា រួមជាមួយថ្នាក់ដឹកនាំ ក្រុមគ្រូពេទ្យ បុគ្គលិក សិល្បករ សិល្បការិនី និងភ្ញៀវកិត្តិយសជាច្រើនរូប។

ក្នុងឱកាសនោះ ឧកញ៉ា គិត លីច័ន្ទផាន់ណា បានថ្លែងសុន្ទរកថាតំណាងលោកជំទាវអ្នកឧកញ៉ា ម៉ៅ ចំណាន គិតម៉េង ដោយគូសបញ្ជាក់ថា កិច្ចសហការនេះ គឺជាការបង្ហាញពីឆន្ទៈរួមក្នុងការលើកកម្ពស់គុណភាពជីវិត និងការទទួលបានសេវាសុខាភិបាលប្រកបដោយគុណភាពសម្រាប់សិល្បករ សិល្បការិនីទូទាំងប្រទេស ជាពិសេសសិល្បកររៀមច្បង ដែលបានលះបង់ពេលវេលា កម្លាំងកាយចិត្ត និងទេពកោសល្យក្នុងការអភិរក្ស និងផ្សព្វផ្សាយសិល្បៈវប្បធម៌ជាតិ។

លោកបានមានប្រសាសន៍ថា៖ «សិល្បករ សិល្បការិនី គឺជាធនធានដ៏មានតម្លៃរបស់សង្គម និងជាអ្នកថែរក្សាអត្ត​សញ្ញាណ​ជាតិខ្មែរ។ ការយកចិត្តទុកដាក់លើសុខភាព សេចក្ដីថ្លៃថ្នូរ និងសុខុមាលភាពរបស់ពួកគាត់ គឺជាកាតព្វកិច្ច​ដែលយើងទាំងអស់គ្នាត្រូវរួមគ្នាគាំពារ និងថែរក្សា»។

តាមរយៈអនុស្សរណៈយោគយល់នេះ សមាជិកសមាគមសិល្បករខ្មែរ នឹងទទួលបានអត្ថប្រយោជន៍ជាច្រើន ពីមន្ទីរ​ពេទ្យអឃីត កោះពេជ្រ និងមន្ទីរពហុព្យាបាល អឃីត សែនសុខ រួមមានសេវាពិនិត្យ ព្យាបាល និងការថែទាំ​សុខភាព​ប្រកប​ដោយគុណភាព ព្រមទាំងលក្ខខណ្ឌអនុគ្រោះផ្សេងៗទៀត។

ជាមួយគ្នានេះ កិច្ចសហការនេះក៏បានបង្ហាញពីការប្តេជ្ញាចិត្តរបស់មន្ទីរពេទ្យអឃីត ក្នុងការអនុវត្តទំនួលខុស​ត្រូវសង្គម និងសកម្មភាពមនុស្សធម៌ តាមរយៈការគាំទ្រដល់សហគមន៍សិល្បករកម្ពុជា និងរួមចំណែកដល់​និរន្តរភាព​នៃវិស័យសិល្បៈវប្បធម៌ជាតិ។

ដោយឡែក លោក ម៉ា អ៊ែមមឺសិន ម៉ានី នាយកប្រតិបត្តិនៃមន្ទីរពេទ្យអឃីត និងជានាយកគ្រប់គ្រងប្រចាំ​ប្រទេស​កម្ពុជា បានបញ្ជាក់ថា កិច្ចសហប្រតិបត្តិការនេះ គឺជាជំហានដ៏សំខាន់ក្នុងការលើកកម្ពស់ការយល់ដឹង​ផ្នែកសុខភាព​ទៅកាន់សាធារណជន តាមរយៈការចូលរួមផ្សព្វផ្សាយសារសុខភាពដោយសមាគមសិល្បករខ្មែរ ដែលមានឥទ្ធិពល​វិជ្ជមាន​ដល់មហាជន។

លោកបានថ្លែងថា៖ «ក្នុងនាមជាមន្ទីរពេទ្យខ្មែរ យើងមានមោទនភាពក្នុងការប្រើប្រាស់ចំណេះជំនាញ និងវិជ្ជាជីវៈ មកបម្រើជាតិមាតុភូមិ ដោយភាពស្មោះត្រង់ និងទំនុកចិត្ត។ រាល់ការខិតខំប្រឹងប្រែងរបស់យើង គឺដើម្បីធានាបាន​នូវសុខសុវត្ថិភាព សុខភាព និងស្នាមញញឹមសម្រាប់ប្រជាជនខ្មែរ»។

ភាគីទាំងពីរ បានសម្តែងនូវជំនឿជាក់ថា កិច្ចសហការនេះនឹងបន្តរីកចម្រើន និងអាចក្លាយជាគំរូសម្រាប់ការពង្រីក​កិច្ចសហប្រតិបត្តិការរវាងវិស័យឯកជន និងស្ថាប័នវប្បធម៌ផ្សេងៗទៀតនៅកម្ពុជា។

សមាគមសិល្បករខ្មែរ បានបញ្ជាក់ថា នឹងបន្តស្វែងរកកិច្ចសហការនានា ដើម្បីគាំទ្រសិល្បករ សិល្បការិនី លើផ្នែកសុខុមាលភាព សង្គមកិច្ច និងការអភិវឌ្ឍជីវភាព ខណៈដែលមន្ទីរពេទ្យអឃីត ក៏នឹងបន្តបេសកកម្មផ្តល់​សេវាសុខាភិបាលប្រកបដោយគុណភាព សុវត្ថិភាព និងការយកចិត្តទុកដាក់ខ្ពស់ជូនដល់ប្រជាជនកម្ពុជា។

The post លោកជំទាវអ្នកឧកញ៉ា ម៉ៅ ចំណាន គិតម៉េង អញ្ជើញចុះ MoU រវាងសមាគមសិល្បករខ្មែរ និងមន្ទីរពេទ្យអឃីត ដើម្បីលើកកម្ពស់សុខុមាលភាពសិល្បករ និងផ្សព្វផ្សាយការយល់ដឹងសុខភាពដល់ពលរដ្ឋ appeared first on .