អ្នកឧកញ៉ា សៀង ណាំ

តើអ្នកឧកញ៉ា ឧកញ៉ា រូបណាខ្លះ ឈរឈ្មោះបោះឆ្នោតជាបេក្ខជនតំណាងរាស្ត្រ នីតិកាលទី៧?

ឧកញ៉ាដែនដី — Tue, 27 Jun 2023 00:30:00 +0000

សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣នេះ មានអ្នកឧកញ៉ា ឧកញ៉ា មកពីគណបក្សប្រជាជនកម្ពុជា ចំនួន ៥រូប បានឈរឈ្មោះជាតំណាងរាស្ត្រ នៅមណ្ឌលរាជធានី-ខេត្ត ផ្សេងៗគ្នា។

យោងតាមសេចក្តីសម្រេចរបស់ គណៈកម្មាធិការជាតិរៀបចំការបោះឆ្នោត (គ.ជ.ប.) លេខ ១៩៣ គ.ជ.ប. ស.ស.រ ដែលចុះហត្ថលេខាដោយលោក ប្រាជ្ញ ចន្ទ ប្រធាន គ.ជ.ប. កាលពីថ្ងៃទី១ ខែឧសភា ឆ្នាំ២០២៣ បានទទួលស្គាល់បញ្ជីបេក្ខជនឈរឈ្មោះបោះឆ្នោត របស់គណៈបក្សប្រជាជនកម្ពុជា ដែលមាន ២៥ មណ្ឌលរាជធានី ខេត្ត ដោយក្នុងនោះមាន អ្នកឧកញ៉ា ឧកញ៉ា ដែលបានឈរឈ្មោះដូចខាងក្រោម៖

១. អ្នកឧកញ៉ា សៀង ណាំ៖ បេក្ខជនពេញសិទ្ធិ លេខរៀងទី២ មណ្ឌលខេត្តសៀមរាប

២. អ្នកឧកញ៉ា ម៉ម វណ្ណឌី៖ បេក្ខជនបម្រុង លេខរៀងទី២ មណ្ឌលខេត្តឧត្តរមានជ័យ

៣. ឧកញ៉ា ភួ ពុយ៖ បេក្ខជនបម្រុង លេខរៀងទី២ មណ្ឌលខេត្តបាត់ដំបង

៤. ឧកញ៉ា លី ឆេង៖ បេក្ខជនពេញសិទ្ធិ លេខរៀងទី១១ មណ្ឌលរាជធានីភ្នំពេញ

៥. ឧកញ៉ា ទ្រី ដាលុច៖ បេក្ខជនបម្រុង លេខរៀងទី៩ មណ្ឌលខេត្តកណ្តាល

សូមជម្រាបជូនថា បេក្ខជនតំណាងរាស្ត្រ ឈរឈ្មោះសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ របស់គណបក្សប្រជាជនកម្ពុជា ទាំង ២៥ មណ្ឌលរាជធានី-ខេត្ត គឺមានបេក្ខជនពេញសិទ្ធិចំនួន ១២៥រូប (ស្ត្រី ១៦រូប) និងបេក្ខជនបម្រុងចំនួនប្រមាណ ១៤៩រូប (ស្ត្រី ៣៨រូប)។ ការបោះឆ្នោតជ្រើសតាំងតំណាងរាស្ត្រ នីតិកាលទី៧ នឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ដោយមានគណបក្សនយោបាយចំនួន ១៨ ចូលរួម៕

The post តើអ្នកឧកញ៉ា ឧកញ៉ា រូបណាខ្លះ ឈរឈ្មោះបោះឆ្នោតជាបេក្ខជនតំណាងរាស្ត្រ នីតិកាលទី៧? appeared first on .

នៅជាមួយគ្នារយៈពេល ១៨ឆ្នាំ រថយន្តអ្នកឧកញ៉ា សៀង ណាំ ធ្វើទុក្ខកណ្តាលផ្លូវ ពេលចុះបំពេញបេសកកម្ម

ឧកញ៉ាដែនដី — Sun, 18 Jun 2023 02:44:30 +0000

រថយន្តម៉ាក Lexus 470 ស៊េរីឆ្នាំចាស់មួយគ្រឿង ដែលនៅជាមួយ អ្នកឧកញ៉ា សៀង ណាំ អស់រយៈពេល ១៨ឆ្នាំមកហើយ បានជួបបញ្ហាធ្វើទុក្ខកណ្តាលផ្លូវ អំឡុងពេលដែលអ្នកឧកញ៉ា សមាជិករដ្ឋសភា និងជាតំណាងរាស្ត្រមណ្ឌលខេត្តសៀមរាប អញ្ជើញចុះសួរសុខទុក្ខប្រជាពលរដ្ឋ ចំនួនពីរឃុំ នៅស្រុកក្រឡាញ់ ខេត្តសៀមរាប កាលពីថ្ងៃទី១៦ ខែមិថុនា ឆ្នាំ២០២៣។

អ្នកឧកញ៉ា សៀង ណាំ ប្រធានក្រុមការងារខេត្តចុះជួយស្រុកក្រឡាញ់ បានលើកឡើងថា ព្រឹកថ្ងៃទី១៦ ខែមិថុនា ឆ្នាំ២០២៣ អ្នកឧកញ៉ាបានចុះសួរសុខទុក្ខប្រជាពលរដ្ឋ ក្នុងឃុំសែនសុខ និងឃុំចន្លាស់ដៃ ស្រុកក្រឡាញ់ ខេត្តសៀមរាប។ អ្នកឧកញ៉ាបណ្ឌិត បានបន្តយ៉ាងដូច្នេះថា៖ “សម្លាញ់ខ្ញុំ ៤៧០ នៅជាមួយខ្ញុំអស់រយៈពេល ១៨ឆ្នាំហើយ ព្រឹកនេះបែបវាហត់ហើយមើលទៅ បានវាមិនចង់ដឹកខ្ញុំទៅមុខទៀត”។

ទោះយ៉ាងណា ក្រុមការងារអ្នកឧកញ៉ា សៀង ណាំ បានជួយឱ្យរថយន្តអាចដំណើរការ និងអាចបន្តដំណើរទៅកាន់គោលដៅប្រកបដោយសុខសុវត្ថិភាព។

សូមជម្រាបថា អ្នកឧកញ៉ា សៀង ណាំ ជាអ្នកជំនួញជើងចាស់ដ៏ឆ្នើមមួយរូប ហើយក៏ជាស្តេចត្រាញ់ ដែលបាននិងកំពុងវិនិយោគក្នុងខេត្តសៀមរាប ជាច្រើនគម្រោង លើវិស័យអចលនទ្រព្យ ទេសចរណ៍ និងបដិសណ្ឋារកិច្ច។ អ្នកឧកញ៉ា ជាម្ចាស់សណ្ឋាគារស៊ីធីអង្គរ ដ៏ស្កឹមស្កៃនៅកណ្ដាលក្រុងសៀមរាប និងជាម្ចាស់ បុរី សៀងណាំ ជាច្រើនទីតាំងផងដែរ៕

The post នៅជាមួយគ្នារយៈពេល ១៨ឆ្នាំ រថយន្តអ្នកឧកញ៉ា សៀង ណាំ ធ្វើទុក្ខកណ្តាលផ្លូវ ពេលចុះបំពេញបេសកកម្ម appeared first on .

អ្នកឧកញ៉ា សៀង ណាំ សម្ពោធដាក់ឱ្យប្រើប្រាស់អគារសិក្សាមួយខ្នង នៅក្រុងសៀមរាប

ឧកញ៉ាដែនដី — Mon, 12 Dec 2022 13:11:00 +0000

នៅព្រឹកថ្ងៃទី១២ ខែធ្នូ ឆ្នាំ២០២២នេះ អ្នកឧកញ៉ា សៀង ណាំ តំណាងរាស្ត្រមណ្ឌលខេត្តសៀមរាប បានអញ្ជើញជាអធិបតីសម្ពោធកាត់ខ្សែបូ ដាក់ឱ្យប្រើប្រាស់ នូវអគារសិក្សា១ខ្នង និងសមិទ្ធផលនានា ក្នុងសាលាបឋមសិក្សាវត្តដំណាក់ ក្រុងសៀមរាប ខេត្តសៀមរាប។

កម្មវិធីសម្ពោធអគារសិក្សានៅសាលាបឋមសិក្សាវត្តសំណាក់ខាងលើនេះ រួមមានអគារសិក្សាមួយខ្នង កំពស់២ជាន់ មាន ១០បន្ទប់ និងខ្លោងទ្វាររបង បន្ទប់ទឹក ក្រាលការ៉ូ ព្រមទាំងសមិទ្ធផលនានា ដែលបានសាងសង់រួចរាល់ជាស្ថាពរ ស្ថិតនៅក្នុង វត្តដំណាក់ ភូមិវត្តដំណាក់ សង្កាត់សាលាកំរើក ក្រុងសៀមរាប ខេត្តសៀមរាប។ គួរបញ្ជាក់ថា អគារនិងសមិទ្ធផលនានាទាំងនេះ ក្រោមគំនិតផ្តួចផ្តើមនិងឧបត្ថម្ភគាំទ្រដោយអ្នកឧកញ៉ា សៀង ណាំ និងសាធារណជនមួយចំនួនទៀតផងដែរ៕

The post អ្នកឧកញ៉ា សៀង ណាំ សម្ពោធដាក់ឱ្យប្រើប្រាស់អគារសិក្សាមួយខ្នង នៅក្រុងសៀមរាប appeared first on .

ដឹងអត់ថា ហេតុអ្វីអ្នកឧកញ៉ា សៀង ណាំ ទទួលបានគ្រឿងឥស្សរិយយសពីព្រះចៅអធិរាជជប៉ុន?

ឧកញ៉ាដែនដី — Fri, 30 Sep 2022 00:30:00 +0000

អ្នកឧកញ៉ា សៀង ណាំ សមាជិករដ្ឋសភា និងជាតំណាងរាស្ត្រមណ្ឌលខេត្តសៀមរាប បានទទួលគ្រឿងឥស្សរិយយស លំដាប់ព្រះអាទិត្យ (The Order of the Rising Sun. Gold Rays With Neck Ribbon) ប្រទានដោយព្រះចៅអធិរាជជប៉ុន និងបានរៀបចំពិធីប្រគល់ទទួល នៅក្រុងសៀមរាប កាលពីថ្ងៃទី១៣ ខែមករា ឆ្នាំ២០២០។

ក្នុងពិធីប្រគល់និងទទួលខាងលើ ស្ថិតក្រោមអធិបតីភាពលោក ហ៊ុន ម៉ានី សមាជិករដ្ឋសភា និងប្រធានគណៈកម្មការទី៧ នៃរដ្ឋសភាកម្ពុជា, លោក ទៀ សីហា អភិបាលខេត្តសៀមរាប និងខាងភាគីជប៉ុន គឺមានលោក កាស៊ូយូគិ ណាកាណិ (Kazuyuki Nakane) សមាជិកសភា និងជាអតីតអនុរដ្ឋមន្ត្រីក្រសួងការបរទេសជប៉ុន, លោក មីកាមិ ម៉ាសាហ៊ីរ៉ូ (Mikami Masahiro) ឯកអគ្គរាជទូតជប៉ុន ប្រចាំកម្ពុជា, លោក ណាអូគី មីតូរី (Naoki Mitori) កុងស៊ុលជប៉ុន ប្រចាំខេត្តសៀមរាប, លោក យូស៊ូកិ កាណារិ (Yusuke Kannari) ប្រធានក្រុមហ៊ុន ហ្កិងហ្គី គ្រុប, រួមនិងវត្តមានរបស់លោក លោកស្រី ជាគណៈអភិបាលខេត្ត ប្រធាន/សមាជិកក្រុមប្រឹក្សាខេត្ត អភិបាល និង ប្រធានក្រុមប្រឹក្សាក្រុង/ស្រុក ប្រធានមន្ទីរជុំវិញខេត្ត អាជីវករភ្ញៀវជាតិ-អន្តរជាតិ ប្រមាណជា ២០០នាក់ ដែលបានរៀបចំនៅសណ្ឋាគារ សូហ្វីតែល ក្រុងសៀមរាប ខេត្តសៀមរាប។

អ្នកឧកញ៉ា សៀង ណាំ ធ្លាប់បានបញ្ជាក់ឱ្យដឹងថា មូលហេតុធំៗដែលធ្វើឱ្យលោកទទួលបានគ្រឿងឥស្សរិយយសនេះ គឺដោយសារលោកបានរួមចំណែកច្រើនក្នុងការរឹតចំណងសាមគ្គីភាព មិត្តភាព និងកិច្ចសហប្រតិបត្តិការ រវាងប្រទេស និងប្រជាជនទាំងពីរ (កម្ពុជា-ជប៉ុន) កាន់តែរឹងមាំ រីកចម្រើន និងស្ថិតស្ថេរយូរអង្វែង ក្នុងរយៈពេលជាច្រើនទសវត្សកន្លងមក។ ជាពិសេសលើការងារមនុស្សធម៌ជាមួយជនជាតិជប៉ុនដូចជា៖

១. កាលឆ្នាំ១៩៩៦ លោកបានស្នើសុំសម្តេចតេជោ ហ៊ុន សែន ឱ្យអនុញ្ញាតបើកសាលា យ៉ាម៉ាម៉ូតុ មជ្ឈមណ្ឌលសិក្សាភាសាជប៉ុន នៅខេត្តសៀមរាប ដែលសិស្សម្នាក់ត្រូវរៀន២ឆ្នាំលើជំនាញមគ្គុទេសទេសចរណ៍ភាសាជប៉ុន ហើយរហូតមកដល់បច្ចុប្បន្នបណ្តុះបណ្តាលបានជាង ៥០០ ទៅ ៦០០នាក់។

២. ព្រឹត្តិការណ៍វិបត្តិផ្ទៃក្នុងកាលថ្ងៃទី ៥-៦ កក្កដា ១៩៩៧៖ លោកបានការពារ មើលការខុសត្រូវ ជនជាតិជប៉ុន ឱ្យនៅក្នុងសណ្ឋាគាររបស់លោក បានរួចចាកទុក្ខភ័យ ព្រោះខ្លាចមានគ្រោះថ្នាក់ ក្នុងនោះរួមទាំងគ្រូបង្រៀនជនជាតិជប៉ុនផងដែរ។

៣. កាលទឹកជំនន់ធំនៅស្រុកបន្ទាយស្រី៖ ជនជាតិជប៉ុន ជាប់នៅប្រាសាទបន្ទាយស្រី នៅសល់ទួលតិចតួច ទឹកហូរខ្លាំង មិនអាចឆ្លងកាត់បាន ខ្លះនៅលើប្រាសាទ ដោយលោកខ្លាចជនជាតិជប៉ុនអត់បាយពេលយប់ ឬគ្រោះថ្នាក់ដោយសារសត្វពិសផ្សេងៗ លោកបានស្នើសុំឧទ្ធម្ភាគចក្រ ៣គ្រឿងពីសម្តេចតេជោ និងបានជួយសង្គ្រោះប្រជាពលរដ្ឋប្រមាណ ១០០០នាក់ជាង រួមទាំងជនជាតិជប៉ុនរាប់រយនាក់។

៤. ការទំនាក់ទំនងផ្នែកផ្សេងៗច្រើនទៀតដូចជា ការសាងសង់សាលារៀន និងអន្តូងទឹកនៅខេត្តសៀមរាប ហើយលោកបានជួយសិស្សចុះកម្មសិក្សាមកពីប្រទេសជប៉ុន (ទស្សនៈកិច្ចនៅខេត្តសៀមរាប) ស្ទើរតែជារៀងរាល់ឆ្នាំ ជាដើម។

សកម្មភាពមនុស្សធម៌ដែលបានជួយប្រជាជនជប៉ុន និងប្រទេសជប៉ុន របស់អ្នកឧកញ៉ា សៀង ណាំ ខាងលើនេះ បានធ្វើឱ្យស្ថានទូតជប៉ុនប្រចាំនៅកម្ពុជា កត់សម្គាល់ឃើញ ហើយតាមរយៈក្រសួងការបរទេសនិងទំនាក់ទំនងអន្តរជាតិ ក៏បានស្នើសុំទៅព្រះចៅអធិរាជជប៉ុន ឱ្យផ្តល់គ្រឿងឥស្សរិយយសដ៏វិសេសវិសាលនេះ ជូនដល់អ្នកឧកញ៉ា។

សូមជម្រាបជូនថា បើតាមស្ថានទូតជប៉ុន គ្រឿងឥស្សរិយយសលំដាប់ព្រះអាទិត្យ (The Order of the Rising Sun. Gold Rays With Neck Ribbon) បង្កើតឡើងនៅក្នុងឆ្នាំ១៨៧៥ ដោយព្រះចៅអធិរាជ ម៉ីជិ (Meiji) ជប៉ុន ដែលដំបូងឡើយ គឺសម្រាប់តែឥស្សរជនជប៉ុនតែប៉ុណ្ណោះ ប៉ុន្តែបច្ចុប្បន្នត្រូវបានប្រគល់ជូនដល់ឥស្សរជនជាន់ខ្ពស់ ដែលជាប្រមុខរដ្ឋ អតីតប្រមុខរដ្ឋ រដ្ឋសភា ព្រឹទ្ធសភា មេទ័ព រដ្ឋមន្រ្តី អនុរដ្ឋមន្ត្រី ថ្នាក់ដឹកនាំអង្គការសង្គមស៊ីវិល និងវិស័យឯកជន សរុប ១៣៦នាក់ នៅលើពិភពលោក ហើយក្នុងនោះក៏មានអ្នកឧកញ៉ា សៀង ណាំ ម្នាក់ផងដែរ៕

The post ដឹងអត់ថា ហេតុអ្វីអ្នកឧកញ៉ា សៀង ណាំ ទទួលបានគ្រឿងឥស្សរិយយសពីព្រះចៅអធិរាជជប៉ុន? appeared first on .

ខ្សែប្រយុទ្ធសេដ្ឋកិច្ចប្រចាំខេត្តសៀមរាប សៀង ណាំ ពិភាក្សាផ្ទាល់ជាមួយសម្តេចតេជោនាយករដ្ឋមន្ត្រី ពីបញ្ហាអភិវឌ្ឍន៍ខេត្ត

រ៉េត សុកធា — Wed, 14 Sep 2022 05:08:38 +0000

អ្នកឧកញ៉ា សៀង ណាំ ជាអ្នកជំនួញជើងចាស់ ហើយក៏ជាស្តេចក្រាញ់ដែលបាននិងកំពុងវិនិយោគក្នុងខេត្តសៀមរាបជាច្រើនគម្រោងលើវិស័យអចលនទ្រព្យ ទេសចរណ៍ និងបដិសណ្ឋារកិច្ច ដ៏ឆ្នើមមួយរូប។

កាលពីថ្ងៃអង្គារ ទី១៣ ខែកញ្ញានេះ អ្នកឧកញ៉ា សៀង ណាំ អញ្ជើញជួបសំណេះសំណាលផ្ទាល់ជាមួយសម្តេចតេជោ ហ៊ុន សែន នាយករដ្ឋមន្ត្រី នាសណ្ឋាគារលំដាប់ផ្កាយ ស្ថិតក្នុងក្រុងសៀមរាប។

បើតាមអ្នកឧកញ៉ា សៀង ណាំ តាមរយៈទំព័រហ្វេសប៊ុកផ្លូវការ បានឲ្យដឹងថា ជំនួបពិភាក្សាការងារដោយបានស្តាប់អនុសាសន៍សម្តេចតេជោណែនាំពីបញ្ហាការអភិវឌ្ឍន៍ក្រុងសៀមរាប។

អ្នកឧកញ៉ា សៀង ណាំ ក្រៅពីមានតំណែងជា អ្នកតំណាងរាស្ដ្រ និង ជាសមាជិករដ្ឋសភាជាតិ លោកក៏ជាម្ចាស់ សណ្ឋាគារស៊ីធីអង្គរដ៏ស្កឹ ស្កៃនៅកណ្ដាលក្រុងសៀមរាប និង មានដីបុរី ចំនួនពីរគឺបុរី សៀងណាំ១ និង បុរី សៀង ណាំ ២ ហើយថ្មីៗនេះលោកកំពុងចាប់ផ្តើមបើកគម្រោងថ្មីមួយចំនួនទៀត។

អ្នកឧកញ៉ាក៏ធ្លាប់ទទួលបានគ្រឿងឥស្សរិយយសរបស់ជប៉ុន “The Order of the Rising Sun, Gold Rays with Neck Ribbon” ក្នុងសក្ខីភាពដើម្បីទទួលស្គាល់ការចូលរួមចំណែកដ៏វិសេសវិសាស ក្នុងការរឹតចំនងមិត្តភាពរវាង ជប៉ុននិងកម្ពុជា៕

The post ខ្សែប្រយុទ្ធសេដ្ឋកិច្ចប្រចាំខេត្តសៀមរាប សៀង ណាំ ពិភាក្សាផ្ទាល់ជាមួយសម្តេចតេជោនាយករដ្ឋមន្ត្រី ពីបញ្ហាអភិវឌ្ឍន៍ខេត្ត appeared first on .