អ្នកឧកញ៉ា សំអាង វឌ្ឍនៈ

អ្នកឧកញ៉ា សំអាង វឌ្ឍនៈ អមឧបនាយករដ្ឋមន្ត្រី ហ៊ុន ម៉ានី ចូលរួមអនុមោទនាពិធីបុណ្យមាឃបូជា នៅភ្នំឧត្តុង្គ

ឧកញ៉ាដែនដី — Wed, 12 Feb 2025 02:24:55 +0000

នាព្រឹកថ្ងៃទី១២ ខែកុម្ភៈ ឆ្នាំ២០២៥ នេះ អ្នកឧកញ៉ា សំអាង វឌ្ឍនៈ សមាជិកក្រុមប្រឹក្សាភិបាល ក្រុមហ៊ុន វឌ្ឍនៈ គ្រុប បានអញ្ជើញអមដំណើរ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ តំណាងដ៏ខ្ពង់ខ្ពស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ចូលរួមអនុមោទនាក្នុងពិធីបុណ្យមាឃបូជា រាប់បាត្រនិងប្រគេនទេយ្យទានដល់ព្រះសង្ឃ នៅព្រះមហាសក្យមុនីចេតិយ ភ្នំព្រះរាជទ្រព្យ (ឧត្ដុង្គ) ស្រុកពញឮ ខេត្តកណ្ដាល។

ពិធីបុណ្យមាឃបូជានៅព្រះមហាសក្យមុនីចេតិយ ភ្នំព្រះរាជទ្រព្យនេះ ក៏មានការអញ្ជើញចូលរួមពីថ្នាក់ដឹកនាំ និងមន្ត្រីរាជការនៃក្រសួង ស្ថាប័នជាតិនានា តំណាងអង្គទូត សិស្ស និស្សិត ព្រមទាំងប្រជាជនកម្ពុជាដ៏ច្រើនកុះករ ដែលជាពុទ្ធសាសនិក។ ពិធីបុណ្យមាឃបូជាតែងតែត្រូវបានប្រារព្ធធ្វើឡើងជារៀងរាល់ឆ្នាំ តាមបែបប្រពៃណីព្រះពុទ្ធសាសនា នៅតាមទីវត្តអារាមទាំងអស់នៅទូទាំងប្រទេសកម្ពុជា ដោយពុទ្ធសាសនិកកម្ពុជាផងដែរ។

មាឃបូជា គឺជាបុណ្យដ៏សំខាន់មួយ សម្រាប់បណ្ដាប្រទេសអ្នកកាន់ព្រះពុទ្ធសាសនា ដែលតែងតែប្រារព្ធធ្វើនៅក្នុងខែមាឃ (ជាខែទីបីរបស់ខ្មែរ)។ បុណ្យមាឃបូជាត្រូវបានប្រារព្ធធ្វើក្នុងប្រទេសកម្ពុជា តាំងពីរជ្ជកាលព្រះអង្គដួង (ក្រុងឧត្ដុង្គ ព.ស២៣៩៧ គ.ស១៨៥៤) ហើយត្រូវបានរាជរដ្ឋាភិបាលកំណត់យកថ្ងៃពេញបូណ៌មី ខែមាឃ ជាថ្ងៃបុណ្យសម្រាប់ជាតិ ហៅថា (មាឃបូជា) តាំងពីរជ្ជកាលព្រះបាទសម្តេចព្រះស៊ីសុវត្ថិមុនីវង្សមក។

កម្មវិធីបុណ្យមាឃបូជាប្រារព្ធឡើង ដើម្បីរំឭកដល់ព្រឹត្តិការណ៍ធំៗបី៖ ១.ដើម្បីរំឭកដល់ព្រះសម្មាសម្ពុទ្ធទ្រង់ធ្វើចតុរង្គសន្និបាត ២.ដើម្បីរំឭកដល់ថ្ងៃដែលព្រះពុទ្ធព្រះបរមគ្រូ ព្រះសម្មាសម្ពុទ្ធទ្រង់សម្តែងឱវាទបាតិមោក្ខ និង ៣.ដើម្បីរំឭកដល់ថ្ងៃដែលព្រះសម្មាសម្ពុទ្ធ ទ្រង់ដាក់ព្រះជន្មាយុសង្ខារ ដែលទ្រង់នឹងចូលបរិនិព្វាន ៣ខែបន្ទាប់។ នេះជាពេលវេលាសម្រាប់ការឆ្លុះបញ្ចាំង សង្រួមចិត្ត និងផ្សារភ្ជាប់ឡើងវិញរវាងជំនឿ និងគុណតម្លៃរបស់ពុទ្ធសាសនិកគ្រប់រូប៕

The post អ្នកឧកញ៉ា សំអាង វឌ្ឍនៈ អមឧបនាយករដ្ឋមន្ត្រី ហ៊ុន ម៉ានី ចូលរួមអនុមោទនាពិធីបុណ្យមាឃបូជា នៅភ្នំឧត្តុង្គ appeared first on .

តាមតួលេខបឋម មានប្រទីបក្រុមហ៊ុនអ្នកឧកញ៉ា ១រូបគត់ ចូលរួមជាមួយប្រទីបរបស់រដ្ឋ បណ្តែតអបអរសាទរព្រះរាជពិធីបុណ្យអុំទូក ឆ្នាំ២០២៤

ឧកញ៉ាដែនដី — Tue, 10 Sep 2024 01:51:04 +0000

ប្រទីបក្រុមហ៊ុន វឌ្ឍនៈ ដែលមានអ្នកឧកញ៉ា សំអាង វឌ្ឍនៈ ជាសមាជិកក្រុមប្រឹក្សាភិបាល និងជាអគ្គនាយកក្រុមហ៊ុន វឌ្ឍនៈប្រ៊ូវើរី គឺជាប្រទីបតំណាងវិស័យឯកជនមួយគត់ ដែលនឹងត្រូវចូលរួមបណ្តែតអបអរសាទរ ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៤ នៅខែវិច្ឆិកា ខាងមុខនេះ។ នេះបើតាមតួលេខបឋម ពីគណៈកម្មាធិការជាតិរៀបចំបុណ្យជាតិ-អន្តរជាតិ។

តាមផែនការស្តីពីការរៀបចំព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៤ របស់គណៈកម្មាធិការជាតិរៀបចំបុណ្យជាតិ-អន្តរជាតិ ចុះថ្ងៃទី៣០ ខែសីហា ឆ្នាំ២០២៤ បានឱ្យដឹងថា ចំនួនប្រទីបរបស់រដ្ឋ និងវិស័យឯកជន ដែលនឹងត្រូវបណ្តែតអបអរសាទរព្រះរាជពិធីបុណ្យអុំទូកឆ្នាំ២០២៤នេះ មានចំនួន ៣២ប្រទីប រួមមាន៖

១.ប្រទីបព្រះបរមរាជវាំង ២.ប្រទីបព្រឹទ្ធសភា ៣.ប្រទីបរដ្ឋសភា ៤.ប្រទីបរាជរដ្ឋាភិបាល ៥.ប្រទីបក្រសួងយុត្តិធម៌ ៦.ប្រទីបក្រសួងការពារជាតិ ៧.ប្រទីបក្រសួងមហាផ្ទៃ ៨.ប្រទីបក្រសួងការបរទេស និងសហប្រតិបត្តិការអន្តរជាតិ ៩.ប្រទីបក្រសួងធម្មការ និងសាសនា ១០.ប្រទីបក្រសួងសេដ្ឋកិច្ច និងហិរញ្ញវត្ថុ
១១.ប្រទីបក្រសួងអប់រំ យុវជន និងកីឡា ១២.ប្រទីបក្រសួងរៀបចំដែនដី នគរូបនីយកម្ម និងសំណង់ ១៣.ប្រទីបក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ១៤.ប្រទីបក្រសួងពាណិជ្ជកម្ម ១៥.ប្រទីបក្រសួងទេសចរណ៍ ១៦.ប្រទីបក្រសួងរ៉ែ និងថាមពល ១៧.ប្រទីបក្រសួងវប្បធម៌ និងវិចិត្រសិល្បៈ ១៨.ប្រទីបក្រសួងកសិកម្ម រុក្ខាប្រមាញ់ និងនេសាទ ១៩.ប្រទីបក្រសួងអភិវឌ្ឍន៍ជនបទ ២០.ប្រទីបក្រសួងសង្គមកិច្ច អតីតយុទ្ធជន និងយុវនីតិសម្បទា។

២១.ប្រទីបក្រសួងបរិស្ថាន ២២.ប្រទីបក្រសួងធនធានទឹក និងឧត្តុនិយម ២៣.ប្រទីបក្រសួងប្រៃសណីយ៍ និងទូរគមនាគមន៍ ២៤.ប្រទីបក្រសួងសាធារណការ និងដឹកជញ្ជូន ២៥.ប្រទីបក្រសួងការងារ និងបណ្តុះបណ្តាលវិជ្ជាជីវៈ ២៦.ប្រទីបក្រសួងមុខងារសាធារណៈ ២៧.ប្រទីបរដ្ឋបាលរាជធានីភ្នំពេញ ២៨.ប្រទីបសហភាពសហព័ន្ធយុវជនកម្ពុជា ២៩.ប្រទីបក្រសួងផែនការ ៣០.ប្រទីបក្រសួងសុខាភិបាល ៣១.ប្រទីបក្រសួងព័ត៌មាន ៣២.ប្រទីបក្រុមហ៊ុន វឌ្ឍនៈ ។

គណៈកម្មាធិការជាតិរៀបចំបុណ្យជាតិ-អន្តរជាតិ បានបញ្ជាក់បន្ថែមថា សម្រាប់ក្រសួង ស្ថាប័ន អង្គភាព រដ្ឋបាលខេត្ត និងក្រុមហ៊ុនឯកជន បើមានបំណងចង់ធ្វើប្រទីបចូលរួមបណ្តែតអបអរសាទរ ក្នុងព្រះរាជពិធីបុណ្យប្រពៃណីទំនៀមទម្លាប់ជាតិ ត្រូវដាក់ពាក្យស្នើសុំ និងផ្តល់គំនូសរូបភាពប្រទីប និងបទអត្ថាធិប្បាយរបស់ប្រទីបនីមួយៗ ផ្ញើមកអគ្គលេខាធិការដ្ឋានគណៈកម្មាធិការជាតិរៀបចំបុណ្យជាតិ-អន្តរជាតិ ឱ្យបានមុនថ្ងៃទី១០ ខែតុលា ឆ្នាំ២០២៤។

គួរបញ្ជាក់ថា នៅក្នុងឆ្នាំ២០២៤នេះ ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នឹងប្រព្រឹត្តទៅនៅថ្ងៃទី១៤-១៥-១៦ ខែវិច្ឆិកា នៅតាមដងទន្លេសាប មុខព្រះបរមរាជវាំង ដើម្បីបើកឱកាសជូនប្រជារាស្ត្រ បានចូលរួមទស្សនាកម្សាន្តសប្បាយរីករាយ ដោយមានការបណ្តែតប្រទីប អុជកាំជ្រួច ប្រគំតន្ត្រីសម័យ បុរាណ និងសម្តែងសិល្បៈ ទាំង៣រាត្រី៕

The post តាមតួលេខបឋម មានប្រទីបក្រុមហ៊ុនអ្នកឧកញ៉ា ១រូបគត់ ចូលរួមជាមួយប្រទីបរបស់រដ្ឋ បណ្តែតអបអរសាទរព្រះរាជពិធីបុណ្យអុំទូក ឆ្នាំ២០២៤ appeared first on .

ព្រះមហាក្សត្រ ប្រោសព្រះរាជទានគ្រឿងឥស្សរិយយស «ជាតូបការ» ដល់ អ្នកឧកញ៉ា សំអាង វឌ្ឍនៈ

ឧកញ៉ាដែនដី — Tue, 09 Jul 2024 00:17:55 +0000

ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានប្រោសព្រះរាជទានគ្រឿងឥស្សរិយយស «ជាតូបការ» ដល់ អ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ ប្រ៊ូវើរី រួមជាមួយសប្បុរសជន ៩អង្គ/រូបផ្សេងទៀត កាលពីថ្ងៃទី២៩ ខែឧសភា ឆ្នាំ២០២៤។

តាមរយៈព្រះរាជក្រឹត្យលេខ នស/រកត/០៥២៤/៥២៤ ព្រះមហាក្សត្របានប្រោសព្រះរាជទានគ្រឿងឥស្សរិយយសតាមលំដាប់ថ្នាក់ ប្រគេនព្រះសង្ឃ និងដល់សប្បុរសជនសរុបចំនួន ៣៦អង្គ/រូប។ ជាមួយគ្នានោះ គ្រឿងឥស្សរិយយស ជាតូបការ មានចំនួន ១០អង្គ/រូប រួមទាំង អ្នកឧកញ៉ា សំអាង វឌ្ឍនៈ។ រីឯ គ្រឿងឥស្សរិយយស សម្តេចព្រះមហាក្សត្រីយានី ព្រះស៊ីសុវត្ថិមុនីវង្ស កុសមៈនារីរ័ត្ន ថ្នាក់មហាសេរីវឌ្ឍន៍ មានចំនួន ១៤អង្គ/រូប ខណៈដែលគ្រឿងឥស្សរិយយស សម្តេចព្រះមហាក្សត្រីយានី ព្រះស៊ីសុវត្ថិមុនីវង្ស កុសមៈនារីរ័ត្ន ថ្នាក់មហាសេនា មានចំនួន ១២អង្គ/រូប។

សូមជម្រាបថា អ្នកឧកញ៉ា សំអាង វឌ្ឍនៈ ជាសប្បុរសជនមួយរូបដែលតែងបរិច្ចាគធនធានផ្ទាល់ខ្លួនជួយដល់សង្គម ទាំងផ្នែកអាណាចក្រនិងពុទ្ធចក្រ ដូចជា ការបរិច្ចាគជួយសាងសង់ហេដ្ឋារចនាសម្ព័ន្ធ ក្នុងតំបន់ប្រវត្ដិសាស្រ្ដយោធាកោះថ្ម X16 ការឧបត្ថម្ភភេសជ្ជៈដល់រដ្ឋបាលខេត្តក្នុងពិធីបុណ្យទានផ្សេងៗ ការឧបត្ថម្ភដល់ព្រឹត្តិការណ៍ស៊ីហ្គេម កីឡាប្រដាល់ និងព្រឹត្តិការណ៍កីឡាបាល់ទាត់ ហើយថ្មីៗកន្លងទៅនេះ អ្នកឧកញ៉ា ក៏ទើបនាំអង្ករចំនួន ៦០ តោនសម្រាប់ ១ឆ្នាំ និងភេសជ្ជៈរបស់ក្រុមហ៊ុនចំនួន ១២០កេស ជូនដល់ក្រសួងព័ត៌មានផងដែរ៕

The post ព្រះមហាក្សត្រ ប្រោសព្រះរាជទានគ្រឿងឥស្សរិយយស «ជាតូបការ» ដល់ អ្នកឧកញ៉ា សំអាង វឌ្ឍនៈ appeared first on .

អ្នកឧកញ៉ា ឧកញ៉ា ៥រូប បរិច្ចាគថវិកាជាច្រើនម៉ឺនដុល្លារសាងសង់ហេដ្ឋារចនាសម្ព័ន្ធនៅតំបន់ប្រវត្ដិសាស្រ្ដយោធាតេជោកោះថ្ម X16

រ៉េត សុកធា — Thu, 20 Jun 2024 04:06:50 +0000

អ្នកឧកញ៉ា ឧកញ៉ា ចំនួន៥រូប បានបរិច្ចាគថវិកាផ្ទាល់ខ្លួន ចូលរួមជាមួយរាជរដ្ឋាភិបាល ក្នុងការសាងសង់ហេដ្ឋារចនាសម្ព័ន្ធ ក្នុងតំបន់ប្រវត្ដិសាស្រ្ដយោធាកោះថ្ម X16។ នេះបើយោងតាមរបាយការណ៍របស់ លោក ជាម ច័ន្ទសោភ័ណ អភិបាលនៃគណៈអភិបាលខេត្ដត្បូងឃ្មុំ ថ្លែងជម្រាបសម្ដេចធិបតី ហ៊ុន ម៉ាណែត នៅក្នុងឱកាសដែលសម្ដេចធិបតី អញ្ជើញជាអធិបតី «ខួបលើកទី៤៧ទិវានៃការចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត ២០ មិថុនា ១៩៧៧ – ២០ មិថុនា ២០២៤ និងបញ្ចុះបឋមសិលាសាងសង់អគារទទួលភ្ញៀវ នៅតំបន់ប្រវត្តិសាស្ត្រយោធាតេជោកោះថ្ម X16» នៅព្រឹកថ្ងៃព្រហស្បតិ៍ ទី២០ ខែមិថុនា ឆ្នាំ២០២៤។

នៅក្នុងឱកាសនេះ លោក ជាម ច័ន្ទសោភ័ណ បានឱ្យដឹងថា «នៅក្នុងកំឡុងពេលប៉ុន្មានឆ្នាំចុងក្រោយនេះ គណៈកម្មាធិការសាងសង់វិមានឈ្នះ-ឈ្នះ ដឹកនាំដោយសម្ដេចពិជ័យសេនា ទៀ បាញ់ ឧបនាយករដ្ឋមន្រ្ដី រដ្ឋមន្រ្ដីក្រសួងការពារជាតិ បានបន្ដយកចិត្ដទុកដាក់អភិវឌ្ឍគម្រោងតំបន់ប្រវត្ដិសាស្រ្ដយោធាកោះថ្ម X16 និងបានបង្កើតក្រុមការងារទទួលបន្ទុកកិច្ចការអភិវឌ្ឍសម្រេចបានជាផ្លែផ្លាគួរកត់សម្គាល់»។

ជាមួយនឹងការសាងសងហេដ្ឋារចនាសម្ព័ន្ធ នៅក្នុងតំបន់ប្រវត្ដិសាស្រ្ដយោធាកោះថ្ម X16 នេះគឺទទួលបន្ទុកដឹកនាំសាងសង់ដោយ ឯកឧត្ដម នាយឧត្ដមសេនីយ៍ សៅ សុខា អគ្គមេបញ្ជារការរង និងជាមេបញ្ជាការកងរាជអាវុធហត្ថលើផ្ទៃប្រទេស និងជាប្រធានក្រុមការងាររៀបចំពិធីដឹងនាំ និងដំណើរការសាងសង់។

បើតាមលោក ជាម ច័ន្ទសោភ័ណ ការសាងសង់ហេដ្ឋារចនាសម្ព័ន្ធទាំងអស់នៅតំបន់ប្រវត្ដិសាស្រ្ដនេះ ដែលរួមមាន៖ អគារវេទិកាអចិន្ដ្រៃយ៍ចំនួន១ខ្នង, ទីលានបាល់ទាត់, ជីកស្រះចំនួន១ ដោយមានចម្លាក់ថ្មភក់រូបនាគ ព័ន្ធជុំវិញ, សាងសង់ប្រាង្គ និងចម្លាក់ព្រះអង្គគោកធ្លក, សាលាដំណាក់ ១ខ្នង, អគារមិត្ដភាព ១ខ្នង, ដាក់បង្គោល តបណ្ដាញអគ្គីសនី រៀបរំប្រព័ន្ធលូរំដោះទឹក ចាក់បេតុងធ្វើផ្លូវ, ដាំកូនឈើ ដាំស្មៅលម្អ និងធ្វើទីលានឧទ្ធម្ភាចក្រចំនួន៥ទីតាំង។

បន្ថែមទៀតនោះ ក៏មានស្ថាបនាផ្លូវក្រវ៉ាត់ព្រំដែនប្រវែង ១៤៤,៧៥៥គីឡូម៉ែត្រ, ស្ថាបនាផ្លូវក្រាលកៅស៊ូ ពីផ្លូវជាតិលេខ៧ មកដល់តំបន់ប្រវត្ដិសាស្រ្ដ យោធាកោះថ្ម X16 ប្រវែង ៩,៩គីឡូម៉ែត្រ, តម្លើងបង្គោលអង់តែន , សាងសង់សារៈមន្ទីកោះថ្ម និងបណ្ដាញអគ្គីសនី និងបំពាក់អំពូលបំភ្លឺផ្លូវ ព្រមទាំងអគារទទួលភ្ញៀវ និងអគារស្នាក់នៅ គ្រោងនឹងបញ្ចុះសីលា សាងសង់នៅថ្ងៃទី២០ ខែមិថុនានេះផងដែរ។

លោក ជាម ច័ន្ទសោភ័ណ បានឱ្យគូសបញ្ជាក់ថា បច្ចុប្បន្ន គិតត្រឹមថ្ងៃទី២០ ខែមិថុនា ក្រុមការងារទទួលបានថវិការពីសប្បុរសជនក្នុងស្រុកសរុបចំនួន ៤៩០ពាន់ដុល្លារហើយ ដែលថវិការទាំងនេះ បានពីសប្បុរសជនរួមមាន អ្នកឧកញ៉ា សំ អាង, អ្នកឧកញ៉ា ឈុន លាង, អ្នកឧកញ៉ា សំអាង វឌ្ឍនៈ ទឹកប្រាក់២៤០ពាន់ដុល្លារ, លោកជំទាវ ឧកញ៉ា សុខ ស៊ីដា ទឹកប្រាក់ ១សែន ៨ម៉ឺនដុល្លារ, ឯកឧត្តម លឹម ប៊ុណ្ណា ទឹកប្រាក់ ៥ម៉ឺនដុល្លារ និង លោកឧកញ៉ា ស៊ូ ជុងជៀន ទឹកប្រាក់២ម៉ឺនដុល្លារ។

សូមជម្រាបជូនថា បើតាម លោក ជាម ច័ន្ទសោភ័ណ ដំណើរការសាងសង់ហេដ្ឋារចនាសម្ព័ន្ធទាំងអស់នៅក្នុងតំបន់ប្រវត្ដិសាស្រ្ដយោធាកោះថ្ម X16 នេះ គឺប្រើប្រាស់ទាំងថវិការបស់សប្បុរសជននានា និងថវិកាគាំទ្ររបស់ក្រសួងការពារជាតិប្រទេសវៀតណាម ដោយមិនប្រើប្រាស់ថវិការបស់រដ្ឋឡើយ៕

The post អ្នកឧកញ៉ា ឧកញ៉ា ៥រូប បរិច្ចាគថវិកាជាច្រើនម៉ឺនដុល្លារសាងសង់ហេដ្ឋារចនាសម្ព័ន្ធនៅតំបន់ប្រវត្ដិសាស្រ្ដយោធាតេជោកោះថ្ម X16 appeared first on .

សេដ្ឋីខ្មែរតែ ៣រូបប៉ុណ្ណោះ បានចូលជួបព្រះមហាក្សត្រប្រ៊ុយណេ ក្នុងព្រះរាជពិធីសោយព្រះក្រយាព្រឹក ជាមួយសម្តេចតេជោ ហ៊ុន សែន និងកូនប្រុសទាំង៣

ឧកញ៉ាដែនដី — Tue, 30 Apr 2024 13:48:33 +0000

អ្នកឧកញ៉ា សំ អាង និងអ្នកឧកញ៉ា ឈុន លាង សហស្ថាបនិកក្រុមហ៊ុន វឌ្ឍនៈ ប្រ៊ូវើរី ព្រមទាំង អ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ ប្រ៊ូវើរី នៅព្រឹកថ្ងៃទី៣០ ខែមេសា ឆ្នាំ២០២៤នេះ មានកិត្តិយសដ៏ខ្ពង់ខ្ពស់ចូលជួបសម្តែងការគួរសមចំពោះព្រះចៅស៊ុលតង់ ហាជី ហាសិនណល់ ប៊ូលហ្កះ ព្រះមហាក្សត្រ នៃប្រទេសប្រ៊ុយណេ ដារូសាឡឹម និងព្រះរាជបុត្រ ក្នុងព្រះរាជពិធីសោយព្រះក្រយាព្រឹក ជាមួយសម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងកូនប្រុសទាំង៣។

បើតាមអគ្គនាយកដ្ឋានទូរទស្សន៍ជាតិកម្ពុជា បានឱ្យដឹងថា ព្រះចៅស៊ុលតង់ ហាជី ហាសិនណល់ ប៊ូលហ្កះ និងព្រះរាជបុត្រ អាប់ឌុល ម៉ាទីន, សម្ដេចតេជោ ហ៊ុន សែន ប្រធានព្រឹទ្ធសភា, សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា, ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងឯកឧត្តម ឧត្តមសេនីយ៍ឯក ហ៊ុន ម៉ានិត មេបញ្ជាការរងកងទ័ពជើងគោក បានយាងនិងអញ្ជើញចូលរួមក្នុងព្រះរាជពិធីសោយព្រះក្រយាព្រឹក ធ្វើឡើងនៅសណ្ឋាគាររ៉ូសរូដ ភ្នំពេញ ដែលជាសណ្ឋាគារដ៏ប្រណិតកណ្តាលរាជធានីភ្នំពេញ ស្ថិតក្នុងមជ្ឈមណ្ឌលពាណិជ្ជកម្ម វឌ្ឍនៈ កាពីតាល ក្រោមការគ្រប់គ្រង់ដោយក្រុមហ៊ុន វឌ្ឍនៈ ប្របភើធី។

ក្នុងឱកាសដ៏ឧត្តុង្គឧត្តមនេះ ក្រុមគ្រួសារអ្នកឧកញ៉ា ពិតជាមានមោទកភាពប្រកបដោយសេចក្តីសោមនស្សរីករាយ ដែលព្រះមហាក្សត្រ នៃប្រទេសប្រ៊ុយណេ ដារូសាឡឹម និងព្រះរាជបុត្រ ព្រះអង្គបានសព្វព្រះរាជហឫទ័យជ្រើសរើសយកសណ្ឋាគាររ៉ូសរូដ ភ្នំពេញ ធ្វើជាកន្លែងគង់ប្រថាប់ និងព្រះរាជពិធីសោយព្រះក្រយា។

សណ្ឋាគារលំដាប់ផ្កាយ៥ រ៉ូសរូដ ភ្នំពេញ (Rosewood Phnom Penh) ដែលស្ថិតនៅចាប់ពីជាន់ទី១៤ នៃអគារវឌ្ឍន: (Vattanac Capital Tower) របស់អ្នកឧកញ៉ា សំអាង វឌ្ឍនៈ គឺជាសណ្ឋាគារមួយ ដែលគេទទួលស្គាល់ថា ជាសណ្ឋាគារដ៏ប្រណិតបំផុតមួយនៅប្រទេសកម្ពុជា តំបន់អាស៊ីអាគ្នេយ៍ និងតំបន់អាស៊ីប៉ាស៊ីហ្វិក ព្រមទាំងត្រូវបានគេទទួលស្គាល់ជាសណ្ឋាគារដ៏ល្អបំផុតមួយ ពីទស្សនាវដ្តី និងស្ថាប័នល្បីៗកម្រិតពិភពលោក៕

The post សេដ្ឋីខ្មែរតែ ៣រូបប៉ុណ្ណោះ បានចូលជួបព្រះមហាក្សត្រប្រ៊ុយណេ ក្នុងព្រះរាជពិធីសោយព្រះក្រយាព្រឹក ជាមួយសម្តេចតេជោ ហ៊ុន សែន និងកូនប្រុសទាំង៣ appeared first on .

ព្រះមហាក្សត្រប្រុយណេ និងព្រះរាជបុត្រ យាងសោយព្រះក្រយាពេលព្រឹក ជាមួយសម្តេចតេជោ ហ៊ុន សែន និងកូនប្រុសទាំង៣ នៅសណ្ឋាគារលំដាប់ផ្កាយ៥ របស់អ្នកឧកញ៉ា១រូប

ឧកញ៉ាដែនដី — Tue, 30 Apr 2024 04:36:32 +0000

នៅព្រឹកថ្ងៃអង្គារ ទី៣០ ខែមេសា ឆ្នាំ២០២៤នេះ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា រួមជាមួយកូនប្រុសទាំងបី គឺសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា, ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងឯកឧត្តម ឧត្តមសេនីយ៍ឯក ហ៊ុន ម៉ានិត មេបញ្ជាការរងកងទ័ពជើងគោក បានអញ្ជើញចូលរួមក្នុងពិធីអាហារពេលព្រឹក ជាមួយព្រះចៅស៊ុលតង់ ហាជី ហាសិនណល់ ប៊ូលហ្កះ ព្រះមហាក្សត្រ នៃប្រទេសប្រុយណេ ដារូសាឡឹម និងព្រះរាជបុត្រ អាប់ឌុល ម៉ាទីន។

ព្រះរាជពិធីសោយព្រះក្រយាព្រឹករបស់ព្រះចៅស៊ុលតង់ និងព្រះរាជបុត្រ ជាមួយសម្តេចតេជោ ហ៊ុន សែន និងកូនប្រុសទាំង៣ ត្រូវបានធ្វើឡើងនៅសណ្ឋាគារលំដាប់ផ្កាយ៥ រូសវូត ភ្នំពេញ (Rosewood Phnom Penh) ក្នុងអគារវឌ្ឍនៈ របស់ អ្នកឧកញ៉ា សំអាង វឌ្ឍនៈ ដែលជាសណ្ឋាគារដ៏ប្រណិតកណ្តាលរាជធានីភ្នំពេញ។ ព្រះរាជពិធីសោយព្រះក្រយានោះ បានប្រព្រឹត្តទៅក្រោមបរិយាសរីករាយ និងស្និទ្ធស្នាលបំផុតប្រៀបដូចជាគ្រួសារតែមួយ។

ព្រះមហាក្សត្រប្រុយណេ បានយាងមកកាន់ប្រទេសកម្ពុជានាពេលនេះ គឺដើម្បីសាកសួរសុខទុក្ខសម្តេចតេជោ ហ៊ុន សែន ដែលព្រះអង្គបានរាប់អានជាប្អូនធម៌ជាយូរមកហើយ និងមិនមែនជាព្រះរាជដំណើរទស្សនកិច្ចផ្លូវការនោះឡើយ។ តាមការបញ្ជាក់របស់សម្តេចតេជោ ហ៊ុន សែន នៅលើបណ្តាញសង្គមបានឱ្យដឹងថា ព្រះមហាក្សត្រប្រុយណេ លោក ថាក់ស៊ីន ស៊ីណាវ៉ាត្រា និងសម្តេចតេជោ មានការរាប់អានគ្នាយ៉ាងជ្រាលជ្រៅបំផុត។ សម្តេចឱ្យដឹងទៀតថា ក្នុងនោះ ព្រះចៅស៊ុលតង់ មានព្រះជន្ម៧៥ព្រះវស្សា ត្រូវបានចាត់ទុកជាបង លោក ថាក់ស៊ីន មានអាយុ ៧៤ឆ្នាំ ជាប្អូនទី១ ហើយសម្តេចតេជោ ហ៊ុន សែន មានអាយុ ៧២ឆ្នាំ ជាប្អូនពៅ។

សណ្ឋាគារលំដាប់ផ្កាយ៥ Rosewood Phnom Penh ដែលកាន់កាប់ ១៤ជាន់កំពូល នៃអគារវឌ្ឍន: (Vattanac Capital Tower) របស់អ្នកឧកញ៉ា សំអាង វឌ្ឍនៈ គឺជាសណ្ឋាគារមួយ ដែលគេទទួលស្គាល់ថា ជាសណ្ឋាគារដ៏ប្រណិតបំផុតមួយនៅប្រទេសកម្ពុជា តំបន់អាស៊ីអាគ្នេយ៍ និងតំបន់អាស៊ីប៉ាស៊ីហ្វិក ព្រមទាំងត្រូវបានគេទទួលស្គាល់ជាសណ្ឋាគារដ៏ល្អបំផុតមួយ ពីទស្សនាវដ្តី និងស្ថាប័នល្បីៗកម្រិតពិភពលោក។ ជាក់ស្តែង នៅឆ្នាំ២០២២នេះ សណ្ឋាគារមួយនេះ បានឈ្នះពានរង្វាន់ចំនួន៤ គឺ ១)សណ្ឋាគារលំដាប់កំពូលទាំង១០ នៅអាស៊ីអាគ្នេយ៍ (ទស្សនាវដ្តីអាមេរិក Condé Nast Traveler), ២)ភោជនីយដ្ឋានល្អបំផុតលំដាប់លេខ១នៅកម្ពុជា (ទស្សនាវដ្តីអាមេរិក TRAVEL + LEISURE), ៣)សណ្ឋាគារល្អបំផុតនៅក្នុងទីក្រុងលំដាប់លេខ២នៅកម្ពុជា (ទស្សនាវដ្តីអាមេរិក TRAVEL + LEISURE) និង ៤)សណ្ឋាគារជាទីពេញចិត្តរបស់អ្នកចាត់ការទូទៅ ចំណាត់ថ្នាក់លេខ១នៅកម្ពុជា (ទស្សនាវដ្តីអាមេរិក TRAVEL + LEISURE) ផងដែរ៕

The post ព្រះមហាក្សត្រប្រុយណេ និងព្រះរាជបុត្រ យាងសោយព្រះក្រយាពេលព្រឹក ជាមួយសម្តេចតេជោ ហ៊ុន សែន និងកូនប្រុសទាំង៣ នៅសណ្ឋាគារលំដាប់ផ្កាយ៥ របស់អ្នកឧកញ៉ា១រូប appeared first on .

ក្រុមហ៊ុន វឌ្ឍនៈ ប្រ៊ូវើរី បើកយុទ្ធនាការ “Love. Top 5” ដែលចូលរួមដោយបុគ្គលិកគ្រប់ផ្នែក គ្រប់ជាន់ថ្នាក់ចុះសំណេះសំណាល និងសួរសុខទុក្ខដៃគូអាជីវកម្ម

ឧកញ៉ាដែនដី — Tue, 12 Mar 2024 12:20:11 +0000

យុទ្ធនាការ “Love. Top 5” រៀបចំឡើងដោយក្រុមហ៊ុន វឌ្ឍនៈ ប្រ៊ូវើរី ចូលរួមដោយបុគ្គលិកគ្រប់ជាន់ថ្នាក់ និងគ្រប់ផ្នែក ដែលនឹងធ្វើដំណើរចុះទៅតាមទីផ្សារដោយផ្ទាល់ ក្នុងគោលបំណងដើម្បីជួបសំណេះសំណាលសួរសុខទុក្ខ ចែករំលែកក្តីស្រលាញ់ ជាមួយអតិថិជន ដៃគូអាជីវកម្ម ក៏ដូចជាស្តាប់ពីមតិយោបល់របស់អតិថិជន ស្វែងយល់បន្ថែមអំពីពួកគាត់ ជាពិសេសផ្តល់នូវទំនុកចិត្ត ភាពកក់ក្តៅ ការយកចិត្តទុកដាក់ជាមួយពួកគាត់ ព្រមទាំងផ្តល់នូវកញ្ចប់ប្រូម៉ូសិនពិសេសៗ ពី វឌ្ឍនៈ ប្រ៊ូវើរី ដើម្បីត្រៀមអបអរសាទរពិធីបុណ្យចូលឆ្នាំថ្មីប្រពៃណីខ្មែរនាពេលឆាប់ៗនេះ។

អ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ ប្រ៊ូវើរី មានប្រសាសន៍ថា “Love. Top 5 ជាយុទ្ធនាការថ្មី មិនធ្លាប់មានពីមុន ដែលយើងធ្វើឡើងនាដើមឆ្នាំ ២០២៤ នេះ គឺដើម្បីផ្លាស់ប្តូរបទពិសោធន៍ថ្មី សម្រាប់បុគ្គលិកគ្រប់ជាន់ថ្នាក់របស់យើង ដែលពួកគាត់នឹងចុះទៅជួបអតិថិជនដោយផ្ទាល់ ចែករំលែកក្តីស្រលាញ់ ផ្តល់ភាពកក់ក្តៅ បង្កើនទំនុកចិត្ត រឹតចំណងមិត្តភាពឲ្យដូចជាគ្រួសារតែមួយ ជាមួយអតិថិជន ដៃគូអាជីវកម្ម នៅទូទាំងប្រទេស។ នៅក្រុមហ៊ុន វឌ្ឍនៈ ប្រ៊ូវើរី យើងនៅតែរក្សាឆន្ទៈ និងភាពច្បាស់លាស់ ដោយជំរុញឲ្យមានភាពជោគជ័យ ឆ្ពោះទៅមុខទាំងអស់គ្នា ជាមួយអតិថិជន ដៃគូអាជីវកម្ម នៅគ្រប់កាលៈទេសៈ ហើយយើងនូវតែបន្តគាំទ្រអាជីវកម្មរបស់អតិថិជនឲ្យកាន់តែរីកចម្រើន តាមរយៈការផ្តល់ជូននូវផលិតផលដែលមានគុណភាពខ្ពស់ ស្តង់ដារអន្តរជាតិ រសជាតិឆ្ងាញ់ប្រកបដោយប្រណិតភាព និងភាពថ្លៃថ្នូរ ថែមទាំងមានឱកាសទទួលបានកាដូលើកទឹកចិត្ត និងឈ្នះរង្វាន់ជាច្រើនសន្ធឹកសន្ធាប់។”

យុទ្ធនាការ “Love.Top 5” ក៏ផ្តល់ជាឱកាសសម្រាប់ក្រុមការងារដែលមិនមែនជាផ្នែកលក់ អាចស្វែងយល់អំពីការងារផ្នែកលក់ ផ្លាស់ប្តូរបទពិសោធន៍ ក៏ដូចជាយល់ដឹងអំពីស្ថានភាពទីផ្សារជាក់ស្តែង រួមទាំងការប្រកួតប្រជែងរវាងក្រុមនីមួយៗ ដើម្បីស្វែងរកក្រុមជើងខ្លាំងទាំង៥ (Top 5)។ យុទ្ធនាការនេះ ប្រពឹត្តឡើងទូទាំងប្រទេស មានរយៈពេល៣ថ្ងៃ ចាប់ពីថ្ងៃទី ១២, ១៣, ១៤ ខែមីនា ឆ្នាំ ២០២៤ ហើយអតិថិជន កុំភ្លេចចូលរួមថតរូប និងលេងកម្សាន្តជាមួយក្រុមការងារ “Love. Top 5” របស់យើង ដើម្បីមានឱកាសឈ្នះរង្វាន់អនុស្សាវរីយជាច្រើន។

The post ក្រុមហ៊ុន វឌ្ឍនៈ ប្រ៊ូវើរី បើកយុទ្ធនាការ “Love. Top 5” ដែលចូលរួមដោយបុគ្គលិកគ្រប់ផ្នែក គ្រប់ជាន់ថ្នាក់ចុះសំណេះសំណាល និងសួរសុខទុក្ខដៃគូអាជីវកម្ម appeared first on .

ឆ្នាំរោង ដ្រាហ្គិនបៀរ ផ្ដល់លាភសំណាងដ៏មហាសាលរង្វាន់រថយន្ត Toyota Hilux និងមាសសុទ្ធរហូតដល់ 168 ក្រាម

អ្នកឧកញ៉ាវត្តភ្នំ — Sat, 02 Mar 2024 06:17:43 +0000

អបអរសាទរឆ្នាំថ្មី ឆ្នាំរោង ឆ្នាំ Dragon ដែលជាឆ្នាំជោគ ឆ្នាំជ័យ ឆ្នាំសប្បាយនាំលាភសំណាងដល់អ្នករាល់គ្នានៅគ្រប់ទិសទី។ ដ្រាហ្គិន ព្រីមៀមដាកបៀរ និងដ្រាហ្គិន ណៃត្រូ បានចែករំលែកពេលវេលាសប្បាយ លាភសំណាង និងបទពិសោធន៍ថ្មី ប្លែកមិនធ្លាប់មាន ជាមួយអតិថិជននៅក្នុងកម្មវិធី THE DRAGON BOY CONCERT របស់កំពូលតារាចម្រៀងរ៉េបលោក G-Devith និងភ្ញៀវកិត្តិយសពិសេសអ្នកនាង Tep Boprek។

លើសពីភាពសប្បាយ លើសពីរសជាតិ និងគុណភាព កាន់តែពិសេសនៅឆ្នាំនេះ ដ្រាហ្គិន ព្រីមៀមដាកបៀរ នឹងផ្តល់លាភសំណាងដ៏មហាសាលដល់អតិថិជន ដូចជារង្វាន់ធំរថយន្តស៊េរីទំនើប Toyota Hilux ម៉ូតូ Honda Click ស៊េរីថ្មី មាសសុទ្ធរហូតដល់ 168 ក្រាម ទឹកប្រាក់សុទ្ធរាប់លានរៀល និងរង្វាន់ជាច្រើនសន្ធឹកសន្ធាប់នៅក្រោមក្រវិលកំប៉ុងដ្រាហ្គិន។

អ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ ប្រ៊ូវើរី មានប្រសាសន៍ថា៖ “ដ្រាហ្គិន ព្រីមៀមដាកបៀរ និងដ្រាហ្គិន ណៃត្រូ គឺជាសក្ខីកម្មនៃការបេ្តជ្ញាចិត្ត និងភាពច្នៃប្រឌិតខ្ពស់របស់យើងខ្ញុំ ក្នុងការផលិតស្រាបៀរដែលមានគុណភាពលំដាប់អន្តរជាតិ រសជាតិថ្មីប្លែកមិនធ្លាប់មាន ដើម្បីផ្តល់ជូននូវបទពិសោធន៍ និងទម្លាប់ថ្មីក្នុងការទទួលទានស្រាបៀរប្រណិតទឹកខ្មៅនៅក្នុងប្រទេសកម្ពុជា ដែលអាចឲ្យអតិថិជនចាប់ផ្តើមសប្បាយជាមួយរសជាតិ និងគុណភាពដ៏ពិតប្រាកដ។ ឆ្នាំនេះ ពិតជាពិសេសសម្រាប់ដ្រាហ្គិន ព្រោះជាឆ្នាំរោង ឆ្នាំ Dragon ដែលយើងនឹងបង្កើតភាពភ្ញាក់ផ្អើល ហើយបន្តចែករំលែកពេលវេលាសប្បាយ ព្រមទាំងផ្តល់លាភសំណាងដ៏មហាសាលដល់អតិថិជននៅគ្រប់ទិសទី។”

អតិថិជននឹងទទួលបានទាំងរសជាតិ និងគុណភាព ទាំងភាពសប្បាយរីករាយ ព្រមទាំងលាភសំណាងដ៏មហាសាលនៅក្រោមក្រវិលកំប៉ុងដ្រាហ្គិន។ ផ្តើមសប្បាយ ផ្តើមឈ្នះជាមួយដ្រាហ្គិន។ បច្ចុប្បន្ន ក្រោមស្លាកសញ្ញា ដ្រាហ្គិន មានផលិតផលក្រាហ្វបៀរប្រណិតទឹកខ្មៅចំនួនពីរ ដែលសម្រិតសម្រាំង ផលិតឡើងដើម្បីភាពឥតខ្ចោះរបស់ក្រុមហ៊ុន វឌ្ឍនៈ ប្រ៊ូវើរី គឺដ្រាហ្គិន ព្រីមៀមដាកបៀរ និងដ្រាហ្គិន ណៃត្រូ។

ដ្រាហ្គិន ព្រីមៀមដាកបៀរ ជាក្រាហ្វបៀរប្រណិតទឹកខ្មៅដំបូងគេនៅកម្ពុជា ហើយទទួលស្គាល់រសជាតិ និងគុណភាពដោយអ្នកជំនាញស្រាបៀរអន្តរជាតិ ដែលបានឈ្នះពានរង្វាន់ចំនួនពីរផ្ទួនគ្នាក្នុងកម្មវិធីស្រាបៀរលំដាប់ពិភពលោក World Beer Awards នៅឆ្នាំ២០២២ ព្រមទាំងបានឈ្នះមេដាយមាសពី Monde Selection Award ឆ្នាំ ២០២៣។ គាស់ក្រវិលកំប៉ុងដ្រាហ្គិននៅថ្ងៃនេះ ហើយទទួលយកលាភសំណាងទាំងអស់គ្នា។

ដ្រាហ្គិន ណៃត្រូ ត្រូវបានផលិតឡើងដើម្បីភាពឥតខ្ចោះតាមបច្ចេកវិទ្យាថ្មីចុងក្រោយ ដោយប្រើប្រាស់គ្រឿងផ្សំគុណភាពខ្ពស់រួមបញ្ចូលនីត្រូហ្សែន (N2) ធ្វើឲ្យដ្រាហ្គិន ណៃត្រូ មានពពុះហ្វូមតូចៗយ៉ាងច្រើន កំហាប់ឡើងខាប់ និងគ្រីមពណ៌ត្នោតនៅផ្នែកខាងលើយ៉ាងក្រាស់ ខុសប្លែកពីស្រាបៀរទូទៅ បង្កើតបានជារសជាតិកាន់តែសម្បូរបែប ក្លិនឈ្ងុយពិសេស និងឆ្ងាញ់ជាប់មាត់។ ផ្តើមសប្បាយជាមួយដ្រាហ្គិន ៕

The post ឆ្នាំរោង ដ្រាហ្គិនបៀរ ផ្ដល់លាភសំណាងដ៏មហាសាលរង្វាន់រថយន្ត Toyota Hilux និងមាសសុទ្ធរហូតដល់ 168 ក្រាម appeared first on .

អ្នកឧកញ៉ា សំអាង វឌ្ឍនៈ នាំយកអង្ករ ៦០តោន និងភេសជ្ជៈ ១២០កេស ជូនដល់ក្រសួងព័ត៌មាន ដើម្បីអនុវត្តកម្មវិធីគាំពារមន្ត្រីរាជការ

ឧកញ៉ាដែនដី — Fri, 26 Jan 2024 02:17:54 +0000

អ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ ប្រ៊ូវើរី បានអញ្ជើញចូលជួបពិភាក្សាការងារជាមួយលោក នេត្រ ភក្ត្រា រដ្ឋមន្រ្តីក្រសួងព័ត៌មាន និងបាននាំយកនូវអង្ករចំនួន ៦០ តោនសម្រាប់ ១ឆ្នាំ និងភេសជ្ជៈរបស់ក្រុមហ៊ុនចំនួន ១២០កេស ជូនដល់ក្រសួងព័ត៌មាន ដើម្បីអនុវត្តកម្មវិធីគាំពារមន្ត្រីរាជការរបស់ក្រសួង កាលពីរសៀលថ្ងៃទី២៥ ខែមករា ឆ្នាំ២០២៤។

កម្មវិធីជួបពិភាក្សា និងប្រគល់ទទួលខាងលើនេះ បានធ្វើឡើងនៅទីស្តីការក្រសួងព័ត៌មាន ដែលក្នុងនោះអ្នកឧកញ៉ា សំអាង វឌ្ឍនៈ បានប្រគល់ជូនអង្ករចំនួន ៦០តោន រួមជាមួយភេសជ្ជៈ Krud និងភេសជ្ជៈ V-Active ជាច្រើនកេស។ ជាមួយគ្នានោះ លោករដ្ឋមន្ត្រីក្រសួងព័ត៌មានក៏បានប្រគល់ជូននូវលិខិតថ្លែងអំណរគុណដល់អ្នកឧកញ៉ា អគ្គនាយកក្រុមហ៊ុន វឌ្ឍនៈ ប្រ៊ូវើ ផងដែរ។

តាមការបញ្ជាក់លើបណ្តាញសង្គម លោក នេត្រ ភក្ត្រា រដ្ឋមន្រ្តីក្រសួងព័ត៌មាន បានឱ្យដឹងថា ក្រសួងព័ត៌មានបានអនុវត្តកម្មវិធីគាំពារមន្ត្រីរាជការដោយបានឧបត្ថម្ភជាប្រចាំខែ នូវអង្ករនិងគ្រឿងឧបភោគបរិភោគខ្លះៗជូនមន្ត្រីរាជការ ដែលមានការខ្វះខាតក្នុងជីវភាព។ លោករដ្ឋមន្ត្រី បានបន្ថែមដូច្នេះថា៖ “ក្នុងនាមថ្នាក់ដឹកនាំនិងមន្ត្រីរាជការនៃក្រសួងព័ត៌មាន ខ្ញុំសូមអរគុណចំពោះអ្នកឧកញ៉ា និងក្រុមហ៊ុន វឌ្ឍនៈ ប្រ៊ូវើរី ដែលបានផ្តល់ការគាំទ្រ”។

សូមជម្រាបជូនថា លោក នេត្រ ភក្ត្រា រដ្ឋមន្រ្តីក្រសួងព័ត៌មាន មានការគិតគូខ្ពស់ចំពោះសុខមាលភាព និងជីវភាពរស់នៅរបស់មន្រ្តីរាជការរបស់ក្រសួង ដោយលោកបានដាក់ចេញវិធានការគាំទ្រសំខាន់ៗមួយចំនួនដូចជា៖ ១)ក្រសួងព័ត៌មាន បានសហការជាមួយ មជ្ឈមណ្ឌលរោគវិនិច្ឆ័យ ប៊ីយ៉ូមេឌីក ដើម្បីទទួលបានការបញ្ចុះតម្លៃ ៣០% លើសេវាពិនិត្យសុខភាព, ២)បង្កើតជាទារកដ្ឋាន សម្រាប់ឱ្យមន្រ្តីជាស្រ្តីមានទីកន្លែងបំបៅដោះកូន មានកន្លែងក្មេងលេង និងមានបណ្ណាល័យអានសៀវភៅថែមទៀត, ៣)ផ្តល់ជាអង្ករ និងត្រីខ កំប៉ុង ជារៀងរាល់ខែដល់មន្រ្តីដែលមានជីវភាពខ្វះខាត ប្រមាណ ៣០០ នាក់, ៤)គិតគូពីគោលការណ៍ ក.៣ កើត ការ និងកប់, ៥)ការរៀបចំទីតាំងឱ្យមានផាសុខភាពសម្រាប់មន្រ្តីរាជការបំពេញកិច្ចការងារ៕

The post អ្នកឧកញ៉ា សំអាង វឌ្ឍនៈ នាំយកអង្ករ ៦០តោន និងភេសជ្ជៈ ១២០កេស ជូនដល់ក្រសួងព័ត៌មាន ដើម្បីអនុវត្តកម្មវិធីគាំពារមន្ត្រីរាជការ appeared first on .

វឌ្ឍនៈ ប៊្រូវើរី ដាក់សម្ពោធម៉ាកសញ្ញាគ្រុឌថ្មី គឺស្រាបៀរ គ្រុឌ ឡៃ ផលិតពីបច្ចេកវិទ្យាថ្មីចុងក្រោយ រក្សានូវរសជាតិដើម ស្រាលស្រទន់ និងស្រស់បំផុត

អ្នកឧកញ៉ាវត្តភ្នំ — Thu, 25 Jan 2024 11:28:04 +0000

ក្រុមហ៊ុន វឌ្ឍនៈ ប៊្រូវើរី កាលពីថ្ងៃទី២៤ មករា កន្លងទៅ បានដាក់សម្ពោធជាផ្លូវការស្រាបៀរថ្មី ក្រោមម៉ាកសញ្ញាគ្រុឌ គឺស្រាបៀរគ្រុឌ ឡៃ ផលិតឡើងពីបច្ចេកវិទ្យាថ្មីចុងក្រោយ Flash Pasteurization ដែលនាំមកនូវបទពិសោធន៍ និងជម្រើសរសជាតិថ្មីឆ្លើយតបតាមតម្រូវការអតិថិជនដែលនិយមចូលចិត្តស្រាបៀរដែលមានរសជាតិដើមថ្មីស្រស់។កម្មវិធីសម្ពោធនេះប្រព្រឹត្តទៅនៅលើសូរ៉ា ស្កាយបារ ជាន់ទី៣៧ ដ៏ប្រណិត និងពេញនិមយនៃអគារដ៏ស្កឺមស្កៃ វឌ្ឍនៈ កាពីតាល់ ដោយមានការចូលរួមដោយអ្នកឧកញ៉ា សំអាង និង អ្នកឧកញ៉ា ឈុន លាង សហស្ថាបនិកក្រុមហ៊ុន វឌ្ឍនៈ ប៊្រូវើរី, អ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ ប៊្រូវើរី, ដៃគូចែកចាយ, និងតារាតំណាងរបស់ក្រុមហ៊ុន វឌ្ឍនៈ ប៊្រូវើរី យ៉ាងច្រើនកុះករ។

ស្រាបៀរ គ្រុឌ ឡៃ គឺជាសមិទ្ធផលទី១៣ របស់ក្រុមហ៊ុន វឌ្ឍនៈ ប៊្រូវើរី ដែលបានឆ្លងកាត់ដំណើរការផលិតតាមបច្ចេកវិទ្យាថ្មីចុងក្រោយបំផុត និងវេចខ្ចប់យ៉ាងផ្ចិតផ្ចង់ និងយកចិត្តទុកដាក់ដើម្បីរក្សាបាននូវរសជាតិដើម ថ្មី ស្រស់បំផុត ជាមួយនឹងក្លិនក្រអូបប្រហើរពីស្រូវសាឡី និងផ្កាហប់ ផ្តល់បាននូវរសជាតិដ៏ឈ្ងុយឆ្ងាញ់ ស្រាលស្រទន់ មានកាឡូរីទាបត្រឹមតែ ៩៨ កាឡូរី ងាយស្រួលទទួលទាន។

អ្នកឧកញ៉ា សំអាង វឌ្ឍនៈ នាយកប្រតិបត្តិក្រុមហ៊ុន វឌ្ឍនៈ ប្រ៊ូវើរី មានប្រសាសន៍ថា “ស្រាបៀរ គ្រុឌ ឡៃ គឺជាការពង្រីកបន្ថែមផលិតផលក្នុងម៉ាកសញ្ញាគ្រុឌ និងសម្រិតសម្រាំងឡើងជាពិសេសសម្រាប់មនុស្សសម័យថ្មី ដែលមោះមុត ជឿជាក់ និងមានរសនិយមបែបថ្មី។ គ្រុឌនៅតែបន្តចែករំលែកភាពរីករាយនិងពេលវេលាល្អសម្រាប់រាល់ការជួបជុំ ជាមួយនឹងពាក្យស្លោក ពេលវេលាល្អ នៅតែជាពេលវេលាជាមួយគ្រុឌ។”

គួរបញ្ជាក់ថា ស្រាបៀរគ្រុឌ ឡៃ ជាសមិទ្ធផលថ្មីទី ១៣ របស់ក្រុមហ៊ុន វឌ្ឍនៈ ប្រ៊ូវើរី បន្ទាប់ពីបានដាក់ដំណើរការផលិតផលជាច្រើនរួមមាន ស្រាបៀរវឌ្ឍនៈ វឌ្ឍនៈ ឡៃ ស្រាបៀរគ្រុឌ ស្រាបៀរប្រណិតទឹកខ្មៅដ្រាហ្គិន ភេសជ្ជៈប៉ូវកម្លាំងគ្រុឌ ភេសជ្ជៈប៉ូវកម្លាំងគ្រុឌអាយស៍ ភេសជ្ជៈប៉ូវកម្លាំងគ្រុឌកូឡា ភេសជ្ជៈកីឡា វី-អាកទីវ វី-អាកទីវ ក្រហម វី-អាកទីវ បៃតង និងភេសជ្ជៈកីឡា វី-អាកទីវ បៃតង ព្រមទាំងភេសជ្ជៈកីឡា វី-អាកទីវ ក្រហម ដែលផលិតផលទាំងអស់សុទ្ធសឹងតែទទួលបានការគាំទ្រយ៉ាងខ្លាំងពីអតិថិជនគ្រប់ទិសទី ព្រមទាំងទទួលបានពានរង្វាន់ពីស្ថាប័ន អន្តរជាតិជាច្រើនដូចជា Monde Selection និង World Beer Awards។

The post វឌ្ឍនៈ ប៊្រូវើរី ដាក់សម្ពោធម៉ាកសញ្ញាគ្រុឌថ្មី គឺស្រាបៀរ គ្រុឌ ឡៃ ផលិតពីបច្ចេកវិទ្យាថ្មីចុងក្រោយ រក្សានូវរសជាតិដើម ស្រាលស្រទន់ និងស្រស់បំផុត appeared first on .