តាមសេចក្តីប្រកាសព័ត៌មាន បានឱ្យដឹងថា ចាប់ពីថ្ងៃដែលរដ្ឋបាលខេត្តកំពង់ចាម បានដាក់ចេញ​នូវវិធានការរដ្ឋបាល​ជាបន្តបន្ទាប់​ឱ្យម្ចាស់ដី​ធ្វើការកកាយថ្មចេញ​ពីផ្ទៃ​ទន្លេវិញនោះ គឺរដ្ឋបាលខេត្តបាន​ធ្វើការ​ចាត់ចែង ដឹកនាំ រៀបចំ និង​តាមដាន​ជាប់ជាប្រចាំ តាមរយៈ​ការចុះ​ទៅ​ដល់​ទីតាំង​ផ្ទាល់​ផង និង​ធ្វើការ​តាមដាន​របាយការណ៍​អនុវត្តរបស់ភាគី​ម្ចាស់ដីផងដែរ។

ដំណើរការ​ការកកាយថ្មចេញវិញនេះ បានចាប់ផ្តើមពីថ្ងៃទី ២៥ ខែកុម្ភៈ ឆ្នាំ២០២៤ រហូតដល់ថ្ងៃទី១២ ខែមីនា ឆ្នាំ២០២៤ មានរយៈពេល ១៧ថ្ងៃ (លឿនជាងវិធានការដែលទុកពេលឲ្យ ៧០ថ្ងៃ) មន្ត្រីជំនាញ និងភាគីម្ចាស់ដីបានរាយការណ៍ថា ការកកាយថ្មយកចេញត្រូវបានធ្វើរួចរាល់ ចប់ការងារទាំងស្រុង និងស្នើសុំការចុះត្រួតពិនិត្យ។

ដើម្បីមានភាពច្បាស់លាស់ រដ្ឋបាលខេត្ត បានស្នើសុំកិច្ចសហការជាមួយនឹងក្រសួងធនធានទឹក និង ឧត្តុនិយម ហើយ​ក្រសួង​បាន​បញ្ជូនមន្ត្រីជំនាញ និងឧបករណ៍បច្ចេកទេសថតវាស់ស្ទង់ផ្ទៃបាតទន្លេ នៅទីតាំងផ្ទាល់ ចំនួន ២លើក។ លើកទី១ រកឃើញថានៅសេសសល់ថ្ម និងឱ្យ​កកាយយកចេញបន្តទៀត ហើយភាគីម្ចាស់ដីបានធ្វើការកកាយ​យកថ្មចេញ​បាន ៣ប៉ុងតុងបន្ថែមទៀត។ លើកទី២ នៅ ថ្ងៃទី ២៣-មីនា-២០២៤ មន្ត្រីជំនាញបានបន្តចុះដល់ទីតាំងផ្ទាល់ និងបាន​ប្រើឧបករណ៍ថតវាស់ស្ទង់ផ្ទៃបាតទន្លេ និងបានបញ្ជាក់ថា ទីតាំងថ្មទាំងអស់ ត្រូវបានកកាយយកថ្ម​ចេញរួចរាល់អស់​ហើយ។

ដូច្នេះ​ រដ្ឋបាលខេត្តកំពង់ចាម សូមប្រកាសបិទបញ្ចប់វិធានការរដ្ឋបាល ស្តីពីការកកាយថ្មចេញពីផ្ទៃទន្លេ នៅភូមិព្រៃទទឹង ឃុំឫស្សីស្រុក ស្រុកស្រីសន្ធរ ខេត្តកំពង់ចាម ចាប់ពីពេលនេះតទៅ និងសូមប្រគល់ទីតាំងនេះឱ្យ​អាជ្ញាធរស្រុកស្រីសន្ធរ និងមន្ទីរជំនាញបន្តគ្រប់គ្រង និងធានាមិនឱ្យ​មានសកម្មភាពល្មើសនានាកើតមានទៀតនោះឡើយ៕

The post ឧកញ៉ា ទន់ ឆៃអ៊ាង ប្រើពេលតែ១៧ថ្ងៃ កាយថ្មពីទន្លេនៅស្រុកស្រីសន្ធរ ចេញវិញរួចរាល់អស់ លឿនជាងពេលកំណត់ appeared first on .