ក្នុងជំនួបសម្តែងការគួរសមនេះ ដឹកនាំដោយលោក Ratchayut Kasemchaisiri ប្រធានក្រុមប្រឹក្សាភិបាលសមាគមឧស្សាហកម្មស៊ីម៉ង់ត៍កម្ពុជា ព្រមទាំងមានការអញ្ជើញចូលរួមពី អ្នកឧកញ៉ា លាង ម៉េង សហស្ថាបនិក និងជាប្រធានក្រុមអគ្គនាយកក្រុមហ៊ុន ខ្មែរ ប៊ែវើរីជីស, ឧកញ៉ា លាង ពៅ (ភីតធើ) អគ្គនាយកពហុពាណិជ្ជកម្ម និងជាប្រធានក្រុមហ៊ុន ជីប ម៉ុង អុិនស៊ី ស៊ីមេន, អ្នកឧកញ៉ា វិញ ហ៊ួរ សហស្ថាបនិកក្រុមហ៊ុនរោងចក្រ ខនស៍ស៊ីមេន និងឧកញ៉ាៗម្ចាស់រោងចក្រស៊ីម៉ង់ត៍មួយចំនួនទៀត។

លោកប្រធានក្រុមប្រឹក្សាភិបាល បានគោរពរាយការណ៍ជូនសម្ដេចបវរធិបតី អំពីវឌ្ឍនភាពនៃ ឧស្សាហកម្ម ស៊ីម៉ង់ត៍ ដែលបច្ចុប្បន្ននេះ បណ្តាក្រុមហ៊ុនដែលជាសមាជិកសមាគម បាននិងកំពុងបោះទុនវិនិយោគសរុបប្រមាណជាង ១.២ប៊ីលានដុល្លារ និងអាចបង្កើតការងារបានប្រមាណជាង ២ ៧០០កន្លែង ដែលក្នុងនោះមានប្រមាណជាង ១ ៩០០នាក់គឺជាកម្លាំងពលកម្មក្នុងស្រុក។ សមាគមមានលទ្ធភាពផលិត និងចែកចាយស៊ីម៉ង់ត៍ ដើម្បីបំពេញតម្រូវការនៅក្នុងស្រុកផង និងសម្រាប់នាំចេញទៅតាមបណ្ដាប្រទេសជិតខាងមួយចំនួនផង ហើយថ្មីៗនេះ សមាគមក៏បានក្លាយជាសមាជិកសហព័ន្ធក្រុមហ៊ុនផលិតស៊ីម៉ងត៍អាស៊ាន (AFCM) ផងដែរ។

ជាការឆ្លើយតប សម្ដេចបវរធិបតី បានសម្ដែងនូវការកោតសសើរ និងវាយតម្លៃខ្ពស់ចំពោះវឌ្ឍនភាពរីកចម្រើន និងជោគជ័យរបស់សមាគមឧស្សាហកម្មស៊ីម៉ង់ត៍កម្ពុជា ដែលបានរួមចំណែកក្នុងការអភិវឌ្ឍសង្គម-សេដ្ឋកិច្ចកម្ពុជា តាមរយៈការបង្កើតការងារសម្រាប់ប្រជាពលរដ្ឋ និងលទ្ធភាពក្នុងការផ្គត់ផ្គង់ស៊ីម៉ង់ត៍ប្រកបដោយគុណភាព និងតម្លៃសមរម្យ។ ជាមួយគ្នានេះ សម្ដេចបវរធិបតី ក៏បានគូសបញ្ជាក់អំពីការដាក់ចេញនូវគោលនយោបាយ, វិធានការ និងការលើកទឹកចិត្តនានារបស់រាជរដ្ឋាភិបាល ដើម្បីធានាដល់ភាពជោគជ័យ, បរិយាកាសវិនិយោគ និងភាពប្រកួតប្រជែងរបស់បណ្ដាក្រុមហ៊ុន ដែលកំពុងមានប្រតិបត្តិការអាជីវកម្មនៅកម្ពុជា។

តបតាមសំណូមពរ របស់សមាគមឧស្សាហកម្មស៊ីម៉ង់ត៍កម្ពុជា សម្តេចបវរធិបតី នាយករដ្ឋមន្ត្រី បានសម្រេច បន្តផ្តល់ការលើកទឹកចិត្តផ្នែកពន្ធដារ ដល់ក្រុមហ៊ុន ផលិតសុីម៉ង់ត៍ក្នុងស្រុក ព្រមទាំងប្រគល់ភារកិច្ចឱ្យក្រសួងសេដ្ឋកិច្ច និងហិរញ្ញវត្ថុ សហការជាមួយក្រសួងរ៉ែ និងថាមពល ធ្វើការសិក្សាលើវិធានការមួយចំនួនបន្ថែមទៀត ដើម្បីលើកយោបល់សុំការសម្រេចពីសម្តេចបវរធិបតីនាយករដ្ឋមន្ត្រី ក្នុងគោលដៅបង្កើនភាពប្រកួតប្រជែង និងការរីកចម្រើននៃឧស្សាហកម្មស៊ីម៉ង់ត៍ ក្នុងការផលិតសុីម៉ង់ត៍ក្នុងស្រុក ដែលមានគុណភាពខ្ពស់ និងតម្លៃ សមរម្យ ដើម្បីជួយជាប្រយោជន៍បន្ថែម ដល់ប្រជាពលរដ្ឋកម្ពុជា ដែលជាអ្នកប្រើប្រាស់៕

The post អ្នកឧកញ៉ា និងឧកញ៉ាៗម្ចាស់រោងចក្រស៊ីម៉ង់ត៍ច្រើនរូប ចូលជួបសម្តែងការគួរសម និងពិភាក្សាការងារជាមួយសម្តេចធីបតី ហ៊ុន ម៉ាណែត appeared first on .

លោក ជា ពុធពិសាខ តំណាងក្រុមនិស្សិតម្ចាស់ជ័យលាភី មកពីវិទ្យាស្ថានពហុបច្ចេកវិទ្យានៅកម្ពុជា ហៅសាលាតិចណូ លើកឡើងថា៖ “កម្មវិធី CAMEL’s Future Engineer Program ថា ពិតជាមានគុណតម្លៃ ជាពិសេសបានរួមចំណែកផ្សាភ្ជាប់ ចំណេះដឹង របស់ក្រុមនិស្សិតទាំងអស់ ដែលបានចូលរួមប្រកួតតាំងពីវគ្គដំបូង រហូតដល់ដល់វគ្គបញ្ចប់។ បើសិនជាអាច ពួកខ្ញុំ ចង់ឱ្យក្រុមហ៊ុន ជីប ម៉ុង អុិនស៊ី ស៊ីមេន បង្កើតកម្មវិធី នេះជាបន្តបន្ទាប់រៀងរាល់ឆ្នាំ” ។

កម្មវិធី CAMEL’s Future Engineer Program ដែលទើបបង្កើតឡើងជាលើកដំបូង ក្រោមការផ្ដួចផ្ដើមបង្កើតឡើងដោយ ក្រុមហ៊ុន ជីប ម៉ុង អុិនស៊ី ស៊ីមេន បាននឹងកំពុងទាក់ចិត្តនិស្សិតជំនាញវិស្វករសំណង់សុីវិល មកពីសកលវិទ្យាល័យល្បីៗទាំង៥ ខាងលើចង់ ឃើញក្រុមហ៊ុន បន្តបង្កើតកម្មវិធីនេះ រៀងរាល់ឆ្នាំ ដើម្បីជាថ្នាលបណ្ដុះបណ្ដាលជំនាញនិស្សិតផង រួមទាំងមានឱកាស ផ្សារភ្ជាប់ទ្រឹស្ដី ជាមួយនឹងការអនុវត្តន៍ផង។

ស្រដៀងគ្នានេះដែរ កញ្ញា ឃន លីណា និស្សិតវិស្វករសំណង់សុីវិល នៃវិទ្យាស្ថានពហុបច្ចេកទេសព្រះកុសមៈ (PPI) ក៏បានលើកឡើងថា តាំងពីចូលរួមប្រកួតប្រជែងក្នុង កម្មវិធី CAMEL’s Future Engineer Program មក កញ្ញា បានរៀនសូត្រទាំងទ្រឹស្ដីផង និងបានចុះអនុវត្តន៍ផ្ទាល់ៗផង ជាមួយអ្នកជំនាញ។ ជាពិសេស កញ្ញា បានស្វែងយល់យ៉ាងច្បាស់ថា ការឌីហ្សាញបេតុង ដែលមានគុណភាពខ្ពស់ និងការជ្រើសរើស ស៊ីម៉ង៍ គុណភាពល្អ ដូចជា សុីម៉ង៍អូដ្ឋ ជាដើម គឺពិតជា សំខាន់ខ្លាំងណាស់ សម្រាប់អាជីពជាវិស្វករសំណង់សុីវិល។

កម្មវិធី CAMEL’s Future Engineer Program មិនត្រឹមតែបណ្ដុះស្មារតី និងជំរុញការប្រឹងប្រែងរបស់ប្អូនៗនិស្សិត ទាំង ៥សកលវិទ្យាល័យ ដែលបានចូលរួមប្រកួតប្រជែងប៉ុណ្ណោះទេ សូម្បីតែលោកគ្រូ អ្នកគ្រូ ដែលជាគ្រូដឹកនាំផ្ទាល់ ក៏វាយតម្លៃខ្ពស់ ពីការបង្កើតឱ្យមាន កម្មវិធី ដែលផ្សាភ្ជាប់ ទ្រឹស្តីនឹងការអនុវត្តស្ដែងៗ និងការបង្ហាត់បង្រៀនបន្ថែម ពីអ្នកជំនាញក្នុងការជ្រើសរើសវត្ថុធាតុដើម ជាពិសេសផលិតផល សុីម៉ង៍ ដើម្បីធានាថា និស្សិតវិស្វករ ដែលបានចូលរួមប្រកួត ពួកគាត់ យល់ច្បាស់ ពីគន្លឹះធ្វើបេតុង និងសំណង់ដែលមាន គុណភាពខ្ពស់ ស្តង់ដារលំដាប់ពិភពលោក។

លោកគ្រូ នុត វិសាល សាស្ត្រាចារ្យផ្នែកសំណង់សុីវិល នៃវិទ្យាស្ថានពហុបច្ចេកវិទ្យានៅកម្ពុជា (ITC) ដែលបានដឹកនាំក្រុមនិស្សិត មកចូលរួមប្រកួតផ្ទាល់ ពិតជាសូមវាយតម្លៃខ្ពស់ លើ កម្មវិធី CAMEL’s Future Engineer Program។ លោកសាស្ត្រាចារ្យ សង្កត់ធ្ងន់ថា និស្សិតពួកគាត់ចូលរៀននៅសាលា បានទទួលចំណេះដឹង និងទ្រឹឹស្ដីបានមួយផ្នែកហើយ តែពេលពួកគាត់ ទទួលបានឱកាស ចុះអនុវត្តន៍ផ្ទាល់ៗ ក្រោមការណែនាំ បង្ហាត់បង្ហាញពីលោកគ្រូ អ្នកគ្រូ ដឹកនាំ និងអ្នកជំណាញប្រចាំ ក្រុមហ៊ុន ជីប ម៉ុង អុិនស៊ី បន្ថែមទៀត គឺពិតជាធ្វើឱ្យពួកគាត់សប្បាយរីករាយ និងបង្កើនចំណេះដឹង បានមួយកម្រិតបន្ថែមទៀត។

គួរជម្រាបជូនថា កម្មវិធី CAMEL’s Future Engineer Program គឺជាកម្មវិធី រៀបចំឡើង ដោយក្រុមហ៊ុន ផលិតស៊ីម៉ង៍ ជីប ម៉ុង អុិនស៊ី ស៊ីមេន គឺជាកម្មវិធីបណ្ដុះភាពក្លាហ៊ាន និងចែករំលែកចំណេះដឹង ផ្សាភ្ជាប់នឹងការអនុវត្តន៍ ដើម្បីផ្ដល់ឳកាស និងតភ្ជាប់និស្សិតវិស្វករសំណង់ស៊ីវិល ដែលមានទេពកោសល្យ អាចឈោងចាប់ក្ដីស្រមៃ បង្កើតចំណេះដឹងបន្ថែម ជាពិសេសការប្រាស្រ័យទាក់ទងគ្នាផ្ទាល់ ជាមួយអ្នកឯកទេសជំនាញក្នុងវិស័យសំណង់ស៊ីវិល ឈានឆ្ពោះទៅប្រកួតប្រជែងគ្នាយក រង្វាន់ជ័យលាភី និងអភិវឌ្ឍន៍ខ្លួនឱ្យក្លាយទៅជាវិស្វករវ័យក្មេងអនាគត និងធានាការអភិវឌ្ឍវិស័យសំណង់នៅកម្ពុជាប្រកបដោយនិរន្តភាព៕

The post លោកឧកញ៉ា លាង ពៅ (ភីធើរ) ប្រគល់ពានរង្វាន់ និងបណ្ណសរសើរ ជូនក្រុមនិស្សិត ក្នុងកម្មវិធី CAMEL’s Future Engineer Program ដែលប្រព្រឹត្តឡើងនៅក្នុងរោងចក្រស៊ីម៉ង៍ ជីប ម៉ុង អុិនស៊ី ខេត្តកំពតផ្ទាល់តែម្តង appeared first on .

ពិធីលាចាកសិក្ខាបទរបស់ព្រះតេជគុណ លាង ពៅ (ភីធើរ) ​ត្រូវបាន​ធ្វើឡើងនៅក្នុងពុទ្ធមណ្ឌលវិបស្សនាធុរៈ​នៃព្រះរាជា​ណាចក្រកម្ពុជា ដែលមានទីតាំងស្ថិតនៅខាងលិច​ភ្នំព្រះរាជទ្រព្យ (ភ្នំឧដ្តង្គ) ឃុំផ្សាដែក ស្រុកពញាព្ម ខេត្តកណ្តាល ដោយមាន​វត្តមានស្ថាបនិកជាន់ខ្ពស់របស់ក្រុមហ៊ុន ជីប ម៉ុង ដូចជា លោកអ្នកឧកញ៉ា ភាព ហៀក លោកអ្នកឧកញ៉ា លាង ឃុន អ្នកឧកញ៉ា លាង ម៉េង ឧកញ៉ា លាង ហួង ព្រមទាំងថ្នាក់ដឹកនាំ និងបុគ្គលិក​ក្រុមហ៊ុន ជីប ម៉ុង ជាច្រើនរូបទៀត។

ពិធីខាងលើនេះ ក៏ត្រូវបានធ្វើឡើង​ក្នុងឱកាស​ដែល​ ថ្នាក់ដឹកនាំជាន់ខ្ពស់របស់ក្រុមហ៊ុន ជីប ម៉ុង ដង្ហែអង្គ​កឋិនទានយ៉ាងធំ ចាប់ផ្តើម​​នៅវត្តមណិរតនារាម ( វត្តទូលទំពូង ) រាជធានីភ្នំពេញ ទៅកាន់ពុទ្ធមណ្ឌលវិបស្សនា​ធុរៈ​នៃព្រះរាជាណាចក្រកម្ពុជា ព្រមទាំង​ការ​ប្រគេន​ទេយ្យទាន​​ចំពោះព្រះសង្ឃ​ផងដែរ។

ឧកញ៉ា លាង ពៅ (ភីធើរ) អគ្គនាយកពហុពាណិជ្ជកម្ម និងជាសមាជិកក្រុមប្រឹក្សា ភិបាល ក្រុមហ៊ុន ជីប ម៉ុង និងជាស្ថាបនិក Rev Up Cambodia បានសម្រេចចិត្តសាងផ្នួសសងគុណមាតារយៈពេលខ្លី នៅក្នុងពុទ្ធមណ្ឌលវិបស្សនាធុរៈនៃព្រះរាជាណាចក្រកម្ពុជា កាលពីថ្ងៃទី៧ ខែតុលា ឆ្នាំ២០២៤។

សូមជម្រាបថា ប្រទេស​កម្ពុជា ជា​ប្រទេស​កាន់​ព្រះ​ពុទ្ធ​សាសនា​ ដូច្នេះតាំងពី​ដើម​មក​ ប្រជាជនខ្មែរ​​បាន​ឃើញ​ប្រយោជន៍​នៃ​ការ​បួស​ទើប​បាន​គិត​ថា បើ​មិន​អាច​បួស​បាន​រហូត​ទេ យ៉ាងហោចណាស់​គ្រាន់​តែ​បួស​​រយៈពេលខ្លី ក៏​ជា​ប្រយោជន៍ដែរ ​ដើម្បី​បាន​ឱកាស​ដុស​ខាត់​សម្អាត​​ចិត្ត ​ស្វែង​រក​សេចក្តី​ពិត​នៃ​ជីវិត​ឱ្យ​ផុត​ចាក​ពី​ការ​សៅ​ហ្មង តាមគន្លង​ព្រះធម៌​​របស់​ព្រះ​ពុទ្ធ​ជាអង្គ​ម្ចាស់ ​រួច​ទើប​លា​ចាក​សិក្ខាបទ​​មក​ទទួល​ខុស​ត្រូវ​ក្នុង​សង្គម​គ្រួសារ និង​សង្គម​ជាតិ​វិញ៕

The post ក្រោយបួសសងគុណមាតាបិតារយៈពេលខ្លី ព្រះតេជគុណ លាង ពៅ (ភីធើរ) លាចាកសិក្ខាបទវិញហើយ appeared first on .

កម្មវិធីដង្ហែ «អង្គកឋិនទានសាមគ្គី» បានចាប់ផ្តើម​​នៅវត្តមណិរតនារាម ( វត្តទូលទំពូង ) រាជធានីភ្នំពេញ រហូតទៅដល់ពុទ្ធមណ្ឌលវិបស្សនាធុរៈ​នៃព្រះរាជាណាចក្រកម្ពុជា ដែលមានវត្តមានព្រះសង្ឃ លាង ពៅ (ភីធើរ) និងវត្តមានស្ថាបនិកជាន់ខ្ពស់របស់ក្រុមហ៊ុន ជីប ម៉ុង ដូចជា លោកអ្នកឧកញ៉ា ភាព ហៀក លោកអ្នកឧកញ៉ា លាង ឃុន អ្នកឧកញ៉ា លាង ម៉េង ឧកញ៉ា លាង ហួង ព្រមទាំងថ្នាក់ដឹកនាំ និងបុគ្គលិកក្រុមហ៊ុន ជីប ម៉ុង ជាច្រើនរូបទៀត។

បុណ្យកឋិនទាន ជាកាលទានមួយដ៏ថ្លៃថ្លា មានតែក្នុងព្រះពុទ្ធសាសនាតែប៉ុណ្ណោះ ដែលក្នុងមួយឆ្នាំមាន​តែមួយ​ដងគត់​មានរយៈពេលកំណត់ ២៩ ថ្ងៃ ដោយវត្តមួយទទួលបានតែអង្គកឋិនមួយ ជាទានមានផលានិសង្ស​ខ្ពង់​ខ្ពស់ទាំងទាយកទាយិកា និងបដិគ្គាហកៈ ជាទីជ្រះថ្លារីករាយ ដែលសាធុសប្បុរសពុទ្ធបរិស័ទផ្តួចផ្តើម​សាមគ្គី​គ្នាប្រារព្ធធ្វើឡើងជាអង្គកឋិនទានមួយជារៀងរាល់ឆ្នាំ បានជាពិធីបុណ្យមួយហៅថា “បុណ្យកឋិនទានសាមគ្គី”។

សូមជម្រាបថា ឧកញ៉ា លាង ពៅ (ភីធើរ) អគ្គនាយកពហុពាណិជ្ជកម្ម និងជាសមាជិកក្រុមប្រឹក្សា ភិបាល ក្រុមហ៊ុន ជីប ម៉ុង និងជាស្ថាបនិក Rev Up Cambodia បានសម្រេចចិត្តសាងផ្នួសសងគុណមាតារយៈពេលខ្លី នៅក្នុងពុទ្ធមណ្ឌលវិបស្សនាធុរៈនៃព្រះរាជាណាចក្រកម្ពុជា កាលពីថ្ងៃទី៧ ខែតុលា ឆ្នាំ២០២៤។ បើតាម​ការ​បង្ហើបពី Rev Up Cambodia បានឱ្យដឹងថា ពិធីដង្ហែអង្គកឋិនទាននាពុទ្ធមណ្ឌលវិបស្សនា​ធុរៈនៃព្រះរាជា​ណាចក្រកម្ពុជានេះ ត្រូវបាន​ធ្វើឡើង​ មុនពេលព្រះតេជគុណ លាង ពៅ (ភីធើរ) លាចាកសិក្ខាបទ៕

The post លោកអ្នកឧកញ៉ា អ្នកឧកញ៉ា ស្ថាបនិកជាន់ខ្ពស់ក្រុមហ៊ុន ជីប ម៉ុង រៀបចំពិធីដង្ហែអង្គកឋិនទាន ទៅកាន់ពុទ្ធមណ្ឌលវិបស្សនាធុរៈ​នៃព្រះរាជាណាចក្រកម្ពុជា appeared first on .

បើតាមទំនៀមទម្លាប់ប្រពៃណីខ្មែរ ពិធីបំបួសនាគនេះជាពិធីមួយធំមានទម្លាប់ធ្វើតាំងពីបុរាណកាលមក ហើយបានចូលជ្រួតជ្រាបទៅក្នុងចិត្តនៃប្រជាជនខ្មែរគ្រប់រូប ព្រោះព្រះពុទ្ធសាសនាខ្មែរបានចាត់ទុកជាសាសនាតែមួយរបស់ជាតិ។ ឯការបំបួសកូនចៅក៏ជាកិច្ចទំនុកបំរុង ព្រះពុទ្ធសាសនាមួយដែរ។ ម៉្យាងទៀតព្រះពុទ្ធសាសនា ជាប្រភពនៃការបណ្តុះបណ្តាលនិស្ស័យអក្សរសាស្ត្រ និងតម្រិះវិជ្ជាផ្សេងៗជាច្រើន។

មនុស្សដែលបានបួសក្នុងព្រះពុទ្ធសាសនាមានតម្លៃខ្ពស់ជាងមនុស្សដែលពុំបានបួសព្រោះអ្នកស្រុកតែងយល់ថា អ្នកបួសជាមនុស្សស្គាល់ បាបបុណ្យ គុណទោសច្បាស់លាស់ ហើយខ្មែរយើងតែងមានជំនឿម៉្យាងទៀតថា “បួសនេន សងគុណម្តាយ បួសភិក្ខុ សងគុណឪពុក”។

ជំនឿទាំងនេះបានជ្រាបជ្រៅទៅក្នុងសន្តានចិត្តប្រជាជនខ្មែរទូទាំងប្រទេសរហូតដល់ពេលរៀបចំទុកដាក់កូនចៅឱ្យមានប្តី-ប្រពន្ធ ក៏គេនិយមប្រកាន់រើសរកតែបុរសណា ដែលបានបួសរៀនផងដែរ។

គួររំលឹកដែរថា នៅក្នុងពិធីបំបួសនាគត្រូវរៀបចំទៅតាមលំដាប់ប្រពៃណី មានពិធីកោរសក់ ពិធីជូនត្រ័យចំពោះលោកអ្នកមានគុណ ពិធីក្រុងពាលី ពិធីបង្វិលពពិល ពិធីធ្វើធ្មេញនាគ ពិធីកួចចំណងដៃ នាគ ពិធីលាបប្រេងម្សៅ ពិធីចំរើនព្រះបរិត្តនាគ ពិធីហែនាគ៣ជុំព្រះវិហារ ពិធីចូលព្រះវិហារ ពិធីនាគវន្ទា ចំពោះព្រះពុទ្ធរូប ពិធីនាគវន្ទាព្រះឧបជ្ឈាយ៍ ពិធីសុំនិស្ស័យបំបួសនាគ ព្រះឧបជ្ឈាយ៍ ព្រះសង្ឃហត្ថាបាស ចំរើនពុទ្ធជ័យ មង្គល ពិធីពហុទេវា សាមណេរវន្ទាលាញោមប្រុស-ស្រី លោកតា លោកយាយ ដើម្បីសាងផ្នួសពិធីកប់សក់ដើម្បីសុំសេចក្តីសុខ។

ទស្សនាវីដេអូខាងក្រោម៖

The post ឧកញ៉ា លាង ពៅ (ភីធើរ) សម្រេចចិត្តបួសសងគុណមាតាបិតា តាមទំនៀមទម្លាប់ខ្មែរពីបុរាណ appeared first on .

កាលពីថ្ងៃទី១៣ កញ្ញា ២០២៤ Camel Wonder Night ដែលមានការចូលរួមពីលោកឧកញ៉ា លាង ពៅ ប្រធានក្រុមហ៊ុន ជីប ម៉ុង អុិនស៊ី ស៊ីមេន និងលោកជំទាវ គឹម ចាន់ថា អគ្គនាយិកាក្រុមហ៊ុន ជីប ម៉ុង អុិនដាស្ទ្រីស៍ និងដេប៉ូចែកចាយសម្ភារសំណង់ពីរាជធានីភ្នំពេញ ខេត្តកណ្ដាល និងខេត្តកំពង់ស្ពឺ។

ក្រុមហ៊ុន ជីប ម៉ុង ដែលត្រូវបានស្គាល់ជាក្រុមហ៊ុនឈានមុខគេនៅកម្ពុជា លើការចែកចាយសម្ភារសំណង់ដែលមានគុណភាព និងទំនុកចិត្តខ្ពស់បំផុត ដែលបានវិនិយោគលើបច្ចេកវិទ្យា និងម៉ាស៊ីនទំនើប ដោយមានការទទួលស្គាល់គុណភាពលំដាប់អន្តរជាតិ ផ្គត់ផ្គង់ទៅកាន់ទីផ្សារកម្ពុជាជាង៤ទសវត្សរ៍មកហើយ។

តាមរយៈការអភិវឌ្ឍឥតឈប់ឈរ ក្រុមហ៊ុន ជីប ម៉ុង​ បានវិនិយោគលើការផលិតស៊ីម៉ងត៍អូដ្ឋដែលមានគុណភាពលំដាប់អន្តរជាតិ ស្តង់ដារអាមេរិក-ថៃ ដើម្បីចែកចាយទូទាំងប្រទេស វិនិយោគលើបេតុងលាយស្រេច ជាពិសេស បន្ដរហូតដល់ការផលិត ក្បឿង​ និងទុយោ ជីប ម៉ុង ដែលប្រើប្រាស់ម៉ាស៊ីន និងបច្ចេកវិទ្យាចុងក្រោយពីអ៊ីតាលី ស្របតាមស្តង់ដារអន្តរជាតិ ISO 9001:2015 ដើម្បីបំពេញគ្រប់តម្រូវការអតិថិជន។

លើសពីការធ្វើពាណិជ្ជកម្ម ជីប ម៉ុង តែងតែគិតគូរពីការរួមចំណែកជាមួយសង្គមជាតិ និងរាជរដ្ឋាភិបាលក្នុងសកម្មភាពរួមចំណែកដើម្បីប្រយោជន៍រួម ដែលជាការផ្ដល់ជូនត្រឡប់ទៅកាន់ជាតិ និងប្រជាជន តាមដែលអាចធ្វើទៅបាន។ សកម្មភាពទាំងនេះ មិនមែនបង្ហាញតែត្រឹមក្រុមហ៊ុន ជីប ម៉ុង​ ប៉ុណ្ណោះទេ តែជាការរួមចំណែកពីគ្រប់ដៃគូ-អតិថិជនពីគ្រប់មូលដ្ឋាន​ ដែលតែងសហការយ៉ាងស្អិតរមួត។

ក្រុមហ៊ុន ជីប ម៉ុង ដែលជាក្រុមហ៊ុនកូនខ្មែរមួយនេះ នៅតែរក្សាគោលជំហរផ្ដល់នូវគុណតម្លៃទៅកាន់ដៃគូអាជីវកម្ម-អតិថិជន និងរួមចំណែកកសាងកម្ពុជាឱ្យកាន់តែរីកចម្រើន។ “សម្ភារសំណង់ ជីប ម៉ុង ឈានមុខគេនៅកម្ពុជា។”

The post លោកឧកញ៉ា លាង ពៅ ជួបជុំដេប៉ូសំណង់ជាង៣០០នាក់ដើម្បីអបអរដៃគូសហការដ៏ជោគជ័យ appeared first on .

ឧកញ៉ា លាង ពៅ (ភីធើរ) បានមានប្រសាសន៍ថា៖ “នៅពេលចូលដល់បរិវេណប្រាសាទ នៅគ្រប់ប្រាសាទទាំងអស់ (មិនចំពោះប្រាសាទអង្គរវត្តមួយនោះទេ) នៅទីនោះគឺជាតំបន់អច្ឆរិយៈជាកេរ្ត៍បន្សល់ទុក ជាទឺកដីបុព្វរសដូនតាខ្មែររបស់យើងជៀសវាងការរំខានដោយសម្លេង សូមឲ្យបងបង្អូនប្រកាន់ខ្ជាប់នូវសីលធម៌ និងការគោរពឲ្យបានខ្ពស់បំផុត។ ហាមដាច់ខាតហាមបើកបរប្រជែងគ្នា និងបំពងសម្លេងម៉ាសុីនឡានឲ្យឮខ្លាំងនៅក្នុងតំបន់អង្គរឡើយ។ តែបើនៅទីសមគួរអាចបញ្ចេញសម្លេងឲ្យឮៗបាន តួយ៉ាងដូចនៅក្នុងទីប្រជុំជនមួយចំនួនដែលក្រុមការងារបានរៀបចំទុកជូននៅក្នុងខេត្តសៀមរាប។”

លោកឧកញ៉ា លាង ពៅ (ភីធើរ) សង្ឃឹមនិងជឿជាក់យ៉ាងមុតមាំថាសមាជិកនឹងអនុវត្តតាមដើម្បីរក្សាតម្លៃ និងភាពថ្លៃថ្នុរក្នុងនាមជាម្ចាស់ផ្ទះនៅក្នុង មហាព្រឹត្តិការណ៍អន្តរជាតិ «Gumball 3000 Rally in Cambodia ដើម្បីទេសចរណ៍» នៅខេត្តសៀមរាបនៅថ្ងៃទី ១៧ ខែកញ្ញានេះ។

សម្រាប់ខេត្តសៀមរាប នៅថ្ងៃទី១៧ ខែកញ្ញា ឆ្នាំ២០២៤ នឹងមានការរៀបចំតាំង បង្ហាញរថយន្ត Supercars, Hyper cars, និង Sportscars ច្រើនជាង ៦០០ គ្រឿងដើម្បីបំបែកឯកត្តកម្មពិភពលោក (Guinness World Record) នៅមុខប្រាសាទអង្គរវត្ត។ ប្រតិភូ Gumball 3000 នឹងត្រឡប់ទៅវិញតាម ច្រកទ្វារព្រំដែនអន្តរជាតិ ប៉ោយប៉ែតបន្តទៅប្រទេស ថៃ ម៉ាឡេសុី និងសឹង្ហបុរី។ ការនេះនឹងធ្វើឲ្យកិត្តិនាមរបស់ប្រទេសកម្ពុជា នឹងបន្តភាពល្បីល្បាញនៅលើឆាកអន្តរជាតិតាមរយៈ សកម្មភាពចូលរួមបំបែកឯកទគ្គកម្មពិភពលោកលើប្រធានបទ «ការតាំងបង្ហាញរថយន្តទំនើបច្រើនជាងគេបំផុតលើពិភពលោក» នៅក្នុងព្រឹត្តិការណ៍អន្តរជាតិ GUMBALL 3000 នឹងធ្វើឡើងលើកដំបូងនៅកម្ពុជា។

គួរបញ្ជាក់ថា ក្រៅពីជួយផ្សព្វផ្សាយពីវិស័យទេសចរណ៍ និងត្រៀមបំបែកកំណត់ត្រា ពិភពលោកហ្គីណេស ថវិកាទាំងអស់ ដែលទទូួលបានពីសប្បុរសជនលើការបរិច្ចាគ និងឧបត្ថម្ភនានា ក្នុងមហាព្រឹត្តិការណ៍ Gumball 3000 Rally នេះ នឹងត្រូវយកទៅជូនមន្ទីរពេទ្យកុមារអង្គរ ខេត្តសៀមរាប ទាំងអស់។ ហើយតាមការរំពឹងទុក ព្រឹត្តិការណ៍ដ៏ធំប្រចាំឆ្នាំនេះ នឹងអាចទាក់ទាញភ្ញៀវទេសចរជាតិ-អន្តរជាតិ ចាប់អារម្មណ៍ចូលរួមទស្សនា ប្រមាណ ៦ម៉ឺននាក់៕ Link

The post ឧកញ៉ា លាង ពៅ (ភីធើរ) ប្រាប់សមាជិករថយន្តចូលរួមព្រឹត្តិការណ៍ Gumball 3000 «ហាមដាច់ខាចរោទ៍សម្លេងឮខ្លាំងៗ» ពេលចូលដល់បរិវេណតំបន់អង្គរ appeared first on .

កិច្ចប្រជុំដ៏សំខាន់ ស្ដីពីការត្រៀមរៀបចំព្រឹត្តិការណ៍ «Gumball 3000 Rally in Cambodia ដើម្បីទេសចរណ៍» នេះក៏មានការ អញ្ជើញចូលរួមពីសំណាក់ថ្នាក់ដឹកនាំនៃរដ្ឋបាលខេត្តសៀមរាប រួមមាន៖ លោក ង៉ូវ សេងកាក់ អភិបាលរងនៃគណៈអភិបាលខេត្តសៀមរាប តំណាងឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប, តំណាងអាជ្ញាធរជាតិអប្សរា គ្រឹះស្ថានអង្គរ មន្ទីរទេសចរណ៍ខេត្ត ស្នងការដ្ឋានគរបាលខេត្ត និងមន្ទីរខេត្តពាក់ព័ន្ធជាច្រើនទៀតចូលរួមផងដែរ។

ក្នុងកិច្ចប្រជុំនេះ គណៈប្រតិភូ និងអាជ្ញាធរពាក់ព័ន្ធ បានប្រជុំពិភាក្សា យ៉ាងផុសផុលពីការត្រៀម រៀបចំព្រឹត្តការណ៍អន្តរជាតិ Gumball 3000 Rally in Cambodia ជាពិសេសការត្រៀមរៀបចំឱ្យបានគ្រប់ជ្រុងជ្រោយ ទៅលើសណ្ដាប់ធ្នាប់ និងសុវត្ថិភាព ជូនអ្នកចូលរួម ដែលមានទាំងភ្ញៀវជាតិ និងបរទេសរាប់ពាន់នាក់ នឹងទទួលបាននូវបទពិសោធន៍ដ៏មិនអាចបំភ្លេចបាន ជាពិសេសស្នាមញញឹមនៅលើទឹកដីប្រទេសកម្ពុជា ក្នុងនាមម្ចាស់ផ្ទះរៀបចំមហាព្រឹត្តិការណ៍លំដាប់ពិភពលោក Gumball 3000 លើកទី២៥ នេះ។

Gumball 3000 Rally លើកទី២៥ លើកនេះ មិនត្រឹមជាព្រឹត្តិការណ៍ជួបជុំក្បួនរថយន្តអន្តរជាតិ ប៉ុណ្ណោះទេ ប៉ុន្តែ ព្រឹត្តិការណ៍ «Gumball 3000 Rally Cambodia» នេះនឹងជួយផ្សព្វផ្សាយអំពីវិស័យទេសចរណ៍កម្ពុជាដល់ពិភពលោក ជួយកំណើនទេសចរងាកក្រសែភ្នែកមកទស្សនាតំបន់អង្គរ និងប្រាសាទអង្គរកាន់តែច្រើន។ មិនត្រឹមតែប៉ុណ្ណោះ ក្រោមការផ្ដួចផ្ដើម និងសម្របសម្រួលពីរដ្ឋបាលខេត្តសៀមរាប ក៏ដូចជា អាជ្ញាធរអប្សរា ម្ចាស់រថយន្ត Supercar ទាំងអស់ដែលចូលរួម បង្កើតកំណត់ត្រាពិភពលោកហ្គីណេស ”ការចូលរួមចតឡានច្រើនជាងគេនៅមុខប្រាសាទអង្គរវត្ត ថែមទៀតទៀតផង។

គួរបញ្ជាក់ថា ក្រៅពីជួយផ្សព្វផ្សាយពីវិស័យទេសចរណ៍ និងត្រៀមបំបែកកំណត់ត្រា ពិភពលោកហ្គីណេស ថវិកាទាំងអស់ ដែលទទូួលបានពីសប្បុរសជនលើការបរិច្ចាគ និងឧបត្ថម្ភនានា ក្នុងមហាព្រឹត្តិការណ៍ Gumball 3000 Rally នេះ នឹងត្រូវយកទៅជូនមន្ទីរពេទ្យកុមារអង្គរ ខេត្តសៀមរាប ទាំងអស់។ ហើយតាមការរំពឹងទុក ព្រឹត្តិការណ៍ដ៏ធំប្រចាំឆ្នាំនេះ នឹងអាចទាក់ទាញភ្ញៀវទេសចរជាតិ-អន្តរជាតិ ចាប់អារម្មណ៍ចូលរួមទស្សនា ប្រមាណ ៦ម៉ឺននាក់ ៕

The post ឧកញ៉ា លាង ពៅ (ភីធើរ) ជិះឧទ្ធម្ភាគចក្រផ្ទាល់ខ្លួនទៅប្រជុំ ត្រៀមរៀបចំមហាព្រឹត្តិការណ៍អន្តរជាតិ Gumball 3000 Rally in Cambodia នៅខេត្តសៀមរាប appeared first on .

នៅក្នុងកម្មវិធីនេះមានការអញ្ជើញចូលរួមក្រោមអធិបតីភាព ឯកឧត្ដម ហេង សួរ រដ្ឋមន្ដ្រីក្រសួងការងារ និងបណ្ដុះ​បណ្ដាលវិជ្ជាជីវៈ, លោកឧកញ៉ា លាង ពៅ ប្រធានក្រុមហ៊ុន ជីប ម៉ុង អ៊ិនស៊ី ស៊ីមេន ខបភើរេសិន (Chip Mong Insee Cement Corporation), ឯកឧត្ដមបណ្ឌិត ប៊ុន ភារិន នាយកវិទ្យាស្ថាន​ជាតិពហុបច្ចេកទេសកម្ពុជា, លោក គី សុខគីម នាយកប្រតិបត្តិនៃមូលនិធិអភិវឌ្ឍន៍ជំនាញ (SDF) និងមន្រ្តីក្រសួង ថ្នាក់ដឹកនាំ និងបុគ្គលិកក្រុមហ៊ុន សាស្រ្តាចារ្យ សិក្ខាកាម និងនិស្សិតនៃវិទ្យាស្ថាន NPIC ជាច្រើននាក់ផងដែរ។

ថ្លែងក្នុងកម្មវិធី លោកឧកញ៉ា លាង ពៅ ប្រធានក្រុមហ៊ុន ជីប ម៉ុង អ៊ិនស៊ី ស៊ីមេន ខបភើរេសិន មានប្រសាសន៍ថា មូលហេតុចម្បងៗ ៣យ៉ាង ដែលជំរុញឱ្យក្រុមហ៊ុនសហការបើកវគ្គបណ្ដុះបណ្ដាលជំនាញនេះឡើង៖

ទី១ ៖ ក្រុមហ៊ុន ជីប ម៉ុង អ៊ិនស៊ី ស៊ីមេន ខបភើរេសិន ចង់ពង្រឹងជំនាញបច្ចេកទេស និងវិជ្ជាជីវៈច្បាស់លាស់​ជូនទៅដល់​សិក្ខាកាមជាងសំណង់ដែលបានបណ្ដុះបណ្ដាលក្នុងគម្រោងអភិវឌ្ឍន៍ជំនាញ ក្រោមការទទួលស្គាល់ដោយក្រសួងការងារ និងបណ្ដុះបណ្ដាលវិជ្ជាជីវៈ។

ទី២ ៖ ដើម្បីរួមចំណែកក្នុងការអភិវឌ្ឍន៍ការងារ ស្របតាមស្តង់ដារួមនៃវិស័យសំណង់ក្នុងប្រទេសកម្ពុជា។

ទី៣ ៖ ក្រុមហ៊ុន ជីប ម៉ុង អ៊ិនស៊ី ស៊ីមេន ខបភើរេសិន ចង់បង្ហាញពីនវានុវត្តន៍ភាពនៃ​គំនិតច្នៃប្រឌិតថ្មីក្នុងការផលិត​ស៊ីម៉ងត៌​នៅក្នុងប្រទេសកម្ពុជា យោងតាមបទដ្ឋានលំដាប់ពិភពលោក ស្របតាមនិន្នាការបច្ចុប្បន្ន​នៃផលិតកម្មដែលកំពុង​វិវត្តន៍ទៅជាលក្ខណៈ Green Cement ជាស៊ីម៉ងត៍ដែលប៉ះពាល់តិចបំផុតដល់បរិស្ថាន។

លោកឧកញ៉ា លាង ពៅ ជឿជាក់បំផុតថា ការផលិតស៊ីម៉ងត៍របស់ក្រុមហ៊ុនប្រកបដោយ​គុណភាពខ្ពស់អនុលោម​ទៅតាម​ស្តង់ដា ឬបទដ្ឋានផលិតស៊ីម៉ងត៍កម្រិតអន្តិរជាតិ និងការកាត់បន្ថយផលប៉ះពាល់​ជាអវិជ្ជមានដល់បរិស្ថានក្នុងកម្រិតតិចតួច​បំផុត ដោយគោរពទៅតាមការអភិវឌ្ឍន៍ប្រកបដោយនិរន្តរភាព ដែលជួយបង្កើននូវនិរន្តរភាពទាំងផ្នែកសេដ្ឋកិច្ច បរិស្ថាន និងសង្គម ។

លោកឧកញ៉ា លាង ពៅ បានបន្ថែមថា សព្វថ្ងៃរោងចក្រផលិតស៊ីម៉ងត៍ ជីប ម៉ុង អ៊ិនស៊ី ស៊ីមេន ខបភើរសិន ដែលមាន​ទីតាំង​នៅខេត្តកំពតបាននឹងកំពុងអនុវត្តដំណើរការប្រព័ន្ធច្រវ៉ាក់ផលិតកម្មក្នុងរោងចក្រតាមបែបទំនើបឈ្មោះថា Co-Processing ចេញពីកន្លែងគ្រប់គ្រងសំណល់ឈ្មោះ Eco-cycle តាមរយៈការប្រើប្រាស់ និងកម្ទេចកាកសំណល់​ដូចជា​កម្ទេចឈើ អាចម៌រណារ អង្កាម ព្រមទាំងសំណល់ឧស្សាហកម្មជាដើម មកកែច្នៃជាថាមពលជំនួស​ធ្យូងថ្មក្នុងដំណើរការ​ឡដុតស៊ីម៉ងត៍ ដើម្បីផលិតចេញជាស៊ីម៉ងត៍ប្រកបដោយគុណភាពខ្ពស់តាមស្តង់ដាពិភពលោក។

លោកឧកញ៉ា ប្រធានក្រុមហ៊ុន ជីប ម៉ុង អ៊ិនស៊ី ស៊ីមេន ខបភើរេសិន បានសង្កត់ធ្ងន់ថា យ៉ាងណាក៏ដោយ បើសិនជាយើង​មានផលិតផលស៊ីម៉ងត៍ដែលផលិតក្នុងស្រុក ដោយក្រុមហ៊ុនសហគ្រិនខ្មែរ ដែលមានគុណភាពស្តង់ដា​កម្រិតអន្តរជាតិ​ក៏ពិតមែន ប៉ុន្តែទន្ទឹមគ្នានោះ យើងក៏នៅតែត្រូវការធនធានមនុស្សលើផ្នែកបច្ចេកទេស ដែលមានវិជ្ជាជីវៈច្បាស់លាស់ ឆ្លងកាត់ការបណ្ដុះបណ្ដាលត្រឹមត្រូវផងដែរ។ ហេតុដូច្នេះហើយ ទើបក្រុមហ៊ុនផលិតស៊ីម៉ងត៌ ជីប ម៉ុង អ៊ិនស៊ី ស៊ីមេន ខបភើរេសិន និងវិទ្យាស្ថានជាតិពហុបច្ចេកទេសកម្ពុជា បានផ្លាស់ប្តូរអនុស្សរណៈយោគយល់គ្នា និងបើកវគ្គបណ្ដុះបណ្ដាល​ការងារកំបោរក្នុងវិស័យសំណង់ ជាមួយវិទ្យាស្ថានជាតិពហុបច្ចេកទេសកម្ពុជា (NPIC) នៅពេលនេះ។

អមជាមួយគ្នានេះ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា វគ្គបណ្តុះ​បណ្តាលជំនាញកំបោរក្នុងវិស័យសំណង់នេះនឹងផ្តល់ឱកាសដល់សិក្ខាកាមឱ្យមានជំនាញផ្នែកកំបោរលក្ខណៈស្តង់ដា ហើយក៏ជាឱកាសនៃការទទួលបានការងារក្នុងក្រុមហ៊ុន ជីប ម៉ុង គ្រុប ដែលជាក្រុមហ៊ុនដ៏ធំមួយនៅកម្ពុជាផងដែរ។

ឆ្លៀតឱកាសនេះដែរ ឯកឧត្ដមរដ្ឋមន្ត្រី ក៏បានកោតសរសើរដល់ក្រុមហ៊ុន ជីប ម៉ុង អ៊ិនស៊ី ស៊ីមេន ខបភើរេសិន ដែល​បាន​នាំយកនូវបច្ចេកវិទ្យាចុងក្រោយក្នុងការផលិតស៊ីម៉ងត៍មានគុណភាពខ្ពស់ដើម្បីបម្រើដល់វិស័យសំណង់។ ឯកឧត្តម​រដ្ឋមន្រ្តី បានបន្ថែមថា តាមរយៈកិច្ចសហការជាមួយវិស័យឯកជននេះ គឺជាភាពជាក់ស្ដែងមួយ​នៃកិច្ចសហការ​រួមគ្នាក្នុង​ការជំរុញការអនុវត្ត និងសម្រេចឱ្យបាននូវគោលនយោបាយ​របស់រាជរដ្ឋាភិបាលលើការងារអភិវឌ្ឍន៍មូលធនមនុស្ស​ក៏ដូចជាការបណ្ដុះបណ្ដាលជំនាញបច្ចេកទេស និងវិជ្ជាជីវៈ ដើម្បីលើកកម្ពស់ផលិតភាព និងភាពប្រកួតប្រជែង​របស់​កម្ពុជាឱ្យកាន់តែល្អប្រសើរឡើង ហើយក៏ជាការរួមចំណែកមួយដែល​បង្ហាញអំពីការយកចិត្តទុកដាក់របស់​វិស័យឯកជន​ក្នុងការចូលរួមកសាង និងកៀរគរធនធានមនុស្សផ្នែកបច្ចេកទេស តាមរយៈភាពជាដៃគូរវាងរដ្ឋ និងឯកជនដែលកិច្ចការ​បណ្តុះបណ្តាលនេះ​ក៏បានឆ្លើយតបទៅនឹងគោលនយោបាយអភិវឌ្ឍន៍មូលធនមនុស្សរបស់រាជរដ្ឋាភិបាលកម្ពុជា។

នៅមុនបញ្ចប់កម្មវិធី ឯកឧត្តមរដ្ឋមន្ត្រី ក៏បានផ្តល់ជាសារណែនាំឱ្យសិក្ខាកាម និងសិស្សានុសិស្សបន្តខិតខំរៀនសូត្រ​ឱ្យបាន​ល្អទាំងជំនាញបច្ចេកទេស និងឥរិយាបទនៃការធ្វើការ រួមទាំងជំនាញទំនាក់ទំនង ព្រោះថាជីវិតការងារទាមទារ​ទាំងចំណេះ​ជំនាញ ឥរិយាបទការងារ និងការប្រាស្រ័យទាក់ទងគ្នា។

យោងតាមប្រសាសន៍របស់ ឯកឧត្ដមបណ្ឌិត ប៊ុន ភារិន នាយកវិទ្យាស្ថានជាតិពហុបច្ចេកទេសកម្ពុជា (NPIC) បានលើក​ឡើងថា វិទ្យាស្ថាន និងក្រុមហ៊ុន ជីប ម៉ុង អ៊ិនស៊ី ស៊ីមេន ខបភើរេសិន បានសហប្រតិបត្ដិការបណ្ដុះ​បណ្ដាលជំនាញ​ជូនដល់សិក្ខាកាមជាមួយគ្នាតាំងពីឆ្នាំ២០១៦មកម្ល៉េះ។ កាលណោះ ការចុះកិច្ចព្រមព្រៀងលើអនុស្សរណៈយោគយល់គ្នា​លើកទី១ទៅលើកម្មវិធី Enterprise Base Vocational Education ក្នុងវិស័យមេកានិចទូទៅ ជំនាញបរិក្ខារឧស្សាហកម្ម (Industry Facility) តាមប្រព័ន្ធទ្វេភាគី (Dual System) ដែលជាកម្មវិធីបណ្ដុះបណ្ដាលរវាងសាលា និងសហគ្រាស​ដោយសិក្សាទាំងក្នុងសាលា និងចុះហ្វឹកហាត់អនុវត្ដផ្ទាល់នៅតាមសហគ្រាសផងដែរ។

ឯកឧត្ដមបណ្ឌិត បន្ដថា បច្ចុប្បន្នកម្មវិធីនេះបានបណ្ដុះបណ្ដាលសិស្សកម្រិត Diploma បានចំនួន ៨ជំនាន់ មកហើយ ដោយក្នុងនោះមានសិស្សសរុប ៨៩នាក់ ស្រី ២៧នាក់ និងបានបញ្ចប់ដោយជោគជ័យចំនួន ៥ជំនាន់ ដែលមាន​សិស្ស​សរុប ៥៨នាក់ ស្រី ១៤នាក់ និងទទួលបានការងារធ្វើនៅក្រុមហ៊ុន ជីប ម៉ុង អ៊ិនស៊ី ស៊ីមេន ខបភើរេសិន សរុបចំនួន ៥៤នាក់ ស្រី ១២នាក់ គិតជាភាគរយស្មើនឹង ៩២%។

គួរបញ្ជាក់ថា នេះមិនមែនជាលើកទី១ទេដែលថ្នាក់ដឹកនាំ ក្រុមហ៊ុន ជីប ម៉ុង អ៊ិនស៊ី ស៊ីមេន ខបភើរេសិន បានយកចិត្តទុក​ដាក់សហការបើកវគ្គបណ្ដុះបណ្ដាលជំនាញវិជ្ជាជីវៈកម្រិតស្តង់ដាជាមួយវិទ្យាស្ថានជាតិពហុបច្ចេកទេសកម្ពុជា ពោលតាំង​ពីឆ្នាំ២០១៦មកម៉្លេះ។ សម្រាប់កិច្ចសហការបើកវគ្គបណ្ដុះ​បណ្ដាលការងារកំបោរក្នុងវិស័យសំណង់ថ្មី​នាពេលនេះ​មាន​សិក្ខាកាមសរុបចំនួន ៦៦នាក់ នឹងត្រូវបណ្តុះបណ្តាលលើជំនាញកំបោរនៃវិស័យសំណង់សម្រាប់ដំណាក់កាលទី១ ហើយ​ដំណាក់កាលទី២, ៣, និង៤ នឹងបន្តអនុវត្តទៅតាមភាពជាក់ស្តែង៕

The post ក្រុមហ៊ុនផលិតស៊ីម៉ងត៍ ជីប ម៉ុង អ៊ិនស៊ី ស៊ីមេន ខបភើរេសិន លោកឧកញ៉ា លាង ពៅ សហការបើកវគ្គបណ្ដុះបណ្ដាលការងារកំបោរក្នុងវិស័យសំណង់ appeared first on .

តើមូលហេតុអ្វី បានជាលោកឧកញ៉ា លាង ពៅ និងលោក ទៀ ស្យាម បង្កើតឱ្យមានព្រឹត្តិការណ៍ជិះរថយន្តឆ្លងប្រទេស​ដ៏អស្ចារ្យនេះឡើង? ហើយថាតើ តើហេតុអ្វី បានជាទីលានបើកបររថយន្តដ៏ធំខ្នាតអន្តរជាតិ នៅប្រទេសថៃ អញ្ជើញ​ម្ចាស់​រថយន្ត super car និងhyper car ល្បីៗពីកម្ពុជា ជាភ្ញៀវកិត្តិយសអន្តរជាតិលំដាប់ VIP ដល់ទីលាន?

លោកឧកញ៉ា លាង ពៅ ម្ចាស់រថយន្ត Bugatti Chiron ដ៏ប្រណីតបំផុតនៅកម្ពុជា មានប្រសាសន៍ថា ការសហការរៀបចំ​របស់ Cambodia Car Culture ជាមួយ REV UP Beyond Supercar ដែលផ្ដួចផ្ដើមដឹកនាំម្ចាស់រថយន្ដ super car និង hyper car ទៅកាន់ប្រទេសថៃនេះ នឹងនាំមកនូវបទពិសោធន៍ថ្មី ប្លែកដែលមិនធ្លាប់មាន។ មួយវិញទៀតការធ្វើដំណើរ​មានរយៈចម្ងាយឆ្ងាយ ចូលខ្ទង់ពាន់គីឡូម៉ែត្រនេះ ចូលទឹកដីបូរីរ៉ាំ ប្រទេសថៃ នឹងនាំយកនូវបទពិសោធន៍ថ្មី និង​អនុស្សាវរីយ៍​ល្អៗ ដល់ម្ចាស់រថយន្តsuper car និង hyper car ស្គាល់គ្នាកាន់តែច្រើន។ ជាពិសេសក្នុងចំណោម​ម្ចាស់​រថយន្ត super car និង hyper car ភាគច្រើន ពួកគាត់សុទ្ធតែជាអ្នកជំនួញ ដូច្នេះតាមរយៈការរៀបចំឱ្យមានព្រឹត្តិការណ៍​បែបនេះ ក៏នឹងអាចជាស្ពានមួយភ្ជាប់ទំនាក់ទំនងអាជីវកម្មរបស់ពួកគាត់បានមួយផ្នែកផងដែរ។

លោកឧកញ៉ា ស្ថាបនិក REV UP Beyond Supercar រូបនេះ បានពន្យល់បន្ថែមថា៖ នាព្រឹកព្រលឹម ថ្ងៃទី២៣ ខែកុម្ភៈ ម្ចាស់រថយន្ត Super Car និង Hyper Car ដែលបានចុះឈ្មោះទាំងអស់ នឹងជួបជុំគ្នានៅបរិវេនអាគារពាណិជ្ជកម្ម ជីប ម៉ុង ថោវើ រួចធ្វើដំណើរចេញពីភ្នំពេញ ទៅខេត្តសៀមរាប ដើម្បីឆ្លៀតថតរូបប្រូម៉ូតទេសចរណ៍ Super Car នៅទឹកដីដ៏អច្ឆរិយៈ​របស់កម្ពុជាយើង រួចបន្តដំណើរទៅព្រំដែនអូស្មាច់ ចូលទឹកដីបូរីរ៉ាំ ប្រទេសថៃ តែម្ដង។

លោក ទៀ ស្យាម ក៏បានបញ្ជាក់បន្ថែមថា ការធ្វើដំណើរផ្លូវឆ្ងាយបែបនេះ នឹងធ្វើឱ្យម្ចាស់ super car និង hyper car ទាំងអស់ បានរៀនសូត្រពីបច្ចេកកវិទ្យា និងចំណេះដឹង ក្នុងការបើកបររថយន្ដក្នុងទីលានប្រណាំង ដោយបើកដោយ​សុវត្ថិភាព ចំណាយពេលតិច។ ជាពិសេសនោះ គឺពួកយើងនឹងដកស្រង់បទពិសោធន៍ ដែលបង្រៀនពីអ្នកជំនាញ មុននឹង​អនុញ្ញាតឱ្យចូលបើកនៅលើ ទីលានបូរីរ៉ាំ ដែលជាទីលានបើកបររថយន្តដ៏ល្បី និងមានការទទួលស្គាល់កម្រិតពិភពលោក៕

The post ឧកញ៉ា លាង ពៅ និងលោក ទៀ ស្យាម ដឹកនាំម្ចាស់រថយន្ដ Super Car និង Hyper Car ធ្វើដំណើររាប់ពាន់គីឡូម៉ែត្រ ទៅកាន់ទីលានបើកបររថយន្តខ្នាតអន្តរជាតិ នៅប្រទេសថៃ appeared first on .