ឧកញ៉ា លីម ឈីវហូរ

ឧកញ៉ាមួយរូប ធ្លាប់ជាប្រធានក្រុមប្រឹក្សាភិបាល «តំបន់សេដ្ឋកិច្ចពិសេសភ្នំពេញ» មុនអ្នកឧកញ៉ា គិត ម៉េង

ឧកញ៉ាដែនដី — Wed, 27 Dec 2023 01:20:00 +0000

តំបន់សេដ្ឋកិច្ចពិសេសភ្នំពេញ (Phnom Penh Special Economic Zone) គឺជាតំបន់សេដ្ឋកិច្ចពិសេសដ៏មានសក្តានុពលនិងធំជាងគេបំផុតមួយនៅកម្ពុជា ដែលត្រូវបានបង្កើតឡើង បន្ទាប់ពីបានទទួលសិទ្ធិវិនិយោគពីរាជរដ្ឋាភិបាលកម្ពុជា និងមានលោកស្រីឧកញ៉ា លីម ឈីវហូរ ជាប្រធានក្រុមប្រឹក្សាភិបាល តាំងពីបង្កើតក្រុមហ៊ុនដំបូង នៅឆ្នាំ២០០៦។

កាលពីថ្ងៃទី៣០ ខែឧសភា ឆ្នាំ២០១៦ ក្រុមហ៊ុនតំបន់សេដ្ឋកិច្ចពិសេសមួយនេះ បានក្លាយខ្លួនទៅជាក្រុមហ៊ុនចុះបញ្ជីនៅផ្សារមូលបត្រកម្ពុជា។ លុះដល់ថ្ងៃទី២១ ខែធ្នូ ឆ្នាំ២០២១ ក្រុមហ៊ុន Royal Group របស់អ្នកឧកញ៉ា គិត ម៉េង ទិញបានភាគហ៊ុនប្រមាណ ៤៥,០៩ភាគរយ និងបានក្លាយជាម្ចាស់ភាគហ៊ុនធំជាងគេ ហើយបានគ្រប់គ្រងតំបន់សេដ្ឋកិច្ចពិសេសភ្នំពេញ។

ក្នុងសេចក្តីថ្លែងការណ៍កាលថ្ងៃទី២១ ខែឧសភា ឆ្នាំ២០២១ អ្នកឧកញ៉ា គិត ម៉េង បានលើកឡើងថា នេះជាកំណត់ត្រាដ៏អស្ចារ្យមួយទៀតសម្រាប់ក្រុមហ៊ុន Royal Group។ អ្នកឧកញ៉ា បានបន្តថា តំបន់សេដ្ឋកិច្ចពិសេសភ្នំពេញ មានក្រុមហ៊ុនវិនិយោគជាច្រើនមកពីប្រទេសជប៉ុន ចិន សិង្ហបុរី សហរដ្ឋអាមេរិក ម៉ាឡេស៊ី ហូឡង់ និងអូស្ត្រាលី ដែលជាទីផ្សារឧស្សាហកម្មដ៏ធំរួមមាន ផ្នែកយានយន្ត កាត់ដេរ ភេសជ្ជៈម្ហូបអាហារ ផលិតផលផ្លាស្ទិក ផលិតផលអេឡិចត្រូនិក និងគ្រឿងអលង្ការ។

សូមជម្រាបថា តំបន់សេដ្ឋកិច្ចពិសេសភ្នំពេញ របស់អ្នកឧកញ៉ា គិត ម៉េង ដែលមានទីតាំងនៅជាប់ផ្លូវជាតិលេខ៤ សង្កាត់កន្ទោក ខណ្ឌកំបូល រាជធានីភ្នំពេញ បានផ្លាស់ប្តូរឈ្មោះថ្មីទៅជា «តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ» (Royal Group Phnom Penh Special Economic Zone) វិញ កាលថ្ងៃទី១២ ខែកក្កដា ឆ្នាំ២០២៣។ តំបន់សេដ្ឋកិច្ចពិសេសនេះ មានផ្ទៃដីប្រមាណ ៤៥០ហិកតា និងបច្ចុប្បន្នមានក្រុមហ៊ុនអន្តរជាតិជាង ៩០ មកពីបណ្តាប្រទេសជាច្រើន៕

The post ឧកញ៉ាមួយរូប ធ្លាប់ជាប្រធានក្រុមប្រឹក្សាភិបាល «តំបន់សេដ្ឋកិច្ចពិសេសភ្នំពេញ» មុនអ្នកឧកញ៉ា គិត ម៉េង appeared first on .

ឧកញ៉ា លីម ឈីវហូរ ទទួលបានសិទ្ធិនាំចូលចែកចាយស្រា Johnnie Walker ផ្ដាច់មុខនៅកម្ពុជា

ឧកញ៉ាដែនដី — Thu, 23 Nov 2023 02:20:33 +0000

ក្រសួងពាណិជ្ជកម្ម បានចេញលិខិតយល់ព្រមឱ្យក្រុមហ៊ុន អ៊ែតវូត អាហរ័ណ នីហរ័ណ របស់លោកស្រីឧកញ៉ា លីម ឈីវហូរ ទទួលបានសិទ្ធិនាំចូល និងចែកចាយផ្តាច់មុខលើផលិតផលស្រាម៉ាក «Johnnie Walker» នៅក្នុងព្រះរាជាណាចក្រកម្ពុជា រហូតដល់ឆ្នាំ២០២៥។

តាមរយៈលិខិតចុះថ្ងៃទី៣០ ខែតុលា ឆ្នាំ២០២៣ របស់ក្រសួងពាណិជ្ជកម្ម បានបញ្ជាក់ថា ក្រសួងបានឯកភាពទទួលស្គាល់សិទ្ធិនាំចូល និងចែកចាយផ្តាច់មុខលើផលិតផលស្រាម៉ាក «Johnnie Walker» របស់ក្រុមហ៊ុន អ៊ែតវូត អាហរ័ណ នីហរ័ណ ដែលទទួលបានសិទ្ធិពីក្រុមហ៊ុនម្ចាស់ម៉ាក Diageo Brands B.V.។ លិខិតក្រសួងដដែល បានបញ្ជាក់ទៀតថា ការទទួលសិទ្ធិផ្តាច់មុខនេះ មានសុពលភាពចាប់ពីថ្ងៃទី ៣០ ខែវិច្ឆិកា ឆ្នាំ២០២៣ រហូតដល់ថ្ងៃទី ៣០ ខែមិថុនា ឆ្នាំ២០២៥។

Johnnie Walker ជាស្រាវីស្គីលក់ដាច់បំផុតលើពិភពលោក ដែលត្រូវបានបង្កើតឡើងតាំងពីឆ្នាំ១៨២០ នៅប្រទេសស្កុតឡែន។ ស្រាដែលមានអាយុកាលជាង ២សតវត្សនេះ បានក្លាយជាប្រេនដ៏ល្បីល្បាញបំផុតមួយនាពេលបច្ចុប្បន្ន និងកំពុងចរាចរលើទីផ្សារចំនួន ១៨០ប្រទេស នៅលើពិភពលោក។

ក្រុមហ៊ុន អ៊ែតវូត អាហរ័ណ នីហរ័ណ របស់លោកស្រីឧកញ៉ា លីម ឈីវហូរ កំពុងនាំចូលនិងចែកចាយនូវប្រភេទស្រា និងស្រាបៀរជាង ១០មុខ ដែលរួមមានដូចជា Hennessy, Johnnie Walker, Katsuyama, Corona Extra, Budweiser, Moet & Chandon, Glenmorangie, Belvedere Vodka, Terrazas, Chandon, Cloudy Bay (New Zealand), Krug, Becks Ice, Veuve Clicquot, Cheval Andes។ ក្រៅពីប្រភេទស្រា ក្រុមហ៊ុនក៏បានផលិតចែកចាយលក់ទឹកបរិសុទ្ធយីហោ “ណាវី”។

សូមជម្រាបថា កាលពីថ្ងៃទី២៨ ខែកញ្ញា ឆ្នាំ២០២២ ក្រុមហ៊ុន អ៊ែតវូត អាហរ័ណ នីហរ័ណ ក៏ទទួលបានសិទ្ធិពីក្រសួងពាណិជ្ជកម្ម ក្នុងការនាំចូល និងចែកចាយស្រាបៀរ Budweiser ទូទាំងប្រទេសកម្ពុជា ចាប់ពីថ្ងៃទី ៨ ខែវិច្ឆិកា ឆ្នាំ២០២២ រហូតដល់ថ្ងៃទី ៣១ ខែធ្នូ ឆ្នាំ២០២៤ ផងដែរ៕

The post ឧកញ៉ា លីម ឈីវហូរ ទទួលបានសិទ្ធិនាំចូលចែកចាយស្រា Johnnie Walker ផ្ដាច់មុខនៅកម្ពុជា appeared first on .

ថ្នាក់ដឹកនាំក្រុមហ៊ុនរបស់ឧកញ៉ា លីម ឈីវហូរ ១រូប ជាប្រធានសមាគមអ្នកនាំចូល និងចែកចាយស្រាបៀរ

ឧកញ៉ាដែនដី — Tue, 14 Nov 2023 00:30:00 +0000

លោក តាន់ សែឆាយ អគ្គនាយកនៃក្រុមហ៊ុន អ៊ែតវូត អាហរ័ណ នីហរ័ណ (Attwood Import Export) របស់លោកស្រីឧកញ៉ា លីម ឈីវហូរ គឺជាប្រធានសមាគមអ្នកនាំចូល និងចែកចាយស្រាបៀរ និងស្រា (Wine Spirit & Beer Importers and Distributors Association) នៅកម្ពុជា។

សមាគមអ្នកនាំចូល និងចែកចាយស្រាបៀរ និងស្រា ជាសមាគមក្នុងស្រុក ដែលមានការទទួលស្គាល់និងចុះបញ្ជីនៅក្រសួងមហាផ្ទៃ កាលពីខែកក្កដា ឆ្នាំ២០២២។ បច្ចុប្បន្នសមាគម មានសមាជិកចំនួន ១០ក្រុមហ៊ុនហើយ បានចូលជាសមាជិក។ គោលបំណងចម្បងៗរបស់សមាគមនេះ គឺជំរុញនិងគាំទ្រកិច្ចសហការក្នុងចំណោមក្រុមហ៊ុនជាសមាជិក ឱ្យមានភាពរីកចម្រើនប្រកបដោយនិរន្តរភាព ចូលរួមលើកកម្ពស់កិច្ចសហការជាមួយរាជរដ្ឋាភិបាលកម្ពុជា វិស័យឯកជន និងស្ថាប័នពាក់ព័ន្ធនានា ក្នុងការរកវិធីសាស្ត្រ ដើម្បីជួយសម្របសម្រួលគាំទ្រដល់ក្រុមហ៊ុនសមាជិក និងចូលរួមជាមួយវិស័យឯកជន ឬស្ថាប័នពាក់ព័ន្ធនានា ដើម្បីផ្សព្វផ្សាយ អនុវត្តច្បាប់ និងបទបញ្ញត្តិជាធរមាន ដូចជា ច្បាប់ស្តីពីម៉ាកពាណិជ្ជនាម កម្មសិទ្ធិបញ្ញា ការប្រកួតប្រជែងមិនស្មោះត្រង់ និងការនាំចូល ជាដើម-ល-។

សូមជម្រាបថា ក្រុមហ៊ុន អ៊ែតវូត អាហរ័ណ នីហរ័ណ ដែលមានលោកស្រីឧកញ៉ា លីម ឈីវហូរ ជាប្រធានស្ថាបនិក និងលោក តាន់ សែឆាយ ជាអគ្គនាយក គឺជាក្រុមហ៊ុននាំចូលនិងចែកចាយផ្តាច់មុខនូវប្រភេទស្រាថ្លៃៗដូចជា ស្រាវីស្គី និងស្រាបៀរ ជាច្រើនប្រភេទ រហូតដល់ទៅជាង ១៥មុខ នៅក្នុងប្រទេសកម្ពុជា នាពេលបច្ចុប្បន្ន ក្នុងនោះមានដូចជា Hennessy, Johnnie Walker, Katsuyama, Corona Extra, Budweiser, Moet & Chandon, Glenmorangie, Belvedere Vodka, Terrazas, Chandon, Cloudy Bay (New Zealand), Krug, Becks Ice, Veuve Clicquot និង Cheval Andes៕

The post ថ្នាក់ដឹកនាំក្រុមហ៊ុនរបស់ឧកញ៉ា លីម ឈីវហូរ ១រូប ជាប្រធានសមាគមអ្នកនាំចូល និងចែកចាយស្រាបៀរ appeared first on .