ឧកញ៉ា វិញ ហួរ

ណែនាំឱ្យស្គាល់ឧកញ៉ាមួយរូប ជាម្ចាស់រោងចក្រស៊ីម៉ង់ត៍ ម្ចាស់ក្រុមហ៊ុនផ្គត់ផ្គង់អគ្គិសនី និងម្ចាស់តំបន់សេដ្ឋកិច្ចពិសេសកំពត

ឧកញ៉ាដែនដី — Mon, 22 May 2023 02:43:44 +0000

លោកឧកញ៉ាបណ្ឌិត វិញ ហួរ ជាអ្នកជំនួញពហុវិស័យដ៏លេចធ្លោរមួយរូបនៅកម្ពុជា ដោយលោកកំពុងកាន់កាប់ក្រុមហ៊ុនធំៗជាច្រើននៅក្នុងដៃ រួមទាំងតំបន់សេដ្ឋកិច្ចពិសេសកំពត។

ឧកញ៉ា វិញ ហួរ ជាម្ចាស់ក្រុមហ៊ុនផ្គត់ផ្គង់អគ្គិសនី កំពត អេឡិកទ្រីស៊ីធី សឹបផ្លាយ (Kampot Electricity Supply Co., Ltd) ដែលបានបើកដំណើរការ តាំងពីខែមិថុនា ឆ្នាំ២០១២។ លោកឧកញ៉ា ក៏ជាសហស្ថាបនិក រោងចក្រផលិតស៊ីម៉ង់ត៍ បាត់ដំបង ខនស៍ ស៊ីមេន លីមីធីត (Battambang Conch Cement Company Limited) ដែលវិនិយោគអស់ទឹកប្រាក់ ២៣០លានដុល្លារ នៅតំបន់ភ្នំដូនមាយ ឃុំស្តៅ ស្រុករតនៈមណ្ឌល ខេត្តបាត់ដំបង និងត្រូវបានបង្កើតឡើងដោយក្រុមហ៊ុនធំៗពីរចូលហ៊ុនគ្នា ជាមួយនឹងអ្នកឧកញ៉ា ស៊ី គង់ទ្រីវ ផងដែរ។

លោកឧកញ៉ា ក៏ជាម្ចាស់គ្រប់គ្រង «តំបន់សេដ្ឋកិច្ចពិសេស កំពត» ដែលមានទីតាំង ស្ថិតនៅឃុំកោះតូច និងឃុំបឹងទូក ស្រុកកំពត ខេត្តកំពត មានទំហំដីទំហំ ១៤៥ ហិកតា និងប្រើទុនវិនិយោគជាង ១៥លានដុល្លារ។ តំបន់សេដ្ឋកិច្ចពិសេសនេះ ត្រូវបានក្រុមប្រឹក្សាអភិវឌ្ឍន៍កម្ពុជា អនុញ្ញាតជាគោលការណ៍ កាលពីថ្ងៃទី២៣ ខែឧសភា ឆ្នាំ២០០៦ និងត្រូវបានសម្តេចតេជោ ហ៊ុន សែន នាយករដ្ឋមន្ត្រីចេញអនុក្រឹត្យបង្កើតតំបន់សេដ្ឋកិច្ចពិសេស នៅថ្ងៃទី០៩ ខែមករា ឆ្នាំ២០០៧។

ក្រៅពីម្ចាស់ក្រុមហ៊ុនធំៗខាងលើនេះ លោកឧកញ៉ា វិញ ហួរ ក៏នៅមានក្រុមហ៊ុនមួយចំនួនទៀតផងដែរ ខណៈដែលបច្ចុប្បន្ន ប្រធានក្រុមហ៊ុន ផែកំពត រូបនេះ ក៏មានតួនាទីជា អនុប្រធានសភាពាណិជ្ជកម្មកម្ពុជា និងជាសមាជិកក្រុមប្រឹក្សាភិបាលនៃសមាគមឧកញ៉ាកម្ពុជា។

លោកឧកញ៉ា វិញ ហួរ ត្រូវបានគេមើលឃើញថា ជាសេដ្ឋីមួយរូប ដែលតែងតែចូលរួមជួយដល់ការងារសង្គមយ៉ាងសកម្ម ដូចជាការចូលរួមបរិច្ចាគថវិកាជូនដល់កាកបាទក្រហមកម្ពុជា ការចូលរួមសកម្មភាពសប្បុរសធម៌ផ្សេងៗ និងការសាងសង់ផ្ទះជូនដល់អតីតយុទ្ធជន រាប់រយខ្នងជាដើម៕

The post ណែនាំឱ្យស្គាល់ឧកញ៉ាមួយរូប ជាម្ចាស់រោងចក្រស៊ីម៉ង់ត៍ ម្ចាស់ក្រុមហ៊ុនផ្គត់ផ្គង់អគ្គិសនី និងម្ចាស់តំបន់សេដ្ឋកិច្ចពិសេសកំពត appeared first on .

ណែនាំឱ្យស្គាល់ឧកញ៉ា២រូប ជាម្ចាស់រោងចក្រស៊ីម៉ង់ត៍ តម្លៃ២៣០លានដុល្លារ នៅខេត្តបាត់ដំបង

ឧកញ៉ាដែនដី — Wed, 26 Oct 2022 05:19:21 +0000

រោងចក្រផលិតស៊ីម៉ង់ត៍ បាត់ដំបង ខនស៍ ស៊ីមេន លីមីធីត (Battambang Conch Cement Company Limited) ដែលវិនិយោគអស់ទឹកប្រាក់ ២៣០លានដុល្លារ នៅតំបន់ភ្នំដូនមាយ ឃុំស្តៅ ស្រុករតនៈមណ្ឌល ខេត្តបាត់ដំបង គឺត្រូវបានបង្កើតឡើងដោយក្រុមហ៊ុនធំៗពីរចូលហ៊ុនគ្នា ក្នុងនោះក៏មានអ្នកឧកញ៉ា ស៊ី គង់ទ្រីវ និងឧកញ៉ា វិញ ហួរ ជាសហស្ថាបនិក។

រោងចក្រស៊ីម៉ងត៍ បាត់ដំបង ខនស៍ ស៊ីមេន លីមីធីត ត្រូវបានសម្ពោធដាក់ឱ្យដំណើរការផលិតស៊ីម៉ងត៍ជាផ្លូវការ នៅថ្ងៃទី៣១ ខែឧសភា ឆ្នាំ២០១៨ ក្រោមអធិបតីភាពដ៏ខ្ពង់ខ្ពស់ សម្តេចអគ្គសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។ រោងចក្រនេះ ត្រូវបានសង់នៅលើទីតាំងដែលមានផ្ទៃដីសរុបទំហំ ៣១៦ ហិកតា និងប្រើរយ:ពេលសាងសង់ចំនួន ១៨ខែ គិតចាប់តាំងពីចុងឆ្នាំ ២០១៦ ក្នុងគម្រោងទុនវិនិយោគ ប្រមាណ ២៣០លានដុល្លារអាមេរិក ដែលជាការវិនិយោគរួមគ្នារវាងក្រុមហ៊ុនចិន Conch International Holding (HK) Limited និងក្រុមហ៊ុន Battambang KT Cement Co.,Ltd តំណាងដោយអ្នកឧកញ៉ា ស៊ី គង់ទ្រីវ និងលោកឧកញ៉ា វិញ ហួរ។

អ្នកឧកញ៉ា ស៊ី គង់ទ្រីវ

អ្នកឧកញ៉ា ស៊ី គង់ទ្រីវ ត្រូវបានគេដឹងថា គឺជាសេដ្ឋីកំពូលមួយរូបនៅកម្ពុជា និងជាអតីតសមាជិកព្រឹទ្ធសភា ហើយលោកជានាយកក្រុមហ៊ុន ខេ ធី ប៉ាស៊ីហ្វិក គ្រុប លីមីធីត និងជាម្ចាស់មជ្ឈមណ្ឌលម៉ុងឌីយ៉ាល់នៅភ្នំពេញ។ ចំណែកឯ ឧកញ៉ា វិញ ហួរ ជាអគ្គនាយកក្រុមហ៊ុន កំពង់ផែកំពត (Kampot Port Co.,Ltd) និងជាម្ចាស់ក្រុមហ៊ុន «វិញ ហួរ» អភិវឌ្ឍន៍លើដំណាំអំពៅ នៅភូមិពាម ឃុំអូរស្វាយ ស្រុកត្រពាំងប្រាសាទ ខេត្តឧត្ដរមានជ័យ ដើម្បីផលិតស្ករនាំចេញទៅបរទេស ផងដែរ។

ឧកញ៉ា វិញ ហួរ

សូមបញ្ជាក់ថា រោងចក្រស៊ីម៉ងត៍ បាត់ដំបង ខនស៍ ស៊ីមេន លីមីធីត មានសមត្ថភាព ផលិតស៊ីម៉ងត៍បានប្រមាណ ៥,០០០ តោនក្នុងមួយថ្ងៃ ឬស្មើនឹងជិត ២លានតោនក្នុងមួយឆ្នាំ។ សម្តេចតេជោ ហ៊ុន សែន បានបញ្ជាក់ឱ្យដឹងថា រោងចក្រនេះ គឺអាចផ្គត់ផ្គង់ទៅកាន់ខេត្តមួយចំនួននៅក្នុងតំបន់ ដូចជាខេត្តបាត់ដំបងខ្លួនឯង ពោធិ៍សាត់ ប៉ៃលិន បន្ទាយមានជ័យ និងសៀមរាប ដែលទាំងអស់នេះ គឺជាតម្រូវការ និងជាផលចំនេញមួយសំរាប់បំពេញតម្រូវការក្នុងស្រុក ខណៈដែលបច្ចុប្បន្ន កម្ពុជាកំពុងមានការអភិវឌ្ឍរីកចម្រើន ក្នុងការសាងសង់ផ្សេងៗ ដូចជាផ្លូវថ្នល់ សាលារៀន និងសំណង់អគារផ្សេងៗ៕

The post ណែនាំឱ្យស្គាល់ឧកញ៉ា២រូប ជាម្ចាស់រោងចក្រស៊ីម៉ង់ត៍ តម្លៃ២៣០លានដុល្លារ នៅខេត្តបាត់ដំបង appeared first on .

ឧកញ៉ា វិញ ហួរ ចូលរួមបរិច្ចាគទឹកប្រាក់ ៥ម៉ឺនដុល្លារជាមួយសម្តេចតេជោ ហ៊ុន សែន ដោះស្រាយបញ្ហាមីន

ឧកញ៉ាកោះក្របី — Tue, 05 Jul 2022 15:11:33 +0000

ឧកញ៉ា វិញ ហួរ និងលោកជំទាវ ប្រកាសបរិច្ចាគថវិកា ៥០,០០០ដុល្លារ ជូនដល់រាជរដ្ឋាភិបាលកម្ពុជា ដើម្បីដោះស្រាយបញ្ហាមីន នៅទូទាំងប្រទេសកម្ពុជា។

ការចូលរួមបរិច្ចាគថវិកានេះ បានធ្វើឡើងបន្ទាប់ពីសម្តេចតេជោ ហ៊ុន សែន អំពាវនាវដល់វិស័យឯកជននានា ដែលមានបំណងចូលរួមជាមួយរាជរដ្ឋាភិបាល ដើម្បីបោសសំអាតមីននៅកម្ពុជា។ សម្តេចតេជោ ហ៊ុន សែន បានថ្លែងអំណរគុណដល់សប្បុរសជនទាំងអស់ ដែលបានចូលរួមបរិច្ចាគថវិកានេះ។

ការអំពាវនាវរបស់សម្តេចធ្វើឡើងបន្ទាប់ពី សម្តេចទទួលបានរបាយការណ៍ពីស្ថានភាព នៃការគំរាមកំហែងយ៉ាងខ្លាំងដោយគ្រាប់មីនចំពោះប្រជាពលរដ្ឋ ក្នុងឱកាសសម្តេចអញ្ជើញលែងកូនត្រី នៅឃុំប៉ោយចារ ស្រុកភ្នំស្រុក ខេត្តបន្ទាយមានជ័យ នៅព្រឹកថ្ងៃទី០១ ខែកក្កដា ឆ្នាំ២០២២៕

The post ឧកញ៉ា វិញ ហួរ ចូលរួមបរិច្ចាគទឹកប្រាក់ ៥ម៉ឺនដុល្លារជាមួយសម្តេចតេជោ ហ៊ុន សែន ដោះស្រាយបញ្ហាមីន appeared first on .