ឧកញ៉ា សន សៀប៖ ទោះបីជាមានការងើបឡើងវិញយឺតនៃវិស័យអចលនទ្រព្យ តែការនាំចូលសម្ភារសំណង់របស់កម្ពុជា កើនឡើងខ្លាំងនៅឆ្នាំ២០២៥

ឧកញ៉ាដែនដី — Tue, 20 Jan 2026 08:19:13 +0000

ឧកញ៉ា សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានបង្ហើបឱ្យដឹងថា ទោះបីជាមានការងើបឡើងវិញយឺតនៃវិស័យអចលនទ្រព្យ តែការនាំចូលសម្ភារសំណង់របស់កម្ពុជា កើនឡើងខ្លាំងនៅឆ្នាំ២០២៥ ដែលជាសញ្ញាមួយវិជ្ជមានចំពោះសេដ្ឋកិច្ចជាតិ។

ក្នុងបទសម្ភាសន៍មួយកាលពីពេលថ្មីៗនេះ ឧកញ៉ា សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ថា វិស័យសំណង់ និងអចលនទ្រព្យ បានងើបឡើងក្នុងសភាពយឺត និងនៅមានកំណើនទាប ដោយសកម្មភាពសាងសង់លំនៅឋានឆ្លើយតបទៅនឹងតម្រូវការពិតក្នុងស្រុកមានការចុះខ្សោយ។

យ៉ាងណាក្តី លោកឧកញ៉ា បានកត់សម្គាល់ឃើញពីសន្ទុះកើនឡើងគួរឱ្យកត់សម្គាល់នៃសកម្មភាពសំណង់បម្រើឱ្យវិស័យឧស្សាហកម្ម ដូចជា ការសាងសង់រោងចក្រ សហគ្រាស និងឃ្លាំង ដែលនឹងក្លាយជានិន្នាការថ្មី ជួយគាំពារកំណើននៃវិស័យនេះពេលខាងមុខ។

ទន្ទឹមនឹងនេះ លោកឧកញ៉ា បានបង្ហាញសុទិដ្ឋិនិយមថា វិស័យឧស្សាហកម្មនៅកម្ពុជា នឹងនៅតែមានកំណើនល្អនៅឆ្នាំ២០២៦នេះ បើធៀបទៅនឹងឆ្នាំ២០២៥ កន្លងទៅ ដោយសារមានកំណើនវិនិយោគរោងចក្រ និងសហគ្រាសថ្មីៗ ដែលបាន និងកំពុងសម្របខ្លួនទៅនឹងការផ្លាស់ប្តូរថ្មី នៃគោលនយោបាយពាណិជ្ជកម្មបដិការរបស់សហរដ្ឋអាម៉េរិក។

សូមជម្រាបថា បើតាមទិន្នន័យពីក្រសួងពាណិជ្ជកម្ម បានឱ្យដឹងថា ប្រទេសកម្ពុជា បាននាំចូលសម្ភារសំណង់ មានទំហំទឹកប្រាក់ ២,៦៣ពាន់លានដុល្លារអាម៉េរិក ក្នុងឆ្នាំ២០២៥ កើនឡើង ៣០,៤២% ខណៈការនាំចូលដែក និងដែកថែប មានតម្លៃរហូតដល់ ១,២១ពាន់លានដុល្លារអាម៉េរិក កើនឡើង ៤៤,១៩% បើធៀបនឹងឆ្នាំ២០២៤៕

The post ឧកញ៉ា សន សៀប៖ ទោះបីជាមានការងើបឡើងវិញយឺតនៃវិស័យអចលនទ្រព្យ តែការនាំចូលសម្ភារសំណង់របស់កម្ពុជា កើនឡើងខ្លាំងនៅឆ្នាំ២០២៥ appeared first on .

ព្រះមហាក្សត្រ ត្រាស់បង្គាប់ផ្តល់គោរមងារ «ឧកញ៉ា» ជូនលោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា

ឧកញ៉ាដែនដី — Tue, 11 Mar 2025 02:30:01 +0000

ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានប្រោសព្រះរាជទានត្រាស់បង្គាប់ផ្តល់គោរមងារ លោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ជា «ឧកញ៉ា» នៅថ្ងៃទី២២ ខែកុម្ភៈ ឆ្នាំ២០២៥ រួមជាមួយធុរជនចំនួន ៣រូបទៀត តាមសេចក្តីក្រាបបង្គំទូលថ្វាយរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

លោក សន សៀប ជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (Cambodian Valuers And Estate Agents Association) សម្រាប់អាណត្តិទី៩ (២០២៥-២០២៦) ខណៈដែលលោកក៏បានជាប់ឈ្មោះជាប្រធានសមាគម តាំងពីអាណត្តិទី៨ (២០២៣-២០២៤)។ ឧកញ៉ា សន សៀប ជាអគ្គនាយកក្រុមហ៊ុន Asia Pacific Property Appraisal Co., Ltd និងជាអគ្គនាយកក្រុមហ៊ុន KH25 Property Co., Ltd ផងដែរ។

គួរបញ្ជាក់ថា ក្រោយជាប់ឆ្នោតជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា អាណត្តិទី៩ (២០២៥-២០២៦) លោកឧកញ៉ា សន សៀប បានបង្ហាញពីការប្តេជ្ញាចិត្តក្នុងការលើកកម្ពស់ឧស្សាហកម្មអចលនវត្ថុ និងការរួមចំណែកក្នុងការអភិវឌ្ឍន៍សេដ្ឋកិច្ចជាតិ។ លោកឧកញ៉ា បានដាក់ចេញនូវផែនការយុទ្ធសាស្រ្តនៃការដឹកនាំសមាគម ដើម្បីពង្រឹងការងារខាងក្នុង និងបណ្តាញការងារជាមួយដៃគូពាក់ព័ន្ធខាងក្រៅ ដែលបានផ្តោតទៅលើការអភិវឌ្ឍន៍ជំនាញវិជ្ជាជីវៈ ក្រមសីលធម៌ សមត្ថភាព ច្បាប់ និងបទប្បញ្ញត្តិ ព្រមទាំងប្រតិបត្តិការប្រកបដោយនិរន្តរភាព៕

The post ព្រះមហាក្សត្រ ត្រាស់បង្គាប់ផ្តល់គោរមងារ «ឧកញ៉ា» ជូនលោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា appeared first on .