លោកជំទាវឧកញ៉ា សុខ ចន្ថា បច្ចុប្បន្ន​មានតួនាទីជា អនុប្រធានក្រុមហ៊ុនសូគីម៉ិច អ៊ុនវេសមេន គ្រុប, អនុប្រធាន ក្រុមហ៊ុន សុខា អូតែល និង​​ជា​ប្រធានក្រុមហ៊ុន សុខា រៀលអេស្តេត ឯ.ក (Sokha Real Estate)។ លោកជំទាវ​ឧកញ៉ា សុខ ចន្ថា ដែលជាកូនទី៤ ​ក្នុងចំណោមកូន៦នាក់​របស់​អ្នកឧកញ៉ា សុខ គង់ បានសិក្សា​នៅ​ប្រទេស​សិង្ហបុរី និងបន្តការសិក្សានៅប្រទេសអូស្ត្រាលី ផ្នែកគ្រប់គ្រង ហើយបានរៀបអាពាហ៍ពិពាហ៍ ជាមួយឧកញា ណាំង សុភាត នៅឆ្នាំ២០០៧។

កាលពីរសៀល​ថ្ងៃទី២០ ខែឧសភា ឆ្នាំ២០២៤ ម្សិលមិញ​នេះ ក្នុងនាមជា​អនុប្រធាន​សមាគម ដែលទើប​ទទួល​ការតែងតាំង​ថ្មី លោកជំទាវឧកញ៉ា សុខ ចន្ថា ក៏​បាន​អញ្ជើញ​ចូលរួម​ក្នុងកិច្ចប្រជុំ​ពិភាក្សាអំពី ការអនុវត្តច្បាប់​ពន្ធដារ និងបញ្ហាប្រឈមលើវិស័យ​សំណង់​នៅកម្ពុជា នៅសណ្ឋាគារភ្នំពេញ ក្រោមការដឹកនាំ​របស់​ លោកអ្នកឧកញ៉ា លី ហួរ ប្រធាន​សមាគមអ្នកអភិវឌ្ឍន៍លំនៅឋានកម្ពុជា ផងដែរ។

គួរបញ្ជាក់ថា សមាគមអ្នកអភិវឌ្ឍន៍លំនៅឋានកម្ពុជា បង្កើត​ឡើង​នៅ​ថ្ងៃទី១៣ ខែវិច្ឆិកា ឆ្នាំ២០១៥ ក្នុងគោលបំណង ដើម្បីពង្រឹងគុណភាពបុរី និងផ្ទះល្វែងឡើងវិញ ព្រមទាំងជំរុញ​ឱ្យសមាជិក​របស់​ខ្លួន សាងសង់​ផ្ទះ សំណង់អគារ ដែលមានចរិតលក្ខណៈបែបរចនាបទខ្មែរ ព្រមទាំងផ្តល់ព័ត៌មានចាំបាច់ជុំវិញ ការរកស៊ីខុស​ច្បាប់ របស់ក្រុមហ៊ុន​ខ្លះ ដែលឆ្មក់​ឱកាសឆរបោកពលរដ្ឋ និងជួយជំរុញ​ឱ្យមានការប្រកួត​ប្រជែកគ្នា​ផ្នែកតម្លៃ​និងសេវាកម្ម ដែលជា​ប្រយោជន៍ ដើម្បីអតិថិជនទទួលព័ត៌មានច្រើនជាងមុន និងមានជម្រើសល្អច្រើន​ជាងមុន។ លើសពីនេះ សមាគម ក៏មានការ​ផ្សព្វផ្សាយជុំវិញវិស័យលំនៅឋានឱ្យទូលំទូលាយ ដោះដូរ​បទពិសោធន៍​រវាង​សមាជិក ព្រមទាំងចូលរួម ដោះស្រាយបញ្ហាផ្លូវច្បាប់នានាជូនអ្នកទិញរបស់ខ្លួន ឱ្យបានច្រើន​ជាងមុន៕

The post កូនស្រីអ្នកឧកញ៉ា សុខ គង់ ទទួលការតែងតាំងជា អនុប្រធានសមាគមអ្នកអភិវឌ្ឍន៍លំនៅឋានកម្ពុជា appeared first on .