ធនាគាររបស់ ឧកញ៉ា ហួត អៀងតុង ឧបត្ថម្ភប្រាក់ ៤០លានរៀល ដល់អង្គការមូលនិធិរក្សាកុមារ

ឧកញ៉ាដែនដី — Mon, 19 Feb 2024 00:50:00 +0000

ធនាគារ ហត្ថា របស់ឧកញ៉ា ហួត អៀងតុង កាលពីថ្ងៃទី១៦ ខែកុម្ភៈ បានចូលរួមឧបត្ថម្ភប្រាក់ប្រចាំឆ្នាំចំនួន ៤០ លានរៀល ដល់អង្គការមូលនិធិរក្សាកុមារ ដើម្បីជួយទ្រទ្រង់សកម្មភាព និងបេសកកម្ម លើកកម្ពស់សុខុមាលភាព ការអប់រំ និងផលប្រយោជន៍កុមារកម្ពុជាពីគ្រប់ស្រទាប់វណ្ណៈ។

លោកឧកញ៉ា ហួត អៀងតុង ប្រធានអគ្គនាយក ធនាគារ ហត្ថា បានលើកឡើងក្នុងពិធីដែលរៀបចំឡើងនៅសណ្ឋាគារ សូហ្វីតែលភ្នំពេញ ថា ការឧបត្ថម្ភកម្មវិធីនេះ គឺបង្ហាញពីការប្តេជ្ញាចិត្តរបស់ ធនាគារ ហត្ថា ក្នុងការចូលរួមលើកកម្ពស់សុខុមាល និងការអប់រំដល់កុមារ ដើម្បីឱ្យពួកគាត់ក្លាយជាអ្នកបន្តវេន និងជាអ្នកជំនាន់ក្រោយដ៏មានសក្តានុពល។ ធនាគារ យល់ច្បាស់អំពីសារៈសំខាន់នៃការផ្តល់ចំណេះដឹង និងជំនាញចាំបាច់ផ្សេងៗដល់យុវជនជំនាន់ក្រោយ ដើម្បីធ្វើការសម្រេចចិត្តផ្នែកហិរញ្ញវត្ថុ នៅក្នុងជីវិតប្រចាំថ្ងៃរបស់ពួកគេឱ្យបានត្រឹមត្រូវ។

នារាត្រីថ្ងៃដដែល ធនាគារ ហត្ថា ដែលជាក្រុមហ៊ុនបុត្រសម័្ពន្ធរបស់ ធនាគារ ក្រុងស្រ៊ី ជាធនាគារពាណិជ្ជធំជាងគេលំដាប់ទី៥ នៅក្នុងប្រទេសថៃ និងជាសមាជិកនៃសម្ព័ន្ធហិរញ្ញវត្ថុអន្តរជាតិ MUFG ក៏បានរៀបចំព្រឹត្តិការណ៍ដ៏សំខាន់ គឺការប្រារព្ធអបអរខួប៣០ឆ្នាំនៃវឌ្ឍនភាព និងវិបុលភាព ជាមួយនឹងពិធីលៀងសាយភោជន៍ផងដែរ។ កម្មវិធីនេះ មានការចូលរួមតំណាងពីធនាគារជាតិនៃកម្ពុជា គណៈគ្រប់គ្រងធនាគារក្រុងស្រ៊ី អតិថិជន ដៃគូយុទ្ធសាស្ត្រអាជីវកម្ម ព្រមទាំងភ្ញៀវកិត្តិយសជាច្រើនរូបទៀត។

សូមជម្រាបថា មូលនិធិរក្សាកុមារ ត្រូវបានបង្កើតឡើងដោយលោកស្រី ជា សិរី ទេសាភិបាល ធនាគារជាតិនៃកម្ពុជា ក្នុងគោលបំណងលើកកម្ពស់សកម្មភាពសប្បុរសធម៌ និងមនុស្សធម៌នៅកម្ពុជា ជាពិសេសចូលរួមលើកកម្ពស់ការអប់រំរបស់កុមារកម្ពុជា៕

The post ធនាគាររបស់ ឧកញ៉ា ហួត អៀងតុង ឧបត្ថម្ភប្រាក់ ៤០លានរៀល ដល់អង្គការមូលនិធិរក្សាកុមារ appeared first on .

ឧកញ៉ា ពីររូបជាប់ឈ្មោះជាសមាជិករបស់សមាគមមីក្រូហិរញ្ញវត្ថុកម្ពុជាក្នុងអាណត្ដិថ្មី

រ៉េត សុកធា — Sat, 17 Feb 2024 02:36:01 +0000

នៅក្នុងឱកាសមហាសន្និបាតប្រចាំឆ្នាំ២០២៤ នាថ្ងៃទី១៦ ខែកុម្ភៈ ឆ្នាំ២០២៤ សមាគមមីក្រូហិរញ្ញវត្ថុកម្ពុជា បានធ្វើការបោះឆ្នោតជ្រើសរើសប្រធានក្រុមប្រឹក្សាភិបាលសមាគមថ្មី សម្រាប់អាណត្ដិឆ្នាំ២០២៤-២០២៥។ ជាលទ្ធផលមាន ធនាគារ គ្រឹះស្ថានហិរញ្ញវត្ថុចំនួន១៣ បានជាប់ឆ្នោត ក្នុងនោះមានលោកស្រី ឌិត នីតា ទទួលបានសេចក្ដីទុកចិត្តធ្វើជាប្រធានសមាគម ចំណែកលោក សុខ វឿន ជាប់ឆ្នោតជា អនុប្រធាន។ នេះបើយោងតាមសេចក្តីប្រកាសព័ត៌មាន CMA។

ឧកញ៉ា ហួត អៀងតុង

តាមរយៈសេចក្ដីប្រកាសនេះ ឧកញ៉ា ចំនួន២រូបបានជាប់ឈ្មោះជាសមាជិករបស់សមាគម ដែលក្នុងនោះមានដូចជា ឧកញ៉ា ឈុន សុភ័ក្រ្ដ ជានាយកប្រតិបត្តិ នៃគ្រឹះស្ថានមីក្រូហិរញ្ញវត្ថុ មហានគរ ម.ក និងឧកញ៉ា ហួត អៀងតុង ស្ថាបនិក និងជាប្រធានអគ្គនាយកធនាគារ ហត្ថា ម.ក។ ក្រៅពីនោះ លោក ដួស ឌីន, លោក គា បូរាណ, លោក ឃូ ប៊ុនទ្រី, កញ្ញា ឃុន សុនីតា, លោក ប៉ា ប៉ុណ្ណរិទ្ធី, លោក ស៊ីម សេនាជាតិ, លោក ឌី ស៊ីថា, លោក ខេង ទីឡែន និងលោក Yannick Nicolas MILEV ក៏ជាប់ឆ្នោតក្លាយជាសមាជិករបស់សមាគមផងដែរ។

ឧកញ៉ា ឈុន សុភ័ក្រ្ដ

សូមជម្រាបជូនថា សមាគមមីក្រូហិរញ្ញវត្ថុកម្ពុជា ត្រូវបានបង្កើតឡើងចាប់តាំងពីឆ្នាំ ២០០៤ ក្នុងគោលបំណងជួយដល់ប្រជាជនកម្ពុជាគ្រប់រូបឱ្យទទួលបាននូវសេវាហិរញ្ញវត្ថុផ្លូវការ សម្បូរបែប ទាន់ពេលវេលា តាមប្រព័ន្ធហិរញ្ញវត្ថុប្រកបដោយការ ទទួលខុសត្រូវនិងនិរន្តរភាព ព្រមទាំងធានានូវសុវត្ថិភាព វិបុលភាព និងនិរន្តរភាពរបស់វិស័យមីក្រូហិរញ្ញវត្ថុនៅកម្ពុជា៕

The post ឧកញ៉ា ពីររូបជាប់ឈ្មោះជាសមាជិករបស់សមាគមមីក្រូហិរញ្ញវត្ថុកម្ពុជាក្នុងអាណត្ដិថ្មី appeared first on .