ឧកញ៉ា ហួត អៀង តុង

ធនាគាររបស់ អ្នកឧកញ៉ា ឧកញ៉ា ៣រូប បានភ្ជាប់ប្រព័ន្ធទូទាត់វិក្កយបត្ររបស់ក្រសួងមហាផ្ទៃ

ឧកញ៉ាដែនដី — Fri, 09 Feb 2024 06:24:34 +0000

ធនាគាររបស់ អ្នកឧកញ៉ា ឧកញ៉ា ចំនួន ៣រូប ជាធនាគារដៃគូជាមួយក្រសួងមហាផ្ទៃ និងបានភ្ជាប់ប្រព័ន្ធទូទាត់វិក្កយបត្រ ក្នុងការទូទាត់កម្រៃសេវារដ្ឋបាលនានានៅអង្គភាពច្រកចេញចូលតែមួយ នៃរដ្ឋបាលរាជធានី ខេត្ត ដើម្បីកាន់តែមានភាពងាយស្រួលសម្រាប់ប្រជាពលរដ្ឋ។

ក្នុងពិធីប្រកាសដាក់ឱ្យអនុវត្តជាផ្លូវការប្រព័ន្ធទូទាត់វិក្កយបត្រ (Payment Hub) និងការដាក់ឱ្យអនុវត្តសាកល្បងកម្មវិធីព័ត៌មានវិទ្យាសម្រាប់ទទួលពាក្យស្នើសុំ និងផ្តល់សេវារដ្ឋបាលតាមប្រព័ន្ធអនឡាញ នៅអង្គភាពច្រកចេញចូលតែមួយរាជធានី ខេត្ត ក្រោមអធិបតីភាព លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាព្រឹកថ្ងៃទី៨ ខែកុម្ភៈ ឆ្នាំ២០២៤ លោក សួស ប្រាថ្នា អគ្គនាយករដ្ឋបាល ក្រសួងមហាផ្ទៃ បានបង្ហើបឱ្យដឹងថា ធនាគារ វីង របស់អ្នកឧកញ៉ា គិត ម៉េង, ធនាគារ កាណាឌីយ៉ា របស់អ្នកឧកញ៉ា ពុង ឃាវសែ និងធនាគារ ហត្ថា របស់ឧកញ៉ា ហួត អៀងតុង រួមទាំងធនាគារដៃគូចំនួន ៨ទៀត គឺជាដៃគូបានភ្ជាប់ប្រព័ន្ធទូទាត់វិក្កយបត្រ (Payment Hub)។

លោក សួស ប្រាថ្នា បានលើកឡើងក្នុងរបាយការណ៍ថា អគ្គនាយកដ្ឋានរដ្ឋបាលនៃក្រសួងមហាផ្ទៃ បានសហការជាមួយក្រុមហ៊ុន KESS INNOVATION PLC បំពាក់ម៉ាស៊ីនទូទាត់ប្រាក់ស្វ័យប្រវត្តិជូនរដ្ឋបាលរាជធានី ខេត្ត ដែលអនុញ្ញាតឱ្យប្រជាពលរដ្ឋអាចមានជម្រើសកាន់តែច្រើន ក្នុងការទូទាត់កម្រៃសេវារដ្ឋបាល ពោលគឺអាចបង់កម្រៃសេវាតាមរយៈប្រព័ន្ធធនាគារ ឬភ្នាក់ងារផ្តល់សេវាផ្ទេរប្រាក់ផ្សេងៗ ឬបង់កម្រៃសេវាជាសាច់ប្រាក់ដោយផ្ទាល់ក៏បាន។

លោកអគ្គនាយករដ្ឋបាល បានបន្ថែមដូច្នេះថា៖ “បច្ចុប្បន្ន ប្រព័ន្ធទូទាត់វិក្កយបត្រ (Payment Hub) បានភ្ជាប់ជាមួយធនាគារដៃគូមានចំនួន ១២ រួមមាន៖ ១.ធនាគារ អេស៊ីលីដា, ២.ធនាគារ អេប៊ីអេ, ៣.ធនាគារ ប៊ីអាយស៊ី, ៤.ធនាគារ វីង, ៥.ធនាគារ ស្ថាបនា, ៦.ធនាគារ កាណាឌីយ៉ា, ៧.ធនាគារ ភីភីស៊ីប៊ី, ៨.ធនាគារ ហត្ថា, ៩.ក្រុមហ៊ុន យូផេឌីជីថល, ១០.ភ្នាក់ងារផ្ទេរប្រាក់ទ្រូម៉ាន់នី, ១១.ភ្នាក់ងារផ្ទេរប្រាក់ អ៊ីម៉ាន់នី និង ១២.ប្រព័ន្ធ KHQR បាគង។ ជាមួយគ្នានេះ ក្រសួងក៏គ្រោងពង្រីកការតភ្ជាប់ជាមួយធនាគារដៃគូផ្សេងៗទៀត នៅពេលអនាគតផងដែរ”។

តាមការបញ្ជាក់ពីលោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ ប្រព័ន្ធទូទាត់វិក្កយបត្រ (Payment Hub) ជាសមិទ្ធផលថ្មីមួយទៀតនៅក្នុងកម្មវិធីកំណែទម្រង់របស់រាជរដ្ឋាភិបាល ក្នុងការបន្តពង្រឹង និងលើកកម្ពស់គុណភាព និងប្រសិទ្ធភាពនៃការផ្តល់សេវាសាធារណៈ ជាពិសេសការផ្តល់សេវារដ្ឋបាលតាមរយៈប្រព័ន្ធឌីជីថល ដើម្បីជំរុញប្រសិទ្ធភាព និងផ្តល់ភាពងាយស្រួលជូនប្រជាពលរដ្ឋ ក្នុងការស្នើសុំសេវារដ្ឋបាលឱ្យបានកាន់តែឆាប់រហ័ស តម្លាភាព និងគណនេយ្យភាព ស្របតាមគោលការណ៍ ស្តង់ដា បែបបទ និងនីតិវិធីនៃការផ្តល់សេវាតាមយន្តការច្រកចេញចូលតែមួយ។ លោកឧបនាយករដ្ឋមន្ត្រី យល់ថាប្រព័ន្ធទូទាត់វិក្កយបត្រនេះ ក៏នឹងចូលរួមចំណែកបំបាត់អំពើពុករលួយ និងការទាមទារកម្រៃសេវាក្រៅផ្លូវការ កាត់បន្ថយបន្ទុកបុគ្គលិកក្នុងការកាន់សាច់ប្រាក់ និងធានាបាននូវសុវត្ថិភាពខ្ពស់៕

The post ធនាគាររបស់ អ្នកឧកញ៉ា ឧកញ៉ា ៣រូប បានភ្ជាប់ប្រព័ន្ធទូទាត់វិក្កយបត្ររបស់ក្រសួងមហាផ្ទៃ appeared first on .

ឧកញ៉ា ហួត អៀងតុង ម្ចាស់ធនាគារ ហត្ថា បានចូលក្រាបថ្វាយបង្គំគាល់ព្រះមហាក្សត្រ

ឧកញ៉ាដែនដី — Mon, 29 Jan 2024 04:55:08 +0000

លោកឧកញ៉ា ហួត អៀងតុង ប្រធានអគ្គនាយក ធនាគារ ហត្ថា និងភរិយា បានចូលក្រាបថ្វាយបង្គំគាល់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្ដម មុនីនាថ សីហនុ ព្រះវររាជមាតាជាតិខ្មែរ នៅព្រះរាជដំណាក់សិរីមង្គលនៃព្រះបរមរាជវាំង កាលពីព្រឹកថ្ងៃសៅរ៍ ទី២៧ ខែមករា ឆ្នាំ២០២៤។

ក្នុងឱកាសដ៏ឧត្តុង្គឧត្តមនេះ លោកឧកញ៉ា ហួត អៀងតុង ព្រមទាំងលោកស្រី បានសំដែងនូវសេចក្តីសោមនស្សរីករាយជាអនេកកប្បការ និងសូមក្រាបថ្វាយថ្លែងអំណរព្រះគុណយ៉ាងជ្រាលជ្រៅ ក្នុងឱកាសដែលព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្ដម មុនីនាថ សីហនុ ព្រះវររាជមាតាជាតិខ្មែរ បានសព្វព្រះរាជហឬទ័យ ព្រះបរមរាជានុញ្ញាតឱ្យចូលក្រាបថ្វាយបង្គំគាល់ដោយផ្ទាល់។

ការចូលក្រាបថ្វាយបង្គំគាល់ព្រះមហាក្សត្រ និងសម្តេចព្រះមហាក្សត្រី ខាងលើនេះ បានប្រព្រឹត្តឡើង ក្នុងឱកាសដែលឧកញ៉ា តែ តាំងប៉ ប្រធានក្រុមប្រឹក្សាភិបាលនៃសមាគមមូលនិធិសម្ដេចតេជោដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា និងលោកជំទាវ ទឹម គឹមហ៊ាង បានដឹកនាំសមាជិកក្រុមប្រឹក្សាភិបាល ចំនួន ១០៨រូប ចូលក្រាបថ្វាយបង្គំគាល់ព្រះមហាក្សត្រ និងសម្តេចព្រះមហាក្សត្រី នៅព្រះរាជដំណាក់សិរីមង្គលនៃព្រះបរមរាជវាំង។

សូមជម្រាបថា ឧកញ៉ា ហួត អៀងតុង ស្ថាបនិក និងជាប្រធានអគ្គនាយក ធនាគារ ហត្ថា ធ្លាប់មានប្រវត្តិក្រខ្សត់កាលនៅកុមារភាព និងធ្លាប់ជាក្មេងដើរទូលនំបុ័ងលក់ ប៉ុន្តែបានខិតខំសិក្សារៀនសូត្រ ដើម្បីឈានចាប់បានឱកាសការងារមួយចំនួន រហូតក្លាយខ្លួនជាម្ចាស់ធនាគារពាណិជ្ជដ៏ឈានមុខមួយ នៅក្នុងប្រទេសកម្ពុជា នាពេលបច្ចុប្បន្ន។ ឧកញ៉ា ហួត អៀងតុង បានបង្កើត គ្រឹះស្ថានមីក្រូហិរញ្ញវត្ថុ ហត្ថាកសិករ លីមីតធីត នៅឆ្នាំ២០០១។ ដល់ឆ្នាំ២០១៦ លោកឧកញ៉ាក៏បានចុះកិច្ចព្រមព្រៀងជាមួយនឹងម្ចាស់ភាគហ៊ុនក្រៅប្រទេសធំមួយទៀតគឺ ធនាគារ ក្រុងស្រ៊ី របស់ប្រទេសថៃ ដែលមានម្ចាស់ជាជនជាតិជប៉ុន។ ក្រោយកិច្ចសហការចូលហ៊ុននេះ លោកឧកញ៉ាបានបំលែងខ្លួនមកជា ធនាគារពាណិជ្ជកម្ម (ធនាគារ ហត្ថា) នៅឆ្នាំ២០២០៕

The post ឧកញ៉ា ហួត អៀងតុង ម្ចាស់ធនាគារ ហត្ថា បានចូលក្រាបថ្វាយបង្គំគាល់ព្រះមហាក្សត្រ appeared first on .

ពីក្មេងដើរទូលនំបុ័ងលក់ ឧកញ៉ា ហួត អៀងតុង តស៊ូរហូតក្លាយជាម្ចាស់ធនាគារ ហត្ថា

ឧកញ៉ាដែនដី — Tue, 12 Sep 2023 05:33:28 +0000

លោកឧកញ៉ា ហួត អៀងតុង ស្ថាបនិក និងជាប្រធានអគ្គនាយកធនាគារ ហត្ថា ធ្លាប់មានប្រវត្តិក្រខ្សត់កាលនៅកុមារភាព និងធ្លាប់ជាក្មេងដើរទូលនំបុ័ងលក់ ប៉ុន្តែបានខិតខំសិក្សារៀនសូត្រ ដើម្បីឈានចាប់បានឱកាសការងារមួយចំនួន រហូតក្លាយខ្លួនជាម្ចាស់ធនាគារពាណិជ្ជដ៏ឈានមុខមួយ នៅក្នុងប្រទេសកម្ពុជា នាពេលបច្ចុប្បន្ន។

ឧកញ៉ា ហួត អៀងតុង បានថ្លែងឱ្យដឹង តាមរយៈបទសម្ភាសន៍មួយ កាលពីពេលថ្មីៗកន្លងទៅថា លោកមានស្រុកកំណើតនៅស្រុកភ្នំក្រវាញ ខេត្តពោធិ៍សាត់ ដែលជាស្រុកព្រៃភ្នំក្រំថ្មមួយ មានចម្ងាយប្រមាណជាង ៣០គីឡូម៉ែត្រ ពីទីរួមខេត្តពោធិ៍សាត់។ នៅពេលដឹងក្តីចូលរៀន អាយុប្រហែល៧ឆ្នាំ លោកបានទៅរស់នៅនិងសិក្សានៅទីរួមខេត្តពោធិ៍សាត់ ហើយនៅពេលនោះ លោករស់នៅជាមួយម្តាយមីង ដែលមានមុខរបរដុតនំបុ័ងលក់ ហើយលោកត្រូវជួយធ្វើនំបុ័ងម្តាយមីងនៅពេលយប់ និងដើរទូលនំបុ័ងលក់នៅពេលទាបភ្លឺ និងដើរទូលលក់តាមស្ថានីយ៍រថភ្លើង។

សម្រាប់ការសិក្សាថ្នាក់បាក់ឌុប គឺលោកបានរាជរដ្ឋាភិបាលជួយផ្តល់អាហារូបករណ៍ឱ្យ នៅឆ្នាំ១៩៨៣។ បន្ទាប់មក លោកបានមកបន្តការសិក្សាថ្នាក់បរិញ្ញាបត្រ ផ្នែកកសិកម្ម នៅសាកលវិទ្យាល័យភូមិន្ទកសិកម្ម ហើយនៅតែបានការជួយអាហារូបករណ៍ពីរាជរដ្ឋាភិបាលដដែល និងបានបញ្ចប់បរិញ្ញាបត្រ នៅឆ្នាំ១៩៩១។ ពេលចប់ពីសាកលវិទ្យាល័យកសិកម្មហើយ ក៏រាជរដ្ឋាភិបាលផ្តល់ឱកាសឱ្យធ្វើជាមន្ត្រីរាជការ នៅមន្ទីរកសិកម្ម ខេត្តពោធិ៍សាត់ ហើយពេលនោះមានអង្គការមួយមកពីប្រទេសកាណាដា មកចាប់ផ្តើមរៀបចំការអភិវឌ្ឍនៅខេត្តពោធិ៍សាត់ និងបានជ្រើសរើសរូបលោក ជាមន្ត្រីជំនួយការ។ ពេលនោះ លោកធ្វើការជាមន្ត្រីកសិកម្មផង និងធ្វើជាជំនួយការឱ្យអង្គការកាណាដាផង។

លោកឧកញ៉ា បានបន្តថា រហូតដល់ឆ្នាំ១៩៩៥ លោកយល់ឃើញថា កម្មវិធីឥណទាន គឺជាកម្មវិធីមួយល្អខ្លាំងមែនទែន ដែលលោកស្រឡាញ់ ហើយជាកម្មវិធីមួយដែលប្រជាពលរដ្ឋខ្មែរ ត្រូវការយូរអង្វែងទៅមុខ ដូច្នេះលោកក៏ជម្រាបទៅនាយកគម្រោងរបស់អង្គការថា លោកសុំឈប់ធ្វើជាជំនួយការទៀតហើយ ហើយសុំទទួលខុសត្រូវធ្វើតែគម្រោងឥណទានមួយទេ។ ដូច្នេះខាងអង្គការក៏ទទួលយកសំណើរបស់លោក និងឱ្យលោកកាន់ការងារតែខាងឥណទានតែមួយមុខ។ នៅឆ្នាំ១៩៩៦ លោកក៏សុំផ្តាច់ចេញពីគម្រោងអង្គការទាំងស្រុង និងបានបង្កើតអង្គការខ្លួនឯងមួយ ដោយដាក់ឈ្មោះថា អង្គការហត្ថាកសិករ ដែលយើងធ្វើការផ្តល់សេវាឥណទានជូនប្រជាពលរដ្ឋរបស់យើង និងបានចុះបញ្ជីជាអង្គការក្នុងស្រុកនៅក្រសួងមហាផ្ទៃ។

ក្រោយមក អង្គការមួយនេះ បានពង្រីកខ្លួនបន្តិចម្តងៗ នៅខេត្តជុំវិញបឹងទន្លេសាប ដូចជាខេត្តកំពង់ធំ សៀមរាប ខេត្តបន្ទាយមានជ័យ ជាដើម។ រហូតដល់ឆ្នាំ២០០០ ធនាគារជាតិកម្ពុជា ក៏បានចេញច្បាប់មួយថា គ្រប់អង្គការឥណទាន ចាំបាច់ត្រូវតែបំលែងខ្លួនទៅជាក្រុមហ៊ុនឯកជន លោកក៏ចាប់ផ្តើមរៀបចំប្រែក្លាយខ្លួនមកជាក្រុមហ៊ុនឯកជន ដោយពេលនោះមានការលំបាកយ៉ាងច្រើន ព្រោះត្រូវការរកអ្នកចូលហ៊ុន ធ្វើយ៉ាងណា ឱ្យមានអ្នកចូលរួមភាគហ៊ុនបន្ថែម។ រហូតដល់ឆ្នាំ២០០១ ទើបលោកបានបង្កើតបានជា គ្រឹះស្ថានមីក្រូហិរញ្ញវត្ថុ ជាផ្លូវការ ដោយបានចូលហ៊ុនជាមួយអង្គការរបស់បារាំងមួយ និងបានពង្រីកខ្លួនជាបន្តបន្ទាប់។

នៅឆ្នាំ២០១០ គ្រឹះស្ថានមីក្រូហិរញ្ញវត្ថុ ហត្ថាកសិករ លីមីតធីត បានបំលែងខ្លួនម្តងទៀត ទៅជាគ្រឹះស្ថានហិរញ្ញវត្ថុ ទទួលប្រាក់បញ្ញើសន្សំ និងបានពង្រីកខ្លួនកាន់តែធំ។ ដល់ឆ្នាំ២០១៦ លោកក៏បានចុះកិច្ចព្រមព្រៀងគ្រឹះស្ថានមីក្រូហិរញ្ញវត្ថុ ហត្ថាកសិករ លីមីតធីត ជាមួយនឹងម្ចាស់ភាគហ៊ុនក្រៅប្រទេសធំមួយទៀតគឺ ធនាគារ ក្រុងស្រ៊ី របស់ប្រទេសថៃ ដែលមានម្ចាស់ជាជនជាតិជប៉ុន ជាម្ចាស់ក្រុមហ៊ុនហិរញ្ញវត្ថុ គ្រុប ដ៏ធំមួយនៅជប៉ុន។ ក្រោយកិច្ចសហការចូលហ៊ុននេះ លោកឧកញ៉ាបានបំលែងខ្លួនមកជា ធនាគារពាណិជ្ជកម្ម (ធនាគារ ហត្ថា) នៅឆ្នាំ២០២០។

លោកឧកញ៉ា ហួត អៀងតុង មានបទពិសោធន៍ច្រើនជាង ៣០ឆ្នាំ លើវិស័យហិរញ្ញវត្ថុ ដែលជាកត្តាធ្វើឱ្យលោកក្លាយជាប្រតិបត្តិករយ៉ាងប៉ិនប្រសប់ទាំងក្នុងការគ្រប់គ្រងហិរញ្ញវត្ថុ និងមិនមែនហិរញ្ញវត្ថុនៅក្នុងស្ថាប័ន។ បន្ទាប់ពីបញ្ចប់ការសិក្សាថ្នាក់បរិញ្ញាបត្រលើជំនាញកសិកម្មនៅឆ្នាំ ១៩៩១ លោកក៏បានបញ្ចប់ការសិក្សាថ្នាក់អនុបណ្ឌិតផ្នែករដ្ឋបាល និងគ្រប់គ្រងអាជីវកម្ម។ ជាពិសេស លោកឧកញ៉ា ក៏ធ្លាប់ចូលរួមសិក្ខាសាលាជាច្រើន នៅក្រៅប្រទេសពាក់ព័ន្ធនឹងវិស័យមីក្រូហិរញ្ញវត្ថុ ដូចជានៅប្រទេសហ្វីលីពីន សហរដ្ឋអាមេរិក ឥណ្ឌូនេស៊ី បារាំង អាល្លឺម៉ង់ និងប្រទេសជាច្រើនទៀត៕

The post ពីក្មេងដើរទូលនំបុ័ងលក់ ឧកញ៉ា ហួត អៀងតុង តស៊ូរហូតក្លាយជាម្ចាស់ធនាគារ ហត្ថា appeared first on .

តើស្ថាបនិក និងជាថ្នាក់ដឹកនាំដ៏ឆ្នើមរបស់ធនាគារ ហត្ថា ឧកញ៉ា ហួត អៀងតុង ជានរណា ?

ឧកញ៉ាកោះក្របី — Wed, 23 Jun 2021 00:58:42 +0000

ជាមួយនឹងបទពិសោធន៍ដ៏ចាស់ទុំក្នុងការបម្រើសេវាហិរញ្ញវត្ថុ អស់រយៈពេលជាង ២៧ឆ្នាំ កន្លងមកនេះ ធនាគារ ហត្ថា (Hattha Bank Plc) បានរួមចំណែកជាច្រើនក្នុងការធ្វើឲ្យប្រសើរឡើងនូវជីវភាពរស់នៅរបស់ប្រជាជនកម្ពុជា ដោយចាប់ផ្តើមពីជ្រុងតូចមួយក្នុងតំបន់ រហូតដល់ពង្រីកប្រតិបត្តិការនៅទូទាំងប្រទេស ជាមួយនឹងចក្ខុវិស័យច្បាស់លាស់ និងការប្តេជ្ញាចិត្តខ្ពស់បំផុត។

ភាពរីកចម្រើនយ៉ាងឆាប់រហ័សរបស់ Hattha Bank ដែលទទួលបាននូវជោគជ័យ បន្ថែមពីលើការរីកចម្រើនឥតឈប់ឈរពីអាជីវកម្មរបស់ខ្លួន គឺផ្តើមពីយុទ្ធសាស្រ្តដឹកនាំដ៏ខ្លាំងខ្លារបស់ CEO ធនាគារនេះ ពិតជាមិនអាចឲ្យគេមើលរំលងបានឡើយ។

សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា អាជីវកម្ម ចែករំលែក ជោគជ័យ

តើប្រធានអគ្គនាយក (President & CEO) របស់ធនាគារ ហត្ថា ម.ក ជានរណា? សូមតាមដានជាមួយ ឧកញ៉ាញូស៍ដូចតទៅ៖

លោកឧកញ៉ា ហួត អៀងតុង គឺជាសហស្ថាបនិករបស់ ហត្ថាកសិករ ក្នុងឆ្នាំ ១៩៩៤ ហើយបានដឹកនាំស្ថាប័ននេះចាប់តាំងពីពេលនោះមកជាង ២៧ឆ្នាំ ជាមួយនឹងបទពិសោធន៍ច្រើនជាង ៣០ឆ្នាំ លើវិស័យហិរញ្ញវត្ថុ ដែលបានធ្វើឱ្យលោកឧកញ៉ាក្លាយជាប្រតិបត្តិករយ៉ាងប៉ិនប្រសប់ទាំងក្នុងការគ្រប់គ្រងហិរញ្ញវត្ថុ និងមិនមែនហិរញ្ញវត្ថុនៅក្នុងស្ថាប័ន។

លោកឧកញ៉ា ហួត អៀងតុង កើតក្នុងឆ្នាំ ១៩៦៨ ស្ថិតនៅភូមិលាច ឃុំលាច ស្រុកភ្នំក្រវាញ ខេត្តពោធិ៍សាត់ មានឪពុកជាគ្រូបង្រៀន និងម្តាយជាកសិករ។ ក្នុងចំណោមបងប្អូនចំនួន ៥នាក់ លោកគឺជាកូនទី២ ដែលមានបងស្រីតែម្នាក់គត់ អាចជួយធ្វើការទំនុកបម្រុងក្នុងគ្រួសារជាមួយម្តាយ។

-ប្រវត្តិការសិក្សា

លោកបានប្រឡងជាប់បាក់ឌុបក្នុងឆ្នាំ ១៩៨៣។ ដោយចិញ្ចឹមចិត្តចង់រៀនបានខ្ពស់លោកក៏បានដាក់ពាក្យប្រឡងយកអាហារូបករណ៍នៅវិទ្យាស្ថានអប់រំកសិកម្ម (សាកលវិទ្យាល័យភូមិន្ទកសិកម្ម) ហើយពេលនោះលោកក៏បានប្រឡងជាប់ ដោយការស្នាក់នៅហូបចុកជាបន្ទុករបស់វិទ្យាស្ថាន។

បន្ទាប់ពីបញ្ចប់ការសិក្សាកម្រិតបរិញ្ញាបត្រលើជំនាញកសិកម្មនៅ ឆ្នាំ១៩៩១ លោកបានបញ្ចប់បរិញ្ញាបត្រជាន់ខ្ពស់ផ្នែករដ្ឋបាលអាជីវកម្មពីសាកលវិទ្យាល័យបៀលប្រាយ។ ជាងនេះទៅទៀត លោកធ្លាប់បានចូលរួមនៅក្នុងសិក្ខាសាលាជាច្រើនពាក់ព័ន្ធនឹងវិស័យហិរញ្ញវត្ថុនៅក្រៅប្រទេស រួមមាន៖ សហរដ្ឋអាមេរិក ហ្វីលីពីន ឥណ្ឌូនេស៊ី បារាំង អាឡឺម៉ង់ និងប្រទេសជាច្រើនទៀត ។

-បទពិសោធន៍ការងារ

នៅពេលបញ្ចប់ការសិក្សាអង្គការ Cambodia Canada Development Bank ត្រូវការអ្នកស្រាវជ្រាវផ្នែកកសិកម្មនៅខេត្តពោធិ៍សាត់ លោកក៏បានដាក់ពាក្យជាប់នៅទីនោះ ក្រោយពីចាប់ប៉ុស្តិ៍ធ្វើការនៅមន្ទីរកសិកម្មទីនោះរួចមក។ បន្ទាប់ពីទទួលបានជោគជ័យ អង្គការក៏បានផ្តល់សេចក្តីទុកចិត្តឱ្យលោកគ្រប់គ្រងគម្រោងថ្មីខាងផ្នែកឥណទាន គឺអង្គការហត្ថាកសិករនេះតែម្តង។

ឆ្នាំ ២០០១ អង្គការ ហត្ថាកសិករ បានចុះបញ្ជីនៅក្រសួងពាណិជ្ជកម្មដោយមានដើមទុនសរុបចំនួន ៧៧.៨៥០ ដុល្លារអាមេរិក ដោយផ្លាស់ប្តូរពីអង្គការក្រៅរដ្ឋាភិបាលទៅជាក្រុមហ៊ុនឯកជនទទួលខុសត្រូវមានកម្រិត ដែលមានឈ្មោះថ្មីថា “ហត្ថាកសិករ លីមីតធីត” ដែលធ្វើការដំបូងនៅក្នុងស្រុកក្រគរ និងស្រុកសំពៅមាស ដោយផ្តល់តែកម្ចីលើផ្នែកកសិកម្មប៉ុណ្ណោះ។

ក្នុងឆ្នាំ ២០១៦ ហត្ថាកសិករ លីមីតធីត ក្លាយជាក្រុមហ៊ុនបុត្រសម្ព័ន្ធរបស់ធនាគារក្រុងស្រ៊ី ដែលជាធនាគារធំជាងគេលំដាប់ទី៥ នៅប្រទេសថៃ និងជាសមាជិកនៃសម្ព័ន្ធហិរញ្ញវត្ថុអន្តរជាតិ Mitsubishi UFJ Financial Group (MUFG) ដែលជា សម្ព័ន្ធក្រុមហ៊ុនផ្តល់សេវាកម្មហិរញ្ញវត្ថុធំបំផុតរបស់ប្រទេសជប៉ុន និងជាក្រុមសម្ព័ន្ធពហុហិរញ្ញវត្ថុ ធំបំផុតមួយក្នុងពិភពលោក។

នៅឆ្នាំ ២០២០ ហត្ថាកសិករ លីមីតធីត បានកម្លាយខ្លួនទៅជា ធនាគារ ហត្ថា ម.ក ដែលបានអនុម័តជាផ្លូវការដោយធនាគារជាតិ នៃ កម្ពុជា និងក្រសួងពាណិជ្ជកម្មនៅថ្ងៃទី ២៦ ខែ សីហា ឆ្នាំ ២០២០។

លោកឧកញ៉ា ហួត អៀងតុង សហស្ថាបនិក និងជាថ្នាក់ដឹកនាំដ៏ឆ្នើមម្នាក់ ដែលនៅពីក្រោយភាពជោគជ័យអស្ចារ្យរបស់ធនាគារ ហត្ថា ម.ក គឺជាធនាគារមួយក្នុងចំណោមធនាគារឈានមុខផ្សេងទៀតនៅកម្ពុជា៕

The post តើស្ថាបនិក និងជាថ្នាក់ដឹកនាំដ៏ឆ្នើមរបស់ធនាគារ ហត្ថា ឧកញ៉ា ហួត អៀងតុង ជានរណា ? appeared first on .