ក្រៅពីប្រធានក្រុមហ៊ុនធំមួយ ឧកញ៉ា ឡាវ កាង កំពុងកាន់តួនាទីជាច្រើនទៀត

ឧកញ៉ាដែនដី — Thu, 11 May 2023 05:28:09 +0000

លោកឧកញ៉ា ឡាវ កាង ជាអ្នកជំនួញចាស់វស្សាដ៏មានឥទ្ធិពលមួយរូបនៅខេត្តព្រះសីហនុ។ បច្ចុប្បន្នលោកជាប្រធានក្រុមហ៊ុនឡាវកាង អីមផត អិចផត និងអចលនទ្រព្យ (Lav Kang Import & Export Co., LTD and Real Estate) ដែលមានអាសយដ្ឋាននៅភូមិ២ សង្កាត់៤ ក្រុងព្រះសីហនុ ខេត្តព្រះសីហនុ។

ក្រៅពីម្ចាស់ក្រុមហ៊ុនផ្ទាល់ខ្លួនដ៏ធំខាងលើនេះ ឧកញ៉ា ឡាវ កាង ក៏ជាប្រធានក្រុមហ៊ុនសូគីម៉ិច សាខាខេត្តព្រះសីហនុ។ សម្រាប់តួនាទីក្នុងវិស័យរដ្ឋ និងសមាគមផ្សេងៗ លោកឧកញ៉ា គឺជាទីប្រឹក្សាសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាអនុប្រធានក្រុមការងារចុះមូលដ្ឋានខេត្តព្រះសីហនុ, អនុប្រធានកិតិ្តយសសាខាកាកបាទក្រហមកម្ពុជា ខេត្តព្រះសីហនុ ព្រមទាំងជាសមាជិកក្រុមប្រឹក្សាភិបាលសមាគមឧកញ៉ាកម្ពុជា។

លោកឧកញ៉ា ក៏ធ្លាប់ជាប់ឆ្នោតជាប្រធានសភាពាណិជ្ជកម្មខេត្តព្រះសីហនុ នៅចន្លោះឆ្នាំ២០១៥ ដល់ឆ្នាំ២០១៩ មុនពេល ឧកញ៉ា វណ្ណ សុខហេង ជាប់ឆ្នោតជាប្រធានបន្តនៅចន្លោះឆ្នាំ២០១៩ ដល់ឆ្នាំ២០២៣ និងឧកញ៉ា តាន់ តាត់ ជាប់ឆ្នោតជាប្រធានសភាពាណិជ្ជកម្មខេត្តព្រះសីហនុ ជាបន្តទៀត ចាប់ពីថ្ងៃទី២៥ ខែមីនា ឆ្នាំ២០២៣ មកដល់បច្ចុប្បន្ន។

សូមជម្រាបជូនថា ឧកញ៉ា ឡាវ កាង ជាឧកញ៉ាដ៏មានចិត្តសប្បុរសធម៌មួយរូប ដែលតែងតែបរិច្ចាគថវិកាផ្ទាល់ខ្លួនជាប្រចាំ ជួយដល់សង្គម និងចូលរួមជួយដល់រាជរដ្ឋាភិបាលកម្ពុជា ក្នុងការស្តារសេដ្ឋកិច្ចជាតិ និងលើកកម្ពស់ជីវភាពរស់នៅរបស់ប្រជាជន ដូចជាការចូលរួមបរិច្ចាគថវិកាដល់កាកបាទក្រហមកម្ពុជា បរិច្ចាគជូនរដ្ឋបាលខេត្តព្រះសីហនុ កងកម្លាំងជើងទឹក ប្រជាពលរដ្ឋរងគ្រោះ និងសកម្មភាពមនុស្សធម៌ផ្សេងៗទៀត៕

The post ក្រៅពីប្រធានក្រុមហ៊ុនធំមួយ ឧកញ៉ា ឡាវ កាង កំពុងកាន់តួនាទីជាច្រើនទៀត appeared first on .