យោងតាមសេចក្ដីសម្រេចចំនួនពីរទំព័រ ចុះហត្ថលេខាដោយសម្ដេចធិបតី ហ៊ុន ម៉ាណែត នាយករដ្ឋមន្រ្ដី កាលពីថ្ងៃទី១៥ ខែកុម្ភៈ ឆ្នាំ២០២៤ បានតែងតាំងសមាសភាពនៃគណៈកម្មាធិការអាហាររូបករណ៍សិស្ស-និស្សិតក្រីក្រ សម្ដេចតេជោ ហ៊ុន សែន និងសម្ដេចកិត្ដិព្រឹទ្ធិបណ្ឌិត ចំនួន១៣រូប ក្នុងនោះមានលោកជំទាវបណ្ឌិត ពេជ ចន្ទមុន្នី ជាប្រធាន, លោក សុខ ពុទ្ធិវុធ និងលោក ស៊ាន បូរ៉ាត ជាអនុប្រធាន ព្រមទាំងមានសមាជិកចំនួន១០រូបទៀត ដោយក្នុងនោះមានឧកញ៉ា ឡាវ វ៉ាន់ រដ្ឋលេខាធិការក្រសួងសាធារណការ និងដឹកជញ្ជូន និងឧកញ៉ា លឹម សុជាតិ អនុប្រធានសភាពាណិជ្ជកម្មកម្ពុជា, ស្ថាបនិក និងជាប្រធាននាយកប្រតិបត្តិ នៃក្រុមហ៊ុន លក្ស្មី ប្រាយម៍ អ៊ិនវេសមេន ផងដែរ។

សូមជម្រាបជូនថា សម្តេចតេជោ ហ៊ុន សែន បានបង្កើតគណៈកម្មាធិការ អាហារូបករណ៍សិស្ស-និស្សិតក្រីក្រ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិតកាលពីឆ្នាំ២០០៧  ដើម្បីជាការចូលរួមជាមួយរាជរដ្ឋាភិបាល ក្នុងការកសាង និងពង្រីកធនធានមនុស្សកម្ពុជា។ បន្ថែមទៀតនោះ គឺមានគោលបំណងបណ្តុះបណ្តាល និងអភិវឌ្ឍន៍ធនធានមនុស្សនៅក្នុងប្រទេសកម្ពុជា កាត់បន្ថយបន្ទុកគ្រួសារក្នុងការបង់ថ្លៃសិក្សា ជាពិសេសផ្តល់ឱកាសដល់សិស្ស និស្សិតក្រីក្រ មានលទ្ធភាពបន្តការសិក្សានៅថ្នាក់ឧត្តមសិក្សា៕

The post ឧកញ៉ា២រូប ទទួលបានការតែងតាំងថ្មី ជាសមាជិកគណៈកម្មាធិការអាហាររូបករណ៍សិស្ស-និស្សិតក្រីក្រ សម្ដេចតេជោ ហ៊ុន សែន និងសម្ដេចកិត្ដិព្រឹទ្ធិបណ្ឌិត appeared first on .