ថ្លែងក្នុងពិធីបើកកិច្ចប្រជុំនាឱកាសនោះ ក្នុងនាម សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានសមាគមអតីតយុទ្ធជន និងនិវត្តជនកម្ពុជា, ក្នុងនាមប្រធាន VECONAC និងក្នុងនាមខ្លួនផ្ទាល់ ឯកឧត្តម ទេសរដ្ឋមន្ត្រី គន់ គីម បានសម្តែងនូវការស្វាគមន៍យ៉ាងកក់ក្តៅបំផុតជូនចំពោះ ឯកឧត្តម លោកជំទាវ និងគណៈប្រតិភូកិត្តិយសមកពីបណ្តាប្រទេសជាសមាជិកអាស៊ានទាំងអស់ ដែលបានអញ្ជើញមកចូលរួមក្នុងព្រឹត្តិការណ៍ដ៏មានអត្ថន័យនេះ។

ឯកឧត្តម ទេសរដ្ឋមន្ត្រី បានគូសបញ្ជាក់ថា កិច្ចប្រជុំក្រុមប្រឹក្សាប្រតិបត្តិលើកទី៣៨ នេះ គឺជាឱកាសដ៏មានសារៈសំខាន់ក្នុងការជួបជុំ ពិនិត្យ ពិភាក្សា និងអនុម័តរួមគ្នានូវរបៀបវារៈ សេចក្តីព្រាងសេចក្តីសម្រេច ព្រមទាំងអនុសាសន៍នានា ដើម្បីត្រៀមរៀបចំពិធីបើកមហាសន្និបាត VECONAC លើកទី២៥ នាថ្ងៃស្អែក ដែលនឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងជាអនុប្រធានទី១ សមាគមអតីតយុទ្ធជន និងនិវត្តជនកម្ពុជា។

ជាមួយគ្នានេះដែរ ឯកឧត្តម ក៏បានសម្តែងនូវការអរគុណ និងកោតសរសើរយ៉ាងជ្រាលជ្រៅចំពោះ ឯកឧត្តម នាយឧត្តមសេនីយ៍ មាស សាវ៉ន អគ្គលេខាធិការ VECONAC ព្រមទាំងថ្នាក់ដឹកនាំ និងលេខាធិការដ្ឋាន VECONAC ទាំងអស់ ចំពោះការខិតខំប្រឹងប្រែងដឹកនាំកិច្ចប្រជុំគណៈកម្មការការងារលើកទី៧ កន្លងមក ឱ្យទទួលបានជោគជ័យ និងបានបន្តរៀបចំកិច្ចប្រជុំក្រុមប្រឹក្សាប្រតិបត្តិលើកទី៣៨ នេះប្រកបដោយភាពរលូន និងមានរបៀបរៀបរយខ្ពស់។

ឯកឧត្តមប្រធានប្តូរវេន VECONAC បានសម្តែងនូវជំនឿជាក់យ៉ាងមុតមាំថា កិច្ចខិតខំប្រឹងប្រែង និងការប្តេជ្ញាចិត្តរួមគ្នាក្នុងការពង្រឹងចំណងមិត្តភាព សាមគ្គីភាព និងកិច្ចសហប្រតិបត្តិការឱ្យកាន់តែជិតស្និទ្ធ និងស៊ីជម្រៅ តាមរយៈស្មារតីសន្ទនាស្ថាបនា នឹងនាំមកនូវលទ្ធផលជាប្រវត្តិសាស្ត្រ ដែលជួយលើកកម្ពស់កិត្យានុភាពរបស់ VECONAC ព្រមទាំងរុញច្រានកិច្ចសហប្រតិបត្តិការរវាងសមាគមអតីតយុទ្ធជនក្នុងតំបន់ឱ្យឈានដល់កម្រិតថ្មីមួយទៀត។

ជាកិច្ចបញ្ចប់ ឯកឧត្តម ទេសរដ្ឋមន្ត្រី គន់ គីម បានជូនពរដល់គណៈប្រតិភូទាំងអស់ឱ្យទទួលបានសុខភាពល្អបរិបូរណ៍ និងទទួលបានជោគជ័យក្នុងបេសកកម្ម ព្រមទាំងបានប្រកាសបើកកិច្ចប្រជុំក្រុមប្រឹក្សាប្រតិបត្តិលើកទី៣៨ នៃសហព័ន្ធអតីតយុទ្ធជនបណ្តាប្រទេសអាស៊ានជាផ្លូវការ ក្រោមបាវចនា «VECONAC FOREVER, FOREVER VECONAC»៕

The post ឯកឧត្តម គន់ គីម អញ្ជើញបើកកិច្ចប្រជុំក្រុមប្រឹក្សាប្រតិបត្តិលើកទី៣៨ នៃសហព័ន្ធអតីតយុទ្ធជនបណ្តាប្រទេសអាស៊ាន (VECONAC) appeared first on .

ឯកឧត្តមកិត្តិសង្គហបណ្ឌិត បាន​ឱ្យដឹងថា កិច្ចប្រជុំនេះ រៀបចំឡើងក្នុងគោលបំណងពង្រឹងពង្រីកកិច្ចសហប្រតិបត្តិការធុរកិច្ចរវាងសមាគមអតីតយុទ្ធជន និងនិវត្តជនកម្ពុជាជាមួយសមាគមអតីតយុទ្ធជនប្រទេសវៀតណាម និងឡាវ សំដៅលើកស្ទួយ និងជួយគ្នាទៅវិញទៅមក ដើម្បីជាប្រយោជន៍រួមសម្រាប់អតីតយុទ្ធជន និងនិវត្តជននៅតាមបណ្តាខេត្តព្រំដែន។

ឯកឧត្តមកិត្តិសង្គហបណ្ឌិត ក៏បានណែនាំដល់ថ្នាក់ដឹកនាំតាមបណ្តាខេត្តជាប់ព្រំដែន ត្រូវធ្វើការសម្របសម្រួលគ្រប់ផែនការសកម្មភាព ដែលសមាគមនៃប្រទេសទាំងបីរក្សានូវចំណងមិត្តភាព សាមគ្គីភាព និងឈរលើឧត្តមប្រយោជន៍ស្របតាមស្មារតី និងការគិតគូរដល់បេសកកម្មជ្រោមជ្រែង និងលើកកម្ពស់ជីវភាពអតីតយុទ្ធជន និងនិវត្តជន៕

The post ឯកឧត្តម គន់ គីម ដឹកនាំកិច្ចប្រជុំពិភាក្សាការងារធុរកិច្ចអតីតយុទ្ធជនអាស៊ានជាមួយថ្នាក់ដឹកនាំតាមបណ្តាខេត្តព្រំដែនទាំង១១ appeared first on .

ក្នុងកិច្ចប្រជុំនេះ ក្រុមការងារនៃគណៈកម្មការជំនាញទាំង៦ របស់លេខាធិការដ្ឋាន VECONAC បានរាយការណ៍អំពីផែនការសកម្មភាព ការប្រុងប្រៀប និងលទ្ធផលដែលសម្រេចបានកន្លងមក សំដៅធានាឱ្យបាននូវការត្រៀមលក្ខណៈរួចរាល់ ១០០ ភាគរយ សម្រាប់ភាពជាម្ចាស់ផ្ទះដឹកនាំមហាសន្និបាត VECONAC លើកទី២៥ ដែលគ្រោងនឹងប្រព្រឹត្តទៅចាប់ពីថ្ងៃទី៣ ដល់ថ្ងៃទី៧ ខែតុលា ឆ្នាំ២០២៦ ខាងមុខនេះ នៅរាជធានីភ្នំពេញ។

ថ្លែងក្នុងឱកាសនោះ ឯកឧត្តមកិត្តិសង្គហបណ្ឌិត គន់ គីម បានវាយតម្លៃខ្ពស់ចំពោះស្មារតីទទួលខុសត្រូវ និងការខិតខំប្រឹងប្រែងរបស់ក្រុមការងារជំនាញនីមួយៗ ដែលបានបំពេញភារកិច្ចស្របតាមផែនការដែលបានគ្រោងទុក។

ឯកឧត្តមទេសរដ្ឋមន្ត្រី បានគូសបញ្ជាក់ថា ការទទួលធ្វើជាម្ចាស់ផ្ទះរៀបចំកិច្ចប្រជុំក្រុមប្រឹក្សាប្រតិបត្តិលើកទី៣៨ វេទិកាធុរកិច្ច និងមហាសន្និបាត VECONAC លើកទី២៥ នាពេលនេះ ពិតជាមានសារៈសំខាន់យ៉ាងខ្លាំង ខណៈដែលស្ថានភាពវិវត្តក្នុងតំបន់មានការប្រែប្រួល ដែលទាមទារឱ្យមានការផ្លាស់ប្តូរទស្សនៈ និងការចូលរួមយ៉ាងសកម្មពីបណ្តាសមាជិកទាំងអស់នៃសហព័ន្ធអតីតយុទ្ធជនក្នុងតំបន់អាស៊ាន។

ទន្ទឹមគ្នានេះ ឯកឧត្តមកិត្តិសង្គហបណ្ឌិត បានណែនាំដល់ក្រុមការងារជំនាញឱ្យយកចិត្តទុកដាក់រៀបចំឯកសារ និងធាតុចូលសំខាន់ៗឱ្យបានហ្មត់ចត់ និងច្បាស់លាស់ ដើម្បីដាក់បញ្ចូលទៅក្នុងរបៀបវារៈនៃកិច្ចប្រជុំក្រុមប្រឹក្សាប្រតិបត្តិលើកទី៣៨ ស្របតាមធម្មនុញ្ញរបស់ VECONAC។ បន្ថែមលើនេះ ឯកឧត្តមបានជំរុញឱ្យគ្រប់ផ្នែកទាំងអស់នៃលេខាធិការដ្ឋាន ត្រូវបន្តពន្លឿនរាល់ការងារសេសសល់ឱ្យបានរួចរាល់មុនព្រឹត្តិការណ៍ឈានមកដល់ ដើម្បីធានាឱ្យដំណើរការទាំងមូលប្រព្រឹត្តទៅដោយរលូន ទទួលបានជោគជ័យ និងលើកកម្ពស់កិត្យានុភាពជាតិលើឆាកអន្តរជាតិ។

សូមជម្រាបជូនថា សហព័ន្ធអតីតយុទ្ធជនបណ្តាប្រទេសអាស៊ាន (Veterans Confederation of ASEAN Countries – VECONAC) ត្រូវបានបង្កើតឡើងកាលពីថ្ងៃទី១៩ ខែធ្នូ ឆ្នាំ១៩៨០។ VECONAC មានបេសកកម្មប្រមូលផ្តុំ និងលើកកម្ពស់កិច្ចខិតខំប្រឹងប្រែងរបស់សមាគមអតីតយុទ្ធជននានាក្នុងតំបន់អាស៊ីអាគ្នេយ៍ ដើម្បីកិច្ចសហប្រតិបត្តិការបម្រើឧត្តមប្រយោជន៍ដល់អតីតយុទ្ធជន យុទ្ធជនពិការ និងក្រុមគ្រួសារ ព្រមទាំងរួមចំណែកយ៉ាងសំខាន់ដល់ការថែរក្សាសន្តិភាព ស្ថិរភាព ភាពសុខដុមរមនា និងការអភិវឌ្ឍប្រកបដោយចីរភាពក្នុងតំបន់ និងពិភពលោក៕

The post ឯកឧត្តម គន់ គីម ដឹកនាំកិច្ចប្រជុំពិនិត្យវឌ្ឍនភាពការងារត្រៀមធ្វើជាម្ចាស់ផ្ទះមហាសន្និបាត VECONAC លើកទី២៥ នាដើមខែតុលាខាងមុខ appeared first on .