នេះបើយោងតាមជំនួបពិភាក្សាការងាររវាងលោកស្រី Hunter Lam តំណាងក្រុមហ៊ុន LEE LI Holdings និងលោក Michael Chan អភិបាលរងក្រុង Markham ប្រទេសកាណាដា ជាមួយលោក ឡឹម តារា រដ្ឋលេខាធិការក្រសួងសុខាភិបាល កាលថ្ងៃទី ៣ ខែកក្កដា​ ឆ្នាំ២០២៤។

នាឱកាសនោះ លោកស្រី Hunter Lam តំណាងក្រុមហ៊ុនកាណាដា បានស្នើសុំការអនុញ្ញាតឱ្យក្រុមការងារបច្ចេកទេសរបស់ក្រុមហ៊ុនមកធ្វើការសិក្សាលម្អិតប្រព័ន្ធសុខាភិបាល សិក្សាលទ្ធភាព និងពិនិត្យរកឱកាសវិនិយោគលើវិស័យសុខាភិបាល នៅពេលខាងមុខ។

លោកស្រីក៏បានថ្លែងអំណរគុណដល់ក្រសួង ដែលបានផ្តល់ឱកាសឱ្យគណៈប្រតិភូរបស់លោកស្រីបានចូលជួបសម្តែងការគួរសម និងពិភាក្សាការងារនៅក្នុងឱកាសបំពេញទស្សនកិច្ចសិក្សា ស្វែងយល់ឱកាសវិនិយោគនៅកម្ពុជា លើវិស័យសក្តានុពលមួយចំនួន រួមមាន៖ ១. វិស័យឧស្ម័ន និងប្រេង២. វិស័យសុខាភិបាល.៣.មជ្ឈមណ្ឌលវាយតម្លៃទទួលស្គាល់សម្រាប់ការនាំចេញ ៤. វិស័យកែច្នៃចំណីអាហារ និងឡូជីស្ទីក និង ៥. វិស័យយានយន្ត។

ការឆ្លើយតប លោក ឡឹម តារា បានថ្លែងអំណរគុណ និងបញ្ជាក់ជំហររបស់ក្រសួងសុខាភិបាល គាំទ្រជំនួយពីដៃគូ និងសប្បុរសជន រួមទាំងការវិនិយោគពីផ្នែកឯកជន ដែលរួមចំណែកលើកកម្ពស់គុណភាពសេវាសុខាភិបាល ដើម្បីឈានទៅសម្រេចបាននូវការគ្របដណ្តប់សុខភាពជាសកល។លោក ក៏បានស្នើឱ្យក្រុមហ៊ុនពិនិត្យលទ្ធភាពបន្ថែមកិច្ចសហប្រតិបត្តិការជាមួយក្រសួងសុខាភិបាលផងដែរ។

គួរបញ្ជាក់ដែរថា បើតាមលោកស្រីតំណាងក្រុមខាងលើ បានជម្រាបជូនអង្គប្រជុំថា កន្លងមកក្រុមហ៊ុនរបស់កាណាដាមួយនេះ មានបទពិសោធន៍វិនិយោគលើមន្ទីរពេទ្យឯកជន និងសហការវិនិយោគជាមួយមន្ទីរពេទ្យសាធារណៈរបស់រដ្ឋ លើផ្នែករូបភាពវេជ្ជសាស្ត្រដូចជា CT Scan, MRI, Ultrasound, Mammography, Laboratory equipment។ល។ នៅប្រទេសមួយចំនួនរួចមកហើយ៕ អត្ថបទ៖ រង្សី

The post ក្រុមហ៊ុនរបស់កាណាដា កំពុងពិនិត្យរកឱកាសវិនិយោគលើវិស័យធំៗចំនួន៥ នៅកម្ពុជា appeared first on .

ការបង្ហាញបំណងរបស់គណៈប្រតិភូ នៅក្នុងជំនួបសម្តែងការគួរសម រវាងលោក នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជា ជាមួយគណៈប្រតិភូធុរកិច្ចនៃការិយាល័យតំណាងសភាពាណិជ្ជកម្មកម្ពុជាប្រចាំទីក្រុង Montreal ដឹកនាំដោយ លោក Kelvin Mo ប្រធានសភាពាណិជ្ចកម្ម នៅថ្ងៃទី៥ ខែមិថុនា ឆ្នាំ២០២៤។

នៅក្នុងជំនួបនោះ លោក នុត អ៊ុនវ័ណរ៉ា បានប្រាប់ដល់សមភាគីអំពីវឌ្ឍនភាពចុងក្រោយនៃការអភិវឌ្ឍរបស់កម្ពុជាដែលស្តែងចេញតាមរយៈស្ថិរភាពនយោបាយ, ម៉ាក្រូសេដ្ឋកិច្ចដែលមានលំនឹង, និងកំណើនឥតឈប់ឈរនៃរំហូរវិនិយោគ។

បន្ថែមពីនេះ លោកក៏បានគូសរំលេចអំពីបច្ចុប្បន្នភាពនៃបរិយាកាសវិនិយោគនៅកម្ពុជាដែលកាន់តែមានភាពបើកចំហ, ទាក់ទាញ, និងងាយស្រួលសម្រាប់ការបណ្តាក់ទុនវិនិយោគលើគ្រប់វិស័យ ជាពិសេសការគាំទ្ររបស់រាជរដ្ឋាភិបាលដល់ប្រព័ន្ធសេដ្ឋកិច្ចទីផ្សារតាមរយៈការធានានូវក្របខ័ណ្ឌច្បាប់ដែលមានប្រសិទ្ធភាព, ការដាក់ចេញនូវក្របខ័ណ្ឌគោលនយោបាយ និងផ្ដល់ការលើកទឹកចិត្តដល់ការវិនិយោគ, និងការវិនិយោគយ៉ាងសន្ធឹកសន្ធាប់ទៅលើធនធានមនុស្ស និងប្រព័ន្ធហេដ្ឋារចនាសម្ព័ន្ធរូបវន្តចាំបាច់នានា ដើម្បីបង្កើនភាពឧត្តមភាពប្រកួតប្រជែងរបស់កម្ពុជា។

ឆ្លៀតក្នុងឪកាសនោះ លោក Kelvin Mo បានសម្តែងនូវសុទិដ្ឋិនិយមថាព័ត៌មានដែលការិយាល័យតំណាងទទួលបានយ៉ាងគ្រប់ជ្រុងជ្រោយនាឱកាសដំណើរទស្សនកិច្ចមកកាន់កម្ពុជាក្នុងពេលនេះ គឺបានផ្តល់នូវមូលដ្ឋានគ្រប់ជ្រុងជ្រោយសម្រាប់គណៈប្រតិភូដែលរួមដំណើរនាពេលនេះ ហើយក៏នឹងសម្រាប់ពាំនាំយកទៅផ្សព្វផ្សាយជូនសហគមន៍ធុរកិច្ចនៅកាណាដាដែលមានបំណងពង្រីកសកម្មភាពវិនិយោគនិងធុរកិច្ចរបស់ខ្លួននៅកម្ពុជាផងដែរ។

ជាមួយគ្នានោះ ប្រធានសភាពាណិជ្ជកម្មកម្ពុជាប្រចាំទីក្រុង Montreal ក៏បានបង្ហាញពីបំណងស្វែងយល់អំពីសក្តានុពល និងកាលានុវត្តភាពវិនិយោគនៅកម្ពុជាផងដែរ ក្នុងវិស័យសំខាន់ៗ៦ រួមមានវិស័យកសិកម្មនិងការកែច្នៃ វិស័យទេសចរណ៍ សុខាភិបាល អចនទ្រព្យ សេវាកម្ម និងឧស្សាហកម្ម៕

The post ប្រធានពាណិជ្ជកម្មកម្ពុជាប្រចាំទីក្រុង Montreal សំឡឹងឃើញឱកាសវិនិយោគក្នុងវិស័យសំខាន់ៗ៦ នៅកម្ពុជា appeared first on .