Adidas

ក្រុមហ៊ុន Adidas អាចនឹងត្រូវបន្ថែមការចំណាយជាង ២០០លានដុល្លារ ក្នុងឆមាសទី២ ដោយពន្ធលោក ត្រាំ

ឧកញ៉ាសាមញ្ញ — Wed, 30 Jul 2025 09:13:09 +0000

ក្រុមហ៊ុនផលិតសម្ភារ:កីឡាដ៏ធំបំផុតមួយរបស់ពិភពលោក Adidas បានឲ្យដឹងថា ពន្ធគយខ្ពស់របស់សហរដ្ឋអាមេរិក អាចនឹងបន្ថែមប្រហែល ២០០លានអឺរ៉ូ (២៣១លានដុល្លារ) ដល់ការចំណាយរបស់ខ្លួន នៅក្នុងឆមាសទី២ ។ នេះបើតាមការចុះផ្សាយពីសារព័ត៌មាន Reuters។

សហរដ្ឋអាមេរិក បាននិយាយកាលពីដើមខែនេះថា ខ្លួននឹងដាក់ពន្ធ ២០% លើការនាំចូលទំនិញពីវៀតណាម និងពន្ធ ១៩% លើការនាំចូលទំនិញពីប្រទេសឥណ្ឌូណេស៊ី ដោយសារតែការចរចាពាណិជ្ជកម្មរវាងប្រទេសទាំងពីរកន្លងមក ត្រូវបានជាប់គាំង។

គួរឲ្យដឹងផងដែរថា វៀតណាម និងឥណ្ឌូណេស៊ី គឺជាប្រទេសផលិតធំបំផុតទាំងពីររបស់ Adidas ដោយបង្កើតចំណែកបាន ២៧% និង ១៩% នៃផលិតផលសរុបរបស់ក្រុមហ៊ុនខ្នាតយក្សអាល្លឺម៉ង់មួយនេះ គិតនៅក្នុងឆ្នាំ២០២៤ កន្លងទៅ។

ជម្រាបជូនផងដែរថា ដូចក្រុមហ៊ុនផលិតសម្ភារ:កីឡាជាច្រើនទៀត រួមទាំងក្រុមហ៊ុន Puma ផងដែរ ក្រុមហ៊ុន Adidas បានបង្កើនការផ្ទុកទំនិញរបស់ខ្លួន ចូលក្នុងទឹកដីសហរដ្ឋអាមេរិក ដើម្បីព្យាយាមកាត់បន្ថយផលប៉ះពាលដោយសារពន្ធគយ ដែលជំរុញឲ្យស្តុកទំនិញរបស់ខ្លួន កើនឡើង ១៦% ដល់ ៥,២៦ពាន់លានអឺរ៉ូ នៅចុងខែមិថុនា៕

The post ក្រុមហ៊ុន Adidas អាចនឹងត្រូវបន្ថែមការចំណាយជាង ២០០លានដុល្លារ ក្នុងឆមាសទី២ ដោយពន្ធលោក ត្រាំ appeared first on .

ម៉ាកយីហោ Yeezy របស់អតីតមហាសេដ្ឋី Kanye West ជាប់បំណុលពន្ធ ៦០០ ០០០ ដុល្លារ

ឧកញ៉ាសំពៅ — Thu, 08 Dec 2022 09:59:00 +0000

តារារ៉េប Kanye West ធ្លាប់ទទួលបានងារជាមហាសេដ្ឋី ប៉ុន្តែបន្ទាប់ពីផ្ដាច់កុងត្រាជាមួយក្រុមហ៊ុន Adidas តំណែងជាអ្នកមានបំផុតមួយរូបនៅអាមេរិករបស់គេ ក៏បានរបូតទៅតាមនោះដូចគ្នា។

រឿងនៅមិនទាន់ចប់ទេ ពោលតាំងពីបាត់បង់ងារជាមហាសេដ្ឋី Kanye មានរឿងអាស្រូវឥតលោះពេល ហើយថ្មីៗនេះមានរបាយការណ៍អះអាងថា ម៉ាកយីហោ Yeezy របស់លោកកំពុងជាប់បំណុលពន្ធយ៉ាងតិច ៦០០ ០០០ ដុល្លារ។ នេះបើតាមការចុះផ្សាយពី Yahoo។

ដោយឡែក NBC News ក៏បានរាយការណ៍ទៀតថា បំណុលពន្ធរបស់ Yeezy គឺមានតាំងពីពាក់កណ្ដាលឆ្នាំ ២០២១ ពោលកាលពីខែកក្កដា ២០២១ នៅមិនទាន់បង់ពន្ធប្រមាណ ១៤ ០០០ ដុល្លារ ហើយខែកុម្ភៈ ២០២២ ជិត ២៨០ ០០០ ដុល្លារ និងខែកញ្ញាប្រហែល ៣២១ ៥៩០ ដុល្លារទៀត។

សូមជម្រាបថា មួយរយៈកាលចុងក្រោយនេះ Kanye ហាក់មានបញ្ហាផ្នែកហិរញ្ញវត្ថុជាខ្លាំង ដោយលោកបានផ្ដល់បទសម្ភាសន៍ជាមួយ Tim Pool កាលពីសប្ដាហ៍មុនថា កុងធនាគារទាំង ៤ របស់លោកត្រូវបានបង្កក ខណៈលុយនៅក្នុងនោះមានប្រមាណ៧៥ លានដុល្លារ ហើយលោកនៅជំពាក់បំណុលពន្ធ ៥០ លានដុល្លារទៀត៕

The post ម៉ាកយីហោ Yeezy របស់អតីតមហាសេដ្ឋី Kanye West ជាប់បំណុលពន្ធ ៦០០ ០០០ ដុល្លារ appeared first on .

ក្រុមហ៊ុន Adidas បានសម្រេចផ្អាកភាពជាដៃគូ ជាមួយសហព័ន្ធបាល់ទាត់របស់រុស្ស៊ីហើយ

ឧកញ៉ាសាមញ្ញ — Wed, 02 Mar 2022 05:37:10 +0000

ក្រុមហ៊ុនសម្ភារកីឡា Adidas បានផ្អាកភាពជាដៃគូរបស់ខ្លួនជាមួយសហព័ន្ធបាល់ទាត់របស់រុស្ស៊ី ពោលគឺផ្អែកទៅលើប្រតិកម្មចុងក្រោយ ចំពោះការលុកលុយរបស់ប្រធានាធិបតីរុស្ស៊ី លោក វ៉្លាឌីមៀ ពូទីន ទៅលើប្រទេសអ៊ុយក្រែន ។

ជាក់ស្តែងក្រុមហ៊ុនខ្នាតយក្សរបស់អាល្លឺម៉ង់មួយនេះ បានក្លាយជាអ្នកផ្គត់ផ្គង់ឧបករណ៍ និងសម្លៀកបំពាក់ ដល់ក្រុមជម្រើសជាតិរុស្ស៊ី ចាប់តាំងពីឆ្នាំ ២០០៨ មកម្លេះ ដោយពួកគេថែមទាំងបានរចនាឈុតបាល់ទាត់ សម្រាប់ពួកគេ ក្នុងការប្រកួតពានរង្វាន់ World Cup ឆ្នាំ ២០១៨ នៅក្នុងប្រទេសរុស្ស៊ីទៀតផង ។

ប៉ុន្តែទោះជាយ៉ាងណាក៏ដោយ បើតាមដំណឹងចុងក្រោយ បានបង្ហាញថា Adidas ឥឡូវនេះបានសម្រេចចិត្តផ្អាកកិច្ចព្រមព្រៀងជាមួយនឹងក្រុមជម្រើសជាតិរុស្ស៊ីហើយ ខណ:ពេលដែលអ្នកស្លាប់កំពុងតែបានកើនឡើង ដោយសារតែការវាយប្រហាររបស់កងកម្លាំង រុស្ស៊ី ទៅលើប្រទេសអ៊ុយក្រែន ។

យ៉ាងណាមិញ ការសម្រេចចិត្តរបស់ Adidas នេះ បានកើតឡើងបន្ទាប់ពីក្រុមបាល់ទាត់អង់គ្លេស Manchester United បានប្រកាសថា ពួកគេបានបញ្ចប់កិច្ចព្រមព្រៀង ដែលតម្លៃប្រមាណ ៤០ លានផោន ជាមួយក្រុមហ៊ុនអាកាសចរណ៍ Aeroflot ដែលគ្រប់គ្រងដោយរុស្ស៊ី ។

បន្ថែមពីនេះ កាលពីពេលថ្មីៗកន្លងទៅ សហព័ន្ធបាល់ទាត់ទ្វីបអឺរ៉ុប UEFA ក៏បានធ្វើការប្រកាស អំពីការផ្លាស់ប្តូរការប្រកួតវគ្គផ្តាច់ព្រ័ត្រពានរង្វាន់ Champions League ពីទីក្រុង Saint Petersburg របស់ប្រទេសរុស្ស៊ី ទៅកាន់ទីក្រុងប៉ារីសវិញ ខណ:សហព័ន្ធក៏បានបញ្ចប់ភាពជាដៃគូ ក្នុងទំហំទឹកប្រាក់ប្រមាណ ៣៤ លានផោន ក្នុងមួយរដូវកាល ជាមួយនឹងក្រុមហ៊ុនថាមពល ដែលគ្រប់គ្រងដោយរដ្ឋរុស្ស៊ី Gazprom ទៀតផង ៕

ប្រភព: Mirror

The post ក្រុមហ៊ុន Adidas បានសម្រេចផ្អាកភាពជាដៃគូ ជាមួយសហព័ន្ធបាល់ទាត់របស់រុស្ស៊ីហើយ appeared first on .

ជួបបញ្ហាផ្ទួនៗ តែក្រុមហ៊ុនយក្សអាល្លឺម៉ង់ Adidas ជឿថាអាជីវកម្មខ្លួន នឹងរីកចម្រើនក្នុងប្រទេសចិន ក្នុងឆ្នាំនេះ

ឧកញ៉ាសាមញ្ញ — Fri, 18 Feb 2022 05:45:24 +0000

ក្រុមហ៊ុនផលិតសម្លៀកបំពាក់ និងសម្ភារកីឡាអាល្លឺម៉ង់ Adidas បាននិយាយកាលពីថ្ងៃព្រហស្បតិ៍ថា ការលក់របស់ខ្លួននឹងរីកចម្រើន នៅក្នុងទីផ្សារដ៏សំខាន់ ក្នុងប្រទេសចិន នៅឆ្នាំ ២០២២ នេះ បើទោះបីជាក្រុមហ៊ុនបានទទួលរងផលប៉ះពាល់ ដោយសារជំងឺឆ្លងកូវីដ ១៩ និងមានការធ្វើពិហិការ របស់ប្រជាជនចិន ទៅលើការប្រើប្រាស់ម៉ាកយីហោរបស់ប្រទេសលោកខាងលិច ក៏ដោយ ។

ជាក់ស្តែង ការលើកឡើងនេះបានកើតឡើង បន្ទាប់ពីទស្សនាវដ្តី Manager Magazin បានរាយការណ៍ថា Adidas រំពឹងថាការលក់របស់ខ្លួន នៅក្នុងប្រទេសចិន នឹងធ្លាក់ចុះប្រហែល ៤០០ លានអឺរ៉ូ ឬ ៤៥៥ លានដុល្លារ នៅក្នុងឆ្នាំ ២០២២ នេះ។

តែទោះជាយ៉ាងណាក៏ដោយ នៅពេលសួរនាំអំពីការចុះផ្សាយបែបនេះ អ្នកនាំពាក្យរបស់ក្រុមហ៊ុន Adidas បានចេញមុខឆ្លើយតបវិញថា ” អាជីវកម្មរបស់យើង នៅក្នុងប្រទេសចិន បានកើនឡើងនៅឆ្នាំ ២០២១ ដូច្នេះហើយអាជីវកម្មរបស់យើង នៅក្នុងប្រទេសចិន ក៏នឹងបន្តកើនឡើងនៅក្នុងឆ្នាំ ២០២២ នេះផងដែរ ” ។

ជម្រាបជូនផងដែរថា ការលក់នៅក្នុងត្រីមាសទី ៣ របស់ Adidas បានធ្លាក់ចុះ ១៥% នៅ Greater China បើទោះបីជាពួកគេបានកើនឡើង ១៥% ក្នុងរយ:ពេល ៩ ខែដំបូងនៃឆ្នាំទៅ ក៏ដោយ ។

រំលឹកផងដែរថា ប្រជាជនចិន បាននាំគ្នាធ្វើពហិការមិនប្រើប្រាស់ម៉ាកយីហោរបស់ប្រទេសលោកខាងលិច បន្ទាប់ពីក្រុមហ៊ុនបានរងការរិះគន់ ចំពោះការនិយាយថា ពួកគេនឹងមិនយកកប្បាស ពីខេត្តស៊ីនជាំងទៀតនោះទេ បន្ទាប់ពីមានរបាយការណ៍អំពីការរំលោភសិទ្ធិមនុស្ស ដែលប្រឆាំងទៅនឹងជនជាតិអ៊ុយហ្គួរម៉ូស្លីម នៅក្នុងតំបន់នោះ តែទោះជាយ៉ាងណា រដ្ឋាភិបាលទីក្រុងប៉េកាំង បានច្រានចោលចំពោះរបាយការណ៍នេះទាំងស្រុង ៕

ប្រភព: Kelo News

The post ជួបបញ្ហាផ្ទួនៗ តែក្រុមហ៊ុនយក្សអាល្លឺម៉ង់ Adidas ជឿថាអាជីវកម្មខ្លួន នឹងរីកចម្រើនក្នុងប្រទេសចិន ក្នុងឆ្នាំនេះ appeared first on .

បងប្អូនមហាសេដ្ឋី Issas គាំទ្រក្រុមហ៊ុនផលិតសម្ភារៈកីឡាថ្មី ដើម្បីប្រជែងទីផ្សារជាមួយ NIKE និង Adidas

ឧកញ៉ាសំពៅ — Tue, 15 Feb 2022 08:25:14 +0000

ក្រុមហ៊ុនផលិតសម្ភារៈកីឡាធំបំផុតលើលោក គឺគ្មានអ្នកណាអាចវ៉ាដាច់ Adidas និង NIKE បានឡើយ ដោយសារម៉ាកយីហោមួយនេះបានឈរជើងលើប្រឡូកក្នុងវិស័យកីឡាជាយូរយារណាស់មកហើយ និងទទួលបានភាពជោគជ័យខ្លាំងផងដែរ។

តែកាលពីពេលថ្មីៗនេះ មានដំណឹងល្ហៀងៗមកថា បងប្អូនត្រកូល Issas ដែលជាមហាសេដ្ឋី និងជាវិនិយោគិនលើវិស័យជាច្រើន ចាប់អារម្មណ៍ជាមួយនឹងក្រុមហ៊ុនផលិតសម្ភារៈកីឡាថ្មីមួយ ថែមទាំងបានជ្រោមជ្រែងអាជីវកម្មខ្នាតតូចមួយនេះ ជាមួយឆន្ទៈប្រជែងទីផ្សារ Adidas និង NIKE ទៀតផង។

ក្រុមហ៊ុនដែលបងប្អូនត្រកូល Issas ជួយគាំទ្រមានឈ្មោះថា Castore ដែលបានបង្កើតឡើងនៅឆ្នាំ ២០១៦ ដោយបងប្អូន Tom និង Phil Beahon ជាមួយនឹងទំហំទឹកប្រាក់ប្រមាណ ៨០ ០០០ ផោន ឬជាង ១០ ម៉ឺនដុល្លារ ដែល ៤០% នៃទឹកប្រាក់នោះជាចំណែកបានមកពីការដាក់បញ្ចាំផ្ទះឪពុកម្ដាយរបស់ពួកគេ។

៥ ឆ្នាំក្រោយបន្ទាប់ពីបង្កើតអាជីវកម្មមួយនេះ Castore បានផ្ដល់ឱកាសការងារជូនមនុស្សជាង ១៥០ កន្លែង ស្របពេលបងប្អូនត្រកូល Issas កំពុងជំរុញឲ្យពួកគេងាកមកផ្គត់ផ្គង់សម្ភារៈកីឡាផ្សេងៗដូចជា ធ្វើការជាមួយម្ចាស់ពាន Wimbledon, Andy Murray សហការជាមួយក្រុមនៅក្របខណ្ឌ Premier League ព្រឹត្តិការណ៍ប្រណាំងឡាន McLaren F1 និងកីឡា Cricket នៅអង់គ្លេសជាដើម។ នេះបើតាមការអះអាងពី ECHO៕

ប្រភព: manchestereveningnews

The post បងប្អូនមហាសេដ្ឋី Issas គាំទ្រក្រុមហ៊ុនផលិតសម្ភារៈកីឡាថ្មី ដើម្បីប្រជែងទីផ្សារជាមួយ NIKE និង Adidas appeared first on .

តម្លៃហ៊ុន Adidas ធ្លាក់ចុះ ៦% ធ្វើឲ្យមហាសេដ្ឋីមានបំផុតនៅអេហ្ស៊ីប របូតប្រាក់អស់ ២៣០ លានដុល្លារ

ឧកញ៉ាសំពៅ — Fri, 04 Feb 2022 01:48:36 +0000

ក្នុងរយៈពេលត្រឹម ២ សប្ដាហ៍ មហាសេដ្ឋីអេហ្ស៊ីប Nassef Sawiris ខាតបង់ទ្រព្យសម្បត្តិអស់ប្រមាណ ២៣០ លានដុល្លារ ដោយសារតម្លៃភាគហ៊ុននៃក្រុមហ៊ុនផលិតសម្ភារៈកីឡាអាល្លឺម៉ង់ Adidas បានធ្លាក់ចុះ ៦% ពី ២៩១,៣ ដុល្លារ មកនៅ ២៧២,២ ដុល្លារ។

បើយោងតាមការចុះផ្សាយពី Bloomberg Billionaire Index ទឹកប្រាក់ដែលនៅសេសសល់ប្រមាណ ៦,៤ ពាន់លានដុល្លាររបស់អ្នកជំនួញរូបនេះ គឺនៅតែអាចជួយទប់តំណែងអ្នកមានបំផុតរបស់លោកនៅអេហ្ស៊ីប និងអ្នកមានទី ៨ នៅទ្វីបអាហ្វ្រិក។

តែបើក្រឡេកទៅមើលពីភាពខុសគ្នារវាងអ្នកមានបំផុតនៅអាហ្វ្រិក និងសេដ្ឋីមានដាច់គេនៅអេហ្សីបរូបនេះ គឺមានភាពខុសគ្នាឆ្ងាយ ពោលគឺអ្នកមានដាច់គេនៅអាហ្វ្រិកលោក Aliko Dangote នាំមុខលោក Sawiris ដល់ទៅជិត ១៤ ពាន់លានដុល្លារ ដោយសារទ្រព្យសម្បត្តិរបស់ Dangote មានជិត ២០ ពាន់លានដុល្លារ។

ក្រៅពីភាគហ៊ុននៅក្នុង Adidas សេដ្ឋីអេហ្សីបលោក Sawiris បច្ចុប្បន្នកាន់កាប់ ៣០% របស់ក្រុមហ៊ុន OCI ដែលជាអ្នកផលិតជីដែលមានមូលដ្ឋាននៅ Geleen ប្រទេសហូឡង់។ ទ្រព្យសម្បត្តិផ្សេងទៀតរបស់សេដ្ឋីរូបនេះរួមមាន ៦% នៃក្រុមហ៊ុនសម្លៀកបំពាក់កីឡារបស់ Adidas និងភាគហ៊ុននៅក្នុង LafargeHolcim ដែលជាក្រុមហ៊ុនផលិតស៊ីម៉ងត៍ដ៏ធំបំផុតរបស់ពិភពលោក៕

ប្រភព: businessinsider

The post តម្លៃហ៊ុន Adidas ធ្លាក់ចុះ ៦% ធ្វើឲ្យមហាសេដ្ឋីមានបំផុតនៅអេហ្ស៊ីប របូតប្រាក់អស់ ២៣០ លានដុល្លារ appeared first on .

ហាង Uniqlo របស់មហាសេដ្ឋីជប៉ុន ជាប់ឈ្មោះក្នុងបញ្ជីហាងសម្លៀកបំពាក់ធំបំផុតទាំង ១០ លើលោក

ឧកញ៉ាសំពៅ — Tue, 18 Jan 2022 02:33:52 +0000

ដូចធ្លាប់បានដឹងរួចមកហើយថា ហាងសម្លៀកបំពាក់ដ៏ពេញនិយមនៅជប៉ុន ក៏ដូចជាជុំវិញសកលលោកគឺ Uniqlo គឺជាអាជីវកម្មរបស់លោក Tadashi Yanai ដែលជាអ្នកមានដាច់គេទី ២ នៅជប៉ុន។

មិនត្រឹមតែជា Brand សម្លៀកបំពាក់ធំប្រចាំប្រទេសឡើយ តែ Uniqlo ថែមទាំងជាប់ជា Brand ល្បីទូទាំងពិភពលោក ដែលមានសាខាជាច្រើនកន្លែង ពោលគិតត្រឹមចុងខែវិច្ឆិកា ២០២១ Uniqlo មានសាខា ២ ៣៥៨ កន្លែងរាប់ទាំងនៅជប៉ុន និងអន្តរជាតិ។

ផ្អែកតាមការចុះផ្សាយពី Thevou ហាងរបស់មហាសេដ្ឋីជប៉ុនមួយនេះបានជាប់ចូលក្នុងបញ្ជីហាងសម្លៀកបំពាក់ធំបំផុតលើលោកទាំង ១០ ដោយផ្អែកលើមូលធនទីផ្សារប្រចាំឆ្នាំ ២០២១ និងភាពល្បីល្បាញរបស់ម៉ាកយីហោមួយនេះ។

ហាង Brand សម្លៀកបំពាក់ធំៗទាំង ១០ លើលោកទាំងនោះមានដូចជា៖

ហាង NIKE មានទីស្នាក់ការកណ្ដាលនៅសហរដ្ឋអាមេរិក មូលធនទីផ្សារឆ្នាំ ២០២១ គឺ ៣០,៥ ពាន់លានដុល្លារ
ហាង GUCCI មានទីស្នាក់ការកណ្ដាលនៅប្រទេសអ៊ីតាលី មូលធនទីផ្សារឆ្នាំ ២០២១ គឺ ១៥,៦ ពាន់លានដុល្លារ
ហាង Louis Vuitton មានទីស្នាក់ការកណ្ដាលនៅប្រទេសបារាំង មូលធនទីផ្សារឆ្នាំ ២០២១ គឺ ១៤,៨ ពាន់លានដុល្លារ
ហាង Adidas មានទីស្នាក់ការកណ្ដាលនៅប្រទេសអាល្លឺម៉ង់ មូលធនទីផ្សារឆ្នាំ ២០២១ គឺ ១៤,៣ ពាន់លានដុល្លារ
ហាង Chanel មានទីស្នាក់ការកណ្ដាលនៅប្រទេសបារាំង មូលធនទីផ្សារឆ្នាំ ២០២១ គឺ ១៣,២ ពាន់លានដុល្លារ
ហាង ZARA មានទីស្នាក់ការកណ្ដាលនៅប្រទេសអេស្ប៉ាញ មូលធនទីផ្សារឆ្នាំ ២០២១ គឺ ១៣,១ ពាន់លានដុល្លារ
ហាង UNIQLO មានទីស្នាក់ការកណ្ដាលនៅប្រទេសជប៉ុន មូលធនទីផ្សារឆ្នាំ ២០២១ គឺ ១៣,១ ពាន់លានដុល្លារ
ហាង H&M មានទីស្នាក់ការកណ្ដាលនៅប្រទេសស៊ុយអែត មូលធនទីផ្សារឆ្នាំ ២០២១ គឺ ១២,៤ ពាន់លានដុល្លារ
ហាង Cartier មានទីស្នាក់ការកណ្ដាលនៅប្រទេសបារាំង មូលធនទីផ្សារឆ្នាំ ២០២១ គឺ ១២ ពាន់លានដុល្លារ
ហាង Hermes មានទីស្នាក់ការកណ្ដាលនៅប្រទេសបារាំង មូលធនទីផ្សារឆ្នាំ ២០២១ គឺ ១១,៦ ពាន់លានដុល្លារ៕

ប្រភព: thevou

The post ហាង Uniqlo របស់មហាសេដ្ឋីជប៉ុន ជាប់ឈ្មោះក្នុងបញ្ជីហាងសម្លៀកបំពាក់ធំបំផុតទាំង ១០ លើលោក appeared first on .