Andrej Babis

មហាសេដ្ឋីឆេក យកឈ្នះក្ដីក្លែងបន្លំអាជីវកម្ម មុនឈរឈ្មោះជាបេក្ខភាពនាយករដ្ឋមន្ត្រី

ឧកញ៉ាសំពៅ — Thu, 15 Feb 2024 05:57:00 +0000

មហាសេដ្ឋីឆេក លោក Andrej Babis ត្រូវបានតុលាការសម្រេចជាផ្លូវការថា មិនជាប់ពាក់ព័ន្ធនឹងករណីក្លែងបន្លំអាជីវកម្ម ដូចដែលបានចោទប្រកាន់ឡើយ ខណៈការយកឈ្នះមួយនេះ កាន់តែបង្កើនទំនុកចិត្តចំពោះមហាសេដ្ឋីម្នាក់នេះ ក្នុងការឈរឈ្មោះជាបេក្ខភាពនាយករដ្ឋមន្ត្រី ដែលនឹងបោះឆ្នោតនាឆ្នាំក្រោយ។

យោងតាមការចុះផ្សាយពីសារព័ត៌មាន Bloomberg បានបង្ហាញថា តុលាការនៅទីក្រុងប្រាក បានច្រានចោលការបោទប្រកាន់ពីព្រះរាជអាជ្ញា ដោយចោទអតីតនាយករដ្ឋមន្ត្រីឆេកថា បានប្រើប្រាស់លុយខុសច្បាប់ប្រហែល ២លានដុល្លារ ពីកញ្ចប់មូលនិធិសហភាពអឺរ៉ុប មុនពេលប្រឡូកក្នុងឆាកនយោបាយ។

ការចោទប្រកាន់មួយនេះ គឺដូចគ្នាទៅនឹងការចោទប្រកាន់កាលពីឆ្នាំទៅ ហើយលោក Babis បានយកឈ្នះវាទាំង២លើក ក្រោមអំណះអំណាងថា វាសុទ្ធតែជាល្បិចនយោបាយ ទម្លាក់កំហុសមកលើលោក និងធ្វើឲ្យលោកបាត់បង់តួនាទីនៅលើឆាកនយោបាយតែប៉ុណ្ណោះ។

សូមជម្រាបដែរថា លោក Andrej Babis ដែលជាអតីតនាយករដ្ឋមន្ត្រីសាធារណរដ្ឋឆេក ធ្លាប់បានប្រកាសក្ដែងៗ នឹងបន្តឈរឈ្មោះជាបេក្ខភាពនាយករដ្ឋមន្ត្រីម្ដងទៀត សម្រាប់ការបោះឆ្នោតធ្វើឡើងនាថ្ងៃទី០៧ និងទី០៨ ខែមិថុនា ឆ្នាំ២០២៤ ខាងមុខ៕

The post មហាសេដ្ឋីឆេក យកឈ្នះក្ដីក្លែងបន្លំអាជីវកម្ម មុនឈរឈ្មោះជាបេក្ខភាពនាយករដ្ឋមន្ត្រី appeared first on .

អតីតមេធំ NATO ផ្ដួលមហាសេដ្ឋី Babis ក្លាយជាប្រធានាធិបតីឆេក

ឧកញ៉ាសំពៅ — Mon, 30 Jan 2023 02:10:52 +0000

ការបោះឆ្នោតជ្រើសរើសប្រធានាធិបតីនៃសាធារណរដ្ឋឆេក បានបញ្ចប់ទៅកាលពីចុងសប្ដាហ៍មុន ហើយជាលទ្ធផលលោក Petr Pavel អតីតឧត្តមសេនីយ NATO បានទទួលជ័យជំនះលើមហាសេដ្ឋី Andrej Babis។

យោងតាមការចុះផ្សាយពី Eastcoastdaily បានបង្ហាញថា លោក Pavel ទទួលបានសម្លេងគាំទ្រ ៥៧,៨% ខណៈមហាសេដ្ឋីឆេកទទួលបានត្រឹម ៤២,២% ដូច្នេះក៏មានន័យថា អតីតមេធំ NATO ដែលមានវ័យ ៦១ ឆ្នាំ នឹងត្រូវចូលខ្លួនមកបន្តតំណែងថ្នាក់ដឹកនាំ Milos Zeman។

“អាណត្តិប្រធានាធិបតីរបស់ខ្ញុំ នឹងជោគជ័យពេលដែលពួកយើងសម្រេចបានលទ្ធផលរួមគ្នា។ ខ្ញុំមិនអាចមើលរំលងពីក្ដីបារម្ភនៃប្រជាជន ដែលកំពុងមានភាពភ័យខ្លាច អំពើអាណាធិបតេយ្យ និងភាពមិនច្បាស់លាស់។ ពួកយើងត្រូវតែកែប្រែវា គោរពច្បាប់ ហើយខ្ញុំសន្យាថាគ្រប់គ្នានឹងទទួលបានសិទ្ធិស្មើៗគ្នា”។ នេះបើតាមសម្ដីប្រធានាធិបតីឆេកថ្មីបាននិយាយ៕

The post អតីតមេធំ NATO ផ្ដួលមហាសេដ្ឋី Babis ក្លាយជាប្រធានាធិបតីឆេក appeared first on .

មហាសេដ្ឋីឆេកឡើងដល់វគ្គបេក្ខភាពចុងក្រោយ នៃការដណ្ដើមតំណែងប្រធានាធិបតី

ឧកញ៉ាសំពៅ — Mon, 16 Jan 2023 05:52:00 +0000

ការបោះឆ្នោតជុំតំបូង នៃការជ្រើសរើសប្រធានាធិបតីនៃសាធារណរដ្ឋឆេក បានបញ្ចប់កាលពីថ្ងៃព្រហស្បតិ៍កន្លងទៅ ដោយអតីតឧត្ដមសេនីយ៍អង្គការ NATO លោក Petr Pavel និងមហាសេដ្ឋី Andrej Babis ទទលបានសម្លេងគាំទ្រដាច់ផឹង បើធៀបនឹងបេក្ខភាព ៦ រូបផ្សេងទៀត។

យោងតាមការចុះផ្សាយពី Politics បានឲ្យដឹងថា លោក Petr ទទួលបានសម្លេងគាំទ្រ ៣៥,៤% ខណៈអតីតនាយករដ្ឋមន្ត្រី Babis ទទួលបានសន្លឹកឆ្នោត ៣៥% ហើយបេក្ខភាពទាំង ២ បានក្លាយជាបេក្ខភាព ២ រូបចុងក្រោយនៃការប្រជែងតំណែងប្រធានាធិបតីនាថ្ងៃទី ២៧ ២៨ មករាខាងមុខ។

វាអាចនឹងមិនមែនជារឿងល្អប៉ុន្មានសម្រាប់ប្រធានាធិបតីថ្មីឡើយ ពោលក្នុងចំណោមអ្នកទាំង ២ គឺនឹងត្រូវទទួលថ្មបាក់ពីលោក Milos Zeman ពោលគឺត្រូវដោះស្រាយវិបត្តិអតិផរណានៅក្នុងប្រទេសដែលមានប្រជាជន ១០,៥ លាននាក់។

សូមជម្រាបដែរថា យោងតាមការស្ទង់មតិមុនពេលបោះឆ្នោតជុំទី ១ បានបង្ហាញថា អតីតមេធំ NATO អាចនឹងផ្ដួលលោក Babis បើសិនជាអ្នកទាំង ២ ត្រូវតទល់គ្នានៅវគ្គផ្ដាច់ព្រ័ត្រ ប៉ុន្តែអតីតនាយករដ្ឋមន្ត្រីឆេក ក៏មានអ្នកគាំទ្រច្រើនដូចគ្នា ដូច្នេះលទ្ធផលពិបាកនឹងស្មានទុកខ្លាំងណាស់៕

The post មហាសេដ្ឋីឆេកឡើងដល់វគ្គបេក្ខភាពចុងក្រោយ នៃការដណ្ដើមតំណែងប្រធានាធិបតី appeared first on .

មហាសេដ្ឋីឆែក តវ៉ាឈ្នះក្ដីជាមួយ EU ជុំវិញការចោទប្រកាន់អំពើឆបោក

ឧកញ៉ាសំពៅ — Tue, 10 Jan 2023 08:18:00 +0000

កាលពីពេលថ្មីៗនេះ មហាសេដ្ឋី និងជាអ្នកនយោបាយជនជាតិឆែក Andrej Babis បានតវ៉ាឈ្នះក្ដីក្ដាំ ដែលបានចោទប្រកាន់លោកពាក់ព័ន្ធនឹងករណីឆបោក ក្នុងទំហំទឹកប្រាក់ប្រមាណ ២ លានអឺរ៉ូពីសហភាពអឺរ៉ុប។

យោងតាមការចុះផ្សាយពី Financial Times បានចុះផ្សាយថា EU បានចោទប្រកាន់លោក Babis ពីបទកិបកេងលុយប្រហែល ២ លានអឺរ៉ូ ដោយបានផ្ទេរប្រាក់ចូលទៅក្នុងអាជីវកម្មមួយក្នុងចំណោមមុខជំនួញរបស់លោកជាច្រើន។

ប្រភពដដែលបន្ថែមទៀតថា លោក Babis គឺជាបុគ្គលដែលមានធនធានរាប់ពាន់លានដុល្លារ តាំងពីមុនប្រឡូកចូលឆាកនយោបាយម៉្លេះ ហើយលោកផ្ទាល់ក៏ធ្លាប់ទម្លាយថា ពាក្យបណ្ដឹងដែលលោកទទួលបាននោះ គឺជាឆាកល្ខោននយោបាយ រៀបចំឡើងដើម្បីទម្លាក់លោកពីតំណែងតែប៉ុណ្ណោះ។

សូមជម្រាបដែរថា លោក Babis គឺជាបេក្ខភាពកំពុងទទួលបានសម្លេងគាំទ្រខ្លាំង ក្នុងការដណ្ដើមតំណែងជាប្រធានាធិបតីឆែក ហើយសម្រាប់ការបោះឆ្នោតជម្រុះជុំដំបូងនឹងធ្វើឡើងរយៈពេល ២ ថ្ងៃនៅសប្ដាហ៍នេះ គឺថ្ងៃសុក្រ និងថ្ងៃសៅរ៍ ខណៈការសម្រេចចុងក្រោយ ធ្វើឡើងរយៈពេល ២ សប្ដាហ៍បន្ទាប់៕

The post មហាសេដ្ឋីឆែក តវ៉ាឈ្នះក្ដីជាមួយ EU ជុំវិញការចោទប្រកាន់អំពើឆបោក appeared first on .

មហាសេដ្ឋីឆេកឡើងតុលាការ តវ៉ាក្ដីក្ដាំជាថ្មីជាមួយ EU មុនការប្រកួតប្រជែងកៅអីប្រធានាធិបតី

ឧកញ៉ាសំពៅ — Thu, 05 Jan 2023 06:51:00 +0000

កាលពីពេលថ្មីៗនេះ មហាសេដ្ឋីឆែក Andrej Babis បានវិលត្រឡប់ទៅកាន់តុលាការជាថ្មី ដើម្បីបន្តប្រឆាំងជាមួយនឹងពាក្យបណ្ដឹងចោទលោកថា កិបកេងលុងជាង ២ លានអឺរ៉ុប អំឡុងពេលលោកកាន់តំណែងជាអតីតនាយករដ្ឋមន្ត្រីប្រចាំប្រទេស។

យោងតាមការចុះផ្សាយពី Reuters បានបង្ហើបថា បច្ចុប្បន្នលោក Babis កំពុងទទួលបានសម្លេងគាំទ្រខ្លាំង ដូច្នេះដើម្បីត្រួសត្រាយផ្លូវទៅកាន់តំណែងជាប្រធានាធិបតី លោកចាំបាច់ត្រូវដោះស្រាយបញ្ហាក្ដីក្ដាំនេះជាមុនសិន ជៀសវាងបញ្ហានៅថ្ងៃខាងមុខ។

គួររំលឹកដែរថា កន្លងមក EU ធ្លាប់ដាក់ពាក្យបណ្ដឹងចោទមហាសេដ្ឋីរូបនេះថា បានលួចកិបកេងថវិកាប្រមាណជាង ២ លានអឺរ៉ូ ប៉ុន្តែបុរសម្នាក់នេះប្រកែកដាច់អហង្ការ និងបានអះអាងថា នេះគឺជាល្បិចលើឆាកនយោបាយ ដែលគូប្រជែងរបស់លោកព្យាយាមទម្លាក់លោកពីអំណាចតែប៉ុណ្ណោះ។

សូមជម្រាបបន្ថែមថា លោក Babis គឺជាបុគ្គលមានទ្រព្យសម្បត្តិច្រើនបំផុតទី ៥ ប្រចាំសាធារណរដ្ឋឆេក ហើយក៏ជាបេក្ខភាពកំពុងទទួលបានការគាំទ្រច្រើន សម្រាប់ការប្រជែងកៅអីប្រធានាធិបតីផងដែរ។

ការបោះឆ្នោតជ្រើសរើសប្រធានាធិបតីនៃសាធារណរដ្ឋឆេកជុំទីមួយ នឹងធ្វើឡើងនៅថ្ងៃទី ១៣-១៤ មករា ខណៈជុំទី ២ ដែលនឹងជម្រុះសល់តែ ២ រូប ធ្វើឡើងនៅថ្ងៃទី ២៧-២៨ មករា៕

The post មហាសេដ្ឋីឆេកឡើងតុលាការ តវ៉ាក្ដីក្ដាំជាថ្មីជាមួយ EU មុនការប្រកួតប្រជែងកៅអីប្រធានាធិបតី appeared first on .

មហាសេដ្ឋីឆែក ប្រកាសឈរឈ្មោះជាបេក្ខភាពប្រធានាធិបតី សម្រាប់ការបោះឆ្នោតឆ្នាំក្រោយ

ឧកញ៉ាសំពៅ — Mon, 31 Oct 2022 04:31:00 +0000

កាលពីពេលថ្មីៗនេះ អតីតនាយករដ្ឋមន្ត្រីសាធារណរដ្ឋឆែក Andrej Babis បានប្រកាសថា លោកនឹងឈរឈ្មោះជាបេក្ខភាពប្រធានាធិបតី សម្រាប់ការបោះឆ្នោតដែលនឹងធ្វើឡើងនៅខែមករាឆ្នាំក្រោយ។ នេះបើតាមការចុះផ្សាយពី BNN Bloomberg។

ការប្រកាសរបស់មហាសេដ្ឋីដែលរកស៊ីលើវិស័យគីមីសាស្ត្រ កសិកម្ម និងប្រព័ន្ធផ្សព្វផ្សាយ គឺធ្វើឡើងនៅលើកម្មវិធីទូរទស្សន៍មួយកាលពីថ្ងៃអាទិត្យ តែបើទោះជាគណបក្សរបស់លោកគឺកំពុងមានប្រជាប្រិយភាពខ្លាំង ប៉ុន្តែមហាសេដ្ឋីម្នាក់នេះទំនងមិនអាចឡើងដល់វគ្គផ្ដាច់ព្រ័ត្រឡើយ។

យោងតាមការស្ទង់មតិបានបង្ហាញថា លោក Babis ប្រហែលអាចឆ្លងផុតវគ្គជម្រុះជុំទី ២ ប៉ុន្តែអាចនឹងពិបាកសម្រាប់វគ្គបន្ទាប់ ស្របពេលបេក្ខភាពដែលមានសង្ឃឹមក្លាយជាប្រធានាធិបតីថ្មីគឺ មន្ត្រីយោធា NATO ដែលបានចូលនិវត្តន៍ និងឈរឈ្មោះជាបេក្ខភាពឯករាជ Petr Pavel។

សូមជម្រាបដែរថា មហាសេដ្ឋីឆែកម្នាក់នេះ កំពុងតវ៉ាក្ដីក្ដាំជាមួយនឹងសហភាពអឺរ៉ុប ជុំវិញការចោទប្រកាន់លោកពីករណីកិបកេងលុយកាក់ អំឡុងពេលលោកកាន់តំណែងជានាយករដ្ឋមន្ត្រី៕

The post មហាសេដ្ឋីឆែក ប្រកាសឈរឈ្មោះជាបេក្ខភាពប្រធានាធិបតី សម្រាប់ការបោះឆ្នោតឆ្នាំក្រោយ appeared first on .

អតីតនាយករដ្ឋមន្ត្រីឆែក ឡើងតុលាការតវ៉ាក្ដីក្ដាំកិបកេងលុយ EU ២ លានដុល្លារ

ឧកញ៉ាសំពៅ — Tue, 13 Sep 2022 07:16:11 +0000

កាលពីថ្ងៃច័ន្ទកន្លងទៅ អតីតនាយករដ្ឋមន្ត្រីសាធារណរដ្ឋឆែក Andrej Babis ត្រូវបានកោះហៅឡើងតុលាការ ជុំវិញពាក្យបណ្ដឹងចោទលោកថា បានកិបកេងលុយជំនួយពីសហភាពអឺរ៉ុបប្រមាណ ២ លានដុល្លារ។

យោងតាមការចុះផ្សាយពី Reuters បានឲ្យដឹងថា ព្រះរាជអាជ្ញាបានចោទប្រកាន់មហាសេដ្ឋីខាងលើដែលជាម្ចាស់សហគ្រាសធំៗលើវិស័យជាច្រើន ជុំវិញការកិបកេងលុយជំនួយពី EU មុនពេលបង្កើតគណបក្សប្រឆាំង ANO នៅក្នុងឆ្នាំ ២០១១។

យ៉ាងណា លោក Babis បានប្រកែកដាច់អហង្ការថា ពាក្យចោទប្រកាន់ទាំងអម្បាលម៉ានគឺសុទ្ធសឹងតែមិនពិត ហើយបញ្ហានេះគឺទាក់ទងនឹងរឿងនយោបាយ។

សូមជម្រាបដែរថា លោក Babis ធ្លាប់បានកាន់តំណែងជានាយករដ្ឋមន្ត្រីនៃសាធារណរដ្ឋឆែកពីឆ្នាំ ២០១៧ ដល់ ២០២១ ហើយថ្មីៗនេះលោកហាក់ទទួលបានប្រជាប្រិយភាពកាន់តែខ្លាំង រហូតដល់អ្នកវិភាគជាច្រើនសន្និដ្ឋានថា បុរសវ័យ ៦៨ ឆ្នាំទំនងអាចទទួលបានតំណែងមួយនេះម្ដងទៀតសម្រាប់អាណត្តិក្រោយ។

គួររំលឹកដែរថា ទ្រព្យសម្បត្តិសរុបរបស់អ្នកនយោបាយចាស់វស្សាម្នាក់នេះមានប្រមាណជិត ៤ ពាន់លានដុល្លារអាមេរិក បើយោងតាមទិន្នន័យផ្ដល់ឲ្យដោយ Forbes៕

The post អតីតនាយករដ្ឋមន្ត្រីឆែក ឡើងតុលាការតវ៉ាក្ដីក្ដាំកិបកេងលុយ EU ២ លានដុល្លារ appeared first on .