១.អ្នកស្រី អ៊ែនជែលីណា ចូលី តារាភាពយន្តហូលីវូដដ៍ល្បី

នៅឆ្នាំ២០០០ តារាសម្តែង អ៊ែនជែលីណា ចូលី ធ្លាប់បានមកសម្តែងភាពយន្តមួយនៅក្នុងរឿងកុនហូលីវូដ គឺរឿង Tomb Raider ដែលមានឈុតខ្លះនៅប្រាសាទអង្គរវត្តដ៏ល្បីល្បាញរបស់កម្ពុជា។ ក្រោយសម្តែងភាពយន្តចប់ អ្នកស្រីបានដក់អារម្មណ៍ទាក់ចិត្តលើប្រជាជនកម្ពុជា អ្នកស្រីឧស្សាហ៍អញ្ជើញមកប្រទេសកម្ពុជា ដោយបានទិញដីសម្រាប់អភិរក្សព្រៃឈើនៅស្រុកសំឡូត ខេត្តបាត់ដំបង។

អ្នកស្រី អ៊ែនជែលីណា ចូលី ត្រូវបានរដ្ឋាភិបាលកម្ពុជា ផ្ដល់សញ្ជាតិកម្ពុជាឲ្យ ជាកិច្ចតបស្នងចំពោះគុណបំណាច់របស់អ្នកស្រី។

នៅឆ្នាំ២០១៦ អ្នកស្រី អ៊ែនជែលីណា បានដឹកនាំថតខ្សែភាពយន្តរឿងរ៉ាវសម័យខ្មែរក្រហម មានចំណងជើងថា «មុនដំបូង ខ្មែរក្រហមសម្លាប់ប៉ាខ្ញុំ» ឬ “First, They Killed My Father” នៅខេត្តបាត់ដំបង។

២.លោក ស្កុត នីសុន ប្រធានផ្នែកទីផ្សារនៅហូលីវូដដ៍ល្បី

មានអាជីពការងារក្នុងវិស័យផលិតកុនដ៍ល្បីល្បាញនៅហូលីវូដរបស់ពិភពលោក រយៈពេល ២៦ឆ្នាំ លោក ស្កុត នីសុន មានប្រាក់បៀវត្សច្រើនចាយមិនអស់ មានផ្ទះវិឡាធំដ៍ស្កឹមស្កៃ រថយន្យទំនើបៗ និងមានទូកកម្សាន្តផ្ទាល់ខ្លួនទៀតផង។

នៅឆ្នាំ២០០០ លោក ស្កុត បានមកទស្សនកិច្ចកម្ពុជា នៅគ្រានោះហើយដែលោកបានជួបកុមារដើររើសសំរាមនៅតំបន់ស្ទឹងមានជ័យ រាជធានីភ្នំពេញ ជាហេតុធ្វើឲ្យជីវិតគាត់ប្រែប្រួលដក់អារម្មណ៍។

លោក ស្កុត នីសុន បានបើកមូលនិធិ និងអង្គការ ជួយកុមាររើសសំរាមនៅស្ទឹងមានជ័យ ឲ្យមានការសិក្សាអប់រំ និងជួយគ្រួសារពួកគេឲ្យមានជីវភាពសមរម្យ។ ក្រោយមក លោកបានកសាងសង់សាលារៀនដ៍ធំមួយ នៅសហគមន៍ស្ទឹងមានជ័យ ដែលផ្ដល់ការអប់រំដល់កុមារកាន់តែច្រើនថែមទៀត។

៣.វេជ្ជបណ្ឌិត បេអាត រីច្ឆន័រ ស្ថាបនិកមន្ទីរពេទ្យគន្ធបុប្ផា

លោកវេជ្ជបណ្ឌិត បេអាត រីច្ឆន័រ កើតនៅថ្ងៃទី១៣ ខែមីនា ឆ្នាំ១៩៤៧ នៅប្រទេសស្វ៊ីស។ លោកទទួលបានសញ្ញាបត្រវេជ្ជបណ្ឌិតនៅឆ្នាំ១៩៧៣ ជាមួយនឹងឯកទេសព្យាបាលកុមារ នៅមន្ទីរពេទ្យកុមារ នៅទីក្រុងហ្ស៊ុយរិច ប្រទេសស្វ៊ីស។

នៅឆ្នាំ១៩៧៤ កាកបាទក្រហមស្វ៊ីស បានបញ្ជូនលោកមកធ្វើការនៅមន្ទីរពេទ្យគន្ធបុប្ផា រាជធានីភ្នំពេញ។ ក្រោយមកដោយស្ថានភាពនៃរបបខ្មែរក្រហម លោក រីច្ឆន័រ ក៍បង្ខំចិត្តត្រឡប់ទៅប្រទេសស្វ៊ីសវិញ នៅឆ្នាំ១៩៧៥។

នៅឆ្នាំ១៩៩២ វេជ្ជបណ្ឌិត បេអាត រីច្ឆន័រ បានសម្រេចវិលត្រឡប់មកប្រទេសកម្ពុជាវិញ ហើយបានកសាងឡើងវិញ និងពង្រីកមន្ទីរពេទ្យគន្ធបុប្ផា ចាប់តាំងពីពេលនោះមកដល់បច្ចុប្បន្ន។

ចាប់ពីឆ្នាំ១៩៩២មក វេជ្ជបណ្ឌិត រីច្ឆន័រ បានបង្កើតនិងដំណើរការមន្ទីរពេទ្យចំនួន៥ នៅរាជធានីភ្នំពេញ និងនៅខេត្តសៀមរាប។ ដោយក្នុងនោះ រាជធានីភ្នំពេញ មានមន្ទីរពេទ្យគន្ធបុប្ផា ចំនួន ៤ គឺគន្ធបុប្ផា ១ កសាងនៅឆ្នាំ១៩៩២ គន្ធបុប្ផា ២ កសាងនៅឆ្នាំ១៩៩៦ គន្ធបុប្ផា ៣ កសាងនៅឆ្នាំ២០០៥ និង គន្ធបុប្ផា ៤ កសាងនៅឆ្នាំ២០០៧។ នឹងនៅខេត្តសៀមរាប លោកវេជ្ជបណ្ឌិត បានកសាងនិងដំណើរការមន្ទីរពេទ្យជយវរ្ម័ន ទី៧ ដែលមន្ទីរពេទ្យមួយនេះកសាងនៅឆ្នាំ១៩៩៩មកម្លេះ។

តាមរបាយការណ៍ពីទំព័រហ្វេសបុក Dr. Beat Richner បានឲ្យដឹងថា ព័ត៌មានពិតនៃតួលេខអ្នកជំងឺ ក្នុងខែវិច្ឆិកា ឆ្នាំ២០២០ នៅមន្ទីរពេទ្យគន្ធបុប្ផាទាំងប្រាំ មានដូចខាងក្រោម៖
១.កុមារមានជំងឺ ចំនួន ៥៣ ៥២៩នាក់បានទទួលការពិនិត្យពិគ្រោះព្យាបាលនៅផ្នែកពិគ្រោះជំងឺក្រៅ (53,529 outpatients)
២.កុមារមានជំងឺធ្ងន់ធ្ងរ ចំនួន ១០ ៨៩០ នាក់ត្រូវបានដាក់ឲ្យសម្រាកព្យាបាលនៅក្នុងមន្ទីរពេទ្យ (10,890 admissions)
៣.កុមារមានជំងឺគ្រិនឈាមធ្ងន់ចំនួន ៣១២នាក់ បានសម្រាកព្យាបាលនៅក្នុងមន្ទីរពេទ្យ។ កុមារចំនួន ៨៦ នាក់ មានជំងឺគ្រុនឈីក
៤.កុមារចំនួន ២ ៤៣៦នាក់បានទទួលការវះកាត់ព្យាបាល
៥.កុមារមានជំងឺបេះដូងពីកំណើត ចំនួន ៩០នាក់បានទទួលការវះកាត់បេះដូង នៅមន្ទីរសម្ភពនៃមន្ទីរពេទ្យជ័យវរ័្មនទី៧(គន្ធបុប្ផាទី៣)
៦.ស្ត្រីមានផ្ទៃពោះចំនួន ១២ ១២៣ នាក់បានពិនិត្យតាមដានផ្ទៃពោះ
៧.ស្ត្រីសម្រាលកូនមានចំនួន២ ១៩៨នាក់
សូមបញ្ជាក់ផងថា រាល់ការព្យាបាលទាំងអស់គឺឥតគិតថ្លៃ សម្រាប់គ្រប់ៗគ្នា ដោយគ្មានការរើសអើង។

៤.លោក គ្រីស្យង់ ហ្គោកឺឡាំង ដេប៉ាលីយ៉ែរ ស្ថាបនិកអង្គការដើម្បីភាពញញឹមនៃកុមារ

លោក គ្រីស្យង់ ហ្គោកឺឡាំង ដេប៉ាលីយ៉ែរ គឺជាជនជាតិបារាំង ដែលបានបង្កើតអង្គការដើម្បីភាពញញឹមនៃកុមារ PSE ជាមួយភរិយា លោកស្រី ម៉ារីហ្វ្រង់ ដេប៉ាលីយ៉ែរ តាំងពីឆ្នាំ១៩៩៥។

តាមរយៈបេសកម្មនិងកម្មវិធីមនុស្សធម៌របស់អង្គការ PSE លោក គ្រីស្យង់ ហ្គោកឺឡាំង បានជួយកុមារកម្ពុជារាប់ពាន់នាក់ ឲ្យចាកចេញពីគំនរសំរាមស្ទឹងមានជ័យ និងជួយកុមារទាំងនោះឲ្យទទួលបានការសិក្សា ការផ្តល់អាហារ និងការស្នាក់នៅសមរម្យ ព្រមទាំងទទួលការបណ្តុះបណ្តាលវិជ្ជាជីវៈ។

លោក គ្រីស្យង់ ហ្គោកឺឡាំង ដេប៉ាលីយ៉ែរ ត្រូវ​បាន​​ព្រះមហាក្សត្រព្រះរាជទាន​សញ្ជាតិ​ខ្មែរ​ដល់​លោក និង​ភរិយា​នៅ​ឆ្នាំ​២០០២ និង​គ្រឿង​ឥស្សរិយយស និង​ព្រះរាជ​អំណោយ​ជា​វត្ថុ​អនុស្សាវរីយ៍​មួយ​ចំនួន​ទៀត​ពី​ព្រះមហាក្សត្រ ទាំង​ពី​ព្រះបាទ​នរោត្តម សីហនុ និង​ព្រះបាទ បរមនាថ នរោត្តម សីហមុនី។

លោក គ្រីស្យង់ ហ្គោកឺឡាំង ដេប៉ាលីយ៉ែរ និង​ភរិយា ក៏​ធ្លាប់​ទទួល​ជ័យលាភី​ពាន​រង្វាន់​វីរបុរស​មនុស្សធម៌​លំដាប់​សហភាព​អឺរ៉ុប នៅ​ឆ្នាំ​២០១៤ និង​មេដាយ​សិទ្ធិ​មនុស្ស​ពី​ប្រទេស​បារាំងផង​ដែរ។

មានយុវជន​ដែល​ជា​អតីត​កុមារ ប៉េ.អេស.អឺ ជាង ៤​ពាន់​នាក់​បាន​បញ្ចប់​ការ​សិក្សា ហើយ​ទទួល​បាន​ការងារ​នៅ​តាម​ក្រុមហ៊ុន និង​ស្ថាប័ន​ផ្សេងៗ។ ចំណែក​ឯ​កុមារ និង​យុវជន​ជិត ៧​ពាន់​នាក់​ទៀត ពួក​គេ​កំពុង​តែ​ទទួល​ការ​ថែទាំ និង​ទទួល​ការ​សិក្សា​ពី​អង្គការ ប៉េ.អេស.អឺ៕

The post ជនបរទេសល្បីឈ្មោះ ៤រូប ដែលពលរដ្ឋខ្មែរចងចាំគ្មានថ្ងៃបំភ្លេច appeared first on .

សូមបញ្ជាក់ផងដែរថា វីរជនបរទេសទាំងពីររូបនេះ បានទទួលមរណភាពហើយ តែពលរដ្ឋខ្មែរនៅចងចាំ និងកោតសរសើរមិនដាច់ពីមាត់ពីភាពលះបង់គ្រប់យ៉ាងរបស់ពួកគាត់។ តោះមកដឹងពីបុគ្គលពីររូបដូចខាងក្រោម៖

១) ប្រវត្តិសង្ខេបវីរបុរស Beat Richner ស្ថាបនិកមន្ទីរពេទ្យគន្ធបុប្ផា

លោកវេជ្ជបណ្ឌិត Beat Richner កើតនៅថ្ងៃទី ១៣ ខែមីនា ឆ្នាំ១៩៤៧ នៅក្នុងទីក្រុងដ៏ធំបំផុតឈ្មោះ Zurich នៃប្រទេសស្វីស។ លោកទទួលបានសញ្ញាបត្រពេទ្យនៅឆ្នាំ១៩៧៣ ជំនាញផ្នែកថែទាំកុមារនៅមន្ទីរពេទ្យកុមារទីក្រុង Zurich។ បន្ទាប់មកទៀត លោកវេជ្ជបណ្ឌិតបានធ្វើការនៅកាកបាទក្រហមស្វីស ក្រោយមកលោកត្រូវបានគេបញ្ជូនមកកម្ពុជា ដើម្បីធ្វើការនៅក្នុងមន្ទីរពេទ្យគន្ធបុប្ផានៅឆ្នាំ១៩៧៤ និងឆ្នាំ១៩៧៥។

កាលដើមឡើយមន្ទីរពេទ្យនេះមានឈ្មោះថា មន្ទីរពេទ្យសម្តេចនរោត្ដមគន្ធបុប្ផា (១៩៤៨-១៩៥២) ដែលជាឈ្មោះបុត្រីរបស់ព្រះមហាក្សត្រនរោត្តមសីហនុ ដែលបានស្លាប់ទាំងវ័យក្មេង។

នៅពេលរបបប៉ុលពតចូលមកដល់ លោកវេជ្ជបណ្ឌិតបានត្រឡប់ទៅប្រទេសស្វីសវិញ ដើម្បីបន្តការងារនៅក្នុងមន្ទីរពេទ្យដដែលរបស់លោកទៀត។ ក្រៅតែពីជំនាញខាងពេទ្យ លោកវេជ្ជបណ្ឌិតក៏ចាប់អារម្មណ៍លើតន្ត្រីផងដែរ ដូចនេះ លោកវេជ្ជបណ្ឌិតបានហាត់លេងតន្ត្រីផ្នែកវីយូឡុង។ លោកវេជ្ជបណ្ឌិតក៏បាននិពន្ធ និងបោះពុម្ភសៀវភៅតន្រ្តីសម្រាប់កុមារផងដែរដែលមានឈ្មោះថា “Beatocello”។ គួរបញ្ជាក់ផងដែរថា លោកវេជ្ជបណ្ឌិត បានទៅសំដែងនៅប្រទេសជាច្រើនពីផ្នែកតន្រ្តីរបស់លោកផងដែរ។

នៅខែធ្នូ ឆ្នាំ១៩៩១ លោកវេជ្ជបណ្ឌិតបានត្រឡប់មកកម្ពុជាវិញ ក្នុងកំឡុងពេលដែលកម្ពុជានៅមានជម្លោះជាមួយខ្មែរក្រហម និងវៀតណាមនៅឡើយ។ ក្នុងពេលនោះ នាយករដ្ឋមន្រ្តីខ្មែរបានស្នើសុំឱ្យលោកបើកមន្ទីរពេទ្យ និងសាងសង់ឡើងវិញ ដើម្បីបន្តការងារជួយកុមារកម្ពុជាទៀត។ នៅខែមីនា ឆ្នាំ១៩៩២ លោកវេជ្ជបណ្ឌិតបានបង្កើតមូលនិធិ Zurich ក្នុងប្រទេសស្វី រួចត្រឡប់មកសាងសង់មន្ទីរពេទ្យគន្ធបុប្ផាឡើងវិញនៅកម្ពុជា  ដូចនេះ មន្ទីរពេទ្យគន្ធបុប្ផា ត្រូវបានបង្កើតឡើងជាថ្មីនៅឆ្នាំ១៩៩២។ ចាប់ពីពេលនោះមក មន្ទីរពេទ្យគន្ធបុប្ផា ត្រូវបានពង្រីកខ្លួនចំនួន ៥សាខា។

សូមបញ្ជាក់ផងដែរថា មន្ទីរពេទ្យគន្ធបុប្ផា មានចំនួន ៥ទីតាំង ដែលមន្ទីរពេទ្យគន្ធបុប្ផាទី១-២ (មន្ទីរពេទ្យគន្ធបុប្ផាទី ២ ត្រូវបានសម្ពោធនៅថ្ងៃទី ១២ ខែតុលា ឆ្នាំ១៩៩៦) នៅទីក្រុងភ្នំពេញ រីឯគន្ធបុប្ផាទី៣ ស្ថិតនៅខេត្តសៀមរាបនៅឆ្នាំ១៩៩៨។ មន្ទីរពទ្យគន្ធបុប្ផាទី ៤ ត្រូវបានសាងសង់ឡើងនៅខែធ្នូ ឆ្នាំ២០០៥ និងមន្ទីរពេទ្យទី ៥ ត្រូវបានសាងសង់ ដោយបង្កើតឡើងនៅខែធ្នូ ឆ្នាំ២០០៧។

ក្នុងរយៈពេល ២៣ ឆ្នាំចុងក្រោយនេះមន្ទីរពេទ្យគន្ធបុប្ផា បានព្យាបាលអ្នកជំងឺសំរាកពេទ្យចំនួន ១៣ លាននាក់ និងកុមារដែលមានជំងឺធ្ងន់ចំនួន ១,៥៦ លាននាក់ដែលត្រូវការការព្យាបាលនៅមន្ទីរពេទ្យ។ តែគួរឱ្យសោកសៅបំផុត ដែលវីរបុរស Beat Richner បានទទួលមរណភាពកាលពីពេលថ្មីៗនេះ។

២) លោក Christian ស្ថាបនិក​អង្គការ PSE (POUR UN SOURIRSD’ENFANT)

ក្នុង​ឆ្នាំ​ ១៩៩៥ Christian និង Marie-France des Pallières បាន​មក​បំពេញ​បេសកកម្ម​មនុស្ស​ធម៌​នៅ​ប្រទេស​កម្ពុជា ក្រោយ​ពេល​ដែល​អ្នក​ទាំង​ពីរ​បាន​ចូលនិវត្តន៍​នៅ​ប្រទេស​បារាំង​។ ប៉ុន្តែ​មួយ​ថ្ងៃ​មុន​ពេល​អ្នក​ទាំង​ពីរ​ចេញ​ទៅ​មាន​ក្មេង​ប្រុស​តូច​គួរ​ឱ្យ​អាណិត​ម្នាក់​នៅ​តាម​ដង​ផ្លូវ​បាន​បង្ហាញ​ប្រាប់​ពី​កន្លែង​ដែល​គាត់​រស់​នៅ​។ នេះ​ជា​អ្វី​ដែល​អ្នក​ទាំង​ពីរ​បាន​ឃើញ​កន្លែង​ចាក់​សំរាម​ដ៏​សំខាន់​នៅ​ជាយ​ក្រុង​រាជធានីភ្នំពេញ ហើយ​ក៏​ឃើញ​កុមារ​កម្ពុជា​ច្រើន​កំពុង​រស់​នៅ​គួរ​ឲ្យ​អាសូរ។

លោក​ Christian និង​ភរិយា​ Marie​មាន​ការ​តក់ស្លុត​យ៉ាង​ខ្លាំង​ចំពោះ​អ្វី​ដែល​បាន​ឃើញ​ហើយ​ក៏​ផុស​គំនិត​មួយ​គិត​ថា «អ្នក​មិន​អាច​មើល​ឃើញ​រឿង​បែប​នេះ​ហើយ​បន្ត​រស់​នៅ​យ៉ាង​មាន​ក្ដី​សុខ ​បែប​នេះ​បាន​ទៀត​ទេ»។

ក្រោយ​មក​ពីរ​នាក់​ប្ដី​ប្រពន្ធ​ខាង​លើ​ក៏​បាន​លះបង់​រឿង​គ្រប់​យ៉ាង​ទាំង​អស់​ ដែល​នៅ​ពី​ក្រោយ​ខ្នង ហើយ​ចាប់​ផ្ដើម​ជីវិត​ថ្មី​មួយ​នៅ​រាជធានី​ភ្នំពេញ ក្នុង​ក្ដី​សង្ឃឹម​មួយ​ថា​នឹង​មិន​ឲ្យ​ស្ថាន​ភាព​បែប​នេះ​កើត​ឡើង​ចំពោះ​កុមារ​កម្ពុជា​ទៀត​ទេ។ បន្ទាប់​មក​អ្នក​ទាំង​ពីរ​បាន​យក​ប្រាក់​កាស​សល់​ពី​ការ​សន្សំ​ទិញ​អាហារ​ឆ្ងាញ់ៗ និង​ចាប់​ផ្ដើម​ផ្ដល់​ជំនួយ​ជា​លើក​ដំបូង​ដល់​កុមារ​នៅ​កន្លែង​ចាក់​សំរាម។

ក្នុង​ឆ្នាំ១៩៩៦ លោក​ Christian និង​ភរិយា​ ចាប់​ផ្ដើម​ជួល​អគារ​មួយ និង​ផ្ដល់​កន្លែង​ស្នាក់​នៅ​ដល់​កុមារ​តូច​ៗ​ចំនួន 60 នាក់។ រហូត​មក​ដល់​បច្ចុប្បន្ន​នេះ​មាន​សិស្ស​ជាង ៧០០០នាក់ មាន​អាយុ​ពី៦ ដល់ ២០ឆ្នាំ​ត្រូវ​បាន​ចុះ​ឈ្មោះ​ចូល​រៀន​នៅ​ក្នុង​សាលា PSE ។ នេះ​បើ​តាម​គេហទំព័រ​ផ្លូវ​ការ​របស់​សាលា​មួយ​នេះ។

PSE គឺ​កើត​ឡើង​ចេញ​ពី​បេះដូង និង​មនោសញ្ចេតនា​ មិន​អាច​កាត់​ថ្លៃ​បាន​របស់​ប្ដីប្រពន្ធ​ជនជាតិ​បារាំង​មួយ​គូ​នេះ។ អ្នក​ទាំង​ពីរ​បាន​រៀបការ​រយៈពេល​ជាង ៥០​ឆ្នាំ​មក​ហើយ និង​មាន​កូន​ពេញ​វ័យ​ចំនួន​បួន​នាក់។ ប៉ុន្តែ​គួរ​ឱ្យ​សោកស្ដាយ​លោក​ក​Christian បាន​ស្លាប់​បាត់បង់​ជីវិត​ទៅ​ហើយ​ដោយ​ជរាពាធ​។

សាលា​PSE​ គឺ​ជា​អនុស្សាវរីយ៍​២០ឆ្នាំ​ចុង​ក្រោយ​របស់អ្នកទាំងពីរ ជំនួស​ឱ្យ​ការ​ចូល​និវត្តន៍​ដ៏​សុខសាន្ត​នៅ​បារាំង៕

ប្រភព: Den-Sharing

The post មកស្គាល់ បរទេសពីររូប សុខចិត្តលះបង់គ្រប់យ៉ាង រួមទាំងបានបូជាជីវិត ដើម្បីជួយពលរដ្ឋខ្មែរ appeared first on .