មហាសេដ្ឋីកាន់សញ្ជាតិពីរ ទិញផ្ទះពីរកន្លែងជាប់គ្នានៅតំបន់អ្នកមាន Beverly Hills តម្លៃសរុបជាង ៧០ លានដុល្លារ

ឧកញ៉ាសំពៅ — Thu, 13 Jan 2022 04:43:00 +0000

ឧកញ៉ាញ៉ូវសន៍បានចុះផ្សាយមួយលេខទាក់ទងនឹងតម្លៃផ្ទះនៅតំបន់ Beverly Hills ដែលជាទីតាំងពេញនិយមមួយសម្រាប់បុគ្គលមានទ្រព្យសម្បត្តិកប់ក្ដោង និងហ៊ានជះលុយខ្ទង់លានៗដុល្លារទៅលើការទិញលំនៅឋានមួយខ្នង។

ជាក់ស្ដែង កាលពីប៉ុន្មានខែមុនមហាសេដ្ឋី Nicolas Berggruen ទើបនឹងសម្រេចទិញផ្ទះមួយខ្នងនៅតំបន់អ្នកមាននេះ ក្នុងតម្លៃដល់ទៅ ៦៣ លានដុល្លារឯណោះ។ ស្រាប់តែថ្មីៗនេះមានព័ត៌មានថា លោកទើបនឹងសម្រេចទិញផ្ទះមួយខ្នងទៀតនៅទីតាំងជាមួយគ្នាក្នុងតម្លៃ ១២,៣ លានដុល្លារ។

ផ្ទះទី ២ ដែលវិនិយោគិនវ័យ ៦០ ឆ្នាំទើបនឹងទិញនោះ គឺនៅជាប់របងនឹងភូមិគ្រឹះតម្លៃជាង ៦០ លានដុល្លាររបស់លោកតែម្ដង។

ថ្វីបើធៀបនឹងផ្ទះតម្លៃជាង ៦០ លានដុល្លារ វាមានទំហំតូចជាងមែនពិត តែផ្ទះមួយខ្នងនេះមានបន្ទប់គេង ៧ បន្ទប់ ផ្ទះបាយដ៏ធំមួយ អាងហែលទឹកមួយ និងទីធ្លាធំទូលាយ រួមជាមួយនឹងគ្រឿងសង្ហារិមស៊ីវិល័យជាច្រើនផងដែរ។

បញ្ជាក់ដែរថា លោក Nicolas គឺជាវិនិយោគិន និងជាសប្បុរសជនមួយរូបដែលមានដើមកំណើតនៅទីក្រុងប៉ារីស ប្រទេសបារាំង ប៉ុន្តែលោកបែរជាមានសញ្ជាតិ ២ គឺអាមេរិកាំង និងអាល្លឺម៉ង់ទៅវិញ។ បច្ចុប្បន្ន ទ្រព្យសម្បត្តិរបស់មហាសេដ្ឋីវ័យ ៦០ ឆ្នាំគឺមានប្រមាណ ១,៧ ពាន់លានដុល្លារ៕

ប្រភព: patch

The post មហាសេដ្ឋីកាន់សញ្ជាតិពីរ ទិញផ្ទះពីរកន្លែងជាប់គ្នានៅតំបន់អ្នកមាន Beverly Hills តម្លៃសរុបជាង ៧០ លានដុល្លារ appeared first on .

ស៊ើបសួរចុះឡើង ទើបដឹងម្ចាស់វីឡាមួយខ្នងតម្លៃជិត ២០ លានដុល្លារ នៅ Beverly Hills ជាចៅប្រុសស្ថាបនិកក្រុមហ៊ុន Samsung

ឧកញ៉ាសំពៅ — Thu, 28 Oct 2021 08:52:02 +0000

តំបន់ Beverly Hills គឺអាចនិយាយបានថា ជាតំបន់រស់នៅរបស់អភិជននៅសហរដ្ឋអាមេរិក ដ្បិតនៅទីនោះ គឺប្រមូលផ្ដុំទៅដោយបុគ្គលមានទ្រព្យរាប់លានដុល្លារ ហើយបើនិយាយពីតម្លៃផ្ទះវិញ គឺសុទ្ធតែខ្ទង់លានដុល្លារតែម្ដង។

ថ្មីៗនេះ ចៅប្រុសរបស់ស្ថាបនិកក្រុមហ៊ុនបច្ចេកវិទ្យាធំបំផុតមួយលើលោក Samsung គឺលោក Chung Yong-jin បានទិញវីឡាមួយខ្នងនៅ Beverly Hills ជាមួយតម្លៃប្រមាណ ១៩,២ លានដុល្លារអាមេរិក ជាមួយទំហំ ១ ០២២ ម៉ែត្រការ៉េ។

អចលនទ្រព្យដ៏ស្កឹមស្កៃមួយនេះ គឺត្រូវបានគេដឹងថា អ្នកស្នងមរតកជំនាន់ទី ៣ របស់ Samsung បានទិញពីអ្នកជំនួញឥណ្ឌូណេស៊ី Aan Sinanta ដែលចំណាយប្រមាណ ១២,៦ លានដុល្លារទិញកាលពីឆ្នាំ ២០១២។

បើតាមការឲ្យដឹងពី Realtor.com វីឡាមួយខ្នងនេះយកលំនាំសាងសង់បែប Tuscan ដែលមានច្រកចូលធំទូលាយ និងពិដានដ៏ស្រស់ស្អាតអមដោយជណ្ដើរឡើងទៅជាន់ខាងលើសងខាង។ មានបន្ទប់ជាច្រើនដូចជា បន្ទប់គេង ៦ បន្ទប់ទឹក ១០ ផ្ទះបាយធំមួយ បន្ទប់ទទួលភ្ញៀវមួយ បន្ទប់ញាំអាហារមួយ បន្ទប់តាំងស្រា បារផ្ទាល់ខ្លួន បន្ទប់ចម្រៀង កន្លែងហាត់ប្រាណ និងសោណា។

បញ្ជាក់ដែរថា លោក Chung គឺជាកូនប្រុសមួយគ្រាប់គត់របស់អ្នកស្រី Lee Myung-hee ដែលជាកូនស្រីពៅរបស់ស្ថាបនិក Samsung លោក Lee Byung-chul។ បុរសមានវ័យ ៥៣ ឆ្នាំរូបនេះបច្ចុប្បន្នគឺជា អនុប្រធាន និង CEO នៃក្រុមហ៊ុន Shinsegae ហើយបើនិយាយពីទំហំទ្រព្យសម្បត្តិវិញ គឺមានប្រមាណ ១,៧ ពាន់លានដុល្លារអាមេរិក បើផ្អែកតាមរបាយការណ៍ពី Forbes៕

ប្រភព: channelnewsasia

The post ស៊ើបសួរចុះឡើង ទើបដឹងម្ចាស់វីឡាមួយខ្នងតម្លៃជិត ២០ លានដុល្លារ នៅ Beverly Hills ជាចៅប្រុសស្ថាបនិកក្រុមហ៊ុន Samsung appeared first on .